إلى آباء و أمهات الغد: ح تعملوا إيه مع أولادكم؟

[Sherief AbdelWahab]

اليوم هو عيد الأم..كل سنة و كل أمهاتنا بألف خير..و إن كنت أؤيد تسميته بعيد الأسرة ..لأن علينا أن تكون كل أيامنا عيدا للأم..

و الكلام موجه لأمهات و آباء المستقبل ..كيف ستكون طريقة تعاملكم مع أبنائكن؟..هل ستختلف عن الطريقة التي نشأتم عليها أم ستختلف؟..هل ستتأثر بتجاربكم سلبا أو إيجابا؟

خلص الكلام

[فــيــروز]

والله يا شريف الموضوع ده فى بالى من زمان

وكنت ناويه اسال الاخوه الآباء و الامهات الموجودين فى المنتدى يا ترى اما ربنا انعم عليكم بنعمة الابناء فكرتم كيف ستقوموا بتربيتهم التربيه الصحيحه؟ ما هى الكتب التى قراتوها؟ سواء فى الدين او التربيه او الاجتماع او غيرها من العلوم التى قد تكون ذات صله !! سؤال صعيب جوى جوى يابوى :blink:

مش هاخبى عليك يا شريف انى انا شخصيا قلقه جدا من الموضوع ده .. لانى وان كنت وانا صغيره طفله مثاليه :lol: لن انكر ان جه عليا اوقات كانت امى بتبقى عاوزه تولع فيا من الافكار التحرريه اللى كانت بتطق فى دماغى .. رغم والله انها كانت افكار كويسه زى الشغل فى الاجازه مثلا .. وتضطر لاستعمال كل انواع التهديدات المختلفه اللى كنت بابقى عارفه انها فشنك يعنى بس بردو كنت باخاف احسن تنفذ تهديداتها :unsure: وهذه الخبره السودا مخليانى مقلقه جدا انى انجب بنت وتطلع زيى :P وعلى راى سلطان السكرى "بتاع سلم لى على جوزك يا اسماعيل بيه" .. اللى هنعمله فى الناس هيطلع علينا ولا اييييه :angry:

تم تعديل 21 مارس 2004 بواسطة فــيــروز

[abofasad]

اييييييييه .....

[عصام]

يا ترى اما ربنا انعم عليكم بنعمة الابناء فكرتم كيف ستقوموا بتربيتهم التربيه الصحيحه؟

فيروز إفترضت إننا فكرنا وتوصلنا للحل ونطبقه حاليا :lol: :P

حضرتك أنا باسأل نفسى السؤال ده يوميا من سبع سنين!! :unsure: :angry:

[se_ Elsyed]

انا لحد دلوقت مش عارف أتعامل مع عيالي الصغيرين عشان انا عصبي وبالوش على طول ..

بس بجد لما يكبروا شوية هاحتويهم وحاسس إن الأب لما يكون شقي وهو صغير - شقي دي الكلمة المؤدبة من المعنى الحقيقي التاني - يبقى عياله لما يكبروا يبقى من الصعب أنه يأكلوه البلوظه ... وهأحاول أقرب منهم على قدر الإمكان ..

علشان كده هاخد شقة أوضة وصالة نعيش فيها كلنا عشان نبقى قريبين من بعض .. :lol:

لأ بجد أحسن حاجة أن الأب والأم يعاملوا أولادهم بتوازن ووسطية .. يعني الأب يبقى صديق لأولاده لكن في نفس الوقت يحتفظ بسُلطة وهيبة الأب عندما يحاول إبنه إلحاق الضرر بنفسه من خلال قرارات صبيانية طائشة .. وكذلك طبعاً الأم ..

وبالتأكيد أي أب وأم بيتمنوا يحققوا في أولادهم ما حُرموا منه في صغرهم ... يعني من ناحية التعليم والإعتماد على النفس والتقرب منهم ... إلخ ..

واهم من هذا كله التنشئة الدينية السليمة مع تحبيبهم في هواية القراءة والإطلاع .. أحسن العيال اليومين دول قربوا ينسوا شكل الكتب من كثرة إعتمادهم على التليفزيون والبلاي ستيشن والنت.