سلامة مرراتك

[ابو محمود]

اثناء تصفحى للنت قبل الدخول هنا وكنت بريح نفسى من المواضيع ال مليانة شد وجذب ايشي مسيحى وايشى نصرانى وايشى سلفى وايشى علمانى ورزع فى حلل وتخبيط فى صوانى

وقع نظرى يا أعزائى على تلك القصيدة اللى تخفف المرارة اللى تفقعت

قصيدة مرارتك يا ريس لشاعر كويس ومش كبير طالع زي كتير من شبابنا وبينقص عمرة أول ما يظهرلة طول

يلا بينا ............................................................................

سلامة مرارتك

يا فاقع مرارة مراة الفقير

فلا جوزها جايب

ولا الفقر تايب

ولا حتي سايب

مَيَّة في قُلة

ولا كوز في زير

سلامة مرارتك

سلامة مرارتك

مرارة العُـزاز

وإيه يعني إحنا

ما نِوْلع بجاز

إنتَ الحقيقة وإحنا المجاز

تفضلْ وييجي بدالنا البديل

شوية خباثة

وعوامل وراثة

نصبح بهايم … ونصبح بديل

فتقدر ساعتها تنام مَلو عينك

ويعلى الشخير

سلامة مرارتك

سلامة مرارتك

سلامة المرارة

يا واقع علينا بسعر الخسارة

فلا فيه صناعة

ولا فيه تجارة

ولا فيه مدير

ولا فيه إدارة

ولا فيه وزارة تسيب الوزير

سلامة مرارتك

***

سلامة مرارتك

فداها المواطن

أبو قلب راطن كلام الهموم

فلا نفس راضية

ولا جتة فاضية

بلاوي وسموم

ولا علاج مداوي

مفيش غير حكاوي

بتاخد بإيدنا لآخر المصير

سلامة مرارتك

***

سلامة مرارتك

وألفين سلامة

يا سايب في كل المنازل علامة

مجاعة … أنين … كآبة … ندامة

جهل وبطالة وعوالة وعيا

وفنون رخيصة وقِلِّة حيا

وهموم بتكتر … وهموم تزيد

إنت في زيادة همومنا خبير

سلامة مرارتك

سلامة مرارتك يا ابو القد فارع

يا مالي عنينا بزبالة الشوارع

أمال بندفع ضرايب لمين

شمالك بتاخد …

وواخدة اليمين

شكلك بتحلف علينا اليمين

ما تجعل في جيبنا قليل أو كتير

سلامة مرارتك

سلامة مرارتك

دي واخدة الحصانة

بنشقى وتاكل علينا شقانا

لا خلِّيت أمامنا ولا فيه ورانا

ضرايب … عوايد … فاتورة … رسوم

ننام بالفاتورة

وبيها نقوم

على البصَّة ندفع فاتورة لعِنينا

ولو نعمى ندفع فاتورة ضرير

سلامة مرارتك

سلامة مرارتك يا صاحب الهمم

بخطبة بنطلع لأعلى قمم

وننزل على جدورنا بين الرمم

على الوهم ياما وياما بنينا

أوامر تجيبنا

أوامر تجينا

على خطوة واحدة في محلك نسير

سلامة مرارتك

سلامة مرارتك

إحنا فداها

تفرقع مرارتك

نفرقع وراها

حالنا بدونك عمره ما ماشي

إحنا بدونك شوية مواشي

من غير راعيها … ومن غير كبير

سلامة مرارتك

للشاعر ابو زيد بيومى

[عبدالخالق ابوزينه]

وان كان الكلام زجلى ومعبر , فوقته ابدا مش وقت المرض

وحتى ان كان الامر اتفرض , وحتى ان كل الشعب اعترض

برضه دا مرض

ومهم ان كان الحمل علينا وجاب لينا رضوض . رض فـ رض

برده ماننسا انه رئيسنا بس المهم ما يجى اللى بعده علشان يعض

ونقوله يا ريس الف سلامه دا حنا لسه شعبك اللى ليك سند