عمرو الليثى يفوز بجائزة اليونسكو للتنمية البشرية

[لولا]

أعلنت لجنة التحكيم بجائزة منظمة الأمم المتحدة للتربية والعلوم والثقافة (اليونسكو) اليوم (الأربعاء) عن فوز المرشح المصري الإعلامي عمرو الليثي بجائزة المنظمة للتنمية البشرية في مجال الإعلام عن عام 2009 بالمناصفة مع آخر من دولة المكسيك. وسوف تقام احتفالية يوم 24 مارس الجاري بمقر المنظمة بباريس.

ويأتي هذا على خلفية صعود الليثي للتصفيات النهائية في المسابقة عن برنامجه "واحد من الناس" بعد أن فاز في الجولة الأولى بسبعة أصوات من إجمالي ثمانية، كما شملت القائمة القصيرة أيضاً 6 مرشحين من المكسيك والهند وفنزويلا والصين وأفغانستان.

"نقلا عن الشرق الأوسط "

لا اخفى سعادتى الهائلة بهذا الخبر لمذيع متميز جدا وبرنامج شديد الصدق والجراءة وهو " واحد من الناس " الذى يذاع على قناة دريم الفضائية ويناقش مشكلات وهموم المصريين الفقراء وساكني العشوائيات.

برنامج يلمس كبد الحقائق دون ان يخاف فى الله لومة لائم ، من الصعب ان لا تضبط نفسك كل حين وانت تبكى حال الآدمية المداسة فى اماكن كثيرة لبشر كل ذنبهم انهم فقراء سلبتهم الحكومة حق العيشة الكريمة وابسط متطلباتها من ماء او كهرباء او سقف حتى يظلل المنزل او مستوصف قريب او مدرسه لتعليم الأطفال او او او ..!!

برنامج يخاطب بعضا من حياء السيد المحافظ والحزب الوطنى ومجلس الشعب والشورى ومجلس الوزراء والحى ل من يجلس على كرسي يفترض ان واجبه الأول من خلاله ان يخدم الشعب .

وطبعا هذا بخلاف انه يستضيف شخصيات منها جيدين كثيرين او حتى عليها خلاف فبيناقشهم بطريقة جيده .

يذكر أن عمرو الليثي يعمل أستاذا بالمعهد العالي للسينما، ويعد ويقدم برنامج "اختراق" - الذي يذاع على التليفزيون المصري - ويناقش من خلاله ملفات وقضايا في التاريخ المصري الحديث.

الاعلامي عمرو الليثي قد وعد بالتبرع بقيمة الجائزة في حالة فوزه بها لمستشفى أبو الريش للأطفال بالقاهرة.

تحياتى

لولا

[أحمد سيف]

فعلا عمرو الليثي واحد من الإعلاميين القلائل المحترمين على القنوات المصرية ... يستاهل الجائزة بكل تأكيد ... ولا عزاء لأنصاف المذيعين من نوعية سيد على وهناء السمري.

[Sherief AbdelWahab]

أول مرة أعرف إن اليونيسيف زي الميوزيك أوورد.. smk:

اللي كان حيالله مساعد فاشل لـ"يحيى العلمي" في مسلسل رأفت الهجان بقى أستاذ في المعهد العالي للسينما؟

أنا مش شايف عن نفسي ذرة إبداع في برنامج ممسوخ من "حديث المدينة".. زي إن برنامجه "اختراق" منفر فكرياً وبصرياً..

وبالمناسبة أكثر صنف ما باطيقش أشوفه هو الحزبوطني اللي عامل معارض.. دة بقى يخليك تترحم على سمير رجب في عنفوانه وجبروته.. أقله كان واضح.. مش زي اللي قلبه مع السلطة وبيعمل معارض علشان خاطر اتنين تلاتة في الحزب..

خلص الكلام

[msayed]

فعلا عمرو الليثي واحد من الإعلاميين القلائل المحترمين على القنوات المصرية ... يستاهل الجائزة بكل تأكيد ... ولا عزاء لأنصاف المذيعين من نوعية سيد على وهناء السمري.

برنامجه فعلاً قيم وبيصب فى خدمة المجتمع

[doha]

أول مرة أعرف إن اليونيسيف زي الميوزيك أوورد..

اللي كان حيالله مساعد فاشل لـ"يحيى العلمي" في مسلسل رأفت الهجان بقى أستاذ في المعهد العالي للسينما؟

أنا مش شايف عن نفسي ذرة إبداع في برنامج ممسوخ من "حديث المدينة".. زي إن برنامجه "اختراق" منفر فكرياً وبصرياً..

وبالمناسبة أكثر صنف ما باطيقش أشوفه هو الحزبوطني اللي عامل معارض.. دة بقى يخليك تترحم على سمير رجب في عنفوانه وجبروته.. أقله كان واضح.. مش زي اللي قلبه مع السلطة وبيعمل معارض علشان خاطر اتنين تلاتة في الحزب..

خلص الكلام

يااه يااستاذ شريف .. ربنا يريح قلبك ..

عمرو الليثي عمري ماتفرجت عليه .. يمكن بشوفه ( تخاطيف ) كده وانا بقلب في القنوات .. يمكن شفت له حلقة او جزء من حلقة زمان من بتاع ست سبع سنين كده ولا حاجه واخذت عنه فكرة وقتها انه متغذي بيفتامين واو لما قرب يفرقع منه ..

وبصراحه انا اي حاجه آخرها ( ليثي) بتحسس منها من الآخر .. بتشكك في نزاهتها

لما قرات الخبر ده امبارح في المحاورات قلت معقوله كل السنين دي وانا مصنفاه غلط .. معقوله الراجل اعلامي ناجح وانا مش واخده بالي .. شكيت في نفسي والله .. كلامك رجع حط لي النقط على الحروف ..

شكرا جزيلا ..

تم تعديل 20 مارس 2010 بواسطة doha

[بركة]

ربنا لوحده اعلم بما في الصدور وليس لنا الا الظاهر

و طول ما بشوف خير بيتعمل قدامي بفرح برزق الغلابة حتى لو ربنا نفعهم بيه عن طريق مين

المهم في الموضوع و البرنامج النتيجة وليس النية أو هو قريب مين

للأسف التليفزيون أصبح سلاح المظلوم الوحيد دلوقتي في بلدنا العزيز

[حنين الوطن]

السلام عليكمورحمه الله وبركاته

القاضى والجلاد

الى ا.شريف والى ضحى

ليه الحكم على الناس من غير ما نعرفهم؟؟؟؟؟؟؟؟؟

انتى قولتى ان عمرك ما شفتى البرنامج!!اما تشوفيه ...وبعدين احكمى عليه!!!

ده برنامج رائع صدقينى...بيوريك الناس المهمشين...المواطنين اللى ما لهمش ابسط حقوق المواطنه الا وهى السكن بيكشف عن العشوائيات وسكانها ويسافر لقرى بعيده

انتم ما سمعتوش عنها لافيها مجارى ولامياه صالحه للشرب......الخ

وبيتكلم بجراءه ويوجه كلامه ل رئيس الوزراء ....للمحافظين وبيطالبهم بالاستقاله والرحيل لانهم مش شايفين شغلهم صح.

وفيه استجابات فوريه وكآن المسئولين المقصرين بيبقوا مستنيين البرنامج علشان يعرفوا"على رآى عادل امام""انا اسمى مكتوب؟؟؟"...........وفورا بيتم تصحيح الاوضاع

بالاضافه الى انه بيعين ناس تستحق فى شركات حكوميه وغير حكوميه وبييجى اسمائهم ع الهوا فيه ناس اتعينوا فى قطاع البترول مثلا وناس فى شركه السلاب وهكذا

بالاضافه الى انه بيوزع شهريا شقق على من يستحق فى 6 اكتوبر مقدمها مهندس مصرى صاحب كمبوند "معمار المرشدى.....

وبالنسبه ان اخره "ليثى" فربنا قال فى كتابه العزيز"ولا تزروا وازرة وزر آخرى"...ان الله غفور رحيم ليه ناخد حد بذنب آخر ؟؟؟وف الاخر ليه ننصب نفسنا قاضى وجلاد

ليه ...ليه دايما ما بنعرفشى نفرح لبعض ؟؟متوجسين خيفه من بعض؟؟

افرحواااااااااااا تفائلواااااااااا

تفائلوا بالخير تجدوه

[msayed]

لا أعرف عمرو الليثى كشخص وإنا أعلم أن والده له تاريخ غير مشرف

لكن يحسب لعمرو أنه برغم أنه مولود وفى بقه معلقة دهب إلا أن برنامجه يهتم بالناس إللى عايشين حياة تحت الآدمية وإللى أظن أنه ما شافهمش فى حياته قبل عمل هذا البرنامج.

وكان ممكن يعمل برنامج من النوادى وحاجة كده تقربه من السياسيين أو الفنانين أو لاعبى الكرة ولكن كان إختياره أن يعرض حياة الناس إللى ضايعين فى الحياة والمهمشين.

حتى لو بيعمل كده علشان الإعلانات والتسويق للبرنامج، فالفكرة تستحق التقدير بغض النظر عن نيته التى لا أحد يعلمها.

[لونا]

الحقيقة إن البرنامج فعلاً مهم و يكفي إنه بمجرد عرضه يتم الإستجابة من المسئولين فوراً...

و إن كان لا يعجبني على الإطلاق عرض هذه النوعية من البرامج على الفضائيات ...

بل يكفي عرضها على قنوات أرضية فقط .. و لا أعرف الكيفية

لكن غير المصريين بالتأكيد لا يهمهم أن يروا هذه المشاهد

هذا بفض النظر عن شخصية عمرو الليثي و من معه أو ضده

و بالتأكيد يشرّف أي مصري فوز أحد المصريين بجائزة عالمية

[عاشق الترحال]

لن أحكم على شخصه لأني لا أعرفه كشخص إلا عن طريق تقديمه لعدة برامج ولعل برنامج واحد من الناس الذي يعرض حياة الناس الغلابه اللي تحت خط الفقر والحياة الآدميه واللي كتير مننا مش واخد باله منهم .

والراجل بيسعى جاهدا أنه يحرك المسؤلين اللي قاعدين على كراسي في التكييف علشان يحسوا بمشاكل الناس ويساعدوهم علشان فيه عينه من المسؤلين

( بتخاف متختشيش ) ولما يتفضحوا على شاشة التليفزيون يقوموا يحطوا في عينهم حصوة ملح ويتحركوا ويحلوا مشاكل المواطنيين الغلابه .

ومن خلال البرنامج ده أقدر أقول أنه يستحق الجائزه لكونه ( إنسان ) يسعى لفعل الخير من خلال برنامجه وحتى لو كان أبوه كما يقال عنه ( فلا تزر وازرة وزر أخرى )

وحتى لو كان برنامجه تقليدي وليس فيه إبداع فيكفى أنه بيفعل الخير هذا ما يعنيني لأن الناس الغلابه دي محتاجه حد يحس بيها.

والنوايا بقى لربنا هو الذي يعلم خائنة الاعين وما تخفى الصدور .

تحياتي

[Sherief AbdelWahab]

أحلى صورة وأحلى صوت.. أنا واخد ميوزيك أوورمة.. :lol:

إعلان كبييييييير على الصفحة الأخرانية للمصري اليوم النهاردة ناشراه قناة دريم تهنئة لسيادة الإعلامي الكبير بحصوله على اليونسكو ميوزيك أوورد (وربنا عارف اللي في ضميري) .. وطبعاً جايبة سيرة "الرعاة" للبرنامج بشكل أو بآخر في قاع الإعلان.. إعلان كدة ماركة إعلانات النفاق اللي بتتنشر في الصحف الحزبوطنية في الأعياد القومية للمحافظات..

دريم اللي يقال إنها بتعاني من أزمة مالية طاحنة نشرت إعلان يفترض إنه بالشيء الفلاني لتهنئة سيادته.. أنا مش حأقول غير:

خلص الكلام

[لولا]

يظهر ان مصر مبقاش فيها حد شريف خلاص !!

ومبقاش حد بيعمل حاجه بدون مصلحة شخصية او تملق ونفاق او اجندة خفية !!

حد يشاورلى على حد شريف فى البلد يا جماعة نجمع كلنا على انه مش تبع حد ولا منافق ولا بيشتغل لحد ولا بيروج لحد ولا بيظهر حاجه ويبطن حاجه تانيه !!

يعنى مصر خلاص عدمت الشرفاء ولا ايه ؟؟

كنت قريت حملة الهجوم على محمود سعد والشكيك فى عمرو الليثى وكمان الهجوم عليه ونصب محاكم للضمائر والقلوب عليهم تتجاوز كتاباتهم وبرامجهم

والنتائج الإيجابية وتحركات الحكومة وبعض افراد الشعب القادرين لتصحيح وضع او تقديم مساعدة ..

اعتقد ان برنامج زى "واحد من الناس " برنامج يقدم الخدمات والحلول العاجلة للمشاكل ومؤخرا نجح فى إجبار الشركة القابضة للمياه ومحافظة 6 أكتوبر على إنهاء مشكلة المياه الملوثة فى قرية الرهاوى بمحافظة 6 أكتوبر وتوصيل المياه إلى قرى أخرى فى المحافظة يستحق فعلا التقدير ..

اعتقد ان مذيع ينزل للشارع المصرى ينتقد الأوضاع الخاطئة يطلب تصحيحها هو شخص يقدم عمليا ترجمة كلمة ان يكون كل شخص ايجابى فى حدود قدراته

ان تطلب التغيير وتسعى له وترفض الواقع المشوه الفاسد لأن الأمور لن تنصلح وحدها طالما يجلس على الكراسي من لا يخافون الله ولا يقيمون للأمانة وزنا

ولا الآدمية حساب .. ان يتحول اعلام "التوك شو " السخيف الى منح مساحة ووقت لبعض الإعلام الهادف الذى يخدم المواطن ويقدم رسائل يُسمع فيها صوته

كإعلام محترم ومتنفس لمواطنون اختنقوا من كم التهميش واللاآدمية التى يعيشوها

كل شخص ارى انه يقدم خدمة لهذا البلد ولمواطنية ويبذل الجهد لتصحيح اوضاع خاطئة هو شخص اراه جدير بالشكر واحترام عمله ، لسنا نملك بلورات سحرية

تترجم الضمائر لنحكم على الأشخاص لذا من الأفضل ان ننتقد العمل ذاته ونقيمه بناء على ما يقدمه او لا يقدمه للمشاهد والمواطن والبلد .

للأسف الإعلام اصبح هو الطريق لهولاء حاليا لتتذكر الحكومة واجباتها تجاههم وحتى تصبح حكومة نظيف حكومة نظيفه تتحرك بدواعى الواجب الوطنى

وتتحمل مسؤلياتها وتراعى الله فى الشعب المطحون المهمش وفقرائه الغلابه فليس لهؤلاء سوى الإعلام لكشف المستور وفضح الفساد وتردى الأحوال..

ومن الطف ما قرأت تعليقا على جائزة برنامج واحد من الناس شخص يطالب ان تكون الجائزة للحكومة التى تتحرك لتصحيح "بعض " الأوضاع "احيانا "بعد فضحها وعرضها

من خلال البرنامج ..

لأ لأ .. بصراحة عنده حق !!

هايلة جدا الحكومة دى اللى عندها نقطة دم بتحس بيها ساعات وتصحح حاجه لبشر مش محسبوسين على البلد بنى آدمين اساسا .. تستحق التقدير طبعا !

لكن البرنامج والمذيع انا رأى انه يكفيه دعوات صاااااادقه من كل شخص فى كل عشوائيه او قرية اتغير شيء فى حياتهم من خلال البرنامج .

أعتقد الدعوة الصادقه من القلب محدش حيطالب كمان انها تكون من نصيب الحكومة .. ولا ايه ؟؟ عموما الحكومة مش بتهتهم بحاجات هايفه زى دى

من عينه رضا الشعب وسعادته واحساسه انه انسان وكام دعوة منه لربنا كده من غير وسيط او محسبوبيه

تحياتى

لولا

[Sherief AbdelWahab]

بمناسبة الجائزة.. هل دعا سيادته لعمل مؤسسي حقيقي- مش مجرد حل مشاكل لأفراد أو مجموعات -لحل مشاكل الفقراء والساكنين في مناطق محرومة خدمياً؟

لو عمل كدة يبقى يستحق الجائزة.. أقله عمل حاجة لها علاقة بالتنمية البشرية صح..

لكنه ما عملش..

وصعب جداً يعمل..

خلص الكلام

[سكر]

بدون الدخول فى نوايا وتفاصيل البرنامج ومقدمة

انا بشاهد البرنامج كثيرا ونفسى يطور فى الاسلوب الى احسن من كدة عشان فعلا ميكونش برنامج مقلد لما سبق

وهحاول اقدم نقد بناء وعلى سبيل المثال

1- زى ما فى احياء تحت الارض وناس مش لاقيه حتى النومه ليه مبيعرضتش على الوجهة الاخر الحياة الاخرى من فلل بالملايين وقصور

ومنتجعات عشان نعرف ان مصر فيها وفيها وكمان نعرف دة اتعمل فيه ليه كدة ودة اتعمل فيه ليه كدة

ونقارن دة بيدفع كام خدمات للدوله ودة بيدفع كام خدمات للدوله

2-الاقلال من استضافه الممثلين والمغنيين فتجهيز حلقتين لكل واحد كثير قوى

مهما طول اليوم فى التليفزيون واجعين دمغنا

ليه مفيش نماذج مشرفه ناجحة من الشباب هما الى يتم التركيز عليهم وعلى ادق تفاصل حياتهم

عجبتنى جدا حلقة مذيع اذاعة القران الكريم شخصيه قمه فى الروعة والمثابرة بس يا خسارة

بعدها جاب احمد عز الممثل لمدة حلقتيين وراء بعض ليه مش عارف

واعتقد ان سبب شهرة البرنامج بالرغم ان الفكرة فعلا معادة هى هذة الحلقه

[Diab]

عجبني عمرو الليثي اللي كان مقضيها عياط الصبح علي حال الغلابة

تاني يوم طار مخصوص علي بورت غالب عشان يحضر حفلة بيونسيه اللي التذكرة بالشيء الفلاني والمجون فيه للركب

صباح التناقض

[إيزيس]

مش داخل دماغي كل اللي بيعمله انسان مبالغ فيه

و أسلوبه مصطنع حتى صوته مصطنع و دمه تقيل

بيحاول يقلد حمدي قنديل

على رأي المثل القوالب نامت و الانصاص قامت

يوم احتفال عيد الأم يجيب الواحدة و لازم يخليها تعيط

والست محترمة و عظيمة و بتحكي على إنها طردت من ييجي 20 شقة لعدم قدرتها على دفع الإيجار

لكن و لو..... لازم يسألها

تطلبي إيه يا أمي؟ ( لازم نخللي الناس تتسول حتى لو حبينا نكرمهم)

واحدة بتقوللك بتنطرد من الشقق

يعني أكيد محتاجة فيراري