هل تريد أن تشارك برأيك؟؟

[elshafey]

موقع يقوم بإرسال روابط للمشاركة في استطلاعات رأي عامة أو سياسية أو عن منتجات أو عني أي شئ

ويعطيك نقاط تحفظ في رصيدك حتي تصل إلي 5000 نقطة وتستطيع بعد ذلك إستبدالها بـ 50 دولار أوتتركها لتزيد و يزيد معها المبلغ

وكل استطلاع ستجد عليه جائزة في الغالب تكون آي بود 8 جيجا

لمشاهدة الموقع والاطلاع أو الاشتراك إلي الرابط التالي

الموقع هنــــا

هنـــــا

تم تعديل 31 مارس 2010 بواسطة elshafey

[doha]

عمرك اطول من عمري بجد يااستاذ شافعي

من اقل من اسبوع كنت ناويه انزل موضوع عن الموقع ده تحديدا .. .

انا مشتركه فيه من يجي ثلاث او اربع سنوات تقريبا ..

ولاني مهووسه بكل ماله علاقه بالتسويق والاحصاء والاستبيانات لقيت الموقع ده بالنسبة لي عز الطلب .. قلت اشترك ..

بصراحه بيعمل استطلاعات راي رااائعه وبتفتح للواحد افاق جديده يفكر فيها ..

وعلى فكره مش شرط ابدا ان الهدف المعلن من الاستطلاع يكون هو نفسه السبب الرئيسي ورائه

يعني ممكن يبدوا لك الاستطلاع عن سلعه ما وهو اصلا بيسالك عن سلعه تانيه خالص بل وحتى ممكن ميكونش للامر علاقه بالسلع ..

آخر استطلاع شاركت فيه كان ظريف اوي .. كان بيدور حول مدى تقبلنا للمختلف عنا دينيا او تحويل الشخص لدينه وفي نفس الوقت ان كنا بنتقبل الشاذ جنسيا او من له ميول مختلفة ..

كان بيسال اسئلة من نوعية اكثر مصادر معلوماتك بتستقيها منين النت ولا التلفزيون ولا الجرائد .. طيب رتب من الاعلى للادنى مين الي يعتبر جريمه كبيرة او حاجه لا تغتفر من بينها العلاقات خارج اطار الزواج او الرده الدينية او الطلاق .. طيب هل تعتقد انك خلال الفترة الاخيرة غيرت رأيك في قناعات كانت عندك ولا لاه .. وهكذا

بصراحه كان نفسي اوي اعرف نتيجه الاستطلاع ده ايه ..

وكنت هحط لكم الاسئلة نتناقش فيها هنا ..

بس كما العاده انشغلت في موضوعات تانيه في المحاورات واجلت المشروع برمته ..

الموقع ده بصراحه رائع لو كنت هتفكر في الاسئلة المعروضه وتعرف محاولات توجيه الراي والذوق العام بتصب في اي اتجاه .. لكن لو هناخذه من باب انه بيقدم جوائز او مبالغ او ماشابه فمش هيبقى مجدي اوي خاصه وانت متضمنش انهم يرسلوا لك 50 استطلاع عشان تكمل النصاب المطلوب لاستلام مكافأتك ..

[الباشمهندس ياسر]

خير يا جماعه

الموقع ده بيطلب بيانات كاملة و تعتبر في مرحلة خطرة

ده مش ناقص غير انهم يسالوا انت لابس ايه و انت بتكلمنا

[doha]

خير يا جماعه

الموقع ده بيطلب بيانات كاملة و تعتبر في مرحلة خطرة

ده مش ناقص غير انهم يسالوا انت لابس ايه و انت بتكلمنا

وايه المشكلة لما تحط بياناتك ؟

محدش هيجبرك تشترك في استطلاع منتش عاوز تشترك فيه وطبيعي ان رايك في الاستطلاع السري هيكون هو ذاته لو كان الاستطلاع علني ..

المثل بيقول ان قلت متخفش .. وان خفت .. متقولش ..

ولا ايه ياباشمهندس ..

[الباشمهندس ياسر]

وايه المشكلة لما تحط بياناتك ؟

محدش هيجبرك تشترك في استطلاع منتش عاوز تشترك فيه وطبيعي ان رايك في الاستطلاع السري هيكون هو ذاته لو كان الاستطلاع علني ..

المثل بيقول ان قلت متخفش .. وان خفت .. متقولش ..

ولا ايه ياباشمهندس ..

مش دي الفكرة يا اختي

الفكرة اني ليه اعرف موقع زي ده

انا ساكن فين و بيتي تمليك ولا ايجار و اخواني اد ايه و ظروف حياتنا ايه و مستوي دخلي كام و ضريبتي مش عارف مالها

البيانات دي تندرج تحت بند بياناتي السرية اللي مينفعش حد يعرفها اطلاقا

و بعدين هو عاوز يعمل قاعدة بيانات كاملة ليه...؟؟؟

هيستخدمها ف ايه..؟

هيعتبرها مؤشر لايه..؟

الموضوع مش مطمني اصلا

[بركة]

والله يا باشمهندس انا شاركت في مصر من عشر سنين في اجتماع لاستطلاع اراء في اعلانات ترويجية لمنتجات

وكان الجروب مطلوب فيه شروط تنوع الثقافات والتعليم والحالة الاجتماعية واختلاف عدد افراد الاسرة لكل مشتركة

وكمان مكان سكنهم وطبعا حضرتك عارف ان سكان كل منطقة بيبقى ليهم اهتمامات مختلفة

ومدام ضحى مشتركة اهو وما فيش مشكلة :lol:

[doha]

انا ساكن فين و بيتي تمليك ولا ايجار و اخواني اد ايه و ظروف حياتنا ايه و مستوي دخلي كام و ضريبتي مش عارف مالها

المعلومات دي مهمه جدا لو بعمل خطه تسويقية لمنتج جديد ..

مثلا

من ضمن استطلاعات الراي الي جات لي مرة بصدد اطلاق مشروب غازي جديد ..

فكانت الاسئلة من نوع :

هل لو المشروب بالليمون وحجم الزجاجه 500 ملم فماهو في رايك السعر العادل لها .. ريال .. ريالين .. ثلاثه .لااعرف ..

فرضا انا قلت اني مش هدفع فيها اكتر من ريال

وفرضا ناس تانيه قالت ممكن تدفع لغايه خمسه ريال ..

هم هيشوفوا مين الي نسبته اكتر ويقرروا يسوقوا له منتجهم ..

لو ابو خمسه ريال هو العدد الاكبر من الناس هيوجهوا له الحمله بتاعتهم فهتبقى اعلاناتها في الشوارع الرئيسيه الي الفئة دي عايشه فيها

لو ابو ريالين هو الاكتر يبقى اولا هيتخفض تكلفة المنتج باي طريقة عشان سعره ميزيدش عن ريالين وفي نفس الوقت هيغيروا طريقة الاعلان بتاعهم بحيث تخاطب الشريحه دي فبدال مايبقى الراجل في الاعلان طالع لابس بدله وماسك لابتوب ممكن يجيبوه لابس جلابيه ومتلفع بلاسه ..

(( قارن مابين اعلانات تنظيم الاسرة مثلا واعلانات بيفرلي هيلز ))

لازم وانا بحط الخطه التسويقية ابقى عارفه المنتج بتاعي ده هيخاطب اي شريحه من الناس من ناحيه دخلها وتركيبتها وثقافتها عشان اعرف اوجه لهم الاعلان بالطريقة الي يفهموها وبادني تكلفه ممكنه ..

فطبيعي لما اعمل استطلاع للراي عن منتج جديد لازم اعرف الناس الي جاوبت دي ساكنه فين وعايشه ازاي والاهم مستواها الاقتصادي ايه عشان ابقى عارفه الناس دي ممكن تدفع على منتجي ده لغايه اي درجه وبالتالي مكلفش عليه حاجه ممكن في الآخر مترجعليش ..

[doha]

في برضه نوعية تانيه من الاسئلة بتنسال ملهاش علاقه مباشرة بحالتك الماديه زي مثلا عدد افراد الاسرة ومن له قرار الشراء .. الخ .

الاسئلة دي ممكن ميكونش الغرض المباشر منها هو المعلومه الي هتقولها فيها بقدر ماهو قياس مده ( صدقك ) في ملأ بيانات الاستبيان ..

في كل مرة هتملا استبيان جديد هيسالك سؤال او اثنين من الي سبق وسالهم لك .. لو الاجابة كانت مختلفة تلقائيا هيشطب استبيانك ومش هيحط اجاباتك في اعتباره وهو بيعمل احصائياته ..

مش بس كده .

ده احصائيا معروف انك وانت بتعمل استبيان لازم تكرر الاسئلة بشكل مخادع وتقارن اجاباتها ببعضها .

مثلا ..

اسألك كم عدد افراد اسرتك بمن فيهم انت ..

بعدين ارجع بعد كام سؤال اسالك كم اخ واخت ليك ..

وممكن في سؤال بعيد اسألك هل تعيش مع والديك ؟

لازم قبل ماابدأ اشوف اجاباتك اقارن الاسئلة الكشفيه دي ببعضها عشان اتأكد انك بتجاوب بجد مش بتحط صح في اي خانه تقابلك وخلاص ..

ممكن يسألك عن ماركه معينة تفضلها وبعد كام سؤال يرجع يسالك اي ماركه من التالي جربته قبل كده .. لو لاحظ انك في ماركه قلت بتحبها ونفس الماركه دي محطيتش عليها علامه ضمن الماركات الي جربتها قبل كده فهيشطب اجاباتك ..

كل ده هدفه انهم ياخذوا عينات من ناس بتتكلم جد وبتقول الحقيقة مش بتعبي استبيان وخلاص وبالتالي هتكون اجاباتهم صالحه لاستخراج معلومه صحيحه ..

واخيرا في حاجه اسمها العينة الممثله .. يعني مينفعش مثلا اني اجيب عشر رجاله زملاء في العمل واخذ رايهم في مشروب معين واقول الناس كلها حبته او الناس كلها كرهته بناء على رايهم هم العشرة .. لازم العينة دي وطالما المشروب موجه لكل فئات المجتمع يبقى فيها ناس كبيرة وناس صغيره .. ستات ورجاله .. اغنياء وفقراء .. متعلمين وغير ذلك .. كل ده عشان تبقى العينة ممثلة لفئات المجتمع كلها فالنتيجه الي هتطلع منها ممكن تكون هي فعلا الموجوده في المجتمع ..

وعشان كده مش شرط ان الاستبيان يبعث لكل الناس المشتركين .. هيختاروا بس الي منطبق عليه شروط الجهة المنتجه وفقا للمنتج نفسه عاوزين يسوقوه عند مين ..

بالمناسبة .. لما كنت في مصر كنت كاتبه عنواني ولما جيت السعوديه كتبت عنواني وطبعا اختلفت الاستبيانات المرسلة .. في مصر كانوا بيسألوني عن ماركات زي جهينة وزبادو في السعوديه بيسألوني عن حليب الربيع ولا نادك .. وطبيعي ان الاستبيانات الي كانت بتيجي لي في مصر معموله لمنتج مصري هيتسوق في مصر ويهمهم يعرفوا راي المصريين فيه والعكس في السعوديه ..

بالمناسبة احلى استبيان جالي كان عن رايي في الحرب على العراق واسبابها ونتائجها .. الاسئلة بصراحه كانت في الصميم وتدرس .. للاسف محتفظتش بنسخه منها لان للاسف بعد مابتملأ الاستبيان مبيكونش في امكانيه للتراجع واستعاده الاسئلة ..

نصيحه لو حد سجل يبقى يكتب الاسئلة او ياخذ لقطه برنت لكل شاشه لان بجد ساعات بيكون في اسئلة لا تنسى ..