مش هدخل المسجد تاني

[Princesse]

هذه اول مرة افتح موضوع منذ ان اشتركت في منتدى محاورات مصرية

ايوة مش هدخل مسجد تاني...محدش يستغرب

دفعني لذلك موقف تعرضت له اليوم.

الموقف جعلني في شدة الحزن، و سألت نفسي لو كان الرسول صلى الله عليه وسلم بينا اليوم هل كان سيفعل نفس الشئ؟

اخوتي الكرام فقط اريد ان اعرف رأيكم هل اخطاءت ام لا

من مدة طويلة و انا افكر في الانتظام لحضور درس ديني في اي مسجد، انا طول عمري بذاكر فرنساوي على الانجليزي على كمبيوتر

اشمعنى الديني هو الي مقصرة فيه؟

نفسي اتعرف على صحبة صالحة ، نروح مع بعض المسجد و نشجع بعض، و نعمل الخير مع بعض

قررت اليوم اني اروح لاقرب مسجد من بيتنا.

رحت و يا رتني ما رحت

الموقف هحكيه بكل امانة

الموقف:

سألت سيدة تجلس امام المسجد هل هناك دروس دينية في هذا المسجد؟

قالت لي ان هناك مجموعة من السيدات في قاعة المناسبات و انهم في درس دلوقتي، و قالت لي ادخلي اساليهم

دخلت

طبعا اول ما دخلت نظرات الاستنكار من كل جانب

و السيدة الفاضلة المحفظة نظرت لي بكل غضب و بصوت عالي قالت: هو فيه ايه؟؟؟؟؟؟؟؟؟؟؟؟؟؟

انا بصراحة خفت و رجعت لورا: وشرحت ليها ان جاية اسأل على دروس الدين مواعيدها امتى

المحفظة: ما احنا في الدرس اهو

انا: انا بس عاوزة اعرف بتبدوا امتى ؟ و ايه الايام التانية المتاحة علشان انا بشتغل

المحفظة: دورت وشها عني و قالت: نكمل الدرس و بعدين نقولك على المواعيد

انا كنت محرجة جدا و حسيت اني بشحت

كنت خلاص خارجة

بس السيدات الي كانوا في الدرس قالوا لي : استني، احنا بنبدأ بعد العصر ، اقعدي معانا..هو انتي طالبة؟

المحفظة: لأ مش يمكن تكون مشغولة ..تعالي يوم تاني ...

بقية السيدات اتكلموا كلهم في نفس واحد و كل واحدة فيهم بدأت تقول لي على المواعيد

المحفظة كان باين عليها اضيقت و اضطرت تقولي على المواعيد: يوم الجمعة قبل الصلاه

اتكسفت اسألها الساعة كام يوم الجمعة

لاني حسيت اني غير مرغوب فيا

و انا خارجة من القاعة تذكرت سورة عبس

سألت وقتها نفسي: لو واحدة غير مسلمة وعاوزة تعرف الاسلام و حصل معاها الموقف دا، هل هتفكر تدخل مسجد تاني؟

وليه احنا نفسنا بندي صورة وحشة عن الدين؟

ربنا سبحانه و تعالى بيقول للرسول : "ولو كنت فظا غليظ القلب لنفضوا من حولك"

هل لاني غير محجبة فليس لي الحق ان اسأل عن دروس دين؟ انا لم ادخل المسجد نفسه ولكني دخلت قاعة المناسبات خارج المسجد، و اكيد لما كنت هحضر الدرس كنت هلبس حاجة على راسي

هل لاني غير محجبة اصبحت منبوذة ؟

وهل هذه هي الطريق علشان نحبب الناس في الإسلام و في الألتزام؟

بجد محتارة

[محمد الششتاوي]

من بداية قراءتي للموضوع وانا توقعت ان حضرتك غير محجبة

انا مش هتكلم في نقطة الحجاب لكن هتكلم عن معاملتهم لحضرتك

للاسف الشديد اللي حصل ينم عن قلة وعي من المحفظة وكل اللي اتعاملوا مع حضرتك باسلوب سيء

والله بصراحة اللي حصل ده في منتهى الاستفزاز

حضرتك رايحة درس يعني معنى كده ان فيه نية داخلية ايجابية

يعني مثلا لو كانت قالت لحضرتك باسلوب كويس ياريت بس تحطي حاجة على شعرك ( وانتي جاية ) عشان ( الشكل العام ) للمحاضرة

بكل تأكيد مش هترفضي وهاترحبي وانا لا اشك ان التعامل بالشكل ده يؤدي للنتيجة دي

وكان ممكن بعد كده يكون في المحاضرات الجاية يكون فيه مناقشات ودية واتوقع انها هتكوزن ايجابية

انما العالم من النوعية دي بتستفزني بدرجة رهيبة جدا جدا

تعامل بالشكل ده وانتي راحة تطلبي التفقه في الدين ده ليس له الا مسمى واحد ,, هو الغباء

واسمحيلي اقول لحضرتك يا ريت ماتحطيش ده في دماغك نهائي

والناس دول لا يعبرو عن الدين نهائي

واحنا صغيرين كان فيه مدرسين تعاملاتهم بمنتهى القسوة والغباء لكن نتج عن تقبلنا تعاملهم ان احنا اتعلمنا

وتذكري قول الرسول صلى الله عليه وسلم

من يرد الله بره خيرا يفقهه في الدين

صدق رسول الله صلى الله عليه وسلم

التفقه له مجالات كتير

في مواقع فيها تسجيلات صوتية كويسة جدا

فيه كتب

والافضل ان حضرتك تروحي مسجد تاني ,, ومحجبة حتى ولو في فترة المحاضرة فقط

نستحمل الغباء لمصلحتنا

تم تعديل 9 مارس 2010 بواسطة محمد الششتاوي

[se_ Elsyed]

يا فندم من حقك تنفعلي وتزعلي - لحظياً -

لكن إنتي حددي .. كنتي رايحه المسجد لمين ؟

لربنا ..

ولا للمُحفظة ؟

لو لربنا .. يبقى ربنا ما بيقفلش بابه قدام حد حتى لو كان كافر .. وبالتالي ما يهمكيش من محفظه ولا غيره .. وفي عشرات المساجد فيها ناس محترمين غير الست دي

لو للمحفظه يبقى من حقك تزعلي منها وتاخدي على خاطرك

اتفق معكي إن الفظاظه وقلة الذوق متوفره عند ناس كتيرة وبيصدروا منها كمان

هوني على نفسك وده موقف بسيط ومش مستاهل

[Folana]

السلام عليكم ورحمة الله...

الأخت الفاضلة برنسيس..

مداخلة حضرتك ذكرتنى بمثل شعبى..أنا الحقيقة لا أعرف الى الان مغزاه أو المناسبة التى قيلت فيه..ومازلت أبحث عن جذوره

لكن تخيلت أن من أطلق المثل الاتى قد يكون مر بنفس ظروف حضرتك...المثل بيقول "بركة ياجامع ان جت منك مش منى"...تقريبا كده يعنى...

حضرتك حكمتى انك مس حتدخلى الجامع لأنك دخلتى تسألى عن مواعيد دروس الدين وقابلوك بعدم إكتراث..لا أظن ان السبب ان حضرتك مش محجبة...ولكن قد تكونى تحدثتى بلهجة متعالية شوية...أو ذكرتى انك مش فاضية ومستعجلة...ممكن...

على أى حال أنا لا أستطيع أن أثنيك عن قرارك..أو أجمل لك الذهاب الى المساجد..أو أذكر لك مزايا وجمال حفظ الايات القرآنية بالتفاسير والنطق الصحيح...

ولكن ان شاء الله تجدى ضالتك..سواء فى أحد المساجد أو فى المنزل ...وبالمناسبة..عند الذهاب الى مسجد فى المرة القادمة للسؤال عن مواعيد الدروس ...حتجدى حضرتك ورقة متعلقة على الحائط بها مواعيد الحفظ والتلاوة...ومواعيد للتفاسير..واخرى للاحاديث النبوية والفقه...

ماحدث مع حضرتك لا يدل بأى حال من الاحوال أن الاخوات غليظات القلب ..أو سخرن من حضرتك..او يعنى بالبلدى كده إتمنظروا عليك....اطلاقاً...يمكن بس لم يستقبلوك الاستقبال اللى كان حضرتك تتوقعيه....وحتى لو كان ظنك فى محله ..فان هذا مردود عليهن وليس على المساجد او دروس حفظ القرآن...

ان شاء الله ربنا يهىء لك من أمرك رشداً.....وتجدى المكان المناسب الذى يساعدك على تحقيق مرادك...

خالص مودتى واحترامى

[لماضة مصرية جدا]

السلام عليكم و رحمة الله و بركاته

عزيزتي برينسس

الموقف اللي حصلك ده...و لا حاجة مع موقف حصل معايا

بس قبل اي حاجة احب اقولك

الجامع ده مش بتاع حد.....ده اسمه بيت ربنا

و طالما انك اخلصتي النية.....و الله هتلاقي ربنا بيثبتك.....و بيدلك للخير

انتي ابتديتي خطوة تقربك لربنا..... و اعلمي ان الشيطان هيقفلك بالمرصاد....هيفضل يقولك....حتي محفظة القرآن شوفي كلمتك ازاي...لا ارجعي بيتك احسن....و انتي اصلا ما انتي كنتي بتتفرجي ع الدرس في التلفزيون

و الله صدقيني يا برينسس....كفاية انك تكوني في صحبة خير...... و تحسي ان الملايكة حواليكي.....و يا سلام لو دعيتي ربنا انه لو قبض روحنا تكون في سجدة للقائه او في درس علم....ياااااااااااه

ده غير انك لما بتتعلمي الدرس في مجموعة مختلف خااااااااالص عن التلفزيون بيكون عندك فرصة تتحاوري و تتنااقشي....و تتعلمي اكتر

خليني بقي اقولك الموقف

من فترة الواحد حس بتقصير شديد... و دايما.....و كانت النية الحمد لله اني ابتدي احفظ قرآن...و طبعا الموضوع في مصر ما فيهوش اي مشكلة..... و ده نعمة حقيقية

لكن في اماكن تانية كتير.....نادرا ما تلاقي مجموعة تحفيظ

كنت عقدت النية بفضل الله...بس مكنتش استدليت علي مسجد فيه مجموعة سيدات و كده

في ليلة

كنت نازلة..... لابسة بنطلون جينز,,,,,و ميكب عادي ....و شنطة ضهر....أذن العشا.....قولت طب بما اني في الشارع اروح اصلي في الجماعة و يمكن اكتشف مكان جديد

المهم وصلت لجامع و قبل ما اخشه.......فوجئت بكمية الاحذية الحريمي..اللي بره الجامع... اتبسطت اوي لاني حسيت اني اكيد هلاقي مجموعة تحفيظ قرآن

دخلت الجامع و انا مبسوطة جدا....اول ما دخلت....كانت السيدات قاعدين في دايرة......و نزل عليهم الصمت بدخولي....و نظرات من فوق لتحت (انا عارفة اني كنت لابسة كاجوال....بس كنت عايزة اصلي)

و الله حوالي 3 دقايق و نظرتهم ليا لا تتوقف.....و من غير اي كلمة......و بعدين واحدةمنهم شاورتلي باصبعها علي مكان لاسدالات الصلاة

انا حسيت اني منبوذة جدا

المهم

لبست الاسدال.....و صلينا العشاء جماعة الحمد لله.....و فاكرة اني بكيت جدا

بعد كده روحت سالت واحدة منهم عن الدرس و تحفيظ القرآن.......لقيتها بتشيح بوجهاعني و بتقولي... الموايعد كذا و كذا بس يا اختي ارجوكي الالتزام....و كانها بتوعق فيا

و الله يا برينسس يمكن انا مش لابسة اسدالات طويلة زي الاخوات الفضليات......بس كان لبسي محتشم....لقيتني بقولها يا اختي الفاضلة اما سمعتي قول الله تعالي

و"و ادعو إلي سبيل ربك بالحكمة و الموعظة الحسنة"

و قول الحبيب صلي الله عليه و سلم

"تبسمك في وجه أخيك صدقة"

و لقيتها بتسيبني و بتمشي و معلقتش بولا كلمة

عارفة يا برينسس طلعت من الجامع (و بحب اقول عليه جامع عشان بيجمع كل القلوب علي عبادة السجود لربنا...محدش من حقه غير ربنا يحاسبنا) و كنت متضايقة اوي.....و كان الحل السهل بالنسبة ليا اني اقول خلاص اهه عملت اللي عليا

طول الطريق و انا راجعة قعدت اكلم ربنا و اقوله طب يمكن انا غلط...بس مكنشي عندها حق تكلمني كده....طب انا مش زعلت منها بس حد تاني ممكن يزعل اوي و ممكن مش يجي تاني

و الله يا بنتي بعديها ع طول اتعرفت علي اخت نحسبها علي خير

دلتني علي جامع بعيد للغاية لكنه قريب من قلبي جدا...لانك بتلاقي فيه سيدات من جنسيات مختلفة جدا لكن جمعهم فعلا الرغبة في مدارسة القرآن

و سبحان الله المحفظة....اعتبرتني بنتها... و بقت تقترب مني علي المستوي الشخصي جدا

جددي النية يا برينسس و الله ربنا هيدلك

مش ربنا بيقرب مننا سبحانه و تعالي اضعاف ما احنا بنقرب ليه

ركزي ع الغاية و هتوصلي

فيه حاجة تانية

و حبيت اختم بيها

و ده الشيخ بتاعي في مصر...ربنا يرحمه و يغفر ليه

عارفة يا برينسس الناس اللي بيبقي فيه سماحة في وشهم كده

مرة كان عندي مشكلة في دراستي و الدنيا قفلت اوي

روحت الجامع...وسلمت عليه

و بعجين قعدت احكيله شوية عن المشكلة.... و تقريبا انفعلت روحت دخلت كلام بالانجليزي

لقيته بيقولي........انتي هترطني الانجليزي هنا كمان

و لقيت نفسي ضحكت

آدي نموذج تاني في التجاه المعاكس..... لا هو اتشدد..... و لا كشر..... و لا اي حاجة

هو علمني ان الجامع لربنا....و احنا بنتجمع هناك عشان كده

يا رب اكون افدتك

و آسفة ع الاطالة

هنشوفك في الجامع قريب.....و نسالك صالح الدعاء......بظهر الغيب

[Princesse]

افعلا بدأت يا استاذ محمد قرأ في كتب الدين

و نزلت دروس دينية من على النت

انا كنت بس اتمنى ان يكون معايا صحبة صالحة تشجعني اكتر ، صدقني بتفرق كتير..

كان نفسي حد جنبي يعلمني ، مش معقول اكون في بلد زي مصر و اتابع المحاضرات من النت و التلفزيون

طيب المسلمين في الخارج يعملوا ايه؟

[Princesse]

السلام عليكم ورحمة الله...

الأخت الفاضلة برنسيس..

حضرتك حكمتى انك مس حتدخلى الجامع لأنك دخلتى تسألى عن مواعيد دروس الدين وقابلوك بعدم إكتراث..لا أظن ان السبب ان حضرتك مش محجبة...ولكن قد تكونى تحدثتى بلهجة متعالية شوية...أو ذكرتى انك مش فاضية ومستعجلة...ممكن...

والله العظيم يا Folana انا كنت رايحة بعد الشغل و كنت تعبانة بس قلت اروح اسأل علشا اخد ثواب و ابدأ في اقرب وقت

صدقيني انا لو كنت مش فاضية و مستعجلة انا مكنتش رحت اساسا

احب اشكرك و اشكر استاذ se_ Elsyed و لماضة و كل من جاوب على

لان بجد كلامكم افادني جدا

ربنا يجزيكم كل خير

[shiko]

....حبيبتى فى الله الرقيقة ...برنسيس ...

طبعا ...موش هاقدر ازود حرف بعد الكلام اللى سمعته ..من الاخوة الافاضال فو ق...وموش هاقدر كمان اقولك مشاعرى ايه تجاه الحكاية اللى حصلت معاكى

بس هاقولك ....كلنا هذا الرجل ياعزيزى ....ومثال لماضة ...اقرب مثال اتقال ...وردها على المحفظة عجبنى اكتر مانا معجبة بالبنوتة دى "بس الا هو البنطلون الزينس ده ..كان ضايق قوى؟؟"

طب انا بس عاوزاكى تقوليلى كام حاجة صغننة كدة ..وطبعا ممكن على الخاص...

انتى ساكنة فين ....؟؟علشان انا هاساعدك كتير فى اختيار اقرب مسجد ليكى ممكن الاقيلك فيه صحبة صالحة ان شاء الله

الاوقات بتاعتك الفاضية؟؟

شغلك فين ؟؟

واخيرا اقبلى منى كل الود والاحترام لشخصك الجميل...وان شاء الله هانحضر درس مع بعض قريب ...وناخد معانا البت رضوى بالمرة ...

اختك فى الله شيكوز

تم تعديل 9 مارس 2010 بواسطة shiko

[se_ Elsyed]

مديري شخص محترم قوي ومش من الناس المتشددين ... بيحكي لي على موقف حصل له في امريكا في اوائل التسعينات

كان بيحضر ماجستير هناك هو ومجموعة مبتعثة من السعوديين زملاءه .. وجاء وقت الصلاة فصلوا كلهم جماعة في صفوف وجت واحده زميلتهم أمريكية داخله الأسلام من أيام بسيطة .. وقفت في الصفوف الخلفية وشعرها مكشوف ولابسه جيبه عاديه ..

إلا والإمام زميلهم بعد ما خلص يمسكها بما فتح الشيطان عليه من أقسى الألفاظ الانجليزية ويا فاجره يا داعره إزاي تصلي بالمنظر ده ومن المنقي خيار يا معلم ..

بيقول لي كلنا بصينا له وكنا هانكله والبنت جالها شبه انهيار عصبي من البكاء الهستيري ...

الله يخرب بيت العقول الزبالة دي ....

الناس دي بهايم ولا إيه بالظبط ؟

مره أخرى كنت بأستمع لبرنامج على الهواء للشيخ سلمان العوده وهو معروف بأنفتاحه ومخه الكبير ... فشاب سعودي أتصل وكان شبه بيبكي .. وبيقول له .. أنا بأشتغل في أرامكو .. وله زميل أسباني معاه والولد أسلم على إيده .. لكن للأسف يا شيخ الولد مجنون عزف جيتار .. وأنا خايف عليه عشان المعازف حرام وهو على ضلال و و و و

الشيخ كان هاينط في كرشه ..

يا عم سيبه هو بيتاجر في الهيروين ؟ .... وعاوز تغير شخصيته في لحظه .... هو في إيه ؟

ومازلت أتذكر بكل أسى موقفين أبشع من بعض حصلوا أمامي

- وأنا في السادس الأبتدائي كان جسمي صغير ... وكنت رايح أصلي مع عمي في المسجد وإذ بالإمام يهجم علي قبل الصلاة عاوز يرميني بره المسجد عشان الاطفال ممنوع يشوشروا على المصلين .. بمنتهى الفظاظه وقلة الذوق ... لكن عمي كيل له وكان هايسفخه على وشه لاني كنت بأصلي من قبل اولى أبتدائي ..

- الموقف الأخر من حوالي 5 سنوات .. بعد ما خلصت طواف حول الكعبه .. قلت أصلي ركعتين خلف مقام إيراهيم ... وكان قدامي واحد سعودي بدقن لحد ركبته بيصلي .. وجت ست كبيره هندية يمكن حلمت طول عمرها إنها تيجي تشوف الكعبه قبل ما تموت .. الست جايه تعدي من قدامه ... ناخد بالنا وهو بيصلي ... راح مستجمع كل قوى الشر جواه وأقسم بالله بإيد واحده مسكها ورماها زي الواحد ما بيرمي كيس مثلاً كده على طول إيده وطرحها أرضاً ... يعني لولا إن الواحد في الحرم كان مسكه بالأقلام والشلاليت لحد ما يقول حقي برقبتي

لأن إذا كان قطع الصلاة من المارين محرم في الإسلام ... فالحرم أستثناء وحيد عشان الزحام .. وبالتالي لا تُقطع صلاة فرد بإن حد يمر أمامه

حتى لو يا أخي .... وست كبيرة قد جدتك عملت كده .. أقوم شايلها وراميها على طول إيدي عشان تقع تموت أمام بيت الله الحرام ؟

[shiko]

عارفة ...ان هاقولك على حاجة حصلت معايا وافتكرتها دلوقتى ...امى فى صلاة الجمعة او التراويح بتضايق من وجود الاطفال ...والاصوات وكدة ...وعشان هى دوغرى شويتين بتزعق فيهم وتحاول تسكتهم تأدبا للمكان ...وطبعا ده غلط ...منهم ومنها ...المهم انا قعدت افكر ولاقيت فكرة جميلة ...اصبحت نهج فىالمسجد عندنا وعند امى ...

بقينا كل جمعة اشترى كيلو طوفى ...واقعد اوزعه على الاطفال فى امسجد ونشجعهم علشان ...يفضلوا هاديين ...المهم الموضوع ماقتصرش على الاطفال ...حضرتك دخلت الستات المسنات كمان ..واول مايشوفونى او يشوفوا امى ...معاكى طوفى ؟؟كمان المسنات حبوه اوى ...ولما قعدنا فترة مابنروحش المسجد...ورجعت لاقيت ناس كتير اوى ماعرفهاش بتنادينى وتسالنى ؟؟انتوا كنتو فين؟؟وفين الطوفى ...

حاجة بسيطة اوى ...غيرت فى طعم التواجد جماعة جوا المسجد ...

عاوزاكى تتبنى افكار بسيطة تحارب الافكار الجهنمية بتاعة ..الناس دى "ربنا يهدينا ويهديهم "..عشان تكونى انتى سبب فى دخول الناس للمسجد

تم تعديل 9 مارس 2010 بواسطة shiko

[MZohairy]

ما زلت عند رأيي

من أكثر الناس ضررا بالإسلام هم بعض المسلمين للأسف

[محمد الششتاوي]

ما زلت عند رأيي

من أكثر الناس ضررا بالإسلام هم بعض المسلمين للأسف

انا مع رأي حضرتك تماما

مع حزف "بعض " واستبدالها بـ "أكثر "

وأنا آسف اني اقول كده

تم تعديل 9 مارس 2010 بواسطة محمد الششتاوي

[Scorpion]

احممممم ...

العزيزة Princesse

من فترة سردت تلك التجربة كي اوصل فكرة لأخت عزيزة جدآ علي ... و الآن أجدها تجربة تنطبق بالفعل علي حالتنا تلك ...

لفترة في حياتي أمتنعت عن الذهاب الي الكنيسة التي كان يرتادها أبي أعتراضآ علي كاهن فرنسي كان لي تحفظات عديدة علي تصرفاته .. و بالرغم من ان جميع من أحبهم كانوا يرتادون تلك الكنيسة ... و لكنني فضلت التضحية بعدم رؤيتهم حتي لا يكون لدي ما يربطني به ....

حتي أتي اليوم الذي أنهت أمي العزيزة هذا الموقف بجملة واحدة فقط .. جعلتني اتراجع عن موقفي مباشرة :

" يا ابني .. انت بتروح الكنيسة دي عشان تصلي .. و الا عشان تشوف القسيس ؟؟ "

و عندما عدت .. و مع الوقت .. أكتشفت ان انطباعي كان مبالغ فيه حول هذا الكاهن ... لدرجة انني كنت من اكثر من حزن عليه عندما رجع الي فرنسا مرة اخري ....

أنصحك "إذا سمحتي لي " بالعودة الي نفس الجامع ... ربما من وجدتيها أكثر فظاظة ستكتشفي بها جانب طيب اختفي لوهلة خلف مفاجئتك لها بظهورك المختلف ... حاولي .. فعلي اي حال لن تخسري شيئآ ...

تحياتي

[MZohairy]

ربما من وجدتيها أكثر فظاظة ستكتشفي بها جانب طيب اختفي لوهلة

و الله انا رأيي انها تعمل طيب و بدل ما تروح تدي دروس تروح تطبخ لجوزها و عيالها و تنضف بيتها و تنفضه.... أهو على الأقل تبقى وجهت جهودها لحاجه ممكن تكون بتفهم فيها

[ابوهنا]

طبعا موضوع حضرتك فتح مجال لهؤلاء الذين يريدون الاسلام تيكيت ايزى

طبعا الكل هيهاجم المحفظه (طبعا هى مخطئه)

ولكن هل لاتجدى خطأ عند حضرتك

يعنى لو واحد دخل المسجد سكران مع الفارق الكبير فى التشبيه..وهو داخل بيطوح ويسال على مواعيد الدرس يبقى نضرب بالزغاريت علشان سعادته شرف

وياريت ماحدش يقول لو كان الرسول موجود (مافرطنا فى الكتاب من شئ) لان ذلك يدعو الى التفكير بان الرسول توفاه الله والدين ناقص والعياذ بالله

ثم مين قال ان اللى قاعدين فى المسجد هم اصحاب المسجد او هم ولاه على الاسلام

طبعا انتى مخطئه لان الحجاب واجب وحضرتك قلتى لو روحت المره الجايه كنتى هتلبسى الحجاب يعنى حضرتك مقره ان فيه حاجه غلط عملتيها

طبعا ذهاب الست الى المسجد ليست مستحبه وانا امنع زوجتى من الذهاب الى تلك الدروس

لانها يعطلها عن بيتها وزوجها

وتنافشنا واقنعتها انى لو رجعت ولاقيت البيت نضيف افضل انشاء الله من حضور الدروس

[fatfouta]

طب تصدقى بالله انا حفظت القرآن كله وانا مش محجبة قبل ماتجوز

من حوالى 8 سنين كانت اختى اللى اصغر منى بتروح تحفظ قرآن فى مسجد قريب من شغلها اسمه

أنس بن مالك فى شارع شهاب فى المهندسين

بس هى كانت محجبة وانا لأ........كان نفسى اروح احفظ معاها بس مكسوفة

هى كان نفسها تقوللى تعالى بس خايفة انى ارفض لانها لما كانت بتكلمنى على الحجاب انا ماكنتش برضو اسمع لها صراحة واقعد اقولها مش انتى اللى هتحاسبينى

وجت فى يوم كان فيه حفلة لخاتمة قرآن لناس صحابها عندهم فى المسجد وقلتلى تعالى معايا ده انتى هتنبسطى جداااا

والخاتمة دى يا ستى بتبقى عبارة عن الدكاترة اللى هما بيحفظوا بيقعدوا الكام بنت اللى حافظين ادامهم ويبداو يسالوهم بطريقة عشوائية.......والبنات تقرأ الايات الى اتسالت فيها

وبعد كده بيبقوا عاملين فوق فى سطوح المسجد لانه كبيييير جداااااا حفلة.........ايوه حفلة وفيها كل حاجة موسيقى بس طبعا اغانى اسلامية....... وكمان جاتوهات واكل من كله لان كل واحدة بتبقى متبرعة وعاملة ولائم وجايباها معاها

المهم يا ستى انا روحت وكنت خايفة احسن اول مايشوفونى بقى يقولوا دى مش محجبة والاقى منهم رفض يعنى

بالعكس لقيت من ضمن ال8 بنات اللى هيمتحنوا اتنين مش محجبات......... ولما جم يمتحنوا طبعا حطوا طرحة على راسهم

عجبنى جدااا كده وخصوصا انى كان نفسى احفظ بس كان الحجاب بالنسبالى عائق

اللى كانت بتحفظ كان اسمها الدكتورة سوزان.........

مش عارفة اقولك اد ايه........... لما روحت لها وعرضت عليها انى احفظ وهى فرحت بجد..... وحددت لى مواعيدى والمجموعة اللى انا هشترك فيها

وقلتلى هو انتى خايفة عشان الحجاب انى ارفضك؟؟ لا طبعا

قلتلى كلمة ساعتها مش هنساها

المصحف عامل ذى كتاب او دستور نمشى عليه لما بنقراه كويس بنحبه وبنفذ اللى مكتوب فيه

وعلى فكرة انا كنت متفوقة والحمد لله وفيه ناس كانت بتحفظ فى تلات سنين انا حفظته فى 8 شهور

وفى يوم الخاتمة بتاعة مجموعتى الكل ماكانوش مصدقين انى خلصت فى الوقت ده.........وان فيه بنات محجبة ولسه ماخلصوش

عاوزة اقولك يا حبيبتى انك محجبة ولا غير محجبة ربنا هو اللى هيحاسبك مش العبد

وواحدة ذى دى اعذريها عشان اكيد هى اتربت على التنفير........فيه ناس كتير بتبقى متربية على ان اللى مش محجبة دى كافرةةةةةةةة ...........فاهمانى

بس ولاااااااا يهمك وواحدة فظة كده تمنعك عن دينك

وانتى حرة فى الاخر فى موضوع حجابك برضو ماتتحجبيش غير لما تكونى عاوزة تبقى محجبة

على فكرة لو انتى فى القاهرة ابعتيلى وانا هقولك اذاى تشتركى فى المسجد الجميل ده

ربنا يوفقك ويبعد عنك المنفرين لديننا اللى بقوا كتير قوى اليومين دول

اعوووذ بالله ربنا يكفينا شرهم

تم تعديل 9 مارس 2010 بواسطة fatfouta

[محمد الششتاوي]

طبعا موضوع حضرتك فتح مجال لهؤلاء الذين يريدون الاسلام تيكيت ايزى

طبعا الكل هيهاجم المحفظه (طبعا هى مخطئه)

ولكن هل لاتجدى خطأ عند حضرتك

يعنى لو واحد دخل المسجد سكران مع الفارق الكبير فى التشبيه..وهو داخل بيطوح ويسال على مواعيد الدرس يبقى نضرب بالزغاريت علشان سعادته شرف

وياريت ماحدش يقول لو كان الرسول موجود (مافرطنا فى الكتاب من شئ) لان ذلك يدعو الى التفكير بان الرسول توفاه الله والدين ناقص والعياذ بالله

ثم مين قال ان اللى قاعدين فى المسجد هم اصحاب المسجد او هم ولاه على الاسلام

طبعا انتى مخطئه لان الحجاب واجب وحضرتك قلتى لو روحت المره الجايه كنتى هتلبسى الحجاب يعنى حضرتك مقره ان فيه حاجه غلط عملتيها

طبعا ذهاب الست الى المسجد ليست مستحبه وانا امنع زوجتى من الذهاب الى تلك الدروس

لانها يعطلها عن بيتها وزوجها

وتنافشنا واقنعتها انى لو رجعت ولاقيت البيت نضيف افضل انشاء الله من حضور الدروس

اتوقع اني انا من هؤلاء الذين تقصدهم في بداية مشاركتك

رغم ان حضرتك اشرت ان المحفظة مخطئة الا انك شايف ان مش من حق حد يهاجمها, والمفروض نقول للمخطيء حسب وجهة نظرك , أحسنت

....

وجهة نظرك وعليا احترامها

اسمحلى في البداية حتى لا انسى

هناك فرق كبير جدا بين" انشاء" و"ان شاء" وهذا لا يليق عند التحدث عن الله عز وجل

ثانيا :ضربت مثلا بالسكران الذي دخل المسجد وقلت مع الفارق الكبير في التشبيه

يبقى ايه لازمته المثل لو حضرتك شايف ان فيه فارق كبير

يقول صلى الله عليه وسلم

لأن يهدي الله علي يديك رجلا واحدا خير لك مما طلعت عليه الشمس " .

يبقى المفروض انها تزغرط ولا تزغرطش

اسمحلي النوعية دي بتبقى عايزة تمثل وترسم الدور انهم رافضين سلوك معين وبيتظاهروا بكده

امال بقى لو كان محفظ مش محفظة!!!!!!!!!!!!!!

ولك تحياتي

تم تعديل 9 مارس 2010 بواسطة محمد الششتاوي

[justme]

بجد انا لما قريت القصة بتاعت برنسيس ولماضة والردود افتكرت القصة دي من ايام الرسول ولنا فيه اسوة حسنة طبعا مع الفارق في القصتين

أخرج البخاري ومسلم وغيرهما: من حديث أنس بن مالك أن أعرابياً دخل المسجد ثم جعل يبول، فأخذت الصحابة الغيرة، فنهوه وصاحوا به، ولكن النبي الذي أوتي الحكمة في الدعوة إلى الله عز وجل، قال: { لا تزرموه } أي لا تقطعوا عليه بوله، فلما قضى الأعرابي بوله أمر النبي صلى الله وعليه وسلم أن يصب عليه ( أي على البول ) ذنوباً من ماء ( أي دلوا من ماء )، ثم دعا الأعرابي وقال له: { إن هذه المساجد لا يصلح فيها شيء من الأذى ( أو من القذر ) وإنما هي للصلاة وقراءة القرآن وذكر الله عز وجل.. } أو كما قال .

وقد روى الإمام أحمد رحمه الله أن هذا الأعرابي قال: ( اللهم ارحمني ومحمداً ولا ترحم معنا أحداً ).

طبعا الجماعة قالوا الخلاصة فيه خطأ من الطرفين بس الاكبر يقع على المحفظة

عموما انا عايز اقولك حاجة ان الذئب لا يأكل من الغنم الا القاصية

يعني الشيطان دايما عايز يبعدنا عن بعض علشان يستفرد

وربنا بيقول

في سورة العصر

بسم الله الرحمن الرحيم : وَالْعَصْرِ إِنَّ الْإِنْسَانَ لَفِي خُسْرٍ إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ

فيما معناه

ان الانسان لفي خسر الا الجماعة اللي بيتواصوا وحطي تحتها مليون خط

طب بيتواصوا بايه بالحق والصبر

ودول هما الخلاصة

مش معنى ان حد عمل معاكي موقف تاخدي ردة الفعل دي لان الواحد بيعمل ده لنفسه مش للناس وانا متأكد ان المشكلة بتاعتنا الناس اللي بتضرب نار من غير ما تبص

موضوع الدروس اللي على النت كويس بس المسجد احسن لأنك ممكن تلاقي ردود على اسئلتك

وربنا ينورلك طريقك كمان وكمان يارب

تم تعديل 9 مارس 2010 بواسطة justme

[fatfouta]

ربما من وجدتيها أكثر فظاظة ستكتشفي بها جانب طيب اختفي لوهلة

و الله انا رأيي انها تعمل طيب و بدل ما تروح تدي دروس تروح تطبخ لجوزها و عيالها و تنضف بيتها و تنفضه.... أهو على الأقل تبقى وجهت جهودها لحاجه ممكن تكون بتفهم فيها

هقول حاجةتانى تعقيبا عالكلام ده

على فكرة يا زوهيرى انا شوفت ناس وكانوا جيراننا......... من النوعية دى هما متربيين على كده يعنى البنت تبقى لسه عندها تلات سنين يفهموها انك لازم لما تخرجى مع ماما تلبسى طرحة

ولو حد قالك فى جيرانك صباح الخير ........تقوليله وعليكم السلام ورحمة الله وبركاته

البنت كانت عندها 6 سنين وشافتنى واقفة فى البلكونة بشعرى وانا كنت لسه مش محجبة برضوا.......قامت قلتلى على فكرة انتى وحشة والمفروض انى لما اشوفك ادور وشى ........تخيل بقى

بس من جواهم والله طيبين جداااا.........بس كمان بصراحةفى التعامل فظييييين جدااا للاسف

يعنى المٌحفظة برضو معذورة

[msayed]

الأخت الفاضلة

سأحاول التبرير لكلاكما، لحضرتك وللمحفظة حتى لا نترك الموقف –وقد يكون سوء تفاهم- يحرمك من تعلم القرآن

فأنت بكل طيابة وأمل فى التعلم ذهبت إلى المسجد بدون حجاب وفى مخيلتك أن هناك فتيات طيبات سوف يستقبلوكى بود، وتبدئى تعلم أمور الدين ويغفر لك عدم حجابك عند دخول المسجد نيتك الطيبة.

أما المحفظة فالموقف بالنسبة لها كان مفاجأة أن تجد فجأة أمامها فتاة غير محجبة فى المسجد وهذا الأمر ممكن تكون ماشافتهوش من أول ما بدأت تحفظ قرآن فتصرفت هذا التصرف.

تصرف المحفظة غير حكيم بالمرة وكان ينبغى أن تمتص المفاجأة وتعاملك بلطف أكثر

وممكن يكون هذا إختبار من الله عز وجل

ونصيحتى أن المواجهة الحكيمة مفيدة جداً فى مثل هذه المواقف وبعد هذه المواجهة إما ان تنشأ علاقة طيبة بينك وبين المحفظة وتزول من عندك أى أثار سلبية من اللقاء الأول أو يتأكد لك أن هذه المحفظة فظة الخلق وفى هذه الحالة لمصلحتك ألا تحفظى على يديها.

أقصد بالمواجهة الحكيمة أن تذهبى إلى المسجد مرة أخرى مرتدية الحجاب وتكلميها مباشرة فى الموقف لتعلمى وجهة نظرها فيه.

وربنا يوفقنا جميعاً لتعلم علوم الدين والدنيا