شكرا لمروركم الكريم

[Alshiekh]

بسم الله الرحمن الرحيم

السلام عليكم

أعلم اننى اطرق نقطة قد تكون حساسة الى حد ما

ظاهرة لاحظتها وقد نقع جميعا فيها وانا بالطبع واحدا ممن فعلوها.

عندما يكتب احدنا موضوعا ،

هل بالضرورة ان يتوجه بالشكر لكل من حضر وشرف وكتب رد او كلمتين؟

عند كتابتنا لفكرة او موضوع او حتى نقل خبر ، لماذا نتخيل اننا قد فتحنا " المندرة " وواجب علينا ان نقدم القهوة والشاى ونرحب بالضيوف؟

أم أن الفكرة هى مجرد ابقاء الموضوع على قمة الموضوعات فى الباب؟

أم ترى اننا نسعد بزيادة رقم المداخلات ، حتى ولو كتبنا ترحيب لكل عضو فى مداخلة منفصلة ، اى ان الاهتمام بالكم وليس بالكيف؟

واحيانا نرى كاتب الموضوع يضيف مداخلة تعبر عن غضبه لعدم وجود ردود وان الاعضاء اكتفوا بالقراءة فقط ، فنجد مثل هذه العبارة " 30 مشاهدة ومافيش رد واحد "

اثناء قرائتى لبعض الموضوعات ، يقفز الى ذهنى " مرزوق وسلامة " الذى كان يقوم بالاداء الفنانين الراحلين عبد المنعم مدبولى وفؤاد المهندس " نجيب قهوة ، نجيب شاى ؟ نجيب شلتة عشان ترتاح ".

اتمنى ان نتعرف على وجهات نظر الاعضاء .

[fatfouta]

الفاضل الاستاذ / محمد

انا بعترف.......ايوه بعترف انى كنت بعمل كده ولغايت وقت قريب اوى كمان

لكن مش عشان الموضوع يفضل على البانر او يبقى ليه الاولوية ولا حاجة........لا لاسباب كتير وهى

- انى ماكنتش اعرف اعمل اذاى الاقتباسات المتعددة عشان اقدر ارد على كل المداخلات مرة واحدة

- فى ردود بيبقى فعلا لازم ارد عليها فى مداخلة لوحدها

- اللى لاحظته هنا بقى ان لو انا فاتحة موضوع وفيه اعضاء كتير شاركوا وانا جيت وردي على بعضهم والبعض الاخر لأ.......للاسف هقولها بصراحة

تلاقى اللى ماردتش عليهم (مقموصين) ويقولوا اشمعنى احنا تجاهلتنا.......والله مانرد لها تانى على مواضيع تانى

وفى مرة جاتلى رسالة عالخاص من عضو بيقولى........يعنى كلفتى نفسك تردى عالكل الا انا........فيه ايه يعنى؟

بالنص والله.........اضايقت الاول لكن بعد قولت لنفسى انا لازم ارد لو شايفة ان كلامى هيضيف شئ

لكن بجد كان جهل منى مش اكتر وانا صريحة وببدأ بنفسى وبصلح اخطائى عااااااااادى

شكرا يا جنرال :blush2:

[Simba]

العادة دي ممكن الاحظها في منتديات كتير لكن هنا نادر جدا ان اشوف شكرا علي مرورك والكلام ده

لان اصل المحاورات قائمة علي التفاعل بين اعضائها في الحوار لكن ان كل مداخلة يتعمل لها مشاركة لوحدها انا شايف ان ده عادي جدا ومفيهوش حاجة

اصلا زيادة عدد مشاركات العضو مش هتترجم لجوايز ولا فلوس ولا حاجة

[pocy]

أخى الفاضل الاستاذ محمد

عندما بدأت اكتب في المحاورات كنت كتبت موضوع وكنت منتظره الرد ومحدش رد أتأثرت قوى وسألت نفسي ليه هم يعنى علشان مثلا مش عارفنى ولا مش عارفين يردوا على ان شالله بالدعاء ولا المشكله اللى عرضتها ليس لها حل وبعدين تراجعت عن كل الافكار السوداويه اللى فى بالى لان الاسئله تزاحمت فى رأسي

وبعدين لم القي لها بالا بقيت بكتب وبرد على اللى بعرف ارد عليه ولى خبره فيه بس لو مش عندى وبلاقي الرقم صفر ومشاهدات كتير برد برد معروف والله مش اعرف بس مأكد حد ممكن يفيدك لانه بيضايقنى ان حد يسأل ومحدش يرد ان شالله بالدعاء بالتوفيق

وبعدين بدأت اغزو الموقع بمواضيعي وكنت بفرح بعدد المداخلات فى الاول لمواضيعي بعدين لاقتنى ان فى ناس مش بعرف ارد عليهم والمفروض ارد عليهم حتى ولو بالشكر علشان مش يزعلوا (اصلي مش بحب حد يزعل منى نهائيا)

مواضيع البنر بقي ده اول حاجه بشوفها وبالتالى لما ببقي عايزه اسال سؤال ولسه حاسهانى مش استفدت دايما بحاول اخليه فى البنر لعل احد الخبرات يشفوه ويفيدونى وده رائي الشخصي وللاسف هعمل كده لو الموضوع هاممنى ولا رأى حضرتك ايه؟؟؟؟؟؟؟؟؟؟

[محمد الششتاوي]

أنا بصراحة لما بفتح موضوع ببق مش عارف هل واجب على اني ارد على كل عضو من باب الذوق

ولا ارد على المشاكارت اللي انا عايز اعق عليها بس

انا بعتقد ان اي عضو وضع مشاركة في موضوعي من باب الذوق المفروض ارد عليه بأي كلمة لانه اكيد هايضايق لو ماردتش عليه

لكن لحد دلوقت مش لاقي جواب نهائي في النقطة دي

هل الاعضاء هتضايق فعلا لو ماردتش على كل واحد منهم حتى ولو مشاركة واحدة مجمعة للرد عليهم جميعا .. ولا بيعتبروا الموضوع موضوعهم ؟؟

[HanaaOsama]

في بدايه دخولي المحاورات كتبت موضوع و جالي ردود رديت عليهم باستفسار او توضيح و مردتش علي رد واحد

فصاحبه زعل وانا مردتش لان الكلام الي كتبه مع انه كويس لكن لم اجد رد بتوضيح سؤال سأله او استفسار عما كتب

بعدها اعدت فتره مكتبش اي ردود لاني اتحرجت بصراحه و كنت لسه جديده

بعد كدا بقيت احاول ارد علي اي مداخله متوجهه ليا

بالنسبه لان السبب يكون ان الواحد يزود مشاركاته اعتقد مفيش حد بيفكر كدا لان ليس لها اي فايده

اما بالنسبه للرد علي الموضوعات يعني الواحد لو فتح موضوع مثلا لانه شايفه اكيد ليه فايده او اي كان السبب و مجاش ولا رد واحد حتي

يبقي اكيد هيضايق ....

مش لازم الموضوع يستمر طالما جت ردود كافيه لصاحب الموضوع للرد علي استفساراته او انتفاء الهدف من الموضوع

لكن ولا رد واحد ديه مش ظريفه معناها موضوع هايف ليس له معني لا يستحق حتي الرد عليه

والمفروض لا يلام صاحب الموضوع لو كتب " 30 مشاهده ولا رد " حتي يظهر الموضوع ع السطح مره اخري لعل حد تاني يشوفه و يرد لان ناس كتير بتشوف البانر بس او بالكتير الصفحة الاولي من كل باب

و ما يحزني ان واحد من المشرفين يجي بعد هذه الجمله يضم رد صاحب الموضوع علي نفسه في نفس المداخله الاولي و يرجع الموضوع يترمي مكانه في الخلف

[se_ Elsyed]

و ما يحزني ان واحد من المشرفين يجي بعد هذه الجمله يضم رد صاحب الموضوع علي نفسه في نفس المداخله الاولي و يرجع الموضوع يترمي مكانه في الخلف

ودي بتتعمل إزاي يافندم ؟

يعني إيه يضم رد على نفسه ؟

[HanaaOsama]

و ما يحزني ان واحد من المشرفين يجي بعد هذه الجمله يضم رد صاحب الموضوع علي نفسه في نفس المداخله الاولي و يرجع الموضوع يترمي مكانه في الخلف

ودي بتتعمل إزاي يافندم ؟

يعني إيه يضم رد على نفسه ؟

اتعملت عادي :rolleyes:

بعد جمله 120 مشاهده و مفيش رد .....

3 ردود لنفس العضو صاحب الموضوع اضموا علي المداخله الاولي في الموضوع الاساسي و الموضوع في لحظه رجع مكانه !

تضايق ديه بالذمه ولا مضايقش wst::

[Damo]

انا لما بفتح موضوع خاص بيا طبيعي ان كل الردود تبقى موجهة ليا. بالتالي بحس ان ذوقيا لازم ارد على كل اللي اخدو من وقتهم عشان يردوا.

[ابو محمود]

و ما يحزني ان واحد من المشرفين يجي بعد هذه الجمله يضم رد صاحب الموضوع علي نفسه في نفس المداخله الاولي و يرجع الموضوع يترمي مكانه في الخلف

ودي بتتعمل إزاي يافندم ؟

يعني إيه يضم رد على نفسه ؟

وسع يا جدع وصلى على النبى عايز اشوف دم ازاي تقول كدة على المشرفين

انا بهدى النفوس يا سي المشرف

[doha]

اهو ده تحديدا احد الاسباب الي بتخليني مقلة في مواضيعي وبكتفي معظم الاحيان بالردود في مواضيع الغير ..

بلاحظ ان مواضيع كتير اصحابها ( بتتابعها ) وترد على الردود الي فيها ( نفر نفر ) وده طبعا بيستهلك وقت وجهد الواحد يصرفه في كتابة حاجه تانيه بدال مايبقى عمال يرد وبس .. بشفق من كتابة موضوع جديد لان ممكن جدا يكون عندي ( دماغ ) اكتب دلوقت حاجه بس وارد اوي اني بعد كده ميكونش في نفس الدماغ لمتابعه الردود .

المشكلة اني احيانا بشعر بالحرج الشديد .. مثلا لوحد كتب كتب عباره اطراء على شيء كتبته بحس ان من الذوق اني ارد واشكره وفي نفس الوقت برضه بجد ان مش من ( اللياقة ) اني اشكر ومفهوم ضمنيا اني اكيد يسعدني ماقال ولكن عشان المنتدى مش ملكية خاصه فمش معقول ان كل حد يمدح نرد عليه بقصيده مدح ..

كتير كنت بسال نفسي ياترى كده صح ولا الواجب الواحد يرد . .بس اعتقد كده ان الاغلبية دلوقت متفقة معايا بان نرد بس لو الرد هيضيف حاجه وفيما عدا ذلك فالقاعده ان الموضوع الي نزل المحاورات خلاص مبقاش ملك صاحبه وبالتالي مفيش على عاتقه تجاه الزوار اي واجبات ( ضيافه ) . .

[مغتربة]

عن نفسى اعتبر كل من كلف نفسه وقتا و جهدا للرد على فى موضوع لى هو ضيفى

و اشعر بحرج بالغ ان لم ارد له التحيه و ان كان باقل الكلمات

لكن فى بعض الاحيان يخرج عن استطاعتى الرد لظروف مفاجئه

فانتهز هذا الموضوع و اتاسف لكل شخص خط لى حرف واحد فى موضوع من مواضيعى

و لم يسعنى الوقت او الظروف بتحيته كما يجب عن ذلك

فهذا تقصير منى بالتاكيد

فلطفا اقبلوا معذرتى

[محمد الششتاوي]

اتمنى أن نخرج من هذا الموضوع بفكر يتفق عليه الغالبية ان لم يكن الجميع

فأنا أرى أنها نقطة هامة لأبعد الحدود

[Alshiekh]

السلام عليكم

الحقيقة انا ارى انه متى كتبت موضوعا حتى ولو كان بسيطا او ساذجا ونشرته ، أرى أن عودتى اليه تكون فقط لارى ان كان هناك ردا يستوجب منى التعليق عليه او استفسار يجب على ان اوضحه .

لاأرى مطلقا اننى يجب ان ارد على عبارات المجاملة او النقد ، يكفينى اننى قرأتها وعرفت رأى القراء فيما كتبت .

لاأرى مطلقا ان اكتب مداخلة او مداخلات لمجرد مجاملة من كتب ردا ليس لدى تعليق عليه الا " شكرا لمروركم ".

[أحمد سيف]

شخصيا لا أستطيع أن أبرئ نفسي تماما من هذه العادة ولا أسعى لإطلاق الأحكام على من يقوم بها.

هناك فكرة شائعة أن كل موضوع له (صاحب) وأن من يكتب في الموضوع يكون رده موجها أساسا لصاحب الموضوع. ربما يكون هذا هو السبب في أن (صاحب) الموضوع يجد نفسه مجبرا - بدافع اللياقة - على الردّ على كل مداخلة في (موضوعه) حتى لا يفهم أنه يتجاهل أحد (ضيوفه).

لكن فعليا بما أن الموضوع ليس ملكا لأحد - بمن فيهم من كتب أول مداخلة فيه - فإن عدم قيامه بالردّ على كل من شارك فيه وشكرهم ليس فيه انتقاص من شأنهم أو تقاعس عن القيام بواجب الضيافة نحوهم.

دائما ما أتصور نفسي وأنا أكتب في المنتدى جالسا في صالون بين مجموعة كبيرة من الزوار يتناقشون في مختلف الموضوعات ... ولا أتصور أن كل من أضاف وجهة نظر في نقطة نقاش معينة يتوقع رسالة شكر من الضيف الذي فتح النقاش في هذه النقطة ... مش كده ولا ايه.

[أحمد سيف]

و ما يحزني ان واحد من المشرفين يجي بعد هذه الجمله يضم رد صاحب الموضوع علي نفسه في نفس المداخله الاولي و يرجع الموضوع يترمي مكانه في الخلف

ودي بتتعمل إزاي يافندم ؟

يعني إيه يضم رد على نفسه ؟

اتعملت عادي :lol:

بعد جمله 120 مشاهده و مفيش رد .....

3 ردود لنفس العضو صاحب الموضوع اضموا علي المداخله الاولي في الموضوع الاساسي و الموضوع في لحظه رجع مكانه !

تضايق ديه بالذمه ولا مضايقش :lol:

بصراحة تضايق ... وحضرتك جبتي الخلاصه

لكن ولا رد واحد ديه مش ظريفه معناها موضوع هايف ليس له معني لا يستحق حتي الرد عليه

لما عضو يكتب موضوع مافيش حدّ مهتم بيه وعايز الناس تردّ عليه بالعافيه ويفضل كل شويه يكتب له كلمه لمجرد إنه يخلي موضوعه يظهر فوق مواضيع الناس بتتابعها ومهتمه بيها فدي فعلا حاجه تضايق.

العضو ده أمامه حل من اثنين ... يا إما يفهم إن موضوعه مايهمش حد وينساه ... أو يحاول يضيف فيه حاجه جديدة تجذب الناس وتخليهم يردوا عليه.

[محمد الششتاوي]

طيب لو حبينا نتعمق شوية في الموضوع

هنلاقي ان أي شخص بيحط رأيه في موضوع بيكون له رغبة بتتفاوت من شخص للتاني في انه يعرف انطباع الناس في وجهة نظره

وبقدر الرغبة دي بيكون رد الفعل عند عدم التعليق على رأيه

يعني ممكن صاحب المشاركة يشعر بحرج شديد ويتخيل انه رأيه لا يستحق التعليق أو انه رأيه تافه وأكيد بيكون له أثر سلبي في نفسه اذا كان من النوع ده

صعب نفترض في صاحب المشاركة انه على ثقة كبيره بنفسه او لا يعير اهتماما برأي الاخرين في أرائه سواء بالايجاب او السلب

هل ده مايستحقش التفكير ؟

ممكن يكون موضوع تنشيط المواضيع أو كثرة الردود تقلل من شكل أو نظام المنتدى

انما أنا كعضو , ماعتقدش اني أهتم بشكل المنتدى أكتر من شكلي الشخصي سواء كصاحب موضوع لا يريد الحرج للمشاركين

أو كصاحب مشاركة ماعتقدش اني ممكن أبرر لصاحب الموضوع عدم الرد علي بسبب حرصه على شكل المنتدى

تم تعديل 21 مارس 2010 بواسطة محمد الششتاوي

[أحمد سيف]

كلامك مظبوط يا أخ محمد ... لكن أيضا الرد التشجيعي والمجاملات ممكن تكون عن طريق الرسائل الخاصة ومش ضروري على العام.

وممكن يبقى لدينا عرف في المنتدى بأن مداخلات المجاملة وجبر الخواطر تبقى في أضيق الحدود حفاظا على شكل الموضوعات ... يعني مش لازم الرد يكون على كل مداخله على حده ... يكفي أن يقول صاحب الموضوع - إذا كنا مصرّين على هذا المبدأ- جملة واحدة في بداية مداخلته التالية يشكر فيها من شارك معه وأدلى برأيه. ساعتها محدش هيزعل وفي نفس الوقت نمنع الإطالة غير الضرورية وتشتيت مسار الموضوعات.

[ذهبية]

مش عارفة لية كلكم بتعتبروا المجاملات كانها عيب وما يصح انها تتقال فى المنتدى

لاحظوا اننا بعد فترة من المداخلات ان اعضاء كتير اصبحوا اصدقاء على الورق

المجاملات دة شىء عادى

الى حضرتك بتقولة دة بتجاهل بعض الاعضاء بالرد على اى مووضع بيجى من عدم المعرفة بالعضو نفسة لانة مثلا اول مرة يكتب

او ان العضو لم يعرف ما يشد الاعضاء للرد علية ودة هيوصلة فورااا

انا شايفة ان المجاملات الراقية فى حدود الادب بتعمل نوع من الالفة و سلسلة من الاتصال بين الاعضاء بيجمعهم منتدى واحد

[Advisor]

من تقاليد محاورات المصريين و منذ نشأتها رفض مداخلات الإطراء و الشكر إلا فى مجال الإبداع مثل الشعر

ما سبق كان إستهلالا لابد منه

و لنعرف قيمة هذه التقاليد تكفينا إطلالة على عديد من المواقع و الخليجية بالذات حيث أغلب المشاركات نوع من الإطراء و الشكر و الدعوات و هذه ثقافة مختلفة.

سؤال هل أدبيا أنت مطالب بشكر كل من عقب على موضوعك و الإجابة هى النفى بالتأكيد و سؤال آخر هل أنت مطالب أدبيا بأن تكتب تعقيب لا يضيف جديدا بالطبع لا.

فى الإصدار الجديد من البرمجيات توجد آلية معينة للتعبير عن الإطراء أو الإستياء فى صورة علامة زائد و علامة ناقص بجوار كل مداخلة و بالضغط أحد العلامتين تضيف أو تخصم من التقييم للمداخلة ، ربما تكون طريقة جيدة لتقييم الحوار.