عاشت الملكة فريدة .. ملكة مصر والسودان

[se_ Elsyed]

محاورات المصريين ... يوم السبت الموافق 27 يناير سنة 2051

خبر عاجل بموضوع سياسة داخلية - كاتب الموضوع - العضو عبد السلام محمد العنبي

" سفر الرئيس جمال مبارك لعمل عملية البواسير بموريتانيا "

------------------------------------

موضوع اخر بباب السياسة الداخلية برضوا

كاتب الموضوع طُلبه عُمر سين سين

عنوان الموضوع " مصدر روفيع بالحزب الوطني يُصرح : فريدة جمال مبارك هي المُرشحة القادمة لانتخابات الرئاسة "

تعليق 1

سويلم محمد تُهامي " لو هانقعد على الحديدة .. مش ممكن تُحكمنا فريده "

تعليق 2 "

عُمر إبن أبو عمر السلفي " قال رسول الله صلى الله عليه وسلم " ما أفلح قوم ولوا أمرهم امرأة ".

تعليق 3

شُكري أياد محمد مزاهيري " بطلوا بقى الرجعيه دي ... وإحنا خدنا إيه من حكم الرجالة .. بلا نيله "

تعليق 4

فتحي شريف عبد الوهاب " مع الحزبوطني ما عادتش فارقه سينا من سونيا ... خلص الكلام "

تعليق 4 باللون الأحمر

المُشرف عبد الرحمن سين سين " نرجو من السادة الزملاء الأفاضل عدم الخروج عن فكرة الموضوع . حيث أن فكرة ترشيح خليفة للرئيس الحالي جمال مبارك ليست محل نقاش الأن طالما الرئيس فيه نفس وبواسيره كويسه "

تعليق 5

نضال محمد عادل أبو زيد " هكذا يكون الرجال ... دعوة الدكتور عيسوي أحمد محمد البرادعي لتعديل الدستور هي صرخة حق في وجه الظلم ... أرجو من الجميع التضامن مع تلك الدعوة لكي نكون : مواطنون لا متفرجون "

تعليق 6

العضوه ساهير بنت لماضه مصريه " تالله إني لأشُم رائحة التغيير .............. مساءكم مَج كابتشينو مع واحده سينابون بالمكسرات " والبنت يا عيني قاعده على الجهاز وأساساً اللي شماه ده ريحة حلة الرز اللي أمها شيطته .. وأهو كله تغيير .. فبدل ما تاكل كل يوم رز معجن أهي تجرب الرز الشايط

تعليق 7

العضو كريستيانو جونير سكوربيون " بوناسيرا يا جماعة .... أنا شايف فعلاً إن في حراك سياسي أبتدا يظهر ... مع إن جدو سكوربيون كان قاعد قدام الدفاية أمبارح بياكل زبادي في الخلاط عشان ما بقاش فيه سنان يمضغ بها الزبادي وقال لي : يا كريشتيانو أن حاسس إنها هاتصيب المره دي مش عارف ليه يا واد "

تعليق 8

جَنى بنت فتفوته " بطلوا تفرقة عنصرية بقى ... وفيها إيه اما تحكم واحده ست ؟ مانتو من أيام بطليموس الأول بتحكموا وخربتوها وقعدتوا على تلها ... جتكو القرف رجاله عاوزه الحرق بالجاز "

تعليق 9 من المشرف ادهم أسد الغضنفر " يا اخت جَنى لو سمحتي سيطري شويه على أنفعالاتك ومش عاوزينها تبقى حرب ضروس بين الرجاله والستات "

تعليق 10

العضو مايكل جو : يا سلام ؟ وليه ما تكونش بنتي كريستينا هي الرئيسة القادمة ؟ .... طب على الأقل شعرها اصفر وعنيها خُضر والبنات بتعاكسها في الشارع "

تعليق 11

العضو طُلبه عُمر سين سين " يا عم شعر أخضر وعيون صفرا إيه هو عيد شم النسيم ؟؟؟ ده مستقبل بلد حرام عليكو مش طبق رز بلبن ده كل واحد داخل يغرف "

تعليق 12

عبد الفتاح احمد سيف متدخلاً باللون الاحمر " الاخوة الزملاء الأفاضل ... كما لاحظتم بإن عدد المداخلات قد بلغ 12 مداخله وده عدد كبير جداً .... لذلك قد قررت الإدارة فصل تلك المداخلات وتقسيم الموضوع إلى 4 مواضيع لكي يسهل تصفحه .. شكراً لتفهمكم ونأسف للازعاج "

تعليق 13

العضو المتيم " لو سمحتو يا جماعه .. أنا جايلي عقد عمل في جُزر المالديف ... ممكن تقولوا لي إجراءات اللاندنج والهاند أوفر مع الديليفري بتبقى إزاي ؟ أرجوووووووووووووووووووووكم "

تعليق 14

العضوه بيريهان بنت ضُحى " يا أخ متيم ... عمت مساءً .. ألحق احذف مداخلتك دي ... المشرف عبد الرحمن سين سين لو شافها هايولع فيك وفي التوبيك كله .. انا حذرتك "

تعليق 15

العضوة كارولين حفيدة miramikhail " صدقوني يا جماعه .. أنا بأدعي للرئيس جمال في كل قداس إن ربنا يشفيه من امراض البواسير اللعينه .. وفي نفس الوقت بأدعي للرئيسة فريدة إن رينا يقويها وبأدعي للزملاء في المحاروات إن ربنا يبارك فيهم "

تعليق 16

العضو شكري إياد مزاهيري " 15 مداخله ولحد دلوقت مش عارف فين المشكلة ؟؟؟؟؟ يعني إنتو معترضين إن يبقى عندنا ريس من غير بواسير ويكمل حياته كده على الجنط ؟

ولا معترضين إن تحكمنا واحده ست مع إننا في القرن الأتنين والعشرين ؟؟؟؟

ولا اقول لكم ... انا هاريح الجيم واكبر الدال .... جدو جابلنا امبارح إتنين كيلو بطارخ .. انا هاقوم أضرب لي بطروختين واحبس بحجر معسل بحريني أثناء الأستماع لكونشرتو من كونشرتوهات مطرب القمم " عصام شعبان عبد الرحيم ... أتوتا لير "

تعليق 17

عضو مجهول " الواد شُكري ده طالع غلس زي جده الله يرحمه ... يعني ما جبوش من بره "

تعليق 18

العضو ... سيكو سيكو إبن الزميلة الفاضلة شيكو شيكو الحاصلة على جائزة الدولة التقديرية من ام المصريين " ماما خديجة الجمال " والجدير بالذكر أن هذه الجائزة تُمنح للاتي بلغن سن 78 عاماً قضين منها 50 عامً في العمل الوطني الوحدوي التقدمي

" بأقول لكم إيه ... بلا سياسية بلا هم .... حد يبارزني بمسدسات الليزر واللي يموت التاني ياخد ربع مليون جنيه ؟ "

تعليق 19

المشرف أبو طالب محمد أبن عم أبو محمد " يا أخ سيكو .. إحنا ملاحظين إن معظم مشاركاتك اليومين دول أصبحت تتسم بالسطحية والبرجوزاية ... من فضلك لم مسدسات الليزر بتاعتك وشوف لك منتدى تاني يا إما تلتزم بجدية منتدى محاورات المصريين ... وشكراً "

تعليق 20

المشرفه فوزيه بنت يارا بنت فلانه

" بليز يا جماعه بليز ... خلونا ندخل في كور الموضوع وبلاش تشتشت "

تعليق 21

العضو الأرشيدوق أكسيلانس " يااااااااااااااااااه فكرتوني باجمل بنت حبيتها وانا في نيرسيري كان أسمها فتحيه ... حرف الإف أول ما قريتوه في العنوان الموضوع عمل شغل عالي قوي عندي وخلى غده الأدرينالين تصب في الأثنى عشر وبقت عينيه ترف من كتر المشاعر "

تعليق 22

مهاود عُمر إبن بوسي " امبارح خرجنا إحنا وتيته نتتمشى شويه في السالمية فلقيت ناس كتير ماشيين ورافعين حتت قماش بفته كاتبين عليها " تسلم لنا بواسيرك يا صاحب الضربة القاضية .... يا جمال يا جمال يابو دماغ فاضيه " فعرفت على طول إنهم مصريين .. لكن تيته قالت لي يالا يا مهاود نمشي من هنا بسرعه أحسن الشرطة هاتيجي تلمهم دلوقت عشان دول ناس قلالات الأدب

تعليق 23

لوليتا حفيدة لولا " أسعد الله مساءكم جميعاً ... في الحقيقة الموضوع ده فكرني بعصيدة كتبتها لما تيته لولا كانت تعبت شويه ودخلت مستشفى كليفلاند - الدمرداش سابقاً - وكان مطلع العصيدة بيقول " سلامتك يا تيتا ... سلامتك يا تيته وسلامة سلامتك ... إلهي تعيشي وأشوف أبتسامتك ".... ميرسي عليكم

تعليق 24

العضو أبو ثنيان مسافر زاده الخيال " بالرغم من إن هذا شأن مصري خالص .. لكن أسمحوا لي ادلوا بدلوي ... فالثابت تاريخياً انه ليس هناك فرف بين سيدة أو رجل في مسائل الحكم من عدمه لكن الامر يعتمد في الاول والأخير على السياسة العامة للحاكم .. وأسف للإطالة "

تعليق 25

سبعاوي عُمر إبن كروسفيلد " انا تيته مره نصحتني زمان وقالت لي : شوف يا سبعاوي .. عشان تبقى مواطن صالح في المجتمع وماحدش يديك على قفاك قدامك حل من اتنين ...يا إما دايماً تلبس حاجه بكُم عشان تغطي قفاك ... يا إما تطلع بطاقة انتخابية وما تنتخبش اللي عاوز يديك على قفاك "

يُتبع

ده أنا هابهدلكو

[أحمد سيف]

يا جدع انت حرام عليك ... الباب اسمه دعوه للابتسام مش موتوا الناس من الضحك

:lol: :lol: :roseop:

بس بجد يا أبو الأسيان ... حته روعه

أديهم يا راجل ما ترحمهمش

[fatfouta]

محاورات المصريين ... يوم السبت الموافق 27 يناير سنة 2051

تعليق 4 باللون الأحمر

المُشرف عبد الرحمن سين سين " نرجو من السادة الزملاء الأفاضل عدم الخروج عن فكرة الموضوع . حيث أن فكرة ترشيح خليفة للرئيس الحالي جمال مبارك ليست محل نقاش الأن طالما الرئيس فيه نفس وبواسيره كويسه "

تعليق 9 من المشرف ادهم أسد الغضنفر " يا اخت جَنى لو سمحتي سيطري شويه على أنفعالاتك ومش عاوزينها تبقى حرب ضروس بين الرجاله والستات "

تعليق 12

عبد الفتاح احمد سيف متدخلاً باللون الاحمر " الاخوة الزملاء الأفاضل ... كما لاحظتم بإن عدد المداخلات قد بلغ 12 مداخله وده عدد كبير جداً .... لذلك قد قررت الإدارة فصل تلك المداخلات وتقسيم الموضوع إلى 4 مواضيع لكي يسهل تصفحه .. شكراً لتفهمكم ونأسف للازعاج "

تعليق 19

المشرف أبو طالب محمد أبن عم أبو محمد " يا أخ سيكو .. إحنا ملاحظين إن معظم مشاركاتك اليومين دول أصبحت تتسم بالسطحية والبرجوزاية ... من فضلك لم مسدسات الليزر بتاعتك وشوف لك منتدى تاني يا إما تلتزم بجدية منتدى محاورات المصريين ... وشكراً "

تعليق 20

المشرفه فوزيه بنت يارا بنت فلانه

" بليز يا جماعه بليز ... خلونا ندخل في كور الموضوع وبلاش تشتشت "

ليه كره يا سى السيد يا خويا؟؟؟ ليه كره

كل ده توريـــــــــــــــث؟؟؟

حتى المحاروات فيها توريث :lol:

يعنى دول ان شاء الله هيبقوا مشرفين ليه سنه 51 مش حرام كره؟؟

مش عدل والله وانا اللى فاكراك ضد التوريث!!!!!!!!!!!!!!!!

اشمعنى يا خويا جنى بنتى تعليقها مايبقاش بالأحمر؟؟ طب اقولك خد جودى تبقى مشرفة بلاش جنى مادام متعصبة قوى كده

ده الظلم فى كل مكان يا ولاد.......حتى فى المحاورات

ماكانش العشم والله

[ذهبية]

لالالا .............ان زعلانة يا سين سين......... يعنى هى جت على ولادى

يعنى انا اسيب لهم ميراثى فى المنتدى ........الاقيك تنساة ولا اية

لالا اوع تنساة ......لحسن هاعمل لهم حزب لوحدهم....... هاسمية....... الحزب الذهبى للمواريث وهاخلى ابنى الكبير صلاح الدين..............هو رئيس السياسات العليا فى الحزب

وعلشان عمر ابنى ما يغير من اخوة ..........هابقى اخلية يمسك القسم الاقتصادى ...... بتاع المنتدى يحطة فى جيبة

و برضةةة .. صلاح الدين...... هياخد حقة فى المنتدى....... شئتم ام ابيتم

طبعا بعد الانكار......... ان المنتدى مش عايزة و لا بيحبة

لكن بعد فترة هيفاجا........ اولادكم كلهم .......و هيبقى برضة الرئيس

[Damo]

اده :lol: ده على كده واحد يحرص على نفسو من الاستاذ سين سين!!

اشك انو عندو فايل تحليل شخصية و حالة اجتماعية و نفسية و روحية مش للاعضاء بس لا للزوار كمان

بس الحمد لله انا فلت :lol:

[جيمي]

هوه لسه في يتبع :)

مبدع مبدع مبدع مبدع مبدع مبدع مبدع مبدع مبدع مبدع مبدع مبدع مبدع مبدع مبدع مبدع مبدع مبدع مبدع مبدع

وادي القبعه اهي :)

وكمان قبعه اهي :hi:

وقبعه اخيره اهي :hi:

يا اخي اقولك ......

عريت راسي

ومت من الضحك :lol: :lol:

[msayed]

والله العظيم جميلة يا سين سين

وأجمل ما فيها

إن الواد حفيدى فلت من البهدلة دى

هو كان عاوز يدخل يرد على شكري إياد مزاهيري بس خاف إنه يغير إتجاه الحديث ويشتت الموضوع وقال الطيب أحسن وها يفتح موضوع جديد للرد عليه

:lol:

[عنبو]

خبر عاجل بموضوع سياسة داخلية - كاتب الموضوع - العضو عبد السلام محمد العنبي

" سفر الرئيس جمال مبارك لعمل عملية البواسير بموريتانيا "

تعليق محمد العنبى

اطلع يابن تتتتتتتتتتتتتتتتتتتتتتتتتتتتتتت من باب سياسه داخليه انت عاوزهم يقبضوا عليك وكمان جايب سيرة بواسير

الملك المقدام جمال بن محمد أل مبارك

انا مش قايلك يابن تتتتتتتتتتتتتتتتتتتتتتتتتتتتتتتتتتتت تبطل كلام فى السياسه وتبطل تسهر مع عمر ابن سين سين وتضربوا شيشه مع بعض

يابنى دول ناس بايعه ابوه سين سين لحد دلوقتى مش عارفين راح فين بسبب الكلام اللى كان بيكتبه

انا نفسى تعمل موضوع جميل كده عن انجازات الدوله المباركيه

او تعمل موضوع تتكلم فيه عن جوله سياحيه قمت بيها الى الاهرامات التلاته محمد وجمال وعلاء

هى دى المواضيع اللى بحق وحقيقى

تحياتى

ابو عبدالسلام محمد أل العنبى

[لماضة مصرية جدا]

تعليق 6

العضوه ساهير بنت لماضه مصريه " تالله إني لأشُم رائحة التغيير .............. مساءكم مَج كابتشينو مع واحده سينابون بالمكسرات " والبنت يا عيني قاعده على الجهاز وأساساً اللي شماه ده ريحة حلة الرز اللي أمها شيطته .. وأهو كله تغيير .. فبدل ما تاكل كل يوم رز معجن أهي تجرب الرز الشايط

يُتبع

ده أنا هابهدلكو

:lol: :lol: :) :)

طب تالله لو عندي بنت و اسمها ساهير...........لاقطع عنها المصروف

كمل يا استاذي

بهدل بهدل و لا يهمك....اديني في البهاريز و المرقة....مش خلاص الرز اتعجن..... :hi:

صباااااااااحكم...جردل ميه ساااااااقعة...بس مليان زغازيغ..... :hi:

[shiko]

خبر عاجل بموضوع سياسة داخلية - كاتب الموضوع - العضو عبد السلام محمد العنبي

" سفر الرئيس جمال مبارك لعمل عملية البواسير بموريتانيا "

------------------------------------

تعليق 18

العضو ... سيكو سيكو إبن الزميلة الفاضلة شيكو شيكو الحاصلة على جائزة الدولة التقديرية من ام المصريين " ماما خديجة الجمال " والجدير بالذكر أن هذه الجائزة تُمنح للاتي بلغن سن 78 عاماً قضين منها 50 عامً في العمل الوطني الوحدوي التقدمي

" بأقول لكم إيه ... بلا سياسية بلا هم .... حد يبارزني بمسدسات الليزر واللي يموت التاني ياخد ربع مليون جنيه ؟ "

تعليق 19

المشرف أبو طالب محمد أبن عم أبو محمد " يا أخ سيكو .. إحنا ملاحظين إن معظم مشاركاتك اليومين دول أصبحت تتسم بالسطحية والبرجوزاية ... من فضلك لم مسدسات الليزر بتاعتك وشوف لك منتدى تاني يا إما تلتزم بجدية منتدى محاورات المصريين ... وشكراً "

..........ماكنش العشم .....يا استاذ س ص ع ...

والله ...وماليك عليا حلفان ...طب بس نزل مسدسات الليزر من ايديك ...لاحسن السلاح يطول...

الجايزة اللى هاخدها دى ...هاخدها على حياة عينى ولا ...لما ان شاء الله هانتقل للرفيق الاعلى ..

طب تصدق بإيه ؟؟قول لا اله الا الله ....بس قول الاول ....

انا هاخليلك انت الجايزة خدها وادينى الربع مليون اللى فوق دول ...وانا هاختفى من المحاورات كلها ...بس ادينى الربع مليون

لا ولسة يتبع ؟؟؟

---------------------------------------------------------------------

على جنب كدة ...انا لا اسمح ابدا وبالمرة ان ابنى يكون اسمه سيكو ....

ولا موش سيكو واحدة دول اتنين ...يعنى اسم مركب ...

...كنت اهدرت دمه ...ما أصل المجتمع موش ناقص عاهات ...

انا ابنى هايبقى اسمه على ... ان شاء الله ...ده مبدئيا

اخيرا ...الكلام المكتوب الاحمر ده ؟؟؟اعتبره كارت بلانش؟؟ولا طرد من المحاورات ..؟؟ ولا زق اكتاف ولا ايه موش فاهمة

اذا كان مجرد تلميح .......ماشى .......بس انا لا اقبل اى تلميحات بالمرة تقتنص من شخصيتى ... سطحية وبرجوازية .الاتنين ؟؟!!

تم تعديل 24 مارس 2010 بواسطة shiko

[pocy]

محاورات المصريين ... يوم السبت الموافق 27 يناير سنة 2051

خبر عاجل بموضوع سياسة داخلية - كاتب الموضوع - العضو عبد السلام محمد العنبي

" سفر الرئيس جمال مبارك لعمل عملية البواسير بموريتانيا "

------------------------------------

موضوع اخر بباب السياسة الداخلية برضوا

كاتب الموضوع طُلبه عُمر سين سين

عنوان الموضوع " مصدر روفيع بالحزب الوطني يُصرح : فريدة جمال مبارك هي المُرشحة القادمة لانتخابات الرئاسة "

تعليق 22

مهاود عُمر إبن بوسي " امبارح خرجنا إحنا وتيته نتتمشى شويه في السالمية فلقيت ناس كتير ماشيين ورافعين حتت قماش بفته كاتبين عليها " تسلم لنا بواسيرك يا صاحب الضربة القاضية .... يا جمال يا جمال يابو دماغ فاضيه " فعرفت على طول إنهم مصريين .. لكن تيته قالت لي يالا يا مهاود نمشي من هنا بسرعه أحسن الشرطة هاتيجي تلمهم دلوقت عشان دول ناس قلالات الأدب

يُتبع

أنا هابهدلكو

الله يسمحك بجد فطست على روحى من الضحك الله ينور ومستنيه بقيت الابداعات

وكمان مسمى حفيدى مهاود الله يسمحك

تم تعديل 24 مارس 2010 بواسطة pocy

[اغابي]

انا اتبهدلت من كتر الضحك

انا فى الشغل اتفضحت وحاتفنش على ايد المحاورات - قريبا جدا المدير حيقولى اقعدى فى بيتك وما تجيش تاني ابقي خلى النت ينفعك علشان تضحكى كويس

الله يسامحك يا سي السيد

بجد ما كنتش اعرف ان عندك كل المواهب دي

- سكر ...... سكر

انا متابعة كويس --- اكمل خلينى اضحك عليهم ..... وبعدين جايب كل واحد شخصيته باختصار فى كلمتين - ايه التركيز العالى داه .......

[pink rose]

عارف يا استاذ احمد

و الله بقالي كام يوم ما ضحكتش من قلبي زي ما ضحكت دلوقتي لما قريت الموضوع دا

باشكرك من قلبي بجد

[se_ Elsyed]

الف شكرا يا جماعه ...رفعتوا من روحي المعدنية

دي حاجه بسيطة والله كتبتها أمبارح بالليل وأنا في وسط الكتب والمذاكرة ..

وبعدين كنت متعش فاكهه وحاجه خفيفة كده

أومال لو كنت متقل بقى

عالعموم ده عربون محبه ... وتيست يعني وطالما عجبتكم .. يبقى أنتظروا الكمالة

[shiko]

عارف يا استاذ احمد

و الله بقالي كام يوم ما ضحكتش من قلبي زي ما ضحكت دلوقتي لما قريت الموضوع دا

باشكرك من قلبي بجد

:blush2: مين استاذ احمد ياريموز ...؟؟؟

تم تعديل 24 مارس 2010 بواسطة shiko

[ozoozo]

محمد احمد اوزواوزو

هاتجيبه فريده هاتجيبوا جمال

انشاء الله الزمالك اخر سنه ليه السنه دي في دوري الدرجه التانيه وانشاء الله السنه الجايه يطلع الدوري الممتاز

[MZohairy]

انا اتشحورت يا رجاله

انا و ابني إياد

و حفيدي شكري

ايه شكري ده؟ :blush2:

بقى اياد الكندي حيخلف كمان 20 سنه واحد يسميه شوكري؟؟ :blush2:

[أبو محمد]

تعرف يا سين سين ؟ .. أنا كنت راجع امبارح بالليل مكلضم من الشغل .. وكانت بتسيطر علىَّ فكرة إنى أنام مكلضم واقوم مكلضم وياويل اللى حشوفه فى وشى عالصبح

منك لله ياشيخ .. بوظت لى الخطة .. وام محمد بتقول لى إنى كنت باضحك وانا نايم ، وعمَّال اتكلم شوية مع "ابو طالب" وشوية مع اخوه الكبير "هاشم" .. أتارى "هاشم" كان أعلنها صريحة إنه لن يتخلى عن مسؤولية الإشراف "طالما فى الصدر قلب ينبض ، ونفس يتردد" :blush2: يعنى "على قلبكم لطالون"

أضحك الله سنك يا سيهههههين .. سيههههين :blush2:

[doha]

ياخبر ابياااااااااااض

وجون وجون وجووووون

قصدي ـ ماشاء الله 25 ـ جون ..

بصراحة لا تعليق يليق بـ التحفة ( الفريدة) دي ..

[se_ Elsyed]

نكمل

تعليق 25

العضوة مرجانه حفيدة فيروز : أيوه كده ... يااااااااااااااااااااااا ه .. دي تيته أول ما هاتعرف الخبر ده هاتفرفر من الفرحه .. عشان ده كان حلمها طول عمرها ... وأفتكر إنها سنة 2023 .. الفت كتاب إسمه " المراة بيت التمكين واللعب في الطين " وبتحكي فيه عن قصة فانتازيه تسود فيها المرآة العالم وتحكم جنس الرجال وتسعبدهم وتخليهم يشتغلوا شغل البيت ويمسحوا ويكنسوا ويسيئوا الأرض .

تعليق 26

العضو عبد الرحمن سين سين : فشر ... ده هايبقى اخر يوم في عمري لو أضطرتني الظروف إني أمسح واكنس .... أنا اعمل كده بمزاجي ... ومستحيل من رابع المستحيلات إني أسيء الأرض

تعليق 27

العضو عبد العال عاشق الترحال : والله عال .. دي القيامة هاتقوم يا جماعة يوم ما الستات يستقووا ويحكومنا ... لله الامر من قبل ومن بعد ... لله الأمر من قبل ومن بعد ...

تعليق 28

العضو فرغلي أبن msayed : لا فض فوك أخي عبد العال .. وبعدين أفرضوا إن الست حكمت – ما يحكمممممممممشي – وبعدين جالها أبن الحلال وأتجوزت وخلفت ... ها قول لي هاتعمل إيه الست الريسه ساعتها ؟

تعليق 29

العضو شوكري زهيري : يا هلا ومرحب بالأخوة السلفيين الأحرار ...... ودي فيها إيه دي كمان يا أخ فرغلي إنت وعبد العال ؟؟؟ ما كل ست مسيرها لبيت جوزها ؟

تعليق 30

عبد العال عاشق الترحال : مرحا مرحا ببني علمان ... لأ يا رفيق شوكري .. الجواز في حد ذاته يُعتبر ستره .. وضل راجل ولا ضل حيطه ... لكن أفرض الست خلفت تقدر تقول لي هاترضع العيل أثناء جلسات الوزراء والسادة المسئولين ؟

تعليق 31 :

العضوه بيريهان بنت ضحى : عادي ... ترضع عادي .... انا دخلت موقع أمبارح عالنت إسمه " عيال دوت كوم " بيتكلم فيه عن الرضاعة الطبيعية وإزاي إنها مفيدة في بناء جسم الطفل ومناعته

تعليق 32 :

شوكري الغلس : هأ هأ ها .. يا أخت بيريهان الأخوة السلفيين الاحرار فاهمني كويس ... ودلوقت واحد فيهم يفتي لي فيها ويكلمني عن " إرضاع الكبير " وإن الست الريسة ممكن ترضع السادة الوزراء عشان ما يبقوش محرمين عليها

تعليق 33

العضوه ساهير بنت لماضه : يا سنه سوخه يا سنه سوخه ... أنا وشي جاب ألوان .. إزاي ده ده ؟ عيب كده يا شوكري إلا كده .. راعي شعور البنات اللي قاعدين ...

تعليق 34

عبد العال و فرغلي في نفس الوقت : بتتريق على السُنة النبوية يا عدو الله ؟

تعليق 35

شوكري : وبقيت عدو الله .....؟؟؟؟؟؟ كل سنه وإنتو عاقلين

تعليق 36

جَنى بنت فتفوته : يا جماعه الحل بسيط جداً .. ومنعاً لإحراج الست الريسة وهي قاعده مع السادة الوزراء وكده ... ممكن نملى لها التتانيا سيريلاك أو حليب بروجرس للاطفال وتخلي حد من الوزرا الستات يرضع الواد ويهدهدوا يمكن ينام .

تعليق 37

فردوس حفيدة ريمو : يا تيته ... يا تيته .. ما شوفتيش فردة الشراب المشمشمي بتاعتي ؟ أرجوكي قومي من قدام الكمبيوتر وردي عليه

تعليق 38

المشرف عبد الفتاح احمد سيف : السادة الزملاء ... لقد مرت المحاورات بأحداث جسيمة وظروف عظيمة وتحديات ضخيمه .. وكما ترون بأم أعينكم ما آل إليه هذا الموضوع المهم وكيف تحول إلى حصه في الرضاعة الطبيعية وفرد الشربات التحتانية ... لذا فقد قررت الإدارة غلق الموضوع لمدة 4 شهور لتكون فرصة لألتقاط الأنفاس وإعادة التفكير والتدبر والتحوير .

وتمر فترة الأربعة شهور وسط همهمات وأرهاصات بين الأعضاء ... ثم يتم أعادة الموضوع بعد تنقيته من الشوائب

تعليق 13 حيث تم حذف باقي الحساب

صالح صلاح ولد الحاجه ذهبيه : والله زمان .... هو الموضوع كان بيتكلم عن إيه عشان أنا نسيت وكتاب الله

تعليق 14

عبد الرحمن سين سين : اظن بعد ما بانت الرؤية في خلال الأربع شهور المنصرمه .. كلنا اتأكدنا إن مسلسل التوريث شغال بنجاح ساحق للسنة الخمسين على التوالي ... وإن ما اتحركناش كلنا كبناء واحد لوقف تلك المهزلة ... هاتكون السنين الجايه سودا بطعم الهباب على دماغنا كلنا

تعليق 15

العضو العجيب إبن الغريب : ... إتحركنا ؟ وبناء ؟ إبقى قابلني ... يابني ما فيش فايدة .. مافيش فايدة ... نزل لنا يا عم وصلة موضوع " المعجم الحائر في بناء كشك سجائر " خلينا نسترزق يمكن نلاقي لنا سبوبة في البلد دي