الشامى رجع من كندا يا رجالة

[ELSHAMY]

ربنا يكرمك يا دكتور دنيا و آخرة ، و يوفقك لما تحبه و ترضاه ، ممكن أسجل إنتساب بدل طالبة منتظمة ؟؟؟

تسجيل متابعة يا دكتور .

معذرة يا دكتور الشامى نفسى أرد بدالك اليوم على الدعوات الجميلة دى

يا أم بلال دة انتى منورة المنتدى

والله انا بستنى علشان أقرأ دعواتك الى تفرح دى

ايوة كدة شجعى لنا الدكتور كمان وكمان وخلية يسخن علشان يكبر الحدوتة شوية ويبطل يضحك علينة ويكبر الخط والقية كاتب شكرا كدة

بيضحك علية :sad: :ninja:

جزاك الله كل خير يا أستاذ حازم ربنا ينير بصيرتك بالحق ، و عقلك بالعلم النافع ، و قلبك بالإيمان ، و ينير حياتك برضا الرحمن ، و قبرك بنور العمل الصالح ، لك و لدكتور شامي صاحب الموضوع ( معلش أصل أنا ما بقعدش على قهاوي ) و لكل من في المنتدى اللهم آمييييين ،

ركزوا في الدعاء أن يسخر للدكتور الشامي الظروف و يطوعها حتى يتلم شمله بعائلته على طول يارب يارب

اللهم آمييين

أم بلال...

و الله لا تطاوعنى الكلمات على وصف تقديرى لك و فخرى بأنك من متابعى هذا الموضوع....

أصبت كبد الحقيقة ...و أدعو الجميع بالدعاء لى أن ييسر الله لى الأمر....أخوكم مقبل على مرحلة مصيرية و يحتاج لدعائكم

تم تعديل 14 يناير 2009 بواسطة ELSHAMY

[ELSHAMY]

لا تخافى على الاطلاق يا أم بلال...

هناك فرق بين أطفال نشأوا فى بيئة تتكلم اللغة العربية ثم ذهبوا هناك.....وأخرين نشأوا فى مجتمع لغته فى المدرسة و الشارع غير عربية...

أولادى و أولادك من النوع الأول....

أولادى لم ينسوا اللغة....يمكن تجربتنا مازالت حديثة....لكن طبعا لاحظت تطور كبير فى نطق اللغة الانجليزية....الحل فى المداومة على التحدث بالعربية فى البيت...قنوات تليفزيونية مثل الجزيرة و أقرأ تكون موجودة....مدارس اسلامية بها فصول لغة عربية بدون تهاون....

و الله خير حافظا و هو أرحم الراحمين

تم تعديل 14 يناير 2009 بواسطة ELSHAMY

[ELSHAMY]

أليكس كارتر...شاب كندى يشهر اسلامه

عمرو خالد

[ام بلال]

أسأل الله العظيم رب العرش العظيم بحوله و قوته و جبروته و قدرته الذي لا يعجزه شيء في الأرض و لا في السماء ، أن ييسر لك أمر لم الشمل و يذلل لك كل العقبات في سبيل ذلك ، اللهم لا سهلا إلا ما جعلته سهلا و أنت تجعل الحزن إذا شئت سهلا اللهم يسر لنا و لدكتور شامي و لكل من في المنتدى و لدكتور هشام ، و أستاذ إيهاب ،كل عسير اللهم إرضى عنا بحولك و قوتك يارب العالمين اللهم آمييييين

يا أعضاء المنتدى الكرام قولوا بكل قوة آميييييين

[ELSHAMY]

أخوانى....أخواتى الأحباء

السلام عليكم و رحمة الله

كان الشامى مأنتخ فى الفندق صباح اليوم الثالث و الأخير من أيام المؤتمر ...كنت عمال ألفلف فى محطات التليفزيون بأدور على أى خبر يخص ما يقوم به أولاد القردة و الخنازير فى شعب غزة....

الواحد قد ايه كان و مازال قلبه محروق...و عنده شعور بالكبت الشديد.... و طبعا هذا الشعور بيزيد أكتر لما كمان تكون بعيد عن مسرح الأحداث...بجسمك مش بقلبك و لا تفكيرك.... كان عندى شعور مفاده "هى موتة و لا أكتر"...نفسى أكون هناك ... أعمل أى حاجة....يارب تخصصى الطبى يفيدهم فى أى شىء....و يا حبذا لو الواحد ربنا من عليه كمان بالشهادة من طلقة تايهة.... أصل لما تكون فى وسط الأحداث فرصتك فى الشهادة بتكون أكتر....بينى و بينكم دخول الجنة ما بقاش بالساهل ... هى مالهاش حل مضمون الا الشهادة..... لكن هذا يا صاحبى لا يمنعنا من التعبير بكل ما تستطيعه امكانياتنا عن غضبنا....يا أمة العرب شىء من الغضب..... و من سأل الله الشهادة بصدق أعطاه الله منزلة الشهداء و لو مات على فراشه...

المهم يمكن من صدق نية الشامى ربنا و قعنى فى قناة الأخبار الكندية المحلية الخاصة بتورونتو....لقيت المذيعة بتقول أن الجالية المسلمة أخذت موافقة لعمل مظاهرة أمام قنصلية أولاد القردة و الخنازير فى تورونتو.... قلت حلو....فرصتك و جاتلك يا أبو الشام انت و الجيش بتاعك للتعبير عما يجيش فى الصدور..... أخدت رأى الفيلدمارشال أم على.... و فرحت جدا لما رأيت من حماستها ...كان رأيها ان ده حدث مش حيحصل كتير...فرصة عملية عظيمة للأولاد قبل ما تكون لنا.... اجابة شافية عما يدور بأدمغتهم الصغيرة عن الدور الذى يمكن أن نقوم به فى ظروفنا الحالية....أصل ساعات الواحد بيشعر ان اجاباته غير منطقية خصوصا لما يتعلق الأمر بأن تشرح لأولادك أسباب الخنوع و الانبطاح و العمالة و التسليم الموجود فى أمة المفترض أنها صاحبة التاريخ و العزة و الكرامة كما رأوا فى المؤتمر....و كما كنا نحاول دائما أن نجعلهم يشعرون بانتمائهم لها........لعن الله السياسة التى تقف حائلا حتى بينك و بين حريتك فى تربية أولادك...و تجعلك تحتار فى تفسير مدلولاتها و أفعالها السودة .

....اصل الموضوع أحيانا ملهوش تفسير عند الأولاد وسط ما تحاول زرعه فى نفوسهم من صفات الشهامة و الاقدام و مساعدة الغير....خصوصا اذا كان السؤال منهم : مش دول برضه مسلمين ؟...صح ....و قادة شعوبنا مسلمين ؟ مضبوط....طب ايه تفسير اللى بيحصل....جاوب بقى يا حلو....

ما فيش اجابة فى هذا الوقت كانت أوقع من حضور المظاهرة...كلمت صديقى فى التليفون...ها ايه رأيك....الاجابة كانت :معاك يا أبو الشام مانقدرش نتأخر ...خلى العيال عضمهم ينشف شوية...و ينفثوا عن غضبهم....احنا اخترناك و حنمشى وراك....

بس الهبابة القنصلية دى فى انهى داهية...هكذا سألنى صديقى...

الشامى: لا تقلق...الشامى حيتصرف بس انتو استعدوا... الساعة كانت حوالى 10 صباحا و المظاهرة كانت الساعة اتنين....صحيت كل الميليشيات من النوم.....استعدوا....عندنا مظاهرة....

اتحطيت فى حيص بيص لما ندى الصغيرة سألتنى: يعنى ايه مظاهرة ؟

حاولت أشرح....تقريبا فشلت.....المهم يا ندى دلوقت تشوفى....

على النت عرفت مكان الهبابة فين....كانت بعد الفندق بشارعين...عشر دقايق بالسيارة....

على فكرة هذه المظاهرة غير التى تفضل المهندس أيهاب بتنزيل صورها يوم 3 يناير....مظاهرتنا كانت يوم 28 ديسمبر ثالث أيام العدوان...

كنت مشفق جدا على الأولاد من برودة الجو.....كانت الحرارة تقريبا 5 تحت الصفر....مش مهم.....فيه ناس تانية متبهدلين تحت القصف المتواصل و احنا حنشتكى من شوية سقعة....

توكلنا على الله....وصلنا المكان....ولاد القردة و الخنازير عاملين المبنى تحفة معمارية زى ما حتشوفوا فى الصور....كان هناك حوالى 15 قرد بيتنططوا على الرصيف أمام الهبابة....رافعين أعلام الصهاينة...و لافتات مثل:

STOP ISLAMIC RACISM

STOP JIHAD

HAMAS + HIZBULLAH = SHAYTAN

مش ده المهم...الأهم كان حركاتهم المستفزة و سخريتهم و الضحكات العالية التى كانوا يواجهون بها المئات من العرب و الكنديين و كل الجنسيات على الرصيف المقابل للسفارة ملوحين بأعلام فلسطين و الدول الاسلامية و لوحات مثل:

FREE FREE PALASTIN

OCCUPATION IS A CRIME

انضمت الجيوش الشامية الى جموع المتظاهرين.... و انتقل الشامى الى رصيف القرود لأخذ بعض الصور....كانت أول مرة أكون بهذا القرب من قادة العدو...كنت بأغلى...و عايز أطيح فى أبوهم و اللى يحصل يحصل...خصوصا مع بجاحتهم و استفزازهم المستمر....

كان هناك أعداد رمزية من رجال البوليس...يتعاملون مع الجميع بمنتهى الاحترام...مافيش ضرب ولا عصيان و لا قنابل مسيلة للدموع و لا اعتقالات....ناس عجيبة ...الظاهر عايزين شوية دروس من عندنا...

كانت وكالات الأنباء و محطات التليفزيون تقوم بتغطية الحدث و اجراء لقاءات....

التهبت المشاعر و علت الحناجر بالتكبير و الهتافات و زادت سخونة الأحداث الى أن عبر المتظاهرين الشارع الى ناحية القنصلية مهللين مكبرين...وعلت الهتافات من البنات و السيدات و الشباب:

خيبر خيبر يا يهود....جيش محمد سوف يعود...

كان الجندى على الصغير محمولا على كتفى القائد الشامى محاولا التقاط كلمات الهتافات و مرددا حسب ما سمع:

هيبر هيبر يا عجوز....

....و كان لازم أجاريه عشان القافية فقلت مرددا وراءه:

جيش محمد سوف يفوز...

و فشلت محاولات البوليس فى منع العبور....ثم حدث الالتحام....

أترككم مع الصور...

[ELSHAMY]

[ELSHAMY]

[ELSHAMY]

صور اكثر من رائعة يا دكتور ... الله يبارك فيك

بس انا لاحظت في علم من الاعلام المرفوعة باللون الاحمر مرسوم عليها وجه رجل باللون الاسود ... مش عارف ده مين و لا يرمز لايه بالضبط ؟؟؟؟

عزيزى كرومبو

الراجل ده هو جيفارا....ثائر كوبى...كان زميل كاسترو...و يعد عالميا من رموز التحرر و الثورة....

تحياتى

[ELSHAMY]

بجد الحاجة الوحيدة اللي بتحصل في اليوم اللي بتفرح القلب هو الدخول لتوبيك الدكتور الشامي

ومن باب ولا تنسوا الفضل بينكم

عاوز الف حضرات الخوة والاخوات هنا للحاجة اللي لفتت انتباهي جدا

الدكتور الشامي

متزوج وعنده اربع اطفال ما شاء الله

وهو في بلد وهما في بلد لازم يكلمهم ويشوف مشاكلهم على الاقل 3 ساعات يوميا

وشغال طبيب في السعودية يعني من 8 الى 10 ساعات شغل يوميا غير حالات الطوارئ والاستدعاء العاجل

واكيد عنده اهل في مصر عاوز يسال عليهم

واصحاب طفولة وزملاء عمل دة غير احتياجاته الشخصية وعلاقاته العامة

يعني عاوز 48 ساعة في اليوم علشان يخلص اللي وراه

ورغم كدة مهتم جدا بالناس وباصحابة هنا في المنتدي واسئلتهم بردة وماهوش مستفبد غير دعاهم وكفي به فايدة

عاوز اعرف

تجيييييييييييييب وقت منيييييييييييييييييييييييييييييييييييين ؟؟؟؟؟؟؟

انا متجوز ولسة مافيش اطفال وعندي قطة شيرازي يتيمة وشغال براحتي يعني 6 والا 8 ساعات والا مافيش خالص ماحدش له عندي حاجة وموش فاضي اهرشششششش ؟؟؟؟

دي محتاجة متطلبات شخصية اجتماعية وحب للناس غير عادي

الدنيا لسة بخير يا تورنتوزززز :)

ربنا يكرمك أخى زناتى....فرحت جدا لما سمعت صوتك....

لا تنسى البركة فى الرزق و الوقت و كلها من الله....و ببركة دعوات أخوانى و أخواتى .....

ربنا يبارك لك فى زوجتك...و عملك....و قطتك الشيرازى....

[ELSHAMY]

اخوانى.....اخواتى

عذرا للتأخير فى المشاركة كنت فى رحلة الى المدينة المنورة....

مغامرة صغيرة على الماشى...!!

تحياتى للجميع

تم تعديل 17 يناير 2009 بواسطة ELSHAMY

[ELSHAMY]

تقبل الله طاعتك وزيارتك يا دكتور

وقت مناسب جدا الوقت هيا فاضية

يعني ممكن تعسكر في الروضة الشريفة زي مانت عاوز

جزاك الله خيرا يا زناتى...

بالفعل كانت زيارة جميلة و المدينة بتكون فاضية الى حد كبير فى هذه الأيام من كل عام....

المهم الراحة النفسية العجيبة اللى بتحصل ... ربنا يتقبل...

اللهم صلى عى محمد النبى و أزواجه أمهات المؤمنين و ذريته وآل بيته كما صليت على إبراهيم إنك حميد مجيد

[ELSHAMY]

اخوانى.....اخواتى

عذرا للتأخير فى المشاركة كنت فى رحلة الى المدينة المنورة....

مغامرة صغيرة على الماشى...!!

تحياتى للجميع

تقبل اللة منك يادكتور واللة انا مشتاقة جدا للمدينة بس منتظرين اجازة نصف السنة ان شاء اللة

متابعين يادكتور ومنتظرينك

هى الاسئلة خلصت ولا اية انا عايزة اخذ كمان جايزة

حقيقى المؤتمر الاسلامى حاجة تفرح كان نفسى اكون معاكم واللة

سلامى للاخت ام على والاولاد وربنا يلم شملكم على خير ان شاء اللة

الفاضلة إيناس

شكرا لك....جايزتك محفوظة من غير أسئلة....

[ELSHAMY]

أعزائى :

عندى سؤال عندى واحد صاحبى دخل الإنترفيو ونجح وأخذ CSQ وبعدها فكر انه عايز يتجوز فهو أعزب الى الآن فإذا تزوج الآن هل يعيد كل شيئ من الأول يعنى تقديم الورق لكيبك تانى وإعادة الانترفيو لأن التقييم إختلف أو يستطيع الإستكمال ومن أين يحصل على CSQ للزوجة بقى ؟

طيب لو هيعيد الاجراءات من الأول ممكن يأجل موضوع الزواج الى بعد دخوله كندا بستة أشهر مثلا ثم يعود لمصر للزواج ويأخذها ويسافر هناك فهل يقدم الطلب مرة أخرى لها ولا إيه ؟

ما هى أفضل الحلول فى رأيكم يا رواد هذا المنتدى الرائع ؟

فى انتظار ردكم ،،،

أخى الفاضل

أحيل سؤالك الى باب أخونا قناوى...

تحياتى

[ELSHAMY]

أعزائى :

عندى سؤال عندى واحد صاحبى دخل الإنترفيو ونجح وأخذ CSQ وبعدها فكر انه عايز يتجوز فهو أعزب الى الآن فإذا تزوج الآن هل يعيد كل شيئ من الأول يعنى تقديم الورق لكيبك تانى وإعادة الانترفيو لأن التقييم إختلف أو يستطيع الإستكمال ومن أين يحصل على CSQ للزوجة بقى ؟

طيب لو هيعيد الاجراءات من الأول ممكن يأجل موضوع الزواج الى بعد دخوله كندا بستة أشهر مثلا ثم يعود لمصر للزواج ويأخذها ويسافر هناك فهل يقدم الطلب مرة أخرى لها ولا إيه ؟

ما هى أفضل الحلول فى رأيكم يا رواد هذا المنتدى الرائع ؟

فى انتظار ردكم ،،،

أخى الفاضل

أحيل سؤالك الى مفتى المنتدى قناوى..

[ELSHAMY]

الف حمد لله على سلامتك يا دكتور ياريت تكون

دعتلينا معاك في الروضه الشريفه

على فكره أنا لسه عاوزه الجوايز بتاعتي أنا سبق

وقلتلك اني لما قرأت الاسئله جاوبتها كلها صح

الله يسلمك يا دكتورة

لازم تعرفى ان دعواتى لكم مستمرة

ربنا يعمل لكم الخير...و نراكم هناك عن قريب....احنا فى حاجة لكل الحبايب لقيام مجتمع صالح يشد أزر بعضه البعض...

[ELSHAMY]

كان يوم الجمعة 26 ديسمبر هو موعد ال Boxing Day و هو يوم بداية الاوكازيونات و التخفيضات الموسمية السنوية فى عموم كندا و أمريكا....تخفيضات جبارة...تحتاج منك دراسة متأنية بحيث تنشن على سلعة معينة أو مجموعة سلع نفسك فيها...و تصحى الفجر و تروح ترابط أمام المحل المنشود ...و أول ما يفتح تجرى على المكان اللى انت عاوزه...و قد يكون نصيبك كام بوكس فى وشك من الزباين التانيين.....عشان كده سموه ال Boxing day

يتبع

حمد لله على السلامه يا دكتورنا من المدينه و تقبل الله طاعتكم

و شكرا على الصور الجميله

طبعا إنت كنت بتهزر في الفقره السابقه

مش ده سبب تسميته بال boxing day طبعا

طبعا يا بوب....Boxing جاية من ال Boxes يعنى صناديق البضاعة....

بس برضه ما يخلاش الأمر من بعض اللكمات...

تحياتى للبوب الكبير

تم تعديل 18 يناير 2009 بواسطة ELSHAMY

[ELSHAMY]

د. الشامى

ربنا يباركلك بجد ....على قد الضحك اللى ضحكته

انا قريت حوالى 20 صفحة مرة واحدة ....لانى كنت غايبه

باعتذر عن الغياب....ياريت ميأثرش فى درجاتى

و كفاية ....الجوايز اللى راحت عليه!!!

حاجة كمان....مش عارفة اقولها و لا لأ

انا حسيت بغيرة( بس مش شريرة و الله)

لما حضرتك ...قلت عن زيارتك للمسجد النبوى

ربنا يتقبل من حضرتك و يكتب لنا الزيارة .....جميعا قريبا ...يارب

للاسف التأشيرات للعمرة ....لسه مقفولة....

متابعيييييييييين يا دكتور

و الله يا قمرنا الجديد...

أنا صحيح كنت باكتب الحلقات و فى القلب غصة و حزن شديد عل أحداث غزة....

و بالعكس كنت زعلان من نفسى إنى بأكتب كلام ينتزع الابتسامات و أهلنا فى غزة فى معاناة شديدة....

بس يمكن دى الحاجة الوحيدة اللى كانت بتخلى الواحد ينسى شوية....

المهم ربنا يكتب لك زيارة المدينة و عمل العمرة...و نسعد بتقديم أى خدمة من أول المطار لحد الحرم...

تحياتى..

[ELSHAMY]

أخوانى أخواتى

السلام عليكم و رحمة الله و بركاته

حبيت تشاركونى بعض الأحداث الجارية حاليا عشان تعرفوا معلومات عن المجتمع الكندى...

لما كنت هناك تم توزيع أوراق فى صلاة الجمعة عن وجوب الاتصال بنواب و ممثلى مدينة لندن فى البرلمان الكندى لتعريفهم بحجم المعاناة فى غزة و وجوب أن تتخذ الحكومة الكندية اجراءات للحد من ذلك.......و نوه خطيب الجمعة الى أن اليهود الموجودين فى لندن على قلتهم عاملين شغل جامد....

المهم قام الأولاد بارسال ايميل لواحد من نواب البرلمان عن المدينة......

و بالفعل قام الرجل بالرد و كان فى رده عدة مفاجآت:

أولا: إنه رد أصلا...... و دى ثقافة شبه منعدمة فى مجتمعاتنا...

ثانيا: الرجل كان منطقى جدا فى رده و هو أنه يتلقى رسائل أخرى من الجانب الأخر و يتعامل معها بنفس الحيادية

ثالثا: يستغرب الرجل موقف المسلمين القوى وردة فعلهم الشديدة فقط على ما يحدث فى غزة...و أين هم مما يحدث فى أماكن أخرى من العالم للألاف من المعذبين فى بورما و التبت و غيرها....

رابعا: أنه متأثر جدا لما يسمعه من أرقام الضحايا و المصابين....على الجانبين...

خامسا: الفكرة الموجودة عنده.....و عند غيره من النواب.....أنها حرب متكافئة.....قصف هنا و قصف هناك....اصابات و أموات هنا ...و كذلك هناك.....و من حق كل جانب أن يدافع عن نفسه....

حأحاول للأمانة أن أرفق رد الرجل بالكامل....

المهم أن هذا الأمر أثار فى ذهنى تساؤلات كثيرة عما نستطيع نحن القيام به من أجل تغيير الصورة فى أدمغة هؤلاء.....هذا الرجل ممثل المدينة فى البرلمان و هذه أفكاره....فما بالكم برجل الشارع العادى فى كندا و أمريكا و أوروبا....

الحقيقة أن تفاعلنا و دورنا يجب أن يتحلى بكل الوسائل المبتكرة لتوصيل و تصحيح الفكرة و كسب الرأى العام كما يفعل اليهود و يتحمسون لباطلهم...أفلا نتحمس نحن لحقنا نصرة لديننا و إعذارا لأنفسنا أمام الله إذا ما سألنا عما فعلنا....

إن الموضوع لا يجب أن يختزل فى مظاهرة هنا أو مقاطعة هناك و السلام.....الأمر أعظم من ذلك مع اعترافى بأهمية الأمرين و تقديرى التام كل من يشارك فى مظاهرة أو يلتزم بمقاطعة و أنا أولهم.....

أنا الحقيقة أدعو كل واحد و واحدة من أحباء هذا الموضوع و ممن تربطنى بهم علاقة وجدانية خفية من التقدير و الأحترام وان كنا لم يرى بعضنا البعض أن يشارك برأى أو فكرة ايجابية فى هذا الصدد و يقترح علينا ما نستطيع فعله فى هذا الإطار...

و لنعلم أن كل من يشارك بفكرة أو أقتراح أنى أرجو الله أن يجعلها فى ميزان حسناته بقدر من سيلتزم بها و يعمل لتفعيلها....

و كما قال الرسول صلى الله عليه و سلم: من سن سنة حسنة فله أجرها و أجر من عمل بها الى يوم القيامة...." الى أخر الحديث.....و ما أحوجنا الى الحسنات...

أنا شخصيا عندى بعض الأقتراحات و الأفكار.....

أنا فى انتظار أفكاركم و اقتراحتكم....

على فكرة هذا الأمر لن يقتصر على تغيير الفكرة عند ممثلى النواب فى كندا....فلنجعلها بصورة أشمل و نبدأ فى تغيير الأفكار التى تطرح فى البرامج الحوارية ذات نسبة المشاهدة العالية فى بلادنا و التى تبث السم فى العسل.... نراها و نعلم تماما أن ما يدور فيها من أفكار تخاطب المواطن العادى لتخديره أو تغيير أفكاره و لا نملك الا مصمصة الشفاه غيظا من هؤلاء الذين لا يحترمون عقولنا....

من سمح لهؤلاء أن يستغفلونا....ألسنا نشارك فى تلك المصيبة بصمتنا الرهيب..؟

حان وقت ان نكون أناسا عمليين...

و الله من وراء القصد و هو يهدى السبيل....

[ELSHAMY]

السلام عليكم ورحمة الله وبركاته

احب في البداية اشكر كل من كتب حرفا في هذا المنتدي الرائع واخص بالشكر د/ شامي صاحب هذا الموضوع االمفيد جدا واكيد د/تهامي ود / قناوي يا جماعة انتوا مش متخيلين كمية الأفادة لينا اد اية انا بقالي حوالي اربع سنين بتصفح المنتدي دة ولم اتشجع اني اسجل فية لأني بصراحة معنديش اضافة بس حسيت اني لازم اشكر الناس دى من اعماق قلبي خاصة د/ شامي.

انا حاليا في مرحلة اتخاذ القرار النهائي للهجرة و تعبئة الفورم خاصة ان احنا مشمولين في الليست الجديدة ادعولي ربنا يسهلي الحال.

اسفة على الأطالة واحب تقبلوني في هذا المنتدي الرائع.

الأخت مروة الشامى

أهلا بك وسط أخوانك و أخواتك....

الشرف لى أن تكون أول مداخلاتك فى هذا الموضوع....

طبعا فى انتظار مشاركاتك القيمة....ربنا ييسر لك الأمور.....

و تحت أمرك فى أى استفسار مع خصم 50% عشان بتنتمى للقبيلة الشامية

تحياتى

[ELSHAMY]

"]الحمد لله باركولي يا جماعة اليوم اتصلت السفارة والجوازات في الطريق عقبال الجميع. وأشكر الدكتور الكبير الشامي والأخت سمية بارك الله فيها لانها أول من بشرنا

الله يوفقنا جميعا

ألف مبروك أخى طارق

اللهم اجعلها فاتحة خير و بركة...