بقالة الأمانة

[Abouhemeed]

بسم الله الرحمن الرحيم

عم أبو الحكم بقال فاتح في الحارة ع الناصية

من يوم ما ع الدنيا وعينا و إحنا بنشتري منه

جبنه و حلاوة و زتون وكل بقالة ناشفة

و الدفع آخر الشهر أو نصه أو الآخر منه

سنين و أيام عدت و الصغير مع الزمان يكبر

و الشاب شبابه يشيب و العبد قدرته ب سنه

و أبو الحكم يبيع للناس يكسب و لا يخسر

دعاء الناس يبارك له بمقدار الطيبة في قلبه

***

ابنه إمام من السفر راجع

قال كفاية يا أبويا كده ارتاح

و الدكان نعمله سوبر ماركت

بضاعة مستورده و في العلب تفاح

أمشي أموري دي قرشناتي براح

و القرش يبقى ألف بدعاك كل صباح

***

أبو الحكم راح وافق و له أسباب

قال يا إمام أوعى تزعل منك ناس

كل أهل الحتة دي جيران و أحباب

زبايني صحيح حالهم على قدهم بمقاس

شفنا مع بعضنا أيام كتير و أحداث

كلامي ليك دا موش كلام و خلاص

دي وصيتي ليك قدام كل الناس

لأجل ربنا يبارك لك بدعاء الناس

***

إمام قال يابا عيب دول برضك أهلي كمان

جبنه و حلاوة و زيت وكله بسعره زي زمان

و ابتدأ مشروعه ببامبرز للعيال و شامبو للشبان

و سأل أجيب زتون سيوه و لا زتون يونان

قال يونان أحسن و هو ح يزيد عنه بكام

الجبنه رومي و نبيعها على إنها البرميسان

و الطرشي لما يكون سايب يوسخ الدكان

أجيب طرشي معبأ أحسن في برطمان

و السعر لو زاد يبقى حق العبوة كمان

و الحلاوة متغلفة بشياكة زي حلاوة لبنان

***

أما الكاتشاب دا للعيال يبقى تحلية

لما يأكلوا البطاطس في الأكياس مقلية

و ثلاجة أملاها لحوم و متجمدة الملوخية

و شيبسي و بيبسي في الكانات معبية

و صابون مستورد بريحه إنما هية

و بدل الفلايات أمشاط شسوار للخطاب هدية

و هناك على الرف دا شكولاته من المستخبية

***

و من كل نوع و صنف اتملأ الدكان

شال بقالة الأمانة و سماه كان كان

و افتتاح دعى له كل من كان له شأن

أنوار و فرقة دي جي تعزف في صوان

أبوه شاف الحال دا كله و كان زعلان

قال يا إمام اعمل حساب الغلبان

مكسب بسيط و ربنا يبارك للإنسان

رد و هو بالعصا يرقص سعيد فرحان

اللي ما معهوش ما يلزموش و أنامالي بالغلبان

أخذ عصايته و من الصوان خرج حزين زعلان

***

دخلت بنت صغيره الدكان و في أيدها نص جنيه

بسمه في عينيها تتلفت على المكان تبص عليه

قالت بابا بيقول لك تمن جبنه بس استوصى فيه

رد إمام تمن إيه هاتي جنيه و خدي لحسه به

و قولي لأبوكي ما فيش بيع له إلا لما يدفع اللي عليه

لأبويا و فوقه عشرة جنيهه طلعت تجري خايفة منيه

في السكة إتعثرت في أبو الحكم و وقعت ما بين رجليه

وطى يسمي يقومها حكت اللي حصل من ابن الإيه

عرف غلطته و وقف يفكر و دمعة ندم مليا عينيه

خدها من أيدها و رجع الدكان اللي هو ليه

فتح الثلاجة و قام كيس بالجبنة لآخره ماليه

إمام قال مالك يا با أنت إتجننت و لا إيه ؟

قال يا بني مشروعك دا خسران و الورق مش ح أمضيه

بقالة الأمانة ح ترجع و الدكان أنت صبي تشتغل فيه

لحد ما تتعلم إن التاجر الشاطر كل الناس بتدعي ليه

أبو حميد المصري الجمعة , 26 مارس, 2004

[Abouhemeed]

اللي بيتفرجوا كتير بس ما حدش بيشتري من بقالة الأمانة !

[Falcon Egypt]

السلام عليكم

الاستاذ ابو حميد

انا ميولى علميه اكثر منها ادبيه حتى دراستى وعملى بعيدان عن الادب لكن اسمح لى

انا اول مره اقراْ زجل وفى الحقيقه انبسطت جدا من الموضوع وسهولته وواقعيته

لانه فعلا ماكتبته هو مايحدث بالفعل.

تحياتى لك. :rolleyes:

[Abouhemeed]

عزيزي فالكون

أشكرك على إطرائك

أنا أيضا أمتهن مهنة بعيدة تماما عن الشعر و الأدبيات و لكن أكتب أفكاري كما تنساب في ذهني ، و غالبا ما تكون منظومة في صورة شعر أو زجل أو نثر مقفي ، و أهوى قراءة الشعر و لا أمتهنه .

أشكرك على تشجيعك

mf-:

[Salwa]

الأخ الفاضل ابو حميد المصرى ..

قرأت كلماتك .....وسرحت ..

تخيلت منظر البنت تجرى ...خوفا ...وخجلا ....

و منظر عم ابو الحكم ....يحاول اصلاح ما افسده ابنه ..

و منظر ابنه ...وطموحه ....والتغير الذى طرأ عليه ...

اعجبنى جدا ....ان الأب اتخذ قراره فى الوقت المناسب ..

لا يجب ان نصبح عبيد مشاعرنا ....لم يفكر كأب ..

فكر فقط كانسان ...

احييك أخى ...تصوير جميل ..واهم شئ ...انه حقيقة ...انه واقع..

تحياتى .

[se_ Elsyed]

أنا شامم ريحة ناس إشتراكيين

وعايزين كل حاجة ببطاقة التموين

يا ناس كفاية نوم خليكوا رأسماليين

عايزين شوية إنفتاح زي الناس التانيين

ونقب على وش الدنيا ونخلع من الدول الناميين

أيه ده انا أتعديت ولا أيه .. طب ما الشعر سهل اهو أومال مكلكعينها ليه .

[ragab2]

عمك أبو الحسن راجل من بتوع زمان

راجل دوغرى لا بتاع لف ولا دوران

بيقولوا عليه دقة قديمة ومش العوبان

واللى عاوز يمشى ويساير الشبان

بشرط لا يبيع ضميره أو يبقى مش انسان

ويفرق بين الغنى .. والفقير والراجل الغلبان

أبو الحسن راضى بقليله حتى لو جوعان

تشبعه لقمة بجبنة مع قطعة بتنجان

بيقولوا عليه عبيط أو عنده جنان

نسيوا ان القناعة كنز وركن من الايمان

والطبع يغلب التطبع ولو قاسى الحرمان

والدهب مايبقاش فالصو بمرور الزمان

[Abouhemeed]

الأخت سلوى

أتلو ما أكتبه لزوجتي و أولادي قبل أن أنشره في أي مكان لأري تعبيرات وجوههم و أتحسس مشاعرهم و أتلقى تعليقاتهم ، و تصوري أن إبنتي قالت لي تماما مثل ما قلتيه، و هو فعلا ما أقصده عندما أكتب ، أن أنقل صورة أو لقطة تترك أثرا نفسيا في القاريء قريبة لما أشعر به.

تهنئتي على حسك المرهف و أشكرك على تعليقك القيم مع تحياتي ،،،

الأخ العزيز سي السيد

و الله يا عزيزي أنا لا إشتراكي و رأسمالي و لكنني مسلم و عربي مصري شايف الأحوال و أتألم لما أصبحنا عليه و إنت عارف طبعا ما أصبحنا عليه ، و أحاول أن أشعر الناس بأن هناك قيم أغلى من المال ، قيم جعلت المجتمعات التي سبقتنا أكثر ترابطا و إنسانية أيام لما كانت الناس قلبها على بعضها ، تسامح بعضها ، و تتألم لما يؤلم الآخرين و تسعد بما تسعدهم ، فأنا عشت أواخر هذه الأيام في الحي الشعبي الذي نشأت فيه و أرى نفس هذا الحي و هو يتغير و لكن تغير لا أحبه و لكن علي أن أتعايش فيه و على الرغم من ذلك لازال هناك الناس الطيبين و أولاد هؤلاء الطيبين و اللذين على نهج آبائهم ، و لكنهم كالذهب في التراب نحتاج أن نبحث عنهم ، و عندما نجدهم نتمسك بهم ، و أشكرك على تتبعك لما أكتب ، و أدعو الله أن يديم علينا آراء سي السيد و نفحاته .

الأخ الفاضل د. رجب

إيه العظمة دي كلها

و الله لم أقرأ ما كتبته من قبل ، و تبدو أن الأفكار واحدة تقريبا

هل هذا من كتاباتك أم نقلا عن ؟

شكرا يا أستاذنا على تشجيعك المستمر