شكراً طلعت السادات ... وحسبي الله ونعم الوكيل في جهاز الشرطة

[se_ Elsyed]

والله أصبحت أضرب كف على كف

تاني مره يعملها طلعت السادات ويترافع في قضية رأي عام تخص مذابح بشعه تُجرى في الصعيد وتحديداً بالمنيا.. واعتقد والله أعلم إن بيترافع مجاناً لأنهم ناس مُعدمين

وأستعجب من الناس اللي ما بتتقيش الله في الشرطة

يقول لك تم القبض على المتهم واعترف بالتفصيل وتماما التمام وناقص يقولوا إن الموتى صحيوا وقالوا إن هو ده اللي قتلنا

ويتضح عكس ذلك تماماً ومن الواضح إن المتهم أتنفخ لحد ما أعترف عشان يريح نفسه وبكده يبقى الأعدام احسن له وإنه كان كبش فدا عشان الشرطة تسكت الرأي العام

ولنا عوده

«جنايات المنيا» تخلى سبيل المتهم فى مذبحة «بنى مزار الثانية»

كتب سعيد نافع ١١/ ٣/ ٢٠١٠

محمد حسين إسماعيل

قررت محكمة جنايات المنيا، أمس، إخلاء سبيل محمد حسين إسماعيل حسن، المتهم بقتل ربة منزل وأبنائها الثلاثة داخل منزلها بقرية «أبوالعباس» مركز بنى مزار بالمنيا، فى ٢١ ديسمبر الماضى، وهى القضية التى عُرفت إعلاميا باسم «مذبحة بنى مزار الثانية».

ونجح طلعت السادات، محامى المتهم، فى الحصول على قرار من المحكمة برئاسة المستشار عرفان صديق، وعضوية تامر سعد زغلول، وأحمد طارق، وأمانة سر جلال مؤمن، بإخلاء سبيل المتهم دون ضمان، استناداً إلى مبررات الدفاع لإثبات انتفاء الدلائل الكافية لإسناد الاتهام للمتهم، تأسيساً على عدم جدية التحريات، واعتبرت المحكمة أن التحريات تمثل رأياً شخصياً لمن أجراها وتحتمل الصحة والبطلان.

وأوضح السادات فى مذكرة طلب الإخلاء أن التحريات أكدت أن الجريمة تمت بقصد السرقة، فيما أثبتت معاينة النيابة لموقع الجريمة عدم وجود مسروقات.

وقال المستشار محمد أبو السعود، المحامى العام لنيابات شمال المنيا، إنه تجرى حاليا دراسة قرار المحكمة لتحديد ما إذا كان سيتم الطعن عليه أم لا. وتحفظت أجهزة الأمن على المتهم لحين الفصل فى القرار أو اتخاذ الإجراءات الأمنية لتأمين المتهم فى حالة تنفيذ القرار.

كانت أجهزة الأمن بالمنيا أعلنت يوم الأحد ٣ يناير الماضى القبض على المتهم بعد مرور ١٥ يوما على اكتشاف جريمة مقتل راضية عبدالمجيد أحمد، ربة منزل «٢٦ سنة»، وأبنائها الثلاثة «محمد ٩ سنوات، على ٧ سنوات، طه ٤ سنوات»، وقررت النيابة حبس المتهم ٤ أيام على ذمة التحقيق، وجدد قاضى المعارضات حبسه ١٥ يوما أخرى.

كان مركز بنى مزار قد شهد مذبحة فى عام ٢٠٠٥ راح ضحيتها ١٠ أشخاص، وتولى السادات الدفاع عن المتهم فى القضية، ويدعى محمد على عبداللطيف، وانتهت القضية إلى براءة المتهم، غير أنه ظل رهن الاحتجاز فترة طويلة، فيما عانت أسرته عزلة شديدة بسبب الحصار الأمنى الذى فرض عليهم.

[president]

أستاذ سى السيد .

مش انا قولت لحضرتك قبل كده ان نفوذ الشخص وثرائه بتفرق كتير فى الحكم عليه فى الرأى العام .

سألت حضرتك قبل كده لو القضاء برأ هشام يبقى القضاء فاسد ؟ قلتلى ايوه . عشان عليه دلائل كذا وكذا وو....

طيب اشمعنى فى الحاله دى شايف ان القضاء عادل ومش خطأ فى الأجراءات ولا حاجه ومافيش اى ثغرات وألاعيب من المحامين .

وشايف ان الشرطه كانت هى اللى ملفقه الموضوع ..برغم الأدله اللى انتشرت ساعتها تدينه ميه فى الميه ..

وعلى فكره المحامى اللى بيدافع عن الشخص المعدم ده مش قديس لو حاجه .. دا متهم بقضية رشوه وقضيه كبيره كمان .

انا حبيت بس اقول لحضرتك ان قضاءنا عادل سواء مع هشام أو غيره . احنا بس اللى عندنا ارتياب من اى شخص صاحب نفوذ او ثراء .

تحياتى

[se_ Elsyed]

طيب اشمعنى فى الحاله دى شايف ان القضاء عادل ومش خطأ فى الأجراءات ولا حاجه ومافيش اى ثغرات وألاعيب من المحامين .

الله ينور عليك

سؤال محترم

عارف ليه ... لسبب بسيط جداً ... وهو إنك لما تقرأ حيثيات حكم البراءة في قضية سفاح بني مزار الاولى تموت من الضحك

طبعاُ قدام المباحث والنيابة الولد أعترف وبصم بالعشرة واعاد تمثيل الجريمة

جه طلعت السادات بنفس الحيثيات دي لعب على نقطتين مازلت متذكرهم

1- قالوا إن الولد نسي الحذاء بتاعه في مكان الجريمة وأعترف طبعاً إنه يخصه ... جه السادات امام المحكمة وقال للنيابة هاتوا الحذاء ... وقال للولد البسه ... إنه يدخل في رجل الولد .. أبداً .. وحاجه كانت مضحكه

2- بعد أن توصلوا للجاني بعدة أيام اعاد تمثيل الجريمة وأعترف أمام المباحث إنه قطع أعضاء الضحايا بطريقة تشريحية فشر أجدعها جراح وقام بأخفاءها فوق سطح أحد المنازل ... وفي محضر الشرطة قالوا أنهم فعلاً عثروا على تلك الاعضاء في حاله سليمة ... تخيل السذاجة ؟

يعني نصاب وأهبل ... لبسها للواد ... وأعترف ... وقالوا أن فين وفين بعدها بمده لقوا الأعضاء اللهم صلي عالنبي زي ما هي وكإن السطح ده كان ديب فريزر متغرق فورمالين

وفي الأخر طلع ولد مضطرب نفسياً وولا له في الطور ولا الطحين وطلع براءه

يبقى فين الاعيب المحامين بقى إذا كان السحر أتقلب على الساحر وبراءته كانت من سذاجة الشرطة ؟...

فاكر برضوا قضية البنت الكومبارس اللي قتلت زوجها القطري وأتهبدت حكم قضت منه على ما أعتقد 5 سنين .... والبنت أعترفت وأتظبطت 100فل وأربعتاشر .. وفين وفين بعد المدة دي كلها قبضوا على عيلين اعبط من بعض نازلين الضغة بالحسين يبيعوا ساعة رجالي ألماظ ثمنها لا يقل عن 200 الف .. نازلين يبيعوها بأي جوز جنيهات .. اتعكشوا ... ومنين يالا أنتو وهو الساعه دي .. أعترفوا انهم قتلوا الراجل بغرض السرقة وسرقوا متعلقاته .. والبنت طبعاً من كتر التعذيب اعترفت عشان تخلص...

يعني للشرطة الاف السوابق اللي بتخلي العفريت يطلع من هدومه ومش محتاجه الاعيب محامين عشان تقول إن اللي قدامك ده بريء ...

[hebapharm]

[ الأخ الفاضل president

زي ماحضرتك قلت ثراء الشخص ونفوذه بيفرق كتيييير جدا وهناك امور قد لا يعلمها احد من تصفية حسابات وغيره بين الكبار ..ما علينا

والله لحضرتك اراء ميزه وفكر يرفض الأنسياق وراء ماهو شائع وقد يتفق عليه الكثير...ولكن ليه حضرتك تستبعد عدم نزاهة القضاء؟؟؟ في بلد اغلب مافيها فاسد وبها ما بها من سرقه ونهب ومحسوبيه ...ومن مكان عملي ارى الكثييير من النهب ..اكيد سمعنا عن فضائح العلاج على نفقة الدوله وارى بنفسي منها الكثير

لماذا تستبعد في هذا المناخ الفاسد اي نوع من عدم النزاهه والكيل بمليون مكيال ؟؟؟...يااخي اذا كان رب البيت بالدف عازف...........................!!!!!

[justme]

والله لو حكيت اللي اعرفه وشفته بعيني ضحية لابن طلعت السادات لتعيطوا وتكرهوا تسمعوا الراجل ده

بس مش هقول غير

حسبي الله ونعم الوكيل

حسبي الله ونعم الوكيل

[president]

عارف ليه ... لسبب بسيط جداً ... وهو إنك لما تقرأ حيثيات حكم البراءة في قضية سفاح بني مزار الاولى تموت من الضحك

تمام كده وانا متفق معاك تماما . ادله دامغه من الشرطه لأدانة المتهم أثبت القضاء فيما بعد انها غلط وملفقه .

مش برده وارد جدا تبقى حيثيات الحكم فى قضية طلعت مصطفى برده تموت من الضحك والأدله دى كلها تبقى فشنك .

ولكن ليه حضرتك تستبعد عدم نزاهة القضاء؟؟؟

في بلد اغلب مافيها فاسد وبها ما بها من سرقه ونهب ومحسوبيه ...ومن مكان عملي ارى الكثييير من النهب ..اكيد سمعنا عن فضائح العلاج على نفقة الدوله وارى بنفسي منها الكثير

لماذا تستبعد في هذا المناخ الفاسد اي نوع من عدم النزاهه والكيل بمليون مكيال ؟؟؟...يااخي اذا كان رب البيت بالدف عازف...........................!!!!!

شوفتى حضرتك قلتى ايه ...قلتى ان القضاء فاسد عشان أغلب البلد مافيها فاسد ... مش عشان انك متأكده ان القضاء فى حد ذاته فاسد ...

وهو ده اللى انا بتكلم فيه ...اننا بنصدر أحكامنا بناء على استنتاجات ومشاعر مش على أدله وحقائق ....

احنا شعب جالنا أحباط من كتر الفساد فأصبحت جميع الأمور فاسده الا ان يثبت العكس . انا لو استسلمت للنظريه دى هكره نفسى وهكره البلد وهيكون دايما عندى

مبرر جاهز فى حالة فشلى وهو الفساد .

انا عشان أعيش حياه طبيعيه بنفسيه مستريحه بقيت أتعامل مع الأمور بنفس مبدأ القضاء "المتهم برئ حتى تثبت ادانته " .

بقيت لما أكون رايح مشوار لمصلحه حكوميه حاطط فى يقينى أن الأمور هتمشى وهاخلص ورقى النهارده . الأحساس ده بيخلينى أكتر فاعليه وايجايبه

انى أخلص أمورى وممكن الموضوع يمشى وممكن لأ بس على الأقل فى احتمال للنجاح ..

انما لو انا حاطط فى دماغى موظفين الحكومه وبلاوى موظفين الحكومه ورشاوى موظفين الحكومه باختصار (الفساد) . هبقى رايح وبتكلك وهاترجم أى موقف واى ورقه تنطلب

حتى لو كانت فعلا ورقه مهمه .كل ده هيترجم فى عقلى الى فساد لأنه اصبح الحاله المسيطره علينا . وأروح أنام فى بتنا وانا بلعن البلد والفساد اللى فيها ...

ياريت أكون قدرت أوضح وجهة نظرى . وبعدين بلاش التشاؤم ده (تفاؤلوا بالخير تجدوه ) ان شاء الله بكره الأمور تتعدل للأحسن.

تحياتى