يا لجنة الحكام...الأهلى بيدفع كام؟

[afiona]

أمال لو ماكانش الأهلويه المصريين أبا عن جد مش المخلطين على أنجليز من يوم ماطلعوا يبقوا برجوازيين أمال مين اللي يبقى برجوازي   

يكفي الأهلي فخرا أنه لم يرأسه يوما ما حيدر باشا عميل الملك ولا عبدالحكيم عامر

تعال يا داروين يا بنى (على رأى س.س) نتكلم شوية عن نشأة الأندية... الزمالك دايما نادى البشوات وعلية القوم و المتعلمين و عشان كده الفرق واضح بين مشجعى الزمالك فى العقلانية و إعطاء كل دى حق حقه و بين التعصب الأهلاوى....

لما علية القوم والطبقة المثقفة و المتعلمة إنضموا للزمالك، عامة الشعب (لفظ دبلوماسى للمكوجية) إنضموا للنادى الأحمر....

كرد فعل ليس إلا لأن مين يسيب مدرسة الفن و الهندسة ?

تم تعديل 13 مارس 2004 بواسطة afiona

[DARWEEN]

وبعدين ياعم داروين ماتش سبين بتاع الكأس ده اللى الزمالك كسبه بجون حسن شحاته كان ماتش الإعادة و كان فى ملعب شبين ولم يتم إذاعة المباراة من أساسه

ما أنا كنت في المدرج وقطع الفانله برضه حتسألني ليه أقولك أن واحد من جيرانا كان بيلعب في شبين ورحت معاه وهو كان فعلا ماتش الإعاده بع شبين ماغسلتهم في أستاد القاهره .... طبعا أنا مرضتش أتكلم على المنيا لأنه عادي أنه تغلب الزمالك ;) wst:: ;) f((:

وبعدين أنت حافظ الحاجات دي أزاي ... غريب أنك تكون زملكاوي يادكتور

بس برضه أنتوا بتنقوا اللي على كيفيكم وتردوا عليه ماتردوا على النادي اللي انشأ مختلط ليمكن الأنجليز من التغلغل في مصر ...

:) mfb: ups: ha) ha) يادكتور ..... أخشى أن تصبح الخيانه يوما ما وجهة نظر

f((: mc: :P

[DARWEEN]

الزمالك دايما نادى البشوات وعلية القوم و المتعلمين و عشان كده الفرق واضح بين مشجعى الزمالك فى العقلانية و إعطاء كل دى حق حقه و بين التعصب الأهلاوى....

:) mfb: ups: ha) ha) wst:: f((:

خير اللهم أجعله خير ..... من أمتى f((: mc:

وفين سعد باشا زغلول .. وطلعت باشا حرب ....

هاتلي أسمين يعادلوهم في الوطنيه في تاريخ الزمالك من يوم ماطلع ........ لحدددددددددددد مرتضى منصور

[se_ Elsyed]

تعالوا نتكلم جد شويه بقى ...

هل يوجد مبرر واحد لما يفعلة لعيبة وجماهير الإسماعيلي بمناسبة وغير مناسبة سوء أفريقيا أو محلياً .. فهل هو مضطهد على جميع المستويات ؟

وحتى لو ما هناك طرق شرعية لأنه ياخد حقه ...

ما عندكوا الاهلي الماتش اللي فات مع النجم الساحلي الحكم الليبي عبد الحكيم الشلماني ضيعوا ومع ذلك لا الجمهور ولا اللعيبة نزلوا كسروا الديا وضبروا الحكم ومع إن الإتحاد العربي وقف الحكم إلا أن الأهلي ماستفدش حاجة ... وعلى فكره الحكم اللي كان في الدور الـ 16 برضوا إتوقف بعد ما ظلم الأهلي ... ومع ذلك الأهلي لم يستفد شيء ...

طب حاجة تاني ماهو بلدية المحلة لسه لابب الإسماعيلي الماتش اللي فات والزمالك بيظبطه كل ماتش رايح جاي ... فده طبعاً بيبقى على قلب الإسماعلاوية زي العسل ...

يا إخواني لازم مجلس الإدارة واللعيبة يبقوا قدوة للجماهير مش الهمجية اللي إحنا بنشوفها عياناً بياناً من نفس الفريق في أي ماتش وفي أي مناسبة ... مع إن ترتيبه الخامس في الدوري إلا إن اللي في القلب في القلب ....

ولازم النادي الإسماعيلي يعيد التفكير في التفريط في لعيبته من اجل حفنة دراهم ومن اجل العند وخلاص في اللعيبة ....

كلنا نحب الإسماعيلي عندما يلعب كورة فقط مش عندما يكونوا بلطجية .

[disappointed]

عارف بقى بجد يا داروين

أنا كنت فى الأول طالع زملكاوى لوالدى (هوّه الحقيقه مش زملكاوى متعصّب.....بس ما بيحترمش الأهلى...لأن والدى كان بيلعب جمباز فى نادى الجزيرة , وكانوا كل سنه يكسبوا بطولة الجمهوريّة من الأهلى ويطلعوا بالكأس يحتفلوا بيه فى كازينو قصر النيل يقوم بلطجيّه مأجّرينهم لعيبة الأهلى يطلعوا عليهم يضربوهم و يخطفوا منهم الكأس ويرموه فى النيل من على الكوبرى :) )

ومع ذلك....أوّل مرّه حسّيت فيها بإنتماء حقيقى و إحترام و حب للزمالك كانت فى أجازة نصف السنه و أنا فى رابعه أو خامسه إبتدائى على ما أذكر

رحت نادى الزمالك مع والدى فى يوم إنتخابات جمعيّه عموميّه لقيت الناس بتتكلّم و تنتقد براحتها , ومرشّحين و منشورات و جوّ ويفط و تىشيرتات مطبوعه و هدايا وبلالين و برامج إنتخابية مطبوعة........هيصه ( ومرشّحين بالهبل ضد قائمة محمد حسن حلمى رغم مكانته فى الزمالك....كان راجل عظيم ....كان رئيس النادى وبيشيل قصعة الأسمنت على كتفه مع العمّال لمّا الزمالك نقل مقرّه من المقر القديم عند مسرح البالون)

حسّيت بجو لذيذ فعلا

المهم بعد يومين كده جدّى (أبو والدتى) عدّى عليّا وتعالى يا واد يا محبط أما نروح الأهلى (كان مستميت فى إستقطابى للقافلة الحمراء...الله يرحمه)...رحت معاه........وقاعدين فى الجنينه اللى فى أول النادى....لقيت واحد عمّال يتهزّأ من اللى حواليه علشام مش عاجبه دورات المياه , واللى حواليه بيتعاملوا معاه على إنّه عميل أو مخرّب

وبدأ إنطباعى عن جو الديموقراطيّة بتاع الزمالك يتأكّد لمّا كبرت , فى مقابل ترسّخ إنطباعى عن أوتوقراطيّة و دكتاتوريّة إدارة الأهلى وتقديس شخص صالح سليم

يا داروين.....

الزمالك قلعة الممارسة الديموقراطيّة فى الأندية المصريّه (ولذلك أخبار خلافاته علنيّه فى الصحف) , والأهلى معقل الدكتاتوريّة والإستبداد و قمع حرّية التعبير و الإنتقاد فى الأندية المصريّه (ولذلك ينظرون إلى واحد مثل طاهر أبو زيد نظرة مريبه , ولهذا يعتقدون أنه عيب - يااااى- أن تتسرّب خلافاتهم و تعارض مناظيرهم للصحف وكأنّها سبّه فى جبينهم أن يكون هناك حوار و تعدّدية فى الآراء فى النادى)

بالإضافة طبعا لأننى منذ كنت طفلا كان يستفزّنى جدّا ذلك الفريق الذى تجامله الحكّام و تسبّح بحمده الصحافة , وكان طبيعة الكرة التجاريّة (خبط و رزع و جرى و المهم البطوله) التى يتميّز بها الأهلى لاتعجبنى ..... كان يعجبنى لعب الزمالك و التقسيم و الآهات بغض النظر عن البطولات

ياداروين باشا......

الزمالك كصاحب محل الحلوانى.....بيأكّل زبائنه أحلى حلويّات , وما ينوبهوش وهو بيقفل محلّه فى آخر اليوم غير حتّة بسبوسة

الزمالك جمهوره بيفهم كوره.....مش بيشجّع نادى علشان اللى حواليه بيشجّعوه و خلاص...بدليل: إن فيه كثير تسألهم بتشجّعوا مين؟؟؟ يقول لك : أنا ماليش فى الكوره.....بس......بأشجّع الأهلى ...

إنما عمر مافيه زملكاوى تلاقيه بيقول هذه الجملة....لأن اللى بيشجّع الزمالك....بيبقى......بيفهم......كوره

ده غير طبعا البنات و الستات اللى مابتعرفش الفرق بين الكوره و قرعة العسل ولما تسألها بتشجّع مين تقول لك : الختيييييييب mfb: وهيّه ولا دريانه الأهلى لعب مع مين ولا طريقة اللعب إيه ولا حتّى إن الختيييييييييب بطّل كوره من زمان ups:

ياما خرجنا يا داروين من الإستاد و إحنا ساخطين على الزمالك وهوّه كسبان لأنّه ماكيّفناش كورة , وياما خرجنا راضيين عن الفرقه رغم عدم التوفيق فى النتيجه....تعالى بقى لجمهور الأهلى : يبقى شكله زى الزفت ومالعبشى بنكله ويروح كسبان بجون أستروبيا أو قرار من حكم فى الوقت الضائع تلاقى جمهور الأهلى خارج و طاير من السعاده

الزملكاوية ينظرون لمتعة الكرة , والأهلوية ينظرون لبطولات الكره

والفرق كبييييييييير

و...ملحوظه أخيره ( ودى من واقع حياتنا اليوميّه)

لو كان جمهور الأهلى 65% و الزمالك 30% و باقى الأندية 5% , فإن التركيبه الداخليّه لنوعيّة الجمهور تجدها كالتالى :

=الأهلى : 80% حرفيين وموظّفين و عيال مفاعيص وستّات وبنات مالهومش فى الكوره من أساسه و تبلومات (دبلومات) و بيّاعين سرّيحه....إلخ إلخ إلخ و20% مهنيين و متعلّمين تعليم عالى

= الزمالك : إقلب النسبه بس

(كعيّنه عشوائيّه........المؤسسة الطبّيه التى أعمل لها 80% من دكاترتها ومحاسبيها وإدارييها زملكاويّة ....بينما الأهلاوية يمثّلون 20% من هذه الفئة ....بينما كل السوّاقين و بتوع الإستقبال وعمّال التليفون و الصيانه و النظافه أهلاويّه)

و لايجب أن يأخذ أحد كلامى هذا على أننى من مناصرى تعالى المتعلّمين و المثقّفين على الحرفيين و محدودى التعليم...ولكن أنا قلت هذا لأنه بفسّر ظاهرة نراها وهى :

عزوف جماهير الزمالك عن الإستاد مقابل إقبال جمهور الأهلى على مباريات الأهلى فى الملعب

هذا هو السبب لإقبال جمهور الأهلى على المدرّجات وعزوف الزملكاويّه عن الذهاب للإستاد (إيه اللى يمنع السمكرى أو الميكانيكى أو سوّاق التاكسى أو بيّاع الفلاّيات أو موظّف الدرجة العاشرة أو العيّل المزوّغ من المدرسه أو العواطلى من إنه يلاقى وقت و مزاج يروح الإستاد؟؟؟؟ إنّما الدكتور أو المهندس أو المدرّس أو بتاع الكمبيوتر أو المحاسب أو أو أو أو...حيلاقى وقت منين يروح الإستاد فى وسط إلتزامات العمل؟؟؟)

عزيزى داروين......

الزمالك غالبية جمهوره مهنيين , والأهلى غالبية جمهوره حرفيين(ومش عيب.......فلماذا الإنكار؟؟؟)

[Farida]

ده غير طبعا البنات و الستات اللى مابتعرفش الفرق بين الكوره و قرعة العسل ولما تسألها بتشجّع مين تقول لك : الختيييييييب  وهيّه ولا دريانه الأهلى لعب مع مين ولا طريقة اللعب إيه ولا حتّى إن الختيييييييييب بطّل كوره من زمان 

طيب ليه كده يا دكتور محبط . :) mfb:

.....عموما سماح علشان طلعت زملكاوى . wst:: f((: ..بس انت كده أكدت الفكره اللى عندى عن الزملكاويه و كالعاده قلت ووفيت ups: ha) ha)

[kokowawa1979]

ياجماعة هو انتم ماشفتوش الحكام وهم نازلين يقروا الفاتحة مع لعيبة الأهلي !!!!

ماهو ناصر عباس لامؤاخذة نزل الملعب وعينه حمرا وماكانش شايف ضربة جزاء الاسماعيلي اللي كانت تسد عين الشمس لكن شاف سلبطة أسامة حسني ووقعة الننوس على الأرض من غير ماحد يلمسه !!!!

وشفتم إزاي محمد أبوتريكة جري على أسامة على الرض وهات ياأحضان !!!

وهم دول حكام مصر في الكورة !!! واحد يحسب ضربة جزاء على الزمالك على الرغم إن الفاول عكسي في الأصل ومن خارج منطقة الجزاء والثاني يحسب ضربة جزاء للأهلي لإن الننوس نفسه مقطوع ووقع لوحده يعني حتى رجل لعيب الاسماعيلي مالمستوش كما هو واضح في الإعادة أكثر من مرة !!!!

صدقوني الأهلي لو حكم له حكام أجانب ينزل درجة عاشرة لكن تقولوا إيه في نادي الحكومة !!!

وبرضه الزمالك هاياخد الدوري بإذن الله رغم أنف الحكام !!!! وبدون ضربات جزاء وكل دوري وانتم بخير يافرقة بتجدد نفسها كل سنة باللعيبة الكسر !!!!

[se_ Elsyed]

موحبط هنا دخل عشش الدبابير عامداً متعمداً يبقى يستاهل القرص ...

يا راجل بطل قلب للحقائق بقى الأهلي جمهورة حرفيين ونجارين مسلح !!! والله عجيبة ...

طب كلف نفسك كده وبُص بصه على أعضاء مجلس إدارة الزمالك الشواضلية اللي بيشلقوا لبعض آناء الليل وأطراف النهار ...

طب تصدق بالله إن غالبية الزملكاوية اللي شفتهم في مصر يا إما بوابين أو حدادين مسلح أو عواطليه ( مع الإعتذار أيضاً لأصحاب المهن الشريفة .. دول على دماغنا من فوق بس أنا بأرد على موحبيط )

ومع إن بابا الله يرحمه كان زملكاوي إلا أنه كان بيشجع الزمالك عشان يغيظني بس مش حباً في الزمالك ..

وبسبوسة أيه وام علي أيه يا حاج أنت بتشجع قويدر كده ...

قال وهايكلمنا عن خيالات واوهام في خياله ويقولك المؤسسة بتاعتنا فيها 99 % زملكاوية وباقي عمال الصيانة وعمال النظافة أهلاوية وفاكر نفسه بيكلم هنود رابطين الفيل على ناصية الشارع .. والحقيقة إن موحبيط هو المصري الوحيد اللي في المؤسسة بعد تطبيق نظام السعودة ويبقى كده بيمثل 100 % وبيدفع له 200 ريال في الشهر للواد شاندرا خان الهندي بتاع الشاي عشان يقول قدام الناس إنه أهلاوي والواد بيعمل كده عشان يلهف منه المعلوم أخر كل شهر ويطلع في الأخر إن موحبيط هو الهندي اللي بينضحك عليه mfb: ...

ولعلمكم جميعاً بقى مافيش أي عامل نظافة شفته طيلة فترة إقامتي في السعودية مصري ... وكلهم يا إما هنود او بنجلاديش وقليل من الفلبينيين ... دي حقيقة ويؤكدها كل الموجودين هنا ، إلا إذا كان موحبيط نفسه جايب واحد مصري غلبان على كفالته وبيتحمل تكاليفه عشان يشفي غليله من الاهلاوية :)

يا راجل ده حتى لعيبة الزمالك على مر التاريخ فضايحهم بجلاجل ما بين حسن شحاته وجمال عبد الحميد وعايده رياض وفُله الجزائرية وغيره وغيره - ما علينا مالناش دعوة بالناس -....

[Sharkiah]

خلاص بقى ، مابدهاش ، ياروح مابعدك روح

كل من عاش ويعيش فى أوربا أو الغرب عموما من العرب أو المسلمين يعرف أنه بحلول شهر فبراير يبدأ الإستعداد ليوم 14 فبراير أو يوم السان فالانتين ـ إللى إتكلم عنه الإخوه والأخوات هنا من كل الوجوه فكفوا ووفوا ـ ولكنى أذكره هنا لأنه ما إن يهل فبراير إلا والدنيا كلها بلا مبالغه تحمر ـ من اللون الأحمر ـ إشى قلوب قطيفه أحمر وإشى شموع حمرا وإشى كروت حمرا وإشى هدوم فى هدوم حمرا والإعلانات فى التليفزيون والجرايد والشوارع ويادوبك تخش على مركز تسوق ولا حتى محل بقاله ولا كشك بتاع لبان ونداغه تلاقى فى وشك علطول كام ورده حمرا ملفوفين فى ورقه سلوفان ، ورغم إن أغلب المسلمين لايعنيهم الأمر وليس لهم لا فى التور ولا فى الطحين إلا أنهم يعيشون الإحمرار غصبا عنهم زى كل مخاليق ربنا الآخرين ، يعنى بينسوا تقريبا إن فى الحياه ألوان أخرى خلقها ربنا غير اللون الأحمر ، ده بالضبط بصوره أو بأخرى إللى تلاقيه حصريا على كل قنوات الإعلام الرياضى المصرى ، الحياه أحمر فى أحمر ، نقاد حمر ، معلقين حمر ، صحفين حمر ، مذيعين حمر ، محللين أستديو حمر ، والكلام واللقطات والإرهاصات والتعبيرات والخلجات والغمزات والهمسات والتنهيدات كلها أحمر فى أحمر ، ولا مانع من الأبيض جنب منه علشان تكتمل الصوره ، ده طبعا غير التركه الشرعيه الحمراء البيضاء المتضمنه إعلام وراثه لمآل ملكيه إتحاد الكره للأحمر والأبيض ـ حتى إنهم عندما عينوا مؤخرا إتحاد قعدوا كده وجابوا ورقه وقلم وفضلوا يكتبوا أدى واحد أحمر وأدى واحد أبيض وده أبيضاوى قصاده أحمراوى ، ماهى تركه بتتقسم ، ده طبعا غير تكيه لجنه الحكام وأبعديه لجنه المسابقات وعزبه لجنه اللاعبين ، يعنى حاله فريده متفرده تنفرد بيها المحروسه بلا مبالغه عن سائر بلدان العالم ، حاله جعلت تقريبا خلايا أجسام المصريين إما حمراء أو أجسام مضاده بيضاء ، يعنى كلمه كوره ، أو أى شى له شكل التكوير فى بلدنا ، لازم يكون عباره عن بنى آدم لابس ياإما فانله حمرا وشورت أبيض ياإما فانله وشورت أبيض فى أبيض ، خلاص قضى الأمر وجفت الأقلام وطويت الصحف (أستغفر الله العظيم)

يعنى مثلا التتار والمغول ، صنمى الكره المصريه ، يلاعبوا نص فرق الدورى على ستاد القاهره (بس الحق يقال لما بتكون مباراه إنبى ولا الترسانه ولا المقاولون ولا جولدى بيقولوا إسمهم الأول ـ حاجه كده زى نفسك فى إيه قبل مانشنقك) إنما الإسماعيلى يروح يلعب فى جنينه الترسانه فى ميت عقبه وخرابه البلاستيك فى شبرا وساحه سوق التلات فى الفيوم بتاعت جولدى وأخيرا شفنا مثلا إزاى راح يلاعب البلديه على ملعب البلديه إللى قيل إن أحد الفلاحين نزل قبل المباراه يعمل له عمليه تسبيخ لأنه إتلخبط بينه وبين الغيط بتاعه ، والصنمين مش هايلاعبوا البلديه حتى على ستاد غزل المحله ، لأ ده بيقولك هيلاعبوه رايح جاى على ستاد القاهره !!!!!!!!! وده غير المباراه النهائيه لكأس مصر على ستاد القاهره ، حتى المباراه النهائيه للدورى ياناس ياعالم ياهووووو كانوا برضه عايزين يلعبوها على ستاد القاهره ، يفوز الإسماعيلى بالدورى يقوم يروح يلاعب الزمالك بطل الكأس على ستاد القاهره ، لما مره كنت فى مصر وقلت يالله ياواد هاتشوف مباراه الإسماعيلى على القناه الرابعه أقوم أفتح ألاقيهم بيذيعوا مباراه الأهلى عليها ، بيذيعهوا لبشر عاملين زى إللى هايموت من العطش ومتلهف على شربه ماء إسمها مباريات الإسماعيلى

فطبيعى جدا بعد كل ده إن مفيش حد من إخواننا عايز من أصله يصدق إن فيه من يعشق بل ويذوب عشقا فى الأصفر والسماوى ، لن يصدق حد منهم كم القاهريين والصعايده والإسكندرانيه ـ قبل سكان الإسماعيليه ـ الذين ينتمون للإسماعيلى بكل جوارحهم ، فقط يبقى الإسماعيلى سكر فى عيون البيض لما يوقف الحمر وزى العسل فى عيون الحمر لما يعرقل البيض ، ويقولك بيفوتوا مبارياتهم للزمالك ، طب وإيه رأيك فى مباراه موسم 1997 الشهيره بعد نكسه السته عندما هزم الإسماعيلى الزمالك 4 ـ 3 مع الرأفه وتسببت هذه النتيجه بالذات فى ضياع الدورى من الزمالك وذهابه للأهلى ؟ وبالمناسبه وقتها وفى ذروه أزمه الإسماعيلى وأيامه الحالكه السواد ـ لاأعادها الله ـ إنتفض من حضيض عثرته ليهزم الزمالك للمره الثانيه فى الكأس ثم ينتزع الكأس من الأهلى فى النهائى أمام 80 ألف متفرج وهو فى أدنى مستوياته ، فهل فوت الزمالك والأهلى مباراتيهما للإسماعيلى وقتها ؟ و ما رأيك فى مباراه 4ـ3 الموسم قبلالماضى والتى كانت الإشعار الرسمى لقذف الزمالك خارج المنافسه ، هل فوتها الزمالك للإسماعيلى ؟ ومباراه الدور الأول العام الحالى فوتناها بدليل كره تراورى إللى فى العارضه والخط ـ وقيل أنها تجاوزته ـ ولا كره إسلام فى ضربه الجزاء إللى فى العارضه هى كمان ولا ضربه الجزاء التى لم تحتسب لجباتى فى آخر لحظه بعد الهجوم الكاسح الماحق ؟ وهل عندما فوت الإسماعيلى للزمالك المباراه النهائيه العام الماضى كان الأهلى يفوت مباراته مع إنبى ـ والتى كان مجرد تعادله فيها يلغى أى أثر لفوز الزمالك ؟

من ألذ وأطرف ماحدث فى مباراه الأهلى الأخيره إن قبل ضربه الجزاء ـ والتى بالمناسبه أحتسبت لخطأ متعلق بمخالفه عاشره يجب إضافتها للتسعه المعروفين المنصوص عليهم فى قانون كره القدم مؤداها أنه يعاقب الإسماعيلى بضربه جزاء فى أول كره مشتركه داخل منطقه جزاءه إذا بادر بالتسجيل فى شباك الأهلى ـ أن أسامه حسنى فى كره مشتركه مع أحمد فتحى مارس هوايه القفز الخاص بحمامات السباحه ومن بق ميمى الشربينى ومن واقع حال لاعبى الأهلى قبل الإسماعيلى فقد توقع الجميع إنذار لأسامه حسنى ولكن كانت الصاعقه باإحتساب الكره مخالفه على أحمد فتحى بل وإعطاءه إنذار ، وهنا أيقنت أن الهزات الأرضيه التى تنبأ بالزلازل قد بدأت وأن ضربه الجزاء قادمه لامحاله ، وقد كان

يعنى لما اتليفزيون ـ فقط التليفزيون ـ يقوم بتدعيم خزينه الأهلى والزمالك سنويا بأربعه خمسه مليون جنيه ، لسه برضه هاتسأل ليه الإسماعيلى بيضطر لبيع لحمه الحى ؟ يعنى لما بس بادوبك أى لاعب عندى تباشير مبادئ مقدمات موهبه يقوم قراصنه البيض والحمر يجروا وراه وهاتك يالعب فى دماغه وهاتك ياترهيب وياترغيب وياوعيد وياتبشير لحد ما الواد ينسى إسمه تقوم بعد كده تستغرب برجماتيه معلم إبن معلم أيقن إن إسلام خلاص باع القضيه فأدخل لناديه خمسمائه ألف جنيه وقال للجاحد ناكر الجميل مع ألف سلامه ؟ طبعا الإعلام الفلانتيناوى هوا حول الموضوع إلى ليه وليه إسلام مايرحش للأهلى ؟ حاله مونجوليزم والله ، يعنى هو كده بالذوق بالعافيه لحم الإسماعيلى الحى لازم يتشفى ويوزع مناصفه بين البيض والحمر ، والقايمه طويله من أيام رضا الله يرحمه إلى جيل حمزه الجمل وفكرى الصغير ومحمد صلاح أبوجريشه وخالد بيبو ورضا سيكا وأحمد حسن وأوتاكا وعماد النحاس وبركات ، والله العظيم سمعت قصص تقترب إن لم تضاهى قصص المافيا

ياعم سى السيد وياأستاذى العزيز داروين وياأخى مجرامون ، وحق من رفع السماء عاليه بلا عمد هناك من ينتمون للأصفر قلبا وقالبا ولايهمهم ماسواه ، أقول إيه بس ياربى ، إلهى وإنت جاهى أشوف يوم فى الأهلى والزمالك ، إلهى تقهرهما وتورينا فيهما عجائب قدرتك قادر ياكريم بحق ماهم كابسين على أنفاس الكره المصريه ونازلين مص فى دمها وتقطيع فى لحمها

[disappointed]

آآآآآخ.......أنا عكّيت باين عليّا :D

يا فريدة أنا قصدى على الآنسات و السيّدات اللى مالهومش فى الكورة يقوموا يلزّقوا روحهم فى الأهلى و خلاص.... بس لمّا بتلاقى واحدة زملكاوية (زيّك كده يعنى ) بيبقى ليها فى الكورة فعلا (وساعات برضه بتلاقى أهلاويّات فاهمين كورة بس دول بيبقوا قلّه مندسّه على جماهير الأهلى :P )

طب ده أنا مرّه قعدت إتفرّجت على ماتش مع أخت حماتى (زملكاويّة طحن) حسّيت إنى قاعد فى أستوديو تحليلى مش فى صالون بيتهم

اللذيذ بقى (واللى بيؤكّد على كلامى)إنّى أوّل ما إتعرّفت على مراتى وفكّرت أخطبها حبّيت أطمأن على مستقبلى الكروى الأُسَرى...فسألتها : إنتى بتحبّى الأهلى والاّ الزمالك؟؟؟ فكانت إجابتها الصاعقة و الفريدة من نوعها :

أنا ماليش فى الكورة....بس ما بأحبّش الزمالك

:D ;) :lol: :lol: :P :rolleyes:

بس على ميييييييين hg)::

دلوقتى بتتبسط قوى لمّا الزمالك يكسب و مع كل جون للزمالك ألاقيها بعتت لى البنت فى الصاله وتقول لها روحى قولى لبابا: وجون و جون و جون و جوووون

(صحيح هيّه بتكره الكورة عمى... وصحيح هيّه بتتبسط لمّا الزمالك يكسب مش حبّا فى الزمالك و إنما حبّا فى الخروجة و العشاء برّه إحتفالا بفوز الزمالك إستغلالا لمزاجى العالى - بتحب الزمالك لإحتفالى بفوزه مش لشخصه :rolleyes: )..... بس مش مشكلة... المهم إنّى ربّنا حبّنى و ما إتجوّزتش واحده أهلاويّه hpc:!: ..... كان ممكن أتعب نفسيّا قوى )

أمّا الأخ سى السيّد بقى فأحب أعرّفه إنّه صحيح السّعوَدَة مفروضة على جميع المؤسسات بالأمر بس إحنا بنعيّنهم إمتثالا لأوامر مكتب العمل دون أن ننتظر أى إنتاج منهم فبنعيّنهم فوق العمالة الموجودة فعلا مش بدلاً منها(بنعتبر مرتّباتهم ضرائب للحكومه)....أمّا عن بتوع النظافة و الصيانه و السوّاقين عندنا فهم فعلا كلّهم مصريين لأنّهم مع المؤسسة من أوّل ما تم إنشائها ولانعانى من صعوبات مع مكتب العمل بسببهم لأن كلّهم إقاماتهم على وظائف مالهاش علاقة بوظائفهم الحقيقيّة(ده غير إن مالك المؤسسة- وهو رجل أعمال و طبيب حاصل على زمالة الكلّية الملكيّة البريطانيّة........ و....زملكاوى :P ;) - بيميل لتعيين المصريين لأن والدته مصريّه و مراته مصريّه و إستثماره الأساسى فى مصر فى شكل قرية سياحيّة كبيرة إسمها "لاسياندا" معمولة على طراز منتجعات مايوركا الأسبانية)

ماعلينا..... نرجع بقى لمرجوعنا..........

بتقول فلّه و عزّه "جمال عبد الحميد"وعايدة رياض "حسن شحاته"(نسيت هياتم"محمود الخواجه" و مها صبرى "عبده نصحى")

وكان ناقص تقولّى شحاته أبو كف و هياتم كمان

ممممممممم..... mc:

يبدو إنك مش فاكر الحادثة الشهيرة بتاعة العربية اللى إتقلبت بشريف عبد المنعم و حسام البدرى على طريق العين السخنه ومعاهم زوجتى لوائين فى الشرطة ;) والموضوع إتلم

و الظاهر إنك مش فاكر محمّد عبّاس اللى بيقضّى تأبيدة فى قضيّة إتّجار بالمخدّرات

وأعتقد إنك ماعندكش فكرة عن ضبط خالد بيبو فى بيت سيّئ السمعة

ياسى السيّد.....مافيش لعيبة كورة أولاد عائلات (اللهم إلاّ هادى خشبه و خالد الغندور و حازم إمام)....الباقيين إنت عارف: من الشارع للنادى , ومن قاع المدينة لقمّة المجتمع...فغالبوا بيتهبلوا :lol:

و....سلّم لى على نوّاب القروض الحراميّه اللى نغنغوا الأهلى بفلوس المودعين الغلابة

[Guest Mohd Gramoun]

الاخ شرقية....... آمييييييييين...بس ياريت الدعاء يشمل الحكومةكمان...

الاخ محبط ....اختار واحد من الثلاثة التالية كجواب لعنوان الموضوع الإستفهامي:

الساعة بخمسة جنيه و الحسابة بتحسب

بأتنين و نص ...تعالي بص

من ده بكرة بقرشين

أنا بحثت :lol: و لفيت وتعبت :rolleyes: لغاية لما لقيت الحرافيش :lol: الاهلوية الحرفيين :rolleyes: بيتكلموا ازاي :lol: ...مالقتش غيردول اجابة علي السؤال... هو الاهلي بيدفع كام hpc:!:

[disappointed]

خلاص بقى ، مابدهاش ، ياروح مابعدك روح

:D

يعنى مثلا التتار والمغول ، صنمى الكره المصريه

:rolleyes:

والصنمين مش هايلاعبوا البلديه حتى على ستاد غزل المحله

:rolleyes:

حاله مونجوليزم والله

إلهى وإنت جاهى أشوف يوم فى الأهلى والزمالك ، إلهى تقهرهما وتورينا فيهما عجائب قدرتك قادر ياكريم بحق ماهم كابسين على أنفاس الكره المصريه ونازلين مص فى دمها وتقطيع فى لحمها

:lol:  mfb:    f((:  hg)::

مبسوط يا معلّم سى السيّد؟؟ :lol:

مبسوط يا داروين باشا؟؟ :lol:

مبسوط يا حاج مجرامون؟؟

آهو "شرقيّه" فتح النااااااار علينا كلّنا

;)      :P

لا بقى........حيث كده ...... وطالما الموضوع بقى فيه ضرب نار توماتيكى توماتيكى

أنا عايز أربّى عيالى

hpc:!:

:P  ;)  ;)

عقلى الباطن بيقول لى : حيث إن الموضوع شكله مابقاش يطمّن , وحيث إن "شرقيّه" سَحَب النص آلى بتاعه وطاح فينا كلّنا..... يبقى أحسن حل.....أخلّيهم كلّهم يناموا.... وأتسحّب فى سكون الليل البهيم وقبل ما الفجر يشقشق....و.....و....و...

mc:  :P  :D

تم تعديل 13 مارس 2004 بواسطة disappointed

[afiona]

يا أخ شرقية يا حبيب الكل....

طب إنتقادك لنادى الهنود الحمر مفهوم لأنك رجل صاحب مزاج عالى فى الكرة و فاهم وهارش الفنيات وعارف إن الأهلى عمره ما لعب كرة إنما بيلعب american football.....

بس ليه بس تدب إسفين فى إئتلاف المزاج الكروي العالى بين مدرسة الفن والهندسة و برازيل العرب ؟ لألألأ، زعلتنى ....

[DARWEEN]

بس ليه بس تدب إسفين فى إئتلاف المزاج الكروي العالى بين مدرسة الفن والهندسة و برازيل العرب ؟ لألألأ، زعلتنى ....

[color=blue][b]ياعم في عرض الحبايب غير الصنف بقى

الأفيون دا بقى موضه قديمه قوي .... ياابني ياحبيبي مدرسة أيه وفن أيه ... وبرازيل أيه

فوووووووووق دي تهيؤااااااااااااات

ياحبيبي كله في مصر بيعك أنت لسه مش واخد بالك أننا بنهزر من الصبح

الكل وحش والأهلي احسن الوحشين دي الحقيقه ... وبعدين أحنا بنحب الأهلي علشان وطنيه وأخلاق ومباديء مش خيانه وقلة أدب زي غيره ..... بس أرجع وأقولك

الأهلي عمهم وحابس دمهم [/b][/color]

[se_ Elsyed]

لأ بجد انا لحد المداخلة بتاعت شرقية وكنت مستمتع بالخناقة دي وبقرأ بمزاج .. لكن لاحظت أن الراجل تعبان قوي وممكن يحصل له حاجه .. نصيحة يا شرقية ماتكلش سمك ولا بيض لمدة أسبوعين وهاتبقى عال العال ...

بس بالله عليك أنا هاسألك سؤال .. لو ناصر عباس ولا الخديوي عباس ده حتى في عبر الدنيا كلها ده يدي الحق للعيبة الإسماعيلي يروحوا يضربوه وبالتالي قرر إتحاد الكوره إيقاف الفتوة عمرو فهيم لأجل غير مسمى ...

يعني لو إحنا في أي بطولة زي كاس القارات كده وإتعرضنا لظلم الحكام اللي وارد في كل الدنيا هايبقى منظرنا أيه والدنيا كلها شايف لعيبتنا بتظبط الحكم ؟...

يا عزيزي شرقية الأدب فضلوه عن الرياضة ولعيبة الإسماعيلية بصراحة الأدب معداش عليهم لأن لو ترجع بالذاكرة لورا هاتلاقي مهازل مستمرة منهم ..

وبرضوا ولا تزعل نفسك .. الأهلي عمهم وحابس دمهم ... عادي يعني مافيش جديد في كده ... وإوعى تزعل إن الإسماعيلي بقى الخامس في الدوري بكره ترجعوا لمكانكم المعتاد هو الـ 3 .. hpc:!:

[Sharkiah]

لأ بجد انا لحد المداخلة بتاعت شرقية وكنت مستمتع بالخناقة دي وبقرأ بمزاج .. لكن لاحظت أن الراجل تعبان قوي وممكن يحصل له حاجه .. نصيحة يا شرقية ماتكلش سمك ولا بيض لمدة أسبوعين وهاتبقى عال العال ...

بس بالله عليك أنا هاسألك سؤال .. لو ناصر عباس ولا الخديوي عباس ده حتى في عبر الدنيا كلها ده يدي الحق للعيبة الإسماعيلي يروحوا يضربوه وبالتالي قرر إتحاد الكوره إيقاف الفتوة عمرو فهيم لأجل غير مسمى ...

يعني لو إحنا في أي بطولة زي كاس القارات كده وإتعرضنا لظلم الحكام اللي وارد في كل الدنيا هايبقى منظرنا أيه والدنيا كلها شايف لعيبتنا بتظبط الحكم ؟...

يا عزيزي شرقية الأدب فضلوه عن الرياضة ولعيبة الإسماعيلية بصراحة الأدب معداش عليهم لأن لو ترجع بالذاكرة لورا هاتلاقي مهازل مستمرة منهم ..

وبرضوا ولا تزعل نفسك .. الأهلي عمهم وحابس دمهم ... عادي يعني مافيش جديد في كده ... وإوعى تزعل إن الإسماعيلي بقى الخامس في الدوري بكره ترجعوا لمكانكم المعتاد هو الـ 3 .. :lol:

والله العظيم تلاته أنا لم أر أى إعتداء أو خناقات بعد المباراه حتى أحكم عليها ، ولكن لو كان عمرو فهيم عمل حاجه زى كده طبعا ده شئ يستوجب العقاب ولا نقاش فى ذلك ، ولكن فقط أذكرك بالعواصف والزلازل والبراكين والأعاصير إللى إجتاحت الإعلام الرياضى الأسبوع الماضى علشان حكم مباراه الأهلى والنجم إرتكب هفوه تقدر بعشر معشار ماإرتكبه الأخ ناصر عباس من مهازل فهل حتى تم تسليط الضوء على ما فعله ؟ بالطبع لأ ولن يحدث ، ولن يعترف حتى سى السيد فى مناقشه بسيطه وكلها تهريج فى تهريج زى دى لأن ده للمره الثانيه نتاج إعلام إحادى خلاك بتستكثر حتى حق الإسماعيلى فى المنافسه الشريفه ، وأنا والله لا أنا زعلان منك ولا أنا حزين ومهموم للدرجه إللى إنت بتصورها دى ولاعمرى فتحت مواضيع هنا ولاحتى كنت ناوى أتكلم عن المباراه رغم إنى الإسماعيلاوى الوحيد فى المنتدى ، ولم أكتب كلمه واحده إلا بغرض التهريج أو بتعبير أكثر دقه إفصاح عن رأى فى صوره تهريجيه تماشيا مع خط الموضوع (خاصه بعد رد الأخ مجرامون التوضيحى الثانى) ، وبالمناسبه إيه رأيك فى إنك قد تضطر للإمتناع عن ضعف عدد الأطعمه التى نصحتنى بالإمتناع عنها ياأبو الكباتن وفوقها كمان الفطير المشلتت ويمكن كمان تضطر تعيش على المحاليل كام يوم لو إسترسلنا فى فضائح سابقه للاعبى الأهلى ؟ ياالله إضحك ياراجل ولايهمك ولاالمسأله كلها مستاهله إنك حتى تكشر لأول مره بالطريقه دى

[Farida]

استاذى العزيز شرقيه واضح ان حضرتك معبى على الأخر .....كل ده فى قلبك و ساكت ...معلهش هدى نفسك و يخرب بيت اللى يزعلك

[Sharkiah]

استاذى العزيز شرقيه واضح ان حضرتك معبى على الأخر .....كل ده فى قلبك و ساكت ...معلهش هدى نفسك و يخرب بيت اللى يزعلك

الله يكرمك ويحفظك يادكتوره فريده ، والله أنا كنت بأكتب بسخريه فقط لاغير بس يمكن غلطتى إنى مازوقتش الموضوع بكام أيكون ودايما ماباأخدش بالى من الموضوع ده ، ياالله شويه أهم :D ;) flrt: :lol: :P

[Guest Mohd Gramoun]

يا أخ شرقية....ولا يهمك...الكورة زي ما قال كابتن لطيف اجوان... و الموضوع لا يعدوا خسارة للإسماعيلي و الاسماعيلي واخد علي الموضوع ده من زمان بسبب ظلم الحكام.... المصريين و العرب و الافارقة و الاوربيين..

كلهم ضد الاسماعيلي...

لكن يظل الاسماعيلي صاحب افضل اداء رغما عن انفي و انف كل اهلاوي متعصب احمراوي... يابو قلب ذهب

[Sharkiah]

يا أخ شرقية....ولا يهمك...الكورة زي ما قال كابتن لطيف اجوان... و الموضوع لا يعدوا خسارة للإسماعيلي و الاسماعيلي واخد علي الموضوع ده من زمان بسبب ظلم الحكام.... المصريين و العرب و الافارقة و الاوربيين..

كلهم ضد الاسماعيلي...

لكن يظل الاسماعيلي صاحب افضل اداء رغما عن انفي و انف كل اهلاوي متعصب احمراوي... يابو قلب ذهب

ماشى ياسيدى ، إتريق براحتك ماهو يومكم ، أسيبك بقى وأروح أشمشم على أى أخبار لمباراه الكروم إللى شكل الإسماعيلى هايلعبها بفريق مدرسه الكره flrt: :lol: