أيه أحلى مطعم في وجهة نظرك ، وأحلى أكله أكلتها فيه ؟

[mekkawy]

يا ريت يا جماعة الخير الله يرضى عليكم ذكر تفاصيل عناوين مطاعم الرياض و جدة

و الرياض بسرعة لأني ماشي منها خلال شوية و عاوز اخلص على مطاعمها قبل ما أمشي و أنا مش ضليع في الطرق أوي فيا ريت وصف الناصح لأخوه الأعمى

كمان بأة و خصوصاً الجدع بتاع العصير و الايس كريم اللي عنده صنف لبناني ده و الناس هنا شكرت فيه أوي .. منكن حد ينجزلي عشان جعان و مجوع العيال و أمهم عما أعرف اماكن المطاعم للوفاء بالاتفاقية المزعومة و هي الغداء أو العشاء برة من يوم لآخر

مكاوى .. قال يغدونا قال

[الغريب]

للأكل.. قصدي للرفع :closedeyes:

[طبيبة بالخارج]

المشويات و صنف المحاشي في مطعم الصفواني بالابراهيمية الاسكندرية

الأكل فيه روعة خصوصا المحشيات كأنها معمولة بالبيت

اما بالنسبة للدمام فول الجلابة مع عيش التميس من فوال نور الصباح اللي قدام مستشفى الدمام المركزي

و الجمبري المشوي من محل الشوي اللي امام باب سوق السمك مع مخلل الباذنجان

[wolfire]

السلام عليكم

تقريبا في مصر اكتر من مكان بصراحة لان الاخ محددش اكلة معينة فا في اكلات كتير تختلف

بلنسبة للاكلات البحرية قدورة في اسكندرية

بلنسبة للحوم والمشويات . الرفاعي في السيدة زينب

بلنسبة للكشري اكيد ابو احمد شنبليون باين

ده داخل مصر .. اما خارج مصر فا هم كتير

الشوكة الذهبية في دبي اسماك

مطعم النجمة على الكورنيش طنجة المغرب

البسبور التركي مدينة جوانجو الصين

مطعم اجلار كباب جوك شدرا تركيا

دي المطاعم اللي اكلت فيها وممتاذة

[ام لبناتى]

بصراحة شديدة انا جعت جدا بس هاعترف قصدى هافتكرررررررررررر

طبعا الفولعند الجحش فالسيدة زينب

اما كبدة هوهو فغير بتاع 26 يوليو اللى جنب محل 205 دة فى واحد فالجيزة برضه عليه ضرب نار عند مكتب البريد

اسكندرية بقى بلبع مشاوى وبحريات

وفى فابو قير واحد عالبحر هو المكان يييييييييييييييييع اوى بس الاكل وهمى وبالذات الجنبرى والبورى اللى بينزل سمن

اما فالقاهرة فابوووووووووووووو شقرة باكل عنده احلى حمام وريش ضانى

وكمان فجدة ابو شقرة وهمىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىى

اما عن الخبر

ففى مطعم سمك اسمه المرساة اكله تحفةةةةةةةةةةةةةةةةة

شوربة ميكس سى فود وهمية واللوبستر تجنن

اما الاستاكوزا والجمبرى الجامبو محشيين جبنة موزاريلا وصوص عجيب كدة فبجد يهبلوااااااااااااااااااااااااااااا

بنقوم من عنده مش عارفين حتى نتفاهم بالاشارة

اما افتكر حاجة تانى بعد ما اضرب ساندوتش هاجى اكمل اعترافاتى

حراااااااااام جوعتونى

[بندق أفندى]

مطعم شوراسكو فى ألمانيا .. ستيك جبار

مطعم أسبانى فى أمريكا مش فاكر اسمه .. بس حاجة لها علاقة باللوبستر

وأحلى أكله استاكوزا عملاقة .. الوحدة حوالى 3 كيلو .. الغريب انه كنا 3 أشخاص كل واحد أخد نفس الطبق 1 ستاكوزا حجم كبير

أروز بالخضار .. سلطات .. بطاطا مشوية .. شوربة بحرية .. جردل كارنبرى .. والحلو تختاره من طاولة عليها كل الأصناف ..

والحساب فقط 90 دولار .. لو هنا ولا 500 دولار

[م تيمور المراغي]

في جده في شارع حراء ,,

مطعم اسمو yummy yummy

يخرب بيت الطعامه ,,

هو صيني ويا باني ,,

انا من 10 سنين متخصص اكل صيني ما سيبتش مطعم في الرياض ولا القاهرة الا وجربته - طبعا الخليج الصيني في مصر حكاية

لكن المطعم ده حقيقي الشيفات اللي فيه ايديهم تتلف في حرير - زي استاذ بندق كده

شوربة المحار والجمبري معموله بمزاج عالي والشوربه على فكره هيا اللي بتبين لي احترافية الشيف من غير كلام ,,

دي ثمنها 25 ريــال ,,

متوسط الاسعار عنده للوجبات الكومبو الاخرى 30 ريــال فقط

الطبق بيكون رز او مكرونه مع صنفين تختارهم مابين 10 اصناف متاحين ادامك ,,

الخدمة فوق الممتازة والمطعم نضيف جدا بيبرق وشغال لحد 3 الفجر الديكور راقي جدا والاضائة خافتة وطبعا التلفزيونات في كل مكان يعني لو فيه برنامج عاجبك او سهره معينه روح وانت مطمن مش حيفوتك ,,

احلى حاجه بقى عاملين قاعده خاصه كده تاخد فيها الآيس تي بتاعهم ادام التلفزيون ومع نفسك يا كبير ساعه ساعتين زي مانت عاوز ,,

ده بقى اعلان كده على فكره هههههه

تحيتي

تيمور - المصري الاعزب المغترب :closedeyes:

[ozoozo]

للرفع بمناسبه موسم الاجازات

مين ده اللي عايز يسيب طبق فول من الجحش بالزيت الحار وجنبيه شويه بصل في الخل وطبق جرجير وقرصين طعميه محشيه

ولا طبق كشري من ابو طارق ومعاه حمصه وتقليته وشططته

ولا شويه شوربه كوارع وفته من العهد الجديد

عايزين تسيبه كل ده عشان شويه بلطجيه

طب يبقي حد بلطجي كده يطلعلي وانا بضرب الفول الصبح بدري مع الموظفين من علي العربيه اللي قدام سينما التحرير اللي في الدقي

روحي ودمي فدي طبق فول بالزيت الحار

تم تعديل 7 مايو 2011 بواسطة ozoozo

[التونسى]

فى القاهره .. كشرى التحرير .. أى عربية فول فى ايتوها منطقه .. مطعم جاد اللى فى شارع 26 .. وهناك اكتر اكله بحبها هى الفطيره السايحه النايحه الفايحه.. الغرقانه فى قشطتها وسكرها وعسلها

فى اسكندريه .. مره أكلت سمك من محل عادى جدا فى منطقة ميامى ..وسبحان الله ..يوضع سره...مش فاكر اسم المحل .. بس حاجه فلكلور ولوكال خالص .. كنت مستعجل ..وعايز اكل اى شئ .. .. ويوميها أكلت أطعم وألذ بلطى مقلى اكلته فى حياتى .. وسر طعمه كان فى خلطه كده زى مية دقه .. بيحط فيها السمك اول ما يطلع من المقلايه .. يقوم السمك يشرب الخلطه .. وبالهنا والشفا يا عم الحج

فى انجلترا .. اى مطعم صينى .. واساسا قلما باكل بره .واغلب اكلى من صنع ايديا

فى اسبانيا .. كنت ف رحله .. وكنت قاعد فى فندق اسمه جراند اوتيل فى مدينه مش فاكر اسمها قريبه من برشلونه .. وكان فيه بوفيه مفتوح .. سى فووود .. تختار انت السمك او السيبيا او الجمبرى وهى لسه طازه او شبه حيه .. والشيف يطبخلك لايف على الهواء والرائحة مباشرة .. وبصراحه مكلتش فى حياتى مأكولات بحريه فى نفس الطعم

[pink rose]

في مطعم ايطالي لطيف جدا على شارع خريص

اسمه فوركيتا

عندهم لازانيا تحفــــــــــــــــة

و كمان اكله كده الصراحة اسمها مكلكع بس طعمها خراااااااافة

عبارة عن صدور فراخ محشية سبانخ و ذرة و عايمة في صوص ابيض

على ما اتذكر اسمها بولو فارتيشيتا

في كمان ستيك دي بونجي

عبارة عن ستيك لحم مشوي و متغرق في صوص البونجي مع المشروم واااااااااااااااو بجد

كمان الفيتوتشيني الفريدو عندهم لطيفة جدا

جربوه و مش هاتندموا ان شاء الله

تم تعديل 7 مايو 2011 بواسطة pink rose

[hOuSsAm]

جدة

مطعم المنسف - اكل اردنى بس ممتاز جدا فى شارع حراء وخصوصا وجبة المنسف

يمى يمى على راى تيمور - اكل صينى ممتاز بردوا فى شارع حراء

فى شارع الميناء جنب عبد الله هاشم واحد بتاع حواوشى تحفة

اشواق فى شارع الستين شاورما حكاية

الفيروز فى شارع الستين بالذات طاجن اللحمة بالجبنة

ام على اكلتها فى درة العروس بس كانت مشكلة

صينية سى فود غريبة بالصوص اكلتها فى فندق هوليداى ان (اوبن بوفيه) فى طريق مكة القديم

لاااااااااازنيا فى بيتزا هت

بيتزا زعتر بالجبنة فى الدانوب شارع الامير متعب

مطاعم الصيادية فى مول الاندلس ومول الامير سلطان اكلهم جميل جدا وخفيف

فيه مطعم تايلندى فى شمال جدة بس مش فاكر الشارع - المطعم فى فيلا ووهم كديكور واكل نضيف جدا (بس غالى شويتين)

المنصورة

البغل فوووووووووول شارع الجلاء او توريل

التورجى سى فود حكاية توريل الجديدة (بحب اوى الملوخية بالجمبرى هناك)

بنادورا (بيتزا وسندوتشات) فى شارع ورا الهابى لاند مش فاكر اسمه ايه كان قدام الحزب الوطنى المخلوع (فى فيلا دور ارضى وتدخل تعييش مع نفسك جوه - تحس انك فى عالم تانى)

بهجت وسمير فى ميت حضر

طبعا الراجل بتاع الخروب فى ميت حضر

فيه واحد بتاع كباب مشهور اوى (اسمه المحمدى) بس حكاية انا مش فاكر هو فين بس لو سالت اى بتاع تاكسى هيوديك وفيه واحد تانى اسمه عنانى بس مجربتوش

ايس كريم الشلقامى فى شارع بنك مصر والصياد عالمشاية (بس انا بحب الشلقامى اكتر مع ان الصياد اشهر)

بليلة من عند الاجاوى طريق المنصورة القاهرة - طبعا فى اجا

الاسكندرية

فى اول شارع اللبان من ناحية المنشية واحد بيقف بعربية بيبيع حجات غريبة اوى بس طعمها حلو ومش بتحس بنفسك غير بعد متاكل 10 او 12 ساندوتش بيعمل كل حاجة قدامك عالعربية وسبحان الله فى الاخر يبقى عارف كل زبون اخد بكام بس الراجل ده حكاية وكنت بخلص شغلى واروح اكمل السهرة عنده لحد بعد نص الليل

فيه بقى فى اخر شارع اللبان فى زقة عالشمال كدة واحد بتاع فوق بيعمل فول بالسدق حكاية كانت سندوتشات صغيرة كدة من اللى بتتاكل فى قطمة

ابو اشرف عنده سمك حكاية

ايس كريم من عند ابو عزة فى بحرى

كايرو

مش فاكر اوى

بس زكرياتى مع محل على بركة الله اللى فى رمسيس

محلات حضرموت والمندى والمظبى خاصة اللى فى المهندسين

فيه محل شاورما كان فى المعادى قريب من ابراج الجزيرة بس مش فاكر اسمه

جاد طبعا اللى فى المعادى

راس البر

بلبول فطيرة بالمكسرات والكريمة (وهم) حكاية وتحفة

[الغريب]

على فكرة من مساوئ وجود الأهل معك في الغربة أنه بيحرمك من "الرمرمة" في المطاعم ، وأنا من محبي الموضوع ده ، بس تقول أيه، حكم الـ ... على الـ...

على العموم أوزوزو العزيز أتى بالخلاصة هنا

مين ده اللي عايز يسيب طبق فول من الجحش بالزيت الحار وجنبيه شويه بصل في الخل وطبق جرجير وقرصين طعميه محشيه

ولا طبق كشري من ابو طارق ومعاه حمصه وتقليته وشططته

ولا شويه شوربه كوارع وفته من العهد الجديد

عايزين تسيبه كل ده عشان شويه بلطجيه

طب يبقي حد بلطجي كده يطلعلي وانا بضرب الفول الصبح بدري مع الموظفين من علي العربيه اللي قدام سينما التحرير اللي في الدقي

روحي ودمي فدي طبق فول بالزيت الحار

وكمان حاجات حلوة قال عليها الفاضل التونسي

.. تختار انت السمك او السيبيا او الجمبرى وهى لسه طازه او شبه حيه .. والشيف يطبخلك لايف على الهواء والرائحة مباشرة .. وبصراحه مكلتش فى حياتى مأكولات بحريه فى نفس الطعم

على فكرة فيش ماركت بيعمل نفس الموضوع سواء في مصر أو في الكويت ، أنا جربته هنا ، تختار السمك وهو حي فريش وهويسويلك

بس عندهم سلطة جمبري باردة بالمايونيز مش قادر أنساها

[engmido]

فيه محل شاورما كان فى المعادى قريب من ابراج الجزيرة بس مش فاكر اسمه

جاد طبعا اللى فى المعادى

انت تانى برده

ايه بقى اللى جابك المعادى عندنا

[hOuSsAm]

فيه محل شاورما كان فى المعادى قريب من ابراج الجزيرة بس مش فاكر اسمه

جاد طبعا اللى فى المعادى

انت تانى برده

ايه بقى اللى جابك المعادى عندنا

كنت شغال وساكن هناك قبل ماروح الزوعدية

بس كانت ايام حلوة

[engmido]

فيه محل شاورما كان فى المعادى قريب من ابراج الجزيرة بس مش فاكر اسمه

جاد طبعا اللى فى المعادى

انت تانى برده

ايه بقى اللى جابك المعادى عندنا

كنت شغال وساكن هناك قبل ماروح الزوعدية

بس كانت ايام حلوة

كنت شغال فين؟؟؟ ( وش عيل رزل وزنان)

[MemoG]

والله جوعتوني وانا عاملة رجيم

خلاص هوقف الرجيم لغاية ما اخلص علي المطاعم دي كلها

بس واحد واحد واقعد قاعدة حلوة انأنق في المينيو براحتي

لحد مااخلص عليه وادخل علي اللي بعدو :FN:

[solimady]

عندنا في اسكندريه

1- مطعم طربوش اكلات سوري عنده طبق فته سوري روعه

2- طبعاً المشويات في قرية بلبع

3- السمك في أبو أشرف في بحري أو راكودا في الشاطبي على البحر

4- مرة كنت في أبوقير وكلت في مطعم علي البحر شكله تعبان بس عملي صينيه فيها سمك وجمبري وكابوريا وسبيط وطعمها خراااافه الراجل قالي ان الصينيه دي اسمها سام6 ههههه

لكن انا دلوقتي في صلاله سلطنة عمان في مطعم صيني إسمه شوب ستيك تروح تاخد من عنده شوربة سي فوود جباره وطبق رز بالروبيان والشارخه (الشارخه هنا هو إسم الإستاكوزا) وتاخد طبق سمك منشوري وربيان مكسيكي الأكله دي ممكن تخلص معاك في يومين

[فاطمة محمد]

مطعم فيش ماركت بالسكندرية على الكورنيش والمنظر تحفة والجحش بالسيدة زينب وحلقة السمك بالقاهرةوعمو حمزة بالرياض