الزواج عن طريق الإنترنت بين مؤيد ومعارض

[عماد حمدي]

:lol:

الموضوع دا خطر ببالي ومش عارف هل تم مناقشتة هنا قبل كدا ولا لا .. وهوه الزواج عن طريق الإنترنت CHAT

دلوقتي في ظل التطور التكنولوجي والعصر الحالي انتشر النت في كل بيت ومتاح للجميع .. ومواقع الزواج كمان

اللي بتوفر العريس او العروسة بكل الصافت اللي انته عايزها ..

من فترة كدة قولت هوه لو واحد متغرب وبينزل اجازة كل سنة مرة لمدة شهر وعايز يتجوز ...

قدامه حل أن أهلة يكونوا اختاروا ليه عروسة وساعتها ضيق الوقت هيخدعة ويقبل بيها ..

بس إفترضنا انه تقابل مع فتاه أحلامة ع الإنترنت .. هل المجتمع يتقبل الوضع دا ..

ياعني لما أهلة يسألوه انتة عرفتها منين ؟؟ يقولهم من ع النت ؟؟ رده الفعل هتكون اية ..

ودلوقتي الوضع بقا أسهل كمثال Face Book وبرامج الشاتينج ياعني هتشوفها وتتكلم معاها وكل شيء ...

ياريت نتناقش في الموضوع دا وهل انتة مؤيد ام معارض هذه الفكرة .. وكمان رده فعل المجتمع ..

تحياتي

Emad Hamdy

[عماد حمدي]

طبعا ً أنا متأسف لو كان الموضوع تم مناقشتة من قبل ..

[لماضة مصرية جدا]

السلام عليكم و رحمة الله و بركاته

استاذي الفاضل

ليه لما قريت التوبيك بتاع حضرتك...جت في بالي صورة محطوطة في "صور ضاحكة".....بتاعت شوية ستات كده عاملين زي مهجرين السويس ايام العدوان الثلاثي....و قاعدين قدام اللاب توب

اه دي خلاصة الموضوع.....روح بص ع الصورة...و هتلاقي فيها كل الاجابة

و الاجابة دي عشان حضرتك حاطط الموضوع في ناحية الموضوعات الخفيفة

بس لو حطيته في ناحية الموضوعات الجادة هتبقي اجابتي كده:

خليني اقتبس العبارات التالية

"في بيئة الإنترنت التي يملك فيها الأفراد القدرة على إخفاء شخصيتهم الحقيقية, يمارس نوع مشابه من الإدعاء و النفاق, بل و التفنن في أنواعه. ففي عالم يستطيع أن يخفي فيه الفرد هويته و يحمي معلوماته الشخصية بسهوله, تتوقع أن يجد الأشخاص بيئة حرة يسقطون الأقنعة فيها , و يظهرون جوانب شخصيتهم الحقيقة. إلا أن ما يحدث هو العكس تماما. فما توقعته أن يكون عاكسا لأفكار و شخصيه المجتمع العربي , لم يكن إلا كاشفا لمرض و سوء أغلبها ! و بدلا من إسقاط الأقنعة, ارتدوا المزيد منها ! فأستغله الكثيرون ليعشوا حياة افتراضية . يختارون فيها أسمائهم و أعمالهم و حتى أشكالهم , و يعبرون عن كل ما في أنفسهم من تعفن فكري .

أيهما الحقيقة؟ و أيهما القناع؟ … سؤال يصلي و يرجو الله أن لا يجيبه أحد"

و ده من اجمل المقالات التي قرأتها مؤخرا.......صادم كثيرا لكنه نوع الصدمة الذي يسبق الافاقة

ده حقيقي جدا....انه عالم افتراضي.......تبحث فيه عما تريد ان تراه... و ليس عما هو موجود بالفعل.......

صديقتي القريبة جدا من القلب...قالتلي في يوم اياكي و حب الغربة.....اتعلم يا سيدي ما حب الغربة.... انه الاحتياج لمشاعر الاهتمام...و ان شخصا يعتني بك و يسال عليك و يهتم لامرك

الغربة تصنع بك حالة شديدة من التوحد مع نفسك....فتصبح في مواجهة مستمرة كل يوم مع احلامك المؤجلة....قد تقنع نفسك مرات كثيرة ان من تجدها هي شخصية حقيقية من شحم و لحم و دماااااغ

قد تخدعك نفسك في مرحلة ما للتوقف عند محطة ترانزيتية....و لكنه قرارك اتريد ان تصنع منها شاطيء آمنا... ام ستكتفي بطيها لحظة ان تلامس قدماك ارض الواقع

لكن سيظل براسي الف سؤال اتري لو كنت اعيش حياة بكل مفرداتها الطبيعية...اتراني سالجا الي هذا العالم الافتراضي

قد يرفع البعض اصابعهم اعتراضا و يقصون علينا قصص جميلة ناجحة....بدات عبر الانترنت.....و لكن متي صنع الاستثناء قاعدة؟؟؟؟

و يراودني مشهد لاخرين اعرفهم عن قرب....بدات قصتهم باعجاب متبادل...و قبل ان يستمروا في معايشة الحالة اللي تفرضها ظروف الاغتراب....

بمنتهي المنطقية وضعوا تلك الحالة الافتراضية علي ارض الواقع......

بمعني بحثوا عن تطبيق لحديث الرسول صلي الله عليه و سلم الارواح جنود مؤلفة ما تنافر منها اختلف و ما تعارف منها ائتلف...

كيف بالله ستتعارف الارواح او تتلاقي عبر الذبذبات السلكية و الاسلكية

رآها.........رأته.........تدراسا الامر.......فان نجح انتقلا للمرحلة التي تليها....و ان لم ينجح...سيلوما انفسهما كثيرا لانهما اضاعا كثير من الوقت في مطاردة ملامح ترتسم في عقليهما فقط

و ان نجح لا اعزو النجاح للنت.......لانه مجرد وسيلة........ووسيلة جدلية للغاية..........و مرفوضة للغاية من اهل الفتاة.....مهما تشدقنا بعصر الحريات......و لكن سيتبعا العديد من الخطوات التي تشابه كل زواجا تقليديا.....اي ان تسال عن العائلة......و عن سيدة قصر الاحلام......بل لعلك ترتدي منظارا خاصا لتراها اتري هي في الحقيقة تبدو كما بدت حانية رقيقة متقدة المشاعر يوم ان عرفتها عبر صندوق المحادثة......

لا زلت استرجع جملة اقتبسها من استاذ م. زوهيري....."ان من يرتبطون عن طريق الانترنت هم اشخاص عجزوا ان يصنعوا حياة حقيقية ع ارض الواقع

يؤسفني ان اكون صادمة........و لكنها وجهة نظري.......لك ان تقرأها و تنير في عقلك عدد من الاسئلة او تمر عليها مرور الكرام و لعلك تحدث نفسك.....اي صدمة ما عانتها تلك الفتاة؟

اختر ما شئت...فانها حياتك.....و تذكر ان الغربة هكذا تصنع بمن اختارها...و من اضطر عليها فله الله

تحياتي

[عماد حمدي]

الاخت لماضة

معلش علي عدم توجية الموضوع للقسم المناسب واكتشفت هذا بعد طرحة بالفعل والتجول في باقي الأقسام لان نادرا ً وربما تكون هذه المشاركة الثانية او الثالثة في باب آخر غير باب المغتربين .. لذا نرجوا التماس العذر ..

حضرتك كلامك معقول .. بس بصراحة الواحد احتار اوي ..

ياعني لو واحد متغرب ونازل اجازتة عايز يختار عروسة .. اان من وجهة نظري ضيق الوقت هيخليه يشوف الجوانب الاجابية فيها ..

ولو لقي أي سلبيات هيقول لنفسة الأمور هتتعدل بعد الجواز ..

انا طبعا ً من مؤيدي الجواز عن حب وقصة حب جميلة مش شرط زي قيس وليلي ولا روميو جوليت ..

انما أقصد انه يكون فيه تعارف سابق ومعرفة تفكير وطباع الطرف الأخر .. سواء للشاب او البنت ..

وأعتبر ان الجواز التقليدي .. حظ وتوفيق من عن ربنا طبعا ً .. بس اللي أقصدة ان يا عالم الزوجة واختياري دا صح ولا غلط ..

ياعني انا فكرت في حاجة لو انا عايز اتجوز وفعلاً أهلي إختارو البنت المناسبة وكدة ونزلت خطبتها مدة أجازتي شهر مثلا ً ..

طبعا ً هيا هتحاول خلال الفترة دي تبين ليا كل إيجابيتها ( وهتلبس قناع بردة ) لانه هوه كل ع بعضة شهر ..

وأرجع من أجازتي يا إما أتواصل معها ع التليفون أو ع النت ..

لذلك فإية المانع انه طالما كدا كدا هيكون فية تواصل لمدة طويلة ع النت .. يبقي لو الواحد عرف اي بنت مثلا ً من علي الشاتينج يرتبط بيها ..

وبرده كلامك منطقي ..

بصراحة الواحد محتار جدا جدا ..

أسف ع الإطالة ,,

عماد

تم تعديل 1 أبريل 2010 بواسطة omda2006

[الباشمهندس ياسر]

الانترنت وسيلة من وسائل التعارف بين الناس

مثلها مثل مختلف الوسائل

لي من اصدقائي من ارتبط عن طريق الانترنت و انعم الله عليهم بالسكينة

و لنا من اخواتنا في المنتدي من حدث له ذلك ... ادام الله عليهم تمام الود و المحبة

و اذكر ايضا ان الانترنت له مساؤه ..ف ربما تقابل الكذب و ربما تقابل السفه

و مرضي النفس كثيرون عبر الشبكة العنكبوتية.. فتجد من لا يستطيع ان يوقع فتاة في براثنه ولا يستطيع حتي ان يطلب التعرف عليها وجها لوجه

يستغل التستر خلف الانترنت و يبدا في بث سمومه للاخريات

و الدليل علي هذا شكاوي اخواتنا في المنتدي ممن يرسلون اليهم عبر البريد الخاص و اظنهم من عناهم الفاضل زهيري ف كلامه الذي اوردته الفاضلة لماضة

و اخيرا

ربما كانت الانترنت ... هي الوسيلة الوحيدة لتعميق العلاقة بين افراد حالت طبيعة وظائفهم من الاندماج ف المحتمع الانساني بصورة او اخري

ف المنتديات .. لا تستطيع ان تخفي نفسك اطلاقا ..فدائما ما تكشف عنك افكارك و كلماتك

[الباشمهندس ياسر]

الموضوع ده بيناقش القضية دي

http://www.egyptiantalks.org/invb/?showtopic=78234

[Scorpion]

الآنسة الفاضلة لماضة ...

أجبرني عمق مداخلتك السابقة و جمال صياغتها الي اعادة قراءتها عدة مرات ... و أصدقك القول ما كنت سأجد كلمات أفضل مما كتبتيه حضرتك لتحليل جوانب علاقات مماثلة ...

تقبلي احترامي و اعجابي البالغ بفكرك الراقي .. و تمكنك من صياغة الكلمات باسلوب سلس و مباشر ...

الموضوع هام بالفعل و أعتقد انكم توافقوني ان مكانه هو باب مواضيع جادة ...

تحياتي و احتراماتي

[لماضة مصرية جدا]

السلام عليكم و رحمة الله و بركاته

استاذ عماد

ارجو الا تفهم تعليقي علي ان موضوع حضرتك ينتمي الي مكان آخر....هو من باب السخرية.....بالعكس.....اجد ان كثيرا من الاسئلة الجدلية المرهقة جدا لتفكيرنا نجد حلها في الكوميديا....و ليس بمزيد من التفكير.....و برضه دي وجهة نظري الخاصة

لو تسمحلي حضرتك....

بس يبدو ان بداخلك تساؤلات لا تتعلق بالزواج عن طريق الانترنت.....انها تساؤلات عن زواج المغترب....او المغتربة....بشكل عام؟؟؟.....رايي ان تطرح تساؤلات مفتوحة....دون ان تحصر نفسك في زاوية واحدة للتفكير.....و ستجد ان هناك مناحي اخري للفكر......زوايا لا نستطيع ان نراها بمفردنا.... لاننا عالقون في حيز الصندوق.....متي ما اخرجنا انفسنا منه...صارت الامور اكثر وضوحا

موضوع يستحق التامل...من زاويتيه....الشاب...... الفتاة

تحياتي

========================

استاذي سكوربيون.....اخجلني ثناؤك......فقط اكتب كما اشعر......و اشعر اليوم بحالة خاصة......لا اعرف كنهها.....لكن لعله خير

[Simba]

هذا الموضوع من أعجب المواضيع التي طرحت علي الأنترنت.. منذ ان عرف الناس المنتديات والمدونات والمواقع وغرف الشات

لا يوجد منتدي علي النت يمكن ان يخلو من هذا الموضوع .. وكأنه موضوع ببساطة يأبي أن يقتل في ساحة الحوار أو يغرف في مجاهل المنتديات فدوما ما يطوف علي السطح هذا التساؤل

الأنترنت دخل حياتنا وأصبح عادة يومية من الصعب الاستغناء عنها .. بل ان الكثير يتصفح النت من خلال الجوال مراهقين وناضجين

تختلف الاهتمامات والاتجاهات والأراء لكن لا يختلف أثنان ابدا بأنه وسيلة من وسائل التعارف كاي وسيلة اخري سواء في ندوات ادبية او أندية رياضية او اي مكان فيه سمة الأختلاط بين الجنسين

زواج الأنترنت اشبه بزواج الصالونات .. وزواج الصالونات منتشر حتي اليوم ويلجأ إليه الكثير سواء مغتربين او علي أرض الوطن

المسألة ربما لا تتعدي التعارف وبعدها الخطوات الأخري التي توضح كل شئ للطرفين

أيضا مفهوم الحب السامي الراقي قد تم تسفيهه وأهانته من هذا وهذه بحثا عن وقت طيب زائف واحلام يعلم الطرفين انها لن تتحقق

وبالمناسبة اختلف مع الأخت لماضة في مصطلح حب الغربة

وبما انها شاعرة وتكتب الشعر ولها نصيب كبير في باب الأدب والقراءات ستتفهمني ان قلت ان الحب بين طرفين لا يخضع تحت اي مصطلح فان كان فهو يقينا اي شئ غير الحب

[عماد حمدي]

شكرا ً Scorpion علي نقل الموضوع

وشكرا ً للباشمهندس ياسر علي مرورك الكرم

والأخت لماضة ..

هوه مش بالظبط تساؤلاتي عن زواج المغترب .. لكن أنا كشاب لسة يدوب 24 سنة أكيد لازم يجي اليوم وأتلم mc:

فقولت فين الوقت اللي هفضي فيه اني أدور وألاقي .. فلقيت فكرة ان الإنترنت أسهل وسيلة دلوقتي وبالذات Face book هتساعد بشكل كبير ..

بس لو افترضنا مثلا ً اني لقيت البنت المناسبة .. وأهلي أو أهلها سألونا عرفتوا بعض إزاي ؟؟ هنقولهم اية ؟؟ وهل هيتقبلوا الوضع دا ولا لأ ..

من 6 سنتين تقريبا ً كان عندي 18 سنة أتعرفت علي بنت إنجليزية وفضلنا ع النت كل يوم نتكلم صوت وكاميرا ووو لحد ما نزلت مصر وكان عندي 22 سنة ياعني بعد أربع سنين ..

لما اتقابلنا وجها ً لوجه حسيت أني دي أول مرة أعرفها فيها وإختلفنا كتير جدا ً .. بالرغم اننا كنا ع النت متفقين !!!

بس يمكن علشان دي مثلا ً اجنبية .. ولو كانت مصرية مثلا ً كان الوضع إختلف ولا اية ..

معرفش بس دي تجربة مريت بيها .. حتي انا كنت كاتب موضوع هنا من زماااااااااان اوي من سنتين تقريبا ً كنت بستفسر فيه عن الزواج من أجنبية .. وفيه أخت فاضلة هنا أرسلت لي رسالة خاصة ووضحت لي حاجات مش فهمتها غير بعدين ..

أنا عندي شعور بالخوف من الموضوع دا .. وهاجس غريب بيجيلي إزاي هتجوز !!؟؟

محتار جدا جدا جدا

[Simba]

يا سيد عمدة بهدوء شديد واتمني تتقبل كلامي من اخ لأخ .. عندي اعتقاد يمكن تشوفه انت اعتقاد خاطئ .. لكن ده اللي لمسته من مداخلتك الأخيرة ... 18 سنة شات مايك وكاميرا وانجليزية .. حضرتك مش بتدور علي زوجة ولا هتدور عن زوجة من خلال الانترنت

انت بس غاوي شات وتعارف وفيس بوك

من أخ لأخ يا عمدة

بنات الناس مش فيران تجارب عاطفية

[لماضة مصرية جدا]

شكرا ً Scorpion علي نقل الموضوع

وشكرا ً للباشمهندس ياسر علي مرورك الكرم

والأخت لماضة ..

هوه مش بالظبط تساؤلاتي عن زواج المغترب .. لكن أنا كشاب لسة يدوب 24 سنة أكيد لازم يجي اليوم وأتلم mc:

فقولت فين الوقت اللي هفضي فيه اني أدور وألاقي .. فلقيت فكرة ان الإنترنت أسهل وسيلة دلوقتي وبالذات Face book هتساعد بشكل كبير ..

بس لو افترضنا مثلا ً اني لقيت البنت المناسبة .. وأهلي أو أهلها سألونا عرفتوا بعض إزاي ؟؟ هنقولهم اية ؟؟ وهل هيتقبلوا الوضع دا ولا لأ ..

من 6 سنتين تقريبا ً كان عندي 18 سنة أتعرفت علي بنت إنجليزية وفضلنا ع النت كل يوم نتكلم صوت وكاميرا ووو لحد ما نزلت مصر وكان عندي 22 سنة ياعني بعد أربع سنين ..

لما اتقابلنا وجها ً لوجه حسيت أني دي أول مرة أعرفها فيها وإختلفنا كتير جدا ً .. بالرغم اننا كنا ع النت متفقين !!!...ليه متفقين بقي... عشان هي بتكلمك و هي شاربة نسكافيه...و انت بتكلمها و انت فارد رجليك ع المكتب...لا عمرك شفتها لاوية بوز...و لا عمرها شافتك بتنضف مناخيرك

بس يمكن علشان دي مثلا ً اجنبية .. ولو كانت مصرية مثلا ً كان الوضع إختلف ولا اية .. يا رياسة برضه الوضه هو هو...بلا اجنبية بلا بطيخ

معرفش بس دي تجربة مريت بيها .. حتي انا كنت كاتب موضوع هنا من زماااااااااان اوي من سنتين تقريبا ً كنت بستفسر فيه عن الزواج من أجنبية .. وفيه أخت فاضلة هنا أرسلت لي رسالة خاصة ووضحت لي حاجات مش فهمتها غير بعدين ..

أنا عندي شعور بالخوف من الموضوع دا .. وهاجس غريب بيجيلي إزاي هتجوز !!؟؟....مش هلبس عباية الوعاظ و اقولك عشان ده غلط و كده...لكن هقولك حاجة واحدة...الهاجس ده معناه انت لسه جواك نفس لوامة بتقولك مش ده الطريق الصح

محتار جدا جدا جدا

السلام عليكم و رحمة الله و بركاته

تصدق بقي يا عماد انا اللي برجوك دلوقتي انك تنقل المداخلة بتاعتك دي لموضوعات خفيفة عشان بجد اعرف ارد عليك

يا عماد يا ولدي.......انت عندك 24 سنة و بتقول يا جوااااااااااااااز.................

بس يا صديقي المغامر....انت لسه في مرحلة استكشاف....و مش استكشاف للجنس الاخر لا ده انت بتشوف نفسك لما تحب هيبقي شكلك ازاي....

البعض قد يراه حق مشروع....

بس انا مبحبش كده و مع كلام استاذ سمبا ان مينفعشي نعامل الحياة بمنطلق التجارب و الفيران...

لان ده هيمتعنا بعض الوقت...لكنه علي طول الوقت هيخلي بوصلة مشاعرنا تتوه مننا و مش هتعرف تميز الغث من السمين.......

هيفقدنا عذرية المشاعر.......اللي بتفضل تتخزن لشخص واحد تري في يوما ما مهما طال انتظاره انه جدير بكل المشاعر المؤجلة

اسمحلي ازق كتف....بس انت محتاج الي ارتباط صحي.........يعني........انساني......مش هيحصل الا لما انت نفسك....تعيد قراءة الامور بشكل مختلف.....و تتعلم ان الامور تجري بمقادير

سلام

[عماد حمدي]

يا سيد عمدة بهدوء شديد واتمني تتقبل كلامي من اخ لأخ .. عندي اعتقاد يمكن تشوفه انت اعتقاد خاطئ .. لكن ده اللي لمسته من مداخلتك الأخيرة ... 18 سنة شات مايك وكاميرا وانجليزية .. حضرتك مش بتدور علي زوجة ولا هتدور عن زوجة من خلال الانترنت

انت بس غاوي شات وتعارف وفيس بوك

من أخ لأخ يا عمدة

بنات الناس مش فيران تجارب عاطفية

هههههههههههههه فيرات تجارب عاطفية دي موتتني :P

انا بقول الكلام دا من 6 سنين ياعني من زام اوي اوانا دلوقتي 24 سنة ياعني بالطبع تفكيري إتغير خاصة بعد ما اتخرجت واشتغلت وبعدت عن جو الجامعة والكلام اللي انتة واخد بالك منه دا ..

انا بقول دي كانت تجربة سابقة ..

هتخلي الناس تاخد فكرة مش ولا بد عني كده :P

ومتقبل كلامك يا سمبا mc:

[عماد حمدي]

لماضة

انتوا مستقلين 24 سنة انا ليا أصدقاء اتجوزا وخلفوا ع فكرة مفيش إلا أنا في الجروب بتاعنا إللي ولا خطبت وبالتبيعة متجوزتش ...

فتلاقي كل الناس دلوقتي انتة مش هتتجوز .. مش هنفرح فيك .. من الأصدقاء ومن الأهل .. فدا خالا الواحد يفكر بس مش بأهمية مجرد تفكير بسيط ..

طبعا ً انا عارف ان قرار الجواز دا قرار مصيري جدا .. ولابد من الإستقرار الأول وبعد كدة أفكر في الموضوع دا ..

أنا بس الفكرة دي طرقعت في دماغي كدة .. وقولت اما اشوف الناس أرائها اية ..

طبعا ً تفكيري أمس غير تفكيري اليوم .. أمس " مرحلة الجامعة " فترة مراهقة بمعني الكلمة الإعجاب نعتبرة حب ..

والتأثر بالمسلسلات والافلام الرومانسية .. والوقت الفاضي .. البنت لو شاب قالها كلمة حلوة يبقي بيحبها والعكس ..

والفراغ كان بيساعد بصراحة .. ياعني وقتها بقول لنفسي طيب اية المانع واية واية .. لاني مش خسران حاجة ..

دلوقتي الوضع مختلف تماما ً إتجهت ميولي العاطفية من المرتبة الأولي في أولوياتي إلي مرتبة أخري أكاد أراها بعيدة فعلاً ..

والأولوية الأن للعمل ثم العمل ثم العمل .. وبعد كدا الجواز ..

طالما كدا كدا هنقول مثلا ً ان أهلي لقولي عروسة تمام نزلت شوفتها .. مستحيل اقرر هل هيا مناسبة ولا لا من يوم ولا اتنين وهاخد وقت قول وافقت وهيا وافقت واتخطبنا .. رجعت سافرت تاني هنتواصل يا إما ع النت يإ إما ع التليفون وساعتها برده هتكون قاعده تضرب نسكافية وانا ممدد رجلي ع المكتب .. يبقي فرقت فية اية .. سواء عرفتها من ع النت أو لا

دا اللي محيرني .. وهل المجتمع بيتقبل حاجة زي كدة ولا لأ ..

[reemragab]

بصراحة انا معارضة جدا للموضوع ده

ومش عشان لو حد سالنى انتى عرفتيه منين فاتحرج اقول من على النت لا خالص لان اولا التفاصيل دى مش مشكلة حد

ثانيا ساعات بيحصل ارتباط عن طريق ان واحد يعجب بواحدة شافها فى اى مكان نادى...حفلة....او حتى الشارع احيانا فمش معقول انه ما برتبطش بيها عشان

لو حد ساله ها يتكسف يقول انه شافها فى الشارع !!!

المشكلة الاكبر ان النت وسيلة تعارف فيها غموض ولبس وخداع فى بعض الاحيان وبتودى لعواقب غير امنة

يعنى فى الاول كلام عادى ...بعد كده يبقى اكتر خصوصية.. بعد كده تليفونات.. وطبعا النتيجة النهائية الخروج والمقابلات واللى ماحنش عارفين ممكن تودى لفين

ومش كل حد بيدخل ويدردش بيكون فعلا عايز يرتبط(يتجوز) حتى لو صرح بده

كمان مواقع الزواج ممكن تبقى وسيلة صيد سهلة للفتيات لمعدومى الضمير او للمستهترين من الشباب

ومتهيالى فى الحالة اللى الشاب ها يضطر فيها للنت عشان يتجوز يبقى جواز الصالونات ساعتها اهون وارحم على الاقل فيه حفاظ على البنت

وبيدى ثقة للشاب فى اختياره ولو بشكل جزئى...

[عماد حمدي]

ومتهيالى فى الحالة اللى الشاب ها يضطر فيها للنت عشان يتجوز يبقى جواز الصالونات ساعتها اهون وارحم على الاقل فيه حفاظ على البنت

وبيدى ثقة للشاب فى اختياره ولو بشكل جزئى...

برافوووووووووو عليكي mc:

بس دا للشخص العادي الموجود في بلدة متاح لية انه يروح حفلات أو أفراح اصدقائة او كدة .. بس الغلبان المغترب هيعمل اية ؟؟؟ :P

تنويه :

الموضوع مش شخصي عني يا جماعة والله .. دا مجرد طرقعة في دماغي مش أكتر .. انا عارف نفسي شوية و الطرقعة تهدي :P

تم تعديل 1 أبريل 2010 بواسطة omda2006

[لماضة مصرية جدا]

دا اللي محيرني .. وهل المجتمع بيتقبل حاجة زي كدة ولا لأ ..

السلام عليكم و رحمة الله و بركاته

طيب... المجتمع ده مين.....لو ع الاصحاب و الاهل و القرايب.....محدش له حاجة عندك......لانك انت اللي بتتحكم في ايه اللي تحكيه و ايه اللي متحكهوش صح

لكن خلينا نتكلم كده في الناس اللي هننده اسماؤهم دول:

1- ابو البنت و امها

2- اخوات البنت لو اولاد و في سنك كده يا عماد.

3- والدك ووالدتك انت

انا هاخدهم من تحت لفوق.....

والدك ووالدتك لانك انت ولد هتقدر تقنعهم في قعدة صفا كده ف البلكونة....و هترسي القعدة بالمقولة الشهيرة "اللي بيشيل قربة.....بتخر علي نافوخه"...صح و لا لا

نروح بقي..للمذكور اسماؤهم نمرة 1.......الاب و الام.....للبنت هيصعقوا..... و لا هو المفروض السيناريو ان البنت هي تروح تقولهم اصلي عرفته عن طريق النت.....و خد عندك بقي...ازمة هز ثقة...يعني انتي قاعدة ع النت النهار و الليل بتحبي...و احنا نايمين علي ودانا......(اه البنت مينفعشي تحب.....و ككمان بتحب ع النت...يا داهية دقي.... يعني البنت اترسم ليها خية و هي عبيطة مش عارفة تشوف الخية)

2- نيجي بقي لنمرة 2.......شباب عترة كده زي الورد....شبهك بالظبط يا عماد......كانوا برضه من 6 سنين فاتوا بيكلموا كذا و كذا.... يا تري تفتكر انطباعهم عنك انت لما تتقدم هيبقي في صالحك (مش بيقولك الانطباعات الاولي تدوم).......هنا انا مش هجاوب هسيبك انت تجاوب....بس انا دلوقتي اختك اللي اصغر منك.....و بقولك كذا و كذا يا تري هترد عليا و تقولي ايه...كأخ...لافف بقي و فاهم دماغ الشباب.

و دي برضه وجهة نظري....يمكن غلط...يمكن صح.....وجهة نظر

بس خلاص

[se_ Elsyed]

من الاخر كده لو النت كان بداية لمرحلة للتعارف الجاد بغرض الزواج .. يبقى مرحا مرحا

أما لو الطرفان اعتبرا ان النت هو بمثابة فترة الخطوبة وكل التعارف وما كانوش شافوا بعض الا من خلال الصور او الكاميرات ... يبقى يتسحملوا ما سيحدث لهم من صدمات

لأن إذا كانت فترة الخطوبة اللي بيبقى فيها الطرفان وجهاً لوجه هي فترة التجمُل والتزين والعصافير المزقزقة فوق أشجار الزيفزون ... فما بالنا والطرفان يتخفيان وراء متاريس الكيبوردات ؟

وصدقوني ... يوم واحد في التعامل وجهاً لوجه والتعرض لظروف ومواقف مختلفه يرى ويشاهد فيها كل طرف ردود فعل الطرف الاخر = سنة تعارف عن طريق النت

[عماد حمدي]

طبعا ً رد فعلهم هيكون الآتي clwn: طاااااااخ طووووووووووخ بووووووووووووووووم !!

وتيجوا تسلموا عليا في المستشفي .. mc:

هوه انا منو جوايا ً طبعا ً مش هقبل أصلا ً بفكرة الجواز عن طريق النت .. بس بقول ان دا هوه الحل مش هقول الوحيد لكن هقول السهل وفي نفس الوقت سهل ومش مضمون عكس جواز الصالونات صعب ومضمون ..!!!

طبعا ً بالنسبة لأهل هنا .. الرد معروف فعلا ً اللي يشيل قربة مخرومة بتخر ع دماغة .. دا ياعني لو لو لو لو تقبلوا النقاش في الموضوع اساسا ً

لكن تسمحيلي بنقطة صغيرة كدة ..

أغلب الأهالي لما بيختاروا لأبنهم عروسة وكدة تركيزهم كلة ع أهلها وأخلاقهم " النسب ياعني " وبعد كدة في الأخر يقولك البنت جميلة ومحترمة وووو !! طيب ما ممكن بنت تكون مناسبة ليا مثلا ً ومش مناسبة لغيري ..

دي حاجة .. حاجة تانية أنا شايف من وجهة نظري ان لو الوضوع بالشكل دا وواضح انه كلة معارض الفكرة .. فمفيش حل غير جواز الصالونات والواحد ينزل من أجازتة يعمل حسابة انه يعمل انترفيوهات علي بيت دي وبيت دي ودي ..

وصدقيني انا بتكلم عن ان ضيق الوقت ممكن يخدع الطرف الأول اللي هوه الزوج .. خاصة لو عمرة كبر وعدي الثلاثين من غير جواز ..

هيضطر يقبل .. ودا انا مش عايزة

بالنسبة لأبوها وأمها .. ردك مظبوط دي ممكن تتدبح فيها .. وفي نفس الوقت في أهالي لارج تقولك عادي يا حبيبتي ودا طبعا ً انا مش أقبلة حتي لو هيا مين ..

فعلا ً هيا فكرة مش مرغوب فيها .. والله المستعان .. والواحد كدا عازب وزي الفل

بس آجلا ً او عاجلا ً هيجي اليوم اللي الواحد يتجوز فيه .. ودا توفيق من عند ربنا

الطيبون للطيبات .. :P

انا أعرف ناس اتجوزا من ع النت فعلا ً وزي الفل .. بس مقابلتش ناس اتجوزت وفشلت .. بس بردودكم دي واضح ان حتي المجتمع الخارجي مش هيتقبلها ودا اللي كنت عايز اوصلة .. والحمد لله

:P

تحيـــــ عماد ـــــاي

[Damo]

الكلام اللي اتقال من قبل الاعضاء الافاضل جميل. بس انا اقول نقطة يمكن اتقالت بس هعيد صياغتها.

شخصيات الناس على النت بتكون غير الحقيقة. حتى لو هما صادقين جدا و مش بيتجملوا ولا حاجة. لكن النت ده عالم تاني و اي حد غصب عنو لااااازم شخصيته الطبيعية اللي هيحاول يظهرها على النت هتبان للي قصادوا حاجة تانيه. ده مش كذب ولا نفاق!! ده حكم الانترنت mc:

الشخصية اللي بتظهر على النت بيكون ليها dimension تاني. مثلا في فترة من الفترات اثناء السفر كان بابايا في بلد و احنا في بلد. فكنا بنتكلم معاه على النت صوت و صورة. حسيتو غير الحقيقة خااااالص. حتى تعاملتنا مع بعض على النت كانت غير تعاملتنا في الحقيقة. شوف!بابايا!!! :huh: ايه اكتر من كده.

اكيد في استثناءات في كل حاجة في الدنيا بس في رأيي القعدة العامة اللي يحب على النت خلاص يتجوز على النت! لان مينفعش اتنين dimensions مختلفين تركبهم على بعض.

بس عشان يبقى ضميري مستريح هقول حاجة اخيره. انا مش ضد انك تتعرف على شريكة حياة محتملة على الانترنت (الكلام ده لو قلتو لاهلي هبات عند الجيران clwn: ) . عايزين تتعرفو اكتر على بعض يبقى في الحقيقة عشان عندكو انتو الاتنين الdimension الصح :P

تحياتي :P

دامو