استفسارات حول الهجرة - 1

[qenawy]

يا عم لو معاها هي الPR يعني الاقامة طيب ما تتفضل هي تنزل مصر وتتجوزها وبعدين هي تسافر تاني وتبعت لك الدعوة وعندها سيكون معك عقد الزواج وصور الزواج والذي منه

اظن ما حدش رابطها في كندا لو عاوزة تنزل مصر عشان تتجوزوا هيبقي الموضوع سهل

ربنا يوفقك

علي فكرة لو هي لسة علي ذمة الرجل الاخر رسميا يبقي انسي الان لغاية الانفصال ما يكون كامل ورسمي

[kishko]

اشكرك اخى الفاضل قناوى

ومعلش كنت عاوز اعرف بس اجابة الاسئلة دى عشان افاضل على اسهل حاجة بالنسبة لى

هل فيزا السياحة غالية؟

وهل اننا لو مخطوبين ينفع تبعتلى دعوة على اساس الخطوبة بس ولا لازم عقد زواج؟

وهل لو اتجوزنا عن طريق التوكيل دة ينفع تبعت لى قبل ما تاخد الجنسية ؟

وهل لو مطلقة قدام الحكومة او مش قدامها دى تفرق؟؟؟؟؟؟؟

افيدونا

وشكرا لكم جميعا

:rolleyes:

[moheltohamy]

بص يا عم كيشكو... د. قناوي جابلك م الآخر فعلاً...

الراجل ده دماغه جامدة بجد :wub:

هاحاول ألخّص لك الموضوع في كام نقطة...

- لازم تطبّق القاعدة 23 بتاعتنا أيّام الجيش (إلعب ف المضمون ، أو كما كنا نسمّيها Play in the madmoon)

يعني لمّا تروح لسفارة كندا ، تكون رايح وانتا عارف راسك فين ورجليك فين زي ما بيقولوا! ما تسيبش مجال للاحتمالات!

- الـ PR زيّه زي الكندي الجنسيّة ، مش فارقة خالص في الحالات دي.

- المفهوم ضمناً من كلامك إن خطيبتك السابقة متمسّكة بيك حالياً ومستعدّة تعمل أي حاجة عشان ترجعوا لبعض تاني. ده اللي هافترضه في كلامي معاك.

- أوّلاً ، لازم تكون في نظر القانون الكندي مطلّقة ( معاها Divorce Certificate) ، ودي بتاخدها بعد مرور شهر على قرار المحكمة بالطلاق. بالشهادي دي بس حضرتك ، يصبح من حقها الزواج مرة تانية!

لو الإجراء ده ما اتعملش ، حتى لو اتجوّزتوا في مصر ، الحكومة الكندية لا تعترف بيه لأنها - في نظرهم - لسّه (على ذمة راجل تاني :blink: )

طبعاً الطلاق المصري مالوش لزمة بالنسبالهم هناك ، لازم تمشي في إجراءات طلاق مدني هناك ، ولو ما كانتش بدأته بالفعل ، فالمفروض بتعمل الأوّل Separation لمدّة سنة ، وبعدين من حقها تطالب بالطلاق. ده لو ما كانتش خلّصت الإجراءات دي ، وده اللي انتا مش موضّحه في كلامك!

ثانياً ، ترجع مصر في زيارة وتتجوّزوا ، وتعتمد الجواز ده ، وتطلّع شهادة بالانجليزي من وزارة العدل في لاظوغلي ، وتعتمدها من الخارجية ، وبعد كده تطلع ع السفارة الكندية في جاردن سيتي تعتمدها من عندهم.

واللي مش متأكّد منه بعد كده ، هل الطلب والإجراءات بيتعمل منها حاجة تانية في مصر ، ولا كله بيكمَل في كندا.

ثالثاً ، بترجع على كندا ، وتعمل لك Sponsorship من كندا ، تحت بند الـ Sponsoring your spouse...

والمفروض من ضمن الأوراق اللي بتقدّمها تعهّد كتابي منها ومنّك برضه ؛ إنك مسئول منها مادّياً لمدة 3 سنين ، وطبعاً بتقدّم لهم إقرار بدخلها عن العام السابق من شغلها ، ومن ملفها ف الضرايب.

وطبعاً بيتعمل عليك كشف طبي عشان التأكد من حالتك الطبية ، وبرضه بيحتاجو منك فيش وتشبيه إن سجلّك الجنائي سليم وزي الفل.

وآدي قانون الطلاق الكندي :unsure:

- المفروض إن الموضوع ده بيعتبر من أسرع الطلبات اللي بيُنظر في أمرها ، وفي المعتاد بيتبت فيه بعد 6 شهور (عشان لم شمل الأسرة Reunion)

السكك التانية بأه اللي عاوز تمشي فيها دي تضييع وقت وفلوس ، ومش مضمونة م الآخر!

والموقع بتاعهم فيه الكلام الرسمي... مش جايب أنا كلامي ده من بيتنا :blink:

ولو تحب أجيبلك تفاصيل تانية ، ممكن أبقى أسأل لك واحد صاحبي كان بدأ المشي ف السكة دي... بس انتا مبدئياً عرفت الخطوات الأولى.

وبالتوفيق مقدماً :rolleyes:

تم تعديل 29 يناير 2009 بواسطة moheltohamy

[kishko]

اخى الفاضل محمد التهامى

اشكرك جزيل الشكر والله يا اخى

انا مدين لك

بصراحة انت جبت من الاخر وبالشرح الوافى

واشكر برضو اخواتى كلهم البوستامى وبسام وزناتى ود.قناوى

يا جماعة والله انتو متعرفوش انتو ريحتونى اد اية

اشكركم جزيل الشكر

وانا استفدت من كل واحد فيكو

ان شاء الله اظبط اوراقى وامشى فى الاجراءات

ولو فى اى حاجة تانية ان شاء الله ارجعلكوا

بكرر شكرى ليكوا كلكوا

وبعتز بيكوا والله

وفعلا المنتدى دة اكثر من رائع

بس جامدة اوى Play in the madmoon :blink: :wub:

اراكم على خير :rolleyes:

[تاتا]

اخى د قناوى تحية لك ولاخوانى فى المنتدى وصلنى امس خطاب من مكتب لندن مرفق بة ايصال استلامهم لمبلغ رسوم التقديم ويفيد بانهم قد ارسلو ملفى الى نوفا سكوتيا وعلى ان انتظر خطاب منهم يفيد بالموافقة او الرفض وان اتبع تعليمتهم واذا لم يصلنى الخطاب خلال 4 شهور فعلى مراسلة مكتب لندن بذلك علما بانى طبيب وارسلت ملفى فى 30 اكتوبر 2008 سؤلى هو هل وصل لغيرى من من قدموا للندن من الخليج حول هذا التاريخ وما هى الخطوات المتوقعة بعد ذلك والمدة الزمنية المتوقعة

[walidfh]

إقتباس(safar @ Dec 11 2008, 03:29 PM)

يرجى من الأخوة الذين قدموا Simplified Application ووصل لهم خطاب من الهجرة الكندية يطلب المستندات إرفاق صورة عن الخطاب وما هي المرفقات التي يطلبونها من شهادات ومستندات، وكيفية توثيقها في بلدان الخليج وخاصة البلدان التي ليس بها سفارة كندية كدولة قطر.

مع تحياتي

إلى الأخ safar

لقد قدمت على الهجرة في السفارة الكندية بالقاهرة في شهر اغسطس 2008 الماضي وحصلت على File Number وجائني رد من السفارة لتجهيز المستدات في 14 يناير 2009 وقد وضعت رد السفارة في الملف المرفق ويمكنك فتحه عن طريق Adobe

لعل المعلومات تكون مفيدة لك

تقبل تحياتي

embassy_email.pdf

[qenawy]

شكرا وليد

معلومات مفيدة جدا

ملحوظة لو تاخدوا بالكم الراجل مقدم في شهر 8 يعني السرعة كبيرة جدا

علي الجميع حجز الاليتس وبسرعة امن هم في نفس الحالة

[safar]

اشكر الأخ وليد على المعلومات التي قدمها، والتي تخص النظام الجديد الذي بدأ العمل به في شهر نوفمبر 2008 ، بينما طلبي تابع لما قبل 27 فبراير 2008 ، وبنظام Simplified Application. أي تقديم طلب من ثلاث ورقات فقط دون أي مرفقات مع الرسوم.

على فكرة هل يوجد أحد وصل له من مكتب لندن رسالة تطلب منه المستندات لدراستها على نظام السمبليفايد ابليكشن أم لا حيث حسب متابعتي لأحد المواقع لم يأت لأحد أي طلب منذ 19 نوفمبر 2008 ، يعني حوالي الشهرين.

مع تحياتي للجميع

[ahmed_saleh]

اشكر الأخ وليد على المعلومات التي قدمها، والتي تخص النظام الجديد الذي بدأ العمل به في شهر نوفمبر 2008 ، بينما طلبي تابع لما قبل 27 فبراير 2008 ، وبنظام Simplified Application. أي تقديم طلب من ثلاث ورقات فقط دون أي مرفقات مع الرسوم.

على فكرة هل يوجد أحد وصل له من مكتب لندن رسالة تطلب منه المستندات لدراستها على نظام السمبليفايد ابليكشن أم لا حيث حسب متابعتي لأحد المواقع لم يأت لأحد أي طلب منذ 19 نوفمبر 2008 ، يعني حوالي الشهرين.

مع تحياتي للجميع

الاخ safar

فعلاً كلام سليم في ناس جالها الـ update في نوفمبر 2008 و هي AOR في يناير 2007

وفي رواية آخرى المفروض CHC يرسلوا الـ update بتاريخ سنتين الا ثلاثة شهور من تقديم الـ Application

على العموم ياريت يكون في تواصل و نبلغ بعض اذا جد جديد :)

[YUSY]

انا اعرف ناس كان جالهم الفيل نمبر فى نوفمبر 2006 وطلبوا منهم الابديت فى يناير 2009

[AboAsem]

أستاذ تاتا

أنا أيضاً و صلنى نفس الخطاب ، مقدم من ابو ظبى فى أغسطس 2008 ، و حسب ما فهمت أننا منتظرين تحديد هل نحن مؤهلين للهجرة و لا لأ

فى حاله قرر مكتب نوفا سكوتشيا إننا مؤهلين للهجرة هناخد رقم ملف و هيطلبوا الأوراق و نكمل الإجراءات

إذا كنا غير مؤهلين سنسترد أموالنا و غيرها فى غيرها

طب ليه مكتب سيدنى فى و لايه نوفا سكوتشيا ؟؟؟ الله أعلم

[saad badr]

مساء الانوار يا دكترة

احمد ربنا انهم ردوا عليكم انا ولا عبروني لغاية دلوقتي ومقدم من امتى يا مؤمن من 22-7-2008 شفت حكمة ربنا ولو بعتولي زيكم كده يبقى الموضوع يخدلوه اربع شهور كمان والملف يجي وينفتح خمس شهور كمان والاختبارات سنة كمان وسنتين لححبايب يبقى الواحد يروح هناك على السبعين بقى وايه هيكون في النهاية بعد ما اكون عملة حاجه هنا لا هروح وابدا من الصفر ان لم يكن تحته هناك وربك يسطر ويسهل للجميع

[BiGGuY]

لي صديق لديه من العمر 24 عام وليس لديه اي شهادات سوي الثانوية العامة ويريد ان يستفسر عن الفرص المتاحة امامه للهجرة الي كندا وهل هناك اي شيء لتحسين فرصته مع العلم انه لديه قريب ولاكن ليس من الدرجة الاولي يعني حاجة زي ابن خالة عم امي كده هههههههههههههههههههه فهل ممكن قريبه ده يقدمله اي نوع من انواع المساعدات التي من شأنها رفع نسبة نجاحه في الهجرة ولو في شهادات لغة مثلا او حاجة ممكن ترفع نسبة نجاحه يا ريت تقولولي لانه كل دماغي من كتر السؤال مع العلم انه كان في كلية حقوق وسابها علشان الموضوع ده يعني لكم ان تتخيلوا الموضوع في دماغه قد ايه ولو مينفعش هجرة هل تنفع دراسة وهتكلفه كام وهل ممكن يشتغل اثناء دراسته ولا لا ولو اني علي ما اعتقد لو موضوع الدراسة ده مرتبط بمجموعه في الثانوية العامة اعتقد انه فرصه معدومة لان مجموعه UNDERGROUND هههههههه

أفيدوني يا اهل الخبرة

[Bassam El Sayed]

موضوع الهجرة بالنسبة لة انسى يا معلم وقريبة مش هيديلة نقطة واحدة . الى يقدر يفيدة القرابة لحد العم او الخال فقط

حلة الوحيد يطلع للدراسة هناك بس دى هتكلفة كتير وبعد ما يحصل على الشهادة من هناك يقدم للهجرة.

الراجل دة مجموع درجاتة مش هيكمل. يكفى انة هيتخصم منة فى نقاط التعليم 10 درجات علشان مش معاة مؤهل جامعى

[samehelassad]

كندا محتاجة مهنيين. زي سباكين وما الي ذلك. لو عرفت تثبت انك حرفي. ومعاك شهادة خبرة انك حرفي. وسجلت نفسك في نقابة المهنيين كحرفي. هيكون معاك مايثبت ذلك للسفارة. وبالتالي لو قدمت هتقبل.

لما كنت في السعودية كنت اعرف مهندسين بيجو السعودية على فيزة عامل بشكل زي كدة. وبعد كدة يعمل تغيير مهنة. بس الحقيقة ماعنديش تفاصيل اكتر من كدة.

[Torontotruk]

كندا محتاجة مهنيين. زي سباكين وما الي ذلك. لو عرفت تثبت انك حرفي. ومعاك شهادة خبرة انك حرفي. وسجلت نفسك في نقابة المهنيين كحرفي. هيكون معاك مايثبت ذلك للسفارة. وبالتالي لو قدمت هتقبل.

اخيرا صدقت كلامي اللي كنت بأوله من اكتر من سنتين...سبحان الله...ولمعلوماتك بعد سنتين بالظبط الهجرة لكندا حتبئي للعلماء...وحتبئي عن طريق الابحاث...يعني يقدم بحث علمي ولما يتوافق علي بحثه ...معناه انهم وافقوا علي هجرته...طبعا بجانب الحرفيين اللي معظمهم حياخدوهم من شرق اوروبا وامريكا الاتينية...

[BiGGuY]

يعني لو اثبت انه مهني عن طريق شهادة هترفع نسبة نجاحه كام نقطة ويا تري هيبقا فيه اختبار يعني ولا لا وايه اكتر المهن الحرفية المطلوبة

اما بالنسبة للدراسة يا تري ايه ظروفها يعني الاستاذ Bassam El Sayed قلي عليه وعلي الدراسة فهل فعلا ينفع مع العلم ان مجموعه في الثانوية العامة 50 % بالظبط فهل في فرص قدامه بالمجموع ده في الدراسة بعيدا عن انه هيعرف يحصل او ميعرفش انا مبتكلم عن الجامعة نفسها هل في ممكن جامعة تقبله هناك بالمجموع ده ولو فيه يا ريت حد يفيدنا في الموضوع ده ولو فيه اي حاجة تاني ممكن ترفع نقطه يا ريت حد يقولي

سؤال تاني انا لو عاوز اعرف نموذج النقط ده احصل عليه منين او لو موجود عند حد من حضراتكم يا ريت يبقا يبعتهولي علي اساس ادهولو وهو يشوف اللي يناسبه

يعني من الاخر خبرته بالموضوع ده ميييييييييييييييح وانا التاني كذلك انا كنت هنصحه يشوفله محامي هجره بس بعد اللي شوفت وسطيكم انتم فعلا بمليون محامي هجرة فعلا ونعم السند

[Bassam El Sayed]

شوف يا اخ bigguy

مسالة انة جايب 50% دى اكيد هتقلل فرصتة فى القبول بس ممكن تلاقى جامعة توافق .

مثلا مقاطعة اونتاريو بس فيها ما لايقل عن 25 جامعة غير الكليات والمعاهد دة غير باقى مقاطعات كندا

خد اللينك دة هتلاقى list بكل مقاطعات كندا جوة كل مقاطعة هتلاقى لستة تانية بكل الكليات والمعاهد والجامعات فى المقاطعة دى .

http://www.canadian-universities.net

خلى صاحبك يراسل الناس دى ويبعتلهم وما تخافش لازم هيردوا عليك ما عندهمش حاجة اسمها طناش . بس العملية هتحتاج فلوس تمن الدراسة . وهو لو اخد مؤهل من هناك فرصتة فى الهجرة كبيرة دة بالاضافة انة هيقدم على الهجرة من داخل كندا يعنى هتبقى اسرع

[Bassam El Sayed]

نسيت اقلك انة علشان يتقبل بالاضافة الى انة يكون معاة فلوس الدراسة لازم هيطلوا منة امتحان IELTS ال ACADEMIC مش GENERAL .

كل جامعة هتلاقى ليها شروط فى القبول خش وشوف ممكن تلاقى جامعة توافق علية

[BiGGuY]

اولا الف شكر ليك يا استاذ بسام بس انا كام ليه كام استفسار كمان معلش هتقل عليك

امتحان IELTS ال ACADEMIC منين وازاي

انا عمال اسمع عن نقط واللي يقولي انت بكده خسرت نقط كذه او حاول تحصل نقط كذه

انا عاوز اعرف اكتر عن الموضوع ده ويا ريت لو فيه نموذج لموضوع النقط ده حد يلحقني بيه علي اساس اني اديه لصاحبي بحس هو ادري بالنقط اللي موجوده عنده والاهم هو اكتر واحد هيقدر ايه النقط اللي ممكن يجمعها

وانا اسف كمان مرة لكثرة اسئلتي بس ده نابع اني عارف انكم لديكم الاجابات اللي انا وعاوزها وواثق اكتر انكم مش هتبخلوا عليه بيها