استخدام كمبيوتر العمل لغرض شخصى

[abdo_bek]

لاحظت ان بعض الاعضاء هنا فى المنتدى يقولون انهم يستعملون كمبيوتر العمل والنت لقراءة ما يكتب فى المنتدى

رغم انه المفروض هذا الكمبيوتر للعمل ووقتهم المفروض مكرس للعمل وراتبهم ياخذونه على العمل وليس الدخول على النت وقراءة المنتديات

عموما انا اريد معرفه ارائكم

[فــيــروز]

الحقيقه انا ممن يستخدمون كمبيوتر العمل للدخول على النت

لان هناك اوقات عديده لا تتعدى على اوقات العمل

بمعنى ان هناك عمليات يستغرق تشغيلها بعض الوقت وفى انتظار ان ينتهى التشغيل يمكن الدخول للنت

احيان كثيره ادخل كذلك فى الوقت المخصص للاكل

يعنى زملائى مثلا ممكن يروحوا ياكلوا فى البوفيه و يشربوا شاى و سجاير و خلافه بمعرفة المدراء و الموضوع عادى بالنسبة لهم بينما انا اقضى هذا الوقت على مكتبى عشان فى الغالب باكل سندوتشات ولسه مابدخنش

الاهم من كل هذا والذى يتيح لى فرصة قضاء وقت طويل على النت فى العمل هو ان المدير ممكن يديلى task ويقرر انه يحتاج وقت لنقول يوم عمل مثلا .. امسك انا الشغلانه الاقيها ماتاخدش غير ثلاث ساعات بس .. اخلص الشغلانه .. و ادخل شويه على النت .. وبعدين اروح اقول انى خلصت شغلى وعاوزه شغل تانى "والله امبارح الموقف بالنص حصل" .. رغم انى ممكن على حس التسع ساعات التى اخذتها اشتغل ساعات اقل لان العمل لا يحتاج سواها و اتسنكح باقى الوقت .. و الحقيقه مش عارفه اذا كان ده حرام ولا لا بس باشوف الزملاء يعنى الحاجه اللى تحتاج ساعه يعملوها فى يوم و يعملوا اعلان انهم مطحونين فى الشغل .. طيب حيث ان المعايير كريمه و تقدر للعمل الذى يحتاج ساعه ثلاث ساعات يبقى كلنا نشتغل بهذه المعايير ..

والشئ الاخير الذى يجعلنى ادخل على النت من الشغل انى بادخل بعد انتهاء مواعيد العمل ..

[ابو يوسف]

هذا الموضوع مطروح بقوة فى الشركة التى أعمل بها !!

لأن كل أجهزة الشركة - بحكم العمل - متصلة بالنت .. كثيرون يستخدمونها عمال على بطال طول اليوم !!!

أعتقد أن كل شخص رقيب على نفسه و على أفعاله ..

يعنى أنا ورايا شغل ... يبقى لازم أعمله .. و الا يبقى مرتبى فيه فلوس حرام !

طيب ما وريش شغل ... ؟؟؟؟

أو خلصت المطلوب منى ؟؟

أعمل ايه ؟؟؟

أرغى ؟؟

الف فى الشركة ؟؟ lo::

اروح (اتسنكح ) فى البوفيه ؟؟ :D

آخد زميله ونقعد فى الكافتيريا ؟؟ :P

و الا أستفاد لى بمعلومة كتنيها زميل فى منتدى محاورات المصريين !!!

:P

[ابو يوسف]

نسيت أقول حاجة ....

قانون العمل بيقول ان ساعات العمل 8 ساعات ...

منها ساعة راحة !!

غير انى بأديهم من عندى ساعتين زيادة بعد مواعيد العمل الرسمية ..

يبفى ليا فى ذمتهم 3 ساعات ..

صلاة ...

و أكل ...

و...

نت

[se_ Elsyed]

سؤال وجيه ومفيد لناس كتير ..

- أولاً لو هذا سيؤثر على جودة ووقت العمل يبقى حرام مصفي ...

- ثانياً لو كان مثلاً الشخص بيدخل على النت من خلال خط تليفون يعني الحسابة بتحسب .. وهو بيدخل على النت لهذا الغرض فقط يبقى برضوا حرام ..

- ثالثاً ... لو كان بيدخل على النت من خلال " سيرفر " يعني لو الجهاز شغال 24 ساعة مابتفرقش في التكاليف ... ودخوله لا يؤثر على إنتاجيته ولا يُعطل عمله ... يبقى ما المانع في ذلك وليس فيه حرمانية ...

ده رأي شخصي ..

أنا مثلاً عندي النت شغال زيوا زي الإي ميل من خلال الأوتلوك 24 ساعة لأن إحنا شركة ISP يعني خدمة النت من ضمن نشاطنا وكل طقم المديرين عندهم نت من خلال سيرفر .. وطبعاً مابيبقاش مطلوب مني شغل بعينه أو محدد بمعنى أصح ..

[Handicraft]

مع احترامى الشديد لكل الآراء أطرح السؤال بطريقة أخرى هل تستعرض مواضيع المحاورات فى حضور المدير المباشر أو الزملاء أم أنك تتخفى عن الناس أثناء دخولك على الإنترنت؟؟؟

لو بتخاف حد ممكن يشوفك أو المدير يقفشك فحقيقى الحلال هو ما لا يجعلك تخجل أو تتخفى عن الأنظار وكأنك ترتكب جرما.

أما لو حضرتك مدير زى س س lo:: ومحدش يقدر يكلمك لأن اللى حيتكلم حيحصل له كده يبقى من حقك تدخل النت بس خلى بالك من نفسك لأن ذاكرتك المهنية ممكن تخستع من كتر استخدامها فى مواضيع المحاورات وخصوصا المواضيع المطوله وبكده حتلاقى نفسك عجزت بدرى بدرى وبعدين المشكلة مش حتعرف تعمل أبجراد للميمورى بتاعتك والخوف يا باشا لتهنج أو البورسبلاى يضرب عندك وخصوصا ان قطع غيار الإنسان لسه تحت الإختبار.

نرجع لموضوع الدخول أثناء فترات الراحة هذا أيضا يتطلب معرفة وموافقة المدير أو صاحب العمل لأنه بمثابة أستخدام أدوات العمل فى أغراض خاصه فمثلا لو حضرتك مهندس مدنى هل يجوز فى وقت الراحة تاخد البلدوذر وتروح تحفر بيه لأساسات العمارة بتاعة حضرتك والحجه ان ده وقت راحة وبعدين البلدوذر مملوك للشركة يعنى مش حندفع حاجه وكده كده هو مركون؟؟؟

ولسه ما خلصش الكلام

[Lighthouse]

الحمد لله

انا بادخل النت من الكمبيوتر بتاعي

وبادفع الفواتير

مش عارفة بصراحة

انا باحس ان دخول النت من كمبيوتر العمل لتصفح مواقع بعيدة عن مجال العمل يعتبر استخدام غير مشروع للنت

ومن غير زعل وده رايي الشخصي

باعتبر ده حرام

[مصر عشقى]

اكيد الدخول على النت من كمبيوتر العمل حرام

العبد لله اكتر واحد بيغرم فيكم لانى بدفع الفاتورة وكمان مرتب ولد يقرا لى المكتوب واملية اللى عاوز اكتبة لانى الحمد لله لا بعرف فى القراية ولا الكتابة زى ما بتقولوا يا متعلمين ومتنورين امى

والعلم نورون

[عادل أبوزيد]

الأفاضل كلمة حرام كلمة كبيرة جدا و إستخدامها أيضا له الكثير من المحاذير

نعود لموضوع إستخدام شبكة المعلومات من العمل ما يصح عندى أنها تخضع للأعراف السائدة فى الشركة و القواعد المعلنة للعمل فى الشركة.

و فى تصورى أنه من المفترض عدم الدخول على مواقع إباحية مثلا. أما كونك لا تظهر ذلك أمام رئيسك فذلك نوع من الذوق العام فى العلاقات الوظيفية مثلا غير مقبول أن تجلس و تقرأ مجلة الكواكب مثلا علنا أمام الجميع أو أمام رئيسك فأنت بذلك توجه له تحدى أنه غير قادر على الإستفادة منك أو أنك عمالة زائدة ... حتى لو لم تكن أخرت أى عمل مطلوب منك.

من ذلك نرى أن المسألة نسبية فلو أمسكت القلم الرصاص الخاص بالعمل و بدأت فى كتابة قصة حياتك و إستهلكت فيها القلم الرصاص فهذا عادى أما أن تطلب من السكرتيرة عشرة أقلام رصاص لتوزعها على أولادك فى المنزل أو لبيعها أمام المدارس فهذا موضوع آخر.

[أسامة الكباريتي]

استجدام الكمبيوتر في الشركة لغير أغراض العمل ممنوع عندنا بموجب القانون الداخلي ..

وجميع الموظفين وقعوا على وثيقة تثبت اطلاعهم على القانون ..

مع وجود بروكسي داخلي .. كل صفحة تتصفحها تسجل ويتم فلترتها ..

الشركة توجه إنذار بالفلصل لكل من يخالف ..

أزعم بأنني مرتاح لهذا النظام ..

فقد كان الاستخدام مكثف قبل ذلك حتى أن الخط المؤجر كان مرهقا جدا ..

أما الآن ..

فعندما أدخل يكون العمل على الشبكة غاية في السرعة .. وننجز العمل بشكل جيد ..

لا يمنع ذلك من فتح صفحة إخبارية كالجزيرة وإسلام أون لاين ..

وذلك للتصفح .. وبخاصة عندما تكون الأخبار ساخنة ..

[se_ Elsyed]

فمثلا لو حضرتك مهندس مدنى هل يجوز فى وقت الراحة تاخد البلدوذر وتروح تحفر بيه لأساسات العمارة بتاعة حضرتك والحجه ان ده وقت راحة وبعدين البلدوذر مملوك للشركة يعنى مش حندفع حاجه وكده كده هو مركون؟؟؟

معليش يا حاج هاندي ده مثال بعيد كل البعد تماماً عن ما نتحدث عنه .. فالبلدوزر وأدوات المكتب أشياء تُستهلك ... والراجل بتاع البلدوزر ده راح يستخدمه عشان يعمل فلوس أو يعمل مصلحة خاصة به .. يبقى أيه وجه مقارنته بموضوع النت ؟

بالإضافة إلى إنه ليس من المعقول أروح أقدم طلب مكتوب لرئيس مجلس الإدارة وأقوله لو سمحت ممكن أستخدم النت في اوقات العمل !!!

فهو بالفعل وافق على تزويد كل مدير أو رئيس قسم بوصلة إنترنت مجانية ... وعارف بالتأكيد إني ممكن ادخل على موقع إخباري أو حاجة مفيدة زي المحاورات بل وفي كثير من الأحيان صاحب الشركة يزودني بمواقع مفيده لم أكن أعرفها زي محيط وأرابيا .. إلخ ..

لكن أنا عرفت ما تريد ان ترمي إليه وهو تعريف الأثم أو الذنب بانه ما حاك في الصدر وخشيت أن يطلع عليه الناس ...

والحمد لله هذا لا ينطبق على مثالنا ...

( ويوم السبت هأوصيهم يشيلوا عنك النت ويقطعوا الكهربا وأبقى

شغلك جهازك بالمنافلة بقى )

[Handicraft]

س س:

لكن أنا عرفت ما تريد ان ترمي إليه وهو تعريف الأثم أو الذنب بانه ما حاك في الصدر وخشيت أن يطلع عليه الناس ...

بالضبط والحاجه الصغيره زى الكبيره ومع اختلافنا ده ما يمنعش أرفع القبعة chf:: لحضرتك على اختصار المداخلات كلها فى السطر المرفق أعلاه.

وبلاش يقطعوا الكهربا من فضلك أحسن المنافيله الوحيده اللى حيلتى مسلفها والظاهر اللى خدها ضرب عليها ويمكن باعها كمان والمعلوم حيوصلك زى العاده من غير ما حد يعرف حاجه وخلينا اخوات وبلاش نخبط فى بعض (وبعدين فين الموضوع اللى كلمتنى عليه وكنت عايز تفتحه ولا الظاهر مجبتش فتاحة معاك)

[MuslimaEgyptian]

السلام عليكم جميعا،

لا أعتبر موضوع الدخول على النت وقت العمل موضوع هين (تحسبوه هينا وهو عند الله عظيم)...فبارك الله فيك يا أخ عبدو بك على فتح هذا الموضوع الذى يمسنا جميعا. فبوسط تصاعد الأمور على الساحه الدوليه,من منا لم يتصفح بالعمل آخر الأخبار الهامه كما ذكر، أو دخل على المحاورات ليتابع أجدد كصص الأخ الأديب حشيش chf:: وشرحه من المواضيع..وبصراحه كنت دائما أشعر بذنب شديد لما نعلمه عن كيف أن كل شئ سيسئل عنه يوم الحساب وان كان هذا التصفح يدخل تحت بند خيانه أمانه العمل

الحمدلله الأخوه أعطونا أفكار كثيره جيده، كشراء لابتوب للإستخدام الشخصى..أو الدخول على النت أثناء فتره إستراحه الغذاء, شئ أحاول جاهده أن أطبقه شخصيا, أو الدخول خارج أوقات العمل..

وكلنا أدرى بأى نوع من الدخول على النت يخون أمانه العمل، لأن كما ذكر الأخوه، هناك طبيعه عمل تستدعى الدخول على النت، فلا حرج - والله أعلم ـ على من يبقى صفحه الأخبار مفتوحه ليلقى نظره سريعه كل حين وحين...وخاصا إن كان يجدد نيته على ألا يخون أمانه العمل وحرصه الشديد عليها . أما من يجلس بالساعات ,ويوم بعد يوم ,لأغراض شخصيه ويترتب على ذلك تعطيل الشغل والأمانه التى أؤتمن عليها لكى يؤديها وعليها يأخذ راتبا، فهذا شئ آخر أكيد سنحاسب عليه.."قال رسول الله صلى الله عليه وسلم، أدوا إذا إؤتمنتم".

ندعو الله أن يعيننا على الأعمال التى ترضاه إن شاء الله...

مش عارفه ليه حاسه بعد التوبيك ده، المنتدى ستقل معدل مداخلاته بالنصف وباب أعضاء نفتقدها سينعش للغايه :D :)

تم تعديل 23 أبريل 2004 بواسطة MuslimaEgyptian