الشامى رجع من كندا يا رجالة

[medopharm]

اه معلشي نسيت

بالنسبة لموضوع العنوان اللي لازم نقوله في المطار علشان كارت البي ار

كنت قريت قبل كده انه ممكن تقول لضابط الهجرة بالمطار انك لسه هتشوف السكن فيقولك لما تحدد عنوان سكنك بلغنا بيه

يا تري ايه مدي صحة المعلومة دي ؟

أخى einstien

السلام عليكم ورحمة الله وبركاته

انا اسف جدا على التأخير فى الرد عليك

بس انا كنت حاولت ابعتلك على الخاص بس للأسف مش شغال

وانا يشرفنى انى اتعرف عليك ونتعاون سويا

ده ايميلى ارجوا اضافتنى عندك

dr_mandour2006@yahoo.com

وكمان احب اسلم على د الشامى

واقوله حمد الله ع السلامه

وعقبالنا كلنا

medopharm

د الشامى تحيه كبيره ليك وحمد الله ع السلامه

حقيقى استفدنا كتير من رحلتك بس انا كان ليا سؤال

هى درجه الحراره دلوقتى كانت 19 تحت الصفر امال فى شهر يناير بتكون كام يعنى ممكن تكون اقل من كده

اصل انا ان شاء الله انا مسافرعلى شهر يناير القادم عشان امتحان البورد

وكنت قلقان من الموضوع ده

وشكراااااااااااااا

medopharm

[مصرية و مغتربة]

اخى Einstien انا كنت مقدم فيدرالى

بالنسبة لموضوع العنوان هذه المعلومة صحيحة

بالنسبة لمحتويات اللستة ..انا كان قصدى على الحاجات اللى انت ناوى تشحنها فى مرحلة لاحقة و هى تسمى List for Goods to come وهى مختلفة عن لستة الحاجات اللى انت مصطحبها معاك وقت اللاندينج ويجب اظهارها لموظف الجمرك اذا سأل عليها...وانا ماحدش سألنى على محتويات الشنط.

بالنسبة للأدوية ...كان معى أدوية و لم يسأل عنها أحد و لم أسمع عن حد اتسأل عليها...ودى معلومات انا عرفتها من أماكن أخرى...الا اذا كانت فيها مواد مخدرة أو مهدئة فيجب الحرص.

بالنسبة لرخصة القيادة و منعا للتكرار...فان الأخوة الأفاضل قد سبقونى بتفصيل ذلك فى الملف المثبت عن الهجرة لكندا...باب رخصة القيادة فى أونتاريو و يمكنك الرجوع اليه

تحياتى

ياريت تبعتلي اللينكات الخاصة بالفورمات اللي حضرتك كنت مجهزها الخاصة باللاندينج لاني مش لاقياها.

[ELSHAMY]

الأخت مصرية و مغتربة

هذا ملف pdf وهو خاص باللى حضرتك طلبتيه:

http://www.cbsa-asfc.gc.ca/E/pbg/cf/b4/b4-07e.pdf

وهذا الموقع هام جدا للأخوة المهاجرين و حاولوا ان تفتحوا معظم اللينكات مفيدة جدا:

www.cic.gc.ca

تحياتى

[ELSHAMY]

agmaa ارسلت لك أيميل بالمعلومات المطلوبة

مزاميزو....شكرا لكلماتك الجميلة

حاكمل بقية الرحلة ان شاء الله بعد شوية

[ELSHAMY]

أخوانى الاعزاء ...نعود لتكملة الرحلة

برضه ما فيش حد يفكرنى احنا و قفنا فين...ما علينا... تقريبا لما ركبنا السيارة من المطار و توجهنا مباشرة الى أوتاوا و الطريق كان سالك مع وجود الثلج على الجانبين لأنى عرفت ان هناك أولوية قصوى لأبقاء الطرق و خصوصا ال high way نظيفة من تراكم الثلوج...المهم وصلنا بعد حوالى ساعتين الى الشقة التى حجزها لنا المحامى فى حى جميل و عرفت بعد كده ان احنا قريبين من كل شىء....

أوتاوا مدينة ليست كبيرة مقارنة بتورونتو لكنها أبرد شوية... وهى العاصمة و بها البرلمان ... فاجئتنا كمية الثلوج المتراكمة على جوانب الشوارع الفرعية و فوق الأسقف المائلة للمنازل حولنا.... الشقة ظريفة...2 حجرة نوم...صالة مطبخ حمام تليفون انترنت تليفزيون ...و العمارة شيك برقم سرى للدخول... و موسيقى هادية فى مدخل العمارة من سماعات فى السقف...طبعا كان المفترض اننا ننام بعد هذه الرحلة الشاقة...لكن كان لازم نروح أى سوبر ماركت قريب لشراء بعض المستلزمات... و فوجئت بجميع الأولاد عايزين يروحوا معى (طبعا عشان يمشوا فى الثلج و يعاينوه عن قريب)...ما قدرتش أرفض لأنى حاسس بيهم ...ولو كنت مكانهم واحنا محدثين تلج كنت حأعمل زيهم...طبعا كنا احنا بس اللى ماشيين فى الشارع...خلصنا و رجعنا ونمنا كالقتلى.

على فكرة طول الليل كانت هناك عربات صغيرة لازالة الثلج المتراكم امام مداخل البيوت و الجراجات...و لكن على الصبح كانت معظم جهودهم راحت هباءا من نزول الثلج طول الليل...لكن على الأقل خففوا شوية من الموجود.

صحينا بدرى على غير المتوقع... كان عندنا موعد مع المحامى لعمل ال Social Insurance Number وبالفعل مر علينا وكان لازم نروح معاه كلنا.... حتى لو انه مش مطلوب جميع المليشيات كانت جاهزة للخروج...

الشوارع بالنهار كان شكلها غير عادى...ده أول نهار لنا بكندا....وكان بالفعل (نهار أبيض و مثلج) ...خلصت اجراءات الSIN بسرعة و كانت اهم التوجيهات من الموظفين لنا بضرورة الاحتفاظ بهذ الرقم فى مكان سرى و عدم اظهاره لأى أحد حتى لا يستخدم بشكل غير شرعى من أى حد غير صاحبه... و بلغونا انه سيتم ارسال SIN Cards بعد اسبوع اللى العنوان اللى اعطيناه لهم و بالفعل استلمناه لاحقا بعد أسبوع وكانت المستندات المطلوبه هى الباسبورات و وورقة ال Proof of Landing اللى قلت لكم عليها قبل كده.... كانوا الحقيقة ناس لطاف جدا و أعطونا بعض النشرات التعريفية عن بعض الخدمات المتوافرة و التى هى من حق المواطن الكندى....(احنا يعنى )

فاصل اعلانى و نواصل.

تحياتى

[ELSHAMY]

...ولو كنت مكانهم واحنا محدثين تلج كنت حأعمل زيهم...

حلوة اوي محدثين تلج دي يا دكتورنا

تصور فعلا انا مشتاق اشوف الشوارع كلها مليانة تلج :lol: wst::

بس شكلي كده علي ما اوصل هيكون التلج داب داب

في كاس اللمون بقاله ساعات :cry:

مع الاعتذار لانغام

عندى اقتراح لك...ايه رأيك تروح فى فصل الشتاء ...بس تقعد فى الركن البعيد الهادى...مع نفس الاعتذار :lol:

[ELSHAMY]

معاك حق يمسيو تورنتو

المصريين فعلا معظمهم مش حلوين مع بعضهم في الغربة ؟؟؟؟؟

انا كنت سامع كدة لحد مشفت بنفسي في الخليج

ويريت نقدر نغير الصورة دي قد منقدر

وفي النهاية كل واحد أهو بيعمل بأصله

الصيدلاني الي لسة بيحلم بكندا

يا مون شير اذا كانت الصورة دي موجودة في الخليج بشكل او باخر

اتمني انها متكونش موجودة في اوروبا و الدول المتقدمة

بجد اظن ان كندا الوضع مختلف

واهو انت شفت دكتور الشامي في المطار

وشفت ازاي الموظف المصري عامله كويس و كان بيبتسم

من غير ما حد يقوله ملناش بركة الا انت

مش كل المصريين اندال انا ماقلتش كدة.طبيعة البلد هنا تخليك تاخد الانطباع ده عنهم بس الحقيقة مش كده.لكن لما توصل ان واحد مايديش عنوانه لصاحبه وهو عارف انه جاى اسبوع يعمل الاندنج و يمشى دى تسميها ايه.في مصريين كويسين جدا في كندا وفي اروبا,وخاصة الناس ايلي مستقريين من مدة طويلة. وزى ما اخويا ماجد قال كل واحد بيعمل بأصله.و الموظف ايلي قابل الدكتور الشامى ده بيعمل في امن المطار و خبير لهجات عربية ,و شغلوا بس مع العرب .هممممم.الله يسامحوا سوسو.

الحقيقة الموظف المصرى كان شغال فى ادارة الجمرك و ليس فى الأمن... وكان يتعامل مع جميع الجنسيات...و يتكلم الفرنسية و الانجليزية...و أعتقد اللغة العربية كمان... wst::

[ELSHAMY]

الدكتور الشامي خد الوش بتاع BIEN VENUE ET NOUS VOULONS QUE TU SERA HEUREUSE EN MONTREALياريت لما يرجع يواصل كتاباته و يقولنا انطبعاته وبالصراحة ايلي عهدانها في شخصه الكريم.

أخى تورونتو...الحقيقة مش فاهم قصدك ايه...واذا كان حد من الأخوة فاهم ياريت يفهمنى..

[ELSHAMY]

الأخ هشام الكندى...أنا ما كانش عندى مشكلة فى ترجمة الجملة...أنا بأعرف فرنسى كويس....أنا بس مش فاهم كلمة (خد وش ) و علاقتها باللى أنا بأحكيه و عموما شكرا لك.

ثانيا...أنا لم أستقر فى مونتريال كما ذكرت..أنا فقط نزلت فى المطار و توجهت مباشرة الى أوتاوا..لأن مطار أوتاوا لا يستقبل معظم خطوط الطيران الدولية القادمة من الشرق الأوسط.

أعتقد ان أخى تورونتو يقصد انى لما أحكى بصراحة حأقول انطباعات غير جيدة عن الناس و تعاملاتهم معى... وهذا غير صحيح لأنى ما أعرفش أحكى غير بصراحة ...ثانيا...انا ماليش مصلحة انى أقول ان الشعب الكندى كان لطيف معى... و طبعا انا أعرف جيدا ان أخى تورونتو أكيد يعرفهم أكتر منى ألف مرة لأنه سبقنى فى التعامل معاهم وكمان طول العشرة بيعرف الواحد طبائع الناس و هذا لم يكن متاحا لى خلال هذه الفترة القصيرة.

طبعا جميل اننا ننصح بعض ونوعى بعض وده الغرض من المنتدى...ومافيش مكان خالى من العيوب...وكندا فى الأخر مكان يسكنه بشر تحكمهم أهواء و رغبات و ميول...زى ما أنا سمعت عن تعاملات عنصرية مخفية... وتخوف مبرره الوحيد انك محمد أو أحمد ومن الشرق الأوسط...لكن فى الأخر لنا الظاهر و اللى فى القلب فى القلب... وكل منا أدرى بما يحتاجه بالضبط من خطوة الهجرة...فشكرا لك تورونتو ان كان ده قصدك.

تحياتى

[ELSHAMY]

أخى einstien

أنا اسف اني بأقطع فى الكتابة لكن و الله ظروف العمل صعبة شوية و مش سهل انى ألاقى وقت حلو كده على بعضه عشان أعرف أمخمخ...(حلوة أمخمخ دى)

أخى تورونتو...انا عرف ان اللى ايده فى الميه (قصدى الثلج) زى حالاتك مش زى اللى أيده فى النار (قصدى الحر) زى حالاتى...كفاية على شرف معرفتك و الاستفادة من خبرتك...و تأكد ثوابك عند الله كبير لأنك لا تبخل بأى معلومة لأى حد.

بناءا على طلب الجماهير يعود لكم مسلسل الشامى رجع من كندا يا رجالة (ويا ستات طبعا)... وصلنا فين ؟.... افتكرت.. خلصنا اجراءات ال SIN وانصح فى هذه المناسبة اخوانى بالدخول على هذا الموقع http://www.cic.gc.ca و قراءة الجزء الخاص ب SIN وكيفية التصرف لو ضاع و ازاى تحمى نفسك من المساءلة.... و الحقيقة الموقع كله جميل و يستحق القراءة.

قضينا بقية اليوم فى التسكع فى الثلج...كنا لسه برضه محدثين و عايشين دور السواح....وزرنا Rideau Canal وهى قناة صغيرة بتكون مغطاة بالثلج تماما فى الشتاء و بذلك تصبح أطول ممر تزلج فى العالم (كما يدعون) زى ما بيقولوا ان CN TOWER فى تورونتو أطول مبنى فى العالم وان كنت سمعت ان برج فى دبى بقى أطول منه.

ما علينا...بعد كده زرنا بعض ال Shopping Centers و اكتشفت بعد فترة اننا محاطون بعدة مطاعم لبنانية منها ملك الشاورمة اللى كان بالنسبة لنا فتح مبين و فكرنا بأيام زمان...

صحيح ساندوتش الشاورمة ب 4 دولار لكنه الحقيقة يساوى فى الحجم تلاتة من النوع اللى انتم عارفينه....(استطراد عشان ما تفتكروش انه غالى)...الحقيقة كمان ان الاسعار من واقع التعامل مع كذا سوبر ماركت ليست غالية جدا...يعنى تشبه السعودية للى عايشين هناك.... و اطمن يا هشام يا كندى...فيه طوابير برضه بس مش على العيش ...طوابير على الاوتوبيس مثلا...على الكافيهات...على استعمال أى مرفق عام....على دخول اماكن الترفيه... وسرحت بخيالى لو ان الناس فى مصر حاولوا يطبقوا حكاية الطابور مثلا فى انتظار الاوتوبيس.....وصحيت من الحلم بسرعة وانا بانهج...كابوس.

على فكرة موشى ديان لما كان بيسأل جواسيس اسرائيل فى مصر على حال الشعب كان بيسألهم على النقطة دى بالذات...(هل الناس بتقف طابور فى انتظار الاوتوبيس ؟ و لما كان بيعرف ان الأجابة (لأ) كان بيطمن ان احنا لسه بدرى علينا عشان نحارب ..... أكيد عنده منطق.

نسيت أقول لكم على الزحلقة الكبرى اللى أخذتها و سحبت معايا فيها ابنى الضغير...وكان شكلى مش ولا بد وانا نايم على ضهرى فى التلج و الولد اتعور فى أنفه...وانا اللى كنت عامل نفسى ماسك ايده عشان ما يتزحلقش....ذكريات (بس مهببة).

كمان من ضمن مشاهداتى الغريبة بوستر اعلانى كبير و فيه صورة واحد عنده جرح كبير فى ذراعه الأيسر و ماسك ابرة و فتلة جراحية بيده اليمنى و بيحاول يخيط الجرح ..وتحت الاعلان مكتوب Do it Yourself......Canada needs more Doctors وده طبعا يعطينا (نحن معشر الدكاترة ) فكرة عن أزمة ندرة الأطباء فى كندا و هذا حنتعرض له فى حلقة أخرى ...بس فكرونى....

فاصل شغل و نواصل....(حسب عدد المرضى).

تحياتى

[ELSHAMY]

نكمل بعض الملاحظات:

عند شراء أى شىء يجب التأكد ان السعر اللى مكتوب هو اللى حتدفعه ...يعنى هل مضاف اليه الضرائب أم لا...عشان لا تفاجأ و انت أمام الكاشير انك بتدفع حوالى 15% فوق السعر اللى شفته و تتكسف ترجع فى كلامك... wst::

طبعا بعد فترة من المشى فى التلج حتاخد خبرة التلج ... وهى ايه نوع التلج اللى يتمشى عليه بأمان...وايه النوع اللى بيغرز....وايه النوع اللى بيزحلق (ده بالذات أسألونى عليه).....وبمناسبة الطقس اكتشفت ان الجسم فعلا بيتعود بعد فترة على البرد وان حالة التخشب المبدئية اللى واجهناها فى أول أيام بدأت تزول بالتدريج...والدليل على كده عند السفر من مطار مونتريال فى العودة كانت درجة الحرارة صفر و انا لابس قميص و بنطلون فقط.... ومن غبر ال thermal كمان.

طبعا فيه قناة تليفزيونية خاصة بالطقس لكل مدينة كبرى على حدة ... و شغالة 24 ساعة..بس الحقيقة مفيدة جدا بالنسبة لتخطيط يومك...خصوصا لو كنت مسافر على high way .... و بمناسبة التليفزيون فطبعا معظم البرامج فى مسابقات الهيافة و الأخبار الخفيفة مع وجود بعض البرامج و القنوات الجادة وذات الطابع الأخبارى.... و طبعا كنا مفتقدين أى خبر عن الشرق الاوسط ...يبدو ان الكنديين بيعتبروا ان كل ما وراء المحيط ما يفرقش معاهم.... وهذه حقيقة...حتى ان بنتى سألتنى (هم الناس دول ما عندهمش مشاكل...مافيش حد عندهم بينضرب زى غزة...ما فيش حد زعلان ليه... فين أخبار الكورة....كله هوكى....كله ضرب...مافيش شتيمة :)

حتى ساعات لما يرسموا خريطة العالم يضعوا أمريكا الشمابة و الجنوبية فى منتصف الخريطة ويمينها اوروبا و افريقيا و شمالها أسيا....و انا اللى طول عمرى فاكر ان مصر فى منتصف العالم زى ما كانوا بيدرسولنا... وجهة نظر برضه wst::

حتى لو حصل و جابوا نشرة جوية عن احوال الطقس فى العالم ...يجيبوا أمريكا...بعض مدن أوروبا....و بعدين الخريطة تجرى متجاوزة المنطقة بتاعتنا بالكامل و تجيب طقس طوكيو ....يعنى من الأخر احنا بالنسبة لهم فى الطراوة .....الا اذا.... وخلى بالك من الا اذا دى.... المرة الوحيدة اللى تم ذكر السعودية فى خبر أول لما اتحكم على ولد كندى (فلسطينى أصلا) موجود فى جدة بالاعدام لأنه قتل ولد أخر (سورى) فى مشاجرة شهيرة حصلت فى جدة....الدنيا اتقلبت...و السفير الكندى اتحرك...ومنظمات بتحتج.... و هيصة

فاصل.... عشان نهدى حرقة الدم....مبسوط يا تورونتو....صراحة تامة أهو.

[ابن الصعيد]

الاخ الشامي

لي بعض الاسئلة

الاول انا طبيب بكالوريوس طب +دبلومة باطنة 19 سنة دراسية دول بكام نقطة (20-22-25 )علشان امتحان اللغة الايلتس

التاني مصاريف الاقامة هنال كام بالمتوسط انا عارف بتختلف من شخص لشخص وشكرا

[ELSHAMY]

عزيزى التايه(أسف ....انت اللى مسمى نفسك كده) :happy:

شكرا لكلماتك ... الدبلومة (سنتين على الأقل) بعد البكالوريوس = 22 نقطة...الماجستير = 25 نقطة.

بالنسبة لتكاليف المعيشة هذا سؤال عريض المنكبين...شلولخ...لأن زى ما حضرتك تفضلت بيفرق حسب ألف حاجة...حتسكن فين ... عدد أفراد الأسرة...السيارة...التدفئة...الدراسة الجامعية (لو فيه)... وطبعا أساتذتنا المقيمين حيكونوا أقدر منى على اجابتك.

أخى أبو مروان:

التلج يا سيدى لما يكون شديد البياض و متماسك...تقدر تمشى عليه بس بعيد عن حوافه اللى ساعات بتنهار تحت ثقل رجليك ...وده طبعا يخضع لعوامل أخرى منها وزن سعادتك.

ثانيا: لما يكون شبه التلج المجروش...بيكون قابل للغرز

ثالثا: لما يكون فى مرحلة السيحان و خاصة لما يكون مختلط بشوية طين بيكون لونه رمادى شوية و كأنه مغطى بطبفة من الزجاج...هو ده اللى بيزحلق (وده اللى زحلقنى) بس لو أعرف مين اللى زقنى......صدقت بقى انى عملت دكتوراة فى التلج.

بالنسبة لقنوات التلبفزيون انا كنت باتكلم على التليفزيون الكندى و قنواته المتاحة فى البيوت الكندية...الفنادق...الشقق المفروشه...أما السادة العرب و المصريين المقيمين فبامكانهم تركيب طبق استقبال للقنوات العربية :winner: وده انا شفته عندهم.

[ELSHAMY]

اخوانى...أخواتى

نكمل يوميات الرحلة....بعد استخراج ال SIN جاء الدور على فتح حساب فى البنك...و أخد لنا المحامى موعد علشان ما نروحش ننتظر كتير لأن الموظفة حتقضى معانا شوية وقت لتعريفنا بخدمات البنك و أنواع الحسابات الموجودة ... و تاخذ بياناتنا كاملة .. و بالفعل استقبلتنا انا و زوجتى بترحاب كبير و كانت متعاونة جدا معانا لكونها عرفت اننا كنديين جداد بقالنا يومين فقط... وخلال جلستها معانا عرفتنا ان أجمل حلم فى حياتها انها تزور مصر cr((: ... و احنا اخترنا عمل حساب مشترك (joint account) mf-: (حسب نصيحة المحامى و اصدقاءنا اللى سبقونا) و بالفعل اعطتنا بطاقات الصراف اللى كانت حضرتهم بعد ما أخدنا الموعد...ناس عملية جدا... و ماكانش مطلوب ابدا منا وضع اى فلوس فى الحساب فى هذا الوقت.

و بعدها بيوم رحنا الى أحد مكاتب ال Ministry of Transportation لعمل رخصة القيادة G1 و هى كما ذكرت هامة لكونها ID عليها الصورة.....المحامى قال لنا نقول اننا بلا خبرة و لا نستطيع اثبات خبرة السواقة لا فى مصر و لا فى السعودية و عايزين نمتحن G1 اللى هو امتحان نظرى فى الاشارات و معلومات المرور الخاصة باونتاريو (عندهم كتاب بيتباع هناك و يشمل كل المطلوب) و ممكن تنزيل معلوماته من أى موقع مدرسة لتعليم قيادة السيارات بكندا .

المكان شيك و رحنا للموظفة المسئولة و دار الحوار التالى:

انا : هاى جود مورنينج...انا عايز أعمل G1 لو سمحتى.

الموظفة: Welcome فين الباسبور ؟ و فين ورقة ال proof of landing ؟

انا: اتفضلى

هى: ما عندكش خبرة سابقة؟

انا: عندى ...بس الحقيقة مش عارف أثبتها.

هى: ممكن أشوف...(وشافت الرخص اللى معايا).... طيب ليه ما تروحش تترجم الرخص دى فى السفارة ...عشان ما تضيعش على نفسك احتساب الخبرة (هذه الخبرة بتفيد انك تسرع فى طلب G2 بدل ما تنتظر سنة وكمان بتنفع فى تقليل قيمة التأمين عند استخراج الرخصة و شراء سيارة)

ملحوظة : بالنسبة لى ده ما كانش مهم فى هذه المرحلة لظروف خاصة.

أنا: بس السفارة حتاخد وقت طويل ...وانا ماعنديش وقت.

هى: أوكى...انا مستعدة أقبل أى ترجمة من أى مكتب ترجمة معتمد... وهنا لعب الشيطان فى مخى...وشاورت زوجتى...و قلت للموظفة...طيب حاحاول و ارجع لك. (ترجمة : أنيس عبيد)

المحامى ما كنش عاجبه اللى حصل وقال كنت عملتها بدون خبرة و خلاص ... و بما اننا كنا رايحين تورونتو بعدها بيوم قال لى على العموم ممكن فى تورونتو تلاقى أى مكتب ترجمة...ترجمها...و ممكن تمتحن هناك.

وهنا حاضطر أقفز من التسلسل الزمنى بتاع الرحلة الى أخر يوم فيها ...طبعا فى تورونتو ما كنش فيه وقت للكلام ده.. و بعد سؤال الحبايب و المعارف قالوا لنا روحوا تانى و قو لول لهم انكوا عايزين G1 بدون خبرة ..... بس يا جماعة دول عرفونا و عرفوا قصتنا.... قالوا لنا مش مهم....هنا الموظف عارف انه بيقضى 8 ساعات فى عمله لخدمتك و خدمة الناس و مهمته تنفيذ أوامرك و رغباتك... ومش زى مصر بيكون أحرص على الوزارة من الوزير...يعنى نرجع تانى...يعنى مش حتقول لنا (لا يا روح باباك انت وهى..مش انتوا اللى كنتم هنا من أسبوع...لا يا حلاوة...انت فاكرنا نايمين...احنا عارفين حركاتكم دى...عالم..؟؟؟ )

لما نشوف ايه اللى حصل فى الزيارة التانية ....لازم شوية تشويق فى الحكاية...عشان تفضلوا متابعين المسلسل...الحلقة الجاية بعد شوية.

تحياتى

[ELSHAMY]

صدقنى أنا بأستنى الحلقات بتاعتك و لا كأنى مستنى the bold and beautiful" ومتهيأ لى الحلقات دى حتترجم للغات ثانية علشان الناس كلها تستفيد mf-:

و ممكن نسمى المسلسل "دليل الأنام للاندنج التمام "للدكتور الشامى

تقبل تحياتى و فى إنتظار الحلقة القادمة

أخوك أمجد جمال محمد

أخى امجد...و ياترى انت بتعتبرنى ال bold أم ال beautiful cr((:

[ELSHAMY]

نواصل مسلسل (نوتس لاندينج)...(بلاش bold and beatiful ) ...انا لسه عندى شعر

وصلنا نفس مكتب استخراج الرخصة و قابلتنا نفس الموظفة و طبعا تذكرتنا على الفور ودار الحوار التالى:

انا: هاى...عاوز اعمل رخصة قيادة G1 لو سمحتى ( ملحوظة : الموظفة كانت مش beautiful أظن أصولها أفريقية غامقة)

هى: هاى..welcome فين اوراقك ؟

أنا: اتفضلى

هى: عندك خبرة

انا: (بشىء من الجدية) انا عاوز G1

هى: OK Sir ادفع الرسوم و روح كاونتر رقم 11

دفعنا الرسوم 125 دولار للفرد... وعند كاونتر 11 قابلنتنى موظفة أخرى ذات وجه مألوف شكيت انها عربية و بالفعل كانت لبنانية...

حسيت بشىء من الراحة..أخيرا بقى لى كوسة...طبعا كنت واهم..كانت جادة فى شغلها جدا مع محاولة اشعارى بأنها فى خدمتى.. و كمان ما تنسوش ان مراتى كانت معايا cr((:

كشفنا نظر...وطلبت منا ان نتوجه لمكان الامتحان.

اخدنا و رقتين ..واحدة لأمتحان الاشارات ...و التانية الامتحان النظرى.... وحصل لى موقف ظريف جدا...مسكت الورقة و لبست النضارة و قعدت أبحلق بس مش شايف الكلام كويس...ما علينا...سلمت الورقة... نجحت فى امتحان الاشارات وسقطت فى التانى...ممكن طبعا تعيد الامتحان فى ساعتها بعد ما تدفع 10 دولار...دفعت و رجعت....برضه لبست النضارة و برضه مش شايف كويس...قلت لما أمسح العدسات يمكن مغبشة...وكانت المفاجأة ان العدسات مش موجودة...وقعت فى جيبى وانا بأطلع النضارة و اتارينى كنت لابس الشنبر على اللحم... mf-: و عرفت ساعتها ليه ما نجحتش. cr((:

فاصل و نواصل

تحياتى

[ELSHAMY]

حضرتك كنت مقدم من اي بلد د/شامي؟؟؟؟؟؟؟؟؟؟؟؟؟؟؟؟

من السعودية

[ELSHAMY]

السلام عليكم د / الشامى

انا عندى استفسار لحضرتك . حضرتك ناوى ترجع تانى الى كندا و لا هتسافر و ترجع لحد ما تأخد الباسبور الكندى . و لو حضرتك مش هتستقر فى كندا ممكن تقلنا الاسباب حتى نستفيد من خبرة حضرتك كما مازلنا نستفيد منها فى رحلة اللانديج. انا عارفة ان لكل شخص ظروفه الخاصة لكن لو حضرتك توضح لنا يكون جزاك الله كل خير و يمكن حضرتك تبين لنا شئ غير واضح حتى الان.

( ان الله فى عون العبد ما دام العبد فى عون أخيه )

أختى المر..

أكيد عندك حق فى استفسارك...بس ما أعتقدش ان ممكن أى حد فى الدنيا حيعطيك اجابة مباشرة عن هذا السؤال...و ما اعتقدش (وانا أسف) ان اجابتى عن ما نويت أن أفعله على مستواى الشخصى حتفيد حضرتك فى شىء...لكن أنا كنت حريص من البداية على تعريفكم جميعا بالخطوط العامة اللى تفيد الجميع و انصحكم بقدر ما استفدت انا من التجربة و بقدر ما أتيح لى من خبرات حتى تطمئنوا على لاندينج سلس... و ماحدش يقع فى نفس أخطائى .... وشكرا على تذكيرنا بالحديث الشريف.

انا شخصيا بأحب حديث أخر (من حسن اسلام المرء ..تركه ما لا يعنيه)

على العموم انتظرى بقية الحلقات...انا مش حأبخل بأى معلومة....عاوز أعرف رأى الأخوة القراء فى الكلمتين دول..هل أنا غلطان ؟

تحياتى لك و بالتوفيق

[ELSHAMY]

يا دكتورنا الموهوب الشامي باااااااشا سابقا الكندي حاليا مع الاعتذار ل حبيبنا إتش :happy:

انا بسجل اعجابي الشديد باسلوب السرد الجذاب

والي هو اكثر من رائع

ايه رأي حضرتك :

ماتألف مسلسل ولا اتنين وتنزل بيهم في رمضان الجاي

ممكن تلحق برضه

صدقني يادكتور دة الي ماشي اليومين دوووول

وسيب ليا فيه الجزء الخاص بتاع يوميات الصيدلي مطحون

مع تحيات

اخوك الصيدلاني الي بيحلم بكندا

أخى ماجد

انا صحيح مكن أنافس اسامة انور عكاشة فى رمضان الجاى بس لو أضمن ان المشاهدين حيكونوا فى جمال و جدعنة أعضاء هذا المنتدى.. وانت منهم...اطمن حاشوف لك دور فى المسلسل....بس برضه لازم تعمل المعادلة علشان أوافقك لك...ما تنساش انى بقيت كندى... md2:

[ELSHAMY]

اخوانى...اخواتى....السلام عليكم ورحمة الله

الحلقة اللى بعد الى بعديها....أعتقد احنا لسه فى موضوع الرخصة...المهم انى نجحت فى المرة التانية برضه من غير نضارة...

Congratulation Sir you have passed this time هكذا بشرتنى الموظفة و ان شاء الله حنبعت لك الرخصة على العنوان بعد 3 - 4 اسابيع

....مش عارف ليه فرحت جدا....وحسيت بفخر شديد...نفس شعورى يوم ما حصلت على الدكتوراة...أخيرا جبت فيكى جون يا كندا....و عيونى دمعت...و افتكرت مصر و شعبها....و طلعت من المكتب و انا بأعنى أغنية عبد الحليم (يا صحابى يا أهلى يا جيرانى....أنا عايز أخدكوا فى أحضانى)......

طبعا الفقرة اللى فاتت دى فى الهجايص ...ما حصلتش طبعا ...دى لزوم مؤلفى المسلسلات اللى انا بقيت منهم :happy:

قبل ما أطلع من المكتب...تذكرت حاجة هامة جدا...فيه حاجة ناسيها...أه صحيح ..دى مراتى كانت معايا.....رجعت بسرعة (قال يعنى بأدور عليها)... لقيتها بتعيد الامتحان للمرة التالتة...وطبعا عداد العشرة دولار شغال...بس الحقيقة اطمنت عليها لما لقيتها لابسة نضارتها.... md2:

المهم...شوية و لقيتها طالعة و بتغنى نفس الأغنية...عرفت انها نجحت... وخرجنا ركبنا العربية الفان اللى كنت استأجرتها قبل أسبوع و لفيت بيها مقاطعة أونتاريو كلها وكنت سايقها حوالى 1800 كيلو ...والبجاحة انى راكنها على باب المكتب ...وجاى امتحن عشان G1....

مش بأقول لكم جبت جون فى كندا