الشامى رجع من كندا يا رجالة

[ELSHAMY]

أخوانى...أخواتى

السلام عليكم و رحمة الله..

قامت مسئولة السكن بتسليم المنزل للجيش و معه مفتاح المدينة :blush2: ايذانا ببسط سيطرة الجيش على لندن اونتاريو... :blush2:

كان قائد الجيش عامل حسابه ان البيت حيكون غير مفروش فى الايام الاولى انتظارا لوصول الكونتينر....فقام القائد بتسليح أفراد البعثة بمراتب هوائية لزوم المعسكر المبدئى لحين وصول العفش.... طبعا الشنط أيضا كان فيها المستلزمات الأولية للمعيشة...يعنى شوية حطب على شوية معلبات...و كام زمزمية مياه...

أصدقائنا تكفلوا بافطار الجيش أول يوم...ولاد الحلال ياما....ثم طلبت منهم الفيلدمارشال ان يدلوها على السوق ...

على الجانب الأخر من العالم...كان الشامى فى مقر القيادة يتابع كل الخطوات و يصدر أوامره حسب سير المعارك...

كان ميعاد وصول الكونتينر مازال صامدا..1 سبتمبر...و بالاتصال مع فيصل فى مونتريال أفاد بأنه لن يتم عمل أى شىء فى هذا اليوم لأنه عيد العمال و هو عطلة رسمية...

حضر الشامى شنطته....وتوكل على الله ...أولا بالخطوط البريطانية الى لندن (بريطانيا العظمى) ثم اير كندا الى مونتريال.... طبعا رحلة طويلة جدا...كانت الرحلة دائما فى اتجاه الغرب...يعنى الشمس مش بتغرب..

كان الشامى قد حجز من على النت فندق فى مونتريال ليلة واحدة...

فى مطار هيثرو كان عند الشامى بعض الوقت خلال الترانزيت...فتحت النت عشان أعرف أروح الفندق ازاى...لقيت ان أجرة الليموزين حوالى 33 دولار لأى مشوار داخل مونتريال... وكمان مثلهم للعودة ...غير المشاوير اللى حنعملها فى المدينة....طيب ما نأجر عربية لمدة يوم ونوفر....و قد كان...تم اسئجار سيارة من على النت بحيث تكون فى انتظار الشامى عند وصوله الى مونتريال...

و هنا يقفز الى الذهن تساؤل منطقى.......طب كيف حيسوق الشامى السيارة فى مونتريال و هو لا يعرف راسه من رجليه فى شوارع المدينة ؟....

و هنا سمع الشامى صفارة قادمة من شنطته....كان حبيبى النافيجاتور شعر بمخاوف الشامى...و حب يطمنه..

الشامى طلع النافيجاتور من الشنطة ودار بينهم الحوار الأتى:

الشامى: الله...انت صاحى

النافيجاتور: طبعا يا باشا...تحت أمرك

الشامى: و الله فيك الخير...كنت ناسيك

النافيجاتور:...يهون عليك العشرة يا أبو الشام...ده انا ياما عملت لك شغل ايام اللاندينج...

الشامى: معلوم يا أبو الشباب...أصل انا ظنيت انك مش حتعرف تقرأ اسماء الشوارع فى مونتريال....بيقولوا مكتوبة بالفرنساوى

النافيجاتور ضاحكا:....ما تقلقش يا معلم...مسيرك تشوف لما نوصل...

...اطمئن الشامى قليلا....

ركبت طيارة اير كندا ...وصلنا مونتريال حوالى الساعة 6 مساءا...توجهت لمكتب ايجار السيارات...

ايجار السيارة كان حوالى 52 دولار فى اليوم....الموظف اقترح عليا انه ممكن اضافة 3 دولار و يعطينى سيارة أكبر و أفخم...وافق الشامى...ملعون أبو الهم....عيش حياتك يا أبو الشام...

واو....شيفروليه امبالا موديل 2008...

ركبت النافيجاتور...كتبت له عنوان الفندق...طلع عارف كل حاجة ابن اللذينا....

كان الجو ممطر...استمتع الشامى بقيادة السيارة فى شوارع مونتريال الجميلة...و فجأة تذكر الشامى ان الجيش الباسل نايم على مراتب فى الأرض ...هناك فى لندن و الشامى عمال يبرطع بالعربية.... طرد الشامى هذا الهاجس.....بكرة الكونتينر يوصل و يرتاحوا....بلاش عكننة بقى...

وصلت الفندق حوالى الساعة 9 مساءا...

استلمت الغرفة....كنت فى منتهى التعب و الارهاق...و فى نفس الوقت جعان جدا....

كان لازم انام عشان بكرة حأروح لشركة الشحن أشوف عملوا ايه فى الكونتينر....

نزلت أدور على أى مطعم فاتح...مش لاقى...و بعدين افتكرت حبييى النافيجاتور....مطعم يا وله...اتفضل يا باشا مطعم لبنانى أخر حلاوة...2 شاورمة....عودة....بيجاما...سرير....نوم....

خ خ خ خ خ ...

يتبع...

[ELSHAMY]

أخوانى....أخواتى

السلام عليكم و رحمة الله

صحيت من النوم بدرى...لميت الشنطة...و على العربية عدل...

اتصلت بفيصل فى شركة الشحن...عرفنى على طول...ورحب بى جدا....وصف لى العنوان..

وله يا نافيجاتور....على هناك...

وصلت الشركة ...مكتب فى مبنى فخم فى الحى القديم بمونتريال...المكتب عبارة عن 3 شركات....(سياحة...و تصدير واستيراد سيارات بالاضافة الى شركة التخليص الجمركى)..كل المسئولين هناك كانوا من تونس الخضراء......سلام كبير يا جدع لتونس و رجالتها...و معاهم أم ريهام...

الشباب كانوا فى منتهى الذوق معى..

أعطانى فيضل ورقة و قال لى ان هذا الفاكس قد وصله من ادارة الجمارك بالميناء يفيد بأن الكونتينر الأن تحت اشرافهم و سيتم فحصه...و اخبار الشركة لاحقا عند الانتهاء من ذلك...

يعنى الجمارك صدقوا الشركة بالتفويض بتاعى...

طيب تقريبا امتى يا عم فيصل يتم الافراج عن الكونتينر و استلامه ؟...هكذ بدأ الشامى كلامه الى فيصل..

فيصل: هذا الأمر ليس بيدنا...ممكن ياخد يومين تلاتة - اسبوع أو اكثر...حسب الزحمة.....ربنا يسهل...على العموم انت لك اسبوع مجانى بعد كده حيبدأوا ياخدوا رسوم أرضية ...

الشامى: طيب و ايه العمل ؟

فيصل:ليس امامنا الا الانتظار...

الشامى: وياخدوا رسوم ليه ؟....ده التأخير من عندهم

فيصل: أيا كان السبب.....

الشامى : و بعد ما تستلموا الكونتينر حتعمل ايه ؟

فيصل: أنا اتفقت مع نفس الشركة اللى شحنت الكونتينر فى المركب انهم يبعتوه على القطار الى تورونتو....و هناك شركة أخرى حتتولى احضاره الى لندن عن طريق شاحنة كبيرة

الشامى كان عنده معلومات ان الكونتينر يجب ارجاعه مرة أخرى الى ميناء مونتريال بعد أن يفرغ حمولته فى لندن....و أن تكاليف هذا الموضوع كانت حتبقى على الشامى....

طبعا البنزين كان أيامها مولع نار....و هذه المعلومة كنت ناقشتها مع أكس الهجان...و هى كانت السبب فى رفع سعر النقل...

طرأت للشامى فكرة و هى انه يسأل ان كانت شركة الشحن لها فرع فى تورونتو فيكون ارجاع الكونتينر الى تورونتو بعد التفريغ حيكون أوفر....فكرة نميسة برضه....

بالفعل الشركة كان لها فرع فى تورونتو...و اتفق فيصل معهم على ارجاع الكونتينر الى تورونتو بدلا من مونتريال توفيرا للنفقات..

الشامى: و الموضوع حتكون تكاليفه ايه يا عم فيصل:

فيصل: رسوم الميناء 300 دولار

شحن الكونتينر بالقطار الى تورونتو ثم شحنه على الشاحنة الى لندن 1700 دولار

رسوم شركة التخليص 300 دولار

كانت الساعة 11 صباحا عندما عرف الشامى ان وجوده فى مونتريال أصبح غير ذى جدوى (حلوة دى)...

اتفقت مع فيصل ان بينا تليفون لما الكونتينر يقوم بالسلامة و يبدأ يتشحن الى لندن...

و أنا فى المكتب كمان اتعرفت على الأخ هشام و هو مسئول شركة السياحة....

طبعا الشامى كان من النوع المستغل...طلبت من هشام انه يشوف لى تذكرة الى تورونتو عشان أروح للعيال...الراجل ما قصر...دخل على النت و جاب لى تذكرة مخفضة كمان و رفض انه ياخد رسوم المكتب طالما انى من طرف صديقهم دكتور الأسعد...

ناس محترمة....

الطيارة كان ميعادها الساعة 2 ظهرا من ميناء مونتريال....كان على مغادرة المكان بسرعة عشان ألحق أسلم السيارة اللى أجرتها...و أركب طيارة تورونتو...

ودعت الشباب و شكرتهم على مجهودهم معى...

كان الشامى فى مرحلة سابفة قد حجز سيارة أخرى فان من مطار تورونتو لمدة اسبوعين حتى تكفى الجيش...

طلعت على مطار مونتريال...سلمت السيارة....و ركبت الطيارة الى مطار تورونتو...

و أخيرا استرخيت فى كرسى الطيارة ...و مازال لسانى يلهج بحمد الله على توفيقه لى فى كل ما سبق...و سؤاله التوفيق فيما بقى...و هو كثير...

الحلقة القادمة...وصول القائد الى لندن و لقاءه بأفراد الجيش اللى كانوا وحشوه جدا...

يتبع...

[agmaa]

الدكتور الشامى

ممكن أعرف:

- سعر تذكرة الطيران من مونتريال لتورونتو

- إيجار الفان بكام (و معاها تأمين شامل)

شكرا لك

[ELSHAMY]

الدكتور الشامى

ممكن أعرف:

- سعر تذكرة الطيران من مونتريال لتورونتو

- إيجار الفان بكام (و معاها تأمين شامل)

شكرا لك

سعر التذكرة بيتغير حسب ميعاد حجزك لها...يعنى ممكن تذكرتك تكون ب 180 دولار و تذكرة اللى قاعد جنبك 300 دولار لأنه حجز متأخر..

تذكرتى كانت فى offer ب 180 دولار..

ايجار الفان فى اسبوعين حوالى 900 دولار..

أى خدمة...

[agmaa]

متشكرين يا دكترة

و إيجار العربية ده بتأمين شامل؟ و أى شركة؟

شكرا

[ELSHAMY]

متشكرين يا دكترة

و إيجار العربية ده بتأمين شامل؟ و أى شركة؟

شكرا

تأمين شامل

شركة ALAMO ..... بس السعر ده من على النت فقط و تحجز قبلها بمدة كافية

تحياتى

[ELSHAMY]

حاضر يا أم ريهام

لأول مرة على الفضائيات...

هذا هو بيت الشامى

...العربية اللى على الباب دى أيجار

[ام بلال]

ربنا يبارك لك وييسر لك أمرك يا دكتور شامي حضرتك لم ترد على مداخلتي السابقة وكذلك موضوع البيوت في كندا وحتى لا نزعج حضرتك ، قل ولو حتى كلمتين بنص دولار على الماشي بعد حلقتك من فضلك ، ننتظر الرد ، ربنا يعين زوجتك على مسئولية أولادكم ويعينك على فراقهم ويجمعكم على خير حال بحول الله وقدرته في الدنيا والآخرة، ويعينك يا دكتور على المصاريف ، و لا يضيع تعبكم أبدا آمييييننن

[ELSHAMY]

ربنا يبارك لك وييسر لك أمرك يا دكتور شامي حضرتك لم ترد على مداخلتي السابقة وكذلك موضوع البيوت في كندا وحتى لا نزعج حضرتك ، قل ولو حتى كلمتين بنص دولار على الماشي بعد حلقتك من فضلك ، ننتظر الرد ، ربنا يعين زوجتك على مسئولية أولادكم ويعينك على فراقهم ويجمعكم على خير حال بحول الله وقدرته في الدنيا والآخرة، ويعينك يا دكتور على المصاريف ، و لا يضيع تعبكم أبدا آمييييننن

الأخت أم بلال

الحقيقة معنديش أدنى فكرة عن موضوع السفر عن طريق البحر للركاب الى كندا و أعتقد حيحتاج منك شوية بحث على النت...و اذا كان عندى وقت حاحاول أبحث لك ان شاء الله...

جزاك الله خير على دعائك الجميل...هذا هو الدعاء المطلوب بالضبط.

[ELSHAMY]

حاضر يا أم ريهام

لأول مرة على الفضائيات...

هذا هو بيت الشامى

...العربية اللى على الباب دى أيجار

شكلك خايف تتحسد ....

اللهم لا حسد ..... :unsure:

انت و ذوقك...

لا تعليق..

[ELSHAMY]

الأخت أم بلال

بالنسبة لأنواع السكن فى كندا فأنا وجدت هذه المعلومات التفصيلية على هذا الرابط:

http://www.settlement.org/sys/faqs_detail.asp?faq_id=4000328

[ELSHAMY]

أخوانى.....أخواتى

السلام عليكم و رحمة الله

وصل الشامى الى مطار تورونتو ...و مباشرة على شركة تأجير السيارات.. استلمت السيارة دودج جراند كارافان موديل 2008.....حاجة فخمة قوى يا رجالة.....

انجعص الشامى خلف مقود القيادة :unsure: ...و ركب النافيجاتور... و كتب له عنوان البيت فى لندن....أخيرا الشامى بقى له عنوان فى كندا يا جدعان...

وكانت المفاجأة...زحام رهيب على طريق الخروج من تورونتو... 45 دقيقة و السيارات تمشى بسرعة 10 – 15 كيلو/الساعة....افتكرت فيه حادثة على الطريق...و الغريب ان لحد ما طلعت على طريق الهاى واى رقم 401 لم يكن هناك أى سبب مقنع لهذا الزحام...

المهم بدأت مراسلة الأولاد ....كان لسه شريحة السعودية هى وسيلة الاتصال بين القائد و الفيلدمارشال....

قربت على البيت...لقيت الأولاد طالعين بره الكومبلكس فى انتظار القائد...و كان لقاءا مؤثرا...اختلطت فيه دموع الفرح مع ضحكات المرح :) ..(حلوة دى)...كان فاضل دقايق على ميعاد الأفطار....

طبعا الشامى لم ينسى الأولاد فى شوية هدايا من مطار هيثرو أثناء الترانزيت...و بدأ فى توزيع الأوسمة على الجنود المنتصرين... وكان نصيب الفيلدمارشال....مش حأقول لكم....

تفقد الشامى البيت.... و الحقيقة انبسطت جدا منه.... و تخيلته و قد امتلأ بالعفش اللى فى الكونتينر....بس هو فين الكونتينر...ربنا يجيبه بالسلامة..

و جلس القائد وسط جنوده فى جلسة أنتخة بعد الفطار ...و تسابق الجنود كل واحد عايز يحكى للقائد حكاياته و ملاحظاته....

كان الجندى على و السيرجنت ندى هم أول الداخلين الى المدارس.... موضوع و لا أسهل...مدرستهم الأبتدائى قريبة من البيت...لم يتم السؤال على أى أوراق... مشى الموضوع بمنتهى السلاسة..

كان للجندى على طلب صعب شوية......باح به للقائد أثناء جلوسه على حجره.....كان يظن ان القائد يقدر يعمل كل حاجة...بس الحقيقة لم يستطع القائد انه يحقق هذا الطلب للجندى علوش....

الطلب هو انه عايز يبقى شعره أصفر زى بقية الأولاد فى الفصل ...صعبة دى؟

أما الجنود الكبار....اللى كانوا رايحين الهاى سكول...فدول حكايتهم حكاية

عايزة كباية شاى... wst::

يتبع..

[ELSHAMY]

متابعين مع حضرتك أشكرك على الإهتمام ، ربنا يجازيك كل خير ويبارك لك

الأخت أم بلال

انا عارف ان موضوع المدارس و التعليم هام جدا لك و لكثير من الأخوة القراء فنستأذنكم فى كتابة حلقة أو يمكن حلقات عن موضوع التعليم من واقع خبرتى الميدانية هناك من أول كى جى و حتى تانية ثانوى....

حلقة بكرة شيقة جدا...

تحياتى

[ELSHAMY]

متابعون و مستمتعون يا دكتور محمد

و أنا كمان والله باستمتع لما أعرف انكم متابعين...

بس قولولى انكم متابعين

[ELSHAMY]

تعديل للتكرار

تم تعديل 20 أكتوبر 2008 بواسطة ELSHAMY

[ELSHAMY]

متابعون و مستمتعون يا دكتور محمد

و أنا كمان والله باستمتع لما أعرف انكم متابعين...

بس قولولى انكم متابعين

[ELSHAMY]

:

كان لي سؤال يا ترى البيت بتاع حضرتك ده اسمه ايه؟؟؟؟

ماشاء الله عليه ربنا يبارك لك فيه

البيت بتاعى ده اسمه الحقيقى عبد السميع...

اذا كان قصدك نوعه فناس بتقول انه تاون هاوس و ناس بتقول انه كوندو...و الله أعلم

[ELSHAMY]

ايه يا د/ الشامي انت مشيت و سبتنا ليه احنا متابعين والله

ولسه القاعده مطوله كان نفسنا نسمع اي نبذه صغيره كده

ومشوقه عن المدارس ( أنا عندي ابتدائي و كي جي )و بحلم

بجد بمدارس هناك هيييييييييييييه لما نستنى بكره ان شاء الله cr((:

يارب تكون الحلقه طويله شويه

كان لي سؤال يا ترى البيت بتاع حضرتك ده اسمه ايه؟؟؟؟

ماشاء الله عليه ربنا يبارك لك فيه

[ELSHAMY]

الأخ أحمد صالح

خاصية استقبال الرسائل لديك ملغاة

و بالنسبة لجميع من سأل عن عناوين شركات الشحن ها هى:

شركة الشحن فى جدة:

شركة خدمات السياحة و الشحن T &TS

ص ب : 6358 جدة 21442 تليفون 6914465

شركة الشحن فى مونتريال:

IMEX Cargo Marine

Tel: 514 848 7088

Fax: 514 848 0870

تحياتى و بالتوفيق

[ELSHAMY]

أخوانى...أخواتى

السلام عليكم و رحمة الله

اليوم - عذرا - سنخرج قليلا عن السياق الزمنى للقصة و ندخل مؤقتا للحديث عن أهم ما يميز كندا ..و هو موضوع التعليم...

حلقة اليوم شيقة جدا...و هى مهداة للسادة مسئولى وزارة التربية و التعليم. ..يمكن يعرفوا ليه كندا أصبحت الأولى فى التعليم على العالم...و احنا مش على الخريطة أصلا...اذا كان الأمر يهمهم...

يشمل مصطلح الهاى سكول (4سنوات دراسية) يعنى الأطفال ابتداءا من الصف التاسع و حتى الصف الثانى عشر...

خلال هذه المرحلة يدرس الطالب 32 مادة مختلفة بواقع 8 مواد دراسية كل عام على حدة...

كل عام دراسى بيكون 2 سيمستر...يعنى 4 مواد فى كل سيمستر...

سهلة دى...؟

يختار الطالب المواد التى يحب أن يدرسها على مزاجه...و خد بالك من "يختار" دى...لأن ذلك بيتم حسب ميول الطالب و رغباته و تطلعاته المستقبلية...يعنى مثلا الطالب غير مجبر مثلا انه يدرس مادة التاريخ اذا كان ميوله فى الأخر أنه يدرس طب....ليه نعكنن عليه و على عيلته اذا كانت ميوله مش تاريخية...

يجلس الطالب فى أول أيام الدراسة مع مسئول أو مسئولة توزيع المواد الدراسية و يتم اختيار المواد المرغوبة بحرية تامة مع بعض النصائح اللطيفة من المسئول حول اختيارات الطالب و ماهية المواد التى سيدرسها حتى لا يفاجأ بمكونات فى المنهج غير متوافقة مع اسم المادة التى اختارها للدراسة...

و كمان مع معرفة رغبة الطالب فى المستقبل يتم مساعدته فى اختيار مواد أخرى قد تكون مكملة لأختياراته...

و هناك مواد كنا نظنها ترفيهية كمادة الألعاب الرياضية و الموسيقى و الدراما و الفنون....الا انها تعامل بنفس الجدية التى تعامل بها المواد الأخرى و لها نفس الدرجات فى التقييم النهائى....

و يبقى أن المطلوب من الطالب قضاء عدد معين من الساعات الدراسية فى كل مادة يختارها...و يتم تقييم الطالب بامتحانات دورية مع مراقبة شديدة لتقدمه فى المادة المختارة و استيعابه لها خلال كامل فترة الدراسة...و قد يتدخل مدرس المادة و ينصح بعدم ملائمة ميول الطالب لهذه المادة اذا لاحظ عدم قدرته على التجاوب...و ساعتها يتم اخطار الأهل و الطالب بذلك ليتم احتيار مادة أخرى بديلة....

أيضا من حق كل طالب بنفسه أن يغير فى اختياراته حسب قبوله للمادة بعد بدأ الدراسة...فقد يرى الطالب أن اختياره لم يكن دقيقا و أنه مش مرتاح للمادة...للمدرس ...لزملائه... للكرسى اللى قاعد عليه ....أى شىء .....فيكون من حقه تغيير هذه المادة فى الأيام الأولى للدراسة...

طبعا لكل مادة مدرس و فصل خاص لتدريس هذه المادة... و يتحرك الطلبة الى مكان الفصل وليس العكس ...يعنى الفصل و المدرس ثابتين و يقوم الطلبة بعد كل حصة بالذهاب الى مكان الحصة الجديدة...

لكل فصل طاقة استيعابية...يعنى لازم كل طالب يكون محضر المواد اللى حابب يدرسها و يحجز مكان بدرى قبل بدء العام الدراسى...

فى حالة الطلبة اللى حضروا متأخرين (زى حالاتنا)...فان الست المسئولة قامت بكل ود و تفهم لظروفنا كمهاجرين جدد بأن تم استثناءنا من ذلك و قام الأولاد باختيار المواد التى يرغبوا فى دراستها براحتهم...بل أكثر من ذلك ذهبت معنا بنفسها لكل مدرس تستأذنه (مش عايز أقول تؤمره) انه يقبل طلبة جداد عنده حتى لو كان استكفى...

ناس ذوق...ذوق...ذوق...

الفصل مساحته مهولة...و هناك حرية للطلبة فى الجلوس على طاولات متفرقة دائرية منتشرة فى مساحة مفتوحة...و يجلس الطلبة فى مجموعات نقاشية...تدار فيها المناقشات بحرية تامة....و يترك للطالب فيها المجال للتعبير عن أراؤه...و هى فى الوقت ذاته فرصة يقتنصها المدرس لوضع تقييم للطالب دون أن يشعر عن مدى فاعليته فى الصف و اشتراكه فى المناقشات و قدرته على الخلق و الابداع كذلك اعتماده على نفسه...

الفصول التى يكون بها جزء عملى فى الدراسة تحتوى على أحدث الأجهزة للتدريب و التطبيقات المختلفة...

طبعا ناهيك عن الفصول الخاصة بمهارات معينة...و المكتبة الكبيرة...و ورش العمل و المعامل و معامل الكمبيوتر.... و غرف الموسيقى...و المسرح...و الصالة المغطاة للألعاب الرياضية و هى بحجم ملعب كرة السلة....و المطعم..و المتحف...و صالة الكئوس و الدروع التى حصلت عليها فرق المدرسة...

المدارس هنا ليس لها سور ...سور ليه ؟ مافيش سور عشان مافيش حد حينط من عليه و يزوغ....ثم يزوغ يروح فين...عدم حضوره للفصل يسجل عليه و بالتالى يسقط تقييمه فى هذه المادة....و هو الخسران...

معظم المدارس محاطة بكمية خضرة غير عادية...مدرسة بنتى محاطة بملعب كرة قدم...و ملعب كرة قدم أمريكية...و 8 ملاعب تنس...

الحصة الواحدة مدتها 75 دقيقة...و يكون يوم الطالب عبارة عن أربع حصص بينهم فترة راحة و غذاء مدتها 75 دقيقة أيضا يمكن خلالها للطلبة الخروج من المدرسة حتى الى البيت و العودة.

يستلم كل طالب فى بداية الدراسة دولاب خاص به (لوكر) يضع فيه كل احتياجاته عشان مش لازم يشيل على ضهره شنطة كبيرة....و ياخد معاه فى البيت الحاجات فقط اللى يحتاجها لمراجعة مادة معينة أو عمل مشروع على الكمبيوتر أو ما شابه...

لا يوجد زى مدرسى معين...

كل ما سبق ذكره مجانى...ماعدا 5 دولار تمن القفل بتاع اللوكر و 25 دولار تمن الصور التى ستلتقط للطلبة خلال الدراسة و كارنيه المدرسة....استغلال فظيع.. cr((:

بمناسبة الصور...مسئولة المدرسة جاءت لتستأذن اذا كنا لا نمانع ان يظهر الأولاد فى الصور الجماعية خلال المباريات و المناسبات المختلفة التى يقوم التليفزيون و الصحف بتصويرها فى المدرسة...كوميديا و الله...

لسه الموضوع فيه كلام تانى

حد عنده سؤال...