الشامى رجع من كندا يا رجالة

[ELSHAMY]

د/ الشامى

انا آسفة ان كنت تدخلت فى أمورك الشخصية . لكن كل ما طلبته هو النصيحة.

اختم بهذا الحديث الشريف ( الدين النصيحة )

بالتوفيق انشاء الله

أختى ألمر ...انا اللى أسف....انا حسيت ان ردى سخيف شوية...أعذرينى انا لسه و الله ما أخذت قرار فى الموضوع ...ولسه كل الخيارات متاحة...و دماغى ملخبطة...وانتى جيتى على الجرح ...وانا عارف انك من ملائكة الرحمة :happy: ...أوعى تزعلى

وأذكرك بالأية (فمن عفا و أصلح فأجره على الله)..صدق الله العظيم

صافى يا لبن ؟ md2:

[ELSHAMY]

معقولة الشرف ده...سى السيد بنفسه ظهر اسمه عندى...و كمان معجب بالسرد التاريخى للرحلة اللاندينج....لأ...ده كتير قوى...شكرا لك ياسيدى الفاضل.

الأخوة و الأخوات...Madzoro, Einstien, Somayasaleh و بنت مصر لكم جزيل الشكر و التقدير و بالنسبة لملاحظاتكم و اسئلتكم سيتم الاجابة عليها توتالة...بالنسبة للرخصة اللى كنت باسوق بيها - زى ما تفضل أخى تورونتو - كانت الرخصة الدولية و هى صالحة لمدة ستين يوم فقط...لكن امتحان ال G1 مافيهوش امتحان سواقة.

بالنسبة لأخى تورونتو ...مش عارف ليه هو بيهنىء الحكومة السعودية على نجاح (ابنهم) البار ... :rolleyes: انا اولا ابن مصر مش ابن السعودية وان كنت لا انكر فضلها على....انا مصرى ..وابويا مصرى...وبخفة دمى مصرى...وكل مصرى الله عليه...وكل مصرى الله علييييييه..... معلش سرحت و اخدتنى الوطنية

أختى بنت مصر...موضوع اقامة الزوجة لوحدها بيعتمد أولا و أخيرا على جدعنة الزوجة و قدرتها على الاحتمال و التصرف ...وده للأسف مش موجود كتير wst:: ...لكنه موجود ...و انا شفت بعينى أمثلة ناجحة فى ذلك...صحيح مفتقدين بعض ...لكن الزوج كمان لازم ينظم وقته فى زيارات متقاربة لتفقد الوضع... وجود الانترنت بيخلى الزوج يكون على اتصال 24 ساعة بأسرته lmo: ...أعرف واحد صاحبى مشغل النت طول النهار ...وساعات بيصحى العيال من النوم عشان يروحوا المدرسة لما زوجته تروح عليها نومه....يعنى كمان قارفينه فى عيشته و هو بعيد...بعد ما ظن انه ارتاح منهم... :lol: .... و طبعا هذا الأمر محتاج تفاهم كبير... و عيال عندها شىء من الالتزام و التوعية بالحياة الجديدة...و ان المجتمع اللى حولهم مش زيهم وان هناك فرق بين تقاليدنا و عاداتنا و ما نراه... وهنا يأتى دور الرقابة المستمرة تخوفا من الانصهار فى الجديد و الانسلاخ من القديم...(حلوة انصهار و انسلاخ دى) wst::

ربنا الحامى فى الأول و الأخر....انتى دوستى على واحد من الجروح...

انتظروا حلقة جديدة...مثيرة...مليئة بكل ما هو جديد مع مسلسل (الشامى رجع من كندا يا رجالة ...بالانجليزى)

تحياتى

[ELSHAMY]

أخوانى ...أخواتى الأعزاء

أعتقد بعد مداخلة أخويا و حبيبى سى السيد الأخيرة....الموضوع بقى محتاج وقفة مع النفس..... ولذلك بأعتذر مؤقتا عن استكمال الحلقات لمدة ساعات قلبلة لحد ما أقعد معاه و نحسب الحسبة و أرجع لكم....

ملحوظة: أى استفسار بعد كده حيكون مبدئيا بخمسة دولار (يعنى نص امتحان اعادة G1) أو ثمن شندوشت شاورمة فى أوتاوا...و أرجو أخد موعد من أخويا سى السيد... مدير أعمالى...وتاج راسى...وسلم لى على اللاندينج.

أخوكم الشامى

[ELSHAMY]

أخوانى ...أخواتى الأعزاء

بما انى لسه ما قعدتش مع أخويا سى السيد حأعمل حلقة مجانية (غير مشفرة) من أبو بلاش عشان الحبايب:

حأعمل دلوقت فلاش باك و أرجع تانى لرابع يوم لنا فى أوتاوا..

نظرا لأنى كنت ناوى أقعد فى أوتاوا خمسة أيام فقط و بعد ذلك كنت ناوى أروح مدينة كينجستون فى طريقى الى تورونتو.....(مدينة تورونتو...مش أخونا تورونتو)...فكان لابد ان أبحث عن سيارة فان أو مينى فان عشان تكفى القبيلة كلها (قولوا ما شاء الله - على رأى زوجتى).... طبعا بهدلة الانتقالات بالمواصلات و أربع عيال و أمهم و 8 شنط بيتبقى مش لطيفة.... وقعدت على النت 4 أيام مش لاقى ولا عربية فى ولا شركة ...أتارى كان فيه عيد Easter و اخوانا الايرلنديين كمان كان عندهم عيد القديس باتريك...وده عيد بيخليهم يلبسوا أخضر فى أخضر...وخلوا أوتاوا خضرة...وخلوا موقفنا رمادى ...و أخدوا كل السيارات المتاحة....

وهنا اتصلت بالمحامى اللى بدوره حاول باتصالاته لكن بلا جدوى..... وكان الحل الوحيد فى رأيه اننا نروح المطار حيث كل مكاتب الايجار موجودة جنب بعض و بكده بتكون الفرصة أكبر.....وفى الطريق لقيت مكتب ايجار سيارات وقلت له استنى يمكن يكون عندهم...وكان لسه التلج فى الشوارع للركب...و دخلت المحل وهنا يظهر أهمية دعاء الوالدين...لقيت شاب يبدو لى ان أصوله باكستانية...

أنا: من فضلك بابحث عى سيارة فان للايجار

هو: للأسف كلهم اتأجروا

أنا: (بشىء من المسكنة) يعنى ولا حتى مينى فان....

هو: (وقد بدأت أصعب عليه)...الحقيقة عندى واحدة لكن مش بأجرها لوجود عيب فيها.

أنا: عيب ايه يعنى ؟

هو: فيه رسالة بتظهر لك فى التابلوه ان الباب الخلفى مفتوح مع انه بيكون مقفول

أنا: (وقد تهللت أساريرى)....يا راااااااجل...صلى على رسول الله...وده عيب برضه ...(تعال شوف العيوب اللى عندنا)...حأخدها ولا يهمك.

وبعدين الفهلوة المصرية اشتغلت...ورحت مكشر وشى و قايل له: بس طبعا العيب الخطير ده حيستلزم انك تعمل لى تخفيض كبير

هو: Of Course Sir .... فين الرخصة ؟

و أعطيته الرخصة الدولية...ولما شاف انها من جدة - السعودية...ابتسم ..وقال لى انت سعودى ؟....قلت له لأ انا مصرى...وابويا مصرى...وبخفة دمى مصرى ....(الى أخر الأغنية)....أوعوا تصدقوا....قلت له : انا مصرى بس مقيم فى السعودية

و عرفت منه انه كان بيحج السنة الماضية...وزار جدة...واسمه نديم...وبقينا أصحاب.

وغاب شوية وجاب السيارة...بونتياك موديل 2007...زى الفل...طبعا أعطانى بعض العدة لأزالة التلج اذا تراكم ...ولقيت نفسى فى حيص بيص أمام العربية....سوق بقى يا فالح ...مش كنت حتعيط على عربية.

نكمل الحلقة الجاية

[ELSHAMY]

اخوانى molto و اليمانى و أختى بنت مصر...كل اخوانى الأحباء...باحبكم كلكم و الله

مش عارف أقول ايه...لكن ده من فضل الله...واتمنى من الله ان يجعل ذلك فى ميزان حسناتى...ولى طلب من كل من قرأ هذه الحلقات أو استفاد منها أى استفادة انه يخصنى و اسرتى بدعوة خالصة لوجه الله بظاهر الغيب وبكده أكون انا كمان مبسوط...الفلوش مش كل حاجة يا أخويا سى السيد...(برضه مافيش مانع نقعد و نحسبها)... :partytime:

أنا مستنى 3560 دعوة بعدد المداخلات اللى حصلت لحد دلوقت...ما فيش حاجة ببلاش.... اللى مش حيدعى ربنا شايفه.

تستاهلو منى حلقة جديدة

تحياتى

[ELSHAMY]

أختى مصرية و مغتربة

بما انكم فى دبى...السؤال حيبقى ب 100 درهم

ثانيا...أعتقد أحسن تحجزوا لكم شقة مفروشة..حتكون أرخص

وربنا معاكم...ونفرح بأول طفل فى تورونتو :baby: ...ويكون بكده كندى رسمى.... ومش حيحتاج يقدم على الهجرة

قلبى معاكم و طمنينى عنكم دايما

[ELSHAMY]

الاخ العزيز د. الشامي

لا استطيع ان اوصف لك مدى الاستمتاع بقراءه يومياتك بكندا ومدى الاستفاده من الخبره التي تقدمها لنا بعد قراءه المعلومات التي فيها .

سؤال فني : انا قدمت بدون محامي ومعنديش عنوان في كندا ايه الحل ؟ سمعت انهم بعطوك رقم تلفون تعطيهم العنوان ومهله 180 يوم ؟ ايه معلوماتك او اي شخص عنده معلومات ؟ (( جزاك الله عنا كل خير :baby: ))

هذه معلومة صحيحة...وحتجد معلومات أخرى فى مداخلات الأخوة السابقة....بس انت راجع الحلقات و ركز معانا شوية... مساء الفل

[ELSHAMY]

اخوانى ...اخواتى....السلام عليكم و رحمة الله

أختى Somayasaleh جزاكى الله خير

أخى meeeedooo مش حانساك يا باشا....بس أنصحك تقرأ الجزء بتاع الطب فى الملف المثبت عن كندا بالمنتدى....كمان الجزء الخاص بمعادلة الشهادات.

يرجع مرجوعنا للسيارة......

سألت نديم قبل ما أتحرك بالسيارة أذا كان ممكن استئجار GPS Navigator عشان التوهان فقال ان ما عندهمش.....طبغا أنا كنت فى مخططى للرحلة ان يكون معى هذا الجهاز لسهولة التنقل بين المدن....فكان شراء Navigator جديد أمر لا مفر منه....

استلمت السيارة...وقعدت حوالى 10 دقايق على بال ما أتعرف على أماكن الحاجات....أصل انا ما ليش تقل على السيارات الأمريكى....ما علينا المضطر يركب الصعب (يا تورونتو)....

أيوه الدراع ده تقريبا بتاع الاشارات....وده بتاع المساحات....وفرامل اليد بقت فرامل رجل.......والدواسة دى بتاعة الفرامل...لأ...بتاعة البنزين....حاجات من هذا القبيل.... الحقيقة كان عندى رهبة من عدة حاجات....السيارة نفسها....و الشوارع اللى ما أعرفهاش....ونظام المرور اللى ذاكرته نظرى...وحان وقت النزول للمعمعة....وكمان السواقة فى التلج...وهل حتفرق ولا لأ.......اشياء كتيرة خلت الجو مش عاطفى أبدا

طبعا كنت مثبت المحامى و قلت له أمشى وراك....على الأقل يوصلنى البيت....بسم الله ...على بركة الله....سبحان الذى سخر لنا هذا و ما كنا له مقرنين وانا الى ربنا لمنقلبون....

مشيت وراه بكل حرص...كأنى باسوق لأول مرة....وكان عندى شعور ان العربية ممكن تتزحلق فى التلج.

وأنا سايق السيارة افتكرت شوية أسئلة كانت بتؤرقنى من قبل السفر....من ساعة ما قررت فى الخطة انى أستأجر سيارة...وهى كانت كالتالى:

يا ترى الواحد بيمون السيارة بأى نوع بنزين ؟ وبكام ؟ وكمان ازاى لأنى كنت بأشوفهم فى التليفزيون بيمونوا العربيات بنفسهم و بعدين يروح يحاسب....طول عمرى بابقى قاعد فى السيارة زى الباشا و يجى العامل يمون...ويحاسب ..وأمشى.....وفى مصر ...تتلم عليك عصابة من اللى بيمسحوا زجاج السيارة حتى و لو كنت لسه خارج من المغسلة....نوع من التسول الشريف.....

وكمان كنت عاوز أعرف ايه أخبار الباركينج ؟ وايه حكاية ماكينات الباركينج اللى فى الشوارع و ازاى استعملها ؟....طيب بالليل حأركن العربية فين؟ وبكام؟...وهل الكريدت مقبول فى الباركينج العام ؟........5000 سؤال ولعوا دماغى و افتكرتهم جميعا و انا ماشى بالعربية خلف المحامى......وكان لابد من اجابات.....شاورت للمحامى عشان يقف....

وبدأت استجوابه عن كل ما سبق.....و الراجل جاوب....أعتقد ان الفلوس اللى أخدها يستاهلها من كتر ما عملت فيه.

حأقول لكم الاجابات فى الحلقة الجاية

تحياتى....ماتنسوش الدعوات...بالذات الزولات بتوع السودان

[ELSHAMY]

أخوانى ...أخواتى الأعزاء

السلام عليكم و رحمة الله

اليكم بعض المشاهدات و الملاحظات...على موضوع المرور و محطات البنزين.... و الباركينج.... و السيارات...البونتياك منها و الفيات...يعنى حلقة مشحمة...وحتحتاجوا تغسلوا ايديكم بعد ما تقروها... :unsure:

- أولا: اذا كنت ناوى تستأجر سيارة فى كندا خصوصا لو انت فى أول زيارة مثلا لعمل اللاندينج فالنصيحة انك لا تستأجر فى أول كام يوم ...لحد ما تأخد خبرة الحياة بنفسك و تعرف الشوارع و تشوف تصرفات السائقين... و احترام المشاة...وا حترام اشارات المرور و علاماته... وكمان تفهم موضوع الباركينج (أه يا جيبى).

- ثانيا: الأفضل طبعا انك تعمل الحجز بتاعك عن طريق النت قبل ما تيجى بكام يوم...وده طبعا يستلزم انك تكون محضر خطة جيدة التوقيت لتحركاتك داخل كندا...طبعا الحجز عن طريق النت أرخص...ويضمن لك نوع السيارة اللى انت عاوزها.

- ثالثا: حاول و انت بتحجز تشوف شركة بتأجر GPS Navigator.... طبعا جهاز مالهوش حل و لازم يكون معاك...انا شخصيا لولاه لكانت الرحلة كلها حتبقى فى الضياع و كان حيبقى صعب جدا نعمل السيناريو اللى كنت مخطط له....مع توفير الوقت و المجهود و راحة البال.

رابعا: لو معاك أطفال صغار أو رضع...ماتنساش تحجز كرسى أطفال يناسب سنهم...أو وزنهم...حسب تعليمات المرور...مافيش طفل يقعد على حجر أمه...أو يدفس جنب اخواته...أو يفضل طليق فى العربية بدون حزام....

خامسا: لازم يكون عدد مقاعد السيارة مناسب لعدد الركاب....و اعمل حسابك فى مكان للشنط.

سادسا: محطات البنزين بيكون مكتوب عليها يافطة كبيرة اما Full Service او Self Service ...الأولى يعنى الخدمة كاملة...يعنى سيادتك خليك مكانك و حيجيلك العامل و يمون السيارة....و يحاسبك... و لو أعطيته بقشيش...بيفرح جدا...ولو ما حصلش مش حيشتمك ولا يضربك...ما تخفش....و غالبا هذا العامل بيكون جالس فى حجرة صغيرة مستخبى من البرد و لما يشوفك حييجى لوحده.....

النوع الثانى و هو الخدمة الذاتية...يعنى أخدم نفسك بنفسك يا حلاوة....و ده اللى فيه الكلام....سعادتك حتقف بالسيارة امام مضخة البنزين...(أعتقد دى حاجة سهلة)...و خلى بالك من الرقم اللى مكتوب على المضخة...عشان تعرف و انت بتحاسب كنت فى مضخة رقم كام.... و طبعا خد بالك تقف صح يعنى يمين أو يسار المضخة حسب مكان التانك wst:: ...(دى كمان سهلة)...لاحظ كمان ان الموتور يكون مش شغال أثناء تعبئة البنزين...

سابعا: أوعى تقف امام مضخة السولار.... wst:: الا اذا كان معاك عربية نقل.....

ثامنا: حتلاقى زراير كتير و عدادات والوان...ما تتخضش...طلع خرطوم البنزين...و اضغط على اللون الأبيض اللى مكتوب عليه Regular ...وعبى يا باشا.....طبعا احسن لك تملا Full Tank كل مرة علشان تقلل عدد المرات طبعا انت مراقب من الشخص اللى جالس بداخل المحطة بدائرة تليفزيونية ..(و قبلها طبعا مراقب من ربنا).... خلصت...أدخل المحطة....قول له رقم المضخة...حاسب و اتوكل على الله.

بعض المضخات بيكون فيها مكان لقبول ال Credit Card و استعماله سهل...بس ما فيش داعى تحرج نفسك. wst::

ملحوظة هامة:

...قد يكون ما ذكرته سابقا بديهيات عند بعض الأخوة اللى عايشين فى أوروبا و الدول المتقدمة...لكن انا هنا بأخاطب جموع الشعب الكادح اللى لم يتعرض لهذه التجربة من قبل....انا شخصيا سافرت بلاد كتيرة شرقا و غربا...بس عمرى ما أجرت سيارة و لا كنت مسئول مباشرة عن كل ما يتعلق بها زى المرة دى.

ان شاء الله تستفيدوا من الكلام ده.....دعواتكم

[ELSHAMY]

اخوانى ...اخواتى الأعزاء..السلام عليكم و رحمة الله

استكمالا لحلقة السيارات...و الباركيينجات...اليكم ما هو أت:

تاسعا: ماكينات الانتظار بتكون على الرصيف بجوار المكان المسموح بالانتظار فيه...و يجب عليك قراءة ما هو مكتوب على العمود اللى على نفس الرصيف حيث تجد المواعيد المتاحة للأنتظار المجانى...و أبو فلوس...يعنى مثلا قد تجد ان أبو فلوس بيكون من بعد الساعة 8 مساء و حتى السادسة صباحا...و بذلك يكون ما بين ذلك بفلوس...

عاشرا: ماكينة الانتظار نفسها مكتوب عليها تعريفة الأنتظار...مثلا الدولار يعطيك 20 دقيقة انتظار...والدولارين 40 دقيقة و هكذا ...احسب مشوارك قد ايه...ويبدأ العداد فى العد التنازلى.

حداشرا : يعدى رجل المرور على الماكينة ولو لقاها صفرت...يعنى كتبت كده: 00:00 تبقى وقعتك سودة لو اتقفشت....و يروح عاطيك واحد تيكيت غرامة.

اثنا عاشرا : لو ما لحقتش مكان تركن فيه بالليل...عليك بأى باركينج Overnight و ده بياخد له حوالى 12 دولار ...(حسب المكان)

13 شرا طبعا كل المولات و أماكن الترفيه جنبها أماكن انتظار.... و لو معاك Navigator... ما فيش أى مشكله ...حيدلك على المكان.

أظن كده الأمور على ميه بيضا....حدش فيه عنده سؤال ؟

بعد شوية...حلقة خاااااااااصة جدا (مغامرات الشامى مع ال Navigator) :ninja:

[ELSHAMY]

الأخت مهاجرة....

وليه بصمت ؟...ياريت نسمع صوتك....ما تخافيش... :wub:

لسه بدرى على الحلقات ما تخلص... جاهزين للرد يا فندم

تحياتى

[ELSHAMY]

أخى العزيز Ahmed Saleh

السلام عليكم.....

أنا قلت فى الحلقة السابقة انى لا أفضل ايجار سيارة من المطار عند النزول لأول مرة...أحسن تاخدلك تاكسى ...وبعد كام يوم استأجر سيارة...وده أحسن من الناحية (المعنوية) :blink: و (النفساوية كمان) عشان تاخد خبرة المكان أولا...

ومن الناحية المادية تكون وفرت لك كام يوم من ايجار السيارة wst::

تحياتى و بالتوفيق

[ELSHAMY]

اخوانى...أخواتى....جموع المهاجرين

السلام عليكم و رحمة الله

هذه حلقة جديدة من المسلسل...

نعمل و احد فلاش باك و نرجع لما بعد استئجار السيارة.... وقفت المحامى ...وجاوبنى على اسئلتى..بس كنت حاسس انى لسه عندى اسئلة كتيرة ....أو يمكن خوفى من انه حيسيبنى لوحدى و يمشى...زى العيل اللى بيخاف من الضلمة و عامل نفسه شجاع و مش عاوز أمه تطفى النور عشان ينام...

و يبدو انه شعر بتخوفاتى...فقال لى ايه رأيك نعمل درس عملى...تعال ورايا...واخدنى عند محطة بنزين و شرح لى كل الموضوع...و الظريف ان فيه شاب كندى قرب منى وسألنى سؤال ما فهمتوش لأول وهلة (مش عارف ازاى الشاب ده عرف ان انا كندى مثله :blink: ) واتاريه سيارته عطلت و عاوز وصلة من بطارية سيارتى..... يعنى هو خلاص أنا ناقص ...مالقيتش غير أنا من وسط ال 33 مليون كندى تسأله السؤال ده.....ده أنا لسه بأقول يا هادى و مش عارف الموتور فين....و بما انه كندى شقيق فكنت ناوى أساعده...بس ربنا ستر و سيارته اشتغلت لوحدها....وكفى الله المؤمنين القتال..... :blush:

المهم...مشى الحال...و صلنى المحامى عند البيت...ركنت السيارة...وحطيت دولارين فى ماكينة الانتظار (يعنى 40 دقيقة)...ودول كانو أول دولارين فى سلسلة الاستنزاف الباركينجيناوى....كنت عاوز أروح اشترى ال Navigator من المول اللى جنب البيت...وقلت مش طالبة كمان انى أروح المول بالسيارة....خلينا محترمين فى الأول...خصوصا انى مرعوب من موضوع الباركينج...

فى المول...اكتشفت ان فيه حوالى 2 مليون نوع من ال Navigators.... و ده استدعى انى أخد محاضرة من البياع عن مميزات كل نوع و عيوبه.... وطبعا انا باسمع له و بافكر فى ال 40 دقيقة اللى قربوا يخلصوا....بس الحقيقة أعطانى معلومات مهمة جدا...يعنى فيه نوع فيه Voice Guide وفيه نوع ما فيهوش....و الأول فيه نوع يقول لك بس الاتجاهات و فيه نوع كمان يقول لك اسم الشارع اللى انت ماشى فيه.. واللى حتروحه.....وفيه نوع معاه خاصية معرفة ازدحام المرور فى الشوارع اللى انت ناوى تروحها Online و يختار لك طرق بديلة....ونوع يقول أحوال الطقس فى الساعات القادمة بالنسبة للظرق اللى حتمشى فيها....المهم...حاجة قلة أدب بصراحة....وطبعا السعر بيفرق كمان حسب حجم الشاشة...

أخيرا اخترت نوع معقول من اللى بينطق اسم الشارع...اما بالنسبة لازدحام المرور و الطقس...مش مهم انا واخد على كده...

ورجعت البيت جرى...عشان اطمن على العربية اللى فات عيلها اكتر من ساعة فى الباركينج....ياترى ايه اللى حصل؟...

ترقبوا حلقة جديدة من مغامرات الشامى فى أوتاوا (بس المرة دى بال Navigator ) wst::

تحياتى

[ELSHAMY]

الأخت دعاء...جزاكى الله خيرا

كلام زوجك صحيح...المحامى مهمته تنتهى عند اعطائكم الفيزا...وكل الخدمات الأخرى لها حساب تانى...معظم المحامين عندهم حاجة اسمها خدمات ما بعد اللاندينج و دى طبعا بفلوس وأهم حاجة فيها انه بعطيكم عنوان تقولوه عند الوصول....و طبعا علشان يريحك من كل المخاوف اللى بتدور فى راسك عند خروجك من المطار....من توصيل و خلافه حسب اتفاقكم معاه...

و الحقيقة هو ماكانش معانا طول الوقت...انا اللى كنت بأستغله أسوأ استغلال وكل ما أحب حتى أهرش أتصل بيه و أساله ...ازاى أهرش لو سمحت فى كندا ؟...حاجات من هذا القبيل عشان يحلل الفلوس اللى لسعها. wst::

أخى (لمؤاخذة) التايه...شكرا لكلماتك....طبعا قابلت دكاترة....وقتلت (كعادتى) الموضوع بحثا...أصبر على رزقك...جايلك فى الكلام يمكن بعد 12 أو 15 حلقة... :rolleyes: حأحكيلك الحكاية قريبا

مادام الكلام كان للأخت دعاء...ما أقدرش أختم الا ب :blink:

[ELSHAMY]

انا بس كان ليا استفسار بخصوص نقطتين

اولا انا متخرج من بقالي سنه وعاوز اقول ان معايا على الاقل سنتين لاني محتاج نقط الخبره دي اوي هل ممكن اكتب شهادات خبره مني لنفسي وابعتهم منغير لا تصديق ولا يحزنون

ثانيا انا بفكر اقدم على كيبك والمفروض زي مقريت ان الملف يكون فيه كل حاجا ايه العمل وانا لسا بدرس فرنسي هل ممكن اقدم الورق مع الابليكيشن ناقص شهادة اللغه الفرنسيه واقدمو بعد سنه كدا على الاقل

صحيح انا صيدلي متخرج 2007

عزيزى:

لا أ أنصحك أبدا بارسال أى ورقة مزورة أو مضروبة أو لا تستطيع اثبانها فيما بعد لو طلبت منك رسميا...أولا لأن كده غش و حرام...وانت محتاج فى الموضوع كله بركة ربنا.

انت لسه متخرج...ايه رأيك تعمل المعادلة...وتاخد خبراتك براحتك...وتسافر على ميه بيضا....بس اوعى تتبل... wst::

[ELSHAMY]

الأخوة الأعزاء

السلام عليكم و رحمة الله

الحلقة الجاية....جت.....فاكرين وقفنا فين...مضبوط...لما رجعت جرى عشان اطمن على العربية ...وهنا كانت المفاجأة... :unsure: .......

ما تتخضوش...ولا مفاجأة ولا حاجة....لقيت العربية واقفة...و عداد الباركينج مصفر 00:00 ومزمر كمان...والحمد لله مافيش مخالفات...و العسكرى ما عداش عليها....

كانوا الأولاد جاهزين لأول فسحة فى أوتاوا بالسيارة...وده يعنى ان كله متدفى وتمام و ما فيش زحلقة .... ركبت ال Navigator وفين يوجعك...

أنا:...لو سمحت يا Navigator عاوزين نروح Shopping Centers

Navigator: حدد ...بتاع ايه ؟ كمبيوتر...ملابس...مجوهرات.....الخ ؟

أنا: ملابس

Navigator: امرك يا باشا....اتفضل لستة بكل الاماكن (على فكرة الاماكن مترتبة تصاعديا حسب بعدها عن مكانى الحالى)...اشى خيال يا ناس.

طبعا بالشكل ده عشنا حياتنا كام ساعة...نزول و طلوع و تنطيط...و أمشى فى الضلمة ولا أخاف....أخاف ليه...معانا Navigator..... و ساعات كمان ما كنتش بأشرب اللبن.....وأشربه ليه...معانا Naviagtor

وكل ما نوصل فى مكان و اكون مش لاقى ركنة للعربية...مش مشكلة....Navigator لو سمحت فين الباركينج؟ ....50 متر على ايدك الشمال يا باشا..أى خدمة

وهكذا...عاوزين ناكل...عاوززين نشرب...عاوزين :ninja: لمؤاخذة...كله جاهز....بعدين عملت نفسى أبو عرام ..وقلت أتفسح بقى فى أوتاوا...وبعدين أبقى أقول له يودينا البيت...وقد كان...تفسحنا و تهنا...البيت لو سمحت يا ولد يا Navigator....أمرك يا باشا..

وبكده أصبح للرحلة كلها طعم تانى..جديد...شىء من الثقة وانا سايق و مش هاممنى حاجة...و حسيت انى جبت جون تانى فى كندا..........كده النتيجة بقت 2/صفر...

وافتكرت طبعا أغنية مامشتش فى نواحيها...طب ما تهتش فيها...وعينى دمعت و الفيلم العربى ده اللى انتو عارفينه... :unsure:

هل يا ترى النتيجة حتفضل كده فى الشوط التانى ولا كندا حيكون لها رأى تانى

...ده اللى حنعرفه مع صفارة الحكم...فاصل مع الاستوديو التحليلى...

تحياتى

[se_ Elsyed]

دكتور شامي

من زمان وانا عايز أسألك سؤال إنت والأخوة الكنديين اللي متقفلين في كندا

بس ما حدش يضحك عليه .. أو يفكر إني بأشتغل الشغلانه دي .. او يظن إني عايز أهاجر ومعايا شنطة العِدة .. دي >>>>>>>>>>>>>>>

بسم الله الرحمن الرحيم

السؤال هو

نظام الحلاقين هناك إيه ؟

يعني عيال كسيبه .. وممكن طلبات الهجرة بتاعتهم تتقبل بسُرعه أول ما أكتب في المهنه " حلاق " ؟

أعود وأؤكد إن كل علاقتي بالحلاقة هو إني بأحلق شعري عند الحلاق كل شهرين أما دقني فبقييفها كل يوم جُمعة ... وإن عندي صالونين حلاقه في مصر بيديرهم أخويا .. وإن مافيش حد في العيلة حلاق صحة ولا دياولو ... على بلاطه كده عشان مش عايزين كلام :unsure:

هــا قولتو إيه ؟

أخوكم زينة الشباب .. الشهير بـــ سيد المِزين

[ELSHAMY]

اخى المزين...(سى السيد)

و عليكم السلام...اللى أعرفه ان الواحد عشان يشتغل حلاق فى كندا لازم يعمل معادلة برضه :unsure: وده امتحان بسيط بيشوف المتقدم بيعرف يروق الزبون ولا لأ....

وأهم شىء هو الامتحان النظرى .أنواع القفيان...طرق تزبيط السكسوكة..وغيره...لو المتقدم نجح بياخد...رخصه (ح1 ) يعنى حلاق مبتدىء...ودى بتعطيه امكانية انه ينضف الشعر من على الزبون بعد ما يخلص حلاقة....

و بعدين يتقدم على امتحان الحصول على (ح2) يعنى حلاق على الطريق ...ودى تسمح للمتقدم انه يحلق لأى حد بس يكون جنبه حلاق تانى بيفهم فى الحلاقة...و يعرف شىء عن الاسعافات الأولية... :unsure:

أخر مرحلة بتكون التقدم للحصول على رخصة (ح full) و دى بتخليه يحلق لأى حد و فى أى وقت و فى أى مكان ...حتى لو على ال high way وطبعا مش حاقولك على الدخل الشهرى....

و مادام (العدة) موجودة ما تقلقش بس ابقى غير الموس....نعيما مقدما

تحياتى

[ELSHAMY]

و الله يا سي السيد ما طلبتش معايا حلاقة هناك.....

ما كنتش ناقص مصاريف..........اصل انا اتحلق لى فى حاجات تانية كتير.. :unsure:

اعتقد الناس المقيمين هناك أكيد بيحلقوا...يمكن عندهم رد

[ELSHAMY]

مساء الخير عليكم يا جماعة

أناعضو جديد معاكم في المنتدى

أنا فعلاً متشكر جداًً جداًً على كل المعلومات اللي عرفتها منكم هنافي المنتدى

و أخص بالشكر السادة الأفاضل الشامي و تورونتو و ايهاب اللي فعلا نفسى أشوفهم

العفو يا بوب...ان شا الله تنبسط معانا....انا ممكن ابعت لك صورة (بخمسة دولار)...ما تخليش فى نفسك حاجة

تحياتى