الشامى رجع من كندا يا رجالة

[ELSHAMY]

الأخ الفاضل الشامي قد يكون تعطيل الرسائل عطل فني من المنتدى لأني دخلت على بريدي الخاص ولم اجد شيئا يدل على التعطيل خاصة وان الأخ ابو مروان كان قد ارسل لي رسالة من ايام ووصلت . لقد حملته امانة واحملها لحضرتك وهي نقل الصورة لنا حية عن المركز الإسلامي والمدارس الإسلامية وانا على يقين تام انك لن تتوانى لحظة عن اسداء النصح للجميع ربنا يبارك لك ويبارك لك في عائلتك الكريمة ويبارك للإخوة جادوللي وياسر وكل من في المنتدى الكريم حيث لا يتسع الوقت والمكان لذكرهم نفر نفر لكن الواحد لا يحمل لهم جميعا في قلبه سوى الدعاء بالتوفيق ورضا رب العباد ويجمعنا على الخير في كندا او في المنتدى.

وشكرا لكم جميعا

أختى الفاضلة

اوعدك بحلقات مفصلة عن كل النشاطات الاسلامية اللى عرفتها فى لندن....

شكرا لك

[ELSHAMY]

أختى بنت مصر

ايه موضوع الأب الروحى ده ؟ ...أنا مش عجوز قوى كده....ممكن نمشيها الأخ الروحى ؟

و الله أنا كمان أحب كثيرين من أعضاء هذا المنتدى...و اتمنى من الله أن اكون خيرا مما تظنين...

أختى أم بلال

من عيونى....الحلقة الجاية حتطلع حالا من الفرن....

تحياتى

[ELSHAMY]

اخوانى...أخواتى

السلام عليكم و رحمة الله

....استمرت الاتصالات خلال شهر يونيو بلا جدوى.....لم يجد الشامى أى مسكن...و حان ميعاد نزول الأجازة السنوية الى الاسكندرية و لسه موضوع السكن مش باين له ملامح....كانت فترة الصيف هى الفترة الذهبية للبحث لأن مدينة لندن أونتاريو مشهورة تعليميا بحاجتين مهمين:

University of Western Ontario

Fanshawe College

مما يجعلها قبلة للدارسين من جميع الانحاء...و بالتالى ينشط السوق العقارى صيفا و تزداد الامور صعوبة كلما قرب ميعاد الدراسة فى الثلاثاء الأول من سبتمبر كل عام...

نزل الجيش الى الأسكندرية...و استمرت المباحثات و الاتصالات مع اصدقائنا الى أن جاءنا خبر سعيد بالعثور على تاون هاوس بداخل كومبلكس قريب من سكنهم...طبعا كان يهمنا فى المقام الأول عدد غرف النوم...كنا فى احتياج الى 3 غرف نوم عشان يكفوا قادة الأفرع الرئيسية من الجنود...

كان التاون هاوس غرفتين نوم فقط لكن به دور ارضى (باسمنت) مفروش مما يعنى امكانية استخدامه كغرفة مستقلة...و فى الحقيقة كان يكفى غرفتين كبار...

دخلت على جوجل ايرث...و عرفت المكان...جانى انشراح قلبى مبدئى...

طبعا صديقتنا كانت خايفة ان اختيارها ما يعجبناش خصوصا اننا لازم ندفع أول و أخر شهر من الايجار مبدئيا...صلينا استخارة و ازداد الانشراح...و توكلنا على الله و بلغناها بالموافقة...و كان و لله الحمد اختيارا موفقا جدا...

وهنا نقفز بالتسلسل الزمنى للحكاية عشان أوصف لكم البيت بعد ما شوفناه:

المكان محاط بمساحة كبيرة من الخضرة ...و هناك عدد 2 بارك كبير على بعد خطوات....الأهم كان و جود محل كبير ل سوبيز (و هو سوبر ماركت شهير يعرفه المقيمين فى كندا) امام الكومبلكس مباشرة و بجواره متجر ضخم ل (هوم ديبو) و فيه كل ما يختص بمستلزمات المنزل....بالاضافة الى صيدلية تعمل 24 ساعة......طبعا كان فيه كمان جراج مقفول و يارد امامى و خلفى محندقين...

اهم الأهم كان ان المدرسة الثانوية و الابتدائية كلتاهما (حلوة كلتاهما دى) كانتا على مسيرة 15-20 دقيقة ... و المدرستين جنب بعض.

ربنا كرمه كبير

" و من يتق الله يجعل له مخرجا و يرزقه من حيث لا يحتسب و من يتوكل على الله فهو حسبه ان الله بالغ أمره قد جعل الله لكل شىء قدرا" ..

شوفتو بقى ان ربنا كرمنى بدعائكم قد ايه ؟

يتبع...

[ELSHAMY]

اخوانى

سامح - اسامة - سادانى

أختى بنت مصر - أم بلال

ربنا يكرمكم جميعا و عقبى للجميع..

حسينى...حأعمل واحد حلقة مخصوص عن أنواع البيوت و ان كنت أفضل احالة سؤالك لأحد الشيوخ الكبار مثل المهندس ياسر أو المهندس ايهاب سالم فهما أجدر منى بالرد

تحياتى

[ELSHAMY]

اخوانى...اخواتى

السلام عليكم ورحمة الله

تم التعاقد على ايجار البيت....هدأت الامور قليلا مع شىء من راحة البال....

خلصنا أول القصيدة ...

طبعا حسب الترتيب الزمنى للخطة الشامية بدأت المناقشات و الاستشارات حول تأثيث البيت الجديد...

كنا قد سمعنا بامكانية شراء أثاث مستعمل من هناك... و لكن انا حسيت انها قصة غير مضمونة و الشامى حياته مرتبة جدا و مش ممكن يروح يعتمد على حاجات فى علم الغيب ...يا ترى اللى انا عاوزه متوفر ؟...و لو متوفر هل حيناسب البيت الجديد؟...و لو حيناسب طب ياترى سعره ايه..؟.... و هل متين ويستحمل و لا لأ؟

وبعدين طرأت فى دماغ الشامى فكرة ثورية لم يتطرق اليها أحد من قبل

... طب ايه المانع ان الشامى يشحن عفش بيته فى جدة الى كندا ؟؟

التفكير كان منطقى جدا...لأنه ببساطة بيت متكامل مش ناقصه حاجة و لله الحمد...يعنى عشان أجيب تانى كل المستلزمات الموجودة حاليا أكيد حندخل فى حسبة كبيرة...طب ليه ما ناخدش البيت الحالى بكل مافيه الى هناك ...على الاقل ده عفشنا اللى احنا عارفينه و واخدين عليه..ناهيك عن ان التفاصيل الصغيرة كلها حتتشحن مرة واحدة....يعنى مش بس الأثاث من غرف نوم و سفرة و دواليب و انتريهات....لأ كمان أدوات مطبخ و أجهزة كهربائية و ملايات و مراتب و ستاير و تحف و براويز...و غيره....لو فكرت أجيب الحاجات دى كلها فى كندا يا ترى حتتكلف كام ...اذا لقيتها أصلا...

كمان ممكن مع الشحن نبعت كل الشنط الزيادة بكل مستلزمات الأسرة من ملابس و غيره..

حتى لو ناقصنا حاجة هناك ممكن نشتريها من جدة و نشحنها فى كراتينها و تتركب هناك...

كلام زين...

و نقطة هامة أخرى ان هذه الاشياء اذا لم تشحن الى كندا حيتم بيعها فى جدة بأبخس الاثمان لأن الشامى بعد رحيل الجيش مش حيكون محتاج لكل ده....

راقت الفكرة للفيلدمارشال أم على...و بقى على الشامى البحث المكثف عن موضوع الشحن من الالف الى الياء....و بدأ الشامى هذه المغامرة من تحت الصفر ...يعنى ماكنش عنده أدنى فكرة عن القصة...

أهم معلومة كانت الموضوع ده حيتكلف كام ؟...و ساعتها هل يستحق كل هذه الغلبة؟...ولا نشترى من هناك و نلم الدور...؟؟

وبدأت مغامرات الشامى مع الشحن...

يتبع

[ELSHAMY]

الدكتور العزيز الشامي

اهو ده الكلام و لا بلاش بدأنا ندخل على التقيل بس بعد اذن سعادتك لي سؤال اعتراضي شوية

الاجهزة اللي عندك بجدة كلها 110 فولت ولا اللي عندك 220 فولت هاتجيبلها محول و لا ايه الحل اللي عملته ؟؟؟

معاك و منتظرين باقي الحلقات و جزاك الله خير

جايلك يا باشا...

الصبر حلو

[ELSHAMY]

دكتور الشامي حضرتك تخصصك ايه؟

استشارى فى الأشعة التشخيصية

[ELSHAMY]

الأخ الفاضل الشامي نريد هنا تفاصيل مملة عن الشحن:

اسم الشركة اللي شحنت لحضرتك

التكلفة بالضبط

الأجهزة الكهربائية كلها أخدتها 110 و220

ايه اللي ممكن الواحد يحتاجه هناك جدا وهو هنا رخيص جدا وهناك غالي ويستحق الشحن ................... الخ

منتظرين الرد بفارغ الصبر

الصبر جميل..

بس مش عارف حأعمل ايه لو صبرك نفد...

[ELSHAMY]

اخوانى...أخواتى

السلام عليكم و رحمة الله

بدت قصة الشحن من أولها سهلة...

.... حتكون ايه يعنى... كفته يعنى..؟ "هكذا حدث الشامى نفسه" .. wst::

وبدأت رحلة البحث و التساؤلات و الاستشارات...و سؤال كل من هب و دب عن الموضوع... :blink:

أولا البحث عن شركات الشحن العالمية فى الانترنت و التى لها فروع فى جدة..وبدأ الشامى يسأل بالتليفون أولا ...الكل اجمعوا على وجوب معاينة الاشياء المطلوب شحنها قبل اعطاء السعر...طيب اتفضلوا..

كلمت 3 شركات و حضر المندوبين و كل واحد أعطى سعر...بعضهم شكلهم جاد و الباقى هجاصين...

كان الشامى يعرف انه فى نوع من الشحن اسمه

Door To Door

يعنى يستلم منك الشقة زى ما هيا مفروشة و يسلمها لك هناك مفروشة...يعنى يركب لك كل حاجة زى ما كانت بالضبط...و سيادتك باشا بتتفرج و ملكش دعوة....يعنى تغليف و كرتنة و تعليب و صندقة و زندقة (لزوم القافية)... و كمان نقل للمينا ثم للكونتينر و الشحن عن طريق المركب لميناء مونتريال ثم عن طريق البر الى لندن اونتاريو.....و انت فى الطراوة....يعنى لو عندك كباية شاى سخنة محطوطة على ترابيزة المطبخ حتلاقيها فى كندا فى نفس المكان و احتمال كمان تكون لسه سخنة....

يعنى سلمنى سخن ...أسلمك سخن

طبعا ده كان اختيار فل الفل...و عرفت ان اللى بيعمل كده شركة دى اتش ال...كلمت المندوب ...حضر و عاين...كام يا عم الكتكوت من الباب للباب ؟...

تمطع المندوب و قال : 36 ألف ريال....

عقدت الصدمة لسان الشامى ...لم يخرج صوتى أول مرة عندما قلت له : كام ؟....36 أيه ؟...36 الف ايه ؟...ده انا اشترى بيهم شركة دى اتش ال كلها و الباقى اشترى بيهم بيت فى كندا...

كانت الصدمة الأولى فى سلسلة صدمات الشحن ...لكنها أعطت الشامى فكرة عن ان الموضوع مش سهل و عايز شوية بحث مكثف ...

لكن يا خسارة و الله كانت فكرة حلوة...بس هل ينهار الشامى تحت وطأة غلاء الاسعار ؟

كان لابد من تغيير استراتيحى للخطة و الالتفاف خلف خطوط العدو..

ولكن هذه قصة أخرى

الصبر حلو...

[ELSHAMY]

ينصر دينك يا خوي hosiny انااقول نفس الكلام

طب سمعونى سقفة حلوة....

وصلوا على النبى...

[ELSHAMY]

ايه الكروتة دي يا دكتور

دي حلقة دي.....انت لازم تمشي علي الاستاندرد بتاع زمات الحلقات السمينة دي 70 سطر و خمسين سطر؟؟؟؟

داحنا لسه بنقول بسم الله الرحمن الرحيم قرايه نلاقي الحلقة خلصت.....دي مش اخلاق الكنادوه دي

مستنيين الكمالة "وزود الشطة"

يا حسينى

انا الدكتور الشامى....ماليش فى الكشرى خالص... :lol:

[ELSHAMY]

ايه الكروتة دي يا دكتور

دي حلقة دي.....انت لازم تمشي علي الاستاندرد بتاع زمات الحلقات السمينة دي 70 سطر و خمسين سطر؟؟؟؟

داحنا لسه بنقول بسم الله الرحمن الرحيم قرايه نلاقي الحلقة خلصت.....دي مش اخلاق الكنادوه دي

مستنيين الكمالة "وزود الشطة"

يا حسينى

انا الدكتور الشامى....ماليش فى الكشرى خالص... :angry:

ممممممممم

حاسس من كلامك انك واخد علي خاطرك يا دكتور....بس انت اكيد عارف ان الكلام ده كله مجرد هزار مع كامل احترامي ليك و لشخصك...وان كنت باهزر معاك فده اكيد من عشمي فيك...كأخ اكبر...و كمان حبا فيك.....والله اعلم بذلك

علي العموم لو كان فيه ايه شئ في نفسك فأنا اسف....وجب الاعتذار علي الملأ كما حدث الخطأ في حقك بدون قصد علي الملأ

على الاطلاق يا حسينى...

و الله لم يخطر ببالى انى ازعل بتاتا...أنا عارف انك بتهزر...ده انا حتى ختمت كلامى بابتسامة

خلى البساط أحمدى يا حسينى...انا أبسط مما تتخيل...

زود لى البصل على الكشرى...

[ELSHAMY]

أخوانى.....أخواتى

السلام عليكم و رحمة الله

بناء على طلب الجماهير...تم تكبير حجم الخط دون المساس بعدد الكلمات عشان تحسوا ان الحلقة كبرت B) .....نوع من أنواع الخداع البصرى...

بدا فى الأفق ان التخلى عن فكرة "من الباب للباب يا قلبى لا تحزن" وارد بعد السعر اللى عرفته...طب ايه البدائل يا رجالة..

جاءت الاجابة على لسان صديق فلسطينى مهندس و مدير لأحد المشاريع الضخمة فى جدة..كان جارى و حبيبى...كان عنده خبرة و تعاملات فى اشكال و انواع الشحن و التصدير و الاستيراد...كان متابع معى الموضوع...

كان الاقتراح بتقسيم التركة...قصدى تقسيم الموضوع الى مراحل محددة و من ثم (حلوة من ثم دى) تجميع المراحل مع بعض و الحصول على نتيجة تشبه الى حد كبير موضوع " من الباب للشباك" اللى كان نفسى فيها...

و تم الاتفاق أولا على البحث عن شركة تتولى فقط التعليب و التغليف و الصندقة و ما الى ذلك...ثم شركة أخرى لنقل الشحنة فى كونتينر عن طريق ميناء جدة الى ميناء مونتريال و يا حبذ لو نقلته مباشرة الى لندن...و هناك فى لندن ربنا يحلها و نشوف حد ينقل و يشيل و يركب ....

كان صديقى يعرف شركة فى جدة له معها تعاملات كثيرة.... ذهبنا و قابلنا المسئول...الرجل رحب جدا و كان الخبر الجميل ان شركته ممكن كمان تقوم بموضوع الشحن الى مونتريال...

الشامى حب يستغل الرجل أسوأ استغلال ...فقلت له :

طب ايه رأيك تشيل الليلة كلها و تسلمنى الشحنة فى لندن أونتاريو ؟

أفاد سيادته بأنه ليس له وكيل فى كندا يتولى ذلك...و لو حب يعملها عن طريق اتصالاته فان شركات التخليص الجمركى و الشحن فى كندا ستتعامل معه على انه شركة دولية و حتضرب السعر فى العالى....و ان أفضل الحلول هو ان الشحنة تصل الى ميناء مونتريال و هناك يقوم الشامى بالبحث عن شركة تخليص تخرج الكونتينر من الميناء و تنقله الى لندن....

بدا الكلام معقول....و ان كان نصه فى علم الغيب....لكن الشامى لا يعرف اليأس....و اذا كان ربنا سهلها فى الأول لابد حيسهلها فى الأخر...بس ناخد بالاسباب...

طلب الرجل معاينة الشقة....ذهب المندوب...عاين...و قال الروشتة بعد يومين...

كام يا عم الحاج التكاليف .... ؟

عشان خاطر الباشمهندس و خاطرك يا دكتور التكاليف حتكون كالأتى:

...هذه قصة أخرى... :aslam:

يتبع...

[ELSHAMY]

:aslam:

اخوانى

سامح - اسامة - سادانى

أختى بنت مصر - أم بلال

ربنا يكرمكم جميعا و عقبى للجميع..

تحياتى

الاخ العزيز الدكتور الشامي ,انا الحقيقه تبع قسم اخوات حضرتك,وكنت عايزه اسالك عن انطباعات الاولاد عن المدارس هناك والمعامله اللي لاقوها وهل الاندماج مع المجتمع الجديد سهل بالنسبه ليهم وللا لا لاني بصراحه قلقانهعلى نفسيه الاولاد انهم يحسو ان مستواهم العلمي مختلف عن اللي حواليهم .شكرا وباك الله لك في اولادك و زوجتك.

الأخت سادانى

معذرة بس الحقيقة الاسم مش باين عليه لا أخوة و لا أخوات...

انتظرى حلقات مفصلة عن موضوع المدارس و انطباعات الأولاد من أول حضانة الى تانية ثانوى..

تحياتى.. B)

[ELSHAMY]

حيث ان الشامى أتأثر من مناشدات الأخوة الأعضاء :shs:

و نظرا لما هو معروف عنه من طيب قلبه.... B) :aslam:

فقد قرر كتابة حلقة جديدة حتنزل النهاردة ان شاء الله الساعة 17:20 بتوقيت مكة 15:20 بتوقيت جرينتش

وعلى المقيمين بالخارج مراعاة فروق التوقيت...

سمعونا الصلاة على الحبيب...

باحبكم كلكم...

[ELSHAMY]

أخوانى...أخواتى

السلام عليكم و رحمة الله

عدنا بناء على طلب الجماهير....

استكمل الرجل حديثه: التغليف و التعبئة لكل ما هو موجود فى الشقة حيحتاج 3 ايام شغل..و حيتكلف 5500 ريال...

أما بالنسبة للشحن فمحتويات الشقة تحتاج الى كونتينر 20 قدم مكعب.....

ملحوظة: كانت أول مرة أعرف فيها ان احجام الكونتينر 20 أو 40 أو 60 قدم و لذلك كل الشركات كانت لازم تعاين عشان تحدد حجم الكونتينر المطلوب..

أما عن تكاليف الشحن فى الكونتينر من ميناء جدة الى ميناء مونتريال حتكون 11500 ريال و ستقوم بها احدى الشركات العالمية...يعنى شركة التغليف حتكون مجرد وسيط لشركة الشحن.....و قد تستغرق عملية الشحن حوالى 3-4 أسابيع.....

ملحوظة : من يريد معرفة اسم شركة التغليف و اسم شركة الشحن يرسل لى على الخاص...مع العلم ان هذه معلومات خاصة بمدينة جدة فقط...

تطلبت هذه المعلومات عقد سلسلة اجتماعات لتقييم الوضع...

خلاصة رأى صديقى و رأى الفيلدمارشال كان ان السعر معقول خصوصا اذا تمت مقارنته بما يمكن دفعه فى حال شراء كل محتويات الشقة مرة أخرى...

توافقت هذه الاراء مع رأى الشامى...طبعا كالعادة زى ما انتم عارفين الرأى الاخير بيكون للشامى بمنتهى الديموقراطية...

حيث كده بقى....اشحن ياعم الشامى كل اللى نفسك فيه...لدرجة انى فكرت أشحن الفيلدمارشال ذاتها مع العيال و نوفر تذاكر السفر...

يرجع مرجوعنا لنقطة فى غاية الأهمية...و هى ان الشامى كان قد سبق له عند عمل رحلة اللاندينج تقديم نموذج بى 4 اللى كنت قلت لكم عليه...و هو النموذج الخاص اللى يمكن المهاجرين الجدد من احضار كل مستلزمات منزلهم و شحنها الى كندا دون دفع رسوم جمركية...كان الشامى عامل حساب اليوم ده...و كنت كتبت كل ما يمكن... وما لا يمكن شحنه فى يوم من الأيام....و أهو جه هذا اليوم من الأيام...

بالنسبة للأجهزة الكهربائية فى كندا التيار الكهربائى 110 فولت...البيوت فى كندا غالبا ما تكون مجهزة بالأتى:

بوتاجاز – غسالة – مجفف – غسالة أطباق – ثلاجة ...فلم يكن هناك حاجة لشحن هذه الاجهزة من جدة خصوصا ان كلها 220 فولت...

التليفزيون ينفع يشتغل على 110 فولت لذلك تم شحنه... و بقية الحاجات اشتريناها من هناك مثل المكواة – الميكرويف – الفرن – المكنسة... و شوية حاجات تانية مش فاكرها...

يمكن أفتكرها الحلقة الجاية...

أوعى تغير المحطة...

حلقتين النهاردة عشان خاطركم.....حد زعلان...؟ ؟

[ELSHAMY]

تسلم ايديك يا دكتور

بس انا عندي حسبة بسيطة مش عارف حضرتك حسبتها بردو ولا لأ

تكاليف الشحن حتي الان و لمونتريال فقط 4200 دولار و لسه ممكن تزيد عن كده علي الاقل ب 1500 دولار كما

يعني كله حدود 5700 دولار...............هل المبلغ ده لا يكفي لتأثيث شقة من هناك علي مستوي جيد؟؟؟؟

ممكن بس أنا أقارن بين اللى عندى بالفعل و اللى ممكن أشتريه من هناك...هذه حسبة شخصية بحتة و غير ملزمة لأحد...فقط انا ذكرت التجربة لعل أحد يستفيد بها ممن تشبه ظروفهم ظروفى...

اقتراحك ينفع لو انى كنت فى شقة مفروشة مثلا و حأسيبها و أسافر...انما كانت شقتى كاملة من كل شىء...ليه أتركها و أبيع اللى فيها بتراب الفلوس...؟

فيه تفاصيل دقيقة فى الفرش و الأثاث مكلفة...و عايزة غلبة فى شرائها...خصوصا و انا رايح على سوق مجهول لا أعرف عنه شيئا... وكمان لا يوجد سيارة ألف بيها على المحلات و الأسواق اللى أنا مش عارف هيا فين أصلا....

اصدقائنا اشتروا انتريه فقط ب 3 الاف دولار....الموضوع نسبى... يعنى مستويات الناس فى الفرش و أذواقهم بتفرق جدا...

نقطة هامة أخرى...مش معقول فى اسبوعين كنت حأسيبهم فى كندا و أرجع و عندهم كل شىء...خصوصا الاطفال ما ينفعش اسيبهم نايمين على الارض ...

لا تقلق الحسبة كانت بالنسبة لى معقولة جدا....

[ELSHAMY]

اخوانى...أخواتى

السلام عليكم و رحمة الله..

أعطينا الموافقة المبدئية لشركة الشحن...

طبعا كان لهم عدة طلبات و منها:

- بيان بكل الأشياء التى سيتم شحنها و القيمة التقديرية لكل شىء.....يشبه اللى كتبناه فى استمارة ال بى 4.

- خطاب معتمد من جهة العمل بأنهم ليس لديهم مانع من قيام مكفولهم اللى هو أنا بشحن اثاث بيته :blink: ....و الله أنا ما انا عارف ايه علاقتهم بهذا الأمر الى الأن....ربنا يرحمنا من العبودية...

- خطاب موجه من الشامى الى شركة الشحن يفيد موافقتى على شحن اثاث البيت

خطاب تفويض باسم شخص ما فى شركة الشحن بانهاء اجراءات التخليص الجمركى فى ميناء جدة..

كلها حاجات سهلة قعد عليها الشامى قعدة رجالة و خلصت فى ساعة..

كان ايجار البيت سيبدأ فى الفاتح من سبتمبر...و بما ان رحلة الشحن حتستغرق من 3 – 4 أسابيع فيكون الاسبوع الأخير من يوليو هو الفترة المناسبة لبدء عملية التغليف....وهنا ظهرت مشكلة كبرى و هى ان الشامى فى هذا الوقت حيكون فى اسكندرية فى الاجازة السنوية.....

و عند الشدائد تظهر معادن الرجال....فكان ان اقترح صديقى المهندس الفلسطينى انه يقوم بالاشراف على كل شىء فى غيابى...ونظرا للعلاقة القوية التى تربطنى به... و علاقة زوجته بالفيلدمارشال و أولاده بأولادى سلمت له مفتاح المعسكر الشامى ....

طبعا تركت له خريطة كاملة للشقة بكل ما سيتم وما لا سيتم شحنه ...

الرجل قام بالواجب و زيادة...و كالعادة يستغل الشامى هذه المناسبة و يسأل القراء الكرام دعوتين حلوين للمهندس صديقى... و عاش أهل القدس جميعا أجدع ناس...

عاد الشامى من الأسكندرية بعد البلبطة فى فى البحر ليجد الشقة على البلاط....كام يوم ووصل الجيش بالكامل...كنا حوالى فى منتصف أغسطس....و كان الموعد المحدد لسفرهم فى 30 أغسطس...

من ناحية أخرى تم شحن الكونتينر بتاريخ 11 أغسطس...و حسب شركة الشحن كان الميعاد المتوقع لوصول الكونتينر الى مونتريال هو الأول من سبتمبر...

استلمت من صديقى ايصال الشحن....

هناك نقطة أخرى أثارها صاحب شركة الشحن هو موضوع التأمين على الحاجات المشحونة و ده بتكون قيمته 2% من القيمة التقديرية الاجمالية للأشياء المشحونة...أنا شخصيا معملتوش...

من الاشياء الجميلة ان الشامى يقدر يدخل على موقع شركة الشحن و يضع رقم شحن الكونتينر و يقدر يتتبع خط السير....كان دايما الميعاد لا يتغير ...الاول من سبتمبر...

يا هل الكونتينر وصل فى ميعاده...؟؟ wst::

يا هل الكونتينر وصل فعلا الى مونتريال ولا جوهانسبرج ولا ميناء الدخيلة ؟ :blink:

و من هو العميل السرى الموجود فى كندا ؟ :ninja:

الحلقة الجاية قريبا...

يتبع..

[ام بلال]

الخير في هذه الأمة الى يوم القيامة ربنا يكرمهم دنيا وآخرة ويبارك لهم في عمرهم ومالهم وولادهم،ويكشف عنهم كربات الدنيا والآخرة . اللي يعمل خير بيقعد له وكما تدين تدان.

د الشامي دي نص حلقة فين بقيتها ، اذا كنت خايف نزهق فلا تقلق ابدا ،اسلوب حضرتك بيخلي الأسطر لا نشعر بها ،لو سمحت اتوصى شويتين. وحتى لا اقطع حبل افكارك ارجع لمداخلتي السابقة على طول وقوللي رد حضرتك ايه طبعا بعد ماتنتهي من سرد فكرتك.

[ELSHAMY]

اخوانى الأعزاء

معلش ما فيش وقت لكتابة حلقة تانية..

بس أوعدكم بكرة بحلقة تفطس من الضحك.....و كلها معلومات جديدة...

الشامى