استفسارات حول الهجرة - 1

[ghallab]

شكرا اخى الفاضل عل اهتمامك

اه الكاريير كاستاذ جامعى حاجة كويسة وبتصيب الناس بالانبهار لاول وهلة

لكن اليك الاتى يا استاذى الفاضل،،، زميلى الاكبر منى بسنة الراتب 700 جنية ، وعشان تعمل بحث فى تخصصنا وتقدم رسالة اقل ما تعمله 13 مركب جديد والمركب الواحد بيتعمله حوالى 5-6 تحليللات طيفية التحليل الواحد فى المركز القومى للبحوث او فى جامعة القاهرة ب50 جنية ، والكيماويات على سبيل المثال زميلى هذا كان عاوز 10 جرام من مادة معينة سال عليها لاقيها بالفين جنية بعد انتظار 4 شهور رد من الجامعة قالوله ادفع انت النص واحنا النص وطبعا هيحتاج اكتر من مرة المادة دى عشان يقدر يوصل لمادة فعالة فى النهاية ، وهذا ابسط ما يمكن قوله ناهيك عن اننا بنشتغل بدل المحضرين فى احيان كثيرة وكمان السكرتارية وتيجى تكلم يقولولك معلش مفيش عمالة كافيه هنعمل للعمال اية يعنى لانهم مش مربوطين بحاجة انما المعيد متكتف انه لازم يسمع الكلام عشان رسالته ، انا مش بذم فيهم لكن هما كمان غصب عنهم ، مش معقول هسيب اشغاله ويعمل الحاجات الصغيرة دى اللى من الممكن المعي يقدر يعملها ، وفوق كل ذلك انا متزوج واعول....وتخيل انت باة

'طب و اخبار الكورسات ايه انا على ايامى كان الميعدين راكبين احدث عربيات و الدكاتره عربيات على قد الحال

[جيمي]

انا فعلا كنت هقترح عليه الاقتراح ده......بس رجعت وقلت ياواد انت مش متاكد ان كانت الكورسات حلال ولا حرام

بس فى حالتك دى انت حلال تعمل اى حاجه

[enjisultan]

انا مش قصدى اسودها بس حتى البعثات اللى قصدك عليها بعد الماجستير اسمع الشروط وانت تحس انا جوزى مدرس مساعد البعثة الاولى لكندا ولازم اجادة تامة للغة الفرنسية كدة طارت كندا....اللى بعدة المانيا لازم معمل من هناك تحت اشراف بروفسيور يبعت يقول للجامعة انا عاوز الدكتور دا...تالت فرصة للخليخ زى الدكتور قناوى بيقول على اساس انك تجيب قرشين تصرف بيهم على الهجرة فشلت اجازة مرافقة الزوجة (حيث ان رئيس جامعة عين شمس مانع اى اجازات )يعنى لازم نسيب الجامعة وبصراحة شغل الخليج دا حظوظ وكمان حتى لو مرتبك 1000 جنية لو ما عاجبكش الحال كمان 1000 دى تبقى طارت والهى انا اسفة جدا جدا على جرعة الهم دا بس والهى احنا فى نفس الموقف...فعشان تتصور الصورة الواقعية لاعضاء هيئة التدريس يعنى لا بيسيبوهم يشوفوا حالهم ولا رواتبهم تكفى حاجة..وربنا يكرمنا ويكرمكوا..

[أحمد سيف]

لو ماعندكش استعداد تستحمل لحد ما تاخذ الماجستير على الأقل وتلاقيلك منحة دكتوراه من جامعة بره ومصصم على حكاية الهجره دي في أقرب فرصه يبقى تسيب الجامعة وتشتغل بره علشان تعرف تعملك قرشين وتاخذ خبره ... وبعد ما تهاجر ابقى قدم على ماجستير ودكتوراه هناك وخذلك منحه أو اشتغل بارت تايم، ده لو كنت لسه حاطط موضوع كاريير التدريس والأبحاث في بالك.

حل ثاني إنك تقدم على دراسة ماجستير في Bioscience (مش متأكد ده له علاقه بتخصصك ولا لأ) في KAUST أو في جامعة محترمه بره مصر بتدي منح لطلاب الماجستير (ولو لقيت في كندا يبقى انت محظوظ )، وبكده تكون مسكت العصايه من النص، ما سبتش كاريير الجامعة وفي نفس الوقت هاتعمل شوية فلوس يسهلولك طريق الهجرة

[أحمد سيف]

أو ادخل على مواقع شركات الأدويه العالمية ساعات بيبقوا منزلين منح أبحاث ممكن تقدم عليها ولو ربنا وفقك يبقى أمورك هاتتيسر إن شاء الله

[حسام يوسف]

بص يا دكتور

لا مفر مبدأيا من الكورسات أو الدروس

العبدلله صيدلى يعن عارف اللى فيها لدرجة ما

ومع احترمى لحل أخى وصديقى العزيز أحمد سيف بخصوصالخروج من الجامعة والعمل كصيدلى

لا

ما انصحكش

انا شايف انك تبدا دروس

لازم

جمد قلبك واتكل على الله

وفية منحة بيعملها رجال اعمال مصريين(تخيلوا)

بقيادة ابن الاستاذ هيكل ربنا يديلة الصحة

www.citadelscholarships.org

اعتقد ممكن يبقالك فرصة كويسة

اطلب منحة فى امريكا أو كندا

وبلاش انجلترا

مش هتكفى فلوس المنحة

ولو خدت المنحة

يبقى عديت لبر الأمان

أتمنى أكون ساعدت

وماتنساناش بدعاءك

[kishko]

يا جماعة انا بس عاوز واحد متخصص شوية وعندة خبرة فى موضوع كندا دة عشان والله تعبت خالص

يا اخوانى الاعزاء

كنت قد خطبت فتاة وقام اهلها بتزويجها ل شاب اخر حتى ياخذها لكندا ولانة ميسور الحال جدا

ولكن خطيبتى لم تكن تحبة وكانت تحبنى المهم انها اصرت على الطلاق منة بعد سفرة بها الى كندا والحمد لله تمت اجراءات الطلاق وخطيبتى الان هناك فى ادمينتون فى كندا

المهم انها تقيم عند احد اقاربها هناك وهى تريد ان تستقر هناك 3 سنوات حتى تاخد الجنسية وبصراحة انا عاوز اروح لها ومش عارف اعمل اية ومش عاوز اضيع عليها الجنسية بنزولها مصر

اخوانى افيدونى الله يكرمك

والله تعبت ومش عارف اوصل لها ازاى

مستنى ردودكم

وشاكرين افضالكم :)

[اسكندرية تانى]

بريد الاهرام عدد يوم الجمعة

و الرابط من هنا

www.ahram.org.eg

:) md2:

تم تعديل 27 يناير 2009 بواسطة اسكندرية تانى

[السندباد المصري]

متشكر اوى يا جماعة على الرد وتعاونكم ده ، مبدئيا بالنسبة لموضموع الدروس انا مش عارف سمعتو عن الكلية عندنا ولا لا؟عين شمس لسه فاتحة جديد مخرجه 8 دفعات بس ، والعدد قليل والدكاترة معظمهم بيؤدى اللى عليه بيضمير فمفيش مجال للدروس ، ولو وجد هيبقى برة كلية الجامعة دى ، فايام العربيات الجامدة انتهى على حظى يا استاذى الفاضل الحاجة التانية انى متشكر اوى على الموقع بتاع المنح بتاعت رجال الاعمال وانا دخلت وبدات اشوف المتطلبات وكده بس اتمنى ان ميكنش ناس كتير عارفاه ههههه

وموضموع انى اسيب الكاررير صعب وسهل

صعب لان اللى يفوتوه الميرى يتمرمغ فى ترابه معلش باة تفكيرى قديم شوية لكن الحقيقة ان لما الظروف بتقفل على الاخر الواحد يلاقى حاجة يتسند عليها بمعنى زى مقالت الاخت الفاضلة الخليج مش دايم لحد حتى لو رحت وغير كده عشان اسيب حاجة لولادى انشاء الله اذا الواحد جرى له حاجة حتى لو كان دخل ضعيف

سهل لان بالنسبة للماديات والارتياح النفسى وعدم وجوده ضغوط نفسية هيبقى مفيش مقارنه اساسا

كل اكللام اللى قلتوه فكرت فيه وخصوصا ان فى ناس عندنا فى الجامعة سابو الكاريير واشتغلو فى الكويت والامارات والسعودية وماشاء الله الوقتى وفى ناس تانية استحملت وصبرت وخدت الماجستير وسافرت بعثات محترمة لدول كتير فربنا ييسر والواحد يقدر يقرر ومتشكر جدا ليكم

[Mshawky]

السلام عليكم ورحمه الله وبركاته

-----------------------------------

انا مهندس شبكات IT وشغال فى البحرين بقالى سنه تقريبا وطبعا مقدرش اخد شهاده خبره من الشركه لانى اشتغلت سنه وسبتها والمفروض هروح على شركه تانيه ان شاء الله

المهم خبرتى كلها 3 سنين ولكن للاسف متفرقين يعنى كل شركه سنه ففى شركه فى مصر اقدر اخد منها شهاده خبره بسنتين على انى اشتغلت معاهم وده حصل فعلا بس كان بارت تيم فديه مش مشكله اقدر اتصرف فيها الكلام ده من جانب مصر

بالنسبه للبحرين هل من اول سنه فى الشركه الجديده اللى هى السنه دى ان شاء الله اقدم على الهجره واكتفى بسنتين بتوع مصر

ولا انتظر مده العقد سنتين واخد بيهم شهاده خبره وبالتالى يكون كله 4 سنين

مع العلم ان سنى حاليا 24 سنه وماشى فى 25 فحبي اخد راى الاخوه علشان اتصرف صح ومشى فى اتجاه صحيح

وجزاكم الله كل خير

اخوكم فى الله \المهندس محمد شوقى

تم تعديل 28 يناير 2009 بواسطة Mshawky

[Mshawky]

???????????????????????????

[Bustami]

احسب نقاطك بتعت الهجرة وشوف السنة كفايو ولا السنتين ولا 3 سنين افضل علشان توصل 67 نقطة

انتبه لدرجاتك في الايلتس كن دقيق

بعد كده تقدر تقرر

انا افضل 3 سنوات خبرة لكن لو انت مستعجل قدم 2 سنة

موضوع البارت تايم لا يؤخذ به , جيب شهادة خبرة بدوام كامل

[Bustami]

اول حاجة قدم على فيزا سياحيه وروح هناك واتجوزها وعيش قانوني

لو مانفعش

خليها تبعتلك دعوة على اساس انكم مخطوبين وحتتجوزوا

لو مانفعش

اعمل توكيل لاي حد من قرايبها علشان يجوزك ليها او العكس هي تعمل توكيل لحد من قرايبك عشان يجوزها ليك ثم تقدملك هجرة عائلية خلال 8 شهور تكون هناك

لو مانفعش

حاول تجيب قبول من اي جامعة للدراسه - بكالوريوس او حتى دورة انجليزي

اطمن وضعك سهل

[Bassam El Sayed]

انت غريب اوى يا kishko

برغم انها كانت متجوزة مصر بردة تسميها خطيبتك

ما علينا زى ما قالك الاستاذ aldostamy

اقصر الطرق فى الى قالة دة انها تبعت توكيل لاى حد فى مصر تتجوزوا بية زواج رسمى وهى تبعتلك زى ما جوزها الاولانى اخدها كندا هى تخدك هناك كمان لانك زوجها وفى خلال من 6 الى 8 شهور بتسافر .

بس بقى يا حلو لازم هى تشتغل وتكون بتكسب فلوس او تجيب اثبات ذلك ولو حتى على ورق انها شغالة وليها دخل هناك وتقدر تعولك غير كدة مش هيسمحوا ليك انك تسافر.

باقى الاقتراحات التانية ما اعتقدش انها مجدية يعنى مثلا الخطوبة مش هتنفع لازم عقد زواج رسمى تثبت بية انك زوجها .

موضوع انك تراسل جامعة وتروح هناك تدرس دى هتكلف كتير جدا ولازم تدفع الفلوس علشان تاخد الفيزا وحتى لو سافرت تدرس هتبقى الفيزا بتاعتك للدراسة فقط مش هجرة بمجرد انتهاء فترة الدراسة لازم ترحل من كندا.

يا اما تسيبها هى بقى هناك وتقدم انت على الهجرة من هنا وتنضم لينا فى طابوووووووووووووووووور الانتظار يا حبيبى .

[Bassam El Sayed]

مهندس محمد

انا مش فاهم لية ما تقدرشى تجيب شهادة خبرة بسنة من شركة البحرين مش عارف اية المشكلة؟

المهم انت اصلا لما تيجى تقدم مش هيطلوا منك اى شىء غير الابلكيشن ولما ييجى دورك هيطلبوا منك تحديث شهاداتك . ساعتها هتبعت بقى كل شهاداتك (المؤهل والخبرة وكل الى طالبينة)

بس فى ظل القانون الجديد امتى ييجى دورك الله اعلم بعد سنة بعد اتنين مش عارف

المهم احسب نقطك وشوف .

[znaty]

بص يا محمد عاوز الخلاصة بجد ؟؟

انت عازب ومعاك بكالوريوس

مالكش اي حل تاني غير انك تجيب شهادات ب اربع سنين خبرة وتجيب اعلى درجات في الايلتس كمان في الاربع فروع

وخد بالك الربع سنين ساعة لما تقدم الابلكاشن اول مرة

لانه بيعملك تقييم ساعة لما يوصل الابلكاشن اول مرة وبعدين يبعت يقولك كمل او ماتكملش

يعني ماينفعش تبعت استمارات فيها سنتين خبرة وتقول لما يبدا البروسيسسنج هابقي 4

دة الى جانب ان البروسيسنج في النظام الجديد بيبدا في خلال 6 شهور من تاريخ تقديمك

وبعدين انا شايف سنك لسه صغير يعني مافيش داعي للتسرع والموضوع بردة محتاج شوية مصاريف

يعني استني تكمل اربع سنين بشهادات رسمية في ايدك وتحوشلك قرشين وبعدين قدم مافيش داعي للاستعجال الوقت بالنسبة ليك

وبعدين جايز ربنا يكرمك ببنت الحلال وتكون معاها بكالوريوس تبقي خدت الزوجة الصالحة واربع نقط كمان

[znaty]

ماتنسوش انها موش كندية لسه

يعني موضوع الخطوبة والجواز دة موش متاكد من حقها تستقدم جوزها والا لازم يمشي في اجرائات عادية بردة

وبعدين هل هيا مطلقة قدام الحكومة الكندية كمان والا ايه ؟ دة اذا كان جوزها كندي يعني

موش عارف ليه حاسس ان الموضوع دة لبش شوية

[Bassam El Sayed]

لا يا زناتى

موضوع واحد متجوز عايز يجيب مراتة او واحدة متجوزة عايزة تجيب جوزها دة اكيد بس المشكلة فى كلتا الحالتين لازم الزوج او الزوجة الى فى كندا يجيب اثبات ان لة دخل ووظيفة يقدر يصرف بيها على الشخص الى هيجيبة

موضوع انها مش كندية دة مش مهم هى معاها PR يعنى من حقها بردة تجيب جوزها مش شرط الجنسية

[Mshawky]

بص يا محمد عاوز الخلاصة بجد ؟؟

انت عازب ومعاك بكالوريوس

مالكش اي حل تاني غير انك تجيب شهادات ب اربع سنين خبرة وتجيب اعلى درجات في الايلتس كمان في الاربع فروع

وخد بالك الربع سنين ساعة لما تقدم الابلكاشن اول مرة

لانه بيعملك تقييم ساعة لما يوصل الابلكاشن اول مرة وبعدين يبعت يقولك كمل او ماتكملش

يعني ماينفعش تبعت استمارات فيها سنتين خبرة وتقول لما يبدا البروسيسسنج هابقي 4

دة الى جانب ان البروسيسنج في النظام الجديد بيبدا في خلال 6 شهور من تاريخ تقديمك

وبعدين انا شايف سنك لسه صغير يعني مافيش داعي للتسرع والموضوع بردة محتاج شوية مصاريف

يعني استني تكمل اربع سنين بشهادات رسمية في ايدك وتحوشلك قرشين وبعدين قدم مافيش داعي للاستعجال الوقت بالنسبة ليك

وبعدين جايز ربنا يكرمك ببنت الحلال وتكون معاها بكالوريوس تبقي خدت الزوجة الصالحة واربع نقط كمان

كللامك عجبنى بس انا قولت الواحد يبتدى هناك ويستغل سنه بس فى الخبرات هناك ويكمل ويستق لان الخليج الصراحه مش مبسوط منهم بكل الاشكال

وعقولهم تعبانه اوى ومفيش خبره بتضاف ليا بسرعه بالاخص مجالنا زى الطب ان مكنتش تذاكر وتحدث نفسك هتروح فى شربة ميا

المهم انا هفكر تانى فى الموضوع وربنا يكرمنى ان شاء الله واكون اتجوزت

[kishko]

السلام عليكم ورحمة الله وبركاتة

اولا اشكر جزيل الشكر اخوانى الاعزاء

albostamy و Bassam El Sayed و znaty

وعلى فكرة يا اخ زناتى الموضوع مش لبش ولا حاجة دى الحقيقة تماما

انا بس عاوز برضو معلش استفيد من خبرتكوا

شكلكوا ما شاء الله عندكو خبرة كبيرة فى الموضوع دة والله انا فخور انى عرفتكوا

يعنى هى دلوقتى اتطلقت منة وبتنهى فى الوقت الحالى اجراءات الطلاق رسمى قدام الحكومة وهى معاها تصريح تفضل بية هناك 5 سنين وبتقول يعنى على كلامها انها لوفضلت 3 سنين تاخد الجنسية

وهى دلوقتى بتدور على وظيفة وان شاء الله سهل تلاقى عشان معاها قرايبها هناك

بس انا كنت عاوز اعرف يعنى الموضوع سهل انى اروح لها زى ما قال اخويا البوستامى؟؟؟؟؟؟؟؟؟؟؟؟؟؟؟؟؟

وهل فيزا السياحة غالية؟

وهل اننا لو مخطوبين ينفع تبعتلى دعوة على اساس الخطوبة بس ولا لازم عقد زواج؟

وهل لو اتجوزنا عن طريق التوكيل دة ينفع تبعت لى قبل ما تاخد الجنسية زى ما بيقول اخويا بسام؟

وهل لو مطلقة قدام الحكومة او مش قدامها دى تفرق؟؟؟؟؟؟؟

مع العلم ان جوزها كندى متجنس

ومع العلم ايضا انى فى الانجليزى مش اوى يعنى نص نص (مستوى التعليم العالى بتاع مصر) يعنى مش عارف اذا كنت هاسد فى الانتر فيو (ان وجدت) ولا لا

افيدونا يا جماعة ربنا يرضى عليكم

وشاكر افضالكم جميعا