الشامى رجع من كندا يا رجالة

[ELSHAMY]

اخوانى...أخواتى الأعزاء

عدنا بعد استراحة قصيرة تمت فيها محاولة لم الشمل...ننسى اللى فات و نكمل...

بدأنا رحلة العودة من لندن أونتاريو حوالى الساعة 8 مساءا...كان الجو بارد جدا لكن بدون أمطار...بعد ما طلعنا على ال high way بحوالى نصف ساعة بدأت رخات خفبفة من البرد....مع أشياء بيضاء كأنها ريش مندوف طاير فى جميع الاتجاهات....طبعا الطريق كان مظلم الا من أنوار العربيات....وبعدين بعد شوية الموضوع زاد حبتين عن القدر الى يخلينى أشوف بمدى رؤية معقول.....هديت السرعة....ومشيت فى تانى حارة شمال....بعد 3 حبات لقيت انى لازم أزود سرعة المساحات لأن كثاقة التلج اللى نازل زادت أكتر....على فكرة دى كانت أول مرة لى أسوق اثناء نزول التلج.....وبعدين الموضوع تقل اكتر و اكتر...واصبح مدى الرؤية أمامى حوالى 10 متر....بقيت ماشى على سرعة 50 كم ....و بعد فترة أصبحت الحاجة الوحيدة اللى شايفها فى الطريق هى الانوار الخلفية للسيارة التى أمامى....

المشكلة الكبرى انك فى هذه الظروف لا تستطيع حتى الانتقال من الحارة التى انت فيها لأن الطريق أصبح بعد فترة عبارة عن جبلين صغيرين من التلج يمينك و يسارك وانت ماشى فى النص...يعنى حتى ما تعرفش تقف على جنب و لا تدخل استراحة الابصعوبة و مجازفة....وفضلت سايق بسرعة وصلت يمكن 20 - 30 كم حوالى 45 دقيقة من الرعب...طبعا العيال فرحانين بالمنظر اللى أول مرة بشوفوه...وانا عامل نفسى مسيطر على الوضع :closedeyes:

وطبعا الطريق اللى كنا نتوقع انه ياخد ساعتين ونصف ...أخد 4 ساعات وبعد موضوع التلج ما توقف كان فيه سيارات واقفة على جانب الطريق عليها لوحات مضيئة مكتوب عليها ان الطرق الموصلة الى مداخل تورونتو مزدحمة بالمرور و فيها تكدس سيارات .... انا كنت عارف ان الولد النافيجاتور حيوصلنا من اسرع طريق...لذلك فضلت انى لا أغير طريقى....وعلى فكرة انا كنت مستمتع جدا بتجربة السواقة فى التلج لأنها أول مرة تحصل لى.... و الغريب ايضا ان الولد النافيجاتور لم يتعطل لسوء الاحوال الجوية و كان ظنى انه ممكن يفقد الاتصال مع القمر الصناعى اللى ممشيه....لكن طلع انه نافيجاتور اصيل و ابن ناس وو صلنا لحد الخرابة (الفندق) بأمان.

وكان الشىء الذى اتفقنا عليه جميعا هو النوم الفورى بعد هذا المشوار السخن و العودة المظفرة بعد فتح (لندن أونتاريو) وضمها الى المملكة الشامية.

ياترى كانت ايه الخطة اللى اتفق عليها الجيش الشامى بعد ما صحا الجنود من النوم ؟

ترقبوا الحلقة القادمة....بس مش عايز معارك وانا غايب ..... :lol:

تحياتى

[ELSHAMY]

الافاضل bsent misr & ghamrawy

جزاكم الله خيرا.....فقط لا تنسونى من صالح دعائكم

[ELSHAMY]

أخوانى....أخواتى الاعزاء

السلام عليكم و رحمة الله

.....كان القرار المبدأى للجيش اننا نقضى اليوم كله فى التسكع فى تورونتو و التوهان فيها براحتنا....و بالفعل بعد الافطار والذى منه ركبنا السيارة و قلنا نبدأ ب Eaton Center تانى لأننا كنا لسه ما لفيناهوش كويس...فقلنا نخلص عليه (و بالتالى على فلوسى) وبعدين نشوف غيره....و بالمرة نعدى على البرج نلم ايراد امبارح....

وفجأة طرأ لى طارىء ...طب ايه رأيكم يا أولاد نغير الوجهة و نروح شلالات نياجرا النهاردة ؟ ...لاقى الاقتراح قبول الجميع...خصوصا ان الساعة كانت حوالى 10 صباحا و الجو مشمس وشكله حيكون يوم جميل....

وله يا نافيجاتور.... شلالات نياجرا احيات ابوك..... وكانت المفاجأة اللى مش ولا بد ان Niagara Falls مسجلة بعدة عناوين....يعنى مثلا...شلالات نياجرا البلد....وشلالات نياجرا المحطة....و شلالات نياجرا النجع...وهكذا....

توكلت على الله و اخترت واحدة منهم....(فى الاخر طلعت غلط)...المهم أخدنا الهاى واى...المسافة كانت حوالى 200 كم على ما اتذكر...بس الجو كان بديع و لا كأننا فى شم النسيم .

الطريق فيه بعض المصانع و المحاجر...و هو يمشى جنوبا بمحاذاة البحيرات العظمى حتى يصل الى الجانب الكندى من الشلالات...المناظر كانت جميلة...خصوصا على بعض الكبارى التى تعبر بنا بعض البحيرات الضغيرة.....و على مشارف منطقة الشلالات اتارى ان فيه مدينة اسمها كده...وفيها منتجعات و فنادق....المهم طنشت النافيجاتور و مشيت على العلامات اللى بنؤدى الى الشلالات نفسها...وبعد شوية كان فيه شارع طويل منحدر لأسفل....فى أخره بيحود بيك يمين مباشرة على منطقة الشلالات.

WOOOOOOW ....دى كانت الكلمة اللى قالها جميع أعضاء البعثة فى نفس واحد....منظر مفاجىء بديع....سبحان الخلاق العظيم...

المنظر كان بيدفعنى انى اسيب السيارة فى أى مكان و انزل بسرعة أشوف الموضوع عن قرب.....باركينج بسرعة يا ولد يا نافيجاتور...و فعلا مشينا شوية بمحاذاة الشلالات...و فى الأخر على اليمين كان فيه باركينج مهول....

التلج كان لسه للركب... لكن رغبتنا فى رؤية المكان عن قرب خلتنا نعبر الطريق بسرعة و ناخد المنظر من أوله.

الحقيقة مش عارف أقول ايه.....سبحان الله هى الكلمة الوحيدة التى أعتقد انها تتردد من فم كل من يؤمن بوجود اله...خالق قادر...مبدع....

كميات مهولة من المياه...لا أحد يعرف جاية منين و لا رايحة على فين....يعنى لا المنبع بيخلص ...و لا المستودع بيتملى (حلوة المنبع و المستودع دى)....فعلا كلنا اتسمرنا امام جمال المنظر....احنا و عشرات السياح و الزوار....وكان طبيعى ان يمتلا المكان بالفنادق العالية و الفخمة....طبعا الليلة بالشىء الفلانى خصوصا لو حضرتك طلبت غرفة Falls View يعنى بتطل على الشلالات مباشرة...وده انا كنت عرفته من على النت لما فكرت...مجرد تفكير ...اننا نقضى يومين هناك....

كميات المياه المهولة اللى بتصب فى الشلالات كانت عاملة 2 قوس قزح من الشرق للغرب و كمان كانت بتعمل شابورة مياه ..تطلع فوق رؤوس المتفرجين...و بعدين تنزل عليهم رخات ميه ساقعة منعشة.... و المدام كانت مصرة انه مطر...مع ان السماء ما فيهاش و لا سحابة...قصر نظر...قصدى وجهة نظر.

كان نفسى ناخد مركب و نزور الشلالات عن قرب...لكن نظرا لوجود التلج كان لسه موسم المراكب لم يبدأ بعد.

المهم مشينا بجوار الجزء الكندى من الشلالات و ده حيكون على يمينك و انت واقف...و أمامك على الضفة الأخرى يتكون الاراضى الامريكية الشقيقة...وجاى من ناحيتها الجزء الامريكى من الشلالات...بس الحقيقة الجزء الكندى شكله أجمل و أكبر بكتير...طول الشاطىء حوالى كيلومتر....و فى أخره فيه قنطرة بتعبر البحيرة الصغيرة اللى بين أمريكا و كندا ..وعليها نقطة جمرك و تفتيش لأنها مدخل مباشر الى امريكا....العلم الامريكى الشقيق كان يرفرف على المبانى الموجودة امامنا......

بصيت فى المنظار المكبر على الجانب الأخر وسرحت....لا بوش ...ولا كونداليزا...ولا أى حد كان موجود.... ده أكتر وقت كنت فيه قريب من أمريكا ...و دى كانت فرصتى فى التعبير عن رفضى لسياسة أمريكا تجاه كوريا الشمالية.. وصحيت من السرحان على صوت الميجور (على) و هو بيشد البنطلون و يقول لى : شيلنى عشان أشوف... :shutup:

المهم قضينا يوم جميل جدا....و اطمئن القائد الشامى على بسط سيطرة الجيش على منطقة الشلالات و ضمها الى مملكته....ولم ينسى القائد انه يعين واد كندى عشان يقطع تذاكر للزوار لأن دخول الشلالات كان ببلاش قبل الغزوة....و فى النهاية شوية أكل على قهوة...على مشتريات من محلات التذكارات.... والحقيقة الواحد كان صعبان عليه يسيب المكان الجميل ده و يمشى....نعمل ايه...سنة الحياة...

نافيجاتور....على تورونتو....لو سمحت.....

و للرحلة بقية...بس مش كتير

تحياتى

[ELSHAMY]

اخوانى...أخواتى الأعزاء

السلام عليكم ورحمة الله

أعتذر عن كتابة حلقة اليوم نظرا لحالة مرضية طارئة...دعواتكم لى بالشفاء...

أسف مرة أخرى..تحياتى

[ELSHAMY]

اخزانى....أخواتى الأعزاء...السلام عليكم و رحمة

لم أكن أتخيل هذا الكم من المشاعر الطيبة التى و جدتها منكم مما كان له الأثر الفاعل فى عودتى للكتابة عشان خاطر عيونكم مع انى - ولله الحمد - لسه بعافية شوية...لكنكم وحشتونى جدا.

و أشكر فى هذه المناسبة كل من سأل عنى سواء بالبريد أو البرق أو الهاتف...كما أشكر كل الى بعتوا SMS حتى الى عملوا ميسد كول..كما أتوجه بالشكر الى أعضاء السفارة الكندية و السفير ذاته على توفير طائئرة خاصة للعلاج فى تورونتو عند أحسن الدكاترة....

و أخص بالذكر أخوانى و أخواتى:

سى السيد - ابو مروان - احمد صالح - كابيتشينو - أبو عمر - اسامة جودة - booosh - دسوق - ماجد غنيم - اينشتين - مادزورو - drpharma - جارسينج - bent misr - اسكندرية تانى - امير التونسى... وأسف ان كنت نسيت أحد....

اليوم الحلقة قبل الأخيرة قريبا

تحياتى

[ELSHAMY]

أخوانى....اخواتى الأعواء

السلام عليكم و رحمة الله

...عاد الشامى و جيشه الى تورونتو مظفرا ( وليس مزفرا...هناك فرق)...وكان لسه اليوم لم يلفظ انفاسه الأخيرة....وكان الجنود و على رأسهم الفيلد مارشال (أم على) رأيهم اننا نروح الفندق نغير هدومنا و بعدين نكمل على ما بقى فى جيوب الشامى بزيارة Eaton Center لأنهم ما كانوش شفوا غليلهم فى أول مرة...

وحيث انها أوامر عليا...لم يكن أمام الشامى الا الأمتثال....وبالفعل ذهبنا و عدنا محملين بالغنائم اللى كان نصيب الشامى منها تى شيرت مكتوب عليه "CANADA".... يا فرحتى.

كان يوم الاربعاء هو أخر أيام الجيش فى تورونتو.....طبعا كان عند الشامى مشوار هام جدا صباحا ...وهذا المشوار هو فى حكم العادة بعد كل غزوة شرائية...وهو ترجيع ما تم شراؤه بالأمس ....مرة المقاس مش مضبوط...ومرة اللون مش حلو...ومرة من غير أى سبب...فكان لازم زيارة سريعة الى نفس المحلات مرة أخرى....طبعا الشامى كان بيطلع دخان من ودانه....لكن نعمل ايه...حكم القوى.

تم تحضير كل الشنط استعدادا للرحيل الى أوتاوا مرة أخرى...لأن طائرة العودة كانت مساء الخميس من مونتريال...اتصلت بالمحامى و قلت له يحضر الشقة مرة أخرى عشان نبيت فى أوتاوا ...ونخليه بالمرة يوصلنا الى مونتريال...

صباح الأربعاء...رجعنا الى Eaton Center.... رجعنا وبدلنا....كان عندى زيارة هامة الى مكتبة جامعة تورونتو لشراء بعض المراجع الطبية.... النافيجاتور وصلنا....خلصنا و توكلنا على الله على أوتاوا....

المرة دة المشوار كان سخن بجد لأنه فوق ال 500 كيلو مرة واحدة....كان لابد من قهوة فى الوريد ....نسيت احكيلكم عن واحد من أشهر محلات القهوة...Tim Horton... وهو موجود فى انحاء كندا بكثرة مملة...يعنى بين كل Tim Horton و Tim Horton يوجد محل Tim Horton .... حتشرب يعنى حتشرب...حتى على الHigh Way موجود فى كل الاستراحات و ميزته انه أرخص من Starbucks .... وأعتقد انه مش يهودى.

وصلنا أوتاوا بعد العصر...الشامى كان استوى....كان لازم علينا اننا نقعد نذاكر قواعد المرور عشان كنا نوينا ندخل امتحان الG1 زى ما حكيت لكم فى الحلقات السابقة....ومسكت بالاوراق....قريت يمكن 3 أو أربع ورقات لقيت نفسى بأنام....فقلت لأم على ....أيه رأيك نصحى بدرى نكمل....زى التلاميذ الخيبانة اللى بتذاكر ليلة الامتحان...وافقتنى على الفور ( من المرات النادرة اللى يحصل فيها كده...)

...وعند الصباح كان علينا الاستيقاظ بدرى عشان الامتحان...وكمان ده كان أخر يوم فى ايجار السيارة...

انتم طبعا عارفين ايه اللى حصل لأنى كنت حكيته قبل كده....لكن يا ترى كان ايه أخبار أخر يوم فى الرحلة ؟

الى اللقاء فى الحلقة الأخيرة.

تحياتى

[ELSHAMY]

سلامتك ألف سلامه ولله حلو كندا قامت بالواجب و نفجاتو مساندك في الرحله واد حلال و وفي لصاحبه أرجوك سآلي بصيط كم أخذت معك سلامي لأم علي من أختها التونسيه

الأخت أمير...شكرا لك...

المبلغ اللى حتحتاجيه يعتمد على اشياء كثيرة منها مدة اقامتك و مكانها و الفندق و مصروفك اليومى...ووووو

...انا الحقيقة كنت أعتمد على ال credit card

الله يعمل لك الخير

[ELSHAMY]

السلام عليكم،

دكتور الشامي، عودٌ احمد و حمد الله على السلامة

ممكن اسأل حضرتك سؤال، خلال الاسبوع اللي حنعمل فيه اللاندينج ، لازم نقدم على OHIP و SIN و PR ( حنطلب منهم ارساله على عنوان اصدقاء لنا )

و ايه كمان مفترض نقوم بيه؟؟؟؟

هل لازم نأجر بيت؟

هل لازم نفتح حساب بنك؟

هل لازم نطلع رخصة قيادة؟

علما باننا حنرجع السعودية تاني بعد اسبوع اللانديج.

معلش اسئلة كتير بس احنا المحامي بتاعنا سيئ للغاية، احنا اللي بنعمل كل حاجة لوحدنا.

شكرا

العزيزة Queen

شكرا لكلماتك

حأرد على أسئلتك على بريدك الخاص

تحياتى

[ELSHAMY]

شكرا لك ونتمني أن نقرأ حلقه جديده وأنا سمعت أنه مسموح سنه لدخول لكنده من تاريخ إعطائك الفيز هل هذا موجود في الدول العربيه و أين قررت الإستقرار عند رجوعك لكند

الأخت أمير بعد التحية

المسموح هو دخول كندا خلال سنة من تاريخ الفحص الطبى ...مدة صلاحية الفيزا بيكون مكتوبوب على الفيزا نفسها.

أعتقد انى حأستقر فى مقاطعة أونتاريو... :blink:

تحياتى

[ELSHAMY]

أخوانى....أخواتى الأعزاء

السلام عليكم و رحمة الله....

الحلقة الأخيرة

....،نأتى لأحداث أخر يوم فى الرحلة...

...ذهبنا صباحا عشان امتحان رخصة القيادة G1 وكما حكيت لكم من قبل تكلل المشوار بالنجاح ...خرجنا من المكتب منتصرين...كان لازم انى ارجع السيارة لمكتب الايجار.... وصلت (ام على) البيت عشان تحضر الاولاد و الشنط استعدادا للسفر.

...ورحت المكتب...قابلت (نديم)...فاكرينه طبعا ودار الحوار الأتى اللى حأحاول أترجمه للأخوة اللى بيدرسوا انجليزى....أما الأخوة اللى بيفهموا انجليزى مافيش داعى يقروا الترجمة...

أنا : جود مورنينج سير..سلام عليكم

نديم: هاى و عليكم السلام

I wish everything was OK with the car ( يعنى ازيك يا دكتور و ازاى الاولاد wst:: )

أنا : والله يا نديم العيب اللى قولتلى عليه فى السيارة كان مزعج جدا....لكن يالا...... ما علينا انا استحملتها بس عشان كنت محتاجها جدا.

نديم: I told you before Sir (يعنا انا قلت لك يا حلاوة و انت قبلت ...ذنبك على جنبك يا باشا...المهم انشا الله تكونوا انبسطوا فى تورونتو.... :wub: )

أنا : الحمد لله...كله تمام...بس احنا طمعانين فى كرمك يا ابو نديم (طبعا انا كنت سايق مسافة أطول من المسموح...وكمان متأخر ساعتين على ميعاد التسليم)

نديم: I made discount already sir.....but let me try (يعنى بلاش حركات الحسوكة بتاعتكوا يا مصريين....انا بس عشان خاطر انك باين عليك تعبان و تكاليف الرحلة جابتك أرض أرض....خلينا نشوف wst:: )

كل اللى حأقدر اعمله لك هو انى مش حاحاسبك على المسافة الزيادة....وكمان مش حأعمل لك غرامة تأخير....(يعنى....أعتقد واضح مش محتاج ترجمة :lol:

استلم نديم العربية وراح يركنها...وبعد شوية لقيته راجع و معاه الوصلة بتاعة الولد النافيجاتور....الشامى كان نساها فى العربية... wst::

كانت الساعة بقت حوالى 1 ظهرا....المحامى كان ميعاده انه يفوت علينا الساعة 2 عشان ياخدنا على مونتريال....الطائرة كان موعدها 8 مساءا

كانت كل الميليشيات جاهزة للسفر فى الموعد....وتوكلنا على الله...تاركين أجمل الذكريات فى أوتاوا...

وانا فى الطريق مر بى شريط الرحلة بسرعة...سبحان الله ...مين كان يصدق....كل شىء ربنا سهله بأحسن مما كنا نتخيل....يارب لك الحمد حمدا كثيرا طيبا مباركا فيه....ملء السموات و الأرض ...وملء ما شئت من شىء بعد.....قد ايه كانت معية ربنا معانا....وقد ايه كانت رعايته لى و لأولادى فى كل شىء....كل المخاوف اللى كانت فى راسى قبل الرحلة راحت...كان ربنا معانا ....ومن يتوكل على الله فهو حسبه

تذكرت كمان لما جلست مع الأولاد قبل الرحلة وقلت لهم....انتم عارفين ان كل أعمالنا لازم تبدأ بنية صالحة....عشان ربنا يكرمنا و يحفظنا و يأجرنا على عملنا...وقعدنا قعدة لطيفة نفكر ايه ممكن تكون نياتنا فى رحلة زى دى...اللى قال...نكون قدوة بسلوكنا امام الاجانب و نخليهم يحترموا معتقداتنا و ديننا...واللى قالت...نشوف أرض الله الواسعة وجمال الطبيعة و نتفكر فى خلق الله....و اللى قالت...نحافظ على صلاتنا و عبادتنا و ذكر ربنا ...وهكذا....وقلت لهم كمان حتى الحاجات اللى نوينا نعملها و ماقدرناش ربنا حيكتب لنا أجرها ان شاء الله.....

وفى النهاية كان كرم ربنا معانا كبير...أكبر من امنياتنا....

وصلنا مطار مونتريال.....فى المطار ما فيش ختم خروج....باى...باى....

ركبنا الطيارة المتجهة الى كازابلانكا....الولد على جرى ناحية كابينة القيادة...رحت وراه....لقيته واقف عند الباب و الطيار و مساعده قاعدين استعدادا للاقلاع....أخذت الولد ...و لمحت لوحات المفاتيح امام الطيار...عدادات كتير و مؤشرات و أرقام ..وأنوار...المهم جيت أرجع سمعت الطيار بيقول بصوت واطى:

ولد يا نافيجاتور....كازابلانكا لو سمحت gra:-

تحسست جيبى لقيت النلفيجاتور مش موجود.... :sad:

ملحوظة: يمكن نعمل حلقة عن الدروس المستفادة اذا الجماهير طلبت...

تحياتى

[ELSHAMY]

هههههههههههههههه مشاء الله النافيجاتور عمل شغل فى الرحلة دى

بس بقولك يادكتور مش عارف لية انا حاسيت انك بعد العاركة الاخيرة بين الاخوة الاعضاء حسيت انه اثر على طريقة سردك للموضوع وكمان حسيت انا زهقت مش عارف يمكن الاحساس دة غلط بس هو احساس جالى وخلاص بس متزعلش منى لانى من اكتر الناس اللى بتدعو لك بالتوفيق

احساسك صحيح...

[ELSHAMY]

تم تثبيت الموضوع تقديراً لجهود الدكتور الشامي أكثر الله من أمثاله .. وإسهاماً من المنتدى في إستفادة الاخوة المُقبلين على الهجرة .

الأخ العزيز سى السيد....السادة/ ادارة امنتدى

نشكر لك اهتمامكم...بارك الله فيكم...

الأخوة القراء....عاوزين أنا وأخويا سى السيد دعوتين حلوين ينفعونا دنيا و أخرة....أسأل الله أن ينفعكم بكل ما كتبت.

حتوحشونى

أخوكم الشامى

[ELSHAMY]

حمدا لله علي سلامتك يا دكتور الشامي

وسرد قصصي رائع ولكن ................ فين البهاريز

يعني سؤال عنا معشر الاطباء فيه عمل ولا غسيل الصحون ورانا والتكسى الجوال

وهل يمكن العمل بسهولة بالابحاث الطبيه بالجامعه براتب معقول

ولوا عاوز مثلا كيمياء حيوية ماجستير بالجامعة ممكن ولا صعب

بالنسبة للاقامة عندك معلومات عن البرتا او نوفا سكوتيا او مانيتوبا بيقولوا الدنيا فيها لسة رخيصة

كفاية عليك اليوم كده

وشكرا يا أبا علي

شكرا لكلماتك أخى العزيز

(1) بالنسبة لنا معشر الأطباء...ليس امامك أى حل سوى طريق المعادلة....و البديل انك تستنضف لك مطعم...وياريت يكون حلال فوود...أهو منك تاكل...ومنك تغسل الصحون.

(2) بالنسبة لموضوع الابحاث...دى كمان ما فاتتش أخوك...شوف ياسيدى...المتوفر هو اما Reasarch Fellow أو Clinical Fellow....طبعا حسب تخصصك...وفى النهاية كلاهما وظائف مؤقتة بنهاية ال Fund اللى مخصص لها....بالاضافة الى ان راتبها ضعيف....

لكن حضرتك تقدر تبعت ايميلات للجامعات والأقسام اللى تناسب تخصصك...وأسال على Clinical Fellow أولا....بتكون أقوى لك فى ال CV بتاعك.

(3) للأسف ما عنديش معلومات عن مقاطعات أخرى.

خالص أمنياتى

[ELSHAMY]

أخوانى ...أخواتى الأعزاء

السلام عليكم و رحمة الله

الأفاضل و الفضليات:

أبو عمر - أبو مروان - medopharm - Queen - Amir - Osamagouda - somayasaleh - drpharm - Einstien - bent misr - madzoro - البوب واحد تايه - جبار سينج - أحمد عبده....

مش عارف أقول ايه امام هذا الطوفان من المشاعر الجارفة التى أبادلكم مثلها...

يقول الرسول صلى الله عليه وسلم (الأرواح جنود مجندة ما تعارف منها أئتلف و ما تنافر منها أختلف).......

وأنا أشعر فى قرارة نفسى بألفة شديدة تجاهكم جميعا....وهذا الأمر ليس له علاقة بأن يقابل بعضنا بعضا...الأمر أسمى من ذلك...فهو يتعلق - كما وضح الحديث - بتلاقى الأرواح و تألفها...

أهم رابط يربطنا فى قناعتى هو تواصل الدعاء الى ان يجمعنا الله فى ظل عرشه يوم لا ظل الا ظله....

وعشان حتوحشونى و أنا ما أقدرش على كده فهناك بشرى - لحاملى الثانوية العامة و راسبيها - أن الشامى نزل بمسلسل كوميدى جديد أسمه (نادى الشرطة فى الدورى الممتاز) حتجدوه فى باب "دعوة للابتسام" فى المنتدى...أرجو أن يحوز اعجابكم ...وعايز أشوف مداخلاتكم هناك و رأيكم فيه....أهى سبوبة عشان نتقابل....الحياة مش كلها كندا...كندا...فيه برضه مصر و ضرب و حاجات كده.

خالص حبى و تقديرى

الشامى

[ELSHAMY]

الف شكر دكتور الشامي على مجهودك الطيب اللي بذلته في سرد تجربتك الكندية والف مبروك على تثبيت الموضوع, وياريت تحكي لنا عن الحاجات اللي لازم الواحد ياخذها من اجهزة مثلا , كمان انا سمعت انه الفولتية اللي بيشتغلوا فيها بكندا هي 110 فولت يعني اي جهاز ناخذو معانا مش حينفع من غير محولة فهل نقدر نستغني عن الموبايل والمحمول مثلا لانه بيشتغلوا على 220 فولت

انا في بالي سؤال ولو انه خاص شوية , انا تفكيري بام علي بتقدر تعيش لوحدها في مونتريال , تقدر تشيل المسؤلية لوحدها وكيف بتحكيلك على الوضع هناك من بعد ماسبتهم ؟ طبعا هي صار عندها خبرة اكتر منك فلازم تاخذ منها الحكي وتحكيه النا .

انا عارفة اني تقلت اشوية سامحني

تقبل تحياتي

الأخت مهاجرة...شكرا لكلماتك

بالنسبة للأجهزة...طبعا الفولت هناك كله 110 ...أنا شخصيا كنت واخد معى محول (ترانس) كهربى عشان شحن الموبايلات طبعا كان شيلة تقبلة...فأعتقد فكرة شحن أجهزة محتاجة مراجعة...ألجهاز الوحيد اللى أخذته معى كان "كيتل" تسخين المياه لزوم الشاى و القهوة...

أم على تفكيرها تغير تماما بعد ما قابلت زوجات أصدقائنا المقيمين هناك لأنهم أجابوا على كل تخوفاتها بالنسبة للأقامة....على فكرة أنا لسه ما سبتهمش....ده حيحصل بس مش الأن لظروف خاصة...

تحياتى

[ELSHAMY]

الدروس المستفادة

أخوانى أخواتى الأعزاء....

السلام عليكم و رحمة الله

اليكم بعض الدروس المستفادة من الرحلة.....وهى ليست مرتبة حسب الأهمية و لكن حسب ما أتذكر....يعنى كل يوم كده كام درس حسب التساهيل..

الدرس الأول : الجريمة لا تفيد

الدرس الثانى: النية الصالحة

أمر هام جدا قبل الشروع فى عمل كل خطوة من خطوات الهجرة هو النية...بغير كده حيكون شغلك و تعبك وهجرتك على الفاضى....ممكن تحوز نجاح فى الدنيا...لكن فى الأخرة....مافيش...طبعا كلنا عارفين ان كل امور دنيانا ممكن تتحول من عادات الى عبادات بمجرد النية الصالحة...

ونضرب هنا مثال صغيرا: لو كانت نيتك مثلا من موضوع كندا هى تعليم الأولاد و الحصول على شهادات ليها قيمة فى سوق العمل مستقبلا...بس كنت خايف عليهم و على اخلاقياتهم....خذ بالاسباب اللى تقوى الوازع الدينى عندهم...أوكل أمرك لله....حتاخد ان شاء الله ثواب و ربك يتكفل بحفظهم....

الدرس الثالث : اغسل يديك قبل الأكل و بعده.

الدرس الرابع : لو ربنا مقدرك...استنضف شركة طيران كويسة عشان شنطك ما تضيعش...وترتاح أثناء الرحلة الطويلة...وما تكونش نهاية هجرتك فى احدى جزر المحيط الهادى. :blush2:

يتبع....

[ELSHAMY]

الدروس المستفادة

الدرس الخامس: اذا كنت فى بداية طريق الهجرة لا تذكر فى أوراقك أى معلومة غير صحيحة.....لأن الكذب حرام....ولأنك قد تطالب باثبانها فى يوم من الأيام

الدرس السادس: لو ما عندكش وقت و لا روح تنهى أوراقك بنفسك...روح لمحامى و ريح دماغك....

الدرس السابع : كل الاوراق اللى حتقدمها ومنها الأبليكيشن لازم يكون عندك منها صور...اختفظ بيها لمراجعة معلوماتك.

الدرس التامن: كل بيمينك :)

يتبع......

[ELSHAMY]

الدروس المستفادة

الدرس التاسع: عند استلام التأشيرة...راجع كل البيانات اللى مكتوبة عليها....وكذلك البيانات الموجودة فى الاوراق اللى حتاخدها معاها...من حيث ال spelling و التواريخ وغيره

الدرس العاشر: هام جدا....يجب قراءة املف الهجرة الى كندا المثبت بالمنتدى بالكامل ...قد يكون ما بين السطور اجابات لكل ما يدور ...أو لا يدور...أو قد يدور فى ذهنك. أنا شخصيا لم أكتب أى مداخلة و لا سألت أى سؤال قبل أن أفرأ الملف كاملا....ستجد نفسك ماشى هناك فى كل الاجراءات بمنتهى السلاسة....أخواننا الذين سبقونا على الطريق كانوا فى منتهى الأمانة....جزاهم الله جميعا عنا خير الجزاء.

الدرس الحادى عشر : حافظ على صلاتك.حتى أثناء سفرك...ما تتكسفش تصلى فى أى مكان....اللى مش عاجبه يشرب من شلالات نياجرا...

الدرس الثانى عشر: جميع أوراقك الهامة...شهادات علمية...شهادات خبرة...شهادات ميلاد...شهادات تطعيم....يجب الاحتفاظ بها فى شنطة يدك أثناء السفر.

الدرس الثالث عشر: يستحسن يكون معاك Credit Card الدنيا كلها ماشية كده هناك....بس خلى بالك ادفع اللى عليك فى الميعاد عشان ما تدخلش فى شبهة الربا....

الدرس الرابع عشر: دعوات أمك و أبوك أو اللى عايش منهم و الناس الصالحين هامة جدا فى الغربة (اللهم اغفر لأمى و أبى و أرحمهما).

يتبع....

[ELSHAMY]

الدروس المستفادة

الدرس الخامس عشر: من الأفضل ان تضع خطة واضحة المعالم لموضوع اللاندينج باليوم...وهذا يسهل عملية حجز الفنادق أو الشقق للأيام الأولى لوجودك هناك.

الدرس السادس عشر: اذا كنت ناوى تعمل لاندينج و تكمل..يعنى مش راجع تانى...لا تتعجل فى ايجار شقة بعقد سنوى وانتظر حتى يستقر بك المفام فى المكان المناسب لعملك و لمدارس أولادك و الخدمات الأخرى وبعدها أختار حتى لا تدفع غرامة قطع الايجار وعدم تكملة العقد.

الدرس السابع عشر: هام جدا قراءة نبذة تاريخية عن كندا اجمالا...و عن المدينة التى نويت الاقامة فيها بصفة خاصة...النت مليانة معلومات.

الدرس الثامن عشر: بعد ما حددت المدينة....ادخل على Google earth شوف المنظر العام و لو عرفت عنوان الفندق أو الشقة شوف موقعه فين ...وعلى اساس ذلك يمكنك تغييره بسهولة...

الدرس التاسع عشر: نسيته.....

يتبع....

[ELSHAMY]

شكرا جزيلا على هذا السرد الرائع لهذه التجربة الفريدة

د/ شامي حضرتك لسه مكلمنتاش عن مستقبل الدكاترة هناك

انا بشوف معظمه طب اسرة..... ازاي الواحد ياخد التخصص اللي هوا عاوزه

اخى meeeedoooo انا تكلمت على هذا الموضوع فى حلقة سابقة بس يبدو حضرتك كنت نبطشى.

يوجد أيضا فى الملف المثبت عن كندا كل التفاصيل عن كيفية اختيار التخصص....شوية تعب بس من سيادتك حتجد كل الاجابات.

تحياتى