قتل الطفولة

[مصر عشقى]

مش عارف اية حكاية المرضى معايا

والله دى حقيقة مش مبالغة ولا فيها اى كدب

كنت ماشى فى الشارع ولقيت طفل بيبكى وشكلة نضيف انا فى الاول قلت الولد تاية عن بيتة ولا حد ضربة وسالتة بتعيط لية يا ابنى ؟ وصعقت من رد الطفل

ماما عيانة ومش معايا تمن الدواء - ساعتها مش عارف اية حصل الدنيا اسودت فى وشى وبعدين قلت لنفسى مش جايز الولد دة محترف تسول وسالتة عن اسم الدواء وتمنة

تعرفوا كام ؟ 18 جنية وطفل شال مسؤلية امة لانة يتيم واخدت الطفل للصيدلى علشان اشترى الدواء لانى كنت مش متاكد ان امة فعلا مريضة ولكن وااااااااة من لكن دى طلع الكتور عارفة وان الطفل امة فعلا مريضة وان الطفل اتكسف يروح للصيدلى يطلب منة الدواء لانة اعطالة الدواء اكتر من مرة مجانا

والصيدلى ربنا يكرمة اعطى للطفل علبتين مجانا وعرفت ان المستشفى بتكتب العلاح علشان المريض يشترية من برة لان صيدلية المستشفى مفبش فيها ادوية

طبعا مش هعلق ولا اشتم فى الوزير الفلانى ولا المسؤل العلانى ولكن مفيش غير حسبى الله ونعم الوكيل :P :blink: :blink:

تم تعديل 16 مارس 2004 بواسطة مصر عشقى

[White heart]

طبعا مش هعلق ولا اشتم فى الوزير الفلانى ولا المسؤل العلانى ولكن مفيش غير حسبى الله ونعم الوكيل

صدقت يا عزيزى....

و انا أيضا مثلك لن أعلق (قبل) أن أعرف الظروف المحيطه بهذا الطفل!

و على الأخص اذا كان طفلا وحيدا أم له من الأخوات خمسه أو أكثر، هل كان يعمل والدة أم لا؟ هل طلق زوجته قبل مماته، أو تزوج من أخرى و أنجب أطفال أخرين أم لا؟ هل الوالدة كانت تعمل فى حياتها أم لا؟ .... الخ .. الخ

افضل هذا (أولا) عن القاء التهم بطريقه "روبوتيكيه" على الغير، أو أى من المسئولين، يجب أولا محاسبه الوالدين! .... معذرة قد يظن البعض بانه لا قلب لى، و لكنى فقط أسعى جاهدا أن أكون "محايد"، من قبل أن أكون عاطفى، حتى لا اظلم أحدا....

و عموما أن أدعوا الله أن يكثر من أمثال هذا الصيدلى و أمثالك، و لكنى على يقين بأن هذا ليس هو الحل......

تم تعديل 17 مارس 2004 بواسطة White heart

[se_ Elsyed]

هناك نوع من الفقراء ينطبق عليهم قول الله تعالى " تحسبهم أغنياء من التعفف "

فتجد أن لديهم حياء في أن يمدوا أيديهم للسؤال مع حاجتهم الشديدة لذلك ولا أظن بإن هناك أكثر من حاجة الإنسان إلى الدواء ..

ومن الممكن أيضاً بألا يكونوا على دراية عن الطريق الصحيح الذي ينبغي ان يسلكوه سواء للتأمين الطبي او للتوجه إلى أي مستشفى حكومي تصرف الدواء بالمجان لمرضاها او بالتقدم بطلب لوزارة الصحة للعلاج على نفقة الدولة ..

ولكن أنا هنا ألوم جيرانهم أو أي شخص محيط بهم ويعلم ظروفهم وتكون لديه القدره على مساعدتهم وليست بالضرورة مساعدة مادية ولكن من الممكن أن يوضح هو لهم ماذا ينبغي ان يفعلوا ...

آه أيها الدنيا كم بكِ من مآساويات ...

فين الناس بتوع الإكتئاب ييجوا يشوفوا

[night prayer]

لاحول و لا قوة الا بالله العلي العظيم..

فين الدولة؟؟!!

فين وزارة الصحة؟؟

و لا احنا بس بنعالج الفنانين برة.. و أهل البلد الغلابة.. مش لاقيين 18 جنيه للدوا!!

[out el koloub]

الطفل ده مش أول حالة ولا آخر حالة . فى ناس كل يوم بتموت لأن معندهاش فلوس للدوا ومعندهاش واسطة علشان تدخل مستشفى من مستشفيات التأمين الصحى من غير ميدوهم ميعاد بعد سنة ولا ستة شهور على الأقل ولحد ما يجى الميعاد يكون المريض مات وانتهى ومحدش عارف لحد امتى هيفضل الانسان رخيص وملوش تمن فى البلد دى ؟؟؟؟؟؟؟؟؟؟؟؟؟؟؟؟؟؟؟؟؟؟؟

تم تعديل 17 مارس 2004 بواسطة out el koloub