أكلات صيامى....

[SoSo R]

مساء الخير يا جماعة..

بهنى الأقباط بالصيام الكبير...عارفة إنى متأخرة شويتين فى التهنئة بس ظروفى مش مساعدانى أفتح مواضيع...

المهم...

أنا دورت هنا فى المنتدى على وصفات صيامى و مالقتش...

وفكرت نعمل الموضوع دة مرجع للمستقبل للوصفات الصيامى...

طبعا لو أخواتى المسلمين عندهم أفكار ينورونا وهابقى سعيدة جدا بمشاركتكم...و عشان كدة هدى فكرة بسيطة عن الوصفات اللى محتاجينها...

الصيام دة مافيهوش سمك وبالتالى الحاجات المتاحة بتكون قليلة قوى و مع طول المدة الواحد بيزهق من تكرار نفس الأصناف...فمحتاجة مساعدة منكم

محتاجين وصفات فيجتيريان...

تكون مكونة من خضروات أو بقول أو عجائن...

وتكون خالية من اللبن ومنتجاته...البيض...الزبدة و طبعا اللحوم...

أنا كان عندى وصفات كتير بس التنقل من بلد للتانى ...كل حاجة ضاعت منى :happy:

محتاجكم تشدوا الهمة...معايا

لسه فاضل تقريبا شهر على الصيام

مستنية أفكاركم

سلام :happy:

[doha]

المسقعة .. باذنجان وزيت وطماطم وبصل وثوم وخل وممكن فلفل اخضر ..

البطاطس المسلوقة بالملح والتوابل وتنهرس مع فص ثوم وشويه زيت صغيرين ..

شوربة العدس وفتة العدس والعدس بالشعرية .

الكشري ..

البيتزا والعجينة هتكون بالزيت وهنستبدل اللحوم بالمشروم الطازج .. ( اعملي سيرش في النت على عجينة العشر دقائق دي رهيبة وممتازه وسريعه ونتيجتها دائما مضمونه .. )

السبرينج رولز بالخضروات ..

فطائر السبانخ عجينة العشر دقائق محشية سبانخ متشوحه مع بصل وسماق ..

الفتوش اللبناني ( سلطة عليها عيش متحمر في الزيت او متحمص في الفرن )

[اغابي]

استنو احضرلكم نفسي شوية كده - واكتبلكم وصفات بجد جميلة

:happy:

[goodfaith]

ازيك يا سوسو وحشاني .. اخبار البنات ايه

ممكن تجربي الفرايد رايس حلو وتغيير عن الاكلات بتاعتنا

رز ابيض مسلوق وبتيجي في مقلاية كبيرة تحطي شوية زيت وجزر مكعبات صغيرة وبسلة وممكن فلفل الوان طبعا في العادي انه قبل كل ده بتحطي بيضتين ووبتسويهم كويس في الزيت بحيث يبقوا فتافيت بس بما انه رز صيني صيامي بلاش البيض دلوقت

صويا صوص وصوص تاني اسمه استني هاروح اشوف لك اسمه

OYSTER SOUCE

هتلاقيه جنب الصويا صوص او في ركن الاكل الصيني في اي محل

ممكن تحطي اي خضروات انتي بتحبيها وطبعا في النهاية بتضيفي الرز الابيض وبتقلبيه كويس وبعد ما بتطفي النار بتحطي بصل اخضر مقطع رفيع وبتقلبيه وبالهنا والشفا

نفس القصة دي ممكن تعمليها بالنودلز بدل الرز بس انتبهي ان النودلز متكونش بالبيض

لو افتكرت تاني اي حاجة هارجع اكتبهالك وبجد سعيدة اني شفتك :happy:

[jasmin hamed]

كل سنه و انتو طيبين

وصفه اكله بسيطه للافطار او العشاء (مغربيه ) اسمها فلفله و ما طيشه (الماطيشه بالمغربى يعنى طماطم )

تسلق الطماطم لمدة 30 س و تقشر و الفلفل يقلى نص قلى و بعدين و خوه سخن تحطيه فى كيس عشان يتقشره و بعدين تقطعى الطماطم و الفلفل

و فى طاسه تحمر الثومه و توضع عليها الفلفل و الطماطم بتطلع ذى الشكشوكه بس بعد ممكن اكل منها اطنان

كسكسي السبع خضروات

تحمرى ثوم و بصل مفروم صغير و بعدين تحطى عليهم طماطم مقشره و

تقطع السبع خضروات و ه) كوسه قرع كرنب افرنجى جزر لفت او بطاطس و قرنبيط ) الى قطع كبيره جدا متساويه و توضع فى الحله التوابل القرفه و القرنفل جوزة الطيبو كمون و كزبره رشه كركم و لو فيه زعفران وممكن ماجى خضار

بعد ما يستوى تصفى الميه الى نزلت من الخضروات و و تزودلها ميه مغليه وديه تسقى بيها الكسكسى

الاكل الهندى على فكره فيه وصفات نباتيه كتير هاحاول اكتبها بعددين

اروح اكولى حاجه عشان جوعتونى

[myusername]

الدكتورة سوسو بنت رانى... كل سنة و حضرتك طيبة..

ممكن تاكلوا قلقاس كنوع من التغيير؟ :P

متهيق لى ان عندكم فى كندا.. الكثير من انواع الخضروات و الفواكه... اللى اذ ربما مبنسمعش عنها هنا فى مصر.. و ده يدى لحضرتك فرصة اكبر فى تنوع الاكلات و الاطباق... بدل ما تكون اكلات روتينية متكررة.

القرنبيط جميل جدا... مع سلطة الطحينة.. و كمان مفيد للقلب و بيدى الجسم طاقة (على ما اسمع)... مش عارف لو عندكم قرنبيط فى كندا ولا لا.. smk: و طبعا يتاكل مع العيش.. بس ممكن حضرتك تجربى طريقة جديدة و تقطعيه حتت.. و تاكليه مع المكرونة مثلا.. :) دى فكرة لسه جاية فى دماغى دلوقتى..

و برضه ممكن المحشى.. بكل انواعه..

بالنسبة للحلويات.. انا سمعت عن حاجة اسمها "جاتوه صيامى".. مش عارف بيتعمل ازاى, بس ممكن حضرتك تشوفى وصفات عالنت لو موجودة..

و ممكن لو تعملوا زلابية و لقمة القاضى؟ حاجات حلوة ممكن تتعمل فى البيت بسهولة..

و دى طريقة جلاش بالتفاح.. منقولة من احد مواقع الاخوة الاقباط عن الاكلات الصيامى:

جاتوه الجلاش بالتفاح

المقادير

نصف كيلو جلاش او ورق بقلاوه -

3 ملاعق كبيره زيت او سمن نباتى

3ثمرات تفاح -

4ملاعق كبيره سكر بودره -

ربع ملعقه صغيره قرفه-

ملعقه صغيره عصير ليمون -

2 ملعقه زبيب .

الطريقة:

يغسل التفاح ويقشر وينزع منه القلب والبذور

يقطع التفاح مكعبات صغيره ويخلط مع الزبيب والسكر وعصير الليمون والقرفه ويترك فى الثلاجه لمدة (1-2)ساعه

تفرد ورقة من الجلاش وتطوى نصفين وترش قليلا بالزيت او السمن النباتى

ثم يوضع فى وسطها ملعقه كبيره من الحشو السابق اعداده ويطبق الجلاش ويلف كالاصابع

تكرر العمليه حتى ينتهى المقدار كله

ترص الوحدات فى صينيه مدهونه بالسمن النباتى او الزيت خفيفا ثم يرش الوجه بباقى

الزيت

تخبز فى فرن هادى الحراره حتى يصبح لونها ذهبيا تخرج

ترص وحدات الجاتوه فى طبق التقديم ويرش الوجه بسكر البودره

مرة تانية.. كل سنة و حضرتك طيبة.. و يا رب تكونوا بخير دايما.. و اكيد لو حضرتك دورتى فى السوبر ماركت.. هتلاقى انواع خضروات ليها العجب..

تم تعديل 8 مارس 2010 بواسطة myusername

[fatfouta]

كل سنة وانتوا طيبيبن يا سوسو

وخدى بالك من الاكل خصوصا لقطاقيطك عشان انتوا لسه قايمين من دور عيا........حمد لله على سلامتكم

كان زمان عندنا واحدة جارتنا مسيحية كنا بنستنى ايام صيامهم عشان تعملنا اكلة كانت بتسميها موتوهلاك(موت وهلاك) مش عارفة كانت بتسميها كده ليه

هى كانت بتعملها وتجيبهالنا واحنا كنا بنحبها اوى واتعلمناها منها

الاكلة عبارة عن فول مدشوش وبيتعمل صلصة كده ذى اى طبخة بعد ماتكونى بليتى الفول قبلها بيوم

تحطى الفول على الصلصة عادى وتسيبيه عالنار لغايت مايستوى ومش بياخد وقت لانه بيكون طرى اساسا بس احنا بنحطه فى الصلصة عشان يا خد طعمها

وبعد كده بنعمله دقة ذى بتاعة الكشرى (لو مش عارفة طريقتها قوليلى)

وترشي الدقى على الطبقى اللى انتى هتاكلى فيه وبس من فوق

والله بتبقى جميلة واهى صيامى وبالهنا والشفا يا حبيبتى

[Salwa]

صباح الخير ياسوسو ..

انا ممكن اقولك طريقة اكلات كتيرررر قوى قوى ...بس دلوقت عاوزاكى تجربى تعملى ال..اسكاليبادا .

على فكرة انا سبق لى وكتبتها هنا زمان ..

هى بسيطة قوى وسهلة قوى قوى ..

عبارة عن ...فلفل احمر وبدنجان وبصل..

كله مشوى ....وطبعااا بعد الشوى اشيلى القشر ..هههههه.

تقطعيه شرائح وتضعى عليه زيت زيتون وملح وفلفل وعصير ليمون ..

ممكن تعمليها بفلفل احمر وبدنجان بس...زى ماتحبى يعنى .

وممكن كمان تشوى بطاطس ....وتعملى حركة كدة يعنى ...تقسمى البطاطساية بعد الشوى من النصف .

وتكونى عملتى الخطة بتاعة الفلفل والبدنجان ووضعتى الملح والفلفل وعصر الليمون ...وتحشى كل نص بطاطس بالحشو ده وتقدميها بطريقة شيك ..

اصل الولاد بياكلوا ...بعنيهم الاول .

حكتب لك طرق تانية كتير..

صباح سعيد جدا جدااا..

[عنبو]

كل سنه وانتم طيبون

هى المفروض طيبون ولا طيبين

طيب علشان ابقى فى السليم كل سنه وانتى طيبه كل انا فى السليم

موضوع الاكل ده انا ماليش فيه

[جايه لك يا كندا]

ازيك يا سوسو، كل سنه وانتي طيبة يا جميل وبناتك القمرات بخير وصحه يارب.

موضوع جميل فعلا ومطلوب لناس كتير حقيقي

:P شوفي يا ستي جايبه لك معايا موسوعه كامله عشان مايبقاش نفسك في أي حاجه ومتلاقيهاش يا قمر (عشان مايبقاش عندنا حجة ياباشا). :)

http://www.st-demiana.com :)

وبألف هنا وشفا مقدما وماتنسيش تبعتيلي شويه من اللي هاتعمليه، ابعتي طبق مع أي عيل صغير ده انا جنبك على طول انتي عارفه فركه كعب smk:

نهارك سعيد يا أحلى سوسو ;)

[عبير يونس]

كل سنة وانتي طيبة يا أحلى سوسو

الحقيقة الجماعة هنا ما خلوش حاجة تتقال

و خللوا الواحد جاع مع اني لسه متغدية من شوية

:wub:

هي فعلا الخضراوات هي الأنسب في الفترة دي

أنا بأعشق البطاطس بكل وصفاتها

و بأعمل البيوريه من غير بيض و لا لبن

بس بالزيت وملح وفلفل وشوية مية مغلية صغننين اوي

على فكرة ان بأضيفها للمكرونة بدل الباشميل و بتبقى خرافة

و ممكن تستبدلي اللحمة المفرومة بسبانخ متشوحة مع بصل

أو بسلة برضه متشوحة مع بصل

و كده تاكلي صينية مكرونة تحفة

و بجد البطاطس أحلى من البشاميل

جربي و ادعيلي

بألف هنا و شفا

:wub:

و سلامي للقمرات الصغيرات

:closedeyes:

[SoSo R]

مساء الخير تانى:

طبعا أنا متشكرة قوى لكل اللى شارك...دة الحبايب كلهم إتجمعوا :o

أنا بس عايزة أقول حاجة و بليل هارجع أرد بالتفصيل...

أختكم عندها القولون :)

يعنى البقول و توابعها و حتى المعجنات بتموتنى...و بافضل طول الصيام باخد فى علاج...

وبعد الصيام بقى كورس مكثف من العلاج...تقدروا تقولوا إن 90% من الأقباط بيشتكوا من القولون...

المشكلة بأه إن المتاح هو فول ..طعمية..بصارة..عتس...

رحمتك ياراااااااااااب

عشان كدة باسألكم على إفتكاسات جديدة

تانى مشكلة الخضار لوحده أو حتى مع رز بيجوع جدا...يعنى الأكل بيتهضم قبل ما تقوم من ع السفرة...لغياب البروتينات...

يبقى عايزين حاجات تقفل التنك بس ما تتعبش القولون

أنا هبتدى بإقتراحات لوجبة الفطار...

زى

سندوتشات الحلاوة.....باكرهها :dirol:

مارجرين مع مربى بدل زبدة مع مربى

فول و طعمية...هنروح منهم فين؟!!!

جارليك بريد بالأعشاب...

سندوتشات زيتون

كراكرز بالجبنة الصيامى..

قراقيش أو بقسماط...حد يلحقنا بطريقة تكون صيامى و سهلة

جلاش بالمكسرات

ممكن الحاجات دى تكون برضه كعشا أو بين الوجبات...

راجعالكم بليل عشان أرد نااااااافر....نااااااااااافر

سلام :old:

[طبيبة مصرية]

د-سوسو

كل سنة وانتم طيبين ويا رب السنة الجاية مع الحبايب متجمعين.......

سلامى للبنوتات الحلوين...........

بس ده اسمه كلام بقى

يعنى انا رحت وشمرت وحمرت وصورت mfb: ..........

وفى الاخر تطلع البقول بتتعبك :blink:

الف سلامة عليكى :lol: ..........

بصى انا هاكتبلك الوصفة ويمكن تعجبك وتجربيها............

هى اكلة هندى تعتبر من المقبلات بس جنب البطاطس المحمرة او البيوريه والسلطة تنفع وجبة غدا حلوة اوى ويبقى تغيير طعم........

هى عبارة عن اقراص بتتعمل من اللوبيا وحمص الطبيخ وتشكليها وتحمريها فى الزيت يعنى نفس فكرة الطعمية بس اخف بكتير..........

المقادير:

نص كيلو لوبيا

كوب حمص طبيخ

بصلة كبيرة مقطعة قطع صغيرة

ورق كارى مقطع صغير(خضار هندى شبه ورق الملوخية)بيدى نكهة حلوة اوى ..........

فلفل حار مقطع صغير

ملعقة صغيرة بيكنج بودر

ملح-فلفل

الطريقة:

تنقعى اللوبيا فى مية حوالى ساعة وبعدين تفركيها جامد بايديكى علشان تنزعى القشرة بتاعتها تماما والمية هتسهل المهمة دى.........

وتضيفى عليها حمص الطبيخ وتكونى برضه نقعتيه شوية .........

تضربى فى الخلاط مع اضافة شوية مية مش كتير يا دوب علشان الخلاط يلف معاكى...........

ضيفى البصل وورق الكارى والفلفل الحار والبيكنج بودر والملح والفلفل وقلبى كويس...........

شكليها بايديكى وحمريها فى الزيت .........

وبالهنا والشفا

الخطوات بالصور

تم تعديل 9 مارس 2010 بواسطة طبيبة مصرية

[ramyfathalla]

أنا سعيد جدا بالتوبيك الجديد بتاع حضرتك يا د/ سوسو و كل سنة و أنت و جميع الأقباط طيبين

أنا أسف انى خرجت برة الموضوع بس فرحان ان د/ سوسو ما زالت معنا هنا و ما رحلتش زى الباقيين و حبيت أرحب بها

المهم يا د/ سوسو أنا لى صديق قبطى و هو بيتعب جدا من الصيام و قاللى انه أخد حل من القسيس لكى يفطر

يعنى المقصود طالما فيه رخصة للافطار للانسان اللى بيتعب قوى كده مثل ما عندنا فى الاسلام يبقى الافطار أفضل له

و لا يكلف الله نفسا الا وسعها و أكيد ربنا يجازيكى حسانات على قد اخلاصك فى الصيام

و أكيد النساء كتير فى المحاورات و عندهم أكيد بدل الوصفة 100 وصفة و ربنا يصبرك ويقويك على تكملة الصيام و هانت يا د/ سوسو فاضل أقل من شهر

أسف كمان مرة على عدم تقديم أى اضافة فى الموضوع

[jasmin hamed]

صباح الخير

على فكرة بما ان حضرتك قولونك تعبان وصفه سريعه صيامى على الماشى

الصبح قبل الفطار حبيتين تين مجفف كل يوم كمان ممكن تقطعى تين و مشمش مجفف و تنقعيهم فى لبن صويا و يبقى ده الفطار

و ممكن قبل ماتنامى حبيتين تين برده و انشاء الله اليوم هيمشى كويس و تاكلى الزلط

[اغابي]

الف سلامة عليكي يا سوسو

انا عاوزة اقولك فيه اكلات اخف واجمل

يعنى انا نهاردة عاملة الاكل داه اولا وثانيا وثالثا خفيف

لكن رابعا ابعدي عنه - خدو عندكم الاكلات دي

اولا : ملوخية خضرا صيامي

المكونات

مكعب خضار ماجى - بصلة مبشورة - طماطم واحدة بس مبشورة - عدد 2 فص توم

- حزمة كزبرة خضرا مفرومة- 4 ملاعق زيت

الطريقة :

بنحط الحلة على النار و فيها كمية 3 لتر ميه ونحط البصلة و حبة الطماطم ومكعب الخضار وملح ونسيبهم على النار لغاية ما نشم ريحة الشوربة بدأت تظهروكمان البصلة المبشورة استوت تمام فى الشوربة واذا احتاج ميه زودي ميه مفيش مشكلة بعدين

بنضيف الملوخية الخضرا اللى مجهزاها عندى والكزبرة الخضره وقبل ما يبدأو يغلو بنكون حمرنا التوم فى الزيت بس يفضل لون التوم يبقي ابيض مش ذهبي ونحطهم فوق الملوخية ونسيبهم على النار لمدة 3 دقائق فقط حتى تمتزج الملوخية مع التوم – بس صدقونى طعمها جميل جدا

ثانيا : قرنبيط مقلى

نسلق القرنبيط نص سلق ونجهز التغميسة بتاعته – وهى بنجيب طبق فيه شوية ميه ومعلقتين دقيق وحبة طماطم مبشورة وحبة توم مبشورة وكزبرة ناشفة وكمون وملح ونخلطهم ونغمس القرنبيط فيهم ونقلى فى الزيت بيبقي جميل جدا

ثالثا : التبولة

2 – 3 حزمة بقدونس – معلقتين زيت زيتون – ربع بصلة مبشورة – نص كوباية برغل ناعم – حبه طماطم مبشورة – 2 عود نعناع اخضر مفروم كويس

يمتزج الكل مع معلقة خل ابيض وملح

رابعا : بليلة حمص

بنكون منقعينه فى المية من قبلها ب8 ساعات تقريبا وبعدين بنغليه ونسويه فى نفس الميه اللى متنقع فيها وبيكون لونها اصفرمع بصلة واحد كبيرة و2 فص توم صاحى مش مبشور ولما يستوى بنجهز الخبز العادي البلدي مثلا رغيف او حسب الطلب ونقطعه مكعبات بالسكينة ( 2سم × 2سم ) ونقلي الخبز فى زيت ولما يخلص بنرش عليه شوية زعتر ناشف وبيتقدم مع طبق بليلة الحمص

:lol:

[عادل أبوزيد]

سعدت للغاية بهذا الموضوع من منطلق أن نعرف بعضنا كثير من المسلمين و خاصة الأجيال الجديدة لا يعرفون شيئا عن حياة المسيحيين ، و لم يكن الأمر كذلك قبل عقدين أو ثلاثة من الزمان.

ما سبق كان إستهلالا لابد منه

قضيت فترة من حياتى فى إنجلترا و هناك رأيت أنواع كثيرة من الأطعمة منها الأطعمة النباتية و كانت تقريبا لا تفترق عن الطعام العادى السائد فى البلد عدا أنها نباتية ، و يود هامبورجر نباتى و لحم نباتى مصنوع من فول الصويا.

و مجرد البحث فى الإنترنت أو حتى فى المكتبات عن vegetarian food ستجدين عدد كبير مثال http://www.vegsoc.org/cordonvert/recipes/mainlist.html

أكيد يمكن أن يتسم حديثى هذا بالسذاجة أو الجهل فربما هناك متطلبات أخرى فى قائمة الطعام الصيامى للإخوة المسيحيين تختلف عن قوائم الطعام النباتية المنتشرة فى العالم.

و دعينى أصيغ سؤالى هل هناك فارق بين الطعام النباتى و الطعام الذى يتوافق مع الصيام الكبير للإخوة المسيحيين المصريين.

[arora]

اهلا حبيبتى سوسو

كل سنة وانتى طيبة

هانت هانت كلها شهر ويخلص الصيام

ولو ان فترة الانقطاع لغاية الساعة 3 او لحد غروب الشمس بتهون الامور كتيير

الواحد يفطر (يعتبر غدا او قول عشا ) على طبق الفول المتين

او على الخضار والرز وتقفل لغاية اخر النهار يا دوبك يقسماطة مع شوية شاى او فاكهة ودمتم

بس اناشوفتلك طريقة الفاهيتا

اوعى دماغك تروح لبعيد :lol:

دى فاهيتا مشرووووووم

ودى عبارة عن

علبة مشروم كاملة (او فريش)

3 ثمرات فلفل الوان

نصف كوب زيتون اسود او اخضر

بصلة مقطعة جوليان (يعنى شكل هلالى )

10 فصوص توم

الطريقة

يحمر الثوم فى قليل جدا من زيت الزيتون على نار هادئة

ويضاف البصل

ثم يضاف الفلفل الالوان

ثم الزيتون

ثم المشروم (كله على نار هادية )

ويغطى ويترك حتى يتم سوا المشروم بحيث لا يدبل الفلفل تماما

يضاف الملح والفلفل الاسود مع مراعاة ان الزيتون يعطى قليل من الملح

وبالهنا والشفا

ملحوظة ممكن اضافة الفاهيتا للمكرونة الاسباجيتى وتاكلى احلى مكرونة

يارب تعجبكم

ويضاف ربع كوب ماء

تم تعديل 10 مارس 2010 بواسطة arora

[لونا]

كل سنة و كل اخواننا النصارى طيبين

اقتراح بسيط للأكل الصيامي ممكن نعمل

السمبوسة بالسبانخ

بنشوح بصلة في زيت زيتون و نتبلها بالملح و الفلفل

ثم نضيف لها السبانخ المقطعة كبير يادوب تدبل ( لو مش صيامي ممكن إضافة جبن مبشور )

و تحشى بيها السمبوسة و تقلى

وفي طريقة ظريفة بحبها

رقائق السمبوسة

باجيب شرائح السمبوسة و أقصها بالمقص على شكل مثلثات

و المثلثات دي إما نقليها في زيت غزير

أو نضعها في صينية و نقلب عليها معلقتين زيت ..و على الفرن

بتطلع كرسبي و روعة الولاد بيحبوها أوي و في الفرن بتكون خفيفة كمان

الطريقة الثالثة للسمبوسة

السمبوسة الحلوة

نكون مجهزين شراب سكري (شربات )

ولما تطلع مثلثات السمبوسة من القلي و هي ساخنة نحطها في الشربات البارد

برضه حلوة أوي و سهللللة جدا

تحياتي

[ريمون]

كل سنه و الجميع طيبيين :wub:

بالنسبه للشباب الغلابه الوحدانى! عليكم و على الاوتميل Oat meal

حت حبه فى طبق من العلبه و زود عليه ميه بتغلى, يدوب تغطيه.

سيبه 5 دقايق

حط عليه زبيب و جوز هند و مكسرات

و ادعيلى!

لو بتجوع بسرعه و محتاج بروتين زود Whey protein powder

الطبق خفيف و مغذى و فيه بروتين و بيشبع md2: