جايلي عرض عمل فى نجران هل اوافق

[مهندس سما]

السلام عليكم ورحمة الله

انا مهندس وبشتغل فى الخبر اجمل مدن السعودية ولكن معروض عليا عمل فى شركة الرياض لها مشروع فى نجران بزيادة فى الراتب تصل الي 4000 ريال شهريا وانا محتار ناس كتير خوفتنى من نجران وناس بتقولي مدام فى زيادة كدة اقبل وروح

هل نجران صعبة للدرجة او وحشة

علما باني زوجتى معايا

ارجوكم الرد بسرعة

[saleh hasan]

اهلا بحضرتك

ياريت تقول انت خبرتك كام سنة ومرتبك كام اصلا

لان كونك ليك خبره اصلا في السعودية ورايح مكان جديد يبقي المفروض يبقي اكتر من كده

بالتوفيق ان شاء الله

[محمد الششتاوي]

الزيادة اكيد مغرية

لكن الزيادة دي ماتكونش ليها قيمة بدون استقرار

........

لو شاغلك المكان

انا شخصيا اشتغلت في الرياض ودلوقتي في مدينة صغيرة

ولقيت ان العيشة في المدن الصغيرة اجمل بكتير من المدن الكبيرة

خاصة لما تكون معاك الاسرة

[saleh hasan]

واضح اني فهمت غلط معلش

انت تقصد ان المرتب هيزيد 4000 ريال مش كده

[مهندس سما]

واضح اني فهمت غلط معلش

انت تقصد ان المرتب هيزيد 4000 ريال مش كده

فعلا الزيادة فى الراتب 4000 ريال شهريا + سيارة جديدة

هل العمل فى نجران مشكلة

[أسد]

المشكلة الوحيدة في العمل في مثل تلك المناطق ..

هي أنك إذا كنت من القاهرة أو الإسكندرية أو أي من المدن الكبرى ,.. واعتدت على الحياة في مدن كبيرة فسوف تعاني هناك

أيضاً إذا كان لك أبناء في مدارس عالمية .. او في مستوى معين .. فلن تكون أمامك أي خيارات متاحة ..

إذا كان لديك أسرة ووتحب الخروج وتغيير الجو .. فالحياة هناك صعبة .. وجودتها أقل ..

يمكنك السفر بالطائرة والعودة في نفس اليوم .. لترى الحياة على طبيعتها .. خاصة وأنت في السعودية .. ووقتها يمكنك إتخاذ قرارك بسهولة

[رعد]

السلام عليكم اخي الكريم السائل

خد التجربة الشخصية دي

انا اشتغلت في نجران سنتين مع كفيل سئ وسيبتة ورحت الدمام بقالي سنة

نجران مش وحشة قوي بس تعتبر قرية بالنسبة للمدن الرئيسية واهلها بدو وشيعة اسماعيلية ( اليامي ) بس طالما انت جاي للعمل في شركة او فرعها فمش هتحس باهلها لانك في فرع زي اي فرع معايا؟؟

هتحس بس بالفرق في المعيشة هي بلد صغيرة جدا عبارة عن شارع رئيسي واحد بدو جداا بس الاسعار فيها رخيصة جداااااااا اقصي تاكسي بياخد ريال واحد بس ولو مشوار طويل وانت بتركب يقول لك لالالالالا دا بعيد مرة هاخد ريالين ههههههههههههههههههههههه

كلنا معانا عربيات بس دة مثال للتوضيح

فتحت فيها الراية موول تجاري كبير

الميزة بقي ان جوها رااائئئع بل بارد في الشتاء الصيف شوية حر بس حر مصري مش رياضي او دماماي !!!!!!!!!

كلنا طالعين عشان الفلوس

الزيادة مغرية وتستاهل

فمش هتحس قوي

ممكن خميس وجمعة تاخد عيلتك بالعربية وتروح ابها 3.5 ساعة هي مصيف السعودية تغير جو وترجع

بينها وبين جدة ساعة وربع طيران

توكل علي الله وروح زود دخلك

بالمناسبة انا مهندس معماري ولو عاوزيني معاك انا موافق عشان اثبت لك ان دة مش كلام وبس !!!!!!!!!! هههههههههههههه

[saleh hasan]

ربنا يوفقك ويختارلك الخير

استخير ربنا الاول وربنا ييسرلك امورك

انا مش هاقدر افيدك في معلومات عن نجران اكتر من المهندس رعد لانه عاش هناك

انا معلوماتي عنها سماعي انها صغيره وخدماتها قليله

المبلغ يستاهل

وحضرتك اللي تقدر تقرر اذا كان هتفرق معاك البلد ام لا

وانا موافق انا كمان اجي معاك

[عماد حمدي]

مش هقولك غير الإستخارة الإستخارة الإستخارة ..

[mama nona]

انا معرفش نجران تحديدا

ولكنى عشت قبل كده قبلد تانية فالجنوب ( الليث)

شارعين طولى وشارعين عرضى

مكنش فيها خدمات

بلد صغيرة جدا

اغلب ال فيها عمال

يعنى سوبر ماركت واحد على اد حاله

حلاق واحد

مستوصف طبى واحد

مركز حكومى واحد

تمشى فالشارع تكون لوحدك فالاشاارة

ولان البلد صغيرة مكنتش اعرف اخرج لوحدى من البيت

لان الناس هتحفظ شكلى لو خرجت

لو حبيت تتفسح كان لازم انزل جدة مثلا

اتخنقت منها ومكنتش قادرة اعيش فيها

ولا حتى بنتى كانت متأقلمة عالجو ده

وقررنا انه لازم نمشى منها باى طريقة

وفعلا مشينا منها على راتب اقل لزوجى

بس فالمقابل نعيش عيشة زى الناس

مش بقول كده لحضرتك علشان ترفض العرض

حضرتك ادرى بنظام حياتك وكمان اسرتك

هى دى العيشة فالبلاد الصغيرة

حياة محدودة

قبل اتخاذ القرار اسأل زوجتك هل تعرف تعيش فالجو ده ولا لا؟

لانك هتخرج وهتشوف ناس وهتغير مكان

هى لا ؟

ولما تحب تخرج يدوب بالعافية هتلاقى مول كده تمشى فيه خطوتين

ربنا يوفقك

[غريب الخبر]

سيدى الفاضل

يجب ان تسال اولا عن طبيعة مكان عملك هناك ؟. هل المشروع داخل المدينة ام فى المناطق الصحراوية المحيطة بنجران ؟

لان هناك عوامل كثيرة يتحدد عليها قرارك . فمثلا لو المشرع بعيدا تماما عن المناطق السكنية وحضرتك متزوج . فاعتقد انه من الممكن انك تبات بره البيت ليلة او اتنين فى بعض الاحوال .

اما لو كان داخل نطاق العمران ( ومساحته قليلة فى نجران ) وكان السكن قريبا .مفيش مشكلة .يمكن هتتعب لو الاول شويه علشان طبيعة البلد صعبة شويه وبالذات انك قاعد فى الخبر .

ودائما تذكر ان المادة احيانا لا تعوض اشياء اخرى مثلا انك تكون بعيدا عن الزوجة والاولاد .او انك تكون غير مستقر نفسيا فى مكانك الجديد .وكثيرا ما تكون البركة فى القليل .

اخى العزيز . يارات تعرف المكان اللى انت رايحه فين بالضبط . وبعدها لك القرار .

دمت بود

ا

[ozoozo]

المشكله في نجران الملل ...الملل....الملل

مفيش مكان تخرجوا فيه غير برضه بنده-زي موضوع بيشه يرضه- او انكم تروحو منطقه الاخدود الاثريه او منطقه السد وطبعا مافيش مطاعم غير هيرفي ومطعم تاني اسمه مارنيز ده اللي فيه عوائل وممكن تخرجوا فيه

اما المدارس فماسمعتش عن مدارس هناك غير المدارس الحكوميه

[Guest الخطيب]

ياعمي إبعد عن الشر وغنيله انت في مكان طيب أحمد الله وخليك مكانك