الشامى رجع من كندا يا رجالة

[ELSHAMY]

اللي فات ده عبارة عن اغنية تعبر عن الحرية و الحياة كالحصان بدون مربط للجواد اي الحياة و انت حاسس بالحرية

مش فاهم الجملة دى...دى ايطالى دى يا مرسى و لا عربى...

[ELSHAMY]

اللهم احفظه لنا ولاسرته كما حفظت الدكر الحكيم

أعتقد قصدك الذِكر الحكيم.....صح ؟

تفرق كتير يا صاحبى

[ELSHAMY]

أخوانى...أخواتى الأحباء

السلام عليكم و رحمة الله..

....على عكس المتوقع تماما ...القطران أصابته سكتة كلامية و جلس مذهولا يستمع الى كلمات الرجل لا يستطيع له ردا......خصوصا أن كلمات الرجل لاقت استحسانا من كل المعتقلين أمثالى....

و هنا تحمس رجل أخر و وجه كلامه الى الهباب قائلا:

فين الشنط بتاعتنا.....؟

كنا فى خضم الأحداث نسينا موضوع الشنط خالص...كان فات علينا نصف ساعة فى المعتقل اللعين....و سرت صيحات بين الجالسين لما افتكرنا ان معانا شنط....خصوصا اننا فى شيكاغو...مركز الحرامية و العصابات و كان أول عينة منهم هو هذا القطران و معاونيه.....

أمر القطران العساكر بأن يصطحبوا الركاب كل واحد على حدة و فى حراسة عسكرى الى سير الشنط لأحضارها...و خرج الشامى من المعتقل فى حراسة هلف يحمل فى ملامحه كل معالم الغطرسة و الكبر الأمريكى....كانوا يعتبروننا رهن الاعتقال لأن من يستطيع أن يخرج من هذه الغرفة كان حيبقى مباشرة فى الاراضى الامريكية....

كان غير مسموح لنا حتى بادخال الشنط الى الغرفة...و تركوها متكومة على جنب فى الخارج دون أى اعتبار لقلقنا على شنطنا حيث كانت معرضة لأى سرقة ...

كانت الجوازات موجودة أمام كبير الضباط يختار منها كل مرة واحد على مزاجه....أو يأتى أحد الضباط من الغرف الخلفية وياخد باسبور و يغيب ربع ساعة و يرجع ينادى على صاحب الباسبور و يصطحبه الى غرفته لبدء التحقيق معاه...أو يمكن تعذيبه...

مرت ساعتان و بدأت الأمور يبقى شكلها بايخ حبتين خصوصا ان الباسبورات مش بتخلص مع وصول مجموعات جديدة من المعتقلين القادمين من جبال تورا بورا....

كان باسبورى المصرى بحجمه الملحوظ وسط باسبورات الناس صامدا لا يتحرك من مكانه....الظاهر كانوا خايفين يقربوا منه أحسن يفرقع فيهم...كان معاه باسبور أخر بنفس الحجم فغرفت ان فيه أحد رفقاء الجهاد المصريين موجود فى القاعة...و بالفعل كان الباسبور لفتاة مصرية تعمل فى الأمم المتحدة و تحمل باسبور أخر ديبلوماسى لم يعتد به ضباط الجنة الامريكية...و بقى الباسبورين صامدين لمدة ساعتين ونصف عندما تكرم أحد الاجلاف و أمسك باسبورها و ناداها للتثبت من الأمر...

بقى ياسبور الشامى لم يمس...

قلت فى نفسى : طبعا يا أبو الشام حيخلوك أخر واحد....أنت مشاكلك كتيرة و حيتسلوا عليك بهدوء....و بدأت أضع سيناريو للتحقيق و أحاول أحضر الاجابات المناسبة..

الضابط وقد أمسك بالباسبور مبتسما ابتسامة كلها تشفى:

انت بقى الشامى...

الشامى بكل عزة: أيوه

الضابط: انت تعبتنا كتير يا خبيبى.... تلاتة سنة و اخنا مش نعرفتو نمكستو انت...

الشامى: صامتا

الضابط: بس اخنا اندنا رجالة مش كانوا يناموا عشان يعرف فين شامى....

الشامى: رجالة ايه و هباب ايه...انتو مسكتونى بالصدفة...ما تعملش فيها أبو الرجالة...

الضابط: انت باين أليك مجرم كبير....حتندم كتير خبيبى لما شوفتوا اللى حيجرالك...

الشامى: أحد.....أحد...

مش عارف اذا كان الحوار محتاج ترجمة أم لا....عموما أقدم أسفى على الأخوة اللى مش بيعرفوا انجليزى...

.....و هنا أفاق الشامى من أحلامه على صوت ضابطة شكلها من أصول امريكية جنوبية تصيح قائلة: مستر الشامى.....

........

يتبع....

[ELSHAMY]

طبعا لو لم اكن اسكندراني لوددت ان اكون اسكندراني...كمل ياغالي...يارافع راسنا...

وأنا ان لم أكن أسكندرانيا لتمنيت أن أكون فنزويليا....

[ELSHAMY]

لتمنيت أن أكون فنزويليا....

مازورتهاش ...بس اسمع ان الحريم هناك تشرح الالب الحزين...ايه ....كنت فين يا لحم لما كنا جزارين...

دماغك راحت بعيد يا صديقى...

أنا قصدى احترامى لموقف فنزويلا فى أحداث غزة......

[ELSHAMY]

]دكتورنا الشامي خبيب البي. الله ينور عليك انت ياخبيبي كلامك جميل اوي ولازم ننشورهلش في كتاب يليء بالمئام بتاع انت ولازم حد يتبنى الكلام بتاع انت بس خبيبي معلش انا لسة بفكر. wst:: :lol:

خبيبى سامخ...

يلا خلصتو تفكير بسرعة...فيه كتير منتج ممكن عملتو شغل و انت لسه فكر...فكر.......

[ELSHAMY]

أنا كل مرة أجاى متأخر و يكون الفيلم أشتغل وأقعد فى أخر صف

هو العرض بيدأ امتى علشان أنا نظرى ضعيف مبقدرش أشوف الترجمة من أخر صف

الشوية اللى عرفت أشفهم ( ومنغير ترجمة)بفكرونى بفليم أجنبى لبطل معروف ( معروف جدا لدرجة أنى مش عرف اسمه )

البطل (أمريكى طبعا)دة لما دخل الصين عملوا فيه اللى الأمريكان بيحاولوا يعملوه فيك يا دوك (شوف بيحاولوا الأنتقاااااااااااااااااام)

بس على مين ده احنا المصريين (بس متقولش لحد)

متابع وبشدة

احنا مش بتوع أفلام....كل اللى حصل ده حقيقى....ما تخافش على الشامى...احنا بتوع الأهوال....

ربنا يستر...

[ELSHAMY]

حمدا لله على السلامة يا دكتور و أعتذر على التأخير في السلامات ، بصراحة أسلوب مميز العيلة عندي كلها بتقرأ معايا حلقات الشامي ،و بنضحك عليها ، ربنا يبارك فيك ، لكن دكتور شامي بتحكي بردك " نونة نونة " كبر الحلقة شوية يا دكتور رجاءا

أختك أم بلال

متسجلة تأخير يا أم بلال....

حنسامحوكى اذا افتكرتينا بدعوة حلوة من بتوع زمان.....

سلامى للكتاكيت أولادك...

حلقة جديدة حتنزل حالا عشان خاطرك....

تم تعديل 10 يناير 2009 بواسطة ELSHAMY

[ELSHAMY]

أخوانى و أخواتى الأحباء....

السلام عليكم ورحمة الله

بمرور الوقت تراكم خلف الخط الأسود عشرات المسافرين.... طبعا المسافرين أصحاب الجوازات الكندية مروا الى الاراضى الامريكية مرور الريح...فى ثوانى اجراءاتهم خلصت و بقى الدور على أمثالنا من أصحاب الباسبورات اللى لا بتودى و لا تجيب...لأ الحقيقة هى ساعات بتودى بس فى داهية.....

جاءت ولية بملابس عسكرية من ضباط المطار وشها يقطع الخميرة من البيت و لمت باسبوراتنا من ضباط الجوازات و طلبت منا أن نتبعها الى مكان مجهول....على جنب كده كان فيه ممر صغير يؤدى الى غرفة كبيرة الحجم عليها اتنين عساكر حراسة الواحد منهم زى الهلف طوله مترين و شكلهم نسوا ازاى يبتسموا ...كأنهم لو ضحكوا حيفك اللحام بتاع وشوشهم.....

الشامى ما كانش بيحب هذه النوعية من خلق الله....توجست خيفة من المصير المجهول.... هيا موتة و لا أكتر....أهم حاجة يا أبو الشام الثبات....الثبات....و ماتعترفش بحاجة حتى لو عذبوك....أنت راجل قدوة....

الغرفة كبيرة و فيها صفوف من الدكك الخشبية اللى مالهش ضهر....متعبة جدا فى القعدة... أمامنا منصة كبيرة يجلس عليه ثلاثة ضباط خلف عدة شاشات للكمبيوتر....ووراهم على الحيطة مكتوب ادراة الهجرة الامريكية مع سارية عليها علم أمريكى ضخم.......المنظر كله يبعث على الرهبة كأننا معتقلين....الغرفة كان بها ناس من كل الجنسيات....شفت حتة فاضية قعدت فيها و قد حل عليا تعب الدنيا كلها...

الجميل انى كنت هادى جدا...باتفرج على التمثيلية اللى بتحصل قدامى كأنى بأشوف فيلم....أصل لما تفوض أمرك لله و مايكونش فى أيدك حاجة تعملها حيكون ايه فايدة القلق...

بدا من طريقة تعامل الضباط مع الناس ان الليلة مش فايتة...كانوا فى منتهى العجرفة و الصلافة و الكبرياء ...عندهم شعور أنهم أصحاب مفاتيح الجنة.....كثر الشخط و النطر فى الناس اللى منهم كتير لا يتكلموا الانجليزية....ولما واحد حب يتكلم فى الموبيل بتاعه عشان يطمن أهله صرخ فيه كبير الضباط بشكل مستفز قائلا بوش عكر:

غير مسموح لك بعمل أى شىء فى هذه الغرفة الا بأذنى....مافيش كلام فى التليفون الا بأذنى...انتم هنا تحت أمرتى.....ليس لكم الحق فى أى فعل حتى ننظر فى أمركم.....

الراجل الغلبان قفل التليفون...و قال له: كنت عاوز أطمن أهلى

الضابط: اللى عاوز يتكلم يرفع ايده...و يستأذن و الكلام يكون من التليفون اللى على مكتبى و باختصار...

بدأ الناس فى رفع أيديهم زى التلاميذ و فيهم العجائز و السيدات...و الباشا يختار منهم على مزاجه...و كل ما حد يروح يتكلم يقول له: باختصار و بسرعة....

أنا تليفونى كان شحنه خلص....و كانت الساعة بقت حوالى 6 مساءا....حتى أولادى ما يعرفوش أنا فين...كنت مفهمهم انى حأكون عندهم الساعة خمسة بالكتير.....وقلت زمانهم افتكرونى اختفيت فى العاصفة الثلجية..... و لا عملت حادثة فى السكة....

اضطريت أسفا انى أنضم لجموع رافعى الأيدى حتى أحظى بموافقة صاحب العزة الأمريكى الجلف اللى قاعد على المنصة بيتحكم فى خلق الله..

أخيرا شاور لى.... : انت تعال...

قلت فى بالى يا بن اللذينا...انت لو تعرف بتكلم مين....أنا الشامى ياض...ده حبايبى فى المنتدى لو عرفوا حيقطعوك....

معلش لو كان لك عند الأمريكانى حاجة قول له يا قطران....

رحت عند القطران و قلت له عايز أكلم أسرتى فى كندا....قالى باختصار ...

ألو يا بندر....أيوه أنا وصلت ... لأ مش تورونتو.....شيكاغو...أه و الله شيكاغو.....أه بتاعة أمريكا.....مطار تورونتو كان مقفول...يا بختك ايه....ده العملية شكلها فى الضياع....ربنا يسهل مش عارف...لما أعرف حأحاول أتصل تانى...مع السلامة...

و فجأة قام رجل عجوز يبدو انه من جنسية شرق أوروبية و هجم على المنصة ... كان شكله اتخنق من القعدة وقال للضابط: انت بتعمل فينا كده ليه ...احنا مش عايزين ندخل بلدك أساسا...و لم يكن لنا رغبة فى ذلك.....و....

يا ترى حصل له أيه ؟....و ايه كانت ردة فعل القطران...

يتبع ...

الله يكون فى عونك

دة انا دمى اتحرق

لك كل التحية متابع فى صمت , لكن بصراحة أصبحت خايف وقلق وأعصابى توترت wst:: دة اية العنجهية دى والعنطزة.

كمل يا باشا :lol:

و لسه انت شفت حاجة....

ده الشامى لسه حيتبهدل أكتر من كده...اقرا الحلقة الجاية...

[ELSHAMY]

د / الشامي

أنا طول عمري بكره أمريكا لله في لله كده ( اه و الله ) على رأي د/تهامي

بس بجد يا دكتور زي ما حببتني في كندا أكتر مانا حباها

فعلا كرهتني في أمريكا أكتر مانا كرهاها :ninja:

وبعدين يا دكتور انتا نزولك ترانزيت في الي ماتتسمى دي

أثر عليك ولا ايه ؟ كده برضو عايز تقعدني في الكرسي

الامامي ب 50 دولار حته واحده طب حتى اعمل حساب

اني زبونه قديمه معاكو wst:: أمال اخوانا الجداد الظراف

الي دخلوا التوبيك معانا جديد هيدفعوا كام :lol:

أنا بقى يادكتور عايزه أعقد في الاول و ببلاش و ينزلي مشاريب كمان

و عندك أجدع كرسى فوتيه عشان الدكتورة يا وله....

[ELSHAMY]

أخوانى....أخواتى الأحباء

السلام عليكم و رحمة الله

سار الشامى الى المنصة بكل عزة و كرامة....

الست طلبت منى ال PR Card اعطيتهولها و اختفت تانى فى غرفتها لمدة عشر دقائق وجاءت حاملة مجموعة من الأوراق طلبت منى أملاها...و عملت سكان للكارد على شاشة أمامها...أعطيتها الأوراق....لم تنظر اليها....و طلبت منى بعض التوقيعات على حاجات مش عارفها....و ماكنتش عايز أعرفها و لا عندى نفس أقراها.....انشالله يكون فيها اعتراف بانى زعيم التنظيم حتى.....

فى النهاية قامت بتدبيس ورقة صغيرة فى الباسبور مع ختم دخول الجنة......

كانت الورقة عبارة عن تأشيرة دخول ليوم واحد فقط.... تخيلوا....تمخض الجبل فولد فأرا......يوم واحد يا أبخل خلق الله....طب خليهم يومين...وايه الحال لو ماعرفناش نخرج من بلدكم الكريهة فى هذا اليوم حتعتبرونا ايه....متسللين و هربانين و اقامتنا غير شرعية...؟؟ !

كان كل ده مش مهم....المهم أخرج بسرعة من هذا المكان الكئيب...

بالفعل أخذت الشنط ولقيت مندوب من شركة أليطاليا فى انتظارى و قال:

بسرعة أطلع الدور التانى....هناك فيه مكتب شركة اليطاليا..

الشامى: هو ايه الموضوع حتعملوا فينا ايه تانى...

كالعادة ماكنش عنده رد.....

فى الدور التانى كان هناك طابور طويل جدا من ركاب الطائرة المنكوبة.....وقفت فى الطابور مثلهم و انا مش عارف أنا واقف ليه....علمتنا الظروف الحياتية اليومية فى بلادنا ان فى المواقف اللى زى دى لازم الواحد يلحق دوره فى الطابور....و بعدين يسأل ده طابور ايه....

سرت همهمات بين الواقفين انهم بيوزعوا فوشرات للبيات فى أحد الفنادق....أخرين عرفوا ان مافيش طيارات الى تورونتو على الخطوط الايطالية لمدة 3 أيام......

كده الرحلة باظت من أولها يا أبو الشام....كنت زعلان على تأخير ساعة فى اقلاع الطيارة..... أدى كمان 72 ساعة حيضيعوا...يعنى المجموع بقى 73 ساعة...

ملأنى شعور بالغيظ و الكبت و الزعل.....أسوأ شىء أن لا يكون فى ايدك وسيلة للتصرف....أن لا تملك ارادتك....و ان تجهل ما هو مصيرك.....بالذات ان الشامى – زى ما انتم طبعا عارفين – بيعتبر نفسه رئيس قسم التخطيط و التظبيط والترتيب....لكن فى نفس الوقت عنده ايمان شديد بأن كل شىء بقدر....و ان ارادة الله واجبة النفاذ و لعل فيها الخير....و كل تأخيرة و فيها خيرة....المهم ألا تعجز أمام الصعاب و يكون عندك دائما الخطط البديلة و القدرة على اتخاذ القرار.....

الساعة بقت حوالى 8:30 مساءا......وصلت عند المضيفة.... أعطتنى فوشر للاقامة فى فندق HILTON INN GARDEN.....حسيت من اسمه انه باين عليه اكتر من 3 نجوم........مش بطال عيش حياتك يا أبو الشام....ان شاء الله مرة تانية ابقى أجيب العيال يتفرجوا عليه من برة....

تأكدت من حوارى مع المضيفة – بالايطالى طبعا – أصل انا كنت قريت زى ما انتم عارفين كتاب كيف تتعلم الايطالية....الخ....الخ..

تأكدت من معلومة ان مافيش طيارات لمدة 3 أيام....

الشامى: امال ايه النظام يا حاجة ؟

المضيفة: نظامو خلطبيسو سنيورى

الشامى: يعنى حنبات كام يوم ؟ و حتودونا تورونتو امتى ؟

المضيفة: سنيورى أخبارو زفتو..... ممكن سنيورى نومو الليلاتو و بكرة عرفتو من اوتيلو اخبارو.....

الشامى: ليلتك سودة.....يعنى حنروح تورونتو ازايو ؟

المضيفة: سنيورى ممكن اتوبيساتو روحتو تورونتو....

الشامى: اتوبيساتو ايه يا ولية...؟ ده حياخد كام ساعاتو ؟

المضيفة: ممكن اتناشراتو ساعاتو سنيورى....

الشامى: طب أعمل ايه بالورقة دى...؟ وازاى أروح الفندق ؟

المضيفة و قد اتنفخت منى: سنيورى انزلتوا فى الشارع.... ممكن اتوبيساتو شيلتو انتا روحتو أوتيلو....

الشامى: طب يا أختى متشكرينو....(يعنى جراتسى باللغة الايطالية)

...

يتبع....

[ELSHAMY]

أخوانى....أخواتى الأحباء

السلام عليكم و رحمة الله

تأكدت من حوارى مع المضيفة – بالايطالى طبعا – أصل انا كنت قريت زى ما انتم عارفين كتاب كيف تتعلم الايطالية....الخ....الخ..

تأكدت من معلومة ان مافيش طيارات لمدة 3 أيام....

الشامى: امال ايه النظام يا حاجة ؟

المضيفة: نظامو خلطبيسو سنيورى

الشامى: يعنى حنبات كام يوم ؟ و حتودونا تورونتو امتى ؟

المضيفة: سنيورى أخبارو زفتو..... ممكن سنيورى نومو الليلاتو و بكرة عرفتو من اوتيلو اخبارو.....

الشامى: ليلتك سودة.....يعنى حنروح تورونتو ازايو ؟

المضيفة: سنيورى ممكن اتوبيساتو روحتو تورونتو....

الشامى: اتوبيساتو ايه يا ولية...؟ ده حياخد كام ساعاتو ؟

المضيفة: ممكن اتناشراتو ساعاتو سنيورى....

الشامى: طب أعمل ايه بالورقة دى...؟ وازاى أروح الفندق ؟

المضيفة و قد اتنفخت منى: سنيورى انزلتوا فى الشارع.... ممكن اتوبيساتو شيلتو انتا روحتو أوتيلو....

الشامى: طب يا أختى متشكرينو....(يعنى جراتسى باللغة الايطالية)

...

يتبع....

سؤال الحلقة اللي فاتت و قبل لما الحلقة اللي جاية تبدأ و ده موجه لعموم الجماهير و المشاركين و الجائزة "مقعد درجة اولى وراء القائد الشامي مباشرة"....

هل سيستسلم القائد الشجاع بعد ما تخلص من "القطران" و يخضع "للولية" و من ثم يركب الاتوبيساتو و لا يثور و يجول و يجند القوات الجوية الامريكية لنقله الى الاراضي الشامية ؟؟؟؟

ارجو من المشاهدين المشاركة بالاجابة على السؤال و الفوز بالجائزة :sad:

ممكن أشارك لو سمحت....

[ELSHAMY]

سنيورى....سنيوريتا....خبيب قلبى كله

السلام عليكم و رحمة الله

فى الشارع كان فيه ناس كتير من الضحايا و من تم الافراج عنهم من المعتقلين من ركاب الطائرة ....الجو كان بارد جدا جدا جدا...... ومع ان الشامى كان متسلح بالكوفيه و السويتر و الجوانتى و الكاب و ما خفى كان أعظم ...الا ان البرد كان قارص جدا و درجة الحرارة كانت – 10....

كان الناس متقسمين مجموعات حسب الفندق اللى حيباتوا فيه.... مجموعة الهيلتون كانت كبيرة....و عرفت ان علينا الانتظار لأن كل ربع ساعة فيه أتوبيس لنقل الركاب الى الفندق.....فى الربع ساعة الأولى كان وجهى بدأ يتجمد من البرد....السقعة اخترقت كل التحصينات اللى أنا عاملها و وصلت أماكن عميقة جدا....ما علينا....

حضر الاوتوبيس متمخطرا....اتوبيس صغير جدا...اذا اتسع ل 10 أفراد فانه من الأكيد لن يتسع لشنطهم.... طبعا باءت محاولتى فى ركوبه بالفشل....و كان علينا الانتظار ربع ساعة كمان.....حسيت ان الموضوع حيطول و يمكن أموت من البرد خصوصا ان فيه رياح جامدة تزيد الشعور بالبرد....

ايه الورطة السودة دى....

كان زمانك متدفى مع الولد علوش و البنت ندى مع كباية شاى بالنعناع....و أكيد أم على كانت محضرالك أكلة حلوة ترم بيها عضمك.....

الحمد لله على كل شىء....كان ممكن برضه يحصلك حاجة فى السكة فى وجود العاصفة....أصل البنت الكندية اللى كانت قاعدة جنبى فى الطيارة قالت لى : أنت أكيد مجنون اذا فكرت انك تسوق العربية من تورونتو الى لندن فى العاصفة دى....انت مش عاوز تشوف عيالك بعد كده...؟ طبعا كانت بتتكلم باللغة الكندية.... و الشامى طبعا فهمها..أصل أنا كنت قريت كتاب....و لا بلاش أحسن تزهقوا منى...

عندها حق....بس برضه ما كنتش عاوز أشوف الوشوش الامريكية العكرة.... و لا أقف الوقفة السودة دى....

نرجع و نقول : قدر الله و ما شاء فعل....

ميزة القادة الكبار أمثال الشامى ان دايما بيكون عندهم تفكير ثورى يقود الى خطط بديلة تساعد على الألتفاف حول العدو حسب سير المعارك.....كلام كبير...

و كان القائد الشامى من كبار مؤيدى مقولة "هين قرشك و لا تهين نفسك"....قصدى هين دولارك بما أننا فى أمريكا....

قلت بلا وجع دماغ...أشوفلى تاكسى يودينى على الفندق...

كان فيه سيارة أجرة دودوج جراند كارافان واقفة على باب المطار فى انتظار زبائن....رحت للسائق و كلمته ....المرة دة بالانجليزى....أصل انا كنت قريت كتاب كيف تتكلم مع سائق التاكسى .... ما علينا....

الشامى: أى وونت تو جو تو هيلتون جاردن ان هوتيل احيات أبوك يا أسطى ..

السائق: أى ويل تيك 25 دولارز...

الشامى: يعنى ما تمشيش عشريناية يا أبو الكباتن ؟

السائق: ماشى....و قام حاطط الشنط فى العربية ...

وأخيرا بدأ الدفء يسرى فى جسم الشامى بعد ان استقر على الكرسى بجوار السائق...

و فجأة رن هاتف السائق....و كانت المفاجأة الكبرى.....

يتبع....

ملحوظة: من هنا و رايح حيكون فيه سؤال لكل حلقة ..و مش حتنزل الحلقة اللى بعديها غير لما تشتركوا جميعا فى اجابة السؤال...ماشى ؟

سؤال حلقة اليوم: يا ترى ايه المفاجأة التى حملتها مكالمة التليفون للسائق ؟

تم تعديل 11 يناير 2009 بواسطة ELSHAMY

[ELSHAMY]

سؤال حلقة اليوم: يا ترى ايه المفاجأة التى حملتها مكالمة التليفون للسائق ؟

حلو اوى يا دكتور موضوع الاسئلة ده :lol: :lol:

وانا هجاوب

تلاقى مامته اتصلت بيه وقالت هاتلى كورن فليس عشان افطر وبكده مبقاش ينفع يوصلك ؟!!!! :P :P

محاولتك ممتازة يا موسى.....

بس اللى أنا عرفته من السائق ان مامته مش بتحب الكورن فليكس...

حاول تانى....

[ELSHAMY]

انا..انا :lol: اجاوب كان رئيس في عمل يطلب منه حمل زبون والعشرناتو كانت حتمشي لجيباتو. صح?تحيه علي الابداع التأليفي

شكرا أم ريهام على المشاركة....

للأسف محاولة خاطئة....

عندك محاولة أخيرة

[ELSHAMY]

ممكن اجاب انا يا أستاذ؟

ده اتصال من الشركة بتاعة مال هو بتقولوا طريقك مسدود مسدود بالتلج الامريكانى يااااااااا ولدى على رأى المرحوم عبد الحليم حافظ

لم يحالفك الحظ هذه المرة....

طب ما التلج مالى الدنيا ....و ايه الجديد

[ELSHAMY]

يا مغامراتك يا جنرال :lol:

المهم تكون عرفت تقابل آل كابوني في شيكاغو وتقنعه ينضم لنا ده مافيجي قديم و ممكن يفيدنا :lol:

رفضوا يدخلوا معانا.....

خافوا على نفسهم....

[ELSHAMY]

سنيورى....سنيوريتا....خبيب قلبى كله

السلام عليكم و رحمة الله

يتبع....

ملحوظة: من هنا و رايح حيكون فيه سؤال لكل حلقة ..و مش حتنزل الحلقة اللى بعديها غير لما تشتركوا جميعا فى اجابة السؤال...ماشى ؟

سؤال حلقة اليوم: يا ترى ايه المفاجأة التى حملتها مكالمة التليفون للسائق ؟

اولاً حكاية السؤال دي فكرتي لكن كل شئ يهون لاجل قائدنا و احنا برضه في قهوته "قهوة الفيشامي"

انا هاجاوب بكل ثقة و هاقولك ان التليفون ده من ALITALIA و هم بيدوروا عليك يا خبيبي لازم تركب الاتوبيساتو بتاع هما مش على مزاجك انت نوغ ايني.....

و طبعاً انا الفائز بجائزة اليوم : الفائز هو ...

"المفتش احمد صالح كورومبو "

:lol: :lol:

ده كلام يا كرومبو....

و هى أليطاليا حتعرف رقم السواق منين....؟

ركز معانا شوية...

[ELSHAMY]

ايه الروعة ده يا دوك....

الله ينور سرد قصصي ولا احلي....

ما شاء الله :lol: :lol:

بس مش ممكن استثناء من السؤال ده؟؟؟

انا اخر عهد لي بالاسئله من عشر سنين

ارحموا تلميذ قوم نسي؟؟؟؟؟ :P :P

عشر سنين...؟ ليه انتى فى سنة كام دلوقت ؟

[ELSHAMY]

طيب انا عملت تحرياتى لغاية ماعرفت التاكسى اللى ركبته من المطار

مش برضه هو ده

و متحفظ على السواق و جارى استجوابه للرد على السؤال الصعب

و حنوافيك بالرد لاحقا

التاكسى هو مضبوط...و فى انتظار نتيجة التحقيقات....

ادى دقنى لو عرفت...السواق ده تم تجنيده من قبل الشامى ..و لن يعترف بشىء