أخي المسلم صباح الخير

[اغابي]

بسيطة يا جماعة

مفيش حاجة - صدقونى - خدو الامور ببساطة - خدوها كثقافة ومعلومات

ما تقلقش يا اخويا تورنتم -

ليه يا تورنتم بتقول زميلى المسيحي واخويا المسلم -

انا جرحتنى اوى الكلمة دي - اكتر من اى كلمة تانية - بس انت اخويا سواء كنت موافق او مش موافق -

بس انا متاكدة انك اخويا هى دي الحقيقة .. بدون تعليق ..

ساعدونا يا جماعة - مش كدا

خلونا سوا نبدأ نكسر الحاجز الزجاجى اللى بينا وبين بعض وكل شوية قوته بتزيد وعامل زى الصخرة فى صلابته .

الحاجز اللى خدعنا طول السنين - احنا اه شايفين بعضنا لانه شفاف - بنقدرنشوف بعض كويس منه -

لكن مش قادرين نوصل لبعض - وكمان مش قادرين نسمع صوت بعض -

مش قادرين نساعد بعض ونمد ايدينا لانه للاسف السهل الممتنع - حاجز قوي وصلب وكل ما نقرب ونستهين بيه

ونعتقد ان مفيش حاجز ولا حاجة - نتصدم بقوة فيه تاني - وننجرح ونتكسر من جوانا -

تعالوا نكسر سوا الحاجز داه ... قبل ما يكســـــرنا هو .....

طيب اهم حاجة عندي دلوقتى - الاسئلة

وبحضر لاسئلة اخي زوهير

انتظرنى يا استاذ / زوهير - حاجاوبك على كل سؤال

تم تعديل 30 مارس 2010 بواسطة اغابي

[Alshiekh]

عزيزى الزميل المسيحى

الإخوة المسلمون

هل تعتقدون أن حوارا كهذا قد يفيد و يكون منطقيا

حوارا بين معتنقى ديانتين كل منهما يؤمن بأن الأصح للطرف الأخر الدخول فى ديانته

هل تعتقدون أن حوارا كهذا قد يفيد و يكون منطقيا و حتى لنقل ليستمر فى منتدى مثل المحاورات

قد يحدث ذلك فقط أن يستمر هذا الحوار فى إحدى حالتين لا ثالث لهما

إما أن يقتنع طرف بما يقوله الطرف الأخر و بصحة كلامه و فى حالة هذا الموضوع لا أعتقد حدوث ذلك و أنفى طبعا تهمة التبشير عن الموضوع

أو أن يكون الطرف المتلقى مكذبا لما يقال فى نفسه و لا يعلنه فتستمر عزيزى المسيحى فى سرد موضوعك و كل من يرد عليك من المسلمين مكذبا فى داخله لما تقول أو وجوب فعل ما تقول فهل يرضيك ذلك يا عزيزى المسيحى؟

قد يقول قائل إنما الموضوع نوع من معرفة أمور الأخر شريك الوطن و الحياة و التى نجهلها

و ربما يكون ذلك صحيحا

و لكن عندما نصطدم بعبارات مثل هذه

تعاليم الكتاب المقدس متفقة فيما بينها تماماً .... ولها اتجاه واحد هو إعلان مقاصد الله للبشر....

من يقرأ توراة موسى ونظام الذبائح والرموز يدرك قصد الله من حيث نعمته إلى ذلك المخلص .... وهكذا فصل الله بين الوثنية واليهودية واختار شعباً يأتي منه المخلص لجميع الأمم.... وفعلاً جاء السيد المسيح من امرأة عذراء وكما تنبأ عنه الأنبياء في التوراة والزبور.

و تذكر يا عزيزى المسيحى أنك من بدأت بعرض موضوعك للمسلم و بدأت توجيه كلامك له

فالمسلمين يؤمنوا أن مقاصد الله للبشر هى- حاليا- هى ما جاء بالقرأن و أن من بعث لجميع الأمم هو رسولهم.

و هنا هل سيتحول الموضوع لحوار أديان و مناقشة هذه الأمور

أم أن على المسلم أن يقرأ هذه الكلمات و يمررها بدلوماسية حتى لا يكون متشددا متشنجا ذو تدين هش.

أم أن على المسلم أن يكون لديه غيرة تجعله يقف عند كلمات كهذه.

أنا فغلا كمسلم محتار

و لكنى كواحد من المسلمين الذين بادرت بخطابهم يا عزيزى المسيحى لا أستطيع تمرير كلمات كهذه دون الوقوف عندها و أناشدك يا شريك الوطن أن يكون تعطنا الفكرة عنكم دون الدخول فى العقائد.

عزيزى الفاضل / 'tantrum'

منتدانا يسمى محاورات المصريين ( مسلمين ومسيحيين واتباع اى دين او ملة أخرى )

ومن الحق الجميع ان يعرف بدينه لاخوانه ( المصريين )

ولو لم يعحبك او لو لم يكن لديك ميل ان تتعرف على دين ( الآخر ) ، فالامر يرجع لك ويمكنك ان تقرأ شيئا آخر

ولكن اذا كان هناك آخرون متشوقون للمعرفة والتعرف على دين ( الآخر ) فلا يحق لك ان تأتى " وتقلب الترابيزة " وتسأل هل يفيد مثل هذا الحديث .

لست وصيا على احدا وليس من حقك ان تتسائل عن جدوى الحديث وعن الاهداف الخفية او المعلنة من ورائه .

هناك اعضاء يعجبهم الموضوع لانهم يحبون ان يستمعوا للغير حتى يتعلموا ، وهناك اعضاء لايحبون ان يسمعوا الا لانفسهم ، فدع من يحبون الاستماع للغير ان يستمتعوا بما يحبون .

[محمد الششتاوي]

عندي سؤال ممكن يكون ساذج

سمعت ان

ان القس بيرش مية على الحضور في الكنيسة من زجاجة

ايه مدى صحة المقولة دي , ولو صح ايه المية دي وايه غرضها؟

[fatfouta]

ساعدونا يا جماعة - مش كدا

خلونا سوا نبدأ نكسر الحاجز الزجاجى اللى بينا وبين بعض وكل شوية قوته بتزيد وعامل زى الصخرة فى صلابته .

الحاجز اللى خدعنا طول السنين - احنا اه شايفين بعضنا لانه شفاف - بنقدرنشوف بعض كويس منه -

لكن مش قادرين نوصل لبعض - وكمان مش قادرين نسمع صوت بعض -

مش قادرين نساعد بعض ونمد ايدينا لانه للاسف السهل الممتنع - حاجز قوي وصلب وكل ما نقرب ونستهين بيه

ونعتقد ان مفيش حاجز ولا حاجة - نتصدم بقوة فيه تاني - وننجرح ونتكسر من جوانا -

تعالوا نكسر سوا الحاجز داه ... قبل ما يكســـــرنا هو .....

عندك حق وكمان انا شايفة اننا بنكسر حواجز كتير غير النفسية

حواجز عدم فهمنا لبعض

حواجز التطرف سواء هنا او هنا

حواجز الحساسية اللى بيننا

حواجز اشعال الفتنة بيننا

نفسى كل ده مايبقاش موجود

انتى جميلة يا اغابى انتى وسكوب وجو كملوا ياللا بسمع بكل حب ليكم ولاخوانى واخواتى المسيحيين

تم تعديل 30 مارس 2010 بواسطة fatfouta

[Scorpion]

الحلفان "القسم" في المسيحية

مع اني يا زهيري سؤالك بتاع لستة اسامي اللي داخلين الجنة و اللي داخلين النار ده رديت عليه كذا مرة في كذا موضوع .. بأمارة مثال السامري الصالح و اللي بيثبت بشكل قاطع ان الجنة في المسيحية و من اقوال السيد المسيح نفسه مش قاصرة علي حد او طايفة معينة انما بالأعمال ... لكن انا متفهم عامل السن و النسيان بقي .. فحسيب الفاضلة أغابي ترد عليك يمكن تحصل المعجزة و تقتنع المرة دي ...

و أوفر المداخلة دي لعضوة عزيزة و غالية عالكل ..

معلش يا سكوربيون قديكون سؤالى نابع عن سوء فهم

زماااااااااااااان أيام الطفولة كان لى صديقة مسيحية ومش فاكرة ايه الحوار بالظبط لكن المهم انى حلفت بالله على حاجة مش فاكراها فقالت لى بالحرف "احلفى بحاجة عدلة"

هل القسم بالله فى عقيدتكم ليس كافياً؟؟؟ و الا البنت دى كانت بتهبل؟؟؟

و مين مارى جرجس اللى باسمع ساعات حلفانات بيها؟؟؟؟؟؟

و فيه جملة ساعات باقراها على العربيات هل من الانجيل؟"إن الرب معى فلا يعوزنى شئ فهو على يمينى فأنا لا أتزحزح"

و سؤال بالغ الحساسية أرجو أن يمر بسلام (و يا رب ما يفتحش علية فاتوحة انا لا بتاعة فتنة طائفية و لا غيره بس و الله الكلام ده حصل فعلاً)

جارة أختى مسيحية و فى حوار جدلى عقيم بينها و بين أختى قالت لها بالحرف انها تفضل ان يحكم اليهود مصر على أن يحكمها المسلمون

مع ان حتى فى عقيدتكم كان اليهود أكثر الناس إيذاءً للمسيح... طيب ليه مشحونين كده من المسلمين؟ و الا دى كمان جاهلة و بتهبل؟ هل هى عقدة الفتح العربى؟؟؟؟

شكراً

نبتدي بالحلفان .... موضوع صديقتك ده غريب بجد .. لأنها يا إما عبرت عن رأيها بطريقة غلط و بدال ما تقوللك احلفي علي حاجة عدلة قالتلك احلفي بحاجة عدلة ... و شتان بين المعنيين ... او انها للأسف "غبية" أو " بتهبل" زي ما قلتي لأن بالطبع من المؤكد ان القسم بالله هو أقدس قسم ممكن انسان يحلف بيه ... و هنا يتشارك المسيحي العادي مع المسلم العادي في الموضوع ده .. لأنه بييجي طبيعي ...

لكن لو دورنا في الأنجيل حتلاقي انه محرم بتاتآ أي نوع من انواع الحلفان ,,, يعني لو مسيحي من اللي هو المفروض انه عمره ما يحلف ... لأن ده طلب السيد المسيح نفسه ...

نبتدي بالتسلسل ...

في العهد القديم كان مسموح بالحلفان .. لكن يا ويله اللي يحلف كذب ... و الوصية التالتة من الوصايا العشر التي نؤمن بأن الله قد سلمها لموسي النبي تقول :

"لا تنطق باسم الرب إلهك باطلاً. لأن الرب لا يُبرئ من نَطقَ باسمه باطلاً."

و في سفر اللاويين ويقول

"ولا تحلفوا باسمي للكذب فتدنس اسم إلهك. أنا الرب"

وفي سفر العدد يقول

"إذا نذر رجلٌ نذراً للرب أو أقسمَ قَسَماً أن يُلزم نفسه بلازمٍ فلا ينقض كلامه. حسب كل ما خرج من فمه يفعل."

من هذه الآيات نعرف أن الله يريد أن يعلّم شعبه كيف يبجل اسمه... فلا ينطقون أو يحلفون به باطلاً أو كذباً ... و من يفعل هذا يُدنس اسم الرب.

والآن كيف أكمل السيد المسيح هذه الوصية ولماذا نحن لا نحلف في العهد الجديد؟

في إنجيل متى يقول السيد المسيح

"أيضاً سمعتم أنهُ قيل للقُدَماءِ لا تحنث بل أوفِ للرب أقسامك. وأما أنا فأقول لكم لا تحلفوا البتَّة. لا بالسماءِ لأنها كُرسيُّ الله. ولا بالأرض لأنها مَوطِئُ قدميهِ. ولا بأورشليم لأنها مدينة الملك العظيم. ولا تحلف برأسك لأنك لا تقدر أن تجعل شعرةً واحدةً بيضاءَ أو سوداءَ. بل ليكن كلامكم نعم نعم لا لا. وما زاد على ذلك فهو من الشِّرّير"

لأن المفروض ان الكلام بين الناس يكون صادق بدون كذب او خداع و عليه فلا حاجة لأي حلفان ...

ده المفروض يعني ...

و اللي بتطلبه المسيحية من اتباعها ....

بس تلاقي فين المثالية دي دلوقتي ؟؟؟؟

سؤال أتركه بلا اجابة ...

ده كان الرد الجزء الأول من مداخلتك ... اشرب كوباية ميه و ارجع ارد عالباقي

تم تعديل 31 مارس 2010 بواسطة Scorpion

[MZohairy]

انا مش شايف اي شيئ غير طبيعي يا اخواني في ردود الأفعال

تقوقع الاخوه المسيحيين جعل من كل ما يخص عقائدهم كالغرف المظلمه

و بالتالي من عاش فتره كبيره في ظلام ...ضوء الشمس المفاجئ بيزعجه بشده مهما كان ضعيف

و شويه شويه بيتعود و يشوف بشكل طبيعي و بدون اي انزعاج

عايز اعرف الرد على سؤالي لو سمحتوا من باقي الافراد

شكرا

[الدكتورة أم أحمد]

لأن المفروض ان الكلام بين الناس يكون صادق بدون كذب او خداع و عليه فلا حاجة لأي حلفان

...

الجملة دي جاءت في الوقت المناسب

وأكيد فيه من أقوال المسيح والانجيل ما يحض على الصدق وتحريه

وأنا سمعت إن فيه اعتكاف في النصرانية

فكيف ذلك؟؟؟

[Scorpion]

لأن المفروض ان الكلام بين الناس يكون صادق بدون كذب او خداع و عليه فلا حاجة لأي حلفان

...

الجملة دي جاءت في الوقت المناسب

وأكيد فيه من أقوال المسيح والانجيل ما يحض على الصدق وتحريه

وأنا سمعت إن فيه اعتكاف في النصرانية

فكيف ذلك؟؟؟

مع اني سألت بعد الجملة دي : فين المثالية دي دلوقتي ؟

لكنني زي ما قلت بحب اللعبة الحلوة ...

و المداخلة دي كده بالظبط ....

بالنسبة للأعتكاف ... شوفي حضرتك ...

فيه سؤال لزهيري ... و بقية اسئلة الفاضلة كروسفيلد .. و سؤال للشيشتاوي ... ان شاء الله اول ما يترد عليهم ... حيبقي ليا الشرف اني اتكلم مع حضرتك عن معني الأعتكاف في المسيحية ...

تحياتي

[fatfouta]

لأن المفروض ان الكلام بين الناس يكون صادق بدون كذب او خداع و عليه فلا حاجة لأي حلفان

...

الجملة دي جاءت في الوقت المناسب

وأكيد فيه من أقوال المسيح والانجيل ما يحض على الصدق وتحريه

وأنا سمعت إن فيه اعتكاف في النصرانية

فكيف ذلك؟؟؟

عزيزتى الدكتورة ام أحمد بجد انا سعيدة جدااااااااااا

[Scorpion]

مارجرجس "جورجيوس"

و مين مارى جرجس اللى باسمع ساعات حلفانات بيها؟؟؟؟؟؟

مار جرجس ( القديس جرجس ) يا عزيزتي قد يكون أشهر قديس في المسيحية و اكثرهم شعبية .. سواء في مصر .. أو في الشرق .. أو في الغرب ...

في مصر بين البسطاء يعرف ايضآ باسم جورجيوس ... و في الغرب سان جورج ..

و هو قديس اختلطت في سيرته التاريخ و الأسطورة ... و نسبت اليه معجزات كثيرة جدآ .... و مازال ملجأ كثيرآ من طالبي الشفاعة ...

تاريخيآ مارجرجس ولد بفلسطين سنة سنة 280 في بلدة اللد ( بين يافا والقدس) ونشأ نشأة متدينة في أسرة مسيحية .... و عندما بلغ السابعة عشرة انخرط في سلك الجندية... في كتيبة الخيالة ( سلاح الفرسان )...

وسرعان ما اظهر براعة في اداء دوره الحربي ... فتمت ترقيته حتى رتبة مقدّم ( في تلك الحقبة كانت تعني قائد ألف) ... و تم تعيينه في الحرس الامبراطوري في نيقوميدية العاصمة الشرقية للدولة.

في تلك الفترة أثار الامبراطور ديوقلسيانوس اضطهاداً عنيفاً على المسيحيين...وأصدر بذلك منشوراً أمر بتعليقه على جدران البلاط الملكي.

دفعت الحمية مار جرجس و هو القائد الشاب (كان في الثالثة والعشرين من عمره) ... فأقدم على تمزيق المنشور.... فثار غضب الامبراطور... وأمر باعتقاله ...

ثم أنزل فيه أفانين العذاب والتنكيل لدفعه إلى الندامة...واستغفار الآلهة والتضحية لها...فلم يتراجع الشاب... ورفض أن يشرك بربه ... و استمر هذا الأمر فترة طويلة و في النهاية لم يسع الامبراطور الا بأن يأمر بقطع رأسه.

فترة تعذيبه تلك و سجنه الذي دام سبع سنوات حتي لحظة قطع رأسه .. نسبت اليها كثيرآ من الأحداث .. و المعجزات الخارقة التي يصدقها البعض ... و يعتبرها البعض الآخر ضربآ من الأسطورة التي تكونت حول تمرد ظابط شاب متسلحآ بايمانه فقط ضد امبراطور رهيب بكل جبروته .... تواردت بها صنوف التعذيب و الكرامات و المعجزات التي قام بها خلال تلك الفترة و التي وصلت الي حد قتله لتنين لينقذ ابنة الملك .. و ان كانت بالطبع مجرد قصة رمزية يرمز فيها التنين الي الشيطان و ابنة الملك الي الكنيسة ... و لكن الثابت انه في خلال عصيانه هذا و فترة تعذيبه تحول كثيرآ جدآ من الشعب من الوثنية الي المسيحية بسببه ...

وقد اشتهر صيت الشهيد... وانتشر تكريمه فور استشهاده ... بدليل أن الامبراطور قسطنطين الكبير أقام في عاصمته الجديدة القسطنطينية كنيسة فخمة على اسم القديس جرجس... ونقل إليها بعض ذخائره ولم يكن قد مرّ على استشهاده ثلاثون سنة. وينسب إلى قسطنطين أيضآ بناء كنيسة اللّد مسقط رأس الشهيد.

و يذكر انه تم نقل جسده إلى مصر فى عهد الأنبا غبريال البطريرك رقم (68) .. ومازالت رفاته حتى الآن فى كنيسة رئيس الملائكة الجليل ميخائيل - الرمل الأسكندرية

أما بالنسبة "للحلفانات بيه" ... فأرجوكي قراءة مداخلتي السابقة حول الحلفان في المسيحية ...

فاصل و نواصل بقية الأسئلة

[Abu Reem]

سالت السؤال ده من قبل في مواضيع اخرى ولم يجاوبني احد

على العموم تحية للأخ سكوربيون على سعة صدره وعلى طرحه لهذا الموضوع..لكي نتعلم ونتعرف أكثر على ما قد يدور في أذهاننا من أسئلة

ارجع لسؤالي:

ما هو مفهوم الحساب بعد الموت بالنسبة للمسيحين : هل هناك سؤال في القبر ؟ وما هي مراحل يوم الحساب؟

وهل هناك جنة ونار...؟ يعني هل العصاة او اصحاب الكبائر او الذنوب او المعاصي الكبير..سيدخلون النار...ليعذبوا فيها...وهل هناك خلود فيها أم لا؟؟؟؟ أم أن هناك مغفرة للجميع عند الحساب؟

ياريت حد يشرح لي المسائل دي بطريقة بسيطة مفهومة وباختصار..

تحياتي لكم جميعاً ،،،،

[pink rose]

هو مش انتوا قولتوا ناجل الاسئلة لبعد الاسبوع دا

ايه بقى رجعتوا في كلامكم ليه؟؟؟؟؟؟؟

[Scorpion]

عندك حق يا مدام remo ...

ده كان الطلب ....

بس ساعات الواحد ما بيقراش كل المداخلات في الموضوع .. فعلشان كده احتمال الأخوة الأعزاء ما خدوش بالهم منه ...

و بالتالي اشكرك علي تذكيرك ده ...

الواحد كان محرج بصراحة ...

[doha]

اسال يعني ولا مسألش ؟

انا خايفه اسأل تقولوا لي ده موضوع عن الاعياد والمناسبات المسيحيه فمعليش مش هنقدر نرد .. بس ابص الاقي الكل جاي بسؤال والحمد لله الناس بترد اهيه وبرضه الحكومه بذات نفسيها قالت :

ومن الحق الجميع ان يعرف بدينه لاخوانه ( المصريين )

ولو لم يعحبك او لو لم يكن لديك ميل ان تتعرف على دين ( الآخر ) ، فالامر يرجع لك ويمكنك ان تقرأ شيئا آخر

عن نفسي قلت قبل كده معنديش اي مشكلة في الحديث عن المسيحيه كدين وعقيده وليس فقط تواريخ مناسبات .. بس المشكلة اني خايفه اعامل الموضوع ده على انه مفتوح لذلك ثم يتضح انه لغير ذلك ..

هل هو خروج عن الموضوع لو سألت في المعتقدات والفروق والايمانيات ولا هبقى كده في داخل الموضوع بذاته ؟

[اغابي]

مرة أخري ... الآخر في المسيحية

سؤال صغير

ما هي رؤيتكم و وجهة نظركم في الآخر؟ (الغير مسيحي)

سواء كان يعتنق ديانه سماويه او غير سماويه (حسب معتقدكم)

هل تعتقدون بدخوله النار في الحياة الآخرة ؟ و كيف اوصاكم دينكم بالتعامل معه في الدنيا؟

شكرا

انا اسفة جدا على التأخير يا استاذ زوهير كنت بطبخ

وكمان رحت كام مشوار وكنت حاعمل حادث بعربيتى بس ربنا ستر واهم حاجة ان العربية لسة سليمة

نقسم الاجابة لجزئين

الجزء الاول

السيد المسيح اعطانا امثلة كتير تدل على ان الانسان الكويس باعماله وصدق نيته امام الله - فقط هى جواز مروره للجنة

يقول الكتاب المقدس :

ليس كل من يقول لي يارب يارب يدخل ملكوت السموات ( مت 7 )

مش معنى انى مسيحية وعلطول شغالة يارب وصلاه يبقي حادخل الجنة وزوهير لاء

مثال السامرى الصالح

قصة جميلة نتاملها – هو حوار بين السيد المسيح اثناء ما كان بيعلم الناس فراح واحد من اللى تبع الشريعة يهودي ساله

ملحوظة :اعتقد ان سؤاله يشبه سؤالك يا زوهير

-واذا ناموسي قام يجربه قائلا يا معلّم ماذا اعمل لارث الحياة الابدية. 26 فقال له ما هو مكتوب في الناموس.كيف تقرأ. 27 فاجاب وقال تحب الرب الهك من كل قلبك ومن كل نفسك ومن كل قدرتك ومن كل فكرك وقريبك مثل نفسك. 28 فقال له بالصواب اجبت.افعل هذا فتحيا. 29 واما هو فاذ اراد ان يبرر نفسه قال ليسوع ومن هو قريبي. 30

-

فأجاب يسوع وقال إنسان كان نازلاً من أورشليم إلى أريحا فوقع بين لصوص فعروه وجرحوه ومضوا وتركوه بين حي وميت فعرض أن كاهناً كان نازلاً في تلك الطريق فرآه وجاز مقابله وكذلك لاوي أيضاً إذ صار عند المكان جاء ونظر وجاز مقابله ولكن سامرياً مسافراً جاء إليه ولما رآه تحنن فتقدم وضمد جراحاته وصب عليها زيتاً وخمراً وأركبه على دابته وأتى به إلى الفندق واعتنى به وفي الغد لما مضى أخرج دينارين وأعطاهما إلى صاحب الفندق وقال له اعتن به ومهما أنفقت أكثر فعند رجوعي أوفيك فأي هؤلاء الثلاثة صار قريباً للذي وقع بين اللصوص فقال الذي صنع معه الرحمة فقال له يسوع اذهب أنت أيضاً واصنع هكذا. لو10: 25 – 37

بعد قراءة النص يسوع المسيح اراد ان يحكى قصة للناموسي كمثال ففى القصة الشخص الأول هو رجل دين والثاني هو خادم في بيت الله, ولكن الشيء المؤسف هو أنه مر بجانبه ولم يكلف نفسه بالتوقف قليلاً والنظر إلى جراحاته أو على الأقل طلب المساعدة من الناس لكي يساعدوه ولكنه تجاوزه بكل بساطة والثاني وقف ونظر لجروحه ولكنه لم يكن سوى فضول إذ لم يحرك ساكناً ولكن الشخص الثالث وهو سامري ( و السامريين فصيل من اليهود وهم أعداء مع اليهود وما كنوش يتعاملوا مع بعض )) ولكننا نرى هنا أن هذا السامري قد وقف ونظر للشخص المضروب وليس هذا فقط بل أجرى له الإسعافات الأولية وأوصى صاحب الفندق بالاعتناء به ريثما يعود ودفع الثمن أيضاً إن هذه السلسلة من الأعمال تدل على محبة هذا السامري لهذا اليهودي حيث أنه خالف كل التوقعات فربما كنا نتوقع أن يقضي عليه عندما يراه ملقى على الأرض بسبب العداء الشديد بينهم بل أحب عدوه واعتنى به , إن هذه الأعمال كانت متوقعة من رجل الدين الشخص الأول الذي من واجباته أن يعلم الناس التعامل بالرحمة والشفقة اتجاه بعضهم البعض وكذلك الاوي الذي تعتبر خدمته جزء من عمل بيت الله ولكنهم فاجئونا بتصرفهم هذا ولم يفعلوا شيئاً. يا ترى ماذا يمكن أن نتعلم من عن محبة القريب؟ هل كلمة قريب تعني الناس ذوي القربى الدموية فقط؟ ماذا لو أن عدوك عمل معك هذا مثلما عمل هذا السامري ما موقفك اتجاهه؟ إن قريبك ليس فقط الناس اللذين ترتبط معهم برباط القربى بل يمكن أن يكون هذا القريب شخص لا تتوقع أن يساعدك بشيء وفجأة تتحول العداوة إلى محبة وصداقة هل عندك الاستعداد للتعامل مع عدوك مثلما فعل هذا السامري؟

ما اقدرش احكم عليك انك مش كويس او حتدخل النار او الجنة – هذا من اختصاص الله فقط

الجزء الثاني

لا يجوز فى المسيحية التعالى والتظاهر والتكبر لان من منطق التكبر والتعالي احكم على الآخرين بدخولهم الجنة او النار لان السيد المسيح يطلب منا ان لانتظاهر بأعمالنا حتى لا نقع فى فخ تجربة الشيطان وحب التكبر والظهور والتعالى ...

يقول الكتاب المقدس :

اولا : عن الصدقة :

أَمَّا أَنتَ، فإِذا تصَدَّقْتَ، فلا تَعلَمْ شِمالُكَ ما تَفعَلُ يَمينُكَ،

لِتكونَ صَدَقَتُكَ في الخُفْيَة، وأَبوكَ الَّذي يَرى في الخُفْيَةِ يُجازيك( مت 6 )

ثانيا : عن الصلاه

فإِذا صَلَّيْتَ فادخُلْ حُجْرَتَكَ وأَغْلِقْ علَيكَ بابَها وصَلِّ إِلى أَبيكَ الَّذي في الخُفْيَة، وأَبوكَ الَّذي يَرى في الخُفْيَةِ يُجازيك

( مت 6 )

ثالثا : عن الصوم

أَمَّا أَنتَ، فإِذا صُمتَ، فادهُنْ رأسَكَ واغسِلْ وَجهَكَ،

لِكَيْ لا يَظْهَرَ لِلنَّاسِ أَنَّكَ صائم، بل لأَبيكَ الَّذي في الخُفْيَة، وأَبوكَ الَّذي يَرى في الخُفْيَةِ يُجازيك. ( مت 6 )

طيب بعد كل الكلام داه يا استاذ زوهير يبقي ازاى انا بقي اقدر احكم عليك وادين الناس - انك مش حتروح الجنة وحتروح النار

مفيش حد يقدر يقول انا اكيد حادخل الفردوس والا يبقي بكده وقع فى فخ الكبرياء

لازم تكون منسحق امام الله

" كن ساهرا و شدد ما بقى الذى هو عتيد ان يموت لانى لم اجد اعمالك كاملة امام الله " ( رؤ 3 : 2

ومن هنا اجتهد انك تخلص نفسك اولا قبل ان تحاكم الاخرين ولتكن اعمالك كاملة امام الله واشعر دائما انك منسحق وخاطىء .

الكتاب المقدس اعطانا امثلة لناس قضوا حياتهم مع الله ولكن سقطو – وكان سقوطهم عظيما – مثال يهوذ كان من تلاميذ يسوع المسيح الاثنى عشر تلميذ ومع ذلك باعه لليهود ..يقول الكتاب المقدس

متى26: 14- 15

14 حينئذ ذهب واحد من الاثني عشر الذي يدعى يهوذا الاسخريوطي إلى رؤساء الكهنة.

15 وقال ماذا تريدون أن تعطوني وأنا أسلمه إليكم، فجعلوا له ثلاثين من الفضة.

وامثلة لناس بعيدين عن الله طول حياتهم ومع ذلك اول من دخلوا الفردوس ( الجنة )

مثال اول واحد دخل الفردوس كان اللص اليمين المعلقة فوق الصليب –

يقول الكتاب المقدس :

الحق أقول لك إنك اليوم تكون معي في الفردوس" (لو 23: 43). هذا اللص كان يعير السيد المسيح مع زميله، كما ذكر القديسان متي ومرقس (مت 27: 44، مر 15: 32). ثم عملت النعمة، وبدأ قلبه يتغير وهو علي الصليب. فلما رأي زميله يجدف علي المسيح "انتهره

اعتقد انت نفسك يا استاذ زوهير لو كان صدفة قابلت اللص ديماس ودا مش من دينك وبس لاء وكمان لص كنت حتفكر يا ترى فى اللحظة دى هل حيدخل الجنة ولا النار – فكر مع نفسك كدا ؟؟ – ورغم ذلك كان اول واحد دخل الجنة

مش عاوزة اطول عليك لكن عندنا امثلة تانى لناس اتغيرت حياتهم زي شخص اسمه موسي الاسود كان مجرم وقاتل وسارق وسكير واتحول الى قديس وشخص اسمه اغسطينوس كان ليه تاريخ فى الشر طويل اتحول لقديس -

وخدو الكليب داه هدية منى

http://www.youtube.com/watch?v=NMyxMEXz37c

فاصل ونواصل باقى الاسئلة

معلش يا استاذ كامل اصلى بحب الاسئلة جدا

بس مش مشكلة ممكن حضرتك تكمل عادي اسبوع الالام

[MZohairy]

متشكر جدا يا أغابي

ميل ميرسي

و احب اوضح للفاضله الأخت ضحى ان الأسئله كلها متاحه حسب ما فهمت بشرط عدم الجدال و تحويلها لمناظرة بين الأديان

ده اللي انا فهمته و الله اعلم

شكرا مره اخرى

[اغابي]

اسال يعني ولا مسألش ؟

انا خايفه اسأل تقولوا لي ده موضوع عن الاعياد والمناسبات المسيحيه فمعليش مش هنقدر نرد .. بس ابص الاقي الكل جاي بسؤال والحمد لله الناس بترد اهيه وبرضه الحكومه بذات نفسيها قالت :

ومن الحق الجميع ان يعرف بدينه لاخوانه ( المصريين )

ولو لم يعحبك او لو لم يكن لديك ميل ان تتعرف على دين ( الآخر ) ، فالامر يرجع لك ويمكنك ان تقرأ شيئا آخر

عن نفسي قلت قبل كده معنديش اي مشكلة في الحديث عن المسيحيه كدين وعقيده وليس فقط تواريخ مناسبات .. بس المشكلة اني خايفه اعامل الموضوع ده على انه مفتوح لذلك ثم يتضح انه لغير ذلك ..

هل هو خروج عن الموضوع لو سألت في المعتقدات والفروق والايمانيات ولا هبقى كده في داخل الموضوع بذاته ؟

ازيك يا doha - شكرا لمداخلتك - انا فرحانة بوجودك جدا جدا

اولا موضوع الفروقات الايمانية كسؤال حاليا انا فى راى سابق لاوانه لكن حنجيله ضرورى بس قدام شوية - انا حاقولك ليه -

من ناحية الاسئلة - لو تلاحظى انا جاوبت على الاسئلة فقط اللى كانت بتناسب موضوع الشرح وقتها زى سؤال جاسمين عن صديقتها كان له علاقة

بالصوم الكبير 55 يوم ومش حنخرج بيه بعيد عن الموضوع نفسه بالعكس انا دخلته وسط الشرح - علشان كدا اجلت اجابة سؤال زوهير وجاوبت على ياسمن - وبعد ما اتكلمنا شوية عن الصوم الكبير

جه وقت الرد على سؤال زوهير لانه ما خرجش بعيد اوى - فى جزء فى سؤاله مرتبط بالصفات السيئة واهمها التكبر الادانة والحكم على الاخرين - يعنى ادين الناس واحكم مين حيدخل الجنة ومين حيدخل النار - وطبعا دى صفات الواحد لما يحس انها حتتملكه خلاص بيحاول فرصة فى الصوم الكبير انه يصلى امام الله ويطلب انه يساعده ويتغير - ويبقى انسان جديد

سؤالك مهم يا doha جدا بس اجابته حتاخد مجهو ووقت - حقولك مثال - لو انت ساكنة فى عمارة وشقتك فى الدور الخامس

علشان توصلى لغرضك وهو الدور الخامس لازم حتعدي الاول على الدور 1 و 2 و 3 و 4 وبعدين توصلى لشقتك

فعلشان انا اجاوب على الاسئلة دي يبقي لازم الاول اخلص من الدور 1 و 2 و 3 و 4

شوية شوية بهدوء واوعدكم مفيش سؤال اتسال مش حيتجاوب عليه بس دلوقتى الاستاذ سكوريبون يتكلم شوية عن اسبوع الالام

علشان نبقي ماشين بتسلسل وما ننشننش بعيد عن الموضوع الاصلى وكمان علشان ترتيب الافكار بنظام يبقي احسن

وعلى فكرة يا جماعة اهم حاجة تركزو انتم عليها انكم تقروا كل كلمة بتتكتب بتركيز - لانه يمكن تلاقوا اجابة لسؤال كنتم حتسالوه او يمكن تلاقو سؤال جديد فجأه عاوزين تسالوه .

يا جماعة انا واستاذ سكوريبون اهم حاجة عندنا الاسئلة

مهمة جدا اسئلتكم وبكرر - لان الاسئلة دي هى اللى بيها حندخل الغرف المظلمة ونشوف الاسرار اللى جواها ونبش ونفتش ونعرف كل حاجة مع بعضنا

كل سؤال حيترد عليه

فاصل ونواصل

:blink:

[عنبو]

يعنى ايه يعنى

هو انا عضو سوبر اونطه بقى

ولماذا تختلف اماكن رسم الصليب فى اليد ؟

ولماذا تختلف ايضاً اشكال الصليب ؟

السؤلين دول لم يتم الاجابه عليهم

[محمد الششتاوي]

طالما الاسئلة كلها متاحة وفيه رقابة على الموضوع يبقى نسئل

احب اسئل مبدئيا

حكم الدين المسيحي في الخارج عن الدين المسيحي؟

في الاسلام , حكم الخارج عن الدين الاسلامي هو القتل , كيف ترون ذلك؟

السؤال الي مش ممكن الاجابة عليه , كأنه ماتسئلش.. :blink:

تم تعديل 31 مارس 2010 بواسطة محمد الششتاوي

[صبح]

عزيزى الزميل المسيحى

الإخوة المسلمون

هل تعتقدون أن حوارا كهذا قد يفيد و يكون منطقيا

حوارا بين معتنقى ديانتين كل منهما يؤمن بأن الأصح للطرف الأخر الدخول فى ديانته

هل تعتقدون أن حوارا كهذا قد يفيد و يكون منطقيا و حتى لنقل ليستمر فى منتدى مثل المحاورات

قد يحدث ذلك فقط أن يستمر هذا الحوار فى إحدى حالتين لا ثالث لهما

إما أن يقتنع طرف بما يقوله الطرف الأخر و بصحة كلامه و فى حالة هذا الموضوع لا أعتقد حدوث ذلك و أنفى طبعا تهمة التبشير عن الموضوع

أو أن يكون الطرف المتلقى مكذبا لما يقال فى نفسه و لا يعلنه فتستمر عزيزى المسيحى فى سرد موضوعك و كل من يرد عليك من المسلمين مكذبا فى داخله لما تقول أو وجوب فعل ما تقول فهل يرضيك ذلك يا عزيزى المسيحى؟

قد يقول قائل إنما الموضوع نوع من معرفة أمور الأخر شريك الوطن و الحياة و التى نجهلها

و ربما يكون ذلك صحيحا

و لكن عندما نصطدم بعبارات مثل هذه

تعاليم الكتاب المقدس متفقة فيما بينها تماماً .... ولها اتجاه واحد هو إعلان مقاصد الله للبشر....

من يقرأ توراة موسى ونظام الذبائح والرموز يدرك قصد الله من حيث نعمته إلى ذلك المخلص .... وهكذا فصل الله بين الوثنية واليهودية واختار شعباً يأتي منه المخلص لجميع الأمم.... وفعلاً جاء السيد المسيح من امرأة عذراء وكما تنبأ عنه الأنبياء في التوراة والزبور.

و تذكر يا عزيزى المسيحى أنك من بدأت بعرض موضوعك للمسلم و بدأت توجيه كلامك له

فالمسلمين يؤمنوا أن مقاصد الله للبشر هى- حاليا- هى ما جاء بالقرأن و أن من بعث لجميع الأمم هو رسولهم.

و هنا هل سيتحول الموضوع لحوار أديان و مناقشة هذه الأمور

أم أن على المسلم أن يقرأ هذه الكلمات و يمررها بدلوماسية حتى لا يكون متشددا متشنجا ذو تدين هش.

أم أن على المسلم أن يكون لديه غيرة تجعله يقف عند كلمات كهذه.

أنا فغلا كمسلم محتار

و لكنى كواحد من المسلمين الذين بادرت بخطابهم يا عزيزى المسيحى لا أستطيع تمرير كلمات كهذه دون الوقوف عندها و أناشدك يا شريك الوطن أن يكون تعطنا الفكرة عنكم دون الدخول فى العقائد.

أتفق تماما مع وجهة نظرك وأعتقد أننا لو فتحنا موضوع مماثل عن وجهة نظر الإسلام لمن يدين بغير الإسلام بعد رسالة سيدنا محمد صلى الله عليه وسلم سيتم غلقه فورا

تم تعديل 31 مارس 2010 بواسطة صبح