بنك أفكار الأعمال الخيرية

[jasmin hamed]

ماتقلقوش يا اخوانا انا مابشحتش

الموضوع و ما فيه انى كنت قاعده مع نفسى قاعده سقراطيه نسبة الى اسم سقرا ط ( اسم الدلع) من حوالى 6 سنين و بعدين شوفت راجل كبير ينادى فى الشارع .....(جعان جعان يا ناس )

قلبى اتقطع و مش عارفه نزلت اذاى الشارع و البقيه ................مش مهم

رجعت البيت و عندى احسا س بغضب غريب تجاه كل حاجه اذاى ابقى انا فى بيت ممكن يرمى اكل مله و ناس مش لاقيه تاكل

يبقى كل واحد يجيله فلوس يروح يبنى جامع و يحط عليه يافطه باسمه و الناس بتنام فى الشارع

يعنى انا صلاتى و صيامى هتنفع الناس المرميه فى الشوارع

العبادات مطلوبه و فرض على كل انسان لكن لو وقفنا عندها المجتمع مش هيتغير

و عليه جلست افكر و افكر اذاى ممكن اعمل حاجه

انا طول عمرى اسمع عن جمعيات خيريه بس ما شوفتهاش و بعدين انا مش عايزه اروح اشترك فى

عمل تطوعى و يومين و انسي او كسل انا عايزه حاجه دايمه طول ما انا عايشه عادات ادخلها فى مفردات اليوم

و عليه فكرت فى مشروعين سهلين خالص و قابلين للتنفيذ

اولا نسبه من الدخل

لو كل واحد مننا فكران نسبه و لنفرض واحد فى الميه هستغنى عنها و يبقى ذيها ذى الايجار

و مايبصلهاش اطلاقا حتى لو بيموت و تحولها لقريب متعثر مثلا لو قدرت تشرك قرايب او صحاب ممكن تلاقيك كفلت اكثر من اسره بس انا

مابؤمنش بمبدا التوكال و عشان كده كل اسره من الاسر الى قررنا نساعدهم باخد عليهم عهد

لو شباب مثلا انهم يردوا نسبه لاسر اخرى محتاجه لما يشتغلوا

طبعا انا مش راقيبه عليهم و لا هسئلهم عملتوا كده و لا او لا انا خدت العهد و هما حرين

بس الحقييقه اسرتين من الى تم مساعدتهم ابتدوا الولاد يشتغلوا و يساعدوا ناس تانيه فعلا

و النتيجه النهائيه 15 فرد فى محيط الاسره بيكفل حوالى عشر اسر الكلام ده بعد 6 سنوات

المشروع التانى :

(مشروع ونيس لكم اخوه فى الصومال )

اسهل من الاولانى الحقييقه و المبداء فيه مش مساعدة الفقرا بالضروره انما عدم الاهدار

مثلا اول ما ست البيت تطبخ الاكل تشيل ربعه الاكل و تبعته الجامع

الجامع الى جنب بيتنا فيه حاجه ذى سبيل كده اتصور موجوده فى كل الجوامع

انا مش عايزه اقول ابعتوه لاسره فى المنطقه لان اكيد فى ايام مابنطبخش مثلا او بنسافر و لو حد اعتمد على كده تبقى مشكله

و ماتفكرش ان الاكل ده ممكن الى يكله ما يكنش فقير مش مهم فقير او غنىالمهم ان

يستغل

و المهم انها تبقى عاده يوميه ذيها ذى الصلاه مش نعملها فى رمضان و خلاص

المشروع التالت :

[size"6"]القرض الحسن

رغم انى بحب اساعد الناس بس بكره الستنطاع و الاتكال الشحاته بمعنى اصح و فكرة المشروع ديه مش فكرتى خالص ديه فكرة امام زاويه فى عماره قريبه مننا

هو المنظم للمشروع كمان

الشاب ده بتجيلو ناس كتير تتبرع فى الحامع بمبالغ مختلفه ماكنش عارف اذاى يتاكد انهم بيروحو ا للبيستحق المهم و عشان كفاية طولت عليكم قوى

جمع الفلوس و عمل بيها كشك لاسره بسيطه الدخل و اشترط على الاسره و كتب عليه وصولات امانه انه يرجع 100 جنيه فى الشهر

و كل مره بيتجمع فلوس بيستنى و يعمل بهم مشرع و هكذا لحد مابقى الدخل كل ست شهور تقريبا ما شاء الله بيعمل مشرع بسيط و هكذا

انا بقى برغى الرغى ده كله ليه عشان اقولكم لو عايز تساعد مش محتاج جمعيه الموضع بيبتدى بالقمه الى بتاكلها

بالهدوم ال مستنين لما نخس عشان نلبسها

باللعب الى مكركبه الاود عشان ليها معنا ذكريات

بالكوبايات و الاطباق الى فى المطبخ ذياده و ممكن تجهز عروسه

نعمل اى حاجه اى حاجه بس نعمل مش رغى و خناقات

اى حد عنده افكار يتفضل يقولهلنا

المره الجايه هقولكم قصة شاب اسمه محمد مع المشروع الاول

[shiko]

فى البداية احب طبعا ...

اشكر الله ان يسر لنا ان نشاركك الراى ..

وثانيا ...ربنا يجزيكى خير ...ويجعله فى موازين حسناتك ...

انه ولى ذلك والقادر عليه ...

ولا ننسى ان الدال على الخير كفاعله ...

(مشروع ونيس لكم اخوه فى الصومال )

اسهل من الاولانى الحقييقه و المبداء فيه مش مساعدة الفقرا بالضروره انما عدم الاهدار

مثلا اول ما ست البيت تطبخ الاكل تشيل ربعه الاكل و تبعته الجامع

الجامع الى جنب بيتنا فيه حاجه ذى سبيل كده اتصور موجوده فى كل الجوامع

......الحقيقة المشروع ده بفضل ربنا طبقناه ..عندنا بالمسجد بشكل منظم ..حتى استقر ..

وبات مطبخ دائم ويومى لكثير من الاسر والافراد...ومقصد الكثير من العمالة اليومية

والجميل ان ربنا انعم علينا وبدءنا فى مساعدة ...المساجد الاخرى المجاورة فى تطبيق نفس الفكرة وبصراحة

ولاقينا شركات كتير كبيرة ..تأكدت من حسن سير المطبخ بتبعتلنا مواد تموينية بشكل دائم

المشروع التالت :

القرض الحسن

جمع الفلوس و عمل بيها كشك لاسره بسيطه الدخل و اشترط على الاسره و كتب عليه وصولات امانه انه يرجع 100 جنيه فى الشهر

و كل مره بيتجمع فلوس بيستنى و يعمل بهم مشرع و هكذا لحد مابقى الدخل كل ست شهور تقريبا ما شاء الله بيعمل مشرع بسيط و هكذا

المشروع ده اكتر من هايل ,,,والله براوة عليكى يا جاسى ...ان شاء الله ربنا يثيبك عنا كل الخير ...

الحمد لله ...المشروع ده اعرف ناس بتعمله على صغير ..يعنى فى حدود من 300 إلى 5000ج ..وده بناءا على قياسات محددة هما بيعملوه ..وبينزلوا الاسواق الشعبية ...للناس اللى فرشة فى الارض ..وبيحاول يعمله اعداة تمويل ..علشان يساعده بضوابط بتضمن اعادة الفلوس دى تانى

لا تعطنى سمكة ...بل علمنى كيف اصطاد...

الحقيقة ياجماعة دعوة ياسمين ...كانت مبادرة طيبة علشان يكون عندنا بنك لافكار تنمية المجتمع ...

ياريت كل حد عنده فكرة زى ياسمين سهل تطبيقها او مستعد لمشاركة اخرين لتطبيقها ...يدينا من وقته اقل القليل ويقولنا عليها

[jasmin hamed]

ماشاء الله حاجه تفرح يا شيكو

و الموضوع ده يخلينى اسئل هل دور الجامع فى الاسلام الصلاه بس

و لا ممكن يبقى كل جامع و جامع للخير و العمل التطوعى و تنظيم المجهودات الفرديه

انا مش بتكلم على ملحقات الجومع ذى العيادات و دور المناسبات انا بتكلم على مستوى الشارع و الافراد

العمل الخيرى الى مش محتاج مؤسسه تتكلف ملاين محتاج تنظيم

[shiko]

ماشاء الله حاجه تفرح يا شيكو

و الموضوع ده يخلينى اسئل هل دور الجامع فى الاسلام الصلاه بس

و لا ممكن يبقى كل جامع و جامع للخير و العمل التطوعى و تنظيم المجهودات الفرديه

انا مش بتكلم على ملحقات الجومع ذى العيادات و دور المناسبات انا بتكلم على مستوى الشارع و الافراد

العمل الخيرى الى مش محتاج مؤسسه تتكلف ملاين محتاج تنظيم

...والله بصى يا ياسمين هو طبعا انا نسيت اقول ان الفكرة كانت لرجل اعمال ..

فتح مطبخ يومى فى منطقة ورش وعمال..مكتظة بالعمالة والاطفال

وكان يقصد بها ..اطعام المتوكل على الله بعمله ...موش متواكل وبيمد ايديه ...

ولما اتناقشت معاه سمعته بيقول ان لو ضمنا" الضامن هو ربنا" انه مافيش بنى ادم ينام جعان

...هنأمن كثير من الشر بين بنو البشر

وانتشرت الفكرة بالحى الذى اسكنه بفضل هذا الرجل ...

جعله الله فى موازين حسناته...وطبعا اكتشفت من خلال التجربة الاولى ان المشكلة ماكنتش فلوس ..

الموضوع ...ادارة بالدرجة الاولى ..

بحسن التنظيم والادارة ....وصدق النوايا مع الله ....شىء يستاهل ...تحقيق المستحيلات

انا موش ضد بناء الماءذن ودى للى يعرف بتتكلف على الاقل 50 الف جنيه للمئذنة الواحدة ...بس كمان الاولى بدل بناء ورفع مئذنتين للمسجد ...ان نسد حاجات المسلمين ...

[لماضة مصرية جدا]

السلام عليكم و رحمة الله و بركاته

يعني انا قريت التوبيك و داخلة مطبقة حتة بخمسة .....

غيري العنوان يا جاسمين....شيكو قالت.....بنك الافكار....و هو فعلا كده...

العمل التطوعي مش بيقف لا عند جامع و لا كنيسة و لا حتي جمعية اهلية او منظمة مجتمع مدني

العمل التطوعي...بيبقي قناعة داخلية من جواكي منين ما تكوني انك مش عايشة لوحدك....و قادرة تحسي بغيرك و احتياجاته.....و قادرة تبذلي الجهد و الوقت و المال علشان توصليله

عارفة يا جاسمين حابة افكر بحاجة....

ناس كتير بتفتكر انها لما بتساعد غيرها ان غيرهم ده هو اللي بينبسط و انتي داخلة عليه شايلة مثلا شنطة رمضان او بطاطين الشتا.....

الحقيقة بقي....انك انتي اللي بتنبسطي...اكتر...بتبصي للسما و تسالي ربنا يا تري رضيت عني يا رب؟؟؟

مصر مليناة مجهودات مميزة جدا جدا.....اشهرها جمعية رسالة.....و اللي ابتدت كمجموعة من شباب كلية الهندسة....

و جمعية صناع الحياة اللي بداها عمرو خالد لكن الفكرة بدات تكبر و تكبر لغاية ما غطت مصر كلها

عارفة يا جاسمين.....كنت زمان لما مش بشتغل بكون زعلانة جدا...بقول مش معايا فلوس و كده....بس اكتشفت ان اسهل حاجة انك تدي فلوس....لكن بتضيع ع الواحد متعة كبيرة اوي اوي....انه يشارك بشكل حقيقي

اقولك مثال

لما بيكون فيه دعوة مثلا لتجهيز اخت غير قادرة...بتلاقي الكل بيتسابق انه يجيبلها حاجة المطبخ....او هدوم....بس لو انتي مش معاكي و لا واحدة منهم عارفة تعمل ايه

تروحي تحضري الفرح....و خصوصا اذا كانت يتيمة....تروحي تقفي جنبها في الكوافير....تعملي ليها حنة من الجيران اللي حواليها تحسسيها انها مش لوحدها

ده مش محتاج فلوس....و لا محتاج.....نقعد نخطط....محتاج بس نعرف نحس باللي قدامنا و نحط نفسنا مكانه...

ايه اللي يدخل الفرحة علي قلبه

ممكن احكيلك علي حاجة

محمد...علمني حاجة مهمة جدا

...و ده غير محمد اللي انتي هتحكي حكايته....ده شاب نحسبه علي خير.....لما بيجي رمضان...بيعمل ايه...بيبتدي في مشروع شنطة رمضان.....عارفة يا جاسمين...انا في البداية قولتله طب يا محمد احنا نلم فلوس و كده و نشتري

كان في دماغي اني هروح السوبر ماركت اجيب رصة حاجات و اطلع

لقيت محمد بيضحك و اخدني من ايدي و رحنا فين

رحنا عند تجار الجملة....و بدل ما يكون عدد ؟؟؟؟ من الشنط بقي الضعف

لقيته بيشيل الاشولة علي كتفه.....لقيته بيقولي لازم نحس و ننوي في كل خطوة بنعملها انها تكون لربنا و كل ما نتعب اكتر كل ما ربنا هيدينا ثواب اكتر

لما كانت المنطقة المستهدفة منطقة بعيدة شوية...فكرنا نروح بالعربيات و كده...لقيته بيقول لا هنركب نفس الموصالات اللي الناس بتاخدها....و هنمشي وسط الناس.....

المفروض و المجموعة بتوزع....الحاجات....نسلم و نمشي...فيه ناس كتير اتعرفنا علهم....و سبحان الله الناس اللي بتبقي في قمة الاحتياج بس بتبقي مصرة انها تمسك فيكي و تروح تملا لتر الحاجة الساقعة عشان مبسوطة بيكي

مع انهم مش عارفين ان احنا اللي مبسوطين بيهم...احنا اللي عطشانين للثواب من خلالهم

عارفة يا جاسمين....لما سافرت عن مصر اكتر حاجة زعلتني اني بعدت عن كل المجموعات اللي كنا بنشتغل مع بعض

بس لقيت ان لو فيه نية خالصة ربنا بيدلك...... لا توجد بلد تخلو من عمل تطوعي.....بيختلف شكله....لكن افكارك....و طاقتك ووقتك تقدري جدا انك تلتحمي بيها مع الناس

هحكيلك عن حاجة هنا في الامارات اسمها تكاتف....و برضه افكار بسيطة جدا.....لكنها في قلب الحياة جدا

ممكن تشوفي برنامج مجددون بتاع عمرو خالد كمان بيطرح افكار و تطبيقات مهمة كتير

و نسال الله ان يتقبل

و بسال ربنا

هل انت راض يا رب؟؟

[shiko]

اضاااااااافة صغنونة بعد ...كلام اللنضة ...اللى فوق...

اصلى ساعات بشوفها ...لنضة منورة ...موش لمضة ...

انا شوفت مشروع ..."مقتبس"....عاجبنى وداخل دماغى موووووت ...

ونفسى كل دور العبادة والرعاية تنفذه

المشروع فكرته بتقوم على الدعم الجزئى (الكفالة العينية)

يعنى نشترى السلع من اماكن الجملة ...وبسعر مناسب

ونعمل مخزن لبيع السلع بالمسجد اللى فى المنطقة

السلع دى هاتتباع بـ50% من تمنها مثلا...وممكن نعمل لكل اسرة على حسب درجة احتياجها بطاقة بنسبة الخصم المستحقة يعنى اسرة 50% خصم والتانية ممن 70% او 20% حسب (وده بيراعى التفاوت بين الاسر)

واكيد طبعا هايجلنا تبرعات عينية ومادية .....

حاجة كدة شبه شنط رمضان بس موش ببلاش....بجزء من تمنها ...

وطبعا ...للاسر المحتاجة وبتقنين وضوابط...نخليه تموين شهرى للاسر دى..

مميزات المشروع

وده موش هايخلى الفلوس اللى معانا تخلص من مرة واحدة

هايضمن استمرارية الموضوع بشكل دائم

النفع هايعم على عدد اكبر من الاسر وبكدة الدايرة هاتوسع

الناس موش هاتخد الا اللى هى محتاجاه وبس...لانها بتدفع موش بتاخد ببلاش..

تحقيق العفة للاسر اللى بتنتفع بالمشروع...لانها مابتشحتش..

يمكن تطبيق نفس الفكرة على سلع اخرى ...زى لبس المدارس واحتياجات الدراسة ..البطاطين ...وعلى حسب احتياج المنطقة محل الدراسة

وياسلام لو اسمع منكم اضافات اخرى ...ياريت نشجع بعض...يمكن نلاقى فكرة واحدة بس تساعد شخص..يكون سبب لدخولنا الجنة

[jasmin hamed]

انا موش ضد بناء الماءذن ودى للى يعرف بتتكلف على الاقل 50 الف جنيه للمئذنة الواحدة ...بس كمان الاولى بدل بناء ورفع مئذنتين للمسجد ...ان نسد حاجات المسلمين ...

ده راى انا كمان و الله

مش عايزه اقول ان ساعات بحس ان الى بيبنى جامع خصوصا لو فى شارع فيه جامعيين تلاته بيبقى انانى

حتى فى التفكير فى حساب الحسنات يعنى يقولك لو كل واحد دخل الجامع خدت حسنه شوفى انتى بقى

يعنى بتمن مازنتين ممكن نجوز واحد و نعفه

الاسلام مش فرائض بس ده تطبيق فى المعاملات اليوميه

[الغريب]

موضوعك رائع يا ياسمين وقبل كدة أنا أثرته في موضوع " مصريون في الكويت"

المشكلة في العمل الخيري من وجهة نظري أنه محتاج جهة سيادية تقوم عليه، لأنهم في بلدنا بيخافوا جدا من أي حد بيجمع فلوس كدة لأنهم مش عارفين هتروح فين ولمين..

علشان كدة كان نفسي السفارات المصرية تتبني الكلام ده يعني تخيلي السفارة المصرية في الكويت لو تبنيت مشروعات خيرية زي كفالة أسرة فقيرة يتحول جزة من راتبك ولو 25 دينار شهر لإعاشتهم يعني حوالي 500 جنيه ، سهلة جدا وممكن كمان يعرفوك بالأسرة دي علشان لما تنزل تتابع أحولهم..

الأنشطة في هذه الناحية كبيرة وكثيرة جدا بس أنا ساعات بحس أنها محتاجة جهة سيادية تقوم على تنظيمها..

بصراحة ديما بنبهر من أداء مؤسسة الرسالة في مصر وفي تسويقهم للعمل الخيري بشكل جميل

[jasmin hamed]

السلام عليكم و رحمة الله و بركاته

يعني انا قريت التوبيك و داخلة مطبقة حتة بخمسة .....

غيري العنوان يا جاسمين....شيكو قالت.....بنك الافكار....و هو فعلا كده...

ماعنديش مانع بس مش عارفه اذاى

العمل التطوعي مش بيقف لا عند جامع و لا كنيسة و لا حتي جمعية اهلية او منظمة مجتمع مدني

العمل التطوعي...بيبقي قناعة داخلية من جواكي منين ما تكوني انك مش عايشة لوحدك....و قادرة تحسي بغيرك و احتياجاته.....و قادرة تبذلي الجهد و الوقت و المال علشان توصليله

عارفة يا جاسمين حابة افكر بحاجة....

ناس كتير بتفتكر انها لما بتساعد غيرها ان غيرهم ده هو اللي بينبسط و انتي داخلة عليه شايلة مثلا شنطة رمضان او بطاطين الشتا.....

الحقيقة بقي....انك انتي اللي بتنبسطي...اكتر...بتبصي للسما و تسالي ربنا يا تري رضيت عني يا رب؟؟؟

ده مش محتاج فلوس....و لا محتاج.....نقعد نخطط....محتاج بس نعرف نحس باللي قدامنا و نحط نفسنا مكانه

ايه اللي يدخل الفرحة علي قلب]

نموذج حضرتك و نموذج الاستاذ محمد و امثله كتير محتاجين انها تبقى فى كل بيت

مش شعارات ابتدى بنفسك

اطفال الشوارع العشوئيات االنظافه النطام و و و

مشاكل هتتحل بسلوك الافراد مش الحكومات

ارحموا ترحموا

[jasmin hamed]

موضوعك رائع يا ياسمين وقبل كدة أنا أثرته في موضوع " مصريون في الكويت"

المشكلة في العمل الخيري من وجهة نظري أنه محتاج جهة سيادية تقوم عليه، لأنهم في بلدنا بيخافوا جدا من أي حد بيجمع فلوس كدة لأنهم مش عارفين هتروح فين ولمين..

علشان كدة كان نفسي السفارات المصرية تتبني الكلام ده يعني تخيلي السفارة المصرية في الكويت لو تبنيت مشروعات خيرية زي كفالة أسرة فقيرة يتحول جزة من راتبك ولو 25 دينار شهر لإعاشتهم يعني حوالي 500 جنيه ، سهلة جدا وممكن كمان يعرفوك بالأسرة دي علشان لما تنزل تتابع أحولهم..

الأنشطة في هذه الناحية كبيرة وكثيرة جدا بس أنا ساعات بحس أنها محتاجة جهة سيادية تقوم على تنظيمها..

بصراحة ديما بنبهر من أداء مؤسسة الرسالة في مصر وفي تسويقهم للعمل الخيري بشكل جميل

استاذ غريب هو ده الى انا قصدى عليه احنا فقدنا الامل فى الحكومه يبقى انا و انت ندور فى محيط العيله الجيران و نساعد

فى كل عيله فيها اسره يمكن ماقدرش اكفلها لوحدى اسئل اخويا المساعده و اختى يبقى انا واثق ان الفلوس راحت لليستحق و كمان راعيت صلة الرحم

كل واحد مننا ممكن يبقى رساله على المستوى الصغير قوى بلاش الكفاله

عارف التنصضيف الى الستات بتعمله كل يوم جمعه ليه مش كل ست تقرر مره فى السنه تستغنى عن كل الحاجات الزايده عندها اطباق معالق

حتى افقر البيوت بيبقى عندهم حاجات ذايده عن الحاجه

مبدا طعام الفرد يكفى اثنين

ز ماتقولش لبس الواد الكبير للصغير ربنا هيرزق نطلعه لله و هيبدلنا الى احسن منه و يباركلنا فيه

[sarmar]

بارك الله فيكم اجمعين صراحة يامدام ياسمين احسست اننا فينا خير ليوم الدين ان شاء اللة رغم السواد الحالك التى تمر بها المحروسة الا انك وخذتى كل ضمير فينا

للقيام بعمل وطنى يساعد اهل المحروسة

اذا تسمحوا لى انى احيانا كثيرة الاحظ ان بعض الاسر تحتاج لشراء حقيبة مدرسية لاولادها عند بداية دخول المدارس ما المانع ان نساعد فى مشروع الحقيبة المدرسية مثلا بحيث انها تحتوى على الاقلام والمساحات وادوات الرسم والادوات الهندسية بربع ثمنها مع وضع الضوابط الكفيلة بعدم تهريبها واعادة بيعها تانى بسعر غالى او استبدالها بفلوس حيث انة اصبح عادى جدا ان الكل يتزاحم على الشىء المجانى سواء فى احتياج لة او غير محتاج

ياريت اعرف مشروع قائم والناس القائمين علية مؤتمنون وذو ثقة وانا مستعد انى اذهب اليهم فى مصر اثناء اجازتى وربنا يوفقنى واشارك معهم

واللة يجزاكم جميعا كل خير ( لماضة جاية ومعاها حتة بخمسة ) ايام الجنية الجبس طبعا اسم على مسمى

[اغابي]

اشكرك على الموضوع الجميل يا جاسمين - وفكرته رائعة

العطاء فى حد ذاته صفة جميلة .... مع الوقت بتعلمك صفات تانية زى المحبة ... و التسامح ... والتواضع . . .والرحمة ... .

ارحمو من فى الارض .... يرحمكم من فى السماء . .

اعطى فى الخفاء مفيش شارع او عمارة فى الكويت او السعودية او مصر - مفهوش اسرة فقيرة

فى الكويت اعرف اسرة فقيره جدا - وفى نفس العمارة معايا ست عندها 4 أطفال برضوه فقيرة جدا

وفي بياعين فى الشوارع وفى ناس فى الكويت مش معاها تمن تذكرة السفر ترجع لاهلها ....

لو دورنا حوالينا حنلاقى فيه فقرا كتير ياما - فى كل مكان - لان الفقراء جزء من الكون ولربنا حكمة انه يختبرنا فى قدرتنا على العطاء

مش لازم انا وبساعد حد - ان اعرف الناس - يستحسن يبقي بينى وبين الشخص اللى حاساعده فقط .

مش لازم جمعيات خيرية - لانها دوشة - ونقول ونقول فيها ونبص نلاقى فى الاخر

( اللى بيقول ما بيعملش * * * واللى بيعمل ما بيقولش )

خلينا احسن ( اللى بيعمل ما بيقولش )

نحط جوانا كبداية الفكرة - وبعدين ايدأ انفذ -

كان عندي صاحبتى هنا بتشتغل مدرسة فى الكويت هى اردنية - وكانت بتنزل تدريب فى مدرسة ابتدائي

راحت فى اول يوم رجعت من التدريب مكتئبة جدا ومش مصدقة - وقالتلى تصدقى فيه اولاد نهارده فى الفصل مش معاهم حتى اقلام رصاص - وشنطهم مقطعة وهدوم مبهدلة حتى الشوز بتاعتهم متقطعة - هى همها انهم اطفال فقرا جدا مش مهم الجنسية ايه - نزلت جابت شنط مدارس وكميات اساتيك وبرايات حتى اشترتلهم يونيفورمات جديد - تصدقوا - وكراسات ووزعتها تانى يوم على الاولاد الفقرا - اللى بحكيه داه مش فى مصر انا بتكلم عن الكويت

حتى لو دولة غنية - برضــــــــوه فيــــــــها فقــــــرا

دوروا حواليكم فى كل مكان - حتلاقوا اختبار من ربنا لكل واحد فينا - عاوز يشوف اعمالنا صالحة ولا لاء -

مش لازم نستنى رمضان ولا الصوم الكبير

مش لازم ندورعلى جمعية خيرية

فى كل مكان حوالينا فيه فقرا - ما تعرفوش حد انكم بتسعدوهم - ربنا بس يشوفكم

المحبة فى كل مكان حوالينا - ولكننا . . . . .

لنا اعين و غير مبصرون ...

اغابي

[se_ Elsyed]

إنتو بس أندهوا وقولوا " جزرررررررررررررررر " هاتلاقوني جيت على طول

غيرت لكم العنوان يا بنات ... ووسعوا شويه عشان باستكمل قراءت الدرر اللي بتقولوها .. وهاجيلكو تاني .. وإحتمال أعمل لكم سربرايز في عيد ميلاد الريس في 4 مايو وأثبت الموضوع بالمناسبة الحلوه دي

تشاو

[se_ Elsyed]

بالرغم من إن برنامج " واحد من الناس " يقطع القلب ويخلي الواحد يكتئب ..

إلا إنه بيكشف لنا حاجات صادمه

أنا عن نفسي ...

اتكسفت جداً من نفسي لما صور حلقة عن سكان المقابر اللي بالألاف وأستضاف واحد منهم كان أُمنية حياته بس يبقى عنده 10 الاف جنيه يدفعهم مقدمة شقة ..

تخيلوا ؟

وأتفق معكم تماماً في متعة المشاركة في عمل الخير بالمجهود مش بالمال بس

أصل الموضوع ده سهل إنك تتبرع أو تضع مبلغ في حساب معين بالبنك

إنما المتعة كلها في المشاركة .. وتحس كده كإنك بتزرع وتجني المحصول في نفس الوقت

أفكاركم كلها هايله ...

وبعيده عن تعقيدات حكومية وكلام من ده

بصراحة يعني حتى أعتى حكومات العالم ما تقدرش تعمل كل حاجه بنفسها وتمي ورا كل واحد ..

يعني لو واحد لديه وقت وقدر إنه يساعد أبناء الجيران في المذاكرة لو يومين في الأسبوع ... فده مش مطلوب من الحكومة لإنها مسألة إنسانية في المقام الأول ..

كمان موضوع أولويات عمل الخير دي بتخليني أضرب راسي في الحيط لحد ما يبقى عندي واوا من السفه اللي بأشوفه في حياتنا اليومية ..

يا عم إنت ياللي بتطلع تحج كل سنة بـ 100 ألف جنيه ... حرام عليك وهاتتحاسب على ده ...

الحج مره واحده .. وإنت لو مقتدر يا عم .. المبلغ ده نفسه ممكن يجوز ييجي 10 بنات أحوالهم متوسطة .. يعني جهاز ورفايع وحاجات بعشرة الاف تغرقها .. مش هانقول من الألف إلى الياء .. لكن على الأقل يا عم تجيب لها ثلاجة وغسالة ويمكن مطبخ خشب كويس وشوية مستلزمات مطبخ ..

كمان لو 20 الف وهناك شاب مقبل على الجواز ممكن يبقوا سند له ويعملوا معاه فرق

ويكفي إنك هاتشوف نتاج عملك ده في الحال .. لما تلاقي أسره سعيده قدامك .. بدل ما واحد وواحده يا عيني يتجوزوا ويبقى عليه كمبيالات تقطم وسطه عشان معظم حاجاتهم أشتروها بالتقسيط وفوايد تزيد عن 25 %

وعجبتني قوي قوي قوي فكرة شيكوز دي بتاعت السلع المدعمة في كل منطقة .. وبجد فكره برلنت وهايلة .. وما أسهل إن الواحد يصمم بطاقة صعب تتزور عشان الناس يصرفوا ببها السلع كل فترة وخصوصاً بعد جنون أسعار اللحمه ولافراخ اللي هايخلي طبقات كبيرة من الناس تحلم بس تذوقهم مره في الشهر ..

لكن

لكن

العملية عاوزه أستمرارية بيني وبينكم

ما أعشمش الناس مره وبعدين أتخلى عنهم

[se_ Elsyed]

المرحلة التانية بعيد بقى عن الشعارات والكلام والأفكار اللي زي العسل دي ..

إحنا ممكن بيننا وبين بعض ننتقل إلى أرض الواقع ونعمل ما بيننا الأعمال الخيرية دي ..

يعني نختار حد نثق فيه يكون في مصر ... والمقتدر فينا يدعم بالمال خصوصاً لو مقيم خارج مصر .... ونبدأ ولو حاجه بسيطة كده نشعر فيها بالراحة عشان قدرنا نساعد حد محتاج ...

[shiko]

===عندى ملاحظتين ===

بالنسبة للماضة وجاسمين ..جميلات المنتدى

والاستاذ غريب ....

ملاحظتى الاولى ...

حماسكوا الرهيب ...بجد اشعرنى بشىء من النشوة ...وان الدماء مازالت تسرى بين جنباتى ...

والثانية

كلكم اجمعتم على نشاط جمعية رسالة ....وهى طبعا من رواد العمل التطوعى بمصر ...

اغابى

دايما صاحبة افكار مستنيرة...وكلمات ..ونبضات غير

دايما صاحبة نظرة ثاقبة ...ترى ما لايراه الاخرون ...احييكى ...

موش لازم جمعية ...موش لازم دوشة علشان اعمل خير

بس ده ماينفيش حلاوة العمل الجماعى ....

بالنسبة لسؤال استاذ سارمار ...

انا حاولت للاسف ابعت لحضرتك عنوان ناس اهل ثقة ومؤتمنين ...ودى جمعية انا تطوعت فيها لفترة موش صغيرة ...والحمد لله اتأكدت منهم بنفسى

بس طبعا للاسف ...حضرتك لاغى خاصية استقبال الرسايل ...وخايفة ...احط بيانتهم ...وده يكون مخالف للقواعد او الناس تفتكر انى بلم تبرعات ...

على العموم ...انا بالفعل عملت معاهم مشروع شنطة المدرسة ...وكمان بعنا الزى المدرسى ...بس طبعا باسعار زهيدة ووفقا لضوابط معينة ..ودى كانت من انجح المشاريع اللى شاركت فيها ...

وطبقناه بعد كده على البطاطين فى موسم الشتاء...وبعينا البطانية بخمسة جنيه للاسر قاطنى المراكب النيلية...بحد اقصى بطانيتين لكل اسرة ...وبرضة بضوابط متفق عليها مسبقاً

اللهم اجزهم بالاحسان احسان

[se_ Elsyed]

المشكلة في العمل الخيري من وجهة نظري أنه محتاج جهة سيادية تقوم عليه، لأنهم في بلدنا بيخافوا جدا من أي حد بيجمع فلوس كدة لأنهم مش عارفين هتروح فين ولمين

لا سيادية ولا حاجه يا غريب

هي شنطة رمضان أو ملابس وبطاطين للفقراء محتاجه سيادية وقيادية ؟

وبعدين إحنا ما نزلناس الشارع نلم من الناس

الموضوع وما فيه إن لو الواحد في منطقتة أو بين اصدقاءه بتبقى عملية ثقة بينهم وبالتأكيد ما فيش معاهم حد غريب يشك فيهم إنهم بيجمعوا أموال لأي أغراض وهكذا ..

[sarmar]

اعتقد موضوع المساعدة بمواد غذائية ممكن تجيب مشاكل وانت هدفك خير تلاقى اللى نط لك وقالك بطاقة ضربية وبطاقة صحية وبطاقة فئوية ومليون بطاقة حتى لو كانت المواد عبارة عن حبوب والاستمرارية كما تقولون يتطلب موقع ثابت ومعلوم الناس تيجى لعندة

تعرفوا الافكار الخير كويسة بس احيانا بتتقلب على صاحبها من اى جهبز يطلع فى نافوخة فوكيرة تلاقى نفسك شايل قضية بالراحة من غير ماتحس

عايز اعمل خير بدون ارهاصات ونقاشات ومشاكل انتو عارفين بلدنا اكثر مننى اد اية الجدل فيها حتى ع الصلاة وطريقة تاديتها

[se_ Elsyed]

اعتقد موضوع المساعدة بمواد غذائية ممكن تجيب مشاكل وانت هدفك خير تلاقى اللى نط لك وقالك بطاقة ضربية وبطاقة صحية وبطاقة فئوية ومليون بطاقة حتى لو كانت المواد عبارة عن حبوب والاستمرارية كما تقولون يتطلب موقع ثابت ومعلوم الناس تيجى لعندة

تعرفوا الافكار الخير كويسة بس احيانا بتتقلب على صاحبها من اى جهبز يطلع فى نافوخة فوكيرة تلاقى نفسك شايل قضية بالراحة من غير ماتحس

عايز اعمل خير بدون ارهاصات ونقاشات ومشاكل انتو عارفين بلدنا اكثر مننى اد اية الجدل فيها حتى ع الصلاة وطريقة تاديتها

لأ اسمح لي

هاتلي مثل حد عمل خير ووزع مساعدات عينيه وحصل له مشاكل وبطاقة ضريبية وكلام من ده

ومش لازم أفتح محل عشان أوزع فيه مساعدات يا عم سارمر ..

لكن ممكن الواحد يعمل حصر للناس المحتاجه مساعدات ويوصل لهم لحد البيت كمان ...

[sarmar]

ياستاذى انا معاك وعلشان انت بتقول ماحصلش حاجة ولا مشاكل من اللى انا قولت عليها لان معظم الاحوال تتم موسمية يعنى فى الغالب شهر رمضان لكن لما بتكون بصفة الاستمرارية ربما تكون الامور مختلفة على العموم زى ماقالت الاستاذة شيكو اهم شىء الادارة السليمة للمشروع وصدق النية ونتوكل على اللة