قناة الـ ART والإحتكار الحقير

[se_ Elsyed]

بريد الأهرام 13/3/2004 م

مثال صارخ‏!‏

اعتادت إحدي القنوات الفضائية علي تعليم الناس دينهم وحثهم علي الأمانة لا لشئ سوي حرصها الشديد علي عدم الخسارة من شراء البعض لكروت مضروبة يستطيعون بها فتح القناة دون اللجوء إلي البائع الشرعي وهم أصحاب هذه القناة‏...‏

وللوصول إلي الهدف فإنها تعرض أحاديث للرسول صلي الله عليه وسلم والتي تدعو إلي الفضيلة‏,‏ والأمانة‏..‏ وبالطبع فلا اعتراض علي هذا فالناس في حاجة دائمة إلي إيقاظ الضمائر ولكن أليس الدين الذي يحتج به أصحاب المصلحة هو نفس الدين الذي ينهي عن الاحتكار‏..‏ ألم تقم نفس هذه القناة الفضائية باحتكار حق إذاعة مباريات كرة القدم التي كان العامة في مسيس الحاجة لرؤيتها للترويح عنهم في ظل هذه الظروف الصعبة التي يعيشونها‏...‏ ألم ينه ديننا الحنيف وبنفس القدر والقوة عن الاحتكار كما نهي عن السرقة‏...‏

أليس هذا مثلا صارخا للمصيبة التي نعيشها الآن وهي استغلال النص فيما يعود علي قائله بالفائدة فقط‏.‏

د‏.‏ حسام أحمد موافي ـ رئيس قسم طب الحالات الحرجة

ملعوبة .... بصراحة أصل الشيخ صالح كامل عايش في الدور اليومين دول وهارينا مواعظ ولكنه نسي الأية القرأنية التى تقول " يأمرون الناس بالبر ويَنسَوُن أنفسهم "

ده حتى عمال يلقح على أنا شخصياً كلام لأني شاري الكارت من مصر وبأستخدمه في السعودية لأن في الإشتراك السنوي في مصر تقريباً بـ 300 ج وهنا بـ 360 ريال يعني حوالي 650 ج .. يبقى بالله عليكوا ليه أدفع أكتر لما ممكن أدفع أقل

على فكرة في السعودية لا يذكر أسمه إلا وتنهال عليه الشتائم من كل حدب وصوب لتطبيقة لمبدأ الإحتكار والركض وراء المادة بغض النظر عن مشاعر الآخرين ...

س س مواطن مغترب ومبقوق من صالح كامل ...

[Sherief AbdelWahab]

ملعوبة .... بصراحة أصل الشيخ صالح كامل عايش في الدور اليومين دول وهارينا مواعظ ولكنه نسي الأية القرأنية التى تقول " يأمرون الناس بالبر ويَنسَوُن أنفسهم "

بعد اللي قلته يا سي السيد..مفيش كلام ينقال

خلص الكلام

[disappointed]

بصراحة شديدة....انا غير مقتنع نهائيّا بهذا الكلام

ألم تقم نفس هذه القناة الفضائية باحتكار حق إذاعة مباريات كرة القدم التي كان العامة في مسيس الحاجة لرؤيتها للترويح عنهم في ظل هذه الظروف الصعبة التي يعيشونها‏

إيه يعنى اللى خلاّها مسيس الحاجه؟؟؟؟

الترويح أصبح مسيس الحاجه؟؟؟

نحن نتحدّث عن ترويح...أى ترفيه.....أى كماليّات

لاهوّه أكل , ولا شرب , ولا لبس , ولا سكن , و هو شيئ يمكن الإستغناء عنه......طب ما السينما ترويح......ببلاش والاّ بفلوس؟؟

اللى عايز ترفيه يدفع فلوسه......هوّه صالح كامل حيدفع كل هذه المصاريف (أستوديوهات , و مرتّبات , وخبراء , و فنيين , و تقنيين , و عقود مع أصحاب حقوق البث....إلخ إلخ إلخ) وبعدين يقدّم المواد دى ببلاش كده و جدعنه؟؟؟.....

أليس هذا مثلا صارخا للمصيبة التي نعيشها الآن وهي استغلال النص فيما يعود علي قائله بالفائدة فقط‏

ديننا حلّل التجارة , وما يفعله صالح كامل هو نوع من أنواع التجاره.... مشروع تجارى.....يقوم بتمويله و رعايته من أجل تحقيق عائد وربح

الرجل لا يضحك على أحد , ولا يغش أحد , ولا يجبر أحد (كون أنه حصل على حقوق بث أغلب الأحداث الرياضيّة فإن ذلك لا يعيبه بل يدل على حرصه على التميّز وعلى أن يكون المشترك عنده فى وضعيّة مميّزة ويكون راض عن كم و كيف المتعة التى ينتظرها من وراء إشتراكه...... وهذه السيطرة على حقوق البث يلام عليها منافسيه الذين لايبذلون جهدا أو ينفقون مالا كافيا لمزاحمة صالح كامل....حد كان قال للقنوات المنافسة إنها ما تنافسوش بشراسة؟؟؟)

وبعدين حقوق البث الحصرى للأحداث الرياضيّة الكبرى بيعطيها الإتحاد الإقليمى أو الإتحاد الدولى لشركات تسويق عملاقه , ثم تقوم هذه الشركات بإستدراج عروض عن طريق مناقصات بحيث تقوم بإرساء العطاء على شركة بث واحدة (حصريّا) فى كل منطقة جغرافية....يعنى الموضوع مفتوح لمن يريد..... ومن يدفع أكثر يحصل على حق البث.....فصالح كامل ينفق أموال طائلة للحصول على هذه الحقوق ولا يعيبه أنه يقدّم هذا الترفيه بعد ذلك مقابل الإشتراك فى قنواته....مع ملاحظة أننى أرى أن كمّ و نوع الترفيه (على المستوى الرياضى) أكبر بكثير جدّا من قيمة الإشتراك (يعنى القيمة أكثر بكثير من الثمن)....فبريال واحد يوميّا فقط (60 ريال شهريّا) تحصل على جميع القنوات الرياضية بالإضافة لباقة قنواته المنوّعة الرئيسيّة....يعنى يا بلاش....بريال فى اليوم (ثمن كوب شاى) بتتفرّج على الدورى الإنجليزى و الدورى الألمانى و التشامبيونز ليج الأوروبى و دورى أبطال العرب و الدورى الأسكتلندى و دورى أبطال أمريكا الجنوبية (الكوبا ليبرتادوريس) و جميع كؤوس العالم للكبار و الناشين والرجال و السيّدات , وكأس أفريقيا للأمم , وكأس أفريقيا للأندية الأبطال , وكأس آسيا , و كأس إيطاليا (كوبّا إيتاليا) وكأس أمريكا الجنوبية للأمم (كوبّا أميريكا) و الفورميولا وان و كرة القدم الأمريكيّة و كرة السلّة الأمريكيّة و كأس العالم للرجبى و السنوكر و البلياردو و الملاكمه(وكلّه بإستدويوهات تحليل مع خبراء و معلّقين على مستوى)....ولمّا تزهق من الرياضه تتفرّج على أحدث فيلم عربى أو فيديو كليب أو مسلسل أو مسرحيّه كوميديّة.....

إييييييييه هوّه......

حننهب..؟؟؟

ده إفتراء والله.....كل ده بريال فى اليوم؟؟؟؟

أمال عايزين إيه....نتفرّج على الهيصه دى كلّها و نتمتّع و نتكيّف و يدفع لنا بقى؟؟؟؟؟

وبعدين كمان نعيب على الراجل إنه بيحاول يحافظ على حقّه من الكروت المضروبة اللى بتضربه فى صميم تمويله من الإشتراكات؟؟؟

والأنقح من كده بقى نلاقى الناس بتعيب عليه إنه حاصل حصريّا على حقوق بث بطولة أبطال العرب (اللى هوّه مموّلها و بيغطّى كل نفقاتها و بيدفع حتّى تذاكر طيران و تكاليف إقامة الفرق و الجوائز الماليّه!!!!)

أمّا عجايب

أنا مش بأدافع عن الإى آر تى (أنا مشترك عادى..... وبعدين أنا أساسا "أوربتاوى" والأساس عندى هو الأوربت علشان قنوات الكارتون للبنت و قنوات الأفلام الأمريكانى و المنوّعات الغربيّة)

بس أنا بصراحة متغاظ جدّا من المنطق المغلوط بتاع الراجل ده... اللى عايز كل حاجه ببلاش (حتّى الترفيه)

د‏.‏ حسام أحمد موافي ـ رئيس قسم طب الحالات الحرجة

واللى يغيظك أكثر إن هذا الكلام يصدر عن شخص ميسور الحال مثل هذا

انا أساساً قابلت فى السعوديّه نوعيّات غريبه من البشر.... بيبقى راجل إستشارى و بروفيسير ملو هدومه بيأخذ 20 ألف ريال فى الشهر مرتّب أساسى غير البوانس و بدلات السكن و تذاكر الطيران له و لأسرته و مدارس العيال و الذى منّه , وعايش سفلقه على قفا شركات الأدوية اللى بتعشّيه كل يوم فى فندق خمس نجوم و حاجزه ليه شاليه فى منتجع على البحر خميس و جمعه و جايبه ليه أجهزة البيت الكهربائيّة من أول الكيتشن ماشين و الفضّيات لغاية ترموس الشاى و أباجورة المكتب....... وبعد كل ده تلاقيه بيعيّط على الألف ريال اللى بيصرفها بخلع الضرس , وبعدين تلاقيه حيموووووت علشان بيدفع ريال فى اليوم علشان يتكيّف كورة

حاجه تجيب شلل معيز

وهوّه فعلا كلام هذا الرجل ليس سوى :

مثال صارخ‏!

على رفع لواء "أبو بلاش كتّر منّه"

على فكرة في السعودية لا يذكر أسمه إلا وتنهال عليه الشتائم من كل حدب وصوب لتطبيقة لمبدأ الإحتكار والركض وراء المادة بغض النظر عن مشاعر الآخرين

طبعا لازم يشتموه.....مش بيطلّع الريال من جيبهم وهمّه متعوّدين على السفلقه؟؟؟

همّه عايزين يتكيّفوا و يترفّهوا و يتمتّعوا أونطه من غير ولا ملّيم , وتلاقى واحد من اللى بيشتموه على إشتراك الإى آر تى أبو ريال فى اليوم ده و عينه فى الفلوس اللى بيتمتّع مقابلها ماعندوش أى مانع من جهة أخرى إنه يدفع 200 ريال(وبيدفع وهوّه سعيد و مبسوط) فى قعدة شيشة و جراك مالهاش معنى أو بيداين نفسه للبنك و هوّه مش لاقى ياكل علشان يجيب كامرى 2004 مع إنّه معاه ماكسيما 2003 لسّه ماخلّصش أقساطها مع البنك, أو مغرّق نفسه فى الديون علشان البيه بسلامته مصمّم يصيّف مع عياله فى لندن مش فى مصر أو سوريا (وهوّه أساساً حتّة موظّف عادى جدّا)

مشاعر إيه بس يا عم سى السيّد؟؟؟؟

واحد إستثمر رأس مال , وأنفق أموال طائلة , و مهتم بتجويد بضاعته لأقصى درجة لتتميّز عن الآخرين و حتّى لايكون لدى الآخرين نفس بضاعته , وعرض بضاعته بسعر فى المتناول ( لاحظ فرق سعر إشتراكه من إشتراك الأوربت أو الشوتايم).... مش عارف بصراحة بعد كده مشاعر إيه اللى يحافظ عليها؟؟؟

الراجل ما إحتكرش رغيف العيش ولا حديد التسليح و لا دواء لمرض عضال....الرجل إحتكر أحد مواد الترفيه و التسليه... إحتكر كماليّه يمكن لمن لا يريد الدفع الإستغناء عنها

أنا مش قادر أفهم هذا المفهوم بجد

د/محبط

مغترب مصرى متفهّم لموقف صالح كامل

تم تعديل 13 مارس 2004 بواسطة disappointed

[se_ Elsyed]

الله الله موحبيط بقى رأسمالي وبابوجوازي يا جدعان وتخلى عن طبقة البلوتاريا الكادحة التى يتكون منها غالبية الشعب المصري ..

يا أبو المحابيط لو إتكلمنا عن نفسنا وبصفتنا مغتربين الحمد لله ممكن كل واحد فينا يشتري قناة خاصة من بابها - واسعة دي شوية - يبقى أحسن لنا نسمي المنتدى " منتدى المحاورات السويسرية للناس المتدفية "

الدكتور اللي باعت الكلمتين دول وانا كتبت تعليقى عليهم بيتكلم على لسان معظم الشعب المصري الكادح اللي مش لاقي كيلو زيت في الجمعية يا أبو عمر وبيطلع همه في الفرجة على المباريات وشتيمة اللعيبة ، أنا عن نفسي ماعنديش سيتالايت في مصر لأني مش مستقر هناك لكن يوم ما بأكون في أجازة ويكون فيه ماتش متشفر بأتذل ذُل الأرامل لأني لم أتعود الجلوس على المقاهي وسط قرقعة الشيشة والدخان الازرق .

يا محبط يا حبيبي صالح كامل مثال حي لشايلوك اليهودي بتاع تاجر البندقية في بحثه عن المال بأي طريقة وماعندوش مانع وقد بلغ من العمر أرزلة يطلع زوجتة ولا مؤخذه ترقص وتعمل حركات على الشاشة - صفاء خانوم أبو السعود - ما علينا مالناش دعوة بالناس .. :)

يا راجل في بطولات الأندية الأفريقية اللي احتكرها كان بيسمح بإذاعة المباراة لما تكون مقامه في نفس الدولة ... دلوقت لأ

ومعاها طبعاً البطولة العربية ... ممنوع برضوا ...

وبطولة الأمم الأفريقية قطع الميه والنور عن الناس ودولة من دول العالم العاشر زي أرتيريا ذاعت كل الماتشات ....

فالرحمة حلوه يا دوك يعني يلهط زي ماهو عايز لكن يعمل حسابه إن فيه ناس غلابه ..

وأديك شوفت التليفزيون المصري عرض عليه 20 مليون جنية مقابل إذاعة البطولة الأقريقية على القنوات المحلية .. عمل فيها عبدو التقيل لحد ماخد صابونة وإتذاعت غصبٍ عنه بربع الثمن ...

أنا معاك إن الإشتراك رخيص في مصر ...

30 ج في الشهر ( ولو إن دول إيجار الأوضة وصالة اللي ساكن فيهم إيجار جديد ) لكن لازم له ريسيفر وطبق ومستلزمات تدخل لها في كمان 1000 جنية ... ودول يساوي كسوة العيال في الشتاء والصيف ....

الناس في مصر غلابة أبو يابوالمحابط وإنت سيد العارفين

بتفكرني بفيلم النوم في العسل ... ففي ناس هوايتها إنها تدور على طرق مبتكرة لعكننة البشر واللغوصة في لحظات السعادة المعدودة والنادرة في حياتهم ...

س س كُحيت ... موظف عالمعاش

[disappointed]

الله الله موحبيط بقى رأسمالي وبابوجوازي يا جدعان وتخلى عن طبقة البلوتاريا الكادحة التى يتكون منها غالبية الشعب المصري

معظم الشعب المصري الكادح اللي مش لاقي كيلو زيت في الجمعية

:lol: :lol:

حتلبّسنى تهمة يا عم سى السيّد والاّ إيه؟؟

:D

هيّه طبعاً تبقى رأسماليّه بورجوازيّة لو صالح كامل كان إحتكر الزيت فى الجمعيّه أو الرز و السكّر و الشاى عند البقّالين

صالح كامل إحتكر سلعة ترفيهيّه

البروليتاريا الكادحة اللى يحاول إحتكار مصدر رزقهم أو لقمة عيشهم أو شربة مائهم أو كسوة عيالهم أأكله بسنانى mc: لأن البروليتاريا الكادحة لازم تعيش بطريقة تحترم آدميّتهم و تلبّى إحتياجاتهم الأساسية....إنما بيتهيّألى البروليتاريا الكادحة ممكن تعيش عادى جدّا بالفرجة على ماتشات الدورى وقصّة مباراة و الكورة مع دريم و فسحة جنينة الحيوانات و ركوب العجل فى القناطر....مش حتموت يعنى من عدم الفرجة على مازيمبى و آسيك و أوكوشا وصامويل إيتو و تشامبيونز ليج العرب (اللى هيّه البطوله اللى خلقها من العدم صالح كامل اللى بنلوم عليه إحتكاره ليها!!!!.... يعنى ماله و لايهنا له؟؟!!! :P )

إحتكار رأس المال لأساسيّات حياة البروليتاريا الكادحة هو توحّش للرأسماليّة (وهو ما أرفضه) , والتشدّد فى رفض إحتكار رأس المال لكماليّات هامشيّة وترفيهيّة مما يؤدّى لإعاقة البروليتاريا الكادحة عن التمتّع بها فى أوضة المسافرين ببلاش و إجبارها على التمتّع بها فى أى قهوة بلدى بثمن السحلب و حجرين المعسّل (اللى كده كده كان حيشربهم )هو تجمّد و تصلّب فى تطبيق المبادئ الإشتراكيّة و التوجّهات اليساريّة (وهو ما أرفضه أيضا...وهو الفارق بين اليسار الجديد الصاعد الباحث عن العدالة الإجتماعيّة و دولة الرفاة مع الحفاظ على الملكيّة الفرديّة وتشجيع رأس المال وبين اليسار العتيق الذى دهسته عجلة التاريخ بعد أن تمسّك بمنهجيّة تطبيق شديدة التطرّف فيما يخص مفاهيمه)

هيّه إسمها البروليتاريا الكادحة مش البروليتاريا الغير مرفّهة

إسمها البروليتاريا المسحوقة مش البروليتاريا المـُـشـَـفّرة

الناس في مصر غلابة أبو يابوالمحابط وإنت سيد العارفين

والله عارف.......بس غلبانين دى تطلق على مستوى أساسيّات الحياة اللى من حقّهم توفيرها لهم عندما لايقدرون عليها(غذاء , كساء , تعليم , علاج), مش على مستوى تشفير القنوات الفضائيّة و إحتكار ماتشات الكورة يا عمّنا

هل يعقل إن واحد يلعن البؤس و الشقاء والقهر الإجتماعى اللى مخلّيه مش عارف يتفرّج على ماتش كورة؟؟؟!!!!!

مش عارف ليه تصوّرت كاريكاتير للكحّيت بتاع مصطفى حسين وهوّه قاعد فوق السطوح بالبيجامه المقطّعه و عياله اللى ماشيين من غير الإسمه إيه ده و البيت مافيهوش مايسد الرمق , ويقوم لاوى بوزه ويعايش مأساة بشعة ويقول :

الحكومة دى لازم تسقط........الوضع أصبح لايطاق.....مافيش أى إحترام لآدميّتنا..... مش ممكن يعنى حتّى ماتش النجم الساحلى مانشوفهوش

ماتش كأس أفريقيا مش قزازة زيت(قزازة الزيت ما ينطبخش الأكل من غيرها , بس ماتش الأهلى و الكروم يسد برضه محل ماتش الأهلى و كانون ياوندى)

ماتش كأس أبطال العرب مش رغيف عيش ( رغيف العيش لاحياة بدونه , بس الحياة تستمر عادى جدا لو البروليتاريا الكادحة إتحرمت من ماتش الزمالك و الترجّى وإتفرّجت على الزمالك و حرس الحدود)

ياسى السيّد

إحتكار الفول و العدس و الدقيق يؤثّر على البروليتاريا الكادحة , بينما لايمكننا وصف البروليتاريا بأنها كادحة أو مسحوقة عندما تتذمّر من إحتكار السيمون فيميه و الماشروم و الكيوى

يا سيّدى الفاضل ......أنا تعوّدت فى حياتى ألاّ أفكّر فى كماليّات من الأساس إلاّ عندما تدخل ظروفى المنحنى الذى يجعل منّى مؤهّلا للتفكير فيها.....فلماذا أقكّر فى شيئ ستستمر حياتى بدونه دون تنغيص ولماذا أجعل تفكيرى متمحورا حوله؟؟!!!

وانا فى ثانوى عمرى ما فكّرت أشمشم على أخبار العربيّات (وكنت عايش عادى) , وأول ما إتخرّجت مافكّرتش أشمشم غير على الفيورا و الــ28 (وكنت عايش عادى) , ومن 6 سنين كده فكّرت أشمشم على المرسيدس القديم (وكنت عايش عادى) ,ومن سنتين فكّرت أشمشم على موديل أحدث من الــ2000 ,و كمان سنه ممكن أشمشم على حاجه موديل نفس السنه

حتقول لى هل أنا حسّيت بفرق فى أى مرحله؟؟ حأقول لك : لأ.. نهاااائى.........لأنى و أنا فى ثانوى ماكنتش محتاج عربيّه , وبعدما إتخرجت الـــ28 كانت تمشّى الحال , و من 6 سنين المرسيدس القديم كان عشرة على عشرة , ودلوقتى العربية الموديل الحديث متوافقة مع وضعى , وكمان سنه يمكن يجد جديد.....الموضوع نسبه و تناسب وترتيب أولويّات....والعلاقة بين إحتياجى و مقدرتى من جهة و رغبتى وتطلّعى من جهة أخرى كانت ثابتة فى جميع هذه المراحل (وهو مايخلق الإتزان النفسى و السلام الداخلى للإنسان)

هناك أساسيّات..... وهناك كماليّات

هناك متطلّبات حياتيّه..... وهناك بدائل ترفيهيّة

وبعدين يعنى ما البروليتاريا الكادحة طول عمرها كانت عايشه زى الفل و من غير إنسحاق لغاية السنه اللى فاتت لمّا ماكانش فيه أى بطولة أساسا إسمها أبطال العرب.....دلوقتى بس حسّوا فجأة إن حياتهم لاتطاق من غير تشامبيونز ليج العرب؟؟؟؟

المهم إنى النهارده بعد ماكتبت مداخلتى الأولى فى الموضوع ده قلت لواحد صاحبى - هوّه عارف نفسه بقى ;) - إنه قد يبدو كلامى متعارض مع ميولى الإشتراكيّه و اليساريّه لكن واقع الأمر ليس كذلك بل هو تطوير وتحديث للمفاهيم اليساريّة والإشتراكية المتشنّجة المتصلّبة

   

عقلى الباطن بيقول لى : ياترى ممكن أفتح الجرنان مرّه ألاقى مظاهرات مليونيّة و إعتصامات شعبيّه عارمة من أجل فكّ تشفير قنوات الإيه آر تى حتّى يمكن للبروليتاريا الكادحة أن تتخلّص من إنسحاقها؟؟!!!!

وعلى فكره......شكوى الناس من الموضوع وتحويله لنحيب و مأساة هو أكبر مثال على ظاهرة التسليع الرأسمالى لمجتمعنا و اللى أشرت إليها فى موضوعى عن مقرطة الديموقراطية على المنهج الليبرالى الأمريكى الرأسمالى , وهى الظاهرة التى ربطت إحتياجات الناس بتسليع أى شيئ من منظور رأسمالى... وأعود لأذكّر بمشهد فيلم اللمبى الذى ظهرت فيه نشوى مصطفى فى دور راقصة إمتهنت الرقص لأنّها تحلم بتغيير الموبايل بتاعها من كارت لخط hpc:!: (ومش عارف البروليتاريا الكادحة هل يمكن تفادى إنسحاقها لو تم ترخيص سعر خط الموبايل حتّى يتسنّى لهؤلاء الكادحين الإفلات من مأساة موبايل الكارت التى تسحقهم؟؟؟)

:rolleyes: :rolleyes:

ياعم سى السيّد الله يسترك hg):: .......إنت مش مشرف؟؟؟ لو فيها بروليتاريا إنقل الموضوع لباب السياسه :lol: :D

[عادل أبوزيد]

إلى كل أحبائنا خارج مصر تصلكم دائما الصورة قاتمة.

و للحديث بقية فى موضوع مستقل.

هنا يا سادة تعلمت أن أتجاهل محتويات الصحف و المجلات فعلا لا يقدمون خدمة حرفية إنهم أقرب إلى ناقلى الدردشة بينهم و بين بعض ... و لتتأكد من كلامى حاول متابعة أى موضوع فى الصحف و المجلات المصرية و إبحث عن أى جهد حرفى فى الكتابات.

ما سبق كان إستهلالا لابد منه

يبدو أننى سأكمل الموضوع هنا منذ سنوات و أنا ألاحظ أنماط الإستهلاك المرتفعة حتى فى المناطق الشعبية و صدقونى كنت ألاحظ هذا بحياد علمى مطلق.

من يطلق عليهم الفقراء يشترون سيارات على الزيرو (لأنهم فقراء و لا يملكون الثمن النقدى فى السيارات المستعملة) إستعمال التليفون المحمول شائع حتى بين الأطفال شراء الوجبات الجاهزة منتشر ... كل هذا و أنا أتكلم عن فقراء مصر

و أول أمس كنت فى زيارة لخالى و سألته عن أحوال البلد - ديروط الشريف فى أعماق الصعيد - فقال لى أنك ترى الناس تأكل اللحم عدة مرات فى الأسبوع - كانوا زمان يأكلونه فى عيد الأضحى فقط و سأعود إلى هذه المعلومة يا دكتور وليد - و ملابسهم تبدو جيدة و يشترون بالتقسيط و مع هذا دائمى الشكوى من الغلاء !!!

و توصلت بينى و بين نفسى إلى تصور أريد أن أطرحه هل هناك فعلا أزمة غلاء طاحنة أم أن الأمر مجرد تقعر من بعض أدعياء الثقافة مثلى ؟؟؟

كنت أود أن أعرض بعض الأسعار هنا و لكن دع ذلك لمداخلة أخرى

[zamalkawy]

سي السيد انا عمل كدة مع اخوية عاملو اشتراك من مصر و هو في السعودية hpc:!:

[فــيــروز]

الحقيقه محبط و الاستاذ عادل ابو زيد قالوا كل ما كنت اود ان اقوله !!

استغرب كثيرا من ان يصير الدش وما يعرضه و احتكار المواد المعروضه هو ما يتحدث عنه عضو متميز فى بريد الاهرام مثل دكتور حسام موافى !! بل انى اشعر بتجنى بالغ منه على صالح كامل .. هو و بعض المشاركين فى الموضوع لا لشئ الا لانه تاجر شاطر لم يجد من ينافسه فصار السوق خاليا له يصول فيه و يجول !!

لماذا ننتظر الدعم فى كل شئ حتى الفرجه على ماتشات الكوره !! اليست هذه متعه ينبغى ان ندفع ثمنها للحصول عليها؟ ولم لا نمتلك ثقافة ادفع مقابل ما تريده !! المواطن البسيط اذا اراد ان يذهب فى نزهه الى النيل وياخد فلوكه مع اسرته الن يدفع ثمن هذه المتعه؟ هل من المفترض ان يطالب الحكومه ان تدعمها له !! لماذا يدفع فاتورة موبيل او ثمن كارت تليفون هو ليس بادنى حاجه له سوى المنظره و الفشخره واما تيجى على الشيخ صالح كامل يبقى الحرامى الاعظم !!

نفس النموذج ينطبق على برامج الكمبيوتر المقلده .. اقسم بالله انه فى احد المنتديات افتى احدهم ان سرقة هذه البرامج حلال لان من صنعها غير مسلمين بينما حرم البرامج المصنوعه محليا لان من صنعها مسلمون !! وحين سالته عن مصدر الفتوى تهرب من الاجابه !! وقال آخر نحن نسرقها لانها غالية الثمن !! فيا ترى هل كل شئ لا نستطيع شراؤه يصير من حقنا سرقته !! عفوا اذا كان لفظ سرقه ثقيل الوقع على البعض .. ولكن لو وضع اى منا نفسه مكان صالح كامل او مكان مبدع هذه البرامج التى تؤخذ دون اى مقابل سوى ثمن الاسطوانه التى تنسخ عليها لعرف قدر الظلم الذى يقع على هؤلاء وحقهم فى ان يشعروا بالغضب لان البعض يحلل سرقتهم لانهم اعتادوا ان يصلهم كل شئ مدعوما حتى ال ART !! وعجبى hpc:!:

[ابو يوسف]

يبقى بالله عليكوا ليه أدفع أكتر لما ممكن أدفع أقل

قوية جداً يا سى السيد ... :lol:

سى السيد يرى الموضوع مثلى و مثل كل طبقة البروليتارليا (عجبانى الكلمة دى لان المثقفين دايما بيحبوا يقولوها !!! )

الشيخ صالح تاجر زكى و بيعرف ازاى يجيب القرش ...

سأل نفسه سؤال ... هما المصريين بيحبوا ايه و مستعدين يضحوا بأرواحهم علشان ايه ؟؟؟

لقى ان الاجابة ....

ماتش كورة !!

على اعتباراننا لعيبة قوى و فرقتنا دايماً للامام ....

ولقاهم اتعودوا ان البلد مصرنا الحبيب بتمن عليهم بالماتشات دى ببلاش .. و تدعمها زى ما كل حاجة كانت مدعمة !!

طيب أبو بلاش خلص ..

و شعارنا الاقتصادى فى الفترة الراهنة .... (اللى ما عوش ما يلزموش hpc:!: )!!

ليه الدكتور ما بعتش يسأل .. فين التليفزيون المصرى العريق ؟؟ :rolleyes:

فين ميزانيته ؟؟ :lol:

فين فلوسنا اللى بيجمعها الجباة ختى على الهوا ؟؟ :lol:

و ليه حكومتنا تسيبنا للى يسوى و اللى ما يسواش يبيعوا و يشتروا فينا ..

مش هو ده السؤال ؟؟؟ :rolleyes:

[se_ Elsyed]

شوف برضوا عمالين يتكلموا على النيل والدشات اللي فوق السطوح وناسيين إن مصر بها ملايين مملينه عايشين في الأرياف ولسه عندهم تليفزيون أبيض وإسود 14 بوصة والإريال عبارة عن عصاية قفص فراخ ...

يا جدعان لا نستطيع أن ننكر بإن هناك فئة عريضة من الشعب تشجع الكوره ودي متعتها الوحيدة في الحياة لأنها لا تستطيع أن تشترك في نادي الجزيرة أو نادي الشمس لممارسة كورة القدم .. فحتى المتعة دي عايزين نحرمهم منها ...

خدوا الحتة دي ... الشيخ شايلوك داخل في مفاوضات جادة مع النادي الأهلي عشان يشفر الماتشات الخاصة به في الدوري من السنة الجاية ويبقى هو صاحب الحق في إذاعتها ..... إزي الحال دلوقت يا برجوازيين ؟

يعني مش هايتبقى للناس غير كاس جزيرة بدران يتفرجوا عليه ...

ففي القاهرة توجد الاف المقاهي ممكن الناس تقعد تتفرج وممكن كمان ياخد اتوبيس العباسية أبو ربع جنيه ويروح الإستاد..

لكن عم صميده الراجل الغلبان اللي في جرجا .. والحاج إزدحمد اللي في سمنود يروح فين ويعمل أيه عشان يتفرج على ناديه اللي بيحبه ؟ ...

إوعى حد يقولي طب ما تخليهم ياخدوا طيارة شارتر وييجوا على الإستاد في مدينة نصر على طول عشان يتفرجوا على الماتش ...

يا حبايبي يا حلوين ... مبدأ pay to watch ده واللى مافيش غيره في أوروبا منتشر عشان كل الناس هناك معاها فيزا كارد وكيبل متوصل جاهز لبيوتها وبيتفرج عالماتش للفريق اللي بيحبه بدولار واحد فقط أي تمن علبة بيبس ..

لكن المصري الموظف او الفلاح الغلبان يعمل أيه ... قولولي يا ناس ... أروح لمين وأقول يا مين ..

[عصام]

كنت أود أن أعرض بعض الأسعار هنا و لكن دع ذلك لمداخلة أخرى

إسمح لى يا أستاذ عادل أن أساعدك فى موضوع الأسعار ده....

علما بأننى لا أحتاج لتوثيق كلامى بدليل لأن كل من يحيا داخل مصر يستطيع أن يؤكد أن تلك الأسعار حقيقية...

[فــيــروز]

اعتقد ان فيه خلط يا س.س. :rolleyes:

كون ان الناس فى مصر غلابه فهذا امر نحن متفقون عليه

لكن من المسئول عن تقديم الدعم لهم؟ هل هو الشيخ صالح ام الحكومه المصريه؟

اعتقد الاجابه معروفه !! اما من يعيشوا فى الريف و تليفزيون ابيض و اسود الى آخره فاعتقد انه نموذج انقرض نوعا ما .. الاطباق الفضائيه منتشره فى الريف يمكن اكثر من انتشارها فى المحافظات الكبرى !! وفلاح اليوم لم يعد هو فلاح الامس المكافح اللى كان بيخبز عيشه فى البيت !! لا هو اصبح زيه زى اهل البندر بيشترى العيش من الفرن و يفضل السمنه الاصطناعى !! ولكن حتى هذا الفلاح .. من المسئول عن دعم السلع "الضروريه" له؟ الحكومه ام صالح كامل !!

لماذا لم يسمى احد شركات المحمول شيلوك؟ لماذا لم يسمى شركة الكهرباء محتكرة الخدمه بالاسعار التى تحلو لها شارون؟ لماذا لم يندد احد بشركة الاتصالات التى تجبى مننا الرسوم و الضرائب اربع مرات فى العام !!

اذا كان النادى الاهلى بصدد بيع حق عرض مبارياته للبيع و الاحتكار ولم يهتم بالجماهير الغلبانه التى تريد ان تتابع مبارياته فهل من المتوقع ان يهتم بيزنس مان بهذه الاعتبارات؟ لماذا لا نطلب من النادى الاهلى الا يبيع حق العرض لجهه تنفرد بالعرض حصريا؟ من الذى سيمكن صالح كامل اصلا من الاحتكار اذا رفضت الجهه المالكه بيعه هذا الحق !!!!!!

ام ان الاسهل ان نلوم الغير ولا نوجه اى لوم لحكومتنا او لنادينا العريق !! يعنى لو النادى فكر يكسب من بيع حق العرض حصريا يبقى عادى ومفيهاش حاجه ولو فكر المشترى ان يكسب يصبح شيلوك !! :rolleyes: عجبت لك يا زمن hpc:!:

تم تعديل 14 مارس 2004 بواسطة فــيــروز

[disappointed]

اذا كان النادى الاهلى بصدد بيع حق عرض مبارياته للبيع و الاحتكار ولم يهتم بالجماهير الغلبانه التى تريد ان تتابع مبارياته فهل من المتوقع ان يهتم بيزنس مان بهذه الاعتبارات؟ لماذا لا نطلب من النادى الاهلى الا يبيع حق العرض لجهه تنفرد بالعرض حصريا؟ من الذى سيمكن صالح كامل اصلا من الاحتكار اذا رفضت الجهه المالكه بيعه هذا الحق !!!!!!

ام ان الاسهل ان نلوم الغير ولا نوجه اى لوم لحكومتنا او لنادينا العريق !! يعنى لو النادى فكر يكسب من بيع حق العرض حصريا يبقى عادى ومفيهاش حاجه ولو فكر المشترى ان يكسب يصبح شيلوك !!  :lol:  عجبت لك يا زمن  hpc:!:

:lol:

رد يا معلّم س-س على الأستاذه

:rolleyes: :lol: :rolleyes:

[Sherief AbdelWahab]

أبو المحابيط:

استياءنا من صالح كامل ليس فقط لكونه مجرد محتكر مباريات كرة قدم فقط..هناك ألف سبب و سبب..أولا لكونه محتكرا..محتكرا فوق القانون و فوق الصحافة و فوق الكل كليلة..لم يتحدث أحد عن ممارساته الاحتكارية لأنه يطعم الفم الصحفي فتستحي العين!..و هناك إشاعة شديدة القوة بأنه كان مع آخرين وراء مناقشة قانون الاحتكار إلى ما لا نهاية!

ثانيا..لكونه يستغل الدين بشكل منفر ..هذا الرجل الذي يطالبنا باحترام الملكية الفكرية باسم الدين هو نفسه الذي يقدم برامج معظمها مسروق من قنوات البتوع و الطراطير..و الأمثلة كتير..

ثالثا..أصبح هذا الرجل يحشر أنفه في شئوننا بشكل منفر..هذا الرجل ينفق على مركز للاقتصاد الإسلامي يطرح قوانين للمناقشة في مجلس الشورى!..أمر في حد ذاته مخيف..في الوقت التي تحتجب الأحزاب السياسية - اللي بتقول عليه حكومة البيه عاطف شرعية - عن تقديم مشاريع قوانين للمناقشة في المجالس النيابية المصرية يأتي مركز ممول من الخارج في قلب الأزهر الشريف ليحول نفسه إلى حزب سياسي!..بغض النظر عن قصة قانون الزكاة التي نعرف جميعا أن فيها ألف إن و إن!

رابعا..احتكار الشيخ صالح كامل لا يشمل فقط كرة القدم ، بل يشمل الأفلام المصرية أيضا..والأفلام المصرية بغض النظر عن مستواها منتج ثقافي مصري..بصفته واجهة لخالد الذكر الوليد بن طلال مجمد الأراضي في توشكى المصرية!..

رجل يتحكم فعليا في تليفزيون أكبر دولة في المنطقة..و لا تريدون من أهل أكبر دولة في المنطقة أن يبدون مجرد استياء!

باي ذا واي: ديننا حلل التجارة ، و جرم الاحتكار..و للرسول صلى الله عليه وسلم حديث ما معناه : من احتكر فهو آثم..

العزيزة فيروووز:

العكس هو ما يحدث..سابوا صالح كامل و مسكوا في عز..و كأن كل المصريين يعيشون في عز!..و من يقرأ ما كتب عن أحمد بن عز يستشعر - تماما - أن كل بيك ممن كتب يملك عمارة و اتنين و تلاتة وعايز يبني لكن بن عز يلهب السوق بأسعاره!

خلص الكلام

[se_ Elsyed]

حاضر هارد يا وليد يا مسخناتي .... شعللها أنت بس وأجري...

بالتأكيد صالح كامل هو ليس كل المشكلة لكنه الجزء الأكبر والأهم ... فهو عامل زي الشيطان اللي بيزين للإنسان سوء عمله فييجي يشخلل بملايينه للتلفزيون المصري وللأندية علشان في الاخر يتحكم هو في الناس ويبقوا تحت رحمته .....

وإذا كانت التجارة بقت عبارة عن إحتكار وذل للانسان يبقى بلاها تجاره وخلينا في الزراعة ....

وأعتقد وأبصم بالعشرة بإنها ليست مسألة تاجر شاطر وعرض وطلب وآليات الإقتصاد الحر وكلام من ده ... ولكنها مسألة ناس بتاكل وبيترش عليها فلوس بالعبيط وبالتالي بيصهينوا وبيبعوا حتى بلدهم ...

اما من يعيشوا فى الريف و تليفزيون ابيض و اسود الى آخره فاعتقد انه نموذج انقرض نوعا ما .. الاطباق الفضائيه منتشره فى الريف يمكن اكثر من انتشارها فى المحافظات الكبرى

أبداًمش صحيح يا فيروز ... إوعي تبصي على عواصم المحافظات أو زي ما بنسميها البندر ... إنزلي الأرياف اللي بيعتمدوا على الزراعه وهاتشوفي بعينك حياتهم البسيطة وقد أيه هما بيعانوا ...

أنا مابقولش نعملهم إشتراك في أوربت ولا أي قناة مشفرة .. بس على الأقل نسيب لهم التليفزيون أبو بلاش ...

[Sherief AbdelWahab]

الخبر اللي جاي دة بقى جديد..

http://al-araby.com/articles/900/040314-11...1-900-fst03.htm

دخلت القنوات الفضائية العربية سباقا محموماً للاستيلاء على أكبر عدد من الأفلام السينمائية واحتكار بثها. فى الأسبوع الماضى قرر مجلس إدارة شركة فنون (هيرمس) بعد مداولات امتدت الى 18 ساعة كاملة بيع أصول عدد من الأفلام المصرية بلغت 800 فيلم الى قناة روتانا التى يمتلكها الأمير السعودى الوليد بن طلال.

الأفلام التى بيعت بمبلغ 60 مليون دولار كانت (هيرمس) قد اشترتها من السوق المصرى وسط ضجة من السينمائيين والمهتمين بالتراث المصرى فى هذا المجال ووصلت القضية الى المناقشة تحت قبة مجلس الشعب، اجتماع (هيرمس) شهد مفاجأت حيث كان من المتوقع ان يصوت علاء الخواجة أكبر المساهمين فى الشركة لمصلحة صديقه الشيخ صالح كامل الذى دخل منافسة مع الوليد بن طلال لشراء الأفلام المصرية التى بحوزة شركة فنون، وفاز فى السباق الأمير رغم تأكيد الشيخ صالح أنه يدخل المعركة على جثته للفوز بالأفلام لمواجهة تعثره المالى البالغ 1.3 مليار دولار، ومن المعروف أن الشيخ صالح كامل كان قد اشترى نحو 1200 فيلم سينمائى لاحتكار عرضها على قناة الأفلام فى باقة A.R.T. ورغم بدأ المزاد بـ 35 مليون دولار إلا أن الأمير الوليد بن طلال وصل عرضه الى 60 مليون دولار، وجاء عرض (هيرمس) بيع هذه الأفلام بعد أن وصلت مديونياتها الى نحو 30 مليون دولار وفى إطار الصراع بين الشيخ والأمير قرر الشيخ صالح دخول ميدان الانتاج السينمائى ليتمكن من امتلاك جميع الأفلام المصرية الجديدة، ومن جانبها قامت روتانا بالبدء فى بث قناة فضائية جديدة تحمل اسم (روتانا كليب) ومن المنتظر خروج قناة أفلام مفتوحة وليست مشفرة مثل قناة A.R.T المملوكة للشيخ صالح،

و الحتة اللي جاية دي شديدة:

وينوى الأمير طلال ضم قناة النيل للمنوعات الى مجموعة روتانا وجرت مفاوضات لبيع القناة مقابل 10 ملايين دولار على أن يكون نظام البيع والاحتكار طبقاً لنظام الـ B.O.T حيث يسترد ملكيتها التليفزيون المصرى بعد عشر سنوات.

أقول لتليفزيوننا : كنتي فين يا لأ لما قلت آآآآآه! :P

خلص الكلام

[Katamando]

سؤال هل المباريات الودية مشفرة أيضاً؟؟؟

وهل من الممكن أن تصبح تلك هي الحالة ولو بعد فترة؟؟؟؟؟

[se_ Elsyed]

سؤال هل المباريات الودية مشفرة أيضاً؟؟؟

وهل من الممكن أن تصبح تلك هي الحالة ولو بعد فترة؟؟؟؟؟

لأ يا باشا لسه ما أتشفرتش ...

روح بقى أتفرج وإتبسط على منتخب مصر قدام ترينداد وتوباجو فاضل ساعة عالماتش