عاوزين نجمع من بعض 250 الف جنيه بسرعه

[justme]

يا جماعة صلوا بينا على النبي

انها البداية

وما سيأتي سيكون اعظم

يعني بكره تلاقوا مطرب ولا فنان تاني باع الصورة بنص مليون وهكذا

وممكن تسمعوا عن مزادات بعد كده

المشكلة في رأيي ان المجتمع عايز كده ومحدش يقولي احنا مستنكرين لكن بقى في ناس مش هقول كتير بتدور على الاخبار دي وبيشدها النوع ده من المواضيع

وبكره تقولوا ان أنا قولت

ربنا يسترها على الغلابة

[se_ Elsyed]

والله واخد بالك حضرتك عشرين تلاتين الف

اصحابه ودول عمله نادره جمعوله المبلغ من بعض وهو سافر ونجح بره جدا ومش ناوي يرجع مصر برضه جدا

؟

المهم من الأخر يعني

رجع الفلوس للناس دي ولا ضرب عليهم العوافي ؟ :sad:

-------------

من يقارن هذا الخبر بما يحدث في الغرب من ممثلين ومشاهير بياخدوا ملايين عشان نشر صورهم الخاصة أو صور أولادهم ...

فالوضع مختلف تماماً ..

إحنا دول نايمه وعندنا مشاكل وبنقضي بقيت عشانا نوم ... ودل ميزانية فيلم تساوي ميزانية دولة بحالها ...

والله العظيم يا جماعة من أسبوعين أخويا عرفني على شخص قضى يمكن 20 سنة من حياته في العمل الحكومي .. وطلع معاش لأسباب طبية ... وألأن مُصاب بشلل رباعي وعنده 4 أولاد صغار وزوجه ... وكل ما يحتكم عليه هو 260 ج معاش شهري ... مطلوب يعيش بيهم ويدفع إيجار منزل ويعلم اولاده و و و و و و

طبعاً مثل هؤلاء بيتهرسوا في هذا المجتمع الغريب ...

لما بنمسع عن خليجي أشترى لوحة سيارة مميزه مثل " ل ط خ 111 " بـ ربع مليون دولار ... مش بنستغرب .... دي مجتمعات مرفهه وهما حُرين ..

لكن منين الرئيس - لسه الأسبوع اللي فات والله قبل ما ماراته بتتفقع - كان في بني سيوف .. وقال نفس البؤين " منين ؟ إحنا دولة مواردها محدودة " وناقص يلف يشحت بينا على أبواب المساجد العالمية ...

ومنين بنسمع إن عادل أمام تقاضى بالفعل 30 مليون جنيه عن مسلسل العراب .... ومحمد سعد المهرج الشهير باللمبي أخد 18 مليون عن المسلسل الذي سيُعرض له في رمضان .... إلخ

فين بقى الرئيس من ده وفين وزير المالية وفين عمرو الليثي اللي بصراحه رمى نفسه في عش الدبابير ولأور مره في تاريخ الاعلام نرى كاميرا تليفزيونية تنزل وتغوص في قلب المناطق مش العشوائية .. لأ دي مناطق تحت مرتبة المقابر بدرجتين تلاته في برنامج " واحد من الناس "

يعني بيتهيألي إن أجر عادل أمام لوحده وده مش هايأثر فيه لو ما حصلش عليه ... كفيل إنه يخرج جميع سكان مقابر الدراسة وهم بالالاف مما هم فيه وينقلهم نقله حضارية ... وأنا اعرف ما أقوله جيداً إذا كنا بنتكلم عن شقق بـ 60 الف مثلاً .. نقول بالفرش والتوضيب هاتتكلف 100 الف يعني بتتكلم عن 30 الف شقة مُجهزة تجهيز بني أدمين

وعندك ربع مليون بتوع بنت شيرين .. أدي عندنا 3 شقق أهم :lol:

وبعدين تعالوا هنا ... أومال المباديء الثورية اللي قرفونا بيها والقضاء على الرأس ماليه المتعفنه .. والعدالة الإجتماعية وفدادين خمسه خمس فدادين .. كل ده راح فين ؟

وهل نسينا مقولة الصحابي الجليل " عبد الله بن مسعود " لما قال .. أوشك أن أأمر الفقراء فيخرجوا بسيوفهم ليأخذوا حقهم من الأغنياء .

من الاغنيا اللي بيستهبلوا فيها وماحدش شاف منهم ربع جنيه حتى ...

[khaleds]

من كام سنه كده كانت انجلينا حامل وكل شويه يجيبو اخبارها فى برامج النميمه ويقعدو بقه يعملو تقارير عن توقعات مكان الولاده الى هتولد فيها وحاجات هبله كده

المهم بعد ما خلفت باعت صوره وليدها ب2 مليون دولار لمجله فى بريطانيا بعد (مزاد) .. قولت فى نفسى يا ولاد الهبله

بس تقريبا احنا كمان اتعدينا من ولاد الهبله

على العموم شوفو الموضوع ده( منقول )

معارك إعلاميه والهدف "شوية عيال"أطفال هوليوود.. رزقهم واسع - الكاتب: طارق

يدفع الاشخاص العاديون المال لنشر صور أبنائهم في الصحف والمجلات لكن الأمر مختلف بالنسبة لأطفال المشاهير حيث تدور حرب بين كبريات المجلات العالمية للفوز بصفقة النشر الحصري لصور أطفال المشاهير بمجرد خروجهم إلي الحياة.

خبر حمل النجمة الأمريكية الحسناء انجلينا جولي من زوجها النجم الشهير براد بيت في توأمين لم يكن مفاجئا لكن غير العادي كانت تلك الحرب الطاحنة التي دارت بين كبريات المجلات الفنية للفوز بمجرد إذاعة خبر حمل انجلينا من أجل الفوز بصفقة الحصول علي حق نشر الصور حصريا رغم ان التوأمين كانا مازالا في بطن النجمة الشهير واندهش العالم بخبر بيع حق نشر صور توأمي النجمين انجلينا جولي وبراد بيت ب 15 مليون دولار.

أربع فئات

وينقسم المشاهير الذين يبيعون صور أطفالهم الرضع لأربع فئات: الأولي مثل "براد وانجلينا" تبيع الصور ثم تتبرع بثمن الصفقة إلي مؤسسات الأعمال الخيرية. والفئة الثانية تحتفظ بثمن الصفقة في أرصدتها المتخمة بالملايين. والثالثة ترفض الدخول في صفقات من هذا النوع وهو ما فعلته النجمة الاسترالية نيكول كيدمان وزوجها المطرب كيث أوربان عندما رفضا بيع صور ابنتهما "صنداي روز". أما الرابعة فتعقد صفقات بيع الصور بطريقة سرية مثل صفقة نشر صور "سوري" ابنة النجمين توم كروز وكيت هولمز حيث لم يعلن رقم الصفقة التي خمنها البعض بمبلغ يتراوح بين 3 و4 ملايين دولار.

شطارة أنجلينا وبراد

عندما يتعلق الأمر بعقد صفقة من أجل بيع صور الأطفال لا يوجد في العالم أشطر من الزوجين انجلينا جولي وبراد بيت اللذين يملكان مهارة فائقة في عقد هذا النوع من الصفقات. فابنة براد وجولي الأولي "شيلوه" بيعت صورها حصريا بمبلغ 4 ملايين دولار لمجلة "بيبول" الأمريكية وب 3.5 ملايين دولار لمجلة "هاللو" البريطانية بالإضافة إلي جني نصف مليون دولار مقابل وضع صورة الطفلة علي طابع استرالي. أما صور التوأم "نوكس" و"فيفان" فبيعت ب 15 مليون دولار دفعتها مجلة "بيبول" لتنشر الصور حصريا وتبرع النجمان بالمبلغ كاملا إلي الأعمال الخيرية التي يشرفان عليها. وكانت صور الطفل باكس الذي تبنته انجلينا من فيتنام وعمره ثلاث سنوات قد بيعت حصريا مقابل 2 مليون دولار لمجلة "بيبول" أيضا.

توأما لوبيز ب 6 ملايين فقط

أما صور "ماكس" و"ايمي" توأمي المطربة جينيفر لوبيز وزوجها المطرب مارك انطوني فبيعت حصريا ب 6 ملايين دولار لمصلحة مجلة "بيبول" وكان رقما قياسيا قبل تحطيمه في صفقة بيع صور أطفال انجلينا جولي وبراد بيت.

الصورة الأولي للرضيع "ليفي" ابن الممثل الشهير ماثيو ماكونجي وعارضة الأزياء كاميلا الفيس بيعت أيضا ب 6 ملايين دولار لمصلحة مجلة "اوكيه".

أما صور "دانليين" طفلة نجمة الاغراء الراحلة آنا نيكول سميث التي حولها مقتلها المأساوي إلي اسطورة والتي أنجبتها قبل موتها بفترة قصيرة من رحيلها وكانت موضوعا لمعركة وصاية بين صديقين من اصدقائها وتم حسمها لمصلحة لاري بيركهيد فبيعت ب 2 مليون دولار لمجلة "اوكيه".

مطربة البوب الأمريكية كريستينا اغليرا باعت صور ابنها "ماكس" مقابل 1.5 مليون دولار وفازت بها حصريا مجلة "بيبول". بينما حصلت مجلة "اوكيه" علي حق النشر الحصري لصور طفل النجمة الأمريكية الشابة جيسكا ألبا بمليون دولار ونصف المليون.

صفقات فاشلة

أما الصفقات التي يعتبرها البعض فاشلة وهي الصفقات التي لا تتعدي المليون دولار فتشمل النجمة بريتني سبيرز التي باعت صور طفلها الأول "شون" التي نشرت علي غلاف مجلة "بيبول" بنصف مليون دولار فقط. بينما باعت شقيقتها جايمي لي صور طفلتها الأولي لمجلة "اوكيه" بمليون دولار والمبلغ ذاته تقاضته النجمة نيكول ريتشي التي باعت صور رضيعتها الأولي لمجلة "بيبول". بينما لم تحصل ليزا بريسلي ابنة ملك الروك الفيس بريسلي سوي علي 100 ألف دولار مقابل نشر صور طفلها الأول.

آخر المنضمات إلي حرب صفقات بيع صور رضع المشاهير المطربة آشلي سيمبسون. الشقيقة الصغيرة للنجمة جيسكا سيمبسون التي أنجبت طفلا منذ اسابيع من زوجها المطرب بيتر وينتز. ويدرس الزوجان حاليا مجموعة من العروض للحصول الحصري علي نشر صور الطفل والرقم المرشح هو 2 مليون دولار.

[doha]

لما بنمسع عن خليجي أشترى لوحة سيارة مميزه مثل " ل ط خ 111 " بـ ربع مليون دولار ... مش بنستغرب .... دي مجتمعات مرفهه وهما حُرين ..

حرام عليك ياحج سيد الي بتعمله فينا ده ..

قربت اعيط من كتر الضحك ..

بالراحة علينا ياحج ..

[president]

واحده واحده ياجماعه بس .

احنا دائما نهوى خلط الأمور ببعضها . مبدئى واضح جدا ... اى حد تجيليه فلوس بطريقه شرعيه حتى لو ملايين ربنا يباركله فيها .

كان لعيب كوره بقى كان سباك -مع احترامى لجميع المهن الشريفه - كان زى مايكون ربنا يباركله فى فلوسه ... مش مشكلة هذا الشخص

ان الحكومه فاسده وظالمه ناس غيره . مافى مهندس بياخد بره مصر 80 الف دولار فى السنه ومهندس نفس دفعته بياخد 18000 الف جنيه فى السنه

والأتنين بيعملوا زى بعض نقعد نشتم فى الأولانى عشان احاسيس التانى ؟ لأ طبعا بس الفساد اللى فى البلد هو اللى بخس حق التانى .

وكمان مش عارف ايه مشكلة لعيبة الكوره .هم لعيبة الكوره دول فشله وصيع ومايبدخلوش مدارس ؟ اللى يعرف يخلى ابنى يوفق مابين التعليم واى رياضه يبقى كويس

وهتبقى ميزه لأبنه .واللى مايعرفش مايرميش باللوم على غيره وينتقد غيره .

تانى ياجماعه الأصل فى الموضوع الفلوس دى جت بطريقه شرعيه ولا لأ ؟ - انا مش بتكلم على شيرين تحديدا - انا بتكلم بصفه عامه .

الأستاذه منال شوقى بتقول انها لو تبرعت بالفلوس كانت هتدعيلها .. يعنى مشكلة حضرتك مش مع الفلوس نفسها ... بس اختلافك انها هتحطها وديعه لبنتها ؟؟؟

استاذه منال حد ممكن يطلب من حضرتك انك تفكى شقتك بشقتين واحده ليكى والتانيه تساعدى بيها حد غيرك ؟

تحياتى

تم تعديل 10 مارس 2010 بواسطة president

[اغابي]

لا تعليق :sad:

[se_ Elsyed]

المشكلة يا بريزدنت في الأستفزاز الإعلامي

وإلا لماذا أوقفوا باب الأفراح اللي كان بييجي في أخبار اليوم كل سبت ؟

وكمان البرامج المشابهه في التليفزيون

يعني الموضوع ده لو تم في الخباثة ما كانش حد أتكلم .. إن شالله تكون أخدت مليون

[عصام أبوالفتح]

ياسيدى بيقولك .. ***** ... متدقش

تم حذف الجُملة .. على فكرة .. حرام يا عصام عشان رزق الكل على ربنا

سي السيد

تم تعديل 10 مارس 2010 بواسطة se_ Elsyed

[Morial]

يا أستاذ بريذيدنت حضرتك ممكن تقرا خبر ذي بتاع شيرين دا في جريدة أو مجلة وفي نفس الجريدة تقرا حاجات تشيب

زي مثلا خبر بيقولك يقتل صديقة لخلافهما علي 20 جنية

مش حضرتك بتقرا الجرايد المصريه برضه

وبعدين شقتي أنا تعبت علشان أجيبها وماجتش كده بالساهل يعني ماخدتش كام صورة هوب بصيت لقيت عندي شقة

وبدون حلفان انا لو مكانها كنت اتبرعت علي الاقل بنصهم ان لم يكن بيهم كلهم خاصة انها مش محتاجة

وزي ما قال أستاذ سيد مينفعش نقارن نفسنا بالغرب لأننا دولة نايمة وف سابع نومة ومش طالبة كوابيس

تم تعديل 10 مارس 2010 بواسطة منال شوقي

[myusername]

وبدون حلفان انا لو مكانها كنت اتبرعت علي الاقل بنصهم ان لم يكن بيهم كلهم خاصة انها مش محتاجة

يعنى انتى عايزاها تتبرع بشقا و تعب البنت؟ wst:: شوفى البنت تعبت ازاى علشان تطلع بالصورة القومر دى :lol:

و بعدين برضه يعنى بنتها لسه فى اول الطريق و بتكون مستقبلها... :lol: تروح تنحرف يعنى ولا تعمل ايه؟ :sad:

[الغريب]

أيه ياجماعة فيه أيه ، عاملين دووشة ليه

ماهو ده مش غريب على أم الدنيا ، وده استمرار لمسلسل "المضحكات المبكيات في مصر"

على فكرة بقى البنت بنت شيرين دي أمريكية ، أنتو نسيتو أنها راحت ولدتها في أمريكا علشان يكون معاها الجنسية وطالما البنت أمريكية يبقى تستاهل مش كفاية أن بلدها بتدينا معونة معيشانة ..

وسلملي على "مشربتش من نيلها"

[سهران]

واحده واحده ياجماعه بس .

احنا دائما نهوى خلط الأمور ببعضها . مبدئى واضح جدا ... اى حد تجيليه فلوس بطريقه شرعيه حتى لو ملايين ربنا يباركله فيها .

كان لعيب كوره بقى كان سباك -مع احترامى لجميع المهن الشريفه - كان زى مايكون ربنا يباركله فى فلوسه ... مش مشكلة هذا الشخص

تحياتى

الأعراف و المنطق بيقولوا أن ده سفه و شيء خطير جدا على السلام الأجتماعي و بالطبع حالة الأستفذاذ البشعة دي مش محتاجة دليل علشان يبرر أدانتها ... أزاي نزرع في أولادنا قيّم الكفاح و المثابرة و الأجتهاد و هما شايفين حواليهم كل شيء عبارة عن ضربة حظ ... و أحيانا الأحتفاء على أشدة بكل ما هو تافه و حقير ..... طب نقول لعيالنا أيه ؟؟؟؟

أي أنجاز ننتظره في مجتمع به تلك التناقضات ؟؟؟

لي صديق مدرس أنجليزي ما بيديش دروس خصوصية لأنها ضد مبدأه ... يوم ما سمع أجــــــر فيلم لأحمد حلمي ما قدرش يروح الشغل أسبــــوع من شدة القهر :sad:

[herohero]

ياجماعه ماهي دي اللي قرفتنا بماشربتش من نيلها وكانت عاوزة تخلف ف امريكا

حبايبنا ده بلدنا وده عالمنا العربي كمان انسوا بقى تقييم الناس اللي بتفهم او الكفاءات ريحوا دماغكم سفه ولا عبط انما ده الواقع

[myusername]

فيه واحد حاطط تعليق على موقع مصراوى بيقول... تاخدوا صورة ابنى و تدونى انبوبة بوتاجاز :unsure:

الاخ الفاضل president,

مفيش اى مشكلة فى المكسب المشروع و الحلال.. حتى و لو كان بيجيب ملايين الدولارات و بأقل مجهود.. و لكن اللى بيحصل ده اسمه "سفه" سعادتك!

لما نكون فى دولة فقيرة و معدمة.. و يوجد هوة و فجوة رهيبة بين الفقراء و الاغنياء... يبقى لازم يكون فيه وقفة. لما يكون فيه ناس بتبيع اطفالها ب5 الاف جنيه.. يبقى اكيد لازم وقفة. لما تكون الموارد و التجارة فى البلد فى إيد 3% فقط من سكانها هما اللى معاهم معظم فلوس البلد... يبقى مفيش شك اننا محتاجين وقفة.

بعض الناس بتقول ما هو ده بيحصل فى أمريكا و اوروبا.. طيب هناك فيه ظروف معيشية و انسانية عالية جدا... يعنى المواطن مش مقهور هناك.. و فيه فرص للناس انها تنجح.. يعنى بصراحة من السذاجة مقارنة الوضع بين مصر و أمريكا بأى حال من الاحوال.

لما الموضوع يوصل لحد الاسراف و التبذير... يبقى اكيد فيه حاجة غلط.. و الناس دول لأما وارثين الفلوس دى لأما سارقينها, لأما بقى هما مبذرين و سفهاء.

الاسلام فيه الكثير من مبادئ الرأسمالية.. و الانفتاح فى التجارة.. و لكن فيه حدود يا سيدى الفاضل؟ و لو افترضنا ان المبدأ تجارى بحت... يبقى بأى مبدأ بتبيع صورة بنتها أصلا؟!!

تم تعديل 10 مارس 2010 بواسطة myusername

[joo]

يا جماعة بلاش الحقد الطبقى دة00 انتم بتبصو على شرين الغلبانة دى

هوانتم متعرفوش قصة حياتها00 دى يا ما شافت زل وفقر وكانت بتنام فى السطح على الارض

وكان السلك واكلها00 فيا جماعة اكيد اللى حصل لها عاوزة تعوضة لبنتها 00 اظن مش كتير عليها تفرح

ثانيا من حكم فى مالة فما ظلم00 وفكرو اكتر فى اللى بينهبونا واحنا مش دريانين 00 او بمعنى اخر عاملين مش واخدين بالنا

طبعا انتم عارفين مين 00 السفاحين فى البلد كتير00 مش تقولولى شرين الغلبانة اللى اكيد عندها بدل العقدة اثنين وثلاثة

ربنا مع الجميع

[مهندس تحكم]

يا جماعة .....دة بيزنس...

يعني الحكاية عملية تسويق مش اكتر ولا أقل......ادارة التسويق اكتشفت انة لو وضعت صورة لبنت مغنية مشهورة (اي كانت المغنية) علي غلاف المجلة ...وكتب انها بتظهر لاول مرة علي الصحف والمجلات...دة هايرفع مبيعات العدد......وطبعا هما عندهم احصائيات توزيع ومخططات للتسويق وتوقعات وغيرة...وبحسبة بسيطة ...الربع مليون ايلي اندفعوا ...هايرجعوا ومعاهم مليون علي الاقل....ويمكن اكتر...بس انتوا ادعوا للناس ايلي بتمول الكلام دة كلة.....

مدمني شراء المجلات واخبار الفنانين....مافيش مجلة بتدفع من جيبها.....

شوفتوا بقي الدنيا ماشية ازاي.....بيزنس اذ بيزنس ولا اية!!؟

[justme]

بجد يا جماعة لازم وقفة مع النفس

محدش عارف ليه الكلام ده بقى عندنا وفي الفترة دي

محدش فاهم ان ده انعكاس لحالة التوهان وفقدان الهوية

بجد احنا فقدنا القيم والهوية وانا عارف ان فيه ناس ممكن تزعل بس فكروا

لو مجتمعنا مبيشتريش البلاوي دي وشرايط الكاسيت بتاع المطربين ولا الناس مش بتقطع بعض علشان ماتش كورة ولا فريق غلب فريق

مع ان محدش فيهم هياخد حاجة لو كسبوا او خسروا ولا حد بيلعب او حتى بيختار اللاعيبة

طب بالذمة مش 3/4 الشرايط مليانة حاجات تنم عن العبط

الناس بتشتري الوهم لأن الشريط بيديله احساس يعيشه في الوهم والمجلة بتخليه يحلم انه يكون من الناس دي

فقط نشتري احلام الثراء والشهرة

والكسب السريع هو الحل

وتلاقي معظم الناس بتتفق على الحجات الهايفة اما الحاجت الكبيرة كله يقولك وانا مالي

يا جماعة احنا شعب بتاع كلام وبس مبنعرفش نحول كلامنا لفعل

من ايام هنرمي مش عارف مين في البحر لغاية بتتقدم بينا

إحنا عايشين على ذكرى الماضي الذي رحل عنا

حد يقدر يعرفلي النجاح بمفهوم ميختلفش عليه اتنين

او النجاح في المال عن طريق اي وظيفة يبقى اطلع مدرس ليه ولا سباك ولا حتى جزمجي او مهندس او دكتور

مش فارقة التعليم بتاعي المهم

المال

الشهرة

وابسط مثال شعبان عبد الرحيم

بيتكلم في السياسة وفي الحياة كلها والناس ابسطاء معجبين بيه

واي حد بقى بيفتي

واي حد بقى ابو العريف وشايف عقله اد ميه

بس بكده هو بيغرق في شبر ميه

وعلشان محدش يقولي ان كلامي في الهواء نعمل اختبا بسيط

حد ينزل الشارع ويسأل اي شاب بلاش عيل مين شعبان عبد الرحيم او شيرين

ولا مين هي نانسي

او حتى هيفا مع انهم مش مصريين وايه هي اعمالهم واغانيهم

وبعدين يسأل مين هو

مصطفى مشرفه

او المشد وعملوا ايه

ولما يجيله الضغط يبقى يكلمني ابعتله اسم دكتور كويس

ربنا يفرجها علينا

تم تعديل 10 مارس 2010 بواسطة justme

[engmido]

ارزاق!!!!!!!!!!!

[سهران]

بتعيط و بتحسبن ...... الخبر في موقع في الفن .....

ــــــــــــــــــــــــــــــــــــــــــــــــــــــــــــــــــــــــــــــــ

ــــــــــــــــــــــــــــــــــــ

شيرين تبكي في مؤتمر تكريمها وتصرح: حسبي الله ونعم الوكيل

الجمعة، 12 مارس 2010 - 19:22

شيرين في مؤتمر جمعية العلماء المصريين بالولايات المتحدة الأمريكية

متابعة: منة محمود

كتابة: محمد صالح

دخلت النجمة شيرين في حالة من البكاء أثناء تكريمها من جمعية العلماء المصريين بسبب ما نشرته إحدى المواقع الإلكترونية عن حصولها على أموال مقابل نشر صور لإبنتها مريم.

ونقلت مراسلة FilFan.com المتواجدة بالمؤتمر بكاء شيرين وهي تتحدث في هذا الموضوع قائلة: "حسبي الله ونعم الوكيل في كل واحد بيكتب خبر عن فنان وهو يقصد أن يؤذيه.

وكانت إحدى المواقع الإلكترونية قد نشرت قبل أيام حصول شيرين على مبلغ نصف مليون جنيه في مقابل نشر صور لإبنتها مريم.

وانفردت مجلة "كاريزما" في عددها الأخير بنشر الصور الأولى لمريم ابنة شيرين والموزع محمد مصطفى، وهي الصور التي ظهرت فيها شيرين أيضا.

يذكر أن جمعية العلماء المصريين بأمريكا تكرم شيرين عن مجمل أعمالها، وخاصة الأغنية الوطنية "مشربتش من نيلها"، وذلك في مؤتمر صحفي بفندق "الواحة" بمنطقة الهرم، بدأ في السابعة مساء الجمعة

ــــــــــــــــــــــــــــــــــــــــــــــــــــــــــــــــــــــــــــــــ

ـــــــــــــــــــــــــــــــــــــــــــــــــــــــــــــــــ

[المخنوق دائما]

أمال لو كانت البت حلوة شوية؟؟؟؟

حسبى الله ونعم الوكيل