ظاهرة المطرب ابو الليف

[MZohairy]

انا مش خورونج انا كينج كونج

انا و ايدي مربوطه بلعب بينج بونج

اغنية المطرب الشعبي ابو الليف

هذا المطرب اللي غنى من عشرين سنه أو أه أه ايئ أه أه أه

ثم غنى بركوته مسخناتي

و انفجر فينا بأغنية انا مش خورونج

http://www.youtube.com/watch?v=UKZG8w94yak

ايه رأيكم ؟

[محمد الششتاوي]

العيب الوحيد فيها ان الالحان والتوزيع مش مناسبين الكلمات

انما فيها فكرة وجرأة كبيرة من مؤلف الكلمات تستحق الاشادة

تحياتي

[myusername]

اولا صوته جميل جدا وحساس ومعبر وأحسن من اصوات كتير

علي سبيل المثال اجدع من ايهاب تلفيق ومحمد مو كحي وسعد الغفير

ثانيا اللحن قمة في الرقة والعذوبة

نيجي بقي للكلمات ودي اللي عليها المشكلة

أولا الكلمات دي من النوع الصادم وده مقصود

ليه ؟

علشان تعمل shockفتتسمع وتنتشر

وعلي الرغم من ان معظم الاغاني الصدمة بتكون خارجة في الغالب عن حدود الادب وخادشة للحياء

الا ان هذا لم يحدث في هذة الاغنية

ثانيا الكلام كله اتقال تقريبا هيقولوا ايه تاني

ونستشهد علي ذلك بالمطرب الهضبة عمرو دياب اللي قال من كام سنه

خلصت فيك كل الكلام

وافتكروا اغانيه في الفترة الاخيرة هتلاقوها اربع خمس جمل بيعيد ويذيد فيهم طول الاغنية

وكل جملة مكونه من كلمتين تلاته وشكرا

يعني اصبح فيه افلاس في الافكار و ملكات التعبير عنها

أنا من رأيي ان الراجل ده ذكي جدا وظهوره بداية لأفول نجم المطربين السوبر بتوع اليومين دول

ده الراجل من ذكاءه بيرضي كل الازواق في اغنية واحدة

بيغني كلمات شعبي علي لحن من النوع ال class music وبالتحديد ال slow melody

ومننساش ان كلامه واقعي جدا

بدليل أنه بيستخدم الفاظ من الواقع المعاش حوله كالفيس بوك مثلا

وقبل ما حد يتريق علي كلامي ولا يفتكرني بهزر يفتكر أغنية سيد درويش الرائد الكبير لما قال

فيك عشرة كوتشينه في البلكونه

وخلوا بالكم ان غناءالكلام ده في العصر ده لا يختلف عن الغناء عن الفيس بوك في عصرنا الراهن

أنا عن نفسي حبيت الاغنية اوي وسأتخذ منها شعاري في الفترة المقبلة :blush2:

الحاجة الوحيدة اللي مش عجباني فيه هي أسمه واعتقد انه أفوارها شوية حتي وأن كان أسمه الحقيقي

تم تعديل 4 أبريل 2010 بواسطة myusername

[myusername]

نسيت اضيف حاجة

كلمة خورونج لغة عربية فصحي صحيحة مائة بالمائة

وأصلها خرونق وهو الشيء الذي ليس له قيمة

وأتحولت لخرونج لأن العرب ينطقون القاف جيم في لغتهم العامية

أما عن تضمينه لكلمات اجنبية في الاغنية فمردود عليه بأنه

franco - arabe song

ذي ما كتير من المطربين عملوا وهذا لا يعيب الاغنية في شيء

وأنما يعتبر مزجا محببا بين اللغات يذيد من تقارب الشعوب ويدعم فكرة الانسانية التي تعلو علي اختلاف الالسنة

حتي وان كانت عن طريق أقتباسات قليلة و متواضعة بين السطور

ولو نفتكر ان داليدا لو مغنتش عربي كان زمانها مجهولة بالنسبة لنا دلوقتي

,اعرف ناس كتير بيحبوا الاغاني الهندية لورود بعض الكلمات العربية فيها من حين لأخر مثل كلمة حبيبي

وأخير أن بشكر ابو الليف وأحيه بحرارة لأنه مطلعش علينا بأغنية

البطيخ البطيخ البطيخ

بيهز حلاوة صوارخ :blush2:

,الشمام الشمام الشمام

ضبًطلي مزاجي تمام :lol:

مع الاعتذار للبطيخ والشمام

تم تعديل 4 أبريل 2010 بواسطة myusername

[عماد الشرقاوي]

ما أعتقده أن الناس اعجبت بهذا المطرب كونها ملت من اغاني العشق والغرام والتي لا تغيير فيها

[se_ Elsyed]

نسيت اضيف حاجة

كلمة خورونج لغة عربية فصحي صحيحة مائة بالمائة

وأصلها خرونق وهو الشيء الذي ليس له قيمة

وأتحولت لخرونج لأن العرب ينطقون القاف جيم في لغتهم العامية

خلاص يا يوزر بقينا نفلسف أي تهجيص ونجيب الباست بارتيسيبول بتاعه ونثبت إنه من اللغة العريبة عشان نقول إنه كلام هادف مش هايف ؟

طب ما لا مؤخذه كلمه عاهره هي كلمة لغة عربية فُصحى

ينفع اغنية بقى تقول :" يا عاهرة يا عاهره يا ام العيون الساحره " ؟

او " يا زنديق يا زنديق ما أروعك من صديق " ؟

يا يوزر ما فيش داعي لده كله ... هي سبوبة والكل بيمد إيده ويلهط منها .... أبو الليف أبو اللوشن كريم ولا أي حاجه بنستخدمها في الحمام .. كله واحده وكله بينهق وبيقلب عيشه

[fatfouta]

والله عندك حق يا سى السيد

بصراحة واحد مقرف واغنية مقرفة.........اسفة انى اقول عليها اغنية او يتقال عليه مطرب اساسا

هو القبح دلوقى بقينا نحلله ونتفرج عليه عادى كده!!!!!!!!

[ابو محمود]

زمان كانت الكلمات حرة يعنى ودان نظيفة تسمع وترتقى وتتناغم الكلمات حين تدخلها

والموسيقى تدل على اهل البيت اللى خارجة منة الاغنية ناهيك عن المطرب وهو الدور الثانوى بعد الكلمات واللحن

اما الان وفى عصر الخلاط وخد وهات تغيرت المعايير

الله يرحم الفن الجميل

الغناء زمان هو عنقود من الدر يتلالأ

الغناء اليوم ماسورة من الفضلات تغمر الشارع بكل جوانبة وتفريعاتة

[se_ Elsyed]

طبعاً من المتوقع إن لو إبن حد فينا سمع البعكوكة دي هايسأل أبوه أو أمه ويقول لهم : يعني إيه خرونج ؟

نجيب له بقى مختار الصحاح ونفهمها له .. ولا نتهرب من السؤال ؟

بصراحة ... بلا قرف

[MZohairy]

اول حاجه يا جماعه عشان تتعلموا النقد الفني و خدوها من اخوكوا الصغير -حيث يوجد في النهر احيانا ما لا يوجد في البحر- لازم نعرف احنا بننتقد مين و ايه العمل اللي بننتقده

يعني ماينفعش نقارن بين الكرنك لعبد الوهاب او الأطلال لأم كلثوم و انا مش خورونج لابو الليف

ليه ما ينفعش؟

مش علشان عبد الوهاب و ام كلثوم عظماء و ابو الليف نكره

لأ

لكن لاختلاف طبيعة الشيئ المقارن يعني ماينفعش نقارن لمونه و تفاحه مثلا

الراجل ده بيغني غناء شعبي و بالتالي يجب ان نضعه في هذا الإطار اولا

ثانيا فظاظة بعض الكلمات كخورونج و كورك هي كلمات منتشره بين نسبه كبيره من الشعب المصري و هي ليست ظاهره جديده

فمأمون الشناوي كتب لعدويه في السبعينات مثلا قرقشنجي دبح كبشه يا محلى مرقة لحم كبشه نكشه طنش قلشه اقلش عكشه و هي كلمات سوقيه جدا

اذا يجب ان نتفق ان تقييم الغناء الشعبي لا يجب ان يتداخل مع تقيمنا للغناء العاطفي الراقي

الراجل جاب كلام صادم و جديد ككلام شعبي غنائي

و عمل لحن غريب كلاسيكي مافيهوش اي طبله!!! و اعتقد اني ماسمعتش اغنيه شعبيه قبل كده مافيهاش ايقاع راقص

بالاضافه الى ان امكانياته الصوتيه جيده

وكل دي عناصر تحسب له

كل ده لا يثبت قبولي لمستوى الكلمات

الا ان الكثيرين قد يقبلونها و يحبوها كمان

و الفن اذواق يا ساده

اورفوار

[myusername]

حد فيكم يا جماعة سمع عن الارجوزة وهي ليست مؤنث الاراجوز ولكنها نوع من الشعر المنظوم في قالب فكاهي شعبي

تعرفوا ان الامثال الشعبية ومهما بالغت في السوقية الا انها نوع من الادب والتراث الفكري لأي أمه ؟

تعرفوا كده ؟

وتعرفوا ان فيه علماء لغة بيسافروا لقري مصرية نائية ومش علي الخريطة علشان يجمعوا امثال شعبية ومفردات هي قمة السوقية والاباحية بمقاييس مرجعيتنا اللغوية في العصر الحالي ؟

طب ايه رأيكم في اشعار نزار قباني ومحتاجة قاموس من اي نوع علشان تشرحوا مفرداتها لاولادكم

علي فكرة يا حاج سين سين الراجل ده مش عامل سبوبة والله لأنها لو سبوبه كان رقصنا علي واحدة ونص ومشي سوق الاغنية في الافراح والنايت كلوب والديسكوهات

لكن الاغنية دي ملهاش سوق في الحتت دي وهو عارف وواعي لكدة كويس

وعلي أد بساطة الكلمات- ولن اقول سذاجتها لأنها ليست كذلك - ألا ان الكتابة في هذا النوع من الغناء يتطلب حرفية شديدة وموهبة فطرية ليست بالعادية وأنا أكيد من اللي بقوله

وعدد كبير جدا من مؤلفي الاغاني الرومانسية النظيفة من وجهة نظركم لا يستطيعون وبمنتهي الامانة مجاراة مثل هذه الاغنية

وخدوا عندكم نماذج من الغناءفي الزمن الجميل

بعد العشا يحلا الهزار والفرفشة

شفتي بتاكلني أنا في عرضك

الطشت قالي الطشت قالي

أرخي الستارة اللي ف ريحنا احسن جيرانك تجرحنا

وللعلم هذا النوع من الفن لم يكن مستهجن علي الرغم من زيوع وانتشار غناء القصائد الثقيلة أنذاك

وأنما كانوا يعتبرون هذا الغناء ذو الكلمات الدارجة البسيطة هو نوع من الشقاوة الذهنية ان جاز التعبير هدفها الخروج عن المألوف وتزجية الوقت ومعهم كل الحق لأننا لو واظبنا علي أكل اللحوم يوميا سنمل حتما بل قد نصاب بالتخمة

وقد يتوق المرء لأرتداء جلابية كتلك التي كان يرتديها اجداده رغبة منه في التغيير تارة وتمردا علي المفروض تارة اخري

قولوا بقي اللي انتوا عايزين تقولوه بس متحجروش علي رأي حد لأنه لولا اختلاف الاذواق لبارت السلع

تحياتي :sad:

تم تعديل 5 أبريل 2010 بواسطة myusername

[MZohairy]

و دي كلمات الأغنيه لبهجت قمر

بتحبنى ... لا اشك ... مين دول اللي علي الفيس بوك

لو مشلتيش العيال دى ... عليك هسك ....

وانااااااااااااااا

انا مش خرونج ... لا .... لا .... لا .... انا كنج كونج .

.. ده انا وانا رابط ايدى بلعب بنج بونج ....

مش ابن هانم ولا ابن لورد اتفضلي ادى الباسورد

ده انا اراجوز متربي في سيرك مش عيل كاورك ....

وانااااااااااااااا

انا مش خرونج ... لا .... لا .... لا .... انا كنج كونج

... ده انا وانا رابط ايدى بلعب بنج بونج

[عاشق الترحال]

كل شيخ وله طريق وكل فوله ولها كيال وبفرض أن ( نادر أبو الليف ) اللي كان عامل أغنيه ( أوأ إي آ أوأ ا آ آ أأإ أأو ) في بداية التسعينات لم تتح له الفرصه طوال هذه الأعوام إلا من خلال هذا الألبوم الذي كتبه له أيمن بهجت قمر فمن المؤكد أن أيمن بهجت قمر وتقريبا محمد مصطفى الموزع كل منهم يعي جيدا مدى تقبل الشارع المصري لمثل هذه النوعيات من الأغاني .

فإن كان ابو الليف يصبوا لتحقيق فرقعه وبروباجندا وطبعا ربح مادي فأكيد هو حقق ده وبضربه واحده أما إن كان فعلا يريد الإستمرار وان يسطع في سماء الطرب :sad: فالمشوار لا زال طويلا .

وكما تعودنا في الفترات السابقه أن كل من أراد أن يلمع نجمه ويسلط عليه الأضواء لابد وأن يأتي بشئ جديد أو شاذ سواء أكان بالكلمات والألحان مثل شعبولا أو الأسلوب سعد الصغير ووسطه السايب أو بكليب ساخن كما هو الحال مع روبي والعجله ونجلا والحصان .

وهنا في هذه الظاهره نجد أن ابو الليف إستخدم الكلمات الدارجه والتي قد توصف بالبيئه عند بعض طبقات المجتمع مستعينا بألحان جميله .

والسؤال الآن ما هو السبب في تقبلنا نحن لمثل هذه الظواهر ؟

وهل سيستمر أبوالليف أم سيكون مثل من سبقوه ؟

اتفق مع وجهة النظر التي تقول بأنها لقمه وكله بيقلب عيشه وببلهط منها وللأسف أمثال هؤلاء هما اللي بيسلط عليهم الأضواء وبيبقوا ملء السمع والبصر لما بقت حاجه تصد النفس والبلد حالها كل يوم مايل عن اللي قبله في شتى المجالات أما نشوف آخرتها أيه وهترسي بينا على فين !

تحياتي :sad:

[myusername]

انا طول عمري بقول الواد بهجت ده شويط كبير

وجون وجون وجون وجون

تصدق يا زهيري باشا انا مكونتش عارف ان بهجت قمر هو اللي كاتب الاغنية

لكن والله كنت متأكد ان اللي كاتبها واحد مثقف جدا ودماغ كمان من غير حتي ما اعرف هو مين

بس ماحبتش اقول كدة بعدين يتريقوا ويقولوا ااااااااااااااااااه دمااااااااااااااااااغ

طب مش كنت تقول كده من الاول يا يوزر :sad:

تم تعديل 5 أبريل 2010 بواسطة myusername

[لماضة مصرية جدا]

السلام عليكم و رحمة الله و بركاته

هو التوبيك في حتة الفنون....يبقي اكيد هيبقي فيه نقد فني و كلام كبير كده....و انا شايفة ما شاء الله كل واحد شايل منشة الدبان و جاي يضرب في التلوث

هو انا مش عارفة هو احنا اللي ودانا اتعودت....بس لا بنسمع حاجات تانية كتير.,,,,و كل واحد حر في اختياراته

اوقات بيسمع عمر خيرت و يعيش مع الحالة....و اوقات حالة الخنقة و التلوث الانساني و الفكري بيخلوا الواحد عايز غيبوبة زي اغنية "حجرين ع الشيشة"....و كل اخواتها

احنا فينا كل ده.....فينا الجمال الراقي....و فينا العشوائية

فينا الاحساس المرهف....و فينا التوحش

عارفة انكم هتقولولي الفن المفروض يرتقي بمشاعر الناس

بس الفن في الاول و في الالخر.....طائر حر......متربطوش بدماغك...و لا باحساسك...و لا انت عايز تسمع ايه او تشوف ايه

الفن يعني تنوع...صح و لا لا؟؟؟

طب ليه الناس عمالة تشتم في كل جيل الحشاشين...او الاغاني اللي بتتعمل في قعدة حشيش (الحقيقة كنت سمعت المصطلح دع في التلفزيون)...و حد يقولي يعني ايه

"العتبة جزاز,,,,,,, و السلم نايلو في نايلو"

و اللي غنتها فوقية نظمي...و لا مش فاكرة اسمها ايه......ليه محدش قاعد يسلخ فيهم و فاكرين ان الزمن اللي فات هو بس بتاع عبد الحليم و عبد الوهاب.....

طب ما عدوية طلع و اتشهر في وقت العمالقة

يا اخوانا......التضاد....بيبرز جمال الاشياء...بيصدمك بالكائن البدائي المتوحش اللي انت فاكر انك نيمته...و هو بس لسه بيتروض

و دي وجهة نظري

و الحل........انت تملك الاختيار....بس لا تحرمني منه

==============================

عارفين بقي لو كنا فتحنا التوبيك ده في موضوعات شخصية....كان هيبقي هايل جدا....لسه شايفة ليه لقاء في التلفزيون مع رولا خرسا....

ابو الليف شاب مكااااااااااافح جدا...حلم حلم......و سعي يحققه...مهما اختلفنا علي الحلم....بس لسه فيه شباب بيحلم...و بيكافح...عشان حلمه

وجهة نظر

تحياتي

[se_ Elsyed]

ثانيا فظاظة بعض الكلمات كخورونج و كورك هي كلمات منتشره بين نسبه كبيره من الشعب المصري و هي ليست ظاهره جديده

أختلف معك - مش جديده يعني :sad: -

ليس كل ما يُقال يبقى يتغني ويتعبى في شرايط ..

بدليل إن في ألفاظ قذرة إنتشرت بين الشباب .. بل للأسف والكبار في عصر الإنحطاط الاخلاقي الأن وبقت زي الحلاوه وبتتقال عادي جداً ...

إيه .. ينفع دي كمان أعبيها في أسطوانات وأقول ما هي منتشرة وموجودة هاننكرها ليه ؟

اذا يجب ان نتفق ان تقييم الغناء الشعبي لا يجب ان يتداخل مع تقيمنا للغناء العاطفي الراقي

أنا ماليش دعوه شعبي ولا شعبك ...

وكل ما يعنيني إن ده كلام قبيح ولا يجب أن يُقال

يا راجل ده في التسعينات لما شعبان عبد الرحيم طلع بأول قصائده العصماء وغنى " كداب يا خيشه " الدنيا أتقلبت ..

لكن مقارنة باللي بيتقال اليومين دول .. فكداب يا خشية تعتبر ملحمه خالدة على كده

-------------

لكن والله كنت متأكد ان اللي كاتبها واحد مثقف جدا ودماغ كمان من غير حتي ما اعرف هو مين

إيه ده .. هو اللي بقى يقول الكلام السوقي المنحط ده .. كده يبقى مُقف ؟

ما كنتش أعرف إن ده هو المنطق بصراحه

!!!!!!!!!!!!!!!!!!!!!

-------------

طب ايه رأيكم في اشعار نزار قباني ومحتاجة قاموس من اي نوع علشان تشرحوا مفرداتها لاولادكم

شاور لي كده على الاطفال اللي بيقرأوا شعر نزار القباني وطفولة نهد والكلام ده ؟

وبعدين أنا اخلي ولادي مثلاً يتفرجوا على فيلم للكبار فقط وأرجع ألوم نفسي ؟ ولا كل عمل فني ولا بلى أزرق له تصنيف للأعمار ؟

وعدد كبير جدا من مؤلفي الاغاني الرومانسية النظيفة من وجهة نظركم لا يستطيعون وبمنتهي الامانة مجاراة مثل هذه الاغنية وخدوا عندكم نماذج من الغناءفي الزمن الجميل

بعد العشا يحلا الهزار والفرفشة

شفتي بتاكلني أنا في عرضك

الطشت قالي الطشت قالي

أرخي الستارة اللي ف ريحنا احسن جيرانك تجرحنا

لا يا يوزر .. مقارنة وأستشهاد خاطيء جداً

لأن في نفس الزمن اللي كان الناس بينتظروا حفلات أم كلثوم وفريد وعبد الوهاب وعبد الحليم ويلتفوا حوالين الراديو بمنتهى الوقار والاحترام .. كانت فعلاً الأغاني المنحطه دي موجوده .. لكن فين ؟

حدودها سعادتك لم تتعدا الكباريهات والمواخير واللي كان بيرتادها هانقول 1 % من الشعب اللي كانوا قادرين ومنحلين ...

وبالتالي لم تكن تلك الكلمات منتشرة ولم يكن لها تسجيلات ولا انتشار خارج تلك الحدود

بالإضافة إلى إنك لن تجد قلماً يذكرها أو ينتقدها .. لأنها لا تستحق النقد أساساً فهي اغاني السكارى والمساطيل ..

وللعلم هذا النوع من الفن لم يكن مستهجن علي الرغم من زيوع وانتشار غناء القصائد الثقيلة أنذاك

مستحيل .. وغير صحيح بالمره .. فالأُذن التي تسمع الاطلال والكرنك والنهر الخالد مستحيل ترمرم وتسمع " أرخي الستارة اللي فريحنا "

وأنما كانوا يعتبرون هذا الغناء ذو الكلمات الدارجة البسيطة هو نوع من الشقاوة الذهنية ان جاز التعبير هدفها الخروج عن المألوف وتزجية الوقت ومعهم كل الحق لأننا لو واظبنا علي أكل اللحوم يوميا سنمل حتما بل قد نصاب بالتخمة

وقد يتوق المرء لأرتداء جلابية كتلك التي كان يرتديها اجداده رغبة منه في التغيير تارة وتمردا علي المفروض تارة اخري

وهل لابد للتغير أن يكون قبيح ويرفضه العقل ؟

وإيه علاقة الجلابية بلبس البدلة ؟

دي حتى الجلاليب الواحد بيحس فيها بالرحرحة والوسع كده بدل خنقة الكرافتة :sad:

وبعدين في البيت الواحد هايقعد لابس أسموكنج وبيبيون ؟؟؟

وهل لما الواحد يبقى متعود عن أختيار الكلمات المحترمة سواء في النطق أو السمع .. هل لازم عشان يكسر المألوف يتحول لقلة الأدب ويسمع قلة أدب زي اللي بيقوله أبو الليف وأمثاله ؟

قولوا بقي اللي انتوا عايزين تقولوه بس متحجروش علي رأي حد لأنه لولا اختلاف الاذواق لبارت السلع

في أشياء بديهية يا يوزر

يعني الاكل الحمضان مش سلعة عشان الاقي ناس تُقبل عليه من باب التغيير

[Tafshan]

عموماً بقيت غالباً مش باسمع اغانى .. بقت ممله و مافيهاش جديد ..

بس طول عمرى باعتقد ان الموسيقى عامله زى الاكل .. امزجه ..

يعنى في ناس غاويه كلاسيك ... كونشيرتو مش عارف ايه و بيتهوفن .. و البيت اللى جنبه .. عادى .. زى الناس الفيجيتريان كده .. لازم الخضار يبقة مسلوق عشان اللحمه فيها كلسترول و الخيار مش عارف فيه كام سعر حرارى و كده ..

و في ناس بتحب الموسيقى العربيه .. زى اللى بيحبوا الكوارع كده .. شوربه و دسم و حاجه كده زى ما بيقولوا مطرح ما تسري تمرى ...

و في ناس بتحب البوب .. يعنى حمائى و تامر حسنى و الطقم ده .. دول زى اللى بيحبوا ماكدونلز .. اكل من غير طعم بس ستايل ..

و في ناس بتحب الجاز فيشدهم السلم الخماسي و اغانى منير .. زى اللى بيحب يجرب اى حاجه جديده المهم تكون طعمها حلو .. دول ممكن يلقطوا اي نغمه جديده و يتقبلوها اكثر من غيرهم ...

و في ناس مندمجه في العشوائيات فيحبوا اللون العشوائى .. شعبولا بقى و سعد الصغير و بعرور و الطقم ده .. دول ما اختاروش الغناء العشوائى .. الغناء العشوائى هو اللى اختارهم .. زى اللى متعود ياخذ سندوتش الكبده من على ناصية الشارع و هو رايح الشغل .. مش بيحبه بس هو ده اللى "المناسب " ليه .. الناس دى ما ينفعش تسمع واحد بيموت نفسه عشان واحده سابته .. ما تولع بجاز !! عنده كم مشاكل ما فيهمش و لا واحده عاطفيه .. يبقى الطبيعي انه يسمع حد من لونه ..

الفن في الاول و الاخر بيعبر عن المجتمع .. ابو الليف صوت بيعبر عن طبقة الشباب اللى بين البينين .. بين العشوائيه و بين الطبقه الوسطى .. شباب مش موجود على الخريطه بس حجمه كبير .. و لذلك ممكن ينجح و يكسر الدنيا .. و زى شعبان عبد الرحيم كده ح يفضلوا عشر سينين بيقولوا عليه ظاهره !

[MZohairy]

حد فيكو سمع عن اوبريت العشره الطيبه لخالد الذكر الشيخ سيد درويش؟

دي بعض كلماته

العشرة الطيبة (1920)

سيف الدين على قد الليل مايطول مسترضي بسهرى ونوحي

في حبك ياللي من اول مشوفك تترد روحي

سنين وأيام هايم فيكي بزمارتي اصحيكي

طول ماأنا وانت في الدنيا دي افوت اهلي واجدادي

حروح على فين وانتي قصادي

نزهة (من النافذة) أه ياترى ياربي ده هو واللا لأ... حبوبي؟

سيف الدين ياعين الحبوب من جوه

ياسبب وعدي ومكتوبي ياكتاكيتها

نزهة ياننوسه

سيف الدين ياقطاقيطها

نزهة ياحنتوسه

سيف الدين ده انا م النجمة في استنظارك

نزهة آديني نازلة

سيف الدين اما نهارك ابيض من طبق القشدة

نزهة اوعى يكون حد شايف طيفي

سيف الدين حطي في بطنك بطيخة صيفي..

شفتي بتاكلني انا في عرضك

خليها تسلم على خدك

نزهة يوه يا دين النبي تنك سايح ماشبعتش من ليلة امبارح

سيف الدين ماتفكرنيش اما دي حقة كانت ليلة في غاية الرقة

نزهة فاكر وانا حاطة ايديه في بطاطك قبلي الترعة

على غفلة ملت عليه ماقدرتش اقولك اوعى

سيف الدين قمت انا بصيت يمين وشمال

ساعة مالقيت مفيش عزال

طبل طبلي كده كده كده كده

وزمر زمري كده كده كده كده وشقلي بقلي

وعنها ودغري خدت لي بوسة لكن صنعة

نزهة من يومها عرفت في الآخر انك مستعبط ساهي

ايش قولت المثل الساير ياما تحت الساهي دواهي

سيف الدين أه عليها عيون ماتلتقهاش على منادمين باكده يابلاش

نزهة عليه مناخير فشر النبقة

سيف الدين اما قوامها زيه ماتلقى دانا متبرجل ياحدقة ياكتاكيتها

ياننوسها ياقطاقيطها ياحنتوسها

اديني بوسة وكمان بوسة

شفتي بتاكلني انا في عرضك

خليها تسلم على خدك

نزهة ياه يادين النبي تنك سايح ماشبعتش من ليلة امبارح

سيف الدين متفكرنيش اما دي حقه كانت ليلة في غاية الرقة

[engmido]

اولا حسبى الله ونعم الوكيل

وعشنا وشفنا

وممكن على راى س س نجيب مختار الصحاح والمعجم الوسيط والفيروز ابادى لو عايزين ...

ثانيا مشكلتنا فى مصر المفاهيم المغلوطة

نطبل ونهلل للر قاصة والممثل الهلاس و نقول الفنانين ولهم حق ....اما صفوة المجتمع من علماء الدين وغيرهم من علماء الدنيا.........

يا عم سيبك وافحت واردم عليهم....!!!!!!...... للاسف ده اسلوبنا فى مصر عندما تنقلب الايه وتعكس المفاهيم ويصير اللغط فنا والعلم غير ذى قيمة

يبقى انت اكيد فى مصر...ويمكن فى الوطن العربى

ومثال على ذلك كان فى بدايات شعبان عبد الرحيم ذلك الجهبز...كانوا يستضيفونه فى البرامج للتريقة والاستهزاء ( ياما منى الحسينى استضافته ومسخرته)

ومرة على مرة بقى فنان والكدبة الللى كدبناها ...احنا برده اللى بنصدقها...بس وشكراااا

امبارح كان ع المحور مع معتز باشا وقعد يتكلم ويقولك انا كنت باشحت وكنت باشتغل فى ليبيا .(.طبعا لا نعيب العمل)

ولكن جه من ليبيا عشان ميلودى باشا حسبى الله ونعم الوكيل شايفة ان الاذواق بقت زفت واللى تغلب به العب به

هات اى هبل فى اى عبط شريك اسطوانة نت لحن عبط ..زززززززززززززززززز

شكرااا المطرب اللامع

وهو نفسه بيقول وادونى شقة وادونى مش عارف ايه يعنى كله اكل عيش

ولا عزاء لجهابزة النقد الفنى

[AbkaReno]

امبارح كانو جايبين واحد في المحور وانا عمال اسمع البرنامج هوا مين يا جدعان ده وفضلت قاعد كتير لحد ما عرفت انه صاحب الاغنيه رحت قلبت على القناه وتابعت فيلم اجنبي افضل.. عمال يقول كلام غريب كل كلمة وسؤال يقول الحمد لله ربنا رزقني والف شكر لشركة مولتي وجاب كل الناس الي وقفو جمبو

طيب هل هما استضافوه علشان يكون سبق اعلامي للقناه ولا استضافوه علشان يبينلك ان الشعب المصري تافه وهايف للدرجه انه بيسمع اغاني صاقطه.؟؟

انا فعلا مش من هواة الاغاني ولا بسمعها ولما بحب اسمع حاجه بشغل الفنان الكبير yanni