الشامى رجع من كندا يا رجالة

[ELSHAMY]

ازيك يادكتورشامي

طبعا بسجل اعجابي الشديد بمسلسل دكتورنا الشامي

وعندي سؤال رخم حبتين وخارج المنهج؟؟؟

هي صح فترة بسيطة الي حضرتك قعدت فيها في كندا

والحمدلله اديك جبت جونين ممتاز جدااااونتيجة هايلة

بس يترى ايه اكتر حاجة افتقدتها ووحشتك من السعودية

وقلت نفسي ارجع ليها بسرعة.....

اخوك الصيدلاني الي بيحلم بكندا .

صوت الأذان فى الشارع

[ELSHAMY]

هو أنا قاعد هنا لوحدى يا د شامي و اللا ايه

تقريبا كده يا بوب....بس انا موجود....هو انا مش مكفيك ولا ايه

اصبر على رزقك

[ELSHAMY]

احب اسجل تقديرى للاخ الزميل الشامى و متابعون لحلقات ليالى الحلمية

العفو يا أبو اسكندر....على فكرة انا كمان اسكندرانى...و ابويا اسكندرانى...وكل اسكندرانى الله عليه ....الى أخر الاغنية

[ELSHAMY]

احب اسجل تقديرى للاخ الزميل الشامى و متابعون لحلقات ليالى الحلمية

العفو يا أبو اسكندر....على فكرة انا كمان اسكندرانى...و ابويا اسكندرانى...وكل اسكندرانى الله عليه ....الى أخر الاغنية

ايوة مش تقول ان حضرتك اسكندراني اوعي تكون من شدس؟خلاص لما تيجي نازل اسكندرية نتقابل هناك مادام خايف تقابلني في تورونتو. :closedeyes:

انا قبلك بمحطتين....ساكن فى حى الوزارة..... وحبيبى ساكن فى شدس...

[ELSHAMY]

مش معقول يا دكتور شامى

انا من الوزارة برضه

ممكن نطلع جيران قوى كدا؟!!!!!!!!!!!!!!!!!!!!!!!!!!!!!!!!

الحمد لله...الدنيا صغيرة...ممكن بقى توقف الناس اللى بتهز راسها دى....انا دخت منك

[ELSHAMY]

أخوانى الأعزاء toronto , دكتور الشامى

السلام عليكم ورحمة الله

أنا عضو جديد بهذا المنتدى الرائع وأحب أن أعبر عن سعادتى بروياتك ومغمراتك فى كندا أخى الحبيب د/ الشامى

وعلى فكرة أنا من دسوق يعنى جنبكم بشوية

أنا عندى سؤال من فترة طويلة وكنت بكسل أكتب لكن أسلوبكم الراقى وخفة ظلكم دفعتنى للكتابة

أنا قدمت فى القاهرة فى السفارة الكندية ودفعت الرسوم فى شهر 8 الماضى ومنذ ذلك الوقت وأنا بإنتظار الفيل نبر لكن لم أستلمه حتى هذا الوقت لذلك مش عارف أعمل أيه لأنى فى ليبيا الأن ومش هينفع النزول غير فى شهر سبعة القادم .

أنا كتبت لهم العنوان على ليبيا وأعطهم بريدى الأكترونى

بما تنصحونى بارك الله فيكم وجزاكم خيرا على أوقاتكم النافعة

أخى العزيز / دسوق.. و عليكم السلام...مرحبا بك أخا عزيزا...ليس أمامك الا الانتظار...و حاول تقرأ مداخلات الأخوة على طريق الهجرة حتعطيك شوية معلومات...تحياتى و بالتوفيق

[ELSHAMY]

أخوانى...أخواتى الأعزاء...السلام عليكم و رحمة الله

نستكمل حلقات المسلسل اليومى....المرة دى أنا فاكر وقفنا فين....لما قعدنا نتسكع بالسيارة فى أوتاوا....

وبما ان اليوم ده كان أخر أيامنا فى أوتاوا و حنطلع تانى يوم على كينجستون فى طريقنا لتورونتو فكان لازم نروح البيت ..ونحضر الشنط استعدادا للسفر...ودى فى حد ذاتها بتبقى ليلة مش لطيفة لأن الأولاد خلوا الشقة سويقة...و الشنط مفتحة...وده شرابه تحت السرير...ودى بيجامتها مش موجودة...وحاجات فوق النجفة مش عارف ليه...وحاجات كتير كنا جايبنها معانا مش موجودة....وحاجات تانية مش بتاعتنا كانت موجودة...فكان لازم كل شىء يتلم...و مافيش نوم لكل الميليشيات قبل ما الشنط تتقفل...مع محاولة يائسة لأرجاع الشقة على ما كانت عليه قبل الغزو الشامى لكندا...

كلمت الدكتور صديقى المقيم فى كينجستون...و عرفت منه العنوان...وطمنته...مافيش قلق من التوهان...معانا الله ثم الNavigator

المهم نمنا و صحينا...ونزلنا الشنط....ياولد يا Navigator....كينجستون لو سمحت....حاضر يا باشا.....نسيت أقولكم ان ال Navigator كمان بيعطيك الوقت التقريبى للوصول و ذلك حسب اختيارك ان كنت تفضل تضبطه انه يوصلك بأقصر وقت أو أقصر مسافة....(قلة أدب)... حتى لو سيادتك دخلت تمون بنزين أو تشرب قهوة على الطريق...فورا يراجع حساباته و يعطيك التوقيت الجديد لرحلتك..(مهزلة).

توكلنا على الله...وطلعنا ال Highway يمين....شمال....اطلع من المخرج....ادخل فى المدخل...المسافة حوالى 250 كم .... و كانت لسه التلوج على جانبى الطريق....الملاحظ التزام معظم السائقين بالسرعة (100 - 110 كم/الساعة)...و الأغرب التزامهم بالحارة اللى ماشيين فيها...حاجات غريبة...

وأنا فى الطريق لقيت بلد طالع منها نور جامد جدا لحد السما..... البلد اسمها ميساساجا...والنور لأن فيها أخويا تورونتو...صباح الفل يا باشا....المهم عدينا بسرعة لأحسن يمسك فينا و احنا معزومين.

المهم ساعتنين وشوية ولقيت الولد ال Navigator بيقول لى حمدا لله على السلامة ...انت امام بيت صاحبك....كلمته...طلع لى فعلا... وكان استقباله لنا حافلا هو و أسرته...و اللطيف ان اولاده تقريبا فى سن أولادى....حصل ايه فى كينجستون...و ايه اللى قاله صاحبى عن انطباعاته عن كندا بعد سنتين اقامة....ده اللى حانعرفه بعد فاصل قصير...طويل ..مش عارف حسب عدد المرضى

تحياتى

[ELSHAMY]

أخوانى..Madzoro, البوب, Agmaa

السلام عليكم....الواحد بقى حاسس ان عليه عبء ثقيل....عدد قراء المسلسل قرب على 7000 واحد...و المداخلات قربت على 200 ... وانا للأسف وقتى محدود...و ماكنتش أعرف ان المسلسل حيحلو كده.....

تخيلوا أنا نفسى باستنى أقرأ الحلقات كل يوم

بس طبعا لو كتبتها مرة واحدة حتخلص و يبقى ما فيش شامى...وانا الحقيقة مستمتع جدا بتواصلنا مع بعض.

أما بالنسبة للأخوة المستعجلين حأقولهم بسرعة اللى حصل عشان يهدوا شوية....

رحنا كينجستون (واحد يوم) و بعدها تورونتو (خمسة يوم) و خلالهم رحنا لندن أونتاريو (واحد يوم)...و شلالات نياجرا (واحد يوم)...وعدنا الى أوتاوا (واحد يوم)...وبعدين مطار مونتريال...كازابلانكا (واحد يوم)...وبعدين جدة.... استريحتوا....خلاص ماعدش فيه شامى....شامى بح....

أما بالنسبة للأخوة اللى مش مستعجلين و مستمتعين زى حالاتى بهذا السرد البطىء الممل...أقول لهم انتم طبعا عارفين أهمية الفاصل الاعلانى...لأنه ده اللى بيجيب الفلوس ... وده اللى بيعطينى فرصة أتذكر الأحداث كويس و أتغلب على الزهايمر.... وكمان بيعطينى فرصة أشوف شوية مرضى

أوعدكم جميعا بحلقة حلوة

أعذرونى...تحياتى

[ELSHAMY]

شوية السسبنس اللي انته عامله ده يا عم شامي بيفكرني بمسلسل بريزون بريك :rolleyes:

يلا احنا معاك علي طول الخط

بس سؤال صغير لو سمحت ، بعد عرض انواع النافيجاتور

يا ريت بقي لو فكرة عن اسعارها ، لاني اشتقت اشتري واحد

في انتظار الحلاقات القادمة

أخىEinstien

بالنسبة لأنواع النافيجاتور الكويسة اللى شفتها...أهم 3 أنواع هم: Garmin - Magillan - Tom Tom وأحسنهم هو Garminهناك أنواع أخرى أقل جودة و وزى ما حكيت ان الاسعار بتفرق حسب الامكانيات و حجم الشاشة... وعدد البلاد الى خرائطها موجودة...و الباقى ممكن تنزله من على النت

الأسعار تبدا من 200 $ ال 600 $ للأنواع المعقولة....

ما تخليش فى نفسك حاجة

[ELSHAMY]

Thanks Dr.Shamy and excuse me to write this time in English I have a problem with my other Lab

May I ask you about the prices of the flight tickets to Toronto

I asked in EgyptAir ,They only arrange flights to Monterial

and the tickets for the whole Family(me and my wife and my two children) will be around 1850$ USD

Is this right information

I heard it costs more than 45000 LE

Dear Mr ElBOB

Actually my flight was from Jeddah to Montreal through Morocco Airlines.... Sorry I don't have an idea about prices in Egypt Air from Cairo direct to Toronto

Regards

[ELSHAMY]

أخوانى...أخواتى...السلام عليكم و رحمة الله

بناءا على رغبة القراء..(مع انى عيان و الله وضغطى فجأة كان عالى جدا النهاردة صباحا)....حلقة جديدة من المسلسل...

وصلنا كينجستون ظهرا...و نسينا برودة الجو مع حرارة الاستقبال...و بعد السلامات ..بدأت المشروبات ..والحلويات...مافيش أحلى من كرم المصرى (لما يحب) مع أخوه فى الغربة...

بدأ صديقنا بجولة فى منزله...ربنا يبارك له فيه وفى أولاده...منزل جميل...Detached مع باك يارد كبير...اتفق مع جيرانه انه يكون مساحة مفتوحة بينهم جميعا ...وكان فيه مساحة كبيرة مستطيلة لونها أبيض...عرفت بعد السؤال انه حمام سباحة :sad: ..وعرفت كمان ان الجزء الخلفى كله بيكون لونه أخضر بعد ذوبان الثلوج....وأمام البيت ساحة انتظار كبيرة غير الجراج...البيت نفسه 3 أدوار....Basement ودور أرضى فيه السفرة و ال living room و اوضة المسافرين :happy: والدور العلوى غرف النوم.....ما شاء الله تبارك الله بيت يشرح القلب.

طبعا كان فيه وصف تفصيلى لنظام التدفئة و كيفية شراء أو ايجار بيت و التأمين و الضرائب العقارية و رسوم الصيانة...وغيره مما لا يتسع المجال لذكره... صديقى هذا طبيب بقاله سنتين فى كندا...ما شاء الله كان عنده نفس طويل لعمل المعادلة بكل أجزائها...وكذلك امتحان التقييم...ودخل امتحان كان متقدم له 64 طبيب فى نفس التخصص...اختاروا منهم أربعة فقط..كان هو واحد منهم وجاء توزيعه فى كينجستون.

كينجستون مدينة ليست كبيرة و يغلب عليها الهدوء الشديد...فيها ايرلنديين كتير...و العرب نسبتهم ليست كبيرة... ولكنها تتميز بوجود مستشفى جامعى قوى.

وكمان سمعنا منه عن نظام التأمين الصحى ..وحكى لى قصص عجيبة عن حقوق المواطن لما يكون مريض...وكان فيما قاله ان الطبيب مسئول عن المريض من وقت ما يشوفه أول مرة لحد ما يطمن انه رجع البيت سليم معافى...ولا تنتهى مهمة الطبيب عند الكشف و كتابة العلاج فقط...بل ان من حقوق المريض انه فى حال ما كان عليه انتظار دوره أو كان ميعاده بعد ساعات ان توفر له المستشفى مكان يريح فيه شوية wst:: ...و يتم ذلك باعطائه Voucher فى اى فندق قريب لو ان المستشفى ما فيهوش مكان...ويتم صرف وجبات غذائية له طول الفترة من ساعة ما بقى على ذمة المستشفى....(عيانين أخر زمن)...

وأحرق دمكم أكتر...ان الفندق لو بعيد بيعطوه Voucher اخر لركوب تاكسى للفندق....طبعا سائق التاكسى تانى يوم يروح يبدل الVoucher بفلوس.....نفس نظام مستشفى القصر العينى wst:: ...و مستشفى الميرى فى اسكندرية :blush2: ...وأظن تم تطبيق النظام ده فى مستشفى أم الكنديين قصدى (المصريين)...حاجة تقرف... :blink:

حاكمل بعد شوية...بعد ما اتعارك مع المريض اللى قدامى.... :happy:

تحياتى

[ELSHAMY]

الأخت مهاجرة..تحت أمرك

السؤال الأول: يوجد فورمات لنوعين من ال List... واحدة للحاجات اللى انتى وخداها معاكى فى السفر ..و الأخرى للأشياء اللى انتى ناوية تشحنيها بعد فترة...ويمكن تنزيل هذه الفورمة من على النت....بالنسبة للأجهزة الكهربائية يجب ان تذكريها بالتفصيل...وكمان لازم تكتبى قيمة تقديرية لسعر كل ما ستذكريه....وده واضح لما تقرى الفورمة..... لم يسألنا أحد عن الذهب و المجوهرات...لكن يجب ذكر التحف و الاشياء القيمة حتى لا تدفعى عليها ضريبة

السؤال الثانى: ...اللى معهوش محامى.....بيعطوه كتيبات كتيرة عند اللاندينج...بس تبقى خبرة المحامى و نصايحه مش حتلاقيها فى أى كتيب.

السؤال الثالث: مادام ناوية تستقرى فى ألبرتا....أحسن تعملى كل حاجاتك هناك...

السؤال الرابع: فيه مدارس عربى ..لكن بمصاريف...بس الأفضل ان حد من العايشين فى ألبرتا يفيدك عن أماكنها وأسعارها....بس أنا أعرف ان المدارس الحكومية بتقبل التلاميذ أيا كان مستواهم فى اللغة....بس يكون فيه على الأقل أى مستوى بداية

الله معك

[ELSHAMY]

الاخ العزيز :lol: د. الشامي :lol: لقد اصبح انتظاري لحلقاتك عن رحلتك الى كندا وسواس قهري فانا ادخل الى الموقع كل ساعه . انشاء الله ربنا يعطيك على قدر الاستفاده الكبيره التي نحصل عليها من حلقاتك الشيقه والممتعه .

الاخت الفاظلة ( مهاجره ) هذا عنوان على النت يفيدك بكل المعلومات عن المدارس :-

http://www.settlement.org/site/ED/elementary.asp

وهذا الموقع يفيد كل كل مهاجر جديد بمعلومات قيمه عن كل شيء قبل السفر الى كندا :-

http://www.settlement.org

ولكن في النهايه التجربه الشخصيه التي نستمدها من اهل الخبره بيبقى لها طعم تاني وشكل تاني :sad: [وسط][/وسط]

الفاضل/ osamagouda

أخجلتنى بكلماتك الجميلة. ..على فكرة الموقعين دول حلوين و فيهم خبرات أخرى و اجابات أسئلة كثيرة....ولك جزيل الشكر

[ELSHAMY]

الأخوة الأعزاء

السلام عليكم و رحمة الله

حلقة جديدة من مسلسلكم...وصلنا لحد أقوال صديقى المستفزة عن التأمين الصحى...وكان فيما أضافه ان هذا السلوك من الأطباء تجاه المرضى هو سلوك مراقب ويتم تقييمه من قبل هيئات متخصصة و بناء عليه يكون اعطاء التقدير للطبيب عن عمله خلال العام...يعنى مش بيعمل كده فقط لأنه كريم و المريض يستاهل...لأ...ده يعلم تماما انه واجبه وسيتم تقييمه عليه...

بمناسبة واجبه دى تذكرت قصة طريفة حصلت مع طبيب صديقى لما كان طبيب امتياز فى أحد مستشفيات أسكندرية منذ سنوات...وحصل نداء عاجل فى المستشفى للتبرع بالدم لأنقاذ حياة أحد المرضى (من الأرياف)... و كان أن أخذت صديقى موجة شهامة و راح اتبرع بدمه لأنه كان فصيلة نادرة....تانى يوم...بعد العيان ما فاق من العملية...صديقى كان بيمر أمام غرفة نفس المريض و كان عنده زيارة من بلدياتنا ...حوالى 50 واحد ...الى قاعدين على طرف السرير...واللى فى الأرض....ولما المريض شاف صديقى...قال له يا دكتور (بفتح التاء) يا دكتور...اتفضل...و دخل صديقى...فقال المريض لأهله...أهو ده الدكتور اللى اتبرع لى بالدم ...الله يكرمه...وهنا شعر صديقى بشىء من الفخر المشوب بالخجل....الى أن قام واحد من أهل المريض و قال بصوت عالى....: وايه يعنى اتبرع بالدم ما هى شغلته wst:: ......وجهة نظر.

عرفتو ليه فيه بعض المرضى بيتضربوا...؟

ما علينا.....وكان فيما قالته زوجة صديقى الطبيب...ودى مقابلتها فى حد ذاتها كانت مهمة لى جدا ( و لزوجتى بالأخص) لأنها مثال لزوجة مصرية مهاجرة و قاعدة فى البيت بالعيال....و أكيد تجرتها و انطباعاتها حتكون مفيدة... و على فكرة انا كنت أعرف (من مصادر سرية) ان هذه السيدة حضرت الى كندا بالعافية...و بالعياط...و ما كانتش عاوزة...والموضوع وصل بينها و بين زوجها الى مشارف المأذون.... وها هى الأن امامنا فلة شمعة منورة.... ولقيتها بتحكى قد ايه هى سعيدة الأن فى حياتها الجديدة...و التفكير فى نزول مصر ...أصبح ينحصر فى الأجازات....مش ناقصها حاجة....عبء كبير من هم متابعة العيال فى المدارس اتشال من عليها لأن نظام المدرسة ان العيل يخلص كل شىء قبل ما يرجع البيت....البيت جميل و الجيران حلوين...و الدنيا أمان...لدرجة انها قالت انهم ساعات كتير بينسوا باب الجاراج مفتوح...وعمر ما حصل حاجة....من الأخر الست مبسوطة جدا...و قعدت تقنع مراتى ان يكون مستقرها فى كينجستون.

وبعد شوية ...اكتشفت ان العيال مش موجودين...أخدنا الكلام و نسيناهم....اتاريهم راحوا مع أولاد صديقى زيارات ميدانية عشان يشوفوا مدارسهم...كل واحد عاوز يطمن على مستقبله......حتى العيال عاملين شغل من ورانا...بس ياترى كانت ايه انطباعاتهم عن الموضوع ؟....

أعتقد دى تستاهل حلقة لوحدها...

تحياتى

[ELSHAMY]

الأخوة الأعزاء...السلام عليكم و رحمة الله

حلقة جديدة من المسلسل..

كان انطباع الأولاد عن المدارس جيد جدا...وبدا لهم مما سمعوه من أقرانهم ان الموضوع هنا أريح بكتير ...طريقة التعليم مبتكرة و مسلية...توصيل المعلومة بيكون عملى قبل ما يكون نظرى....و طبعا أهم حاجة ان ما فيش home work الا قليل...

وجاء ميعاد الغدا....سفرة مهولة...عامرة... :lol: .أو هكذا بدت فى أعين 6 بنى أدمين جايين من مجاعة زينا ....لحمة...فراخ...سمك....جمبرى...أحمدك يارب... :)

(يا أولاد).....هكذا ناديتهم...تعالوا بسرعة ....كلوا و ما تتكسفوش....هو ده يا ولاد ( الحلال فوود)...اللى وعدتكم بيه....وطبعا كانت مجزرة لأنى كنت مشتاق للأكل البيتى الحلال...والعيال معدتهم قشفت من التونة و الجبنة و العيش التوست.... و نادرا سندوتشات الشاورمة..

الحقيقة كان كرم الضيافة عالى جدا...أعلى من كرم مطاوع.....واحنا ما كدبناش خبر...وعملنا الواجب...وزيادة...

وبعد الشاى و الذى منه ... ;) سألت صديقى على بيته و كيف اشتراه...و كذلك تأثيث البيت... وقال ان موضوع شراء البيت مش بيتم فى الشهور الأولى طبعا...سيادتك تشرف و تختار المدينة...و الحى اللى حابب تسكن فيه...وطبعا بيحكمك فى كده مدارس الاولاد و مكان عملك...واذا تراءى لك ان الأمور مستقرة بتبدأ فى البحث عن شراء منزل حسب امكانياتك....و تروح البنك...و يستحسن يكون معاك مقدم معقول عشان تقلل الأقساط وقيمة الفائدة اللى بتكون على 25 سنة مثلا أو حسب ما تختار.

تأثيث البيت مش مشكلة ...لو حابب أثاث جديد موجود ...وحتى المستعمل بتكون حالته جيدة... العثور عليه سهل من الاعلانات أو النشرات و الجرائد المجانية المنتشرة على ناصية كل شارع فى المدن الكبيرة.... و يمكن كمان انتظار ما يسمى بال Garage Sale كل سبت و أحد بيكون فيه حاجات حلوة.... :)

و على بعد العصر كده حان موعد الرحيل....عشان كنت عاوز ألحق الطريق فى النور....مع انى كان معايا الولد ال Navigator بس برضه المسافة الى تورونتو كانت حوالى 250 كم أخرى...... و خفت أنام و انا سايق ...خصوصا بعد مذبحة الغدا...

و بدأت الم العيال wst:: اللى اتبحتروا فى كل حتة...ومالقيناش البنت الصغيرة ندى...طبعا لازم أعرفكم بندى...شخصية ودودة اجتماعية سريعة الألفة مع الناس...قيادية لأبعد حد...بس ما كنتش متخيل انها حتمارس هوايتها فى التعرف على الناس لهذه الدرجة....فى الأخر لقيناها عند جيران صديقى بتلعب مع بنتهم.... و عرفت منه انهم يهود.....يا للعار...لكنه حكى لى انهم ناس لطاف جدا و غير المناظر اللى احنا نعرفها....يعنى البنت عملت تطبيع من ورايا...

و توكلنا على الله فى الطريق الى تورونتو wst::

...ولكن هذه حلقة أخرى

تحياتى

[ELSHAMY]

اخوانى magedghoneim & drpharma....

أشكركم جزيل الشكر ...انا حاسس جدا بمشاعركم...مش عاوز غير دعواتكم

[ELSHAMY]

أخوانى...أخواتى...السلام عليكم و رحمة الله

أخى البوب....هناك طبعا فرق بين اليهودى اللى عايش فى حاله فى أى بلد (بصرف النظر عن اللى فى قلبه) و ذلك اللى اتصهين يعنى تلبس بالفكر الصهيونى البغيض...وفى سبيل ذلك هاجر و بيقتل فى اخوانك هناك فى فلسطين.... أنا ما بقولش انهم حلوين...يكفيى ان القرأن اخبرنا عنهم و عن طباعهم و انهم مغضوب عليهم الى يوم الدين...ده مش موضوعنا ...خلى اللى فى القلب فى القلب...وفى اى مكان فى العالم ليس لك الا الظاهر...و ديننا يعلمنا ان نعامل الجميع باحترام طالما لم يستدعى الأمر غير ذلك.

أختى somayasaleh بالنسبة للمدارس الابتدائى و الاعدادى ما فيش مشكلة ...(من فضلك ارجعى للحلقة بتاعة المدارس) لكن الاولاد فى Grade 11 & 12 سمعت انهم عند الالتحاق بالجامعة لازم يكونوا عملول ما يسمى بال Volunteer hours ولها نظام معين...منها ما يمكن عمله بعد ساعات الدراسة أو فى ال weekends او فى الاجازة الصيفية......طبعا ياريت حد من الأفاضل المقيمين يعطينا فكرة أوسع عن هذا الموضوع.

الحقيقة انا بنتى الكبيرة فى Grsade 10....وهى تدرس بنظام ال SAT وهى عرفت معلومات عن الموضوع....حأرجع لها و أقولك... ايه يعنى مش عيب.....أظن انها مش حتبخل عليا بشىء.....أنا زى أبوها برضه.....بل اكتر من كده...انا أبوها شخصيا.... :)

بالنسبة للباشمهندس ابنك....ربنا يحميه...طبعا الأمر يرجع لك يا هندسة.... و نحن نتفهم كل اهتماماتك...لكن ليه ما تيصش للموضوع من واقع استفادتك انت على المستوى الشخصى...اذا هناك فرصة لتكملة دراستك...أو الحصول على مؤهل أعلى بخبرة كندية و باسبور كندى...أعتقد ان أمورك فى مصر أو أى دولة عربية حتكون الطف بكتير....و ما تقلقش حترجع تلاقى اصحابك زى ما سبتهم و برضه بيبحثوا عن عقد عمل فى الخليج ....نصيحة أخيرة...صلى استخارة ..و اترك الامر لله.

تحياتى

[ELSHAMY]

أخوانى...و اخواتى....السلام عليكم و رحمة الله و بركاته

معلش افتكرت معلومة تناقشنا فيها انا و صديقى فى كينجستون ..... وهى موضوع شحن الاثاث و مستلزمات البيت سواء من مصر أو الخليج الى كندا بعد الاستقرار...

صديقى كان له تجربة .... هو ما كنش عنده حاجات كتير تستاهل الشحن مباشرة من السعودية الى كندا.... لكن كان عنده بعض التحف و الحاجات الغالية كان عاوز يشحنها...ففكر انه طالما حينزل مصر ياخدها معاه ...و بعدين يبقى يشحنها من مصر على كندا....على فكرة الشحن من السعودية مباشرة سهل و ما فيهوش مشاكل....المهم انه اشترى صندوق كبير ...حط فيه كل الحاجات...وقال أهو ده الصندوق اللى مش حافتحه فى مصر لأنى حاستلمه و اشحنه على طول على كندا.....المهم استلمه بعد عذاب أليم من قرية البضائع....و راح يسأل ازاى يشحنه لكندا....هاهاهاهاهاهاها...مش قادر اقول لكم الراجل جرى له ايه من الروتين الممل عشان يحاول يشحن واحد صندوق فقط ...كمية أوراق...واذون...وموافقات... و امضاءات....وفى الأخر ياريت كل ده نفع....قالو له لازم تجيب اذن تصدير....يعنى ياخد رخصة تصدير...لأنه يصدر تحف خارج البلاد.... :) .....وعارفين رسوم التصدير لهذا الصندوق كام ؟ فقط 10000 جنيه.....كان هاين عليه يفتح الصندوق و يكسر كل اللى فيه على دماغ اللى قدامه....و صرف نظر نهائيا عن الموضوع....وانا شفته الحقيقة عايش سعيد جدا....حتى من غيرما يشحن الصندوق....

تحياتى

[ELSHAMY]

الأخوة الأعزاء...السلام عليكم و رحمة الله

حلقة جديدة من المسلسل...

حلقة ال week end لازم تكون كوميدية شوية...عشان تقضوا اجازة سعيدة.

.......خرجنا من كينجستون قبل المغرب بساعة....الجو كان جميل والشمس طالعة...بس الحرارة كانت حوالى 5 تحت الصفر....ركبت النافيجاتور....(نسيت اقول لكم انى كنت بأخد النافيجاتور معايا لما أركن العربية فى أى مكان عشان محدش يهبشه ).... و بالليل كان كل يوم ينام فى حضنى...كنت باتعامل معاه كأنه ابنى بالضبط....يمكن أكتر.... :sad:

...توكلنا على الله...و دار الحوار اللى انتو عارفينه.....ولد يا نافيجاتور...تورونتو لو سمحت....و رحت كاتب له عنوان الفندق...وكان فى شارع اسمه (بامبركين)....بجوار حديقة اسمها (ألين) .... أمرك يا باشا....و طبعا كنا خدنا على بعض انا و الولد النافيجاتور....و لقيته بيقول لى: ريح انت بس يا باشا... و كله تمام....طريق السلامة...سكتك خضرة (قصده بيضا)... تهيؤات.

و انا فى الطريق سرحت كالعادة لو ان أحد المصريين كان معاه هذا الجهاز فى شوارع القاهرة الزحمة اللى ما لهاش معالم ولا خريطة أصلا ...كان ممكن يكون الحوار ازاى بينه و بين النافيجاتور:

المصرى الغلبان: لو سمحت يا استاذ نافيجاتور ممكن توصلنى ؟

النافيجاتور: اصطبحنا و اصطبح الملك لله...فيه ايه تانى عالصبح ؟ انت مش كفاية اللى عملته فيا امبارح...عاوز ايه ؟

المصرى الغلبان: أنا الحقيقة عاوز أروح عين الصيرة ...و بعد كده أرض اللواء...و نرجع عن طريق شبرا على الشرابية

وهنا يرتجف النافيجاتور عند سماع كلمات المصرى...و يبدأ ينور أحمر و أصفر....و تظهر على الشاشة...كلمات غير مفهومة....بعضها شتيمة....ويقول بصوت متهدج:

ايه يابا البلد اللى انت جبتنا فيها دى ؟....دى مش موجودة عندى و لا حتى فى الميمورى....عموما نحاول....

ويبدأ النافيجاتور فى الهمهمة

....امشى على طول...

حاسب الحمار اللى قدامك....

خلى بالك فيه واحد بيعدى الشارع بقفاه...

الاوتوبيس ده شكله حيركن فى وسط الشارع.....

عربية سرفيس حتقطع عليك الطريق....

حيوان بيجر عربية عليها خضار حيطلع يحك لك العربية....

اقفل الشباك اللى جنبك...واحد حيخطف منك الموبايل....

الله يخرب بيتك انت جبتنى فين....انا مش ملاحق.....

يا بنى انت عاوز حاوى مش نافيجاتور...رجعنى لأمى الله يخليك...

ثم يرتجف النافيجاتور....و كأنه بيطلع فى الروح....ويقول بصوت مرعوب قبل ان يلفظ انفاسه الأخيرة:

....حضر رخصك... :) لجنة يا باشا.....

وهنا صحيت من السرحان....كابوس.

تحياتى

[se_ Elsyed]

الله يخليك يا دكتور شامي

يارب تحج يارب

كمل مسلسل " نافيجيتور في المحروسة " وركز عالحته بتاعت أمين الشرطة ضرب النافيجتور على قفاه وجرو على تخشيبة النفيجتورات في قسم الوايلي

عارف إني ما عيطتش في المسلسل ده غير عند الحتة بتاعت التأمين الصحي وإن إزاي لو الدكتور من دول جاب عصير طماطام للمريض مع إنه طالب كوكتيل يقوم المريض رازع الدكتور بالقلم وذلك كان أثناء مرور مدير المستشفى اللي كان معاه وفد من وزارة الصحة المصري فلما حاتم الجبلي لفت نظر المدير إن في عيان بلطجي ماسك مطواه و بيغز بها الدكتور ، راح مدير المستشفى قال له : سيبوا المريض من حقه يأدب الدكتور .. بقى واحد طالب كوكتيل ساقع ومشبر .. يقوم بمنتهى الإهمال يجيب له عصير طماطم ... يستاهل ينضرب ولا لأ ؟

هنا عيطت وانتحبت لدرجة إن مراتي والعيال إتلموا عليه وقالوا لي : مالك يا بابا ؟ خلاص مش عايزين شربات وفالنات جديدة وهانقضي الصيفية دي ببواقي الشتوية .. عشان شكلك مزنوق وإحنا أخر الشهر ... قلت لهم لأ يا ولاد الموضوع مش له علاقة بالشربات خالص .. لكن كلام عمكو الشامي فكرني بالمرحوم أبويا ( اهو أي حجه والسلام عشان أخلع من موضوع العياط بدل لو حكيت لهم موضوع المشتشفيات بتاعت كندا هايقولوا بابا بقى يتفرج على افلام خيال علمي )

تفتكر يا دكتور إحنا ليه بنعمل في نفسنا كده وليه الحكومات بتاعتنا بتعمل فينا كده وكده وليه إحنا وصلنا لكده وليه هما بقوا كده مع إنهم مش مسلمين وكده لكنهم أحسن أخلاقياً من مليار مسلم كده وكده ؟

------------------------

انا بصراحة اذا سافرت الرياض لازم اقابل حضرتك واتعرف عليك ان شاء الرحمن

يا أخ مديح الدكتور من ساعة ما رجع من كندا وهو قاعد مع النافيجيتور ليل نهار يكلمه وياخد ويدي معاه في الكلام ... وما بقاش يقابل حد ولا يكلم حد ومكتفي بصداقة الفنافيجتور فقط ..

على فكرة هو بيعتذر لك إنه مش هايقدر يقابلك

لإنه اساساً في جده مش في الرياض