استفسارات حول الهجرة - 1

[مصرى لم يندثر أثره]

اعتقد يا أخى الكريم المنتدى فيه ملف كامل عن الهجره لكندا

ممكن بس حضرتك تبحث حاجه بسيطه هاتلاقى كل اللى انتى عاوزه ان شاء الله

[jemy]

يا جماعه قريتها لكن ما فهمتش حاجه يعني ايه الشروط بجد

[dentist]

في البداية انا احب اعرف بنفسي ,,,,انا احمد شعيب من مصر في اخر سنة في طب اسنان

الحاجة الاولي انا عاوز اعرف خطوات الهجرة خطوة خطوة,,,,,وايه الفرق بين اني اقدم في مكتب او تبع السفارة

الحاجة التانية انا صفر في الفرنساوي,,,,هل ينفع المقابلة انها تتعمل بالانجليزي وهل ينفع اني بعد لما اهاجر _اذا شاء الله_ ابتدي اتعلم فرنساوي

الحاجة التالتة انا بفضل الله اخدت امتياز 3 سنين في الكلية وسنة جيد جد ا _لسه باقي سنة ويارب يستر فيها_ ,,,,هل ده يساعدني ولا ملوش لازمة

الحاجة الجامسة ,,,وطيب علي فرض القبول هل السفارة بتساعدني علي ايجاد السكن ,,ووالخ الخ ولا احتاس

انا اسف للاسئلة لكن ارجو الرد علشان اخد قراري

[qenawy]

شوف يا دكتور احمد

اولا ما شاء الله علي التفوق ربنا يحرسك

ثانيا

كندا تحتاج ان يكون لديك خبرة في العمل حتي تهاجر من سنة الي 4 سنوات فاكثر طبعا هناك المفروض 67 نقطة علي الاقل تحصل عليهم سن وخبرة ومؤهل دراسي هاديلك الموقع اللي تدور فيه كويس وهو موقع الهجرة الكندي الرسمي

المحامين ليس لهم دور في رايي الا اراحة دماغك من الورق ومتابعته وان كانت راحة دماغ تكلفك 20 الف جنيه

اللغة مش فرنساوي ممكن انجليزي واكيد انت كويس فيه

عموما خد الموقع ده واقراه كويس يرد علي استفساراتك

ثالثا نصيحة اخيرة

لو عاوز تهاجر ومستعجل شوف استراليا اظن سكتها اسهل بالنسبة لظروفك وشكرا

الموقع الرسمي للهجرة لكندا

[hamoudi]

ممكن اعرف انواع مرض السكر الى يسبب عدم الهجرة لان زوجتي مصابه بالسكر

وانا خايف ليكون سبب فى الرفض

[dentist]

اشكرك جدا علي ردك ,,,,انا عملت الاختبار علي الموقع ولقيت نفسي سقطت لما علمت علي خانة اني غير متعلم الفرنسية

كررت الاختبار وفرضت ان مستوايا متوسط فيه عدوني والحمد لله,,,,الحاجة المهمة هل صحيح ان ظروف الدكاترة وحشة هناك؟؟؟يعني استراليا احسن بالنسبة لينا_بغض النظر عن الاجراءات؟؟؟؟

وكان عندي استفسار بالنسبة للشعب الكندي ,,,ايه نظامه مع الناس؟؟؟؟ لاني اسمع ان الاستراليين متعصبين

[drpharma]

اشكرك جدا علي ردك ,,,,انا عملت الاختبار علي الموقع ولقيت نفسي سقطت لما علمت علي خانة اني غير متعلم الفرنسية

كررت الاختبار وفرضت ان مستوايا متوسط فيه عدوني والحمد لله,,,,الحاجة المهمة هل صحيح ان ظروف الدكاترة وحشة هناك؟؟؟يعني استراليا احسن بالنسبة لينا_بغض النظر عن الاجراءات؟؟؟؟

وكان عندي استفسار بالنسبة للشعب الكندي ,,,ايه نظامه مع الناس؟؟؟؟ لاني اسمع ان الاستراليين متعصبين

سيبك انت من ان الاسترالين متعصبين والكلام ده فالعالم كلو في عنصريه ومحدش خالي

نصيحه د جالدولي صح 100 فال100

استراليا انسب ليك ومعادلتها ارحم من سكة كندا

[moheltohamy]

دكتورنا / دنتيست...

تعرف... أنا تابعت موضوعك ده من أول ما نزّلته سيادتك. وما حسيتش إني عاوز أرد عليه! تعرف ليه؟!

الأسلوب المصري الكلاسيك اللي عاوز الناس تدوّر له على مصلحته وتجيبهاله لغاية عنده ، أو المدرس الخصوصي اللي بييجي لغاية البيت ، ويوصل المعلومة بالمعلقة!

تسمحلي أسألك : هل تصفحت المواضيع المذكورة هنا كويس؟ هل تابعت كلام هادي وإيهاب سالم وتورونتو وياسر ، اللي قتلو كندا بحثاً ، وآراءً وتعليقات ونصايح؟! إنتا أول مشاركة ليك فتحت توبيك جديد بتسأل فيه عن معلومات عن الهجرة ، في حين إن المنتدى مليان كلام وشرح خطوة بخطوة!

هل تصفحت الموقع الرسمي للهجرة لكندا ، كما تفضّل أخونا د. قناوي وقدمهولك؟! علماً بأنه بيجاوب على كل حاجة في الدنيا ، وأي شيئ ممكم يخطر لك على بال! لدرجة إنك لو رحت السفارة الكندية في جاردن سيتي عشان تستفسر عن أي حاجة ؛ هيقولولك خش ع الويب سايت! طيب عاوز أسأل على حاجة ، هتلاقيها ع الويب سايت ، طيب حاجة محيراني ، ع الويب سايت! وفعلاً كل المعلومات موجودة ع السايت بتاعهم! بس المشكلة مين يقرأ!

وحتى الميل اللي بعتهولي ، حسيت إنه من نوعية كوبي آند بيست! ما حسيتش إنك كاتبهولي شخصياً!

عموماً - رغم إني معترض على الطريقة - هاحاول أجاوب لك باختصار على النقاط اللي محيراك على أد ما أقدر...

انا عاوز اعرف خطوات الهجرة خطوة خطوة

دي صعبة بصراحة ، دي محتاجة نفتح لك توبيك من أول وجديد!

وايه الفرق بين اني اقدم في مكتب او تبع السفارة

هوه نفس الفرق بين إنك تذاكر المواد لوحدك ، أو تروح لمدرس خصوصي عشان يشرحهالك! كل اللي بيعمله ؛ إنه بيقدم نيابةً عنك ، وبيرتب لك ورقك ، وبيقول لك تعمل إيه الخطوة الجاية! وبيهبش منك بتاع 3 تلاف دولار!

الحاجة التانية انا صفر في الفرنساوي

وإيه المشكلة؟!

هل ينفع المقابلة انها تتعمل بالانجليزي

هيه الديفولت بتاعها إنها تكون بالانجليزي ، إلا لو طلبت إنها تكون بالفرنساوي! وممكن كمان تكون بالعربي لو حبيت! وممكن ما يطلبوش منك إنترفيو أصلاً (زي ما حصل معانا)!

وهل ينفع اني بعد لما اهاجر _اذا شاء الله_ ابتدي اتعلم فرنساوي

وليه أصلاً وجع القلب؟! إنتا ناوي تعيش في كيبك؟! اللي بيتعلم فرنساوي اللي بيكون بيجمّع نقاط ، قبل التقديم للهجرة. بعد كده ، مالهاش لزوم أصلاً إنك تدرس فرنساوي ، إلا لو هتعيش في ولاية كيبك (واللي أنا مش شايف لها ميزة تستاهل إني أروح أعيش فيها أصلاً ، لمؤاخذة يا وجدي)!

انا بفضل الله اخدت امتياز 3 سنين في الكلية وسنة جيد جد ا _لسه باقي سنة ويارب يستر فيها_ ,,,,هل ده يساعدني ولا ملوش لازمة

ولا ليه أي لازمة! دانتا لو معاك الدكتوراه من أمريكا أو الزمالة البريطانية أو حتى زمالة كفر سعد ؛ هيسألوك على المعادلة الكندية ، والخبرة الكندية! يمكن الأخ مهاجر قديم له رأي تاني في الموضوع ده ، بس دي معلوماتي!

وطيب علي فرض القبول هل السفارة بتساعدني علي ايجاد السكن ,,ووالخ الخ ولا احتاس

إحتاس!

بص يا دكتور...

انتا عارف اللي بيتلكك؟! اللي خايف من كل حاجة ، وف النهاية مش هيعمل أي حاجة؟! ده اللي حسيته من كلامك بصراحة!

إنتا فعلاً عاوز تهاجر؟ عملت إيه من الخطوات عشان كلامك يكون منطقي؟! أكيد ولا حاجة...

بص... انتا بتقول في البكالوريوس. استفيد بالوقت اللي لسه أدامك ، وابدأ ارفع مستواك ف الإنجليزي (ويا ريت تعمل لنفسك اختبار تحديد المستوى من المركز الثقافي البريطاني - البريتيش كاونسل) ، وخد كورسات ف الفرنساوي. وعندك المركز الثقافي الفرنسي

http://www.ambafrance-eg.org/cfcc

ويا ريت لو تبدأ إجراءات المعادلة الكندية (وبصراحة ما عنديش فكرة عن معادلة الأسنان)!

وابدأ في حساب النقاط اللي هتحتاجها في الهجرة ، وشوف محتاج كام سنة خبرة ، ولسّه أدامك كام سنة عشان تخلّص اللي وراك ، من تكليف وجيش وخلافه!

ولما تبقى تاخد الفيزا للسفر لكندا ، أو ع الأقل تعمل الكشف الطبي ؛ تبقى تفكر في الخطوة التالية ، ومشكلة السكن والشغل هناك! (وعندك التوبيك بتاعي لسه متكلمين فيه على السكن ومغامرات البحث عن سيد جلال ، عفواً البحث عن شقة في تورونتو)

وبالنسبة لاستراليا ، فأنا كنت فكرت في الهجرة ليهم بصراحة ، لكن لقيت شروطهم صعبة ، ورخمة ، والحياة معاهم سافلة بصراحة! لازم أعادل شهادتي الأول قبل ما أعمل أي خطوة ، وموقع الهجرة بتاعهم مش واضح كده ، ومديلك التفاصيل زي بتاع كندا! ونيو زيلاند بقى ما تفهمش من الموقع بتاعهم أي حاجة أساساً!!!

ولو نجحت تشتغل طبيب أٍسنان في كندا ، يبقى الدنيا اتبشبشت لك يا ريس ، وهتغرف م الفلوس غرف! وشغل الأسنان هناك غالي ومكلّف ، يعني م الآخر هتعملهم هناك ، وهترصهم اكوام اكوام!

بس لازم تكون حاطط احتمال إنك ما تشتغلش بتخصصك ، لو الأمور ما اتفتّحتش معاك! ممكن جداً تحصل! ممكن تنجح ف المعادلة ، وما تاخدش نيابة! وتقعدلك 5 سنين مثلاً على ما تجيلك الفرصة!

هل تقبل تشتغل أي حاجة تانية؟ ولا الموضوع بتاع الأسنان ده كروشيال بالنسبالك (مسألة حياة أو موت)؟!

ويعني إيه عنصريين؟! طب ماحنا هنا في مصر عنصريين؟! شوف نظرتنا للأجانب أو حتى العرب عاملة ازاي؟! اعمل انتا بس خناقة مع أي حد أجنبي أو عربي أو حتى مصري مسيحي! هتاخد بالجزمة! وبتتكلم عن العنصرية؟! يا راجل!

وعندك كذا مداخلة ليا كلام عام عن كندا... وآدي لينكاتهم عشان ما أكونش باكرر نفسي... دي ودي ودي

تم تعديل 5 أغسطس 2008 بواسطة moheltohamy

[alaashabana]

:blush2: :lol: cr((: cr((:

كنت قاسى او يا دكتور تهامى على الراجل ... :blush2:

على العموم نتمنى انك تفيدنا دائما بكلامك .. وحكايتك الجميل

منتظرين الجديد منك

[capitshino]

دكتورنا / دنتيست...

الأسلوب المصري الكلاسيك اللي عاوز الناس تدوّر له على مصلحته وتجيبهاله لغاية عنده ، أو المدرس الخصوصي اللي بييجي لغاية البيت ، ويوصل المعلومة بالمعلقة!

معترض وبشدة

تسمحلي أسألك : هل تصفحت المواضيع المذكورة هنا كويس؟ هل تابعت كلام هادي وإيهاب سالم وتورونتو وياسر ، اللي قتلو كندا بحثاً ، وآراءً وتعليقات ونصايح؟! إنتا أول مشاركة ليك فتحت توبيك جديد بتسأل فيه عن معلومات عن الهجرة ، في حين إن المنتدى مليان كلام وشرح خطوة بخطوة!

معترض

وحتى الميل اللي بعتهولي ، حسيت إنه من نوعية كوبي آند بيست! ما حسيتش إنك كاتبهولي شخصياً!

معترض وبشدة

[ويعني إيه عنصريين؟! طب ماحنا هنا في مصر عنصريين؟! شوف نظرتنا للأجانب أو حتى العرب عاملة ازاي؟! اعمل انتا بس خناقة مع أي حد أجنبي أو عربي أو حتى مصري مسيحي! هتاخد بالجزمة! وبتتكلم عن العنصرية؟! يا راجل!

عداك العيب وازح

ودي

[ELSHAMY]

العزيز dentist

الحقيقة انك لازم تستفيد جدا من كلام د. التهامى.....أعتقد هو أصاب عين الحقيقة...ابذل شوية مجهود

أنا شخصيا لم أسال أى سؤال فى المنتدى قبل ان أقرأ الملفات الموجودة كاملة

لسه بدرى على انك تتلخبط.....انا مش شايف اى داعى للخبطة

[ابو الخير]

يا دكتور تهامي بشويش علي الراجل

الصراحه الكلام الكتير اللي في المواضيع ممكن يكون صعب علي واحد مالهوش اي خلفيه عن الهجره . و بعدين الراجل كاتب معلش عشان انا متلخبط . انا فعلا شايف ان مفروض يتعمل موضوع عن الخطوات و كل واحد يكتب عمل ايه و ايه الصعوبات اللي وجهته و الموضوع ده يتثبت

اول مره اشوفك متزرزر - حلوه متزرزر دي - بس برضو زي العسل ... الا انت بتتكلم هنا و سايب موضوعك ليه ؟؟ :blush2: :blush2: يلا ادينا حلقه جديده بسرعه

[alaashabana]

انا بردة استغربت لما لاقيتك اون لاين ومكتبش حاجة وجاى هنا يتنرفز على الراجل الغلبان اللى لسة متخرجش من الكلية..

اكيد تلاقى جاتله حالة فى المستشفى ضايقتة ولا مريض نرفزة فقال يجى يطلع نرفزتة علينا بدل ما يكتمها فى قلبة ..

بس من كتر الواحد ما حبك من طريقة كلامك وحكايتكبقى متقبل منك اى حاجة حتى نرفزتك وزرزرتك فضلت اضحك عليها اكتر من 10 دقايق ..

المهم انا عملت موضوع جديد وانت طبعا تفضلت وشرفتنى فية ياريت بقى تكمل حكاياتك .. يا سيدى احلفلك ان كلامك وحكايتك هى اللى بتنسينا هموم الغربة والشغل.. دا انا حتى عاوز اجيب لاب توب واتخانقت مع صاحب السكن علشان يدخل نت وكل دة علشان اشيف الناس الحلوة فى المنتدى 24 ساعة .

يلا بقى متتأخرش عاوز اجى بكرة الشغل ان شاء الله افتح المنتدى الاقى قصة جميلة وكويسة ..

[dentist]

انا فعلا شاكر ليك علي ردك ليا علي الرغم من قسوة الرد عليا,,انا عارف انك بترد علشان انت عاوز الخير ليا,,,,وبص انا مش عاوز اقعد في بيتنا والناس تيجي تتحايل عليا,,,,انا قريت وتابعت وعملت الامتحان كذا مرة وفرضت اني في الفرنساوي مرة حلو جدا ومرة متوسط ,,,,كان موضوع المعادلة غامض بالنسبة لي والاخ ابو الخير مشكور رد عليا ودلني علي الويب سايت,,,,,الشي اللي حضرتك ماخدتش بالك منه اني خايف اني اتعب وبعدين الاقي تعبي ده كله راح علي الفاضي انا واحد ماليش غير المذاكرة والا حرام عليا اقرف اعصابي لمدة 6 سنين وبعدين اشتغل زيي زي غيري,,,,,مادام ابتديت حاجة يبقي لازم اكملها...واللي يهمني اني لما اتعب الاقي نتيجة فهمتني؟؟؟؟؟

[dentist]

موضوع الاجراءت الحمد لله فهمته,,,لكن كان الجزء التاني اني لازم اسال علي الشهادات,,,, وايه اللي هيحصل لو رحت هناك,,,,,,ولا حضرتك عاوزني اروح هناك وابات في الشارع وبعدين اقول انا ياجدعان دكتور!!!!! انا تقريبا قريت المواضيع لكني حاسس ان المعلومات متفرقة ومش عارف اربط مابينهم وكل شوية اسمع حاجة جديدة تغير اتجاه تفكيري ....علي العموم اكرر اعتذاري لو ضايقت حد ف حاجة وشكرا

[moheltohamy]

والله يا جماعة ، أنا لا باتنرفز على الراجل من فراغ ولا حاجة قرصتني ؛ فجيت أتظرظر عليه!

أنا أساساً جايلي ستيفنيس في رقبتي ، يمكن لأول مرة في حياتي! وقاعد زي الروبوت ، ولا عارف انام ولا عارف اتحرك! ولو نمت وجيت اتقلّب ، أصحى من الألم!

ومديها النهارده بس 6 كبسولات ميولجين (ماصل ريلاكسانت) و3 بونيدون 75 كبسول (يعني بتاع ضعف الجرعة المسموحة من الإندوميثاسين - أغبى مسكن ع المعدة) ، بس اعمل إيه؟! إحساس صعب إنك مش عارف ترتاح في أي وضع!

وف نفس الوقت ؛ لو كنت شديت شوية على أخونا دينتيست ، فيمكن من تعاملي معاه كأخ أكبر ، ومحاولة دفعه إنه يتحرك ويستفيد بالوقت! وما يكونش سلبي.

وعموماً حقك عليا يا دكتور دنتيست ، ولو تحب إني ألغي التعامل بالعشم ده ، يبقى حاضر ، بس مش هاحس ساعتها إني مهتم بموضوعك بجد ، وحريص عليه.

ويمكن أنا ما فهمتش إعتراضات أخونا كابتشينو ماشية في أنهو اتجاه بصراحة!

وتعرف يا دينتيست... أنا أكتر حاجة عجبتني في د. قناوي (اللي ماسك مدير مستشفي في بلده) ، إنه مش بيكابر يروح يشتغل أي حاجة هناك! تخيل؟ النقطة دي بصراحة احترمتها فيه جداً جداً. عقلية بالمنظر ده تستحق كل تبجيل وتقدير.

أنا نفسي ما عنديش مشكلة إني أبدأ حياتس حارس أمن أو سواق تاكسي أو مسعف أو ممرض في بريمة... دانتا لو اشتغلت زبال هناك برضه هتكون إنسان محترم. محدش قال إن البداية سهلة في أي مكان.

واحد صاحبي في مصر (دكتور نسا) ، لما قلتله إني لو اتزنقت وما عرفتش أخلّص معادلة الميديك ، ممكن أشتغل سيكيوريتي جارد على بنك أو في عمارة ، شغلانة مريحة ، وهتديلك وقت فاضي تذاكر فيه ، ودخل كويس تصرف على نفسك ، وممكن تحوش منه كمان! وف الوقت ده ممكن تدبر أمور المعادلة. البيه سخن عليّا ، وانتا ازاي تقبل ، وبعد ما كنت دكتور محترم في بلدك ؛ تروح تتبهدل ف الغربة! إلى آخر العقلية المصرية إياها! ندمت إني كلمته أصلاً عن البلان بتاعتي!

ولا وانا باكلمه من كندا ، وباحكيله عن إنطباعاتي ، وفرحتي بالحياة هناك ، البيه يرد عليا إن كل دي أوهام ، وإن أكيد أنا شايف الصورة من بره ، ودي فكرة سطحية عن المجتمع ، والناس بتتظاهر ، والحقيقة مش كده!

ساعتها قلتله : هيتظاهروا بإيه؟ إنهم بيبتسموا في وشي؟ ولا إنهم بيساعدوني؟ ولا إنهم بيتطوعوا بإسداء النصيحة ليّا من غير ما اطلبها؟ ولا بتعاملهم باحترام معايا في أي مصلحة أحتاجها؟ ولا إنهم طيبين؟ ولا إن الحياة ماشية بهدوء ومفيش تنشنة ولا شد أعصاب وحرقة دم؟ ولا إني مبسوط باللايف استايل اللي حاسس بيه هنا؟! وف الآخر قلتله : خلاص يا سيدي ؛ كندا بلد بنت ستين كلب ، ولا يعلى على مصر أم الدنيا! اللي ما شفتش البهدلة ولا الفقر غير لما خرجت برّاها! إرتحت يا سيدي؟!

وساعتها أحمد الديب قاللي : إنتا غلطان ، عامل كل واحد على حسب عقليته ، وبيقوللي إن المفروض أقدر العقلية المصرية في التفكير ، ونظام الشغلانة الميري!

وأفتكر برضه موقف تاني (شكلنا مش هنكتب حاجة في موضوعي النهارده!!!)...

كان معايا ف البريمة بتاعتي السابقة (في الصحرا الغربية) مهندس ميكانيكا قوى... كان شغال سنيور ميكانيك.

الراجل ده كلمني على الفرق بينه وبين واحد صاحبه اختار الكلاسيك باثواي (الحكومة)... هوه شغال ف البريمة ، ودي بيشتغل بإيده ، وشحم وبهدلة ، زي الصنايعي بالظبط ، و12 ساعة شغل و 12 ساعة راحة ، و14 يوم شغل و14 يوم أجازة. وصاحبه ودفعته شغال في شركة حكومية أو تبع الحكومة ، مدير مشروعات ، وبتجيله كل يوم عربية الشغل بالسواق بتاعها تحت البيت كل يوم ، وقاعد في مكتبه ، ومدير وكده!

لكن بعد كام سنة ، لما ييجي يجوّز بنته ؛ هوه مرتبه بتاع 3 تلاف دولار ، وصاحبه مرتبه مش هيجيب ألف جنيه ، يبقى يخلّي العربية أم سواق والمكتب والمنظرة يساعدوه في تجهيز البنت! آهو بيتبهدل صحيح ؛ لكن آهو مرمي ف الشغل ، ومحدش حاسس بيه ، ولما بينزل أجازة ، قاعد باله مرتاح ، ولا شايل هم المصاريف وأول الشهر!

أنا عن نفسي مش باكابر خالص في موضوع المهنة ده. وممكن أشتغل أي حاجة ف الدنيا ، ولا عندي مشاكل نفسية! ممكن أترحم شوية ع الشغل ف البترول والمخمخة والمرتب والعز ف السعودية ، بس أنا بطبعي ما باندمش! وشايف إن الشغل ده وسيلة لكسب دخل عشان أعيش الحياة اللي أتمناها. مش عشان سمو المهنة ، والروحانيات وأزيل عناء البشر اللي بيعانوا إلى آخر البطيخ ده! أنا درست واتبهدلت عشان أعيش حياة كريمة ف الآخر. وبس!

وعندي استعداد إني أبدأ أي بداية - لو ما مشيش المخطط اللي في دماغي - إلى أن أعرف إزاي أوصل للي في بالي. وله ما حصلش برضه مش هيكون عندي مشاكل نفسية!

وأحب أقول لك إن فيه ناس اتحكالي عنهم قعدوا عاطلين (بيصرفوا من المدخرات لمدة 3 أو 5 سنين) لغاية ما عمل المعادلة وأخد اللايسنس! بس كده إنتا بتقامر على حاجة في علم الغيب! عموماً دي اختلافات فردية من واحد للتاني.

أما بخصوص تبات ف الشارع دي ... أول مرة أسمع حد شاغل نفسه بالكلام ده. السكن متاح ، والأكل والمواصلات وكل حاجة. وأي شغلانة هتشتغلها - أياً كانت - هتغطيلك كل دول.

وإن كنت خابف ع الـ 6 سنين ؛ فأنا ود. قناوي مثلاً مضيعين 7 سنين ونص ، والتكليف ، والجيش ، وهوه دبلومة الجلدية ، وانا كنت خلّصت الفيرست بتاع ماجستير العظام من عين شمس ، وكانت الرسالة وبروتوكولها جاهزين للمناقشة ، وكبّرت وقلت طز! الماجستير ده ، لا أنا محتاجه في شغلي ف البترول ، ولا له أي لازمة في كندا! مش ناقصة أرف المشرفين! :angry:

وأعتقد د. الشامي مضحي بأكتر من كده كمان. تعتقد كل ده بلا مقابل؟!

وزي ما دايماً باقول ، كندا مش فلوس ولا منصب... كندا مجتمع وناس ولايف ستايل.

أو ع الأقل ده اللي انا شايفه!

حدد يا دكتورنا إنتا عاوز إيه من كندا بالظبط ، وساعتها هنقدر نقول لك تستاهل تضحي بالـ 6 سنين ولا تخليك في مصرنا الغالية أحسن لك!

تم تعديل 5 أغسطس 2008 بواسطة moheltohamy

[qenawy]

وتعرف يا دينتيست... أنا أكتر حاجة عجبتني في د. قناوي (اللي ماسك مدير مستشفي في بلده) ، إنه مش بيكابر يروح يشتغل أي حاجة هناك! تخيل؟ النقطة دي بصراحة احترمتها فيه جداً جداً. عقلية بالمنظر ده تستحق كل تبجيل وتقدير.

هذا وسام كبير وشهادة تقدير لم احصل عليها من قبل في حياتي

فشكرا جزيلا يا دكتور والله رفعت من روحي المعنوية كثيرا

[somayasaleh]

والله يا جماعة ، أنا لا باتنرفز على الراجل من فراغ ولا حاجة قرصتني ؛ فجيت أتظرظر عليه!

أنا أساساً جايلي ستيفنيس في رقبتي ، يمكن لأول مرة في حياتي! وقاعد زي الروبوت ، ولا عارف انام ولا عارف اتحرك! ولو نمت وجيت اتقلّب ، أصحى من الألم!

ومديها النهارده بس 6 كبسولات ميولجين (ماصل ريلاكسانت) و3 بونيدون 75 كبسول (يعني بتاع ضعف الجرعة المسموحة من الإندوميثاسين - أغبى مسكن ع المعدة) ، بس اعمل إيه؟! إحساس صعب إنك مش عارف ترتاح في أي وضع!

--------------------------------------------------

الف مليون سلامه لك يا استاذنا الفاضل

وربنا يشفي حضرتك عن قريب

بس ده موضع عادي انا كل يومين تلاتة اقوم ورقبتي واقفه خالص

والله 2 حبة بنادول اكسترا بتريح قوي

:angry:

[ELSHAMY]

الدكتور التهامى

تخيل انى ممكن أضحى بماجستير و دكتوراة فى الأشعة التشخيصية و رئيس قسم فى السعودية فقط عشان ولادى يتعلموا و يعيشوا فى بيئة نظيفة.... مين فينا بقى بيضحى أكتر ؟

سلامة رقبة سيادتك....

[moheltohamy]

هاهاهاهاها ... والله يا باشا أنا كنت عارف إنك مضحي بالكتير! مانا قلت كده برضه:

وأعتقد د. الشامي مضحي بأكتر من كده كمان. تعتقد كل ده بلا مقابل؟!

وإن كنت مش عارف حتى الآن إيه البلان بتاعك!

وشكراً على دعوتك يا كبيرنا bsh:)

د. قناوي ... أنا بجد باحترمك وباعتز بمعرفتك جداً ، ومن النادر أن أصادف العقلية بتاعتك وأسلوب تفكيرك. وأعتقد هتلاقي الكتير هنا ممن يقدرون فكرك زيي بالضبط.

باشمهندسة سمية ... (مش هندسة برضه؟!)

يا افندم ربنا يخليكي. بس همه دايماً البنات متدلعين bngn:: يشتكو من مليون حاجة تاعباهم ، وكباية عصير قصب تخففهم... اللهم لا حسد

والحق أروح أنجز في حلقة النهارده عشان أنا عندي كذا يوم تأخير ، ومحدش بيرحم. :angry:

تم تعديل 5 أغسطس 2008 بواسطة moheltohamy