علل .....ليه الناس مظهرها أصبح مبهدل

[Morial]

لما بمشي في الشارع أو بركب المترو بلاحظ حاجة غريبة جدا

مش أن نسبة كبيرة من الناس أصبح مظهرها مبهدل وبس

لاء ده أصبح العادي الغير عادي دلوقتي أن الواحد يبقي مهندم في مظهره

تلاقي الناس بتبصله ومستغربه ومعتبراه كائن غريب أو مش من واقعهم

العادي بقي إن الواحد يخرج بحذاء مش متورنش وعليه طبقات من التراب

والغير عادي انك تشوف واحد بحذاء بيلمع من النضافة

العادي ان ناس بتلبس هدومها من غير مكوه وأحيانا كمان مبقعة أو متًربة

والغير عادي إن يعدي عليك واحد ببدلة مثلا ومعظم الناس هيعتقدوا انه لازم رايح مناسبة مهمة أو ان شغله بيفرض عليه يلبس رسمي

أنا طبعا مش بقصد نوعية اللبس أذا كان غالي وللا رخيص

لاء أنا أقصد الاهتمام بالهندام أيا كانت نوعية اللبس

بمعني

الاهتمام بنضافة الملابس وكيها وانها تكون متناسقة

ده غير اني كتيرممكن اشوف واحدة لابسة بلوزة زرارها وقع تقوم تشبكها بدبوس

وحتي في اوساط الشباب اللي تكاد تكون مسؤلياتهم مقصورة علي انفسهم لاحظت ايضا ان كتير منهم مكبر دماغة

ليه الناس مبقاش عندها حس جمالي ؟

ليه الناس مبقتش بتخجل من البهدلة في المظهر؟

ليه اللامبالاة دي وكأن حسن المظهر أصبح رفاهية أو شيء ثانوي

يا تري علشان ظروفنا الاقتصادية كبلد نامي وسوء احوال المعيشة والغلاء ؟

طيب مال ده ومال الهندام ما انا ممكن يكون لبسي متواضع لكن منسق ونضيف ومكوي

ام ان ده اصبح سلوك شبه جماعي متفق عليه ضمنا إن الطبيعي هو المظهر المبهدل وده مبيلفتش نظر الناس

إنما الشخص المهندم هو اللي بيستوقف نظرهم

لما بشوف الافلام العربي القديمة بترحم علي الزمن ده اللي كان مٌني عيني اعيشه لما كانت الناس جميلة في كل شيء جوهرا ومظهرا

تم تعديل 5 مارس 2010 بواسطة منال شوقي

[fatfouta]

ده الديرتى لوك يا حبيبتى

متاخديش فى بالك

[Rock]

انا معاكي في نفس النقطة لكن هي الظاهرة مش باظبط عشان فقداننا للحس الجمالي و اللي انا معاكي في انة احنا فقدناة بس دة من زمان

لكن النقطة زي ما حضرتك اسلفتي نظراا للمستوي الاقتصادي و ازيد كمان انة انا مش هالبس كويس و انا محبط و البس لية و لمين ( علي فقر اية يعني...جاتنا ستين نيلة في حظنا الهباب ) لو مش متخرج هيبقي خايف يحصلة زي اللي حصل للي اتخرجوا و لو متخرج مخنوق من البحث عن شغلانة بمؤهلة او من غير و لو في شغانة هيبقي حاسس بالظلم من المرتب المتدني و هكذا و هكذا

انا اللي يخليني البس كويس لمل يكون مرتبي في المستشفي المبجلو مش لاحق 500 لحلوح

الكلام دة فكرني ببونميرسي احد شخصيات رائعة فيكتور هوجو ( البؤساء ) اللي كان بيهتم جدا بلبسة و اهم حاجة عندو الحذاء و ما حسش بالفقر :ninja: الا لما لقي حذاؤة اتقطع

يالا طولها زي عرضها

[fatfouta]

عاوزة اقولك حاجة كمان يا منال

النظافة او الشكل المهندم ده مالوش دعوة خالص بالمستوى الاقتصادى معلش........دى الصابونة بجنيه

ده يبقى طبع يا بنتى والله لان فيه ناس بتبقى مقتدرة جداااااا لكن مالهاش دعوة بموضوع النظافة ولا المظهر الكويس ويقولك يا سيدى كبر دماغك

[justme]

معلش في رأيي ده انعكاس للحالة النفسية وليس الاقتصادية

يعني ده تعبير عن القرف ناتج عن اللاشعور

حضرتك اسئلي اي حد هيقعد يشتكيلك من كل حاجة معظم الناس بتشتكي

تم تعديل 5 مارس 2010 بواسطة justme

[Morial]

معلش في رأيي ده انعكاس للحالة النفسية وليس الاقتصادية

يعني ده تعبير عن القرف ناتج عن اللاشعور

حضرتك اسئلي اي حد هيقعد يشتكيلك من كل حاجة معظم الناس بتشتكي

انا مع حضرتك ان معظم الناس بتشتكي من ضغوط كتير وانا واحدة من الناس دول

لكن حضرتك مش معايا برده ان دي حاجة ودي حاجة ؟

بل علي العكس أنا لما اكون مهمومة بحاجات كتير وكمان مظهري مش ولا بد متهيألي ان المفروض دا هيؤدي لزيادة همومي وضيقي

والعكس لما يكون الواحد مظهره كويس دا هيساهم في رفع معنوياته وكمان ممكن يغير من مجري حياته الي الافضل

يعني علي سبيل المثال ممكن اتنين عندهم نفس الكفاءة في العمل ونفس الخبرة ويكون واحد فيهم مظهره كويس والتاني مش ولابد والاتنين يترشحوا لترقية تفتكر حضرتك مين اللي موقفه يكون اقوي ؟

العين بفطرتها مياله لأنها تحب اي منظر جميل وتنفر من الفوضي

[محمد الششتاوي]

اعتقد لو حضرتك خدتي بالك من الناس اللي باللي شكل ده ( اللي مهملين في نفسهم )

أكيد هتلاقي الدبلة في ايديهم الشمال

واللي الدبلة في ايده الشمال ومهتم بشكله وبلبسه - أكيد عايش حياة زوجية سعيدة

وأكيد اللي لسه مالبسش دبله في الشمال أغلبهم مهتمين بشكلهم

لكن اللي الدبلة لابسها في اليمين- اكيد بيبقى خارج المنافسة

باختصار

المظهر بيعتمد بشكل أساسي على شكل العلاقة بالحنس الاخر من وجهة نظري

تم تعديل 5 مارس 2010 بواسطة محمد الششتاوي

[ذهبية]

لاسباب مختلفة من وجهة نظرى يمكن اولهم عصر السرعة الىل احنا فية يعنى يقولك انا لسة هاكوى و اغسل

ما هو كدة كدة هينكسر من المواصلات المقرفة

البس احلى حاجة لية ما التراب هبهدلة يا استاذى الفاضلة دة الموظفين عاملين لبس معين لشغل الحكومة الصبح

دة بتاع البهدلة و طلعان العين فى المواصلات

يقولك هو انا حمل ان القميص ينقطع او البنطلون يتخرم اشترى تانى منين تلاقى كل واحد هو هو نفس الطقم كل يوم

فية ناس تانية بقى يقولك البس انا حلو فى وسط ناس تعبانة ماديا علشان اتحسد...... لالا انا هاشز عن القاعدة و العين هتبقى عليا فبالتالى بيقلدهم علشان الحسد

و فية ناس تانية بجد بجد مطحونة ليل و نهار فى وظيفة الصبح و باليل

و مزاجها مهبب يعنى بتقوم كل يوم الصبح بضرب ......

تفتكرى يعنى هيبقى لة مزاج يلبس و يروق على مزاجة

[الباشمهندس ياسر]

الاكتئاب

فقد الرغبة ف الحياة او ف الاستمتاع بها

ترتيب اولويات اهمل الهندمة

احيانا ... الفقر

[justme]

الاخت منال

لو حضرتك قرتي الكلام كويس ان ده انعكاس لحالة داخلية

موضوع الترقية والحاجات دي ده للي عنده شغلانه محترمه مش موظف او عامل على باب الله اللي في المواصلات العامة

روحي اي مصلحة حكومية هتلاقي ان اللبس بتاعهم out dated يعني بالبلدي بطل بكسر الباء

ليه

مشاكل الحياة وهمومها كترت ولقمة العيش والبيت والعيال وووووو

اما الاناس الشيك دول لازم يكون فيه دافع لكل فعل ولما نطبق ده هتلاقيهم ناجحين وسعداء على الاقل في شيء في حياتهم او عندهم طموح ولذلك اللبس انعكاس لده

اما الشخص اللي عايش وخلاص ومقتنع انها خلصت هتلاقيه مش فارقة معاه

ياريت تروحي اي مصلحة حكومية وانتي تعرفي قصدي كويس

[myusername]

طبعا المظهر بيدل علي شخصية البني ادم وبيدي لمحة عن طريقة تفكيره واسلوب حياته

تم تعديل 6 مارس 2010 بواسطة myusername

[Morial]

انا فاكرة لما والدي كان لسه في الخدمة -حاليا علي المعاش -كان عنده مهمة شبه مقدسة لازم يقوم بيها قبل ما ينام وهي ورنشة حذاءه وتلميعه وكان بيقوم بالعملية دي وكأنها بروسيدجر له تكنيك خاص وكنت احب اراقبه اوي واشوف اذاي حذاءه يتحول كل يوم لاخر جديد لانج

ولما كبرت وكنت أحب اصالحه كنت اورنشله الجذمة في الخفاء وأسيبهاله تحت السرير يجي هو يورنشها يلاقيها بتبرق وكان يفرح ويوافق يصالحني

وافتكر كمان رئيستي في الشغل ودي كانت ست شخصيتها قوية جدا وبتهتم بشغلها بطريقة تجبر اي حد علي احترامها لكن مظهرها كان يجبرالناس علي العكس تماما

ومرة شفتها جاية ببلوزة زرار احد اكمامها واقع وشابكة الكم بدبوس فقلت يمكن صحيت من النوم متأخرة او اولادها لخموها الصبح بمدارسهم

وفضلت استناها تلبس البلوزة دي تاني علشان اشوف الزرار ودي.... ابدا هو هو الدبوس الضخم اللي شبكاه كما لو كان قطعة اكسسوار

وكنت لما اكلمها عيني تسرح تلقائيا وتتنح للدبوس وكنت اخاف تفتكرني قاصدة احرجها علشان ببص علي بلوتها

لكن الغريب في الامر هو انها عمرها ما اتضايقت من اني متابعة الدبوس

تم تعديل 6 مارس 2010 بواسطة منال شوقي

[Morial]

طبعا المظهر بيدل علي شخصية البني ادم وبيدي لمحة عن طريقة تفكيره واسلوب حياته

أنا موافقة علي الكلام دا تمام الموافقة

[عنبو]

بالنسبه للشباب فدى موضه الشاب بجد اهم حاجه يكون اللبس مفيهوش قطع وعلى حسب المستوى المادى بتاع كل واحد

بس ده بيكون على اللبس الكاجوال

لكن اللبس الكلاسيك فده لازم يكون مكوى ومتناسق مع بعضه وله ماشيه معينه والواحد مش بيضطر يلبسه الا اذا كان فيه مناسبه لانه بيحكم الواحد

بالنسبه للناس الكبيره فده له علاقه بحته بالحاله الماديه

بس انا شخصياً بحب اللبس الكاجوال لان الواحد بيكون براحته خالص لكن الكلاسك خنيقه واى شوية تراب او اى حاجه بيظهروا فيه

[أسد]

إنظر إلى شكل العمارات في مصر ..

إنظر إلى مظهر الشوارع ..

إنظر إلى لمسات الجمال في حياتنا ..

لن تجدها ..

هذه هي طبيعة الأمور ...

من زمان .. وليست بأمر جديد ..

الجديد .. هو أن هناك من حانت لهم الفرصة للسفر غلى خارج مصر .. ورأي وقارن .. وعاد بفكر مختلف ..

أو من يشارهد ويقارن .. ويحاول أن يحسن .. ويختلف ..

حتى وإن لم يسافر إلى الخارج

[اغابي]

اهم حاجة الاهتمام بالنظافة الشخصية اولا وكله بعدين حيجي واحدة واحده

البسو هدوم بسيطة - مش مشكلة - مش لازم تبقي هدوم غالية والقصة دي

لكن اهم حاجة الريحة - انا مش بتضايق من حاجة غير الروايح الصعبة دي

ممكن ناس بقابلهم هنا فى الكويت بيبقوا شيك جدا ولابسبن هدوم ماركة عالمية داه بجد بيحصل باستمرار

وللاسف

ريحته مش ...... :blink:

[اغابي]

ممكن اضيف حاجة بالنسبة للوضع فى مصر

الطابع الظاهرى المنتشر للتدين - اهم اسباب المظهر المتبهدل

من لحظة ما ننزل من سلم الطيارة لغاية ما نوصل بيتنا وكل الناس متدينة وبتعرف ربنا

وواضح على ملامح وشهم وشكلهم ولبسهم انهم بتوع صلاه وبس

الناس فاهمة التدين والعلاقة بربنا انك لازم تبقي بايع الدنيا وزاهد فيها وبعيد كل البعد عن الاهتمام بالمظهر

بس داه سبب من الاسباب - لان فيه ناس زي ما قولت فى المداخلة اللى قبل دي شيك جدا ولابسين ماركة سواء الشوز او النضارة الشمسية او البنطلونات والتيشيرتات

داه غير نوع الموبايل وفى الاخر - ريحتك وحشة ؟؟؟

تحياتي للجميع

[Melhakim]

ممكن اضيف حاجة بالنسبة للوضع فى مصر

الطابع الظاهرى المنتشر للتدين - اهم اسباب المظهر المتبهدل

من لحظة ما ننزل من سلم الطيارة لغاية ما نوصل بيتنا وكل الناس متدينة وبتعرف ربنا

وواضح على ملامح وشهم وشكلهم ولبسهم انهم بتوع صلاه وبس

الناس فاهمة التدين والعلاقة بربنا انك لازم تبقي بايع الدنيا وزاهد فيها وبعيد كل البعد عن الاهتمام بالمظهر

بس داه سبب من الاسباب - لان فيه ناس زي ما قولت فى المداخلة اللى قبل دي شيك جدا ولابسين ماركة سواء الشوز او النضارة الشمسية او البنطلونات والتيشيرتات

داه غير نوع الموبايل وفى الاخر - ريحتك وحشة ؟؟؟

تحياتي للجميع

مش فاهم ايه علاقة التدين بالمظهر المتبهدل والغير مهندم

واعتقد اللى حضرتك بتشوفيهم على سلم الطيارة دول الركاب اللى جايين معاكى على نفس الرحلة او طقم الضيافه معتقدش ان فى حد تانى ممكن يكون فى المنطقة دى الا اذا كان فى استقبال شعبى للرحلات اللى جايه من بره

ومين قال ان الناس فاهم ان التدين يعنى بهدلة فى اللبس

انا اعرف ناس متدينه وفى قمة النظافة والشياكه

واعرف ناس تانيه متعلمه تعليم عالى ومعاها ماجستير ولا تفقه شئ فى النظافة

النظافة ملعاش علاقة بالتدين اوغيره النظافة ليها علاقة بالشخص نفسه وتربيته ونشأته وبيئته وحاجات كتير تانيه

[اغابي]

ممكن اضيف حاجة بالنسبة للوضع فى مصر

الطابع الظاهرى المنتشر للتدين - اهم اسباب المظهر المتبهدل

من لحظة ما ننزل من سلم الطيارة لغاية ما نوصل بيتنا وكل الناس متدينة وبتعرف ربنا

وواضح على ملامح وشهم وشكلهم ولبسهم انهم بتوع صلاه وبس

الناس فاهمة التدين والعلاقة بربنا انك لازم تبقي بايع الدنيا وزاهد فيها وبعيد كل البعد عن الاهتمام بالمظهر

بس داه سبب من الاسباب - لان فيه ناس زي ما قولت فى المداخلة اللى قبل دي شيك جدا ولابسين ماركة سواء الشوز او النضارة الشمسية او البنطلونات والتيشيرتات

داه غير نوع الموبايل وفى الاخر - ريحتك وحشة ؟؟؟

تحياتي للجميع

مش فاهم ايه علاقة التدين بالمظهر المتبهدل والغير مهندم

واعتقد اللى حضرتك بتشوفيهم على سلم الطيارة دول الركاب اللى جايين معاكى على نفس الرحلة او طقم الضيافه معتقدش ان فى حد تانى ممكن يكون فى المنطقة دى الا اذا كان فى استقبال شعبى للرحلات اللى جايه من بره

ومين قال ان الناس فاهم ان التدين يعنى بهدلة فى اللبس

انا اعرف ناس متدينه وفى قمة النظافة والشياكه

واعرف ناس تانيه متعلمه تعليم عالى ومعاها ماجستير ولا تفقه شئ فى النظافة

النظافة ملعاش علاقة بالتدين اوغيره النظافة ليها علاقة بالشخص نفسه وتربيته ونشأته وبيئته وحاجات كتير تانيه

ممكن برضوه - وانا قولت ان داه سبب مش اغلب الاسباب

بس دي وجهة نظرى - معلش انا متاكدة من اللى بقولوا - ان داه سبب من الاسباب - دا راي شخصى لك ان تقبله او ترفضه

لك حرية مطلقة وانا احترم راي وحرية الاخرين

تحياتي :blink:

[محمد الششتاوي]

اهم حاجة الاهتمام بالنظافة الشخصية اولا وكله بعدين حيجي واحدة واحده

البسو هدوم بسيطة - مش مشكلة - مش لازم تبقي هدوم غالية والقصة دي

لكن اهم حاجة الريحة - انا مش بتضايق من حاجة غير الروايح الصعبة دي

ممكن ناس بقابلهم هنا فى الكويت بيبقوا شيك جدا ولابسبن هدوم ماركة عالمية داه بجد بيحصل باستمرار

وللاسف

ريحته مش ...... :blink:

الشخص اللي زي كدة عادة بيكون مدخن