الشامى رجع من كندا يا رجالة

[ELSHAMY]

السلام عليكم ورحمة الله

كده برده يا دكاترة متردش علينا هو النيفجاتور ده أخدك مننا ولا أيه شكلى كده هأسرقه منك

أخوك محمد بتاع دسوق من ليبيا

أخى(محمد) اللى من (دسوق) وقاعد فى (ليبيا) وعايز يروح (كندا)....وحبيبى ساكن فى (الحسين)... wst:: أوامرك انت ما سألتش حاجة عشان ارد عليك.

تحياتى

اخوك (الشامى) اللى من (اسكندرية) و قاعد فى (السعودية) و رجع من (كندا)...يا رجالة

[ELSHAMY]

]

يا أخ مديح الدكتور من ساعة ما رجع من كندا وهو قاعد مع النافيجيتور ليل نهار يكلمه وياخد ويدي معاه في الكلام ... وما بقاش يقابل حد ولا يكلم حد ومكتفي بصداقة الفنافيجتور فقط ..

اخويا سى السيد...انت كده حتدى فكرة للقراء انى اتجننت وباكلم النافيجاتور طول الليل.... :) لعلمك النافيجاتور بينام بدرى...و بنخلص كلامنا على السعة حداشر بالكتير ...وبعد كده ننام... wst::

بلاش اشاعات لو سمحت...خلينا نكمل المسلسل على خير wst::

[ELSHAMY]

لما كنت فى السفارة الموظفة اللى أستلمت منى application سألتها أمتى أستلم الفيل نامبر فأعطتنى ورقة من الطباعة مكتوب عليها

receipt:...........

file ID:.............

client:............

وفهت منها أن ده هو الفيل نبر

وعندما قمت بأدخاله فى الصفحة المخصصة على الموقع قبله وقال أنه ممكن يكون فى طور البداية

ممكن تفدنى أكثر وشاكرين على وقتك الغالى

اخى محمد تشرفت بمعرفتك.... الحقيقة مش حاقدر أفيدك أكتر...كما قلت لك من قبل ده لسه أول الطريق...وواضح من مداخلات الأخوة اللى فى نفس المرحلة دى انك تنسى الموضوع شوية و ما تقلقش....بس تابع على فترات زى ما عملت...وربنا يوفقك

[ELSHAMY]

السلام عليكم ،

استاذ الشامي، اتابع مسلسل حضرتك الشيق، جزاك الله كل خير على سرد تجربتك بهذا الاسلوب الجميل.

عندي سؤال لحضرتك: ماذا عن حجز الفندق، هل قمت بالحجز مسبقا على الانترنت قبل الوصول لكندا، الحقيقة الموتيلات و الفنادق كتير اوي اوي مش عارفين نختار على اي اساس. و يا ترى ايه اخبار الاسعار؟ احنا يمكن يكون لسه امامنا اربعة اشهر على الاقل و لكن نقوم بالبحث و الاستعداد من الان.

شكرا مقدما.

الأخت العزبزة Queen انا قمت بحجز الفنادق عن طريق النت قبل السفر بمدة كافية...لو ان رحلتك واضحة المعالم من دلوقت...أنصحك تحجزى بدرى ....

الأسعار طبعا زى ما انتى عايزة....كله موجود...ممكن الموقعين دول يفيدوكى:

www.booking.com

www.expedia.com

طبعا انا كنت عارف بالضبط انا باحجز فين بعد دراسة مستفيضة للمدينة اللى حاستقر فيها...يعنى مثلا ..كنت باعرف انى قريب من محطات المترو أو المواصلات العامة...كنت عارف كمان الأماكن اللى ناوى أزورها...و عن طريق google earth كنت باعرف انا فين بالضبط...لدرجة انى ما كنت احتاج خريطة للتجول فى بعض المدن....عاوز أقولك انى قعدت فى الموضوع ده يمكن 4 شهور لحد ما تشبعت بالمعلومات....

الله يوفقكم

[ELSHAMY]

الأخوة و الأخوات الأعزاء

السلام عليكم و رحمة الله

حلقة جديدة من المسلسل اللى مش عايز يخلص....هانت استحملونى

وصلنا لحد ما صحيت من الكابوس....وهنا نظرت الى النافبجاتور و لقيت شاشته كأنها بتقولى:

(احيات أبوك يا شيخ ما ناخدنى معاك لو رحت مصر) على طول رديت عليه:

انت ازاى تقول كده على مصر...يمكن عندك حق ...اصلك ماشربتش من نيلها......و ما مشتش فى نواحيها...ولا تهتش فيها...

و هنا تذكرت انه ياما وقف معايا وقفات رجولة...و ياما كنت تايه و دلنى على الطريق....و ترقرقت الدموع فى عينى و قلت له: "خلاص يا عم وعد و لا تزعل"........بس عشان يوصلنى تورونتو....

وصلنا مشارف تورونتو و كان الليل أرخى سدوله (حلوة دى)...وظهر من أضواء تورونتو و مبانيها انها مدينة ضخمة مقارنة بأوتاوا....تورونتو سكانها حوالى 5 مليون...و حسب ما سمعت ان الحكومة توجهت الى جعل تورونتو العاصمة الاقتصادية _ وذلك بايعاز من أمريكا - بعد ما مونتريال بان منها الغدر و حبت تنفصل بقاطعة كيبك عن كندا...ولذلك كات هذا التوجه لسحب معظم الاستثمارات و المشاريع من مونتريال و تحويلها الى توروتتو.

وبعد شوية كبارى على انفاق...قال النافيجاتور...حمدا لله على السلامة ياباشا وصلنا الفندق...وقبل ما أقوله شكرا لقيته بيقول لى : قهوتنا يا باشا ربنا يخليلك الاولاد...مش باقولكم بقى نافيجاتور مصرى...

الفندق من بره شكله ما يسرش حبيب...ولما دخلنا الاستقبال اكتشفنا انه ما يسرش عدو و لا حبيب......انا كنت حجزت الفندق من على النت ...والحقيقة شكل الصور اللى شفتها و الامكانيات اللى قريتها مختلف تماما عن اللى شفته امامى...كانت ميزته الكبرى انه على بعد امتار من شارع "دنداس".... و هو شارع هام وبيوصل لشارع "يونج"...أطول شارع فى العالم (حسب ما يقول الكنديين)....لكن ما علينا شكلنا اتدبسنا ... و على الاقل حنقضى الليلة الاولى فيه....طبعا مأساة تنزيل الشنط فى التلج اتكررت و طبعا كان لازم أعمل كده لوحدى انا و الاولاد لأنه حتى ما فيش حد يساعد من الفندق...كل موظفين الفندق عبارة عن 3 أفراد....من الأخر مكان فقير و حقير.

سألت و عرفت ان فيه جراج قريب من الفندق....الليلة لحد الصبح ب 12 دولار....ركنت العربية و رجعت لقيت الاولاد استلموا الغرف...دخلت على الموظف الوحيد اللى واقف فى مكتب الاستقبال الحقير و أمامه شاشة الكمبيوتر....و نظرت اليه نظرة تحمل كل معان انطباعى عن الفندق و احتقارى له....

نعم يا سيدى انا الشامى....لأ مش سعودى...مصرى (طبعا و أبويا مصرى...انتو عارفين الباقى)...محجوز عندك من على النت...نعم حاجز سويت ( يعنى جناح للأخوة اللى لسه بياخدوا كورسات انجليزى)....

و المصيبة التانية كان عدم وجود سويت (يعنى جناح) فى هذه الخرابة......و كان رأيه اننا ناخد غرفتين منفصلتين لحد بكرة ربنا يحلها...طبعا مع التعب و الارهاق و عدم وجود حلول أخرى...وافقت...وعرفت بعدها لما شفت الجناح (يعنى سويت) ان الواحد طالما لا يعلم الغيب لازم يحمد ربنا على الموجود.....

الغريب ان الفندق على حقارته كان زحمة جدا...ناس داخلة و ناس طالعة...بس معظمهم شباب....وهكذا كان انطباعنا عن تورونتو فى أول ليلة انطباعا مهببا....وحسيت ان كندا سجلت أول أهدافها فى مرمى الشامى...كده النتيجة بقت 2/1 ...

يا ترى الشامى حيسكت؟ .....ده اللى حنعرفه فى الحلقة القادمة

تحياتى

[ELSHAMY]

السلام عليكم ورحمة الله اخي الشامي

انا عندي ليك كام سؤال لو مفيهاش ازعاج.

1 - ياتري الوقت اللي بياخده الباسبور علي ما تنطبع فيه الفيزا ويرجع مرة تانية بيكون كام يوم؟

2- يا تري ايه الاوراق اللي بتجي مع الباسبور؟

3- وايه هي المدة اللي بعد اللاندينج بناخد فيها بطاقة الاقامة الدائمة؟

4- حالة الملف علي موقع الهجرة امتي بتتغير لانها الي الان عندي مازالت in process ?

5- رقم التليفون اللي سألت حضرتك عليه وقلتلي هبعتهولك الي الان موصلش؟

وكفاية كده بقة تقلت عليك.

ولا يهمك يا فندم..

1- 30 - 40 يوم

2- بتيجى مجموعة أوراق مكربنة لكل فرد على حدة...و يجب مراجعة البيانات المكتوبة فيها وتكون مطابقة لبيانات الباسبور...و كمان يجب مراجعة بيانات الفيزا المطبوعة فى الباسبور.

3- حوالى شهر

4- تتغير حالة الملف لما تتغير حالة الملف :lol:

5- رقم التليفون حابعتهولك على البريد الخاص

مبسوطة ؟...تحياتى

[ELSHAMY]

اخوانى ...أخواتى...السلام عليكم و رحمة الله

الحلقة الجديدة

""""طبعا الشامى ما سكتش...بس يعمل ايه فى هذا المكان ...مش مصدق ان ده يكون استقبال تورونتو له فى أول يوم....معلش ياتورونتو......الصبر طيب.

وأخذت الباسبورات من امام الموظف و انا باتمتم ببعض الكلمات اللى مش فاكرها لكن لا يخرج معناها عن كثير امتنانى لشكل الفندق ...و الموظف اللى أصر انه ياخد فلوس الاقامة بالكامل مقدما.....كمان ...على ايه...نازلين فى الفور سيزونز ياخى.

المنظر كان فى الاستقبال كالأتى: ...صالة ضيقة جدا ممكن تعتبروها ممر...وكاونتر الاستقبال نفسه كان صغير لدرجة انه ما يكفيش غير زبون واحد......حاجة كده تشبه لوكاندة "صابر" للنوم فى مجطة مصر فى اسكندرية.....و فى المدخل فيه كنبة جلد قاعد عليها شابين و شابة بيتمرقعوا مع بعض ...و على حجر كل واحد منهم لاب توب...مش عارف بيعملوا ايه....لكن ضحكاتهم بتطرقع فى الصالة كل شوية....ويتفرع من هذا الوكر ممر طويل تفتح عن يمينه غرف الفندق.... وفى أخر الممر فيه سلم طالع و سلم نازل للدورين الاول و تحت الارضى....الممر كان ضلمة....و حسيت ان المكان ده مش ناقصه غير فردتين كاوتش معلقين على الحيطة...وكام قفص مرميين على الأرض...على كام حبل....مع توفيق الدقن ومحمود المليجى و يبقى ده وكر العصابة i*: .... :)

...ومما زاد الطين بلة (حلوة بلة دى)....ان الغرف ماكنتش جنب بعض...يعنى بينى و بين غرفة الاولاد فيه غرفة فى النص....المهم رحت اتطمنت على الاولاد...لقيتهم طبعا مش عاجبهم الحال....الاوضة ضيقة....يعنى وانت داخل يادوب تخطى خطوة و التانية لازم تكون فوق السرير.....الشنط يادوب غطت الاماكن المتاحة من أرض الغرفة....و اللى يضحك ان لون ستاير الغرفة نفس لون فرش السرير....الهيلتون يا خى.

"خلاص ناموا دلوقت و بكرة ربنا يحلها...بلاش دوشة عشان فيه ناس جنبكم" ....هكذا كانت اوامرى للأولاد اللى حاولت اخليها صارمة....طبعا هيهات... :closedeyes:

رجعت غرفتى...و قعدت على طرف السرير...وسرحت...."كده يا كندا....تعملى فى الشامى كده....وانا اللى جاى و فاتح لك دراعاتى وصدرى....معلش...لسه الرحلة ما خلصتش"....

حاولت أعصر دماغى هو انا دفست البيجاما فى انهى شنطة....مشكلة....و رسيت فى الأخرة على انى نمت بملابس "التنس" :lol:

نسيت أقول لكم ان الشامى نومه صعب جدا...وخفيف جدا....يعنى مشكلتى الكبرى انى أعرف أدخل فى النوم.....ساعة النوم كل الافكار و المشاكل و البلاوى تسيطر على مخى و يتملكنى الأرق و معرفش انام غير بعد قراءة الاذكار .... و ساعات الواحد يختم القرأن قبل ما عينى تغفل شوية....المصيبة التانية انى اذا نجحت هذه المحاولات و نمت....ممكن أصحى من صوت قطة ماشية فى الشارع اللى بعدينا....واذا صحيت ...صعب جدا أدخل فى النوم تانى.....ما علينا....هذه مقدمة عشان تعرفوا حجم المأساة اللى حصلت بعد كده....هما الحقيقة مأساتين....واحدة من الحيطة اللى جنبى....و التانية من تحت السرير...... :lol:

ترقبوا الحلقة القادمة......ليلة الرعب فى تورونتو.... :unsure:

تحياتى

[ELSHAMY]

:D أخوانى...أخواتى...السلام عليكم و رحمة الله

....كان الأرهاق قد بلغ منى أيما مبلغ (حوالى 100 دولار bv:- ) ....وبدأ النوم يداعب جفونى.....قلت حلو أما استغل هذه المداعبة و أدخل فى النوم بسرعة قبل ما دماغى تشتغل و ما أعرفش أوقفها....كان يوم متعب بدأناه من أوتاوا صباحا الى تورونتو مساءا مرورا بكينجستون.....

وبدأت جفونى تتقل...حلو...وسرحت....وتخيلت انى سامع ناس ببتكلم....وبعدين يسكتوا شوية...باين عليه حلم...هانت دخلنا فى النوم....أصوات جاية من بعيد.....ميزت منها صوت خرير الماء....كأن الميه بتجرى تحتى فى جدول أو نهر صغير bv:- ....حسيت انى حأبدأ أحلم بالجنة....وبعدين ميزت صوت رجالة بتتكلم....حوار جاد bv:- ....يكونوش الملايكة اللى حياخدونى الجنة...احتمال.....طب ليه بيتكلموا انجليزى ؟ :sad: .....اما انك غبى....انت فى كندا يا بنى أدم ....عاوزهم يتكلموا ايه ؟

...وبعدين الحوار سخن...وبدأوا يصرخوا... :D .وكمان صوت المياه بدأ يبقى أعلى ....و كأنها شلالات نياجرا (مع انى كنت لسه ما شفتهاش) ....لأ بقى ده مش حلم...ونطيت من السرير مفزوع wst:: ....ولقيت نفسى لسه سامع الحوار....وكان مصدره الحيطة اللى جنبى....أما الميه فكان صوتها طالع من تحت السرير... wst::

وبعد ما فقت (ما كنتش نمت أصلا)....طلع الاخوة فى الغرفة اللى جنبى اللى بتفصلنا عن غرفة الاولاد كانوا بيتناقشوا (تقريبا فى مشكلة السلاح النووى الايرانى)......طب دى و عرفناها.....انما منين صوت الميه ؟...وليه تحت السرير ؟....يكونوش حاطين ال :D تحت......؟؟!!!

وبعد بحث و تمحيص للغرفة اكتشفت انها مواسير التدفئة.... وكانت طبعا خربانة و داخلها الهوا....فكانت طول الليل بتكركر....عرفت انها ليلة مش فايتة....ويمكن عينى غفلت قبل النهار ما يشقشق.

كده يا تورونتو....تعملى فى الشامى كده فى أول يوم....حتشوفى الشامى حيعمل ايه....ان ما كنتش انيمك من المغرب يا تورونتو ما ابقاش الشامى....

صحيت دماغى مقلوبة و متعكنن من قلة النوم...وكان أول رد فعل طبيعى انى اروح للأخ بتاع الاستقبال عشان ياخد نصيبه من العكننة...

نسيت أقول لكم ان الغرفة ما فيهاش جهاز تليفون...بس الفيشة موجودة....أهم حاجة النظام....و الريموت بتاع التليفزيون مش شغال....ما علينا....رحت الاستقبال و انا مفعم بكل هذه المشاعر....

يا ترى الشامى حيعمل ايه مع موظف الاستقبال ؟ و مين فيهم اللى حيتعور الأول ؟

ده اللى حنعرفه فى الحلقة الجاية

تحياتى

[ELSHAMY]

الناتيجة بقت 2-2 ياريس

يعجبنى شباب المشجعين اللى مصحصحين...لازم كلكم تقفوا ورا الشامى لحد ما يعدى من الأزمة دى وما ينزلش درجة تانية...

أخوكم الشامى كبير مشجعى الاتحاد السكندرى

[ELSHAMY]

اخوانى ...أخواتى الأعزاء

السلام عليكم و رحمة الله

الشامى مش ممكن ينكسر طول ما وراه جمهور وفى أمثال مصرية و مغتربة و المر و hosiny و somayasaleh..... ما تخافوش على الشامى يا جدعان....الشامى منكم و بكم و لكم.....خلوا شعاركم دايما (احنا اخترناك و حنمشى وراك) و حتشوفوا اللى حيجرالكم....ان ما كنتش أغرقكوا.....فى النعيم طبعا.... f((:

...طبعا كان وصل بى الغضب و العكننة أى مبلغ (200 دولار).. :big_boss: ...و توجهت لمكتب الاستقبال عشان اشتكى من الغرفة و الفندق و العيشة و اللى عايشينها.....لكن للاسف لقيت موظف الاستقبال اتغير...(امه داعياله).....و حكيت للموظف الجديد كل الحكايات....تأسف.... و لكن لمحت فى عينيه كأنه عارف كل الحاجات دى...وبيقول فى نفسه (كويس انه ما شافش بقية البلاوى)....

صحيت الاطفال...و بدأت الاستعدادات لغزو تورزنتو من قبل الجيوش الشامية :lol: ....زى ما انتم عارفين الشامى مجروح ....وبعد ما ذاق لذة النصر فى الايام الأولى للغزوة...بقى صعب عليه انه يذوق طعم التعادل....فما بالكم بالخسارة.....وهنا تذكر الشامى كل محبيه...الاصدقاء....الأقارب...الجيران...قراء منتدى المصريين....كل الناس اللى بتدعيله و مستنياه على أحر من الجمر ...أرجع أقولهم ايه ؟....اتهزمت يا رجالة.....الشامى انهزم فى تورونتو بالانجليزى يا رجالة....ده مش ممكن يحصل أبدا... وختمت السرحان بتاعى كالعادة بأغنية وطنية....وكانت المرة دى أغنية...حابطل السجاير.... :huh:

...بعد شوية لقيت حد بيخبط على باب الغرفة وبيقول حاجة مش فاهمها.....فتحت الباب لقيت راجل شكله من الناس اللى كانوا بيطلعوا ورا عادل أدهم و هو رئيس عصابة :wub: ....واخد مطوتين فى وشه...وبيحاول يبتسم وهو بيقول Maintenence Sir...وفهمت انه بتاع الصيانة....شال السرير...وحاول يصلح فى المواسير اللى بتكركر....و يروح الحمام...كان عمال يشتم و يسب فى الشركة اللى ركبت المواسير عشان هم السبب فى دخول الهوا داخل المواسير....وكان الحل الأخير....انه لغى وصلة المواسير من أساسه.....على فكرة هذا الرجل بالاضافة لعمله كسباك بيصلح تليفونات....وبيدهن الحيطة....ويصلح الريموت...وفهمت انهم بعتولى مدير ادارة الصيانة شخصيا..... :lol: .

بعد شوية كل الميليشيات كانت جاهزة ....وانطلقنا للشوارع.....الجو كان برد جدا...جدا....ودايما مش عارف ليه بتكون ساعات الصباح الأولى أبرد من أى وقت تانى حتى بالليل....ممكن فقهاء القانون فى كندا يبقوا يشرحو لنا ايه السبب.... كانت الخطة اننا نروح أولا على CN tower....ونشوف ايه حكاية أعلى برج فى العالم....الواحد مش عارف يصدق مين فى الموضوع ده....لما كنت فى دبى شفت مبنى قالوا عليه ده الأعلى....ولما كنت فى كوالا لامبور فى ماليزيا...طلعت ال Twin tower وقالوا انه الأعلى.... ما علينا كله حيبان... رحت أجيب العربية من الجراج و كانت متغطية بالتلج....ركبت الوله Navigator حبيبى..... يلا يا أبو الشباب CN tower لو سمحت.....عيونى يا باشا....صباحك عسل....شديت نفس جامد (من الهوا الطلق لأحسن حد تفكيره يروح بعيد).... و قلت له توكلنا على الله...

انا حاوريكى يا تورونتو...وبدأت الغزوة المباركة.. wst:: .

تحياتى

[ELSHAMY]

أخوانى....أخواتى....السلام عليكم و رحمة الله..

....وصلت جحافل الجيوش الشامية الى مشارف CN Tower.... كان البرج يظهر على استحياء من بين المبانى العالية المحيطة به.... كان (تورونتو) قائد الفرنجة قد جمع ما تبقى من حامية المدينة و عملوا كمين للشامى تحت البرج.... :lol:

الشامى لمح الكمين ...كانوا مجموعة من الجنود الخرعين...اللى شعره أصفر...واللى لابس لى بنطلون وسطه واقع...واللى حاطط لى سماعات أى بود فى ودانه....وكان قائدهم تورونتو داهية فى الحرب كما هو داهية فى السلم...فكان مستخبى

طبعا استخدام التكنولوجيا فى الحروب مش عيب......فكان ان أمر القائد الشامى الوله نافيجاتور انه يشوف له تورونتو مستخبى فين.... قال له مستخبى ورا ماكدونالدز ياباشا هو ومجموعة من العساكر بياكلوا فراخ من اللى بيوزعوها ببلاش ...

وهنا تذكر القائد الشامى ان (تورونتو) ده ابن بلده واسكندرانى قديم و كمان ساكن فى حى (شدس).... قبل ما تاخده الجيوش الرومانية و الرومية (الايطالية) و تعمله قائد لفرعها فى كندا.

" وله يا نافيجاتور...شوف لنا ركنة...دول باين عليهم مش حايجيبوها البر"....ركنت السيارة ...ونزل الجنود الشوام البواسل الى أرض المعركة ...وسط دعوات أمهم بالنصر المبين...

الجو كان برد جدا....جدا...جدا...

فكر القائد الشامى جيدا قبل ان يقوم بالهجوم النهائى انه يعمل حركة جدعنة مع تورونتو و يرسل له مرسال :lol: ...يمكن يلم الدور... ويسلم البرج... أختار القائد الشامى البنت (ندى) الصغيرة و بعت معاها رسالة وقال لها روحى ورا ماكدونادز حتلاقلى قائد الجيش...سلميه الرساله دى....وهاتى بالمرة شوية سندوتشات(سمك حلال) و شيبسى عشان الجيش يفطر...

أمسك تورونتو بالرسالة بايده الشمال :lol: و كان فيه ورك فرخة (من اللى ببلاش) فى ايده اليمين...وقرا:

" من الشامى قائد الجيوش الشامية...الى تورونتو قائد الفرنجة....

....صبح...صبح يا عم الحاج...لم الموضوع و سلم البرج...أحسن أخلى اللى مايشترى يتفرج عليكو....مع السلامو عليكو "

هنا استشاط (تورونتو) غضبا....وأمر جنوده انهم ياحدوا البنت ندى أسيرة حرب....

انتفض النافيجاتور و هو يقول للقائد الشامى..."الحق يا باشا...ندى أتأسرت"....قال الشامى و هو يجمع جنوده..." على نفسها جنت براقش.....الا ندى...يللا بينا يا رجالة"

كان تورونتو يجلس وسط جنوده يضحكون و يغنون:

"كندا هى أمى......نياجرا هى دمى....تلجها فى بياضى....." و قد لعب البيبسى :lol: و الشيبسى (اللى أسروه مع ندى) بعقولهم.... وهنا هجم الشامى و جنوده البواسل على جيش الفرنجة...وكان نصيب تورونتو عضة فى مكان حساس من الولد (على) أصغر جنود جيش الشامى انتقاما لأخته المأسورة....وتم تحرير جميع الرهائن....وتفرق جنود الفرنجة فى الحوارى اللى حوالين البرج....ورجع (تورونتو) الى مسيساجا وحلف انه ما يعملها تانى...

خرج الرجل مدير البرج مستسلما و ماسك فى ايده منديل أبيض :lol: ...وصافح الشامى...وسلمه مفتاح البرج قائلا:...مبروك عليك...انت من الأن قائد البرج....تقدر تدخل انت و حبايبك فى أى وقت من غير تذاكر...وكمان تقدر تروح فى أى مكان فى كندا فى أى وقت....براحتك ياباشا.....وهنا صاح جنود الجيش الشامى...(الله أكبر ولله الحمد) :lol: ....فقال لهم قائدهم...."بس يا وله منك له...لأحسن يكون فيه أمن مركزى مستخبى فى أى حتة..."

وكافأ الشامى جنوده بكيس فيشار لكل جندى :lol: ....وأعلن الشامى عن تسجيل هدف و لا أحلى وبقت النتيجة 3/2

وبدأت رحلة صعود البرج

تحياتى

[ELSHAMY]

الاخ ELSHAMY

انا عندي احساس ان الهدف الاخير غير صحيح OFF SIDE يا باشا و الـ LINE MAN كان رافع الراية و الحكم ايدالك كارت اصفر :sad: بالاضافة الى ان فريق تورونتو الفرنجي لم يلتحم بلعبة مباشرة و ياريت نشوفها بالاعادة عشان نتأكد غير ان الفيفا لم تعطي الفريق الشامي التصريح النهائي باللعب على الاراضي الكندية

أخى أحمد صالح...واضح انك من المشجعين المتعصبين للفريق التورونتاوى....الهدف صحيح بلا أدنى شك...وهذا ما أكده الاستوديو التحليلى بعد المباراة....ولو مش مصدق ممكن تحلل فى معمل تانى....عموما مرحبا بك وسط اخوانك محبى الشامى....وانتظر الهدف الرابع...

ملحوظة: الشامى معاه تصريح رسمى باللعب فى الاراضى الكندية وكمان فى نادى سيون السويسرى

تحياتى

[ELSHAMY]

أخوانى...أخواتى...السلام عليكم و رحمة الله

الحلقة السابعة و الثلاثون بعد المائة الثانية من المسلسل المشوق.

دخل الشامى و من وراءه جيشه المظفر الى البرج و قد اصطفت البنات اللى بيقطعوا التذاكر على جانبى الممر و هم ينثرون الورود على الجيش المنتصر..... :lol:

واختار الشامى قائد الجيوش واحدة من البنات الاسيرات .....وسألها: (انتشى مرتبطشة ؟) بالكندى يعنى انت مرتبطة...وهنا لم يكمل القائد سؤاله حتى شعر بوخز سيف (أم على) ...سيدة كندا الأولى...فى ضهره ......فعمل نفسه بيضحك... angl:: وقال للبنت الأمورة: ( من فضلك عاوز 6 تذاكر)....

طبعا الشامى عادته -كعادة أسلافه من القادة العظماء الفاتحين - ما يحبش النطاعة ولا الاستهبال ومش عشان يعنى انتصر يقوم يدخل البرج ببلاش..لازم نكون قدوة فى تصرفاتنا....ودفع الشامى تمن التذاكر ...زى أى زبون عادى ...بس اتفق مع مسئول البرج ان نسبته من تمن التذاكر من هنا و رايح تتبعتله بشيك مصرفى كل أخر شهر....الحق حق.

البرج ارتفاعه 447 متر...ولما الميجور (على) عرف المعلومة دى ...نصح القائد انه يطلع فى الأسانسير pps: ...البرج كله على بعضه مبنى من 30 سنة...وعند الاخوة الكنديين اصرار انه يكون عجيبة الدنيا الثامنة...وده حتلاقيه مرسوم فى مدخل البرج من تحت...البرج مبنى على قاعدة ثلاثية...وهذا هندسيا أحسن التصاميم اللى تخليه يصمد امام الريح خصوصا فى الادوار العليا.

الدور الاول من البرج يطل على مدينة تورونتو باطلالة بانورامية رائعة....تورونتو فعلا كبيرة جدا...البرج قريب من الحدود الجنوبية لمدينة تورونتو قريبا من البحيرات العظمى....و يقال ان فى الايام الصافية من غير سحاب تقدر تشوف مدينة نيو يورك و شلالات نياجرا بوضوح....

هذا الدور كمان فيه جزء أرضيته زجاجية...يعنى منك للشارع...و طبعا لازم تتحلى بقدر من الشجاعة عشان تخطى الخطوة الأولى وتقف على هذه الأرضية...طبعا الأولاد تفننوا فى أخد الصور فى هذا المكان...اللى نايم واللى قاعد.....و يوجد ايضا فى نفس الدور مطعم و كافيتيريا.

المنظر كان بديع...بس اللى أبدع منه كان الدور اللى بعده على ارتفاع 37 دور من الدور الاول....طبعا له تذكرة خاصة...وفعلا ظهرت لنا تورونتو بشكل أكبر...وكانت بقع التلج ما زالت طافية على البحيرات العظمى.....أسفل البرج فيه مبنى دائرى ضخم يشبه قاعة الصالات المغطاة اسمه Rogers Center....وله سقف متحرك كبير...يومها كان فيه عرض تزحلق على الجليد من عروض ديزنى....هذه الصالة حسب ما قرأت فى أحد مداخلات الفاضل - المختفى - ايهاب سالم انها فتحت للمسلمين لأداء صلاة العيد....شعور جميل و تصرف راقى من الفرنجة.

وكان هناك أيضا عرض سينمائى لمراحل انشاء البرج اللى فكرته الاساسية هو انه برج للاتصالات...وحضرنا أيضا عرض Similator ...وبعدين جاء الدور على ال Gift Shop فى الدور الأرضى....وفين يوجعك يا شامى...

قبل ان نودع البرج و عند انتهاء الزيارة...جالى واحد كندى غلبان لابس طرطور و شايل فى ايده بخور ...وقال لى : (روح يا بنى الهى ينصرك...خلصتنا من حكم تورونتو و أعوانه...انت ما تعرفش كانوا بيعملوا فينا ايه)....فرت الدمعة من عينى :cry: و طبطبت عليه و قلت له: (ده أقل واجب ياوالدى....دعواتك معانا)...

وبدأت رحلتنا يرجع لها طعمها الحلو تانى....و كندا اليوم فى عيد... mil:

الى اللقاء مع الشامى فى متحف الهوكى.

تحياتى

[ELSHAMY]

اخوانى ...أخواتى الأعزاء

السلام عليكم و رحمة الله

قيل لنا ان متحف الهوكى على بعد خطوات من البرج و انه من المعالم الهامة للزيارة....الحقيقة كان مشوار بالنسبة للجيش...خصوصا ان الجندى (على) كان تعب من معركة البرج و عاوز حد يشيله...المهم وصلنا المتحف و لما دخلنا عرفنا قد ايه موضوع الهوكى متغلغل فى التراث الكندى العريق....و بمناسبة العراقة فيه معلومة هامة لازم تعرفوها و هى ان كندا كلها على بعضها عمرها كام ياترى ؟....تخيلوا 60 سنة فقط.....أول باسبور كندى كان سنة 1947 وكان احتفال كبير السنة اللى فاتت بمرور ستين سنة على هذا الحدث.....يعنى الشامى لو كان اتجوز بدرى شوية كان جاب بنت قد كندا.....

انهينا زيارة المتحف على السريع عشان مرارتى كانت حتتفقع....ورجعنا الى مكان السيارة عن طريق محطة السكة الحديد اللى فيها ممر داخلى طويل يعبر بك الشوارع و يوصل لحد مكان البرج...

اتصلنا بأصدقائنا فى مدينة لندن أونتاريو و اتفقنا على اننا نزورهم تانى يوم.

ولد يا نافيجاتور عاوزين شوبينج سنتر كبير...وكان اقتراحه علينا اننا نروح Eaton Center

لأننا كنا ماشيين فى شارع يونج.

المركز ضخم و مهول ...ومن أول وهلة عاوز له اسبوع عشان يخلص....وقلت حلو مكان ملموم و مكيف و فيه كل اللى بيحلموا بيه....على فكرة ما فيش فروقات مهولة بين ماهو معروض و مثيله فى السعودية...ما عدا بعض المحلات اللى ما لهاش توكيلات فى الخليج أصلا...والاسعار نفسها تقريبا

قضينا بقية اليوم فى التسكع و التوهان والاكل و الشرب حتى المساء و عدنا الى الخرابة (الفندق).... وقابلت موظف الاستقبال و قال لى انه جهز الجناح اللى كنت حجزته أولا....قلت جميل ممكن نشوفه قبل ما ننقل....وذهبنا لنرى ...وهالنا ما رأينا....غرفة صغيرة بها سريرين كبيرين حديد و فوق كل سرير يوجد سرير تانى أصغر....,بذلك يكون (الجناح عبارة عن 6 سراير بينهم ممر عرضه 30 سم وحمام....هو ده الجناح .... يعنى تقريبا ما يكفيش الشنط لوحدها....مش قلت لكم لو كنتم تعلمون الغيب لرضيتم بالواقع... وعقدنا اجتماع سريعا لتقرير ما اذ كنا نشوف فندق تانى أو نستمر...وتم عرض و مناقشة جميع الأراء بحرية تامة....وكان القرارالنهائى –كالعادة- لى وهو اننا نكمل ونحمد ربنا على اللى احنا فيه خصوصا ان الشنط المفتوحة و النقل والشيل و الحط بالنسبة لى مشكلة كبرى عشان انا ديسكاوى قديم (عامل عملية ديسك)...ثانيا احنا تقريبا ما بنشوفش الفندق الا ساعة النوم....

وكان التعب قد بلغ بنا أى مبلغ خصوصا و اننا كنا بدأنا اليوم بغزوة البرج.... وانهيناه بغزوة Eaton اللى عدنا منها محملين بكثير من الغنائم اللى خربت بيت جيب الشامى....ولذلك كان القرار بالعشاء و النوم عشان رحلة الغد الى لندن اونتاريو.....

نكمل بعدين

تحياتى

[ELSHAMY]

السلام عليكم،

الحقيقة متابعة رحلة حضرتك ممتعة للغاية و خاصة الطريقة الكوميدية اللي بتضحك موت، يا ريت حضرتك تقولنا ايه الدروس المستفاده من هذه الرحلة: مثلا ازاي حضرتك استطعت تأجر البيت المناسب لاسرتك في اسبوع واحد،

هل اسبوع فعلا يكفي لاتمام اجراءات اللانديج (ما عدا الPR طبعا) ،

ايه الحاجات اللي تنصح بيها اللي حيعمل لاندج.

ياترى لو الواحد حيعمل لاندج و يرجع السعودية، لازم يأجر بيت برضه في كندا علشان يثبت جدية نيته للهجرة؟

شكرا لحضرتك.

السلام عليكم...

بجد يا د / الشامي قصدي الكندي حضرتك فظيع جدا

ايه الروعه و الجمال ده أنا نسيت التليفزيون و المسلسلات الي فيه خلاص

أصبح مسلسل واحد الي بشوفه و هو الشامي في كندا . أنا ساعات بنسى

اني في مصر من كتر الاندماج.

بس نفسي أعرف اللوجوهات الجميله والمعبره دي كلها منين بس ؟؟؟؟؟

لي تعليق صغير بس متأخر شويه.. كويس أوي ان حضرتك ما طولتش في موضوع

المستشفيات و التأمين الصحي لأن الموضوع ده كبير أوي في مصر و على قد ما هوه كبير ومهم

على قد ما ادهور و بقى غم ( حلوه دي - هنيجي فيك ايه يا دكتور ).

احنا مش عايزين نعرف حاجه عن جمال التأمين الصحي في كندا ولا عن حسن المعامله

ولا احترام المريض ولا أي حاجه من الكلام ده و اسألني أنا عن المستشفيات والي

بيحصل في المستشفيات

العزيزات بنت مصر & Queen

ربنا يجبر بخاطركم

الشقة فى أوتاوا أجرها لى المحامى....الباقى كله من على النت...

اجراءات اللاندينج كلها تخلص فى يومين بالكتير....استلام ال PR card بيكون بعد شهر SIN card بيكون بعد اسبوع

موضوع ايجار البيت و العودة يحتاج منك الاتفاق مع محامى لأنهاء هذا الاجراء و متابعته بعد سفرك ..عشان يستلم لك البريد اللى حيجيلك على هذا العنوان...

....ام عن الدروس المستفادة حنبقى نعمل لها حلقة أخيرة يمكن فى رمضان الجاى... :lol:

تحياتى

اختى بنت مصر ...هل لك علاقة بالمجال الطبى.....ان شاء الله اتمنى يكون لك أى علاقة ما عدا ان تكونى مريضة.... :cry:

[ELSHAMY]

أخوانى....أخواتى الأعزاء

السلام عليكم و رحمة الله

انطلقت القافلة من تورونتو صباحا الى مدينة (لندن أونتاريو) على بعد حوالى 200 كم جنوب غرب تورونتو....كالعادة عرفنا العنوان و النافيجاتور تولى بقية الموضوع... نسيت أقول لكم ان هذه الأسرة المرة دى بقالهم حوالى سنة ونصف فى لندن لكن صديقى لا يقيم معهم بصقة مستمرة....يعنى بيروح و يرجع زيارات لأنه لا يستطيع ترك عمله فى الخليج...وكمان ماعندوش حماسة يذاكرالمعادلة و يمتحن تانى.... فكان قرارهم ان تستقر زوجته بالأولاد للدراسة.....و هى فى الحقيقة تجربة جديرة بالبحث و السؤال....لأن ده أعتقد انه هاجس فى تفكير كثير من الأخوة على طريق الهجرة....فكان لازم نروح نزورهم و نعرف القصة ماشية معاهم ازاى...وهل الموضوع ناجح أم فيه مشاكل...

وصلنا مشارف لندن حوالى الظهر....وكان استقبالهم لنا حافلا ....خصوصا ان بنتهم الكبيرة فى نفس سن ينتى...والولدين نفس الكلام ..وكمان فيه بنت صغيرة قد ندى....اما الميجور (على).... فكان حيقضى اليوم وحيدا...

البيت رائع و منظم ونظيف .... والدور اللى تحت الارضى عاملينه مكان للعب الاولاد وهذا البيت تم شراؤه من حوالى سنة... و به باك يارد و جراج لسيارتين....المنطقة هاديو وجميلة...وقالوا لنا ان بعد ذوبان التلج بيكون كل شىء أخضر....

الحقيقة ان صديقى هذا - جزاه الله خيرا – كان مصدر معلوماتى الرئيسى فى الموضوع كله...لم يبخل علينا بأى معلومة...وكان كلامه دايما صح من واقع خبرته و دراسته العميقة للموضوع ...وكمان خلانا نتجنب كل الاخطاء اللى وقع فيها هو...

هو بدأ موضوع الهجرة لوحده بدون محامى....و عمل لاندينج من 3 سنوات فى هاليفاكس...هو نفسه مش عارف ليه اختار هاليفاكس....لكن بعد فترة اكتشف لأسباب معينة انه لازم يغير...وكان لهم أصدقاء استقروا فى لندن اونتاريو...فانتقلوا معهم...واستقروا هناك.... اصدقائهم بعد كده سابوا لندن ور احوا أوتاوا...(ندالة).... ... زوجة صديقى كانت محضرة نفسها تمام لاجابة كل اسئلتنا عن كل شىء.... وقالت ان المدينة جميلة و هادئة ...وفيها كل شىء بعيدا عن صخب تورونتو...والعرب موجودين كتير ولهم نشاط ملحوظ...وهى شخصيا أصبح لها صديقات كثيرات.... وكمان بترسل اولادها الى مدرسة اسلامية يوم الأحد..... و هناك مجالات لأعمال تطوعية كئيرة من بازارات و غيرها.... طبعا هى تفتقد زوجها ف اتخاذ قرارات كتيرة تستدعى وجوده شخصيا....لكن هو فاتح النت معاهم 24 ساعة ....وحسه فى البيت زى ما بيقولوا....فعلا تجربة جديرة بالاحترام...... طبعا هى تقوم بجهد كبير...ولم تنكر انها تحملت مسئولية كل شىء...وقالت بوجوب متابعة الاولاد بشكل مكثف لعلمها بتأثير المجتمع المحيط بهم عليهم و اللى احيانا بيكون أقوى تأثيرا من التوجيهات المنزلية....وهى ساقت لنا أمثلة عن أسر حصل فيها مشاكل من بناتهم نتيجة الاختلاط....لكن كان معظمها من أسر هى أصلا متفلتة....و مش فارقة معاهم....أو من أطفال نشأوا هناك....وما شافوش اى بيئة اسلامية قبل كده....يعنى المقصود هناك فرق بين من نشأ و اتربى هناك وبين اللى نشأ و تربى فى بلده....وجهة نظر...

و طبعا كان كرمها معانا عالى جدا....و قالت انها عوزة تبدأ تعودنا على الحياة الكندية....و البداية كانت وجبة ما بين الفطار و الغدا و عملتها لنا على الطريقة الكندية....طبق فيه انواع من الجبن...معاه خضار شبه الكرنبيت و خس و كرفس.... استبشرت خير... بس الفار لعب فى عبى و قلت يارب استر على الغدا....

قعدنا فى حوارات مستمرة حتى الساعة خمسة....اتغدينا...و كانت قد أعدت فى جدول الزيارة جولة ميدانية فى المدينة عشان نشوف كل شىء بنفسنا....و عشان تقنعنا ان يكون مستقرنا معاهم..

مشيت ورا سيارتها و كانت معانا بنتها فى سيارتنا عشان تشرح لنا...الحقيقة البنت كانت موسوعة معلومات...كان واضح طبعا انها مدينة كبيرة مقارنة بكينجستون ..لكنها طبعا أصغر من تورونتو....وزرنا مدارس الأولاد ابتدائى و ثانوى....و مركز المدينة.... و اخذناجولة و اسعة فى جامعة وسترن اونتاريو ذات المساحة الشاسعة و كانت الساعة قاربت السابعة مساءا...وكان لابد من الرحيل عائدين الى تورونتو..... شكرناهم جدا على كرم الضيافة و حسن الاستقبال ...و اخذنا طريقنا عائدين....ولكن فى الطريق كانت هناك مفاجأة جديدة على الشامى و ماكانش عامل حسابها....ياترى ايه ؟

ترقبوا الحلقة القادمة

[ELSHAMY]

أخي د / الشامي

أنا أكن لحضرتك كل الاحترام و التقدير . لان أكيد سردك للمعلومات بكل هذه

الطريقه الرائعه و الخفيفه .متضمنه في نفس الوقت كل المعلومات المفيده

يستحق بصراحه كل الاحترام و التقدير. ;)

بالنسبه ليه أنا صيدلانيه وعلى علاقه كبيره بعمليه توفير العلاج للمرضى

وخصوصا المستورد والادويه الخاصه بالامراض الخطيره ( كفانا الله جميعا شر المرض )

نفسي يا د/ الشامي تعقب على رد الاخ Toronto لاني دائما أشعر من ردوده

أن كندا ليست البلد التي تستحق مننا جميعا هذا العناء. فهل هذه حقيقه؟

وأشكر لك و للاخ Toronto الاهتمام.

بنت مصر :sad:

أختى/ بنت مصر

شكرا لكلمات حضرتك

الأخ تورونتو له وجهة نظره التى أحترمها....هو أدرى بظروفه.... وهناك أمثلة أخرى كثيرة مبسوظة و عايشة كويس....الموضوع نسبى جدا.... ما يناسبنى قد لا يناسبك...و العكس صحيح... لكن فى النهاية نشكر له وجهة نظره و نحترمها لأنه قد يفتح أعيننا على أشياء لا نعرفها عن الوجه القبيح للهجرة...

وربنا يعمل لنا الخير و يرضينا به

[ELSHAMY]

أخوانى....أخواتى الأعزاء

السلام عليكم و رحمة الله

أولا أذكركم بنفسى ...أنا الشامى اللى كنت باحكيلكم عن رحلتى الى كندا....وأنا ماليش دعوة بالعركة اللى حاصلة بين بعض الزملاء اللى ما لقوش مكان يتعاركوا فيه الا عندى....زى بعضه ما علينا...

عاوز بس أعمل مداخلة بسيطة....انا كنت محايد جدا عند سردى لتجربتى.... و لو كنتم لاحظتم انى دائما ما كنت استعمل كلمات مثل ...(وجهة نظر...رأى أخر....تجربة جديرة بالاحترام) فى وصف مشاهداتى خلال الرحلة....أنا لا أميل كثيرا الى تضخيم ما أراه جديدا على و لا أصفه بمنتهى الانبهار.....و كذلك لا أحتقر ما أراه حقيرا و لا أصفه بمنتهى الاحتقار....أنا لم أتربى فى قصر منيف ...ولا فى عشة صفيح....الوسطية و الاعتدال و التجرد من الاهواء الشخصية دايما بتكون دليل المصداقية.... وكمان انا حسيت من مداخلاتكم الدافئة التى فاقت ال 300 مداخلة عن رضاكم عن طريقة السرد....

مرة أخرى ربنا فى الأخرة بيحاسب على النيات....(انما الاعمال بالنيات)....وانا كانت نيتى انى أحاول بقدر الامكان افادة من هم على الطربق....وعشان انا مريت بنفس الخطوات ...ومرت بى نفس التساؤلات فكنت عارف ايه اللى ممكن يدور من الاسئلة....كانت طريقة السرد اللى فيه الاجابات من غبر ما تسألوا........و أنا فى حياتى – مثل كل الناس – محتاج لعون ربى و كان سبيلى لذلك هو الحديث الشريف ( الله فى عون العبد ما دام العبد فى عون أخيه)...

طبعا هذا الامر هو أكثر ما يغيظ الشيطان...ان يكون المسلمين متقاربين...متناصحين...يحب أحدهم لأخيه ما يحبه لنفسه....فيبدأ وسوسته اللعينة...ويشعلها نعرات عرقية...و شخصية...ويحول الامر من تبادل للنصيحة.....الى تبادل للشتائم و التشكيك فى المصداقية.....اذا فقد نجح الشيطان فى التفرقة و بث الكره بين بعض المسلمين مع ان بداية و نية كل منهم كانت افادة الاخرين....اسلوب الشيطان التدريجى معروف.....

واذا كان المسلم ذكى و فطن و يعلم اسلوب الشيطان من الاول فيكون من الذكاء تصحيح النيات فى مرحلة معينة...و مراجعة النفس....و اصطحاب معية الله و عونه....

أعوذ بالله من الانتصار لنفسى...ومن الاعجاب بذاتى...و فرحتى باطراء الناس لى...كل ذلك ان حصل فقد فزت بأجر الدنيا و لم يبق لأخرتى شىء يوضع فى ميزان حسناتى.

الحقيقة انا زعلان مما حصل من تلاسنات ..و ادعو الجميع الى التغافر و التسامح....وكما قال الرسول...(...فيعرض هذا و يعرض هذا و خيرهما الذى يبدأ بالسلام)...

و معلش انا مش قادر اكتب حلقة اليوم من المسلسل لأن نفسى اتسدت.... حاولوا تفتحولى نفسى بكام مداخلة حلوة...ونرجع زى زمان....

تحياتى

[ELSHAMY]

يا أخ تورنتو لقد فاض الكيل من إسلوبك المتدني في الحوار

لو سمحت ... لو عندك كلمة فيها خير فلتتفضل وتقولها ... أما غير ذلك .. فنرجوك أن تلتزم الصمت ...

أعذرني لما اقول لك إن هذا إنذار أخير لك ..

حتى موضوع الراجل الطيب دكتور شامي .. عايز تبوظه بإسلوبك !!!!!

شي عجيب وإسلوب أعجب

-------------------------

نيابة عن الإدارة . أعتذر لك يا دكتور شامي عن ما حدث في موضوعك .. وأان شخصياً حجبت تلك المداخلات التي لا تليق .. وأرجو إنك ما تبخلش على الجميع بتجربتك ونصايحك وإسلوب الجميل ..

أنا عن نفسي لم أفكر في إني أسيب بلدي او أستقر في دولة أخرى غيرها ..

ومع ذلك اسلوبك المحترم حبيبني في كندا

وأعتقد إنك لو روحت بوركينا فاسو وبأسلوبك ده .. هاتحببني فيها برضوا

الأخ المحترم سى السيد

كلماتك على العين و الراس....حاعملك حلقات خاصة عن (الشامى رجع من بوركينا فاسو يا سى السيد)....

خالص احترامى و تحياتى

[ELSHAMY]

لا لا لا لا لا لا لا لا لا لا لا لا لا لا لا لا لا لا لا :lol: مافيش حلقه اليوم طب اعمل ايه اروح فين لا لا لا لا لا لا لا لا لا لا لا لا لا لا لا لا

:closedeyes: نرجوا من مشرفين المنتدى مراقبه المشاركات حيث اصبحت لا تليق بمثل هذا المنتدى واستخدمت عبارات والفاظ خارجه عن الاداب العامه ولا اعلم لماذا بعض المشاركين اصبح همه الوحيد هو نقض كل ما يكتب في المنتدى ، نرجوا من الجميع وضع تجربته الشخصيه ان كانت تجربه جيده او تجربه سيئه والقارئ يحكم ويأخذ منها ما يريد .

وفي النهايه لا لا لا لا لا لا لا لا لا لا لا لا لا لا لا لا لا لا لا لا لا لا لا لا لا لا لا لا لا لا لا عاوزين حلقه خلاص تعبت

اخوانى..helsinki , SEMESMS, osamagouda

قطعتوا قلبى....ما اقدرش على زعلكم....بس لسه نفسى مقفولة... :)

حاحاول النهاردة أكتب ان شاء الله

باحبكم... :blink: