الشامى رجع من كندا يا رجالة

[ELSHAMY]

النمرة غلط

تسجيل متابعة واعجاب يا دكتورنا

غلط يا باشا....النمرة كانت صح.....

[ELSHAMY]

السؤال سهل ياريس

أكيد التيلفون كان من FBI

بيأكدو على صاحب التاكسي يتحفظ على الهدف

وأكيد كان هناك كم سيارة بوليس تحاصر التاكسي وأصوتها تكسر سماء شيكاغو :D

وفوقك مباشرة طيارة هيلوكبتر لزوم الأكشن :P

والقناصة فوق السطوح

والمدرعات في كل المخارج

ما أنت فلت من المراقبة هما كانو متتبعين الأتوبيس تطلع أنت في تاكسي ...معلم بأه B)

أبو زيد الهيلالي في شيكاغو :P

حتخرج الزاي من الورطة دي يازعيم :blink:

لازم تكون سبايدر مان

كل اللى ذكرته صحيح ...بس محبتش أحكى عشان ما تخافوش.....

بس المكالمة لم تكن من FBI[/]

[ELSHAMY]

يعلن الشامى عن فشل كل محاولات المشتركين فى معرفة المفاجأة...و بالتالى سيتم حجب الجائزة لهذه الحلقة....

انتظروا الاجابة بعد شوية فى الحلقة الجاية..

[ELSHAMY]

أخوانى....أخواتى الأحباء

السلام عليكم و رحمة الله

المفاجأة كانت أن السائق رد على التليفون باللغة العربية.....

حلو الكلام....

الشامى استنى عليه لما خلص المكالمة وقال له:

طب مش كنت تقول من الصبح......انت بقى منين ؟

السائق: أنا مصرى...

الشامى كان متأكد من لهجته أنه مش مصرى طبعا...و لا أبوه مصرى....و ماعندوش خفة الدم المصرى....حسب الأغنية ما بتقول...

الشامى: لأ طبعا أنت مش مصرى..

السائق : أنا الحقيقة أردنى....بس أجمل أصدقائى كانوا من مصر ...و قعد يقول شعر فى المصريين اللى كان عارفهم فى الأردن..

وبعدين سألنى: هو ايه حكاية الزحمة دى ؟....انتو كنتو مستنيين ايه ؟

وحكيت له القصة بسرعة....

السائق: يعنى انت المفروض كنت رايح تورونتو ؟

الشامى: أنا الحقيقة كنت رايح لندن ..... بس الظاهر ما فيش نصيب نشوف العيال النهاردة....

السائق و قد تأثر بحالة الشامى: طب ايه رأيك أوديك أنا لندن ؟

وقع اقتراح السائق على الشامى وقع الصاعقة....

كنت فاكر ان قصده انى أروح الفندق أنام و بعدين يوصلنى بكرة....فكرة ثورية بس لم يكن عندى أدنى فكرة عن أبعادها و متطلباتها و لا تكاليفها...

السائق: أصل انا نمت الضهر كويس ...و ممكن أوصلك على هناك دلوقت..

الشامى: انت بتتكلم جد...؟

السائق: طبعا...

الشامى : و دى تاخد كام ساعة ؟

السائق: حوالى 9 ساعات.....حنطلع شمالا الى مدينة ديترويت و منها الى الحدود و بعدين ساعتين و نبقى فى لندن...

مدينة لندن كانت تبعد حوالى 200 كيلومتر الى الجنوب الغربى من تورونتو.....و معنى ذلك انها أقرب الى الحدود الأمريكية....

كان لابد من اتخاذ قرار سريع و حاسم..... أبو الشام ملك المغامرات جاءته مغامرة جديدة من غير ما يعمل حسابها....

الشامى: و القصة دى تتكلف كام ؟

السائق: و الله ما أعرف..... بينى و بينك العداد....

الشامى: ماهو أنا لازم أعرف..... يمكن التكاليف لا تناسبنى

السائق: و الله يا أخى شركة الايجار بتاخد منى 60% و أنا 40% منهم تمن البنزين.... و ما تنساش انى كمان حأرجع فاضى....

الشامى عمل حسبة سريعة فى دماغه....يعنى حتتكلف كام 500 – 600...انت برضه الكسبان....تشوف العيال و كفاية اللى ضاع من الأجازة...خصوصا ان البديل كان فى علم الغيب....لسه على بال لما بكرة نصحى ...و اليطاليا تفكر فينا...و يلمونا ازاى من فنادق شيكاغو اللى اتبعترنا فيها.... و حيطلع الاوتوبيس على الساعة كام ...و لسه حياخدله 12 ساعة.... يعنى تقريبا فيها يومين كمان فى الضياع..

أفقت من الحسبة على صوت السائق بيقول لى: ايه رأيك يا أستاذ....نتوكل على الله ؟

الشامى: توكلنا على الله.....

يتبع....

سؤال الحلقة: ياترى يا هل ترى ما المشكلة الكبرى التى كان يخشى منها السائق على الحدود الأمريكية – الكندية ؟

[ELSHAMY]

سؤال الحلقة: ياترى يا هل ترى ما المشكلة الكبرى التى كان يخشى منها السائق على الحدود الأمريكية – الكندية ؟

اكيد كان لسة جديد فى امريكا وماكانش معاه الباسبور الامريكانى

برافو يا دعاء....ممتازة..

أخيرا لقيت حد له تفكير ثورى قريب من فكر الشامى.....

الاجابة خطأ...

الراجل موجود فى أمريكا من عشرين سنة..... و معاه باسيور أمريكانى....

تم تعديل 12 يناير 2009 بواسطة ELSHAMY

[ELSHAMY]

يا دى الاسئلة الصعبة يادكتر

نتغدى ونفكر لحسن النفكير على معدة خالية ممنوع بأمر الطبيب (يجيب قرحة)

بقالك عشر ساعات بتتغدى.... ؟.

[ELSHAMY]

أخوانى....أخواتى الأحباء

السلام عليكم و رحمة الله

الشامى: توكلنا على الله.....

يتبع....

سؤال الحلقة: ياترى يا هل ترى ما المشكلة الكبرى التى كان يخشى منها السائق على الحدود الأمريكية – الكندية ؟

اعتقد انه كان خايف من الزحام وال Jam علي الحدود نظرا لسوء الاحوال الجويه.

لم يكن هناك أى زحمة...

اجابتك خاطئة

[ELSHAMY]

همممممم

ممكن كان خايف لتطلع لا كندي ولا شامي! (لو تلاحظ إنك ما جبتش سيرة إنه شاف الباسبور ، ولا حتى البي آر) واللي ما يعرفك يجهلك يا عمّنا

أو إنك تكون هربان م المطار من أمن الدولة الأمريكية ؛ وعشان كده كل المدرعات والهليكوبتر كانو بيبرُموا حواليه أدّام المطار ؛ تهربوا من كل دول ، ويصطادوكو ع الحدود!

يمكن هوّه اللي كان مزوّغ في أمريكا ، أو معاهوش الباسبور الأمريكي على رأي دعاء ، وبالتالي مش من حقه يدخل كندا!

يمكن رخصته كانت مسحوبة وماشي بوصل!

وممكن كان مزوّغ م الموقف من غير ما يجيب الكارتة!

آهو أي تهييس... مش عارف السؤال ده فكرني بفوازير زمان بتاعت الفيل والنملة ، وسلسلة فوازير الصعيدي... إحم... صباح الفل د. قناوي :wub:

يا تهامى .....وصل ايه و كارتة ايه.....انت فاكره فى موقف أحمد حلمى......؟

[ELSHAMY]

سوال ولا اسهل. اية الاسئلة السهلة دي يادكتورنا.

طبعا كان خايف يتقفش على القائد الشامي متلبس في محاولة الهرب في تاكسي امريكي.

ممتاز يا سامح.....

اجابة خاطئة...

هو لسه ما كانش عارف مدى خطورة الشامى.....

[ELSHAMY]

مش جايز يا جماعة انو معندوش بنزين

اهي مشاركة وجايز تضرب معاية وافوز بالجايزة......الا هي الجايزة ايه,....

يالله مش مهم المهم اننا نقف في الطابور.....زي م الباشا قال :wub: wst:: :)

و ده برضه سبب يخليه يخاف من الحدود....؟

ذاكر شوية....يا student

بس خليك فى الطابور

[ELSHAMY]

أخوانى....أخواتى الأحباء

السلام عليكم و رحمة الله

سؤال الحلقة: ياترى يا هل ترى ما المشكلة الكبرى التى كان يخشى منها السائق على الحدود الأمريكية – الكندية ؟

بسم الله الرحمن الرحيم

الاجابة هى

تونس :lol:

قصدك فنزويلا ؟

[ELSHAMY]

أخوانى....أخواتى الأحباء

السلام عليكم و رحمة الله

سؤال الحلقة: ياترى يا هل ترى ما المشكلة الكبرى التى كان يخشى منها السائق على الحدود الأمريكية – الكندية ؟

طبعاً ما فيش غير "المفتش احمد صالح كرومبو" اللي هايحل السؤال ده زي ما حل اللي قبله و اللي قبله و اللي قبله .....

ببساطة... الحدود كانت مقفولة بالثلوج و العواصف و كل ما تمشي للشمال تسوء الاحوال الجوية اكثر خاصة ان السائق كان لابس هدوم خفيفة شوية و كمان نايم الضهر كويس و بعدين السيارة ما فيهاش fog lights زي ما هو واضح من خلال الصور اللي تم التقاطها بالقمر الصناعي

و طبعاً انا عرفت ده كله بسبب قوة ملاحظتي للدلائل و الاحداث و خبرتي كمفتش من زززززمااااان

كرومبو.....

كفاية كده....

اجتهاد مشكور...بس كله خطأ

تم تعديل 12 يناير 2009 بواسطة ELSHAMY

[ELSHAMY]

ومن يتق الله يجعل له مخرجا

أكيد دعاء الأعضاء عمل عمله ...

هو أنا عايش غير بدعواتكم.....

[ELSHAMY]

ممممممم

اكيد معاه جرين كارد او جنسية مافيش حد اهبل في الزمان دة

ممكن خايف انهم يقفلوا الطريق علشان العاصفة الثلجية ؟؟

او مايعرفش يرجع فعايز يلبسك بياته هناك ؟

برضه غلط...

[ELSHAMY]

يعلن الشامى عن فشل كل المحاولات لحل السؤال للمرة الثانية....

و سيتم حجب الجايزة.....

كده الجوايز حتتراكم و مش حأعرف أعمل فيها ايه....

[ELSHAMY]

أخوانى.....أخواتى الأحباء

السلام عليكم و رحمة الله

أعتقد دى كانت أول مرة فى التاريخ حد يوقف تاكسى فى أمريكا و يقول له : نفر كندا يا أسطى.....

ضبط السائق النافيجاتور بتاعه على عنوان الشامى فى لندن.....كان معاه جهاز صغير و محندق طبعا لا يساوى شىء جنب الوله النافيجاتور بتاع الشامى.....

وهنا سأل السائق: هو أنا محتاج فيزا لكندا و لا لأ ؟

الشامى: انت معاك باسبور ايه ؟

السائق: امريكى...

الشامى: يا عم اتوكل على الله مافيش تأشيرات للأمريكان الى كندا..

السائق كان خايف و قال لى: على العموم لو لقيتهم محتاجين فيزا حأبقى أسيبك على الحدود و انت خدلك مواصلة تانية...

الشامى فى باله: هيا ناقصاك انت كمان....أنا شبعت مغامرات يا با......هى أم الليلة دى مش حتفوت ولا أيه ؟

السائق: أنا شايف انى أحسن أجيب الباسبور معايا..

الشامى: جيبه

السائق كلم مراته فى التليفون ملقيا اليها بالمفاجأة: حضرى الباسبور...حتلاقيه فى الدولاب....أصل أنا رايح كندا...أيوه كندا عندى توصيلة....

و أنا متخيل مراته بتقول له: كندا مين يا راجل....يخيبك....بقى انت برضه رايح كندا....شوف رايح تتصرمح مع مين....قال كندا قال....انت فاكرنى هبلة.........

تهيؤات....

سارت السيارة فى شوارع مخيفة و ضلمة مليئة بالثلج..... لحد ما وصلنا بيت السائق...غاب شوية و رجع معاه الباسبور....

السائق : أكيد انت محتاج قهوة دلوقت ؟

الشامى : جدا...

السائق: أوكى حأعزمك على قهوة و بالمرة نمون بنزين و نتوكل على الله...

كانت عيناى بتقفل لوحدها من التعب...كنت بأحاول أفضل مصحصح مع الراجل الغريب ده اللى أنا ما أعرفش عنه حاجة....فى شوارع شيكاغو الموحشة....و الساعة بقت 10 مساءا...

وقف السائق عند محطة بنزين.... و بدأ يمون بنفسه...

كنت عاوز أدخل الحمام....دخلت بسرعة...و أنا فى الحمام افتكرت ان الشنط مع السواق فى العربية و ممكن ياخدهم و يخلع...مش عارف خلصت الحمام ازاى و جرى على بره....لقيت الراجل بيحضر لى القهوة بنفسه ...

كان المفترض ان القهوة تعمل شغل و تعطينى بعض الطاقة عشان بس أقدر أفتح عيونى.... التعب كان أقوى من كل شىء....

" سارت السيارة لمدة خمس دقائق ...و فجأة انحرفت فى أحد الأزقة المظلمة ... و فوجئت بحوالى خمسة أشخاص.... ألتفوا حول السيارة..... و حاولوا ينزلونى بالقوة...حاولت أقاوم...لكن الكثرة تغلب الشجاعة..... السائق كان بيتفرج دون أن يتدخل...واضح انه كان متفق معاهم..... أشهروا السكاكين فى وجهى.... أخدوا كل اللى فى جيوبى ..و الساعة و الموبيل...و لم أسلم من بعض الركلات....حاولت أكون هادى حتى لا تزيد الأذية....وجوه مجرمة....سابونى فى التلج...و ركبوا السيارة و معاهم الشنط كلها...... و انطلق بهم السائق مسرعا....."

يتبع....

سؤال الحلقة: ياترى يا هل ترى الشامى عايش دلوقت و لا مات من البرد.....؟

[ELSHAMY]

الى جميع الأخوة و الأخوات الذين و اللاتى اشتركوا معانا فى حل سؤال الحلقة الأخيرة.....

كلكم وقعتم فى الفخ اللى نصبه لكم الشامى المكار....

مافيش غير واحد بس هو اللى جاوب على السؤال و الباقى سرحوا وراء الطعم...

السؤال لم يكن معرفة اذا كان حلم أم لا...السؤال كان هل الشامى بقى على قيد الحياة أم لا....

طبعا كان واضح انه حلم....

و بهذا يكون ابننا student هو الفائز بجائزة الحلقة مع انه لسه Student و الجايزة هى عبارة عن مجموعة صور حتنزل بعد شوية....

تم تعديل 12 يناير 2009 بواسطة ELSHAMY

[ELSHAMY]

هذا هو شكل الثلج أمام البيت عند وصولى....

[ELSHAMY]

أخوانى......أخواتى الأحباء

السلا عليكم و رحمة الله...

صحيت من الكابوس المزعج ده على صوت السائق ينادى:

يا أستاذ.....يا أستاذ....حمدا لله على السلامة احنا وصلنا مدينة ديترويت...

كانت عقارب الساعة تشير الى الواحدة صباحا.....

السائق: انت باين عليك تعبان جدا....انت نمت نوم عميق و شخيرك كان ملعلع....

الشامى: أنا كمان حلمت حلم مزعج جدا..

السائق: خير اللهم اجعله خير...

الشامى مارضيش يقول للسائق على اللى العصابة اللى شافها فى الحلم....أحسن السائق يعملها بجد...

الشامى : بس أنا ما عنديش موضوع الشخير ده....يمكن من كتر التعب...

و سرحت فى الثلج اللى متكوم فى الشوارع...هو اليوم ده مش عايز يخلص ليه.....أنا فاكر انى كنت مشغول جدا يوم الخميس بطوله...و كنت معزوم على الغدا عند واحد قريبنا من علية القوم....و بعدين رجعت على البيت فى أسكندرية...أخدت الشنط....بعد 3 ساعات ونص كنت فى مطار القاهرة...انتظرت 3 ساعات...طيارة روما لمدة 4 ساعات...انتظار فى روما 4 ساعات...الطيارة الى تورونتو 12 ساعة...وصلت شيكاغو.... و كمان نضيف عليهم 8 ساعات فرق توقيت.....يعنى اليوم أصبح 32 ساعة من غير نوم.....

و مش عايز تسمع شخيرى.....كويس انك ما سمعتش حاجة تانية....

كان السكون يخيم على كل شىء....و أخذنا نتبادل الأحاديث أنا و السائق عن عمله...و أراءه فى العرب و قادتهم...و السياسة الدولية...و الأوضاع الاقتصادية....و أخرها الخراب اللى حل على الاقتصاد الأمريكى و تأثر صناعة السيارات بذلك.... و طبعا مدينة ديترويت هى أم صناعة السيارات و كان لها من الخراب أوفر نصيب.....

طبعا حديثنا كان باللغة العربية...أصل الشامى كان مش محتاج يقرأ أى كتاب عن تعليم اللغة العربية...

بمناسبة السيارات التأثير كان واضح جدا على الاسعار...مثلا السيارة الدودج جراند كارافان موديل 2009 نزل سعرها من 33 ألف دولار الى 17 ألف دولار....و على أخر الرحلة قريت بعينى فى الجرايد اعلان بيقول.....اشترى سيارة تاخد الاخرى مجانا....كأنك بتشترى طماطم و لا برتقال...

لسه ربنا حيخرب بيتهم أكتر من كده....أوعوا تتهاونوا فى استجابة ربنا لدعواتكم على الظالمين اينما كانوا....بس احنا بننسى...مش لازم تكون الاستجابة فى نزول صاعقة من السماء....لكن المصائب كتيرة...و ربنا موجود و لا يحب الظلم....

بعد ساعتين كمان كنا وصلنا نقطة الحدود الأمريكية الكندية....الجو كان بارد جدا...المنظر كان يشبه محطة تحصيل الرسوم على الطريق الصحراوى.....كان فيه ممر واحد فقط مفتوح...و الغريب ان مافيش ولا سيارة موجودة حتى انى شكيت أحسن نكون على حدود المكسيك.....

دخلنا الممر....بهدوء اتفتح الشباك...و صوت حريمى طلع من جوه بيصبح علينا....

السائق: جود مورنينج..معى أحد المسافرين الى مدينة لندن...

الضابطة: أوراقك...

سلمها السائق جواز سفرى و معاه ال PR Card ..

رجعتهم لنا بعد نص دقيقة....و قالت للسواق: ورقك...

السائق: الباسبور ؟

الضابطة: يكفينى رخصة القيادة....

شافتها و أعطتها له بعد نص دقيقة أخرى..و قالت له: كم راكب معك...

السائق: واحد فقط...

الهانم ما كلفتش خاطرها حتى تبص فى العربية....و لا تشوف الشنط...و لا تتحرك من مكانها الدافىء....و لا تعمل أى حاجة....

فقط قالت : welcome

تحرك السائق بالسيارة قائلا: مرحبا أنت فى كندا...

أنا كنت مذهول من سلاسة الاجراءات... و فى نفس الوقت فرحان ان الشنط لم تمس....و ماحدش شاف الجبنة الرومى اللى كنت دافسها وسط الهدوم.....

يعنى لو كنت جبت معايا عشرة من حبايبى فى المنتدى من الصيادلة اللى وظيفتهم مش فى اللستة و خبيتهم فى العربية و أخدت من كل واحد ألف دولار بس مش كانوا عدوا و لا اجراءات هجرة و لا وجع قلب....

حمدت الله كثيرا...ان بعد العسر يسرا.... ساعتين و نكون فى البيت ان شاء الله.....

انجعصت فى الكرسى بعد ما خف التوتر الى حد كبير.....و أخذ السائق طريقه الى مدينة لندن.....

سؤال الحلقة: يا هل حنوصل بسلام ؟....أم هناك مفاجأت أخرى فى الطريق... ؟

يتبع....

[ELSHAMY]

و صورتين كمان عشان بقية الحبايب....