مؤتمر إصلاح المزاج العربي

[Sherief AbdelWahab]

تعالوا نستوحي من المؤتمر عديم الفائدة المقام في مكتبة الاسكندرية عن الإصلاح العربي مؤتمرا يقام في الباطنية لكل أصحاب المزاج العرب الذين يرون في ضرورة إصلاح المزاج العربي حتى يصلح حال البلاد و العباد!

خلص الكلام

[عصام]

السادة الأفاضل....حشيش...أفيونة...بانجومان

إتفضلوا الميكروفون معاكم

[se_ Elsyed]

اللـــــــــه أنا باحب قوي أحضر الإجتماعات اللي زي دي .. بس أضمن منين إن قوات مكافحة المزامج مش هاتيجي تلمنا ؟..

ما علينا ندخل على محضر الإجتماع :

زعيم 1 : إحنا أجتمعنا هنا النهاردة يا رجالة عشان نصلح من نفسنا .

زعيم 2 : إزاي يعني يا معلم .. عدم اللامؤخذه مش واخد بالي .

زعيم 3 : انا أقولك إذا .. اصلي عندي فكره عن العُبارة .. حيث إن صبياننا بتوع العلاقات الخارجية إجتمعوا في الأول وحطوا مسودة للقاعدة دي .

زعيم 2 : قول يا باشا ربنا معاك .

زعيم 3 : إحنا بالصلاتو عالنبي عايزين نصلح شعوبنا ونصلح نفسنا ونصلح بوابير الجـــــــــــــاز .

زعيم 1 :بوابير جاز أيه يا عم السمكري .. إنت مش هاتنسى شغلانتك القديمة بقى ، قصدوا يا جماعة إن إحنا مانستناش أمريكا لما تيجي تظبطنا لذلك كل واحد يظبط نفسه بنفسه.

زعيم 4 ( وده كان نايم وصحي على سيرة الأنفاس ) : الله حلوه حكايه تظبيط النفس دي ... يا سلام أمريكا دي فيها الخير والله إنها مهتمية بأنفاسنا .

زعيم 1 : إنتوا أيامكوا سودا أنا عارف ... أنا بأحذر إن الخطر جاي راكب رهوان يا رجالة وده هايبقى أشد من خطر أحمد رشدي أيام ما كان وزير للداخلية وكان مربيلنا الرعب .. أمريكا مابتعرفش أبوها .. وأديكوا شفتوم المعلم صدام والمرمطة اللي إتمرمطها ...

حد يكمل أنا مش شايف حاجة من الدخان اللي معبأ المكان

[moody00x]

يا معلم سيد

لو مالقتش عرفة الجامع تحب اجيب لك أى نوع معايا فى الزيارة؟

[se_ Elsyed]

يا معلم سيد

لو مالقتش عرفة الجامع تحب اجيب لك أى نوع معايا فى الزيارة؟

للاسف يا مودي مابحبش الحلويات ... ممكن لو سمحت تمن جبنة أسطمبولي ولو مافيهاش رزالة تجيبلي معاهم خرطوشة سجاير سوبر من الطويلة دي ... مش ليه دي عشان الشاويشية بتوع المنتجع ..

شكل شريف عبد الوهاب زقني في الموضوع وهرب ووقف هو في الناشف

[Sherief AbdelWahab]

استطاع مراسل قناة مزاج تي في أن ينقل فقرات هامة من الجلسة الافتتاحية لمؤتمر إصلاح المزاج العربي..

رحب رئيس الوفد المصري بالضيوف ، و بدأ خطابه بإدانة العملية الأخيرة التي قامت بها سلطات مكافحة المخدرات ضد أولاد حنفي في الصعيد المصري، واصفين إياها بالتدخل الأمريكي السافر في شئون المزاج المصري..

وشدد رئيس الوفد المصري على "وحدة المصير" التي تجمع جميع الكييفة العرب ، فكلنا - و الكلام له - نكركر من جوزة واحدة!..

و أكد أنه يجب أن يكون مزاج العرب للعرب..و أن الكييفة العرب سيرفضون أي إصلاح مزاجي يفرض عليهم من الخارج..و أن إصلاح المزاج يجب أن يبدأ من الداخل أولا!..

و على هامش المؤتمر تعقد جلسات عمل مشتركة على عدة محاور..فهناك في غرزة للو ورشة "الباطنية العربية المشتركة" ، و في غرزة الأقرع ورشة عمل "مقاطعة مخدرات قتلة الشعوب"..أما غرزة أبو سيف فتشهد ورشة "تجديد الخطاب الكيفي و تحديات العصر"..

و قد عقدت الجلسة الافتتاحية وسط إجراءات أمن مشددة ، فقد وقف ما يزيد على التسعين ناضورجيا على حدود الباطنية تحسبا لأي هجوم محتمل من مكافحة المخدرات..و قد هيأت اللجنة المنظمة كل وسائل الإعاشة للوفود الزائرة من جميع أنحاء العالم العربي في المناطق العشوائية المجاورة التي يصعب على البوليس الوصول إليها.. :P

خلص الكلام

[afiona]

عقلى الباطن: سي السيد ده طلع غلبان على الرغم من فنجرة البق اللى عايش فيها، وتم إستدراجه بمنتهى السهولة لموضوع يودى فى داهية..

ياللا، أخد الشر وراح....

آسف لعدم المساهمة فى هدا الموضوع لسبب إصابتى بحواجبى وهى إصابة بالغة تمنعنى من الكتابة....

أفيونة

نائب أمين عام الجامعة العربية لشئون الكيف

[R.M.G.]

ياريس عايزين نناقش الميزانية ونعرف كل"قرش"بيروح فين

وعايزين "نشد"حيلنا شوية في الدفاع عن " تربة"بلادنا و"نكرس"كل جهدنا في الدفاع عن "قضايا" الوطن وبلاش "نكركر" قصدي نكرر لامؤاخذه العبارات القديمة زي حكاية تفعيل وكلمة آليات عشان كل مرة الشعب بياخد"كبسه"لما بيسمع الحاجات دي

[se_ Elsyed]

لأ مداخلة شديدة وتسلم دماغك يا أرميتاج ... :D

ماجتش من نواب الكيف اللي واجعين دماغنا حشيش وأعوانه أفيونة وبانجومان .. !!!

[عصام]

هذه البلاد سفينة

والغرب ريح

والطغاة هم الشراع

والراكبون بكل ناحية مشاع

إن أذعنوا .. عطشوا وجاعوا

وإذا تصدوا للرياح

رمت بهم بحرا ... وما للبحر قاع

وإذا ابتغوا كسر الشراع

ترنحوا معها .. وضاعوا

دعهم

فإن الراكبين هم الفرائس....والسباع..

دعهم

فلو شاءوا التحرر لاستطاعوا

هم ضائعون لأنهم

لم يدرسوا علم الملاحة

هم غارقون لأنهم

لم يتقنوا فن السباحة

هم متعبون لأنهم ... ركنوا لراحة

دعهم

فليس لمثلهم يرجى اللقاء

لمثلهم يزجى الوداع!

باعوا القرار ليضمنوا

أن يستقر لهم متاع

باعوا المتاع ليأمنوا

أن لا تقص لهم ذراع

باعوا الذراع ليتقوا....

باعوا

وباعوا

ثم باعوا

ثم باعوا البيع

لما لم يعد شيء يباع!

أحمد مطر

[Sherief AbdelWahab]

أخيرا و في هدوء شديد تم ختام مؤتمر المزاج العربي الذي عقد بغرز الباطنية كما استضافت بعض غرز الأسكندرية بعض جلساته..

وأكد البيان الختامي على ضرورة إصلاح المزاج العربي إصلاحا صالحا ينبع من الداخل..كما طالبت جموع الأمزجية العالم العربي بوحدة النفس..و الوصول إلى كركرات تنبع من إرادة الشعوب العربية!

طبعا شكرت الوفود الوفد المصري على حسن الضيافة ، و خدوا معاهم بعض الأصناف وهمة ماشيين..

عبده أبو حجر-تليفزيون مية مسا-الباطنية

خلص الكلام