الشامى رجع من كندا يا رجالة

[ELSHAMY]

د/ الشامى جزاك الله كل خير.

و مستنين الدروس المستفادة توصل لحد 100 درس مستفاد و كله بأجره و الثواب من عند الله. :lol: :happy: :roseop

أختى العزيزة ألمر....انتى طلعتى أسكندرانية ؟...أجدع ناس.....الصورة جمياة جدا و قلبت عليا الذكريات...

الله المستعان الدروس توصل ل 100

تحياتى..وشكرا على الصورة الجميلة

[ELSHAMY]

الدروس المستفادة

الدرس العشرين: حجز الفنادق و السيارة من على النت أرخص بكتير....وحاول تعمله بدرى لو ان ميعاد سفرك تم تحديده بدقة..

الدرس الواحد و العشرين:اذا كنت ناوى تأجر سيارة لا تحجزها فى الأيام الأولى لوصولك الى أن تتعرف على البلد و تشوف الشوارع و تعود عينك على النظام...لمؤاخذة يعنى...

الدرس الواحد و العشرين: اعمل رخصة دولية حتفيدك فى السواقة فى الستين يوم الأولى....

الدرس الثانى و العشرون: كن قدوة فى كل تصرفاتك....اعلم انك مراقب من ناس عارفين انك عربى...مسلم...عندهم تخوفات منك مخفية....بيفترضوا فيك انك ارهابى همجى بربرى و لا تحبهم....حاول تضيع كل ده بسلوكك اللطيف الذى يحترم حقوق الغير...ويعطف على الصغير...و يوقر الكبير....ساعد من يحتاج...اظهر لهم محاسن أخلاقك و تعاليم دينك...أستغل أى فرصة لتعريفهم ببلدك و حضارتك و....ببساطة كن كما أنت ....مسلم يعيش بأخلاق المسلمين اللى نسيناها و احنا عايشين فى بلاد المسلمين...جاءتك فرصة ذهبية لاكتساب ود الناس و احترامهم ونشر مبادئك واصلاح من حولك...

الدرس الثالث و العشرون: هذه أرض الله...سخرها لعباده جميعا...ودول خلق من خلق الله....ما فيش أحسن من التراحم و المحبة...كن انت القطب الذى يجذب و ليس الذى ينجذب... لو كانت هذه قناعتك و ايمانك الراسخ حتكون انت محور التغيير....وما أدراك يمكن جهودك تكون نواة لأعمال خير كثيرة بنيتك الصالحة. و ضع امامك هذه المقولة : " ان الرجل الواحد يستطيع أن يحى أمة...ان صحت رجولته"

يتبع...

[ELSHAMY]

الدروس المستفادة

الدرس الرابع و العشرين: عند شراء أى شىء يجب التأكد هل السعر المكتوب مضاف اليه الضرائب أم لا حتى لا تفاجأ عند الكاشيير بدفع حوالى 15 % من السعر كضريبة

الدرس الخامس و العشرين: كل ما سيتم شراؤه بعد اللاندينج لا يمكن استرجاع الضرائب المضافة اليه فى المطار اذا حاولت السفر كما يحدث مع السياح لأن سيادتك أصبحت مواطن كندى تدفع ضريبة على كل ما تشتريه..

الدرس السادس و العشرين: عند شراء أى مأكولات جاهزة اقرأ جيدا : تاريخ الانتهاء - المكونات- حتى لا تقع فى المحظور.

الدرس السابع و العشرين: تذكر دائما ان تشرك زوجتك و أطفالك فى كل ما تقوم به من أعمال سواء انهاء اجراءات حكومية, بنكية, شرائية, حتى فى المطار...أشرح لهم باسلوب يتناسب مع امكانياتهم كل ما تقوم به من خطوات وأسبابها و الفايدة منها.... كيفية التصرف مع الناس و احترامهم...

الدرس الثامن و العشرين: التلميح الذكى لأطفالك أننا نأخذ من الناس ما يناسبنا و نترك ما لا يناسبنا....دايما خليهم عارفين انهم مختلفين فى سلوكياتهم عن غيرهم وان عندهم معايير مختلفة لقياس الأمور. ....

الدرس التاسع و العشرين: غض البصر فرض عليا.....أفديه بروحى و عينيا...

يتبع

[ELSHAMY]

الدروس المستفادة

الدرس الثلاثون: اذا كان وصولك لعمل اللاندينج فى فصل الشتاء فلا تتهاون فى موضوع الملابس الثقيلة خصوصا بالنسبة للأطفال :rolleyes: ....و يرجى مراجعة حلقة مكونات شنظة السفر...

الدرس الواحد و الثلاثون: اعطى الفرصة لأولادك و زوجتك ان يتعاملوا مباشرة مع بعض المتطلبات اليومية مثل شراء شىء أو قطع تذاكر مع مراقبتهم من بعيد لبعيد و مراجعة و تصحيح الأخطاء و الثناء على االأمور الصحيحة حتى تزول رهبة الغربة.

الدرس الثانى و الثلاثون: اعمل درس عملى للأولاد على شكل و حجم و لون مختلف العملات الورقية و المعدنية.....ما تنساش تلم الفلوس من العبال بعد ما يشوفوها...

الدرس الثالث و الثلاثون: خليك دايما على وضوء و انت خارج لأى مشوار....ميعاد الصلاة ممكن يجيلك و انت فى أى مكان فتكون جاهز و ما عندكش حجة لتأجيل الصلاة.

يتبع...

[ELSHAMY]

سؤال يادكتور الشامي بالنسبة لشهادات الاولاد , هل المطلوب عمل مصادقة لجميع الشهادات من الاول ابتدائي لغاية مراحلهم الدراسية ام فقط السنة الخيرة ؟

فقط سنة الخبرة.....وان كان هناك ناس قالوا لى مش محتاجين اى شهادات و بيدخلوهم حسب السن

[ELSHAMY]

امبارح سمعت معلومة من دكتور ان نبوبرونزويك بتسمح للاطباء بمزاولة المهنة من غير معادلة..و الراجل ده مصدر موثوق منه.

اخبار جميلة....فى انتظار تفاصيلك المعتادة يا أبو أسكندر

تحياتى

[ELSHAMY]

الدروس المستفادة

الدرس الرابع و الثلاثون: هام جدا تحديد أهدافك من موضوع الهجرة من بداية القصة...مطلوب تفكير منطقى عميق يتناسب مع ظروفك التى لا يمكن أن تتطايق مع ظروف أى أسرة أخرى الا نادرا....اذا هو موضوع تفصيل على قدك.

الدرس الخامس و الثلاثون: انت ذاهب الى المجهول اللى فى علم الغيب فلازم تتسلح بكل ما تستطيع من قراءة و معرفة و تثقيف دينى و غيره حتى تستطيع مواجهة ذلك....فلابد من أن تأخذ بالأسباب و تجعل النتائج على الله.

الدرس السادس و الثلاثون: أولادك.....أولادك.....أولادك...أرجوك لا تفقدهم و لا تكون سبب فى ضياعهم و ضياع ذريتهم من بعدهم ويكتب لك انت الوزر...كندا لا تراهن عليك و لا على زوجتك....نحن قريبا الى زوال....الرهان الأكبر على هذه الذرية....أنت دورك كان الاستفادة المادية منك و من مركزك و وظيفتك و هى الأشياء التى جعلت نقاطك عالية فى التقييم المبدئى....اندماج أولادك فى المجتمع الجديد و تأثرهم به قادم لا محالة....مهمتك التقليل من هذا التأثير.

الدرس السابع و الثلاثون: لا تظن انك دوما ستكون قادرا على اتخاذ قرار العودة فورا اذا الدنيا أظلمت فى الهجرة....لذلك اجعل لنفسك دايما خط رجعة و خيط رفيع يربطك بمصدر ما للرزق....أعرف أحد أصدقائى الأطباء سحب أسرته تانى على السعودية و كرسى فى الكلوب و هد المعبد كله لما عرف ان بنته سلوكها بدأ يسوء....

الدرس الثامن و الثلاثون: اذا كان أولادك ما زالوا صغارا فأنت تستطيع بشخطة واحدة تخليهم يطيعوا أوامرك....الأمر يا صديقى مختلف لما تكون هناك :bro: و تناقش شاب أو شابة فى العشرينات معاه باسبور و متخرج من كندا :bsmal: ....الأمور حتفرق لأنك حتكون راجل عجوز (اذا كنت لسه على قيد الحياة).

الدرس التاسع و الثلاثون: طب ايه الحل ياشامى فى رأيك ؟ الله المستعان نحاول نجاوب فى الدروس القادمة

يتبع

[ELSHAMY]

جزاك الله كل خير يا د. الشامى

العزيزة ألمر...

ريحة البحر هفت عليا....جايلك يا أسكندرية الشهر الجاى ان شاء الله...شكرا لك

[ELSHAMY]

أخوانى و حبايبى:

madzoro - drpharma - drbakir - meeedoooo - toOoli - bent misr - osamajouda - الحازم حسن - مهاجرة - المر

شكرا لكم المتابعة و ربنا يسمع منكم.....دعواتكم

[ELSHAMY]

الدروس المستفادة

النهاردة الحقيقة مش درس....دى محاضرة فيها بتاع خمستاشر درس فى خلاصة موضوع الأولاد من وجهة نظرى المتواضعة القاصرة.

..... لأول مرة أعترف أمامكم ان الموضوع اللى حاتكلم فيه فى منتهى الصعوبة...الأفكار تتزاحم فى رأسى من كثرة ما عرفت و قرأت و رأيت.....موضوع الأولاد علامة فارقة فى موضوع الهجرة كله.....و أنا أعترف أيضا ان هذا الموضوع عامل لى صداع من يوم ما جيت من كندا...

أحيانا ترى و تسمع عن أمثلة نجحت فى الحفاظ على هويتها و طبقت الخطة التى وضعتها بحذافيرها بعون الله طبعا و التوكل عليه....فينشرح صدرك و يحدوك الأمل فى النجاح....و أحيانا أخرى ترى و تسمع أمثلة أخرى فشلت فى كل ذلك وكانت الهجرة هى بداية طريق ضياع لا معالم له...

بداية أيضا أنا عارف ان كلامى ممكن ما يعجبش بعض القراء وذلك ليس لأن كلامى خطأ و لكن لخلاف فى القناعات و المبادىء.....و أنا كما -عرفتمونى – لا أدعى انى على حق مطلق فكل البشر يؤخذ من كلامه و يرد الا المعصوم عليه الصلاة و السلام..لكنى متأكد أن كثيرين من قراء هذا الموضوع بيقتنعوا بأشياء مما أكتبه و ذلك ملاحظ من تواصلهم معى.....وهذا فى حد ذاته مسئولية عظيمة......يعنى خلينا نتكلم على الناس اللى فى طريق الهجرة اللى بيحبوا ربنا و مش عايزين يعصوه و لا يكونوا سبب فى ذلك و كمان بيحبوا أولادهم وعايزين لهم مستقبل أحسن من المتاح.

هذه مقدمة علشان أنقل لكم قد ايه الموضوع محير....و فى الأمور اللى بتشكل علينا فى حياتنا علمنا الرسول عليه الصلاة و السلام ان علينا بصلاة الاستخارة قبل الشروع فى عمل أى شىء.

أحيانا كثيرة أقول لنفسى طيب ليه لا أكون أنا مثال نجاح و تطبيق جيد لما عرفته و نويت أعمله و الله المستعان أولا و أخيرا....

بالصدفة البحتة و جدت اليوم فى مداخلة أحد الأخوة و هو صاحب تجربة فى انجلترا وجدت نفس الكلام اللى كنت ناوى أكتبه تقريبا بالذات فى الجزء الخاص بتقسيم أنواع المهاجرين من حيث الوقت الباقى لسفرهم و أعمار أولادهم.... (أرجو الرجوع لهذه المداخلة... http://www.egyptiantalks.org/invb/index.ph...eaded&start

لكنى هنا أضيف بعض الأبعاد الأخرى من وجهة نظر المتفائل بالخير ...

دعونا نتفق على النقاط الأتية و نمشى مع بعض واحدة واحدة و أنا هنا معاكم بما اننا بقينا عيلة واحدة كأنى بأفكر بصوت عالى و أركز هنا على صنفين من المهاجرين ذوى الأولاد:

1) الأولاد الذين سوف يولدون هناك أو سافروا كندا و هم صغار بدون ادراك و اتربوا هناك مشكلتهم بتكون أصعب مستقبلا و حلها بالكامل على عاتق الأهل و يتوقف و ضعهم على الميعاد الذى قرر الأهل فيه الرجوع أو عدمه.

2) الأولاد حول سن البلوغ (اكثر و أقل) و نشأوا و أتربوا فى بلد عربية (مصر أو خليج) مشكلتهم يتم معالجتها قبل السفر باعداد جيد و خطوات مدروسة تطرقنا الى بعض منها فى دروس سابقة و بين السطور.

هناك عنصر هام و هو عنصر الوقت....و أعنى به المدة المتبقية على بدء الهجرة ...وهذه هى الفرصة المتاحة لزرع المبادىء و تحديد الأهداف فى نقاش فكرى مفتوح فى وجود الزوجة و الأولاد....طبعا قد يقول قائل "نقاش مين يا عم" أو يقلل من قيمة هذا الكلام....أقول لهم: اذا كنت عمرك ما عملت ده قبل كده مع أولادك طيب ليه ما تجربش و نتناصح بيننا و بين بعضنا فى أحسن الطرق لتوصيل المعلومة و ايقاظ حاسة التفكير و المناقشة لدى الأولاد....وكل واحد منا يحكى تجربته للأخرين.

طبعا الموضوع مش حيتم بشكل رسمى ....يعنى الأولاد مش لازم يشعروا انهم بيحضروا محاضرة فى الأخلاق....لكن خليك ذكى فى التعامل و تحايل بكل الطرق فى توصيل ما تحب....مرة على الغدا....مرة أثناء فسحة....مرة فى السيارة....مرة غير موضوع الكلام و حوله على موضوع الهجرة و اشرح تخوفاتك....

لا تنسى فيه نقطة هامة جدا فى صالحك و هو ان الصنف التانى من الأولاد بيكون متشوق لخوض التجربة بأى تمن....و بيحلموا بهذه الحياة اللى سمعوا عنها....فيجب عليك ان تستغل هذه النقطة أسوأ استغلال و تلعب على مشاعرهم و تعمل معاهم اتفاقات مع تهديد مستتر بأنك ممكن ما تروحش لأنك خايف عليهم من كذا وكذا...

أوعى تفتكر ان فتح الكلام مع الأولاد غير مجدى بحجة انهم صغار ما بيفهموش.... تبقى واهم....العيال بتفهم كل حاجة و لو علاقتك بهم تغلفها المحبة و الأحترام حيكون تلقيهم لكلامك على أحسن ما تتمنى.....و يمكن ينفذوا كلامك فقط لأنهم بيحبوك و عارفين من تاريخك معاهم (أرجو ما يكونش تاريخ أسود) انك دايما خايف على مصلحتهم و بتحب لهم الخير.

الغرض من هذا الأمر كله كما سبق أن ذكرت ان الهجرة اذا كانت شر لابد منه وان البديل لها من عودة أو بقاء فى مصر شر أخر على مستوى مختلف...اذا فيجب أن تعذر نفسك عند وقوفك أمام الله يوم الحساب....و تكون نصحت و وضحت وشرحت وأخذت بالأسباب و عملت كل اللى عليك بأخلاص....و النتايج حتكون على الله....

الحلقة الجاية أكمل....حاسس ان نفسى أتقطع...

[ELSHAMY]

أخوانى .....أخواتى الأعزاء

وحشتونى....أبدأ من اليوم عرض بعض صور رحلتنا الى الاراضى الكندية الشقيقة حتى يكون الملف متكامل

تحياتى للجميع

هذه الصورة من بلكونة الشقة فى أوتاوا أول يوم فى الرحلة...

صورة لصالة الوصول بمطار مونتريال

الجندى على و السيرجنت ندى فى أحد شوارع أوتاوا و التلج أعلى من قامتهم

.

هذه صورة بوستر فى شوارع أوتاوا يدل على مدى النقص الشديد فى الاطباء

ده بقى المفروض فى الصيف انه سلم

مبنى البرلمان - اوتاوا

القائد الشامى و الجندى على - منظر خلفى - :sad: بجوار البرلمان

قناة "ريدو" فى أوتاوا و هى متجمدة و تستغل فى الشتاء كمجرى للتزحلق على الجليد

أمام مبنى البرلمان

النصب التذكارى للقائد الشامى بعد فتح أوتاوا....

أوتاوا مدينة مزدحمة جدا :blush2: ...حتى ما فيش مكان على كرسى تقعد عليه فى الحديقة... :wub:

نعود مع مجموعة صور جديدة:

أول يوم فى أوتاوا

محاولات ليلية لأزالة الثلج المتراكم

نعود مع مجموعة صور جديدة:

أول يوم فى أوتاوا

محاولات ليلية لأزالة الثلج المتراكم

أول صورة تنشر للولد النافيجاتور فى الطريق لكينجستون

مظاهرة للجالية الصينية فى أوتاوا احتجاجا على أحداث التيبت...على فكرة البوليس كان بيحرسهم طوال المظاهرة....بالضبط زى ما بيحصل فى مصر

أمام منزل صديقى فى كينجستون

منظر عام لمدينة تورونتو من أعلى CN Tower

منظر أخر لمدينة تورونتو

مكان الهدايا التذكارية أسفل CN tower

Rogers Center

تورونتو وا لبحيرات

الأرضية الزجاجية قى ال CN Tower

منظر جميل من أعلى البرج

التوك توك مسموح بيه فى تورونتو...!!!

بعد اذنك يا بوب شوارع كمان عشان تحرم يا بسام

حرمت يا بسام ؟

ولسه.....

كفاية عليك كده النهاردة...

كده قربنا يا بوب من مكان الشغل ؟ :rolleyes:

توزونتو كمان وكمان...

متحف الهوكى فى تورونتو

صور جديدة لمبانى تورونتو

]

مبانى تورونتو كمان و كمان

[ELSHAMY]

هذه صورة بوستر فى شوارع أوتاوا يدل على مدى النقص الشديد فى الاطباء

يادكتورنا العزيز النقص واضح و فى كل المقاطعات ....بس ايه النتيجه ,هل المعادله مثلا أتسهلت , أنا اختى دكتوره و خلصت المعادلات المطلوبه تعال اتفرج مطلوب منها تشتغل فين سنتين قبل تلاقى شغل فى تورنتو ....أماكن بعيده تماما عن تورنتو ...أرياف يعنى تأخد 3 عيال تربيهم فى وسط مجتمع من البيض....... بينك و بين أقرب جامع مسيره بالأبل و البلد حيلتها كام محل عم المنوفى الى قدام عينو الحلوانى أنضف منهم ....الحكايه مش شغل و خلاص .....

أخى ياسر

طيب هل تعتقد ان السادة ملوك ال Royal College وهى الجهة المسئولة عن هذا النقص حيغيروا رأيهم تحت ضغط الحاجة..؟؟...وهل تتوقع شىء فى هذا الصدد فى التغيرات المرتقبة فى نوفمبر ؟

[ELSHAMY]

غدا ان شاء الله مع مجموعة أخرى من الصور exclusive لأحباء الشامى.

تحياتى

[ELSHAMY]

اخوانى و أخواتى الأعزاء

السلام عليكم و رحمة الله

استكمالا لما سبق من خواطرى حول مرحلة الاعداد للهجرة و بعد ما ذكرته من ملامح هذا الاعداد خاصة بالنسبة للأطفال ....وفى هذا الصدد أحب أن ابشركم ببشرى جميلة وهى ردة فعل الأولاد المبدأية بعد أن بدأت خطة الاعداد معاهم وكما شرحت لكم كانوا متفهمين بل وعدوا بأن يكونوا عونا جيدا لبناء مجتمع مسلم جديد و أن يكونوا أيضا نواة لأصلاح من حولهم.....و الجميل ما ذكرته لى ابنتى الكبرى من رغبتها فى أن يسلم على يدها أكبر عدد من الناس...!!!!....قد تكون أحلام مستحيلة لكن القصد من كلامى هو أن ابشركم أن الكلام بيجيب نتيجة و الله المستعان لتحقيق المراد.

وجدت فى نفسى بعد ذلك ميلا لخوض التجربة و يحدونى امل كبير فى تحقيق أهدافى و تحدى العقبات.

ظروفنا نستطيع - فى كثير من الأحيان - أن نتحكم فيها و نصنعها _ بأذن الله طبعا - ....و هذا يفتح باب للأمل لكثير من المهاجرين ان يكونوا نواة لمجتمع جيد بداية من اختيار مكان المعيشة....و الجيران...و القرب من مسجد....و افشاء السلام...و التعارف ...

هى دعوة اذا لأن نكون لبنة التغيير و الالتزام لمن اختار هذا الطريق...

أشعر ببارقة أمل ....معية الله تكفينا و لو تخلى عنا الجميع.....فلنصنع عالمنا و نحميه....و نترك بصمتنا و نرعاها....و نبذر بذورنا و نتعهدها.

و الله من وراء القصد و هو يهدى السبيل.

[ELSHAMY]

كندا وحشة

الشوارع مش نظيفة

الزبالة فى شوارع كندا للركب

الناس فى كندا بتشحت ومش لاقيين شغل

الضرائب بتاخد كل فلوسك وبتخليك تكمل الشهر عيش حاف

الفساد فى كندا بقى للركب ، والرئيس بتاع كندا وحش وابنه عامل فيها ريس

ابن الرئيس الكندى ملموم على شلة رجال الاعمال الكنديين وصاحبه بتاع الحديد مالوش حل

حلها بسيط .... قاعدين ليه؟ مش لسه معاكوا الجنسية المصرية ، سيبوا كندا للناس اللى بيقولوا عليها حلوة ، وارجعوا مصر ردوا لها جمايلها عليكوا ، وادوا الفرصة لغيركوا يروحوا يجربوا يمكن تعجبهم.

أخى محمد

الله ينور يا باشا.....كلام فى الجون ....

اسكندرية أجدع ناس...

[ELSHAMY]

1- بما أن الPR CARD تأخذ مدة شهر فلماذا أنت كانت مدة رحلتك 17 يوم وأنا أعلم أنك إذا لم تأكذ ال PR فلن تتمكن من العودة إلى كندا مرة أخرى

2- أعلم أن الكنديين لا يقومون بفحص الجوازات عند مغادرة البلاد ولكن هل سألت المحامي عن ماذا سوف تقول للكنديين في المطار عند عودتك للحصول على الجواز الذي تحتاج إلى الإقامة في كندا لمدة 3 سنوات منهم سنتين حتى تحافظ على ال PR خلال مدة خمس سنوات .

الأخ العزيز kAINE

شكرا لكلماتك الطيبة....بالنسبة لأسئلتك:

1- ال PR CARD يحتاج شهر لأستلامه ...و أنا وضحت انك مش لازم تكون موجود لأستلامه بنفسك...فقط المطلوب اعطائهم عنوان بريدى لأرسال الكارت عليه بعد حوالى شهر من عمل اللاندينج....وبالفعل تم ارسال الكارد الى العنوان ...و بعد ذلك قام المحامى بارسال الكارت لى بالبريد و استلمته بالفعل فى السعودية منذ اسبوع..

2- عند عودتك الى كندا انت غير مضطر و لا الكنديين حيسألوك كنت فين...و لا رايح فين ...ولا ايه المدة اللى قضيتها فى الخارج..

الله يعمل لك الخير...

تحياتى

[ELSHAMY]

الأخوة الأعزاء

السلام عليكم و رحمة الله

أنا لى حوالى اسبوع لم أكتب حرفا فى هذا الموضوع...وشايف الحقيقة ان المعركة احتدمت و لى غرض - بعد اذنكم - انى انهيها ...و تكون مداخلتى هذه لوضع حد لهذه الترهات التى لم يستفد منها باقى القراء على طريق الهجرة أى شىء الا....الاعجاب بفلان ...أو الزعل من فلان....وأحذر الجميع للمرة العاشرة أن هذا المكان فكرته الأساسية هى توجيه النصح للناس و ارشاد من يريد دون أجر الا ابتغاء وجه الله....و اللى عنده نية تانية فأنا أرجوه أن يبحث عن مكان أخر لنشر أفكاره ....لأنى أشعر ان رغبة الاتنصار للنفس و تغليب الرأى هى السائدة....كما انى أرى اصرارا عريبا من بعض الأخوة لفرض أرائهم على الأخرين و كأنهم أوصياء عليهم....مما يؤدى الى الرد المماثل و محاولة تصيد الأخطاء حتى و لو كانت كتابية أو نحوية....ثم يتدخل الشيطان...و تعلو نبرة الحدة...ثم يصل الأمر للسباب و التشكيك فى النوايا....ثم تتدخل الادارة لتهدئة الأمور...أو قفل باب المناقشة.....و هذا ما لاأريده لهذ الموضوع الذى بذلت فيه مجهودا كبيرا ...و أرجو الله أن يجعله فى ميزان حسناتى...

نرجع تانى و نفكر بهدوء....ينقسم الناس فى هذا المنتدى الى قسمين:

1 قسم هاجر الى كندا ...و هؤلاء بدورهم ينقسموا الى نوعين:

* نوع عايش فى كندا و يكافح و ربنا بيرزقه و مبسوط

* نوع تانى عايش فى كندا و مش مبسوط لأسباب يراها و خاصة به (وليس لنا بها شأن)

2 قسم لم يهاجر....وهؤلاء أيضا ينقسموا الى نوعين:

* نوع مقتنع بفكرة الهجرة ...أو بدأ اجراءاتها...أو بيحلم بيها و يراها حل جميل لمشكلات خاصة به و أجندة معينة عنده

* و نوع غير مقتنع...و يراه موضوع خطر... و مجازفة لا تستاهل....

....حلو الكلام.....عايزكم تقولوا فى نفس واحد: كلام جميل..

الأن يستطيع كل واحد أن يضع نفسه فى القسم المناسب...و نبدأ فى حل الاشكالية ببعض المعادلات و الأفتراضات...

النوع الأول من القسم الأول (الناس المبسوطة فى كندا) حيكون ايه تأثيرهم فى القسم التانى:

المقتنعين بفكرة الهحرة حيزيد اقتناعهم ...و يستبشروا خيرا...و تتفتح أمالهم ...و تنتعش أحلامهم...و يثبتوا على الطريق...ويبدأوا فى كتابة الردود أمثال: الله ينور يا دكتور...الله يبارك لك....ان شاء الله نتقابل هناك

و الغير مقتنعين....بعضهم سيتأثر قليلا و يبدأ يقتنع و الغالبية مش حتتأثر بل يبدأ فى سرد أسبابه للرفض الخاصة به و التى لا تهم أعضاء المنتدى فى شىء و لن تقنع القسم الأول....و تبدأ المشكلات لمحاولتهم فرض قناعتهم و التقليل من شأن الفكرة....و يمكن يكون السبب فقط انهم مش عارفين يعملوها.....أو مروا بتجربة مريرة...أو سمعوا عن واحد قريب لجيران أصحابهم خاض التجربة و فشل...

النوع الثانى من القسم الأول (الناس الغير مبسوطة فى كندا) حيكون أيه تأثيرهم على القسم التانى من خلق الله:

المقتنعين بفكرة الهجرة ممكن يجيلهم احباط و لكنه مؤقت....و ممكن يأخذ العبرة و الدرس و يحاول تجنب الأشياء السيئة فى التجربة....لكنه فى النهاية لن يتوقف عن المضى فى طريق الهجرة المقتنع به...

أما الغير مقتنعين أساسا فلن يزيدهم الكلام الا اقتناعا بفكرتهم الرافضة للهجرة....و رضا بأنهم كانوا على حق... مع شىء من التشفى الداخلى (لبعض أصحاب النفوس الحاقدة)....

حلو الكلام.....كلام جميل...

و هكذا نرى أن كل الأراء يمكن طرحها بود و حب و دون ملاسنات و لا سباب ولا تجريح....و أن الاستفادة من هذا النقاش ممكن جدا أن تكون مجدية اذا غلفت بشىء من المصداقية....و تفهم الأخر.... و تقبل المخالف....و القناعة بحرية الرأى....مع افتراض النية الصالحة.

أرجو من الجميع الرجوع عن تلك المهاترات....و أن تكون هذه المداخلة أخر الأحزان....وكل واحد ممكن ينام قرير العين ...

دعواتكم لى ...وخالص حبى و تحياتى للجميع

[ELSHAMY]

الأخت مصرية و مغتربة

أولا حمدا لله على سلامتك ان شاء الله بالتوفيق

أنا فعلا لم أعرف انك سألتينى عن شىء و انا طنشت زى ما بتقولى.... و الدليل على كده ردودى عليكى فى كل مرة سألتينى عن أى

شىء .....و يمكنك مراجعة بريدك الخاص .... و لعلمك الطناش ليس من طبعى ... و مرة أخرى تحت أمرك فى أى سؤال ...أعتقد انك ظلمتينى

[ايهاب سالم]

عند عودتك الى كندا انت غير مضطر و لا الكنديين حيسألوك كنت فين...و لا رايح فين ...ولا ايه المدة اللى قضيتها فى الخارج..

غير صحيح

عند عودتك لكندا ستستلم على الطائره كارت تكتب فيه تاريخ خروجك من كندا أخر مره و توقيعك على الكارت وثيقه ضدك عند ثبوت العكس وهذا سهل إثباته بوسائل كثيره الأن

موضوع التلاعب للحصول على الجنسيه أصبح صعب كتير عن زمان

و أعرف حالات كتير اتكشفوا

أعرف حاله إتكشفت في الجمارك بعد ما عدوا من ضابط الجوازات ثم ضابط الهجره

وأعرف حاله إتكشفوا لأنهم لم يجدوا لهم سجل أي إستعمال لكارت التأمين الصحي لأنهم لم يذهبوا لطبيب ولا مره لأنهم طبعا كانوا عايشين خارج كندا

وفيه ناس كتبوا بيانات كاذبه في ورق الجنسيه و امتحنوا الامتحان ثم رجعوا الخليج و لما عادوا بعد مكالمه من المحامي لحضور إحتفال حلف لقسم و إستلام الجنسيه وجدوا نفسهم على قائمة ترقب الوصول لأنهم إتكشفوا

وفصلوا الزوج عن الزوجه و استمروا يحققوا معاهم 12 ساعه في المطار

وطبعا أقوالهم تضاربت ولم يستطيعوا إثبات إنهم كانوا عايشين في كندا أبسطها إن أولادهم لم يكونوا مسجلين في أي مدرسه

وتم إلغاء إقامتهم

بأقول لكل من عمل لاندينج و مشي

إمشي عدل يحتار عدوك فيك و إرجع قبل مرور 3 سنوات عليك في الخارج

[ELSHAMY]

شكرا يا أستاذ ايهاب غلى تصحيحك لمعلوماتى

تحياتى