خلاص قررت اسافر الاجازة بالسيارة

[essamlotfy]

توصل بالسلامة ان شاء الله ... وتكون رحلة مريحة وممتعة

انا ماعرفش انت طالع منين بالظبط ... بس لو طالع من الرياض

اكيد هتاخد طريق القصيم : الرياض - بريدة - حائل - تبوك - العقبة

وده تقريبا 1200 كم ... ويفضل طبعا انك تريح في الطريق

وغالبا ً يكون في حائل .. لأنك لو عديت حائل المدن بعد كده علي الطريق هتكون قليلة اوي

والمسافات بينها متباعدة بعكس الطريق من الرياض لحائل

طبعا ً البنزين مش هاوصيك عليه ... دائما ً وابدا ً متخليش التانك يقل عن النص

ومتقفش غير في المحطات الكبيرة وتلاحظ ان فيها عربيات كتيرة واقفة

بعد ما توصل تبوك ان شاء الله وفي طريقك للعقبة هتمر بمنطقة جبلية صعبة شوية بين حقل والعقبة

حاول قدر الامكان انك تمشي فيها بالنهار مش بالليل ... لأنه طريق مرتفع في الجبل فيه تعرجات كتيرة

واتجاه واحد مش اتجاهين ... وعلي يمينك علي طول الطريق بيكون فيه وادي منخفض ... هيا مسافة صغيرة

بس تمشي فيها بالراحة وتركز كويس فيها .... ومتستعجلش

ميناء نويبغ من وجهة نظري هو أفضل الموانيء المصرية ...

والاجراءات فيه سهلة وسلسة ومش بتاخد وقت كتير بالكتير ساعتين بتكون مخلص اجراءاتك وخارج منه

متنساش طبعا طفاية الحريق ... لو عربيتك صغيرة طفاية واحدة ... لو سيارة كبيرة طفايتين

لأنك لو وصلت المينا ومش معاك طفاية هتشتريها ب 300 جنيه

توصل بالسلامة ان شاء الله ... وفي أمان الله

تحياتي

انا طالع من الرياض ان شاء الله، وفعلا انا درست الطريق علي جوجل وفعلا زي ما حضرتك قلت هايكون الطريق - الرياض-بريدة-حائل-تبوك-العقبة

بالنسبة للطفاية انا معايا واحدة هل تنفع ولا لازم اشتري واحدة واخد معايا الفاتورة.

[Mercedes]

اخواني الاعزاء المحاوراتية :blush2:

ربنا اكرمني وقررت اسافر اول اجازة ليه بعد 18 شهر غربة بالسيارة عن طريق العقبة - نويبع :ninja:

اللي نفسة ينزل ونبقي صحبة يتفضل و اول خطوة عملتها - طلعت دفتر التربتك كلفني 320 ريال وخدته وانا واقف مفيش 10 دقايق :blink:

ارجو الدعاء بالتوفيق

واللي عنده نصايح هأكون شاكر جدا جدا

وهنا صورة الدفتر

وسأواليكم بالاخبار أول بأول

السلام عليكم و رحمة الله و بركاته

والله سيادتك راجل طيب و ابن حلال مصفى و مكشوف عنك الحجاب كمان.

أصل أنا عرفت أن وزارة الطيران المصرى المدنى وقفت الرحلات بتاع الخطوط السعودية اللى جايه من المدينة الى القاهرة لأن السعودية وقفت الرحلات بتاع مصر للطيران اللى شغالة من القاهرة للمدينة( كمبدأ المعاملة بالمثر - قال يعنى ).

و كمان بيقولوا أن كل رحلة لمصر للطيران, السعودية هتلغيها , هيتلغى قصادها رحلة للخطوط السعودية.

أنا قريت الكلام ده النهاردة فى الصفحة الأولى لأهرام الثلاثاء 6 ابريل 2010

عشان نبقى نعمل حسابنا بعد كده نروح يابالسيارة أو بالباخرة

و الله حاجة تضحك

قال و كنا بنحلم بجسر بين مصر و السعودية

يا جماعة دى حاجة تكسف

هو احنا طالبين جسر عابر للقارات زى اللى موجود فى الاتحاد الأوروبى و لا طالبين قطار سريع زى اللى بين بريطانيا و فرنسا.

لله الأمر من قبل و من بعد

MERCEDES S430

[essamlotfy]

تروح وتيجى بالسلامة طبعا دة اولا

وبالتوفيق انشاء الله ورحلة موفقة انشاء الله

انا ليا باء سوال انا عايش فى الامارات لو انا عايز انزل مصر بالعربية الى معايا هنا

هل لازم تكون العربية بأسمى ؟ ولو مش بأسمى هل من الممكن يكون هناك رسالة من صاحب العربية بالموافقة ولا الكلام دة مينفعش

ثانيا : لانى شخصيا انا مش متوقع انى اعرف اخد الطريق دة كلو

هل ينفع اشحن العربية من ميناء دبى مثلا لاى مينا فى القاهرة واروح استلمها هناك ونفس الكلام فى العودة واعلق نمر جمرك بردة ترب تكت

ولا لازم ادخل وانا سايق

تحياتى للجميع واسف على الغيبة الطويلة يمكن اكتر من سنة لكن متابع حركة المنتدى

قاهــــــــــــــــــــــــــرى

اخي العزيز

طبعا انا عايش في السعودية فمعنديش فكرة عن ما يحدث في الامارات لكن ممكن حضرتك تروح اي مكتب سياحي (اللي بيطلعوا دفتر التربتك) وأكيد هاتلاقي عندهم الاجابة ان شاء الله .

[essamlotfy]

تحياتي للجميع انا يمكن ل تعقيب تاني ف اتجاه مختلف هو اصلا ايه دواعي النزول بالسياره زمان كان لنا تجربة مع والدي ونزلنا بالسيارة والسبب كان الاتي نا معندناش سيارة ف مصر وكنا بنبي بيتنا ف منطقه تعتبر بعيده ساعتها وكان محتاجين السيارة

اما لو مكنش كده فاريح مليون مرة التنقل بالتاكسيات لان بجد وجع دماغ المشوار من الكويت لمصر بيتقضي بس السواقه ف مصر مولد ووجع دماغ ف ع ايه يعني ده مجر اقتراح لان دلوقتي الطيران الاقتصادي حل ازمة ارتفاع اسعار التذاكر بتاعت الطيران

والله عندك حق في موضوع السواقة في مصر مختلفة جدا تحس ان مفيش اي نظام الناس بتحترمة زي ما يكون كل واحد داخل بكتفه واللي يقف في طريقة يتعور

[herohero]

تحياتي للجميع انا يمكن ل تعقيب تاني ف اتجاه مختلف هو اصلا ايه دواعي النزول بالسياره زمان كان لنا تجربة مع والدي ونزلنا بالسيارة والسبب كان الاتي نا معندناش سيارة ف مصر وكنا بنبي بيتنا ف منطقه تعتبر بعيده ساعتها وكان محتاجين السيارة

اما لو مكنش كده فاريح مليون مرة التنقل بالتاكسيات لان بجد وجع دماغ المشوار من الكويت لمصر بيتقضي بس السواقه ف مصر مولد ووجع دماغ ف ع ايه يعني ده مجر اقتراح لان دلوقتي الطيران الاقتصادي حل ازمة ارتفاع اسعار التذاكر بتاعت الطيران

والله عندك حق في موضوع السواقة في مصر مختلفة جدا تحس ان مفيش اي نظام الناس بتحترمة زي ما يكون كل واحد داخل بكتفه واللي يقف في طريقة يتعور

السواقه ف مصر ده مزاج تحس كده انك ف مغامرة هنا وايب بلد السواقه شيئ عادي اا ف مصر تحس انها مزيج من الفوضى ع قلة الذوق ع التخلف بجد شيئ ممتع للغايه

نصيحه لو ماسوقيتش قبل كده ف مصر توخى الحذر خاصة لو عربيتك غاليه لان المبدا ف مصر اللي خايف ع عربيته يركن

[mokhtarelmalahy]

توصل بالسلامه ياباشا ان شاء الله ورحله موفقه .... ان مجربتهاش قبل كده بس عندى معلومات كويسه لا باس بها هاحاول افيدك بيها ان شاء الله

الاول حضرتك فى مدينه ايه بمعنى هتتحرك ازاى وخط سيرك ايه ؟

مبدءيا لو حضرتك هتطلع من الرياض فيه طريقين

اولا : طريق من الرياض إلى القصيم بريده ثم إلى حائل 350 كم ثم من حائل إلى تبوك حوالي 700 كم باجمالى من الرياض لتبوك حوالى 1400 كم طبعا الرقم ممكن مايبقاش مزبوط بس ده حسب معلوماتى المتواضعه

ثانيا : من الرياض لجده لو عايز تعمل عمره حوالى 600 كم ومن جده لتبوك طريق الساحل على البحر الاحمر حوالى 1000 كم يعنى كله فى حدود 1700

طبعا قبل اى حاجه لازم حاله العربيه تكون تستحمل المشوار ده ولازم قبلها باسبوع تشيك على الزيت والاطارات والبطاريه والمياه عشان تبقى مطمن

وماتنساش طول الطريق تعبى بنزين باستمرار تحسبا لقله وجود محطات بنزين

وطبعا لازم النوم كويس جا قبل الرحله عشان تبقى فايق للطريق ولو لقيت نفسك تعبان شويه فى الطريق ريح شويه او ممكن تقضى ليله فى اى فندق فى مدينه على الطريق او رست

فى ميناء العقبه تقريبا الفرد ب 75 $ والسياره ب 200 $ فى العباره مابتاخدش وقت طويل فى السريعه والبطيئه والمسافه من تبوك للعقبه مش كبيره لا تتعدى 250 كم

تخلى بالك كويس جدا من طريق نويبع لحد النفق او كوبرى السلام لانه مزدوج حارتين بس وفى وسط الجبال وخطير شويه

الرسوم اللى هتدفع للسياره فى الميناء عشان تعلق لوحات جمرك نويبه او جمرك جنوب سيناء

لو العربيه اقل من 1300 سى سى هتبقى 250 جنيه

لو العربيه من 1300 ل 2000 سى سى هتبقى 500 جنيه

لو العربيه اكتر من 2000 سى سى هتبقى 1000 جنيه

المده المسموح يها على ماعتقد 3 شهور

حتعمل بوليصة تأمين على العربية .. حوالي 60 أو 70 جنيه ..

..

فيه فحص فني للسيارة .. حتدفع حوالي 30 جنيه ..

ودول خريطتين تفصيليتين للجزيره العربيه كلها بالمدن والطرق والمسافات يارب تفيدك

ارجو من الاخوه لو فيه معلومه خطا يصححوها....

اى خدمه ياباشا وتوصل بالسلامه .... اجازه سعيده

يا اخي العزيز انا مش عارف اشكرك ازاي علي المعلومات القيمة دي،

انا استفدت جدا من الخرايط دي وسجلت النقط المهمة.

على ايه ياباشا احنا اخوات واللى يقدر يساعد بحاجه مايتاخرش .... اى خدمه يا معلم

[عادل أبوضيف]

رحلة سعيدة وتروح وترجع بالسلامة إن شاء الله

أهم شيء تنسيق مواعيدك في الخروج من الرياض

المسافة كما ذكر الاخوة حوالي 1400 كيلو متر حتي مجمع البلاغة في تبوك

ولو علي حدود الاردن تبقي 1300 كيلو

المهم أفضل شيء أن تخرج من هنا من الرياض علي المغرب كده

حتي تصل إلي المنطقة ما بعد حائل علي حدود الفجر إنشاء وتسوق الفترة الباقية في وضح النهار

لانه يفضل القياده في النهار وخاصة من بعد تيماء حتي تبوك

ربنا يسبل عليك ستره وييسر لك أمرك

تحياتي