مجرد ارقام عابرة

[justme]

محدش مهتم باللي فات مش مهم الارقام كتير

ماشي ننقل على اللي بعده

100 الف

ده عدد الفدادين (جمع فدان) اللي اخدهم الوليد بن طلال في توشكى

100 الف فدان ضرب 4000 تقريبا يعني بالصلاة على الحبيب النبي

400 مليون متر مربع

طبعا هما اكتر بشوية من كده

يعني حوالي 400 كيلومتر مربع

يعني 1/20 من مساحة مصر تقريبا

عارفين اخدهم بكام

الفدان ب 50 جنيه

والمصيبة انه مكنش دافع تمنهم كاش

عارفين المتر بكام

تقريبا بقرش صاغ فقط لا غير

يعني الشاب مننا من مصروفه في الشهر يقدر يشتري فدانين

ولغاية دلوقت مزرعهومش

اه يعني كله ب 5 مليون جنيه

تخيلوا

بقى متوسط انتاج الفدان حوالي 2 طن قمح

نضربهم في 100 الف يعني 200 الف طن قمح على الأقل

ده غير المحاصيل التانية سنويا

طب لو ال 1000 شاب اللي عايزين يخلعوا على ايطاليا دول لم 80 مليون وشروهم ب 5 مليون والباقي صرفوعه عليهم هيبى ايه الوضع

مستني تعليقاتكم

تم تعديل 15 مارس 2010 بواسطة justme

[Morial]

يا اخ جست مي انت مُصر تجيبلي زبحة صدرية ليييييه ؟

1/20 من مساحة مصر وللا مصر كلها يعني هي كانت بلدنا

[MZohairy]

عندي رقم سريع كده محبتوش

100 الف جنيه تكلفة الحج لبعض المقتدرين

و بيعملها كل سنه او يعملها سنه و يفوت سنه

[الباشمهندس ياسر]

طب لو ال 1000 شاب اللي عايزين يخلعوا على ايطاليا دول لم 80 مليون وشروهم ب 5 مليون والباقي صرفوعه عليهم هيبى ايه الوضع

مستني تعليقاتكم

تصدق و تؤمن بالله

التكتلات مع توافر الحسابات المظبوطة و الرجالة اللي تشيل الشغل بتعمل عمايل مش طبيعية

و بتدي نتايج رهييييييييييييييييييييييييييييييييييبة

جرب كده تجمع خمس افراد و تبدا تتحرك بمليون جنيه بس و شوف النتائج هتبقي ازاي

طب قسما عظما الموقف اللي هقوه ده حصل و الله يشهد

من يومين بالظبط و قاعد مع اصحابي من ايام الجامعه ع القهوة

و قلتلهم .. يا رجاله فيه مزارع للبيع ف الفيوم و المحامي قاللي هندفع مقدم بسيط جدا و التقسيط برده قريب

ايه رايكم لو نخش فيها و نبقي عملنا حاجة تلمنا مع بعض و نبقي حتي نروح نعمل فيها استراحة بسيطة كده

و اللي عاوز يغير جو يبقي نازل ف ملكه و نجيب فلاحين يزرعوها و لينا حصة ف الانتاج

كلهم بلا استثناء قالوا ملناش ف الحوار يا عمنا

مفيش دقيقة وواحد منهم قال باللفظ .. انا قررت اني اشتري شقة للعربدة .. مين راكب ف الحوار

نصهم بعلو الصوت .. انااااااااااااااااا

قعدت اضحك و لكنه ضحك كالبكاء

[من بعيد]

الراجل كلامه منطقى جدا وهوبيقول لو الف اجتمعوا مع بعض ممكن يعملوا مشروع ناجح بالمبلغ

انا بقول لو عشره من العينه دى حطوا فلوسهم على بعض هيعملوا حاجه برضه مش وحشه

وبغض النظر لو مش عايزين يقعدوا فى مصر

وراح ايطاليا هيعوض ال 80 الف جنيه دول فى اد ايه وقت ؟

بصراحة انا مش مقتنع ان فيه حد بيدفع المبلغ ده علشان يروح يترمى فى البحر.. و يا عالم يوصل او ميوصلش.. ولا حتى 50 الف.. و حتى 30 الف.

لسبب بسيط جدا.. لان اللى معاه 80 الف.. و راح يقدم على تأشيرة انجلترا ولا تأشيرة ايطاليا.. هياخدها على طول.. و ده يعنى من تجارب شباب اعرفهم.

بالنسبة لموضوع انه يعوضهم ولا لا.. للاسف مش هيعوضهم.. الا بعد سنتين على الاقل, لان الوضع فى ايطاليا يرثى له بصراحة. فيه ناس معاها اقامة فى ايطاليا رجعت علشان تقعد فى مصر كام شهر, لغاية اما الامور تتحسن.. بدل ما هما عمالين يصرفوا من غير شغل.

اما عن موضوع ان شباب تجمع الفلوس مع بعض.. زى اى شىء فى مصر... نحن نفتقد الى حسن الادارة. لو 10 جمعوا مع بعض نص مليون جنيه, ده مبلغ كويس جدا علشان يبدأوا بيه مصنع او ورشة صغيرة... بس فين الادارة؟

انا زيك تقريبا يا اخىالفاضل منحيث اننى ماشى على المبدأ اللى بيقول ليس كل ما يقال يصدق وانا فعلا الاول مكنتش مصدق بس شفت بتفسى شباب مثل هؤلاء وفعلا دفعوا المبلغ ده او اقل بشئ بسيط

اللى بيحصل انه بيخسر البلغ كله وبيلاقى شغل بتراب الفلوس مش عشان يسدد لا عشان ياكل ويشر ب وينام فقط لا غير

وبلغه الارقام اعرف احد هؤلاء الشباب يعمل من الخامسه والنصف صباحا الى الثامنه مساءا ولسته ايام ونصف فى الاسبوع بمبلغ 200 ايورو وبطرح المصاريف الاساسيه اكل وشرب ونوم هيكونوا حوالى 500 (ايورو ) يكون المتبقى 300 ايورو وبحسبه بسيطه نلاقى انه ممكن يسدد مبلغ ال80000 جنيه مصرى (10000ايورو) فى سنتين ونصف ده فى حاله ما اذا امتنع عن شراء ملابس او لو اضطر لا قدر الله الى شراء علاج

[justme]

طب ليه بنفكر بسلبية

ليه مش بإيجابية

يعني ممكن نطرح فكرة يا باشمهندس واللي مستعد مش هيتكلف كتير

وكل ما العدد كبر كل ما كان المشروع اكبر واضمن

يعني المغتربين دول اا كل واحد حط 20 الف جنيه واتجمع 1000 شخص يعني 10 مليون

شوف هيجيبوا كام فدان وهيشغلوا كام شخص

بدل ما العمال الغلابة اللي مش لاقية شغل دي تعمل مظاهرات مش هاتاخد منها حق ولا باطل ليه متروحش هناك تشتغل

معلش يا جماعة غلطة حسابية هي 1/2300 مش على 20

[الباشمهندس ياسر]

طب ليه بنفكر بسلبية

ليه مش بإيجابية

يعني ممكن نطرح فكرة يا باشمهندس واللي مستعد مش هيتكلف كتير

وكل ما العدد كبر كل ما كان المشروع اكبر واضمن

يعني المغتربين دول اا كل واحد حط 20 الف جنيه واتجمع 1000 شخص يعني 10 مليون

شوف هيجيبوا كام فدان وهيشغلوا كام شخص

بدل ما العمال الغلابة اللي مش لاقية شغل دي تعمل مظاهرات مش هاتاخد منها حق ولا باطل ليه متروحش هناك تشتغل

يا سيدي اي خدمة

المزرعة 10 فدادين و تمنها تمانين باكو

بتدفعهم بالتقسيط .. و المقدم 20 باكو و الباقي دفعات

و المرافق متوفرة .. مايه من مورد نهري .. تقريبا ترعة كبيرة ... و الكهرباء موجوده

و اي حد عاوز ... انا ممكن اديله رقم المحامي

و ربنا يوفقكم للخير

[se_ Elsyed]

برنامج عصير الكتب اللي بييجي كل يوم أحد

رهيب رهيب رهيب

كان بيناقش كتاب لكاتب أقتصادي أسمه عبد الخالق فاروق - على ما أعتقد - يعرض فيها العديد من الأرقام بشكل سلس .. وبشكل يجعلك تبكي

- خدوا الكام حته دول

1- ميزانية البلد سنة 1950 بلغت 278 مليون جنيه ... فيها كل مليم مذكور بوضوح ومنها مخصصات العائلة المالكة من أول الملك فاروق لحد أصغر أمير ... الملك فاروق مخصصه السنوي كان 100 الف جنيه فقط لا غير ... تم تخفيضة إلى 80 بعد حرب 48 والراجل ما فتحش بؤه

2- ههههههههههههههههههههههههه دي ضحكه سخرية طووووووووووووووويلة ... بعد ما قامت الثورة المباركة ومن خلال أرقام حكومية بحته .... وتحت شعار الأمن القومي ( امنك يا ليفي ) أصبحت الميزانيات مبهمه .. وما يلوموش على الشركات اللي بتضرب ميزانيات عشان الضرايب ... ولم يعد أي شيء يُذكر - حتى الأن - عن ميزانية وزراة الدافع أو الداخلية أو حتى الإعلام .. تخيلوا ؟ وبالتالي مش عاوز تهريج وحد يقولي مصاريف الرئاسة والسلطات والبابا غنوج حتى بيقول عنها حاجه ؟

وده كله بقى يُستعاض عنه ببند إسمه " ميزانية اجمالية " او مخصصات إجمالية .... حاجه كده زي فيلم نجيب الريحاني " الشيء لزوم الشيء " ... المهم في 2009 بلغ الشيء لزوم الشيء في الميزانية تحت هذا البند رقم واحد فقط يبلغ 16 مليار جنيه .. ومافيش قرطاس من قراطيس مجلس الشعب وأتحدى أجعص جعيص فيهم يقول أنا مش قرطاس .. أتحدى حد فيهم يفتح بؤه ويقول مين الرقم ده ؟

بصراحه اللهم إلا شخص من اخر الشرفاء أسمه جودت الملط رئيس الجهاز المركزي للمحاسبات .. ساعات بيتكلم على أستحياء ويخبط في الحلل .. ومن سنتين قال لهم : في 20 مليار جنيه من عائدات الخصخصة مش لاقيينهم ؟

آه وكتاب الله ...

أصل ساعات ماما كانت بتعمل كده

يعني تكون حطيت 10 ج في التسريحه وتروح تدور عليها في الدولاب وتقلب الدنيا وفي الأخر تلاقيها في درج التسريحه

تفتكروا الـ 20 مليار حد يكون حطهم في الجزامه وبيدور عليهم في التلاجه ؟

3- ميزانية الازهر .. بلغت مؤخراً أضعاف ميزانية البحث العلمي ... مش عشان لا سمح الله مبارك رجل ولي من أولياء الله ومهتم بامور الدين ... لأ .. بيقول لك ده عشان يواجهوا دعوات التطرف ... هههههههههههههههه

كفاية عصير كده وصباحكم كوكتيل مشبر

[اغابي]

نرجع لمشكلة الشباب اللى بتهرب على ايطاليا بطريق غير مشروع

وكل التفاصيل فى حلقة برنامج 90 دقيقة اللى يقدرها يحملها من النت الاولاد دول بيدفع الواحد 80 الف جنية علشان يروح ايطاليا

المبلغ داه يبجيبوه منين ؟؟؟؟؟

يعنى ابو الشاب اللى مات فى ايطاليا بيقول فى البرنامج - مدينا ايدينا لكل الناس واستلفنا على تحويشة العمر دفعناها للولد علشان يروح ايطاليا

وبدأ يشتغل ونسدد الديون دي وجهز اخته علشان حتتجوز كل داه من طفل عمره 16 سنة .

[se_ Elsyed]

نرجع لمشكلة الشباب اللى بتهرب على ايطاليا بطريق غير مشروع

وكل التفاصيل فى حلقة برنامج 90 دقيقة اللى يقدرها يحملها من النت الاولاد دول بيدفع الواحد 80 الف جنية علشان يروح ايطاليا

المبلغ داه يبجيبوه منين ؟؟؟؟؟

يعنى ابو الشاب اللى مات فى ايطاليا بيقول فى البرنامج - مدينا ايدينا لكل الناس واستلفنا على تحويشة العمر دفعناها للولد علشان يروح ايطاليا

وبدأ يشتغل ونسدد الديون دي وجهز اخته علشان حتتجوز كل داه من طفل عمره 16 سنة .

للاٍسف يا أغابي

شوفي ..

من ناحية إقتصادية بحته .... سواء أستلفت الفلوس ... أو دبرتها بمعرفتي .. أو بعت ممتلكات ... او أو أو أو .. هذا لا يُقلل من قيمة المبلغ

بمعنى إيه ؟

يعني مش عشان أنا سالف 800 الف يبقى استهون بهم وأقول ده من إيد الناس

من إيدهم أو رجلهم اديك أدبست فيهم وخلاص

حتى لو كنت أخرجتهم من جيبك ... فمعروف أن راس المال في حاله إخراجه لمشروع أو هدف معين .. بيبقى التزام على المشروع نفسه لابد أن يؤديه

هاشرح ببساطه .. أنا معايا 10 االف جنيه .. ووضعتهم في مشروع .. يبقى المشروع عليه ليه 10 الاف لازم يرجعهم لي .. ده غير الأرباح طبعاً .. بس نقول الأرباح والخساير في علم الله ...لكن يظل راس المالي هو إلتزام

بشكل أخر ..

الـ 80 الف دول زي ما عرفت تستلفهم عشان تموت وتترمي في البحر .. فكنت أستلفهم برضوا عشان تعمل بهم مشروع بتفهم فيه في بلدك

أما بيرجعهم إزاي .. فأقول لحضرتك ..

طبعاً بيبقوا طالعين لا عارفين لغة ولا لديهم حتى أي حرفة أو مهنة .. وبالتالي بيشتغل أي حاجه إن شالله لو أعمال غير أخلاقية أو شريفه ..

حتى لو أشتغل عمل شريف فبيبقى بنظام الـ balck market .. يعني هانقول عامل مزرعة مثلاً .. فهناك لو أفترضنا إن العامل اللي معاه أوراق رسمية وإقامته هناك شرعية بياخد 5 يورو في الساعه ... فصاحبنا ممكن يقبل 1 او 2 يورو لأنه مخالف

وهناك للأسف مصريين شغالين في إيطاليا بالذات في المجال ده وعامل زي مقاول أنفار بيورد للأماكن دي عمالة بلاك ماركت ... ويحاسب صاحب المكان على 3 يورو مثلاً .. ويدفع هو للعامل 2 ...

وبالتالي بيوفروا إزاي ؟

بيوفروا عن طريق عيشه أقرب للحيوانات للأسف

تلاقي 20 واحد في غرفة واحده

أكل بأقل القليل إن ما كانش من الزبالة

إلى اخر ذلك بقى من المعيشة وأهم شيء هو توفير الفلوس بأي طريقة

[justme]

هيه جت على اد كده يا عم سي السيد

طيب خد عندك يا سيدي مدام رجعنا لايطاليا تاني

تعرف ان فيه شباب هناك بياخدهم المافيا يتسجنوا ويلبسوا قضايا بمزاجهم مقابل مبلغ من المال

وتلاقي الشب من دول يتسكعلوه 5 سنين ويعترف على نفسه وياخدله مبلغ محترم ولا شغل ولا بطيخ

ده غير مواضيع غسيل الأموال

يعني بالله عليكم فكروا فيها هم لا معاهم لغة ولا بطيخ وبياخدوا فلوس متدنية منين الواحد بيبنيله عمارة في ظرف سنتين تلاته تكلف ملايين

[اغابي]

بس يا جماعة خلينا واقعيين شوية

انا لو انا شاب ومعايا 80 الف ومخيرنى بين مشروع فى مصر ولا سفر بره -

بيني وبينك من غير ما حد يسمعنا وبصوت واطي هوششششششش

حاسافر طبعا

لان النسبة المحتملة الاكبر ان فى السفر بره ان الفلوس بتجيب فلوس - لكن فى مصر الفلوس اما بتجيب فلوس اذا اذا اذ نجح المشروع ( بدون تكسير مجاديف من الحكومة لمحاولة افشال اى مشروع ناجح ) واما بتجيب خسارة والاحتمال التاني اكبر - لان برضوه جابو فى برنامج 90 دقيقة من حوالى 3 شهور - الناس عملت مظاهرات لان مجلس المدينة بتاع المنطقة انا مش فاكرة اى محافظة بصراحة المهم قفلولهم حوالى 65 محل بحجج تضحك طبعا وقال معتز هى الحكومة عاوزة من الناس ايه ؟؟ وواحد من الناس قدام الكاميرا قال ان محله كلف 250 الف ج وهو شقا عمره - ازاى عاوزين يقفلوهولى بسهولة كده والناس قاعدين على الارصفة جنب محلاتهم واسر بسيطة جدا لا عندهم وظيفة ولا حاجة وكلهم متخرجين من سنين .

وكمان السفر فيه فوايد تانية كتير اوى غير الفلوس

[justme]

يا فندم الكلام بتاع بره ده مناسب لمن هو مؤهل مش يروح يتمرمط وآسف على اللفظ ده

الشباب دي بتروح لا لغة ولا مؤهلات ولا خبرة بس لأن غيرهم نجح

فيه فرق بين واحد فاهم وواحد مش فاهم

اللي مش فاهم لازم يروح يتعلم

بس انا مع حضرتك برضه لأن مجتمعنا مفيهوش مناخ آمن

بس لو دول مجموعة كبيرة وأخدوا قطعة أرض مع بعض ممكن يعموا حاجات وده ابسط استثمار

[sarmar]

ياريت ياجماعة يكون فى مصر يجذب المصريين اولاد البلد ومستقبلها ويجعلهم يستثمروا فلوسهم وعمرهم فى مصر لكن للاسف لاتوجد دولة فى العالم طاردة وكارهة لاولادها مثل مصر

يعنى هل الزحام وتكاثر وزيادة السكان هم السبب وراء ذلك ؟؟؟ طبعا لا لان اعتقد ان معدل الزيادة لايختلف عن معدل الزيادة فى دول نامية مثلنا بل ربما نحن اقل والدول الاخرى لاتطرد اهلها

هل من ادارتنا لامورنا الحياتية اعتقد نعم فنحن خايبين بدرجة ممتاز مع مرتبة الشرف فى ادارة ابسط الجهات الادارية التى نعيشها وهل هذة الخيبة التقيلة التى جعلتنا فى اخر الصفوف من التخلف هل هذة الخيبة اسبابها سياسية ام اقتصادية ام دينية ام اجتماعية

بكل وضوح سوف نقول ان الخيبة لم تترك مجال من المجالات هذة الا وفشلت فشلا مركبا تحتاج الى تدمير كل ماسبق لان كل الاسباب التى ادت للفشل نحن نعيش فيها وكانها امور صحيحة وعادية جدا وستجد من يقاتلك اذا حاولت ان تصحح لة الوضع لانة فى غير مصلحتة الشخصية وعلى المتضرر اللجوء للهجرة خارج مصر

[اغابي]

انا كمان حاديكم مثال خد بالك يا سي السيد - خذ بالك

بابا كان موظف حكومي بس فى مركز مهم وكل يومه فى الوظيفة بجد

ماما جاتلها فكرة كدا طقت فى دماغها فى ليلة راحت عاملة مشروع هو تكلفته بسيطة جدا - وانا كنت حاكتب عن تفاصيل المشروع فى توبيك - افكار لمشروعات جديدة - يمكن حد يستفيد من الفكرة بالتفصيل وحاساعد اى حد عاوز اسرار نجاح المشروع داه لان عندي خبرة فيه .

المهم ماما بدأت المشروع بتكلفة بسيطة وكانت هى المحاسب والمدير والموظف والعامل لوحدها اجتهدت فيه - وبابا نفض ايديه وقالها دا مشروعك واتحمليه وحدك انا راجل مش فاضي - وشوية شوية - نجح لدرجة ان كان شغال عندها 7 أشخاص وفاتح بيوتهم - المهم خلال نجاح استمر أكثر من 10 سنين نجاح ساحق - ساحق 0 مكسبه كبير والادارة بتاعه ماما ممتازة - وكان الاعتماد على فلوس المشروع مش مرتب بابا اللى ما كنش حتى يطل يشوف شكل المشروع لان ماكانش عنده وقت - المهم بدأت رزالة مجلس المدينة - ( حبة موسيقي تصويرية - رعب يا اخونة )

اولا : التهديد وكل شوية يجي موظف يقول فى اختلافات فى المواصفات و و و القصص دي وبدأ التهديد يوصل اما فعلا نديهم رشاوى واما يتقفل المشروع - اول حاجة ماما جريئة جدا جدا - مامتى مجرمة - راحت لرئيس مجلس المدينة واتكلمت بطريقة حادة جدا معاه وصوتها لع لع وانا رحت معاها فى اليوم داه وكنت فى الجامعة - اتاري هو كمان رئيس مجلس المدينة بياخد رشاوى - بعد ما هددته انها حتروح للمحافظ واقفلو المشرو انا مش عاوزاه الناس نصحوها خلاص ارمى 2000 ج لكل مهندس علشان تقفلى بقهم - راحت ماما جابت لمهندس منهم شبكة ذهب لبنته علشان حتتجوز وهو اللى طلب كده كانت بحوالى 4000 ج زمان لما كان الدهب رخيص

وخد عندك ماسورة مهندسين رشاوى انفجرت - كل شهر يجي واحد عاوز رشوه وهما وكر عصابة بس يصيدو تى مشروع ناجح - دا كتير منتشر الموضوع داه - المهم اللى ندفعله الفين واللى 4 الاف واولاد اللذين يحكو لبعض وفى الاخر ماما وهى اصلا كبرت فى السن وبعدين صدقونى ماما مابقتش قادرة على عصابة مجلس المدينة الشرفاء - ما لهمش كبير تشتكيله عن الرشاوى كلهم مرتشين كلهم من اصغر موظف فيها لرئيس مجلس المدينة نفسه - ومشروعنا كان ناجح جدا ومشغلين عندنا 7 بيوتهم مفتوحة من المشروع - واضطرينا نقفل المشروع ونبيع المصنع ونحط فلوسه فى ارض فى الغردقة وخلصت الحدوتة - توتة توتة

انا وجوزى كنا بنحكى لماما ان كان نفسنا بجد نفتح المشروع تاني ونشترى احنا المصنع من ماما بدل حد غريب لكن هى ما نصحتناش لان بلدنا مفهاش ذمة ولا ضمير .

يبقي السفر والهجرة افضل بكتير

[justme]

طب انا عندي فكيرة صغننة

معلش اصلها طالبة جنان بجد

اللي يدي رشوة بعد كده يسجلها فيديو والكاميرات الصغيرة صوت وصورة

وننزلها على اليوتيوب

ونجرسهم واهي تبقى دليل ادانه

واللي عايز الكاميرات الصغيرة على قفا من يشيل

اهو الواحد يشفي غليله

حسبي الله ونعم الوكيل

تم تعديل 16 مارس 2010 بواسطة justme

[hOuSsAm]

ياريت ياجماعة يكون فى مصر يجذب المصريين اولاد البلد ومستقبلها ويجعلهم يستثمروا فلوسهم وعمرهم فى مصر لكن للاسف لاتوجد دولة فى العالم طاردة وكارهة لاولادها مثل مصر

يعنى هل الزحام وتكاثر وزيادة السكان هم السبب وراء ذلك ؟؟؟ طبعا لا لان اعتقد ان معدل الزيادة لايختلف عن معدل الزيادة فى دول نامية مثلنا بل ربما نحن اقل والدول الاخرى لاتطرد اهلها

هل من ادارتنا لامورنا الحياتية اعتقد نعم فنحن خايبين بدرجة ممتاز مع مرتبة الشرف فى ادارة ابسط الجهات الادارية التى نعيشها وهل هذة الخيبة التقيلة التى جعلتنا فى اخر الصفوف من التخلف هل هذة الخيبة اسبابها سياسية ام اقتصادية ام دينية ام اجتماعية

بكل وضوح سوف نقول ان الخيبة لم تترك مجال من المجالات هذة الا وفشلت فشلا مركبا تحتاج الى تدمير كل ماسبق لان كل الاسباب التى ادت للفشل نحن نعيش فيها وكانها امور صحيحة وعادية جدا وستجد من يقاتلك اذا حاولت ان تصحح لة الوضع لانة فى غير مصلحتة الشخصية وعلى المتضرر اللجوء للهجرة خارج مصر

حمد لله عالسلامة يا استاذ مجدى مبسوطين لرجوعك يا فندم

واضافة لكلامك ناس كتيرة فى مصر بتحب تجيب احباط للشباب بيبقول مش عايزين يشوفوا حد ناجح

غير ان الشباب اللى طالع كله عايزين يشتغلوا مديرين وعلى مكاتب

كتير مش عايز يشقى ويتعب بجد ويطلع السلم من اوله

فى مرة من حوالى 4 سنوات راكب مواصلة بين مدينتى والمنصورة كان اللى جنبى معاه موبيل غريب اوى كان ساعتها ملفت للنظر لانه مكنش موجود فى السوق ولا الفئة بتاعته اساسا المهم كان بيبص باستغراب عالشوارع وبصلى وقالى البلد اتغيرت اوى قولتله انت كنت فين قالى بقالى 9 سنوات فى اليونان واول مرة انزل مصر واتصدمت كتير اوى

بس قالى انه عنده مطعم هناك ومشغل فيه مصريين وكان نازل يتجوز البنت اللى بيحبها من قبل ميسافر (مش عارف استنته 9 سنين ازاى دى)

وانا فى الكلية كان كل زمايلى بجد مش بيفكروا غير انهم يسافروا وكلهم كانوا عارفين انهم هيدفعوا فلوس عشان يسافروا اقولهم يعنى هتسافروا وتتغربوا تشتغلوا عشان تدفعوا فلوس مش تاخدوا فلوس

بجد التربية غلط كتير ومش عارفين الطريق اوله ازاى

مش عارفين قيمتهم كمصريين

مش عارفين ان المفروض الدول دى تيجى وتدفعلنا كتير عشان نسافر مش احنا اللى ندفع

اللى بيحصل ان الشاب بيدفع 80 الف عشان اطاليا ويفضل يشقى بيهم سنين عشان يسدهم

وبيدفع 20 او 30 الف فى الخليج ويجى يفضل شهور يدور على شغل

وطبعا بيستغلوه ويدوله اقل المرتبات (اصله بدون عمل)

ربنا يهدى وحسبنا الله ونعم الوكيل فى اللى كان السبب

[hOuSsAm]

طب انا عندي فكيرة صغننة

معلش اصلها طالبة جنان بجد

اللي يدي رشوة بعد كده يسجلها فيديو والكاميرات الصغيرة صوت وصورة

وننزلها على اليوتيوب

ونجرسهم واهي تبقى دليل ادانه

واللي عايز الكاميرات الصغيرة على قفا من يشيل

اهو الواحد يشفي غليله

حسبي الله ونعم الوكيل

تصور مين بس

كدة هتصور الشعب كله

لاننا كلنا مشتركون فى الفساد

ايوة كلنا

محنا اللى عودناهم على انك عشان تخلص كل مصلحة يبقى لازم تطلع فلوس

ده الطبيعى فى كل مكان تطلع اكرامية للموظف اللى بيادى عمله

عايزتركب تليفون جديد طيب ادفع

عايز تصلح ماسورة المية متبحبح ايدك

جاى من السفر تاخدهم من باب الطيارة لحد باب المطار بقشيش (على ايه بس مش عارف)

حجات كتيرة اوى

واحد صحبى بيشتغل فى شركةوكان ببيخلص شحنة فى ميناء دمياط والمهندس اللى هيوقعله عالورق بصله كدة وقاله امال قين الاكرامية بتاعتى زميلى قاله يا استاذى الفاضل الظرف بتاعك مجهزه لك يا فندم زى كل مرة (ظرف كان فيه 150 جنيه)

كنت رايح بنك من البنوك عشان ناجر منه مخازن للشركة اللى كنت بشتغل فيها فى مصر وكان معايا مدير المشتريات وعرفنى هناك على صديق ليه هو اللى كان هيخلصلنا الورق وبعد مسبناه قالى تتخيل يكون خريج ايه قولتله اكيد محاسبة او اقتصاد

قالى خريج تربية رياضية (المفروض انه هيتعامل فى ارقام وحسابات ودراسات جدوى)

اخو واحد زميلى معاه ليسانس اداب انجلش وبيشتغل مامور ضرايب

مراته معاها تربية نوعية وبتشتغل مامورة ضرايب

هتصور مين ولا مين بس

[justme]

يا عم تخيل معايا التالي

كل واحد صور واحد واخترنا عنوان واحد الفساد في مصر

وحطيناها على النت كنوع من الفضيحة

شوف انت بقى

مش احسن من السلبية اللي احنا فيها

وعلى فكرة احنا السبب لأن لما بنقدر نحاسبهم أل بيصعبوا علينا ونقول خليهم يسترزقوا

والناس بقت بتطلب بقلب جامد دلوقت

انا اللي مستغربله حاجة واحدة

ليه الدولة مترفعش الرسوم ماحنا دافعين دافعين وتدي مرتبات احسن من كده

ليه ميبقاش فيه نظام مركزي مشرف على التعيينات بتاعت الناس دي

بس هقول ايه

حسبي الله ونعم الوكيل

الشكوى لفير الله مذلة

[se_ Elsyed]

معلش يا جماعة طقت في نافوخي كده كام فكرة عن موضوع ارقام نقرأها

ماذا يمكن ان تعني لو نظرنا بطريقة مختلفة

هبدأ بالرقم ده اللي سمعته من ناس كتير

80 الف جنيه

الناس بتدفع 80 الف (ده اخر رقم سمعته من سنه) علشان تروح ايطاليا تخيلوا الرقم ده طب اللي بيدبروا مبلغ زي كده لو اتفق 1000 منهم هيكون معاهم 80 مليون جنيه ولو الف منهم دول مهن مختلفة وعملوا جمعية وبدأوا مشروع في مصر ممكن يعملوا ايه

صباح الدماغ اللي ما تفرقش عن الجزمه حاجه .. غير إن الجزمة ساعات بتبقى برباط .. إنما اتلدماغ على طول بتبقى " بانص "

انقطاع الاتصال بهم في عرض البحر اختفاء 75 شاباً من الغربية

في رحلة هجرة غير شرعية لليونان

دمياط - نادر عمارة:

يبذل رجال مباحث ميناءي دمياط وبورسعيد والأمن العام بمديرية أمن دمياط جهودا واسعة لكشف غموض انقطاع الاتصال واختفاء 75 شابا من ابناء محافظة الغربية كانوا في طريقهم لليونان في رحلة هجرة غير شرعية.

كان علي زكريا والد احد الشباب قد ابلغ رجال الأمن عن تلقيه استغاثة من نجله علي المركب في عرض البحر ما بين محافظتي دمياط وبورسعيد ونفاد المواد الغذائية وعدم وجود أي مأكولات وان قبطان المركب يهددهم بسبب اثارتهم المشاكل واحداث ضوضاء وازعاج.. ثم انقطع الاتصال بين الابن ووالده وان المركب سوري الجنسية ولونه يجمع بين الازرق والبرتقالي.

اسفرت التحريات عن ان احد سماسرة الهجرة غير الشرعية من قرية شبرا ميلس بالغربية قد حصل علي 30 ألف جنيه من كل شاب مقابل تسفيره في هجرة غير شرعية لليونان.

امر اللواء مصطفي محمد مصطفي مساعد وزير الداخلية مدير أمن دمياط بتشكيل جهاز بحث برئاسة العميدين عفيفي النجار مدير المباحث واحمد فتحي رئيس مباحث المديرية وبالاشتراك مع مديرية أمن بورسعيد لكشف غموض الموقف.

75 شاب زي الورد

إتنين مليون جنيه وربع مدافوعه زي سلامو عليكم

لأ ورايحين اليونان اللي بيكحتوا في الأسفلت دلوقت وأوربا بتلم لهم معونات وخلاص بيشحتوا

إن لله وإنا إليه راجعون ..

واللي هايقول لي : إيه رماك على المر .... هاعوره بجد